Cabin Minic

CABIN MINIC!

JH Davis Tlangthan,

Ainak Vengpui.

Break lai a ni a. Dictionary biha ka ṭhut reng laiin ka bulah a lo ding a, "Nang hi Tiffin i pai ve ngai lo e mi? Thil ei turin i chhuak ngai bawk si lo va, i rilṭam ve thei lo e mi?" mi lo ti a.

Chu chu Miriam Lalduhsaki min biakna hmasa ber a ni. Chutia beisei lo lutuk maia a ni anga hmelṭha, a ruka ka lo melh fo ṭhin hmeichhiain mi han be ta mai chu ka zamin, ka hamhaih nasa mai a, ka lai em bawk avanga ṭul miah lova ka Bag zen rawk rawk chungin aw lawi deuhin, "A, ei ve e, aw ka ei tawh a lawm, Chaw ei sa in ka lo kal a," tiin bah nuaiin ka chhang ta khan ka hria. "Keini pawh Breakfast ei sa thovin lawm kan lo kal ve. Lunch ei a hun tawh a lawm," a tih phei kha chu ka 'UM, E ' vel ta mai maiin ka hria.

Motor Chetsualnaah chuan ka nu leh pa chu vanduai berah ṭangin an fapa neihchhun chu min liamsan ta. School kal tawh loh mai ka duh a. Ka pate'n, " Thanpui, in ti lungngai mah ta che. I nu leh pa an awm tawh loh vang maiin i khawvel a tawp ta tihna a ni reng reng hleinem. Hei, kei i patea leh i nutei kan la awm a lawm. I pa kha Zirna ngai pawimawh tak a ni a, a tan tal i zir zawm tur a ni. Chuan, Pawl 7 ṭha taka i pass phawt chuan High School chu Aizawl ah i kal dawn nia, " tiin min fuih mawlh mawlh reng a. Thatho vaklo chung chuan pawlsarih chu ka kal zawm veleh mai a.

Kan vawk man Rs 15,000 chu a bang awm lova paiin Zirna sang zawk zir zawm turin Zawlkhawpui lamah ka herliam a.

"Khawnge i nu leh pa emaw, lo kalpui tu che?" tia Principal-in min zawhna chu keimaha kal ka nih thu ka hrilh a. Chutia mi dang hruai lova Admission ka lo buaipui chu min lawm em em a, ka mark sheet a hmuh phei chuan a lawm hle nghe nghe a ni. Ka chanchin a hriat chuan min khawngaih em em a, a School ah chuan min ziaklut nghalin Admission pawh min free nghe nghe.

Tunah chuan Principal-in min zawn hmuhsak, mi inhnuai ah ka bungrua tlem te nen ka invawm lut tawh a. Principal ṭhianpa te Daily News Paper ka sem ṭanna pawh zingthum liam ta kha a ni.

Kan Class lo luhna lam atangin, " MAY I COME IN MISS ? ' tih aw a lo awm a. Aw lo chhuahna lam ka hawiphei ve chu ka inchhir lo kher mai. A chhan chu nidanga ka la hmuh fo tur mah ni se, a nung chunga ka hmeichhe hmuh tawh a zawnga hmelṭha ber mai, MIRIAM. LALDUHSAKI ka hmuh hmasak ber ṭum a ni tlat. Chu zirlai lo lut chu tituai nalh tak, kum 16 vel hmelpu, Pathianin a bik taka a duan emaw tih tur khawpa hmelṭha a ni a. A hmelthatzia chu keia ṭawngkam hian a sawichhuak zo lova, Mizote William Shakespear tihtur khawpa thuthiam, Pu Mafaa Hauhnar hian he Chhelotei hi hmuin belchiang ve se a ṭhatzia a sawichhuak zo berin ka ring. Mipa ni ve ta chu bialnu emaw nupui tur hmeichhe hmelṭha ngaihtuah chang a awm lo thei lova, chuti ang hunah pawh chuan TV-a kan hmuh Film Stars anga hmelṭha chu ka mitthla vawng vawng mai ṭhin. Ka tette atanga hmeichhe hmelṭha ka duh chi, ka kawppui tur atana ka lo dream ṭhin te chu Miriami chuan a dah NIL chiang hlawm hle. Kan School Uniform te chu a tana siam bik emaw tih mai tur khawpin mi dang zawng aiin a mawi pui bik a ni. A bula va kal a va enchian kher loh paw'n a fai sar tih a hriat a. Heti ang em em hmelṭha hi Mizonu chhul atangin a chhuak thei a ni maw, nge ram dang mi heta lo zir ve tur zawk ? A nalh dan leh hmelthat zia enin, Star Plus emaw Star Gold Channel a lang ṭhin ni lovin, ARIRANG Channel vela lang ṭhin niawma mawi a ni mah zawk a, tute emaw chuan a Mongolian hmelthat tiin an sawi anga, chu chu ka ngaihdan a ni ve ngei ang.

Chhuata ka awngphah, Vanglaini phek 5 lung chunga phah nen danglamna tam miah loh tur khawpa ruh chunga mu chung chuan Miriami'n rinloh deuh maia thil ka ei ngailo tih a lo hria mai chu mak ka ti a. Min lo chik viau ṭhin ni ten ka'n ring nghal ngawt a. Chaw pai lova, thil ei tura ka chhuah ngailoh bawk chu eng emaw tak hian fuh dawn tlat a hriatna ka nei thar vel bawk a. Miriami biak thlakhlelh avang chuan Tiffin pai lova thil ei tura chhuah loh pawh chu ka chhunzawm zel tur a ni tiin thutlukna ropui ka siam nghal a.

Ka Tiffin pailoh leh thil ei tura ka chhuah ngailoh chuan rah a chhuah lem hlei lo va. Mahse, Miriami erawh a la hmelṭha tho ! Mi dang hriat miah loh hian ka lo melh leh vawng vawng mai ṭhin a. Ani'n min melh ngai erawh ka hre ngailo thung.

Tukkhat ka Chanchinbu sem chu, nu pakhat Chawhmeh zuar niawm hian, "Mama, kha chanchin i sem elaw? I va fel ve. Kan laksak ve thei che angem?" tiin min zawt a. A theih thua ka chhan hnuin an in min kawhmuh a, a tukzing aṭanga pe tan tura kan inbiak fel hnuin kan in kalsan a.

Tuk dang ang bawkin Chanchinbu semin ka tlankual leh a, Chawhmehzuarnu te in chu ka thleng a, 'CHANCHINBU' tia kawngkhar tlem inhawnga Chanchinbu ka va thehphei chuan inchhungah chuan tu emaw ka hmu tlat. Kal leh mai ka tum chu tawpin ka hawilet leh ngat a. Ka piantirh ata ka hmeichhe hmuh tawh azawnga hmelṭha ka tih ber mai, MIRIAMI a ni. A va mak em ! Keimah chauh mak ka tilo niin a lang, ani pawh Dawhkana lehkha zir mek niawma ṭhu kha, hmuh thianglo hmu ta ang maiin min lo en kuau a. Minute khat dawn ti chuan kan in en tawp mai a. Minute khat dawn engmah sawi lova ka en chhung chuan hengte hi ka hmuchhuak thar hram bawk a. School Uniform kha a lo mawipui ber awzawng lo. Kekawrbul dum leh T-shirt var a mawipui leh zual. Uniform kawr bantlawnin a khuh chin a Ban leh, School Mawzain a khuh chin a chawn vel a ngo hle tih te chu ka hmuchhuak thar a. A hmelṭha hrim hrim a engkim a lo inhmeh a ni ber. Nakin deuh ah, "Kan lawm e aw," a lo ti hram a. A aw te hlei hlei chu Vantirhkoh aw ianga mawi ni mai ten ka hre hial. Kan kohhran upa pu Vuat-an Vantirhkohte aw chu a mawi a ti tlat a lawm. A lawmthu sawina chu, "AW" tia chhân pahin hmun danga sem lehzel turin ka tlansan ve nghal mai a.

Chutia ka Chanchinbu sem lalute zinga Miriami te an lo tel ve ta mai chuan eng emaw tak hian min ti phurin, min ti thatho thar a. A chhungah Hmelthate-i a chen ve tlat avangin in tha lo tak, hlui lam tawh Miriami te in chu Aizawl pa hausate Building sang leh ropui tak te aiin nalh ka tiin ropui ka ti thar nghal a. Zinga lehkha a chhiar avang chuan Miriami tak pawh chu a pangchan hmel aiin a taima ka ti a ka ngaisang bawk. Heng te hi ka rilru ah a lo lang bawk, ' Miriami te hi an hausa vaklo a ni ang. Kha chawhmehzuari kha a nu a ni ngei bawk ang maw ! Chuan, inah khan amah chauh ka hmu a, khawnge a nu leh pa, a unau ? Anu chawhmeh zuarin a chhuak a ni ang, mi dang an la mu a niang. An in chhe deuh mahse Sum an nei zek mai thei, a chhan chu Miriami inchei dan thin aṭang khan an hausak hmel si. An hausak hmel nge a inchei fai hrim hrim a ka hmu hausa zawk ka hrelo.

Chumi ni chuan mi dang an la thleng lo va. Ka ṭhutnaa ṭhu a Dictionary ka bih reng lai chuan rin loh lutuk maiin, Miriami lo thleng chiah chuan a ṭhutna lam pan pahin nui sang chungin, " Uii,rilṭam thei lova chu ka thlen khalh ve tawh ang chu ka tia min thlen khalh leh ta tho mai. Motor jam nasa lutuk vang mawle, " a ti a. Ka hawikual vel a, mi dang ka hmu lo. " Keimah maw ? " ka ti a. Min en lem lo chuan, " Aw, nang kha. I va thleng hma thei em em ve, zingah Chanchinbu i sem bawk a, " a ṭawng lai chu a hnung lam aṭang chuan ka en reng a, a va duhawm tehlul em! A hnunglam aṭang ringawt pawn a tuipuiral ṭawng takin, a ' SPECIAL ' thlawt a lawm. "Nia, Chanchinbu ka sem zo, in ka thleng ka inbual nghal a, zana ka chhum sa chaw ka ei a ka lo kal nghal mai zel a lawm,"

Ka sawi zo chiah chu lo hawilet ngatin, "Chawṭhing i ei ṭhin maw?" tiin min zawt nghal a."Chawṭhing chu ni chiah lo ve, zanah ka chhum lawk mai a lawm," tiin amah en tawh lem lovin ka chhang a. A hmaieng ka en ngamlo a ni! Keimah lam min la en reng chung chuan, "Nizana mi chu Chawṭhing a nih reng chu," a lo la ti hram. Chutih lai chuan mi dang an lo thleng ve nual tawh a. Ka chhan ve leh hmain mi dang lo thleng ten an biak avangin a hawilet ta daih a, Chawṭhing a nih lohzia pawh chu ka sawifiah ta lem lo.

.

Miriami mi kohna (?) 'Riltam ve thei lova' tih chu ka ngaihtuah let a, nalh tehchiam lo mahse ka lawm a, ka nuih a tiza hle bawk! Ani anga hmelṭhain ka hming a phuah a nih chuan duh leh, 'Tututa, Linglinga, Murara etc ' pawh ni rawh sek sek, ka AMEN vek mai ang ! Tin, min thlen khalh a lo tum ṭhin hle tih ka hriat phei chuan a ruk takin Hmelthate-i hian min 'vei' hle ah ka'n ngai hmanhmawh bawk a. Class ṭan hma hauha chuti ang Ṭawngkam leh ka Hming nalh loh zet Miriami ka atanga ka hriat avang ngawt chuan chumi ni kan class lak ah reng reng chuan ka hlim ru hle a. A ruka min lo chik tlattu chu awm se, khami ni a ka hmelah khan 'Pachhiate Sa hmeh tuk hmel' a hmuh ngei ka ring In ka thleng a, eng dang rilru ah a lang theilo, ' Riltam ve thei lova ' leh a phuahtu, mengmawitei bawkin ka rilru an luah leh a. Miriami'n man chawi lova a luah mek Rilru neitupa, keiin mi inhnuai Rs 500 pm in ka luah ve thung a.

Tlaikhat chu Principal hian, "Concrete Ban khur laih tur ka hmelhriatten an nei a, i lai peih angem ? Ft khatah Rs 500-600 vel zel a nia, Ft 5-6 vel veka laih tur a nia. Khur khatah Rs 3000-4000 vel i hlawh thei dawn a ni, " Sir, ka lawm takmeuh a ni, ka peih lutuk, naktuk atangin ka lai tan nghal thei angem ? " tiin lawmthu sawi pahin a tuk atanga laih nghal theih a nih leh nihloh thu ka zawt nghal a. " A ṭhat chu. Aw, naktuk atangin a laih tan nghal theih ka ring, ka lo zawt chiang ang. Mahse i zirnain a chhiatphah tur a ni lovang,"

 "Yes Sir"

Tichuan, inrinni leh School off apiangin ban khur chu ka lai ta thin a. Zanah lehkha ka chhiar a, zingah Chanchinbu semin Class kan ban hma deuhin tlaiah ban khur ka lai leh ṭhin.

Ṭumkhat School aṭanga ka haw tur chu ruah a sur nasa em em a, " Hey, Riltam thei ve lova, min lo nghak, i nihlip min lo zawn ve, " tih aw School lam atanga lo chhuak ka hria a. Tunge a ni tih mi dang zawh kher ka ngai lo, Miriami ngei a ni. " Ka nu a lo haw tlai dawn a, keiman rawng ka bawl a ngai, ka haw hma a ngai. Ruah a sur ka ring lova nihliap pawh ka lo pai lo, " tiin a ṭawng nghal mawlh mawlh a.

Tichuan, insi rialin kan kal dun chu a ni ta mai. A rim te hlei hlei chu ka tribal hnar nalh lem lo takin rim a hriat tawh a zawnga rimtui berah an chang nghal a. Ka rilruin ruah surtir tu chunglam roreltu hnenah lawmthu ka han thawn nghal mawlh mawlh a.

Minute nga vel engmah sawi lova insi riala kan kal hnu chuan Bus Stand kan thleng chu a ni ta mai a. Bus Stand chu hnai hi ka ti thar em em a. Bus nghakin kan ding ta ran mai a. Bus chu a lo kal ṭhin tak nain ruah a sur vang nge, han chuan ve chakawm loh khawpin an khat a ni ta zel mai si. Rilruah ruah a sur nasa emai Ban khur laih pawh a tihchi lovang, thlen hma a ngailo, Kein kal mai teh ang, Sum save a ni nghal mai, tih ka ngaihtuah a. Ka piah deuhva ding reng Chhelote-i lam chu hawiin, " Mimi, Bus an khat theih sia kein ka haw zawk mai dawn," tih leh nihliap parha kal ka rual nghal a. " Ka lo kal ve dawn min nghak rawh, " tiin a lo kal veleh nghal a. A lawm a ka lawmzia mai kha ! Ka bula kal chu nuam a ti ve ni ten ka hre thar nghal a. Rilruin, ' Bus chuang khat tlattute chu an vaiin lawmthu ka hrilh mawlh mawlh hlawm a. " Nang hi i ṭawng khât e, " a lo ti sap a. Ṭawng tam loh chhan zawhna hi a zawhna dawngtu tan hian chhan a lo har thin khawp a, " Khât vak a mi ? " tiin ka chhang ta khan ka hria. Engtin maha mi chhang ta lem lovin a ngawi ta vang vang mai a. Mipa zawk ka ni a, ka ngawichawi lutuk avang chuan a ti ngawichawi ve in ka hria a, eng emaw tak sawitur ka ngaihtuah a ngai. "I nu chu khawiah nge a kal?" tih ka zawt a. " A patea te loah a feh a, tlaiah a lo haw chauh ang," tiin min chhang a. " Nih chu, ti daih ila in inah mi dang ka hmuh awm ka la hre miah lova, " tih ka zawt ta phawng mai a. "Ánu chawhmeh zuarin a chhuak daih zel a lawm. Ápa a thi tawh a, " tiin zawi sapin mi chhang a. A thusawi chuan min ṭhawngin ka khawngaih em em bawk a. "A lo nih chu mawle," tih chauhvin ka chhang thei.

Miriami te in ka thlen dawn chuan ka Sam ka'n tuai ṭha te te a. " Chanchinbu " tiin kawngkhar tlem lo inhawng ah chuan Chanchinbu chu ka rawlhlut a. Miriami aw ngei mai chuan, " Kan lawm e, thingpui lo in la, " a lo ti ta mai. Ka beisei lo thil a nih vang nge, chhang ta lem lo chuan ka tlan tum dan posi ngai ngai chuan ka ding ta reng a. Kawngkhar chu a lo in hawng a, "I lo in dawn em?" min lo ti a. "Ka tlai palh ang, naktuk ah ka lo in zawk mai ang, " tih leh tlan ka rual nghal a. Min en reng tih ka hre bawk a, ka in la tlanchak mai mai khawp a ! Min en renga hriatna ka neih tlat avang chuan hnung za chuai chuai khawpa chakin ka tlanin ka hria. Rilru ah, 'Naktukah Chhelote-i te Thingpui ka in dawn," tia khi vur chungin ka tlan a ni.

L.A khawpuia Restaurant changkang ber pawl, Howlin' Ray's-a chawlhtur ang hrimin Miriami te ina thingpui ka in tur chu ka zan mutna ah ka ngaihtuah lawk a. Ka phur em em a. A tukzing ka chanchinbu sem tur chu ka hak khat deuh T-shirt ha turin rilru ka siam a. Chanchinbu sem tur mah ni ila, Mission ropui (Miriam te inchhunga thingpui in chu) tih tur ka neih bawk avangin Chawlhni chauha ka hman phal, ka Gel ka inhnawih bawk ang.

Zing dar 4:30 ah ka Alarm kam chuan min tiharh a. Ka inphih fai nghal mawlh mawlh a, ka Sam tuai huhin ka darthlalang hman thiam, Zawng hmaitiat leka liana inen chungin ka hmelthatna thuruk ṭhin, a chang chauha ka hman phal, FAIR & LOVELY ngei mai chu ka thingtlang hmel chhuanawm loh zetah chuan ka'n chul mam a. Ka Samah chuan Gel ka hnawih bawk a. Chanchinbu sem tur leh a kar laka Chhelote-i te run a Thingpui in bawk tur chuan ka phe chhuak ta.

Chhelote-i lawina in chu ka thleng ta. An kawt ah ka ding ta ran mai. Thingpui in turin min sawm nawn leh kher lo se engtin nge niang ? Thingpui chuuuu, ka ti tawp dawn nge ? Nimina min sawm khan vawiina ka in zawk tur hi ka sawi tawh tho a, mahse a theihnghilh ve theih tho a. Ka rilru a buai ta map mai ! A pawi lo, muang banin Chanchinbu tiin áwngah ka thehlut ang, a hriatchhuah a min sawm leh ka in anga, min sawm lo a nih paw'n nidang a ni mai. 'CHANCHINBU' tiin kawngkhar tlem inhawngah chuan ka ken lai chanchinbu chu ka rawlhlut a. " E, tukin chu i lo va thleng hma ve, lo lut rawh, ka tho chiah a, thingpui pawh ka la chhuang lum hleinem, lo nghak lawk rawh, ka tilum vat ange, kha tah khan thu rawh. Tui i in hmasa duh em ? " tiin ṭhutna min kawhhmuh pahin min lo be siam siam a. Ka tui a hal loh thuin ka chhang a. Ni e, henu te Thingpui in vat ka châk avang hian nidanga 5:20 am vela tho thin kha 4:30 am ah ka tho reng a nih kha.

Engmah sawi lovin a che vel chu ka thlir reng a, a va ṬHA famkim chiang em ! A tho phâng hmel ringawt pawh ṭha tak a ni. Chutia ngawi renga ka en reng lai chuan ka lam lo hawiin nuisang chungin, " I ṭawng tlem e, " a lo ti ngawt a. Ka en rengna ata ka mit la sawn vatin, "Sawi tur a vâng e lawm. I nu a va chhuak hma awm ve," ka ti ve hram a. Sawitur a vâng tih lam ka sawi chu min chhang ta lem lovin, "Nia, a thuṭpuina a hla sia a kal hma ṭhin lutuk. A kal dawnin lehkha zir turin min kaitho thin a, mahse zing thawh hi ka harsat lutuk a, (a nui bawk a) a kal aṭanga darkar khat dawn awm velah ka tho chauh thin. Ka in atana a lo lum sa thingpui pawh a lo dai hman ṭhin, " tiin a sawi a. Thingpui no hnih lo chawi chungin ka thutna lam chu lo panin, " In ṭeuh rawh aw, i lo in ve tur thu hi anu ka hrilh a, a lum teuh a nia."

Engtin maha chhang lem lo chuan a thingpui min pek chu ka la a. Ka hma ah Stool a lo hung bawk a, Thingpui no pakhat zawk chu Stool chungah chuan a dah a. Kil khata Fridge awmna lam panin Bowl pakhat, a chhunga Biscuit 'Good Day' awm a lo keng phei a. " Ei ṭeuh rawh aw, " a lo ti bawk a.

.

Chhelote-i Thingpui min pek chu ka in ṭan ta, a va tui em! "In engzah vel nge i sem, a hahthlak viau ṭhin lo maw?" tiin Stool a no pakhat zawk chu lain ka ṭhutna Long chair hmawr lamah daih chuan a va ṭhu a. A thu hla kan ti mai mai khawp a. Mahse, Miriami nen Long chair pakhat chunga ṭhua thingpui kan dawm dun pawh chu chawimawina ah ka ngailo phal chuang lo. "Hahthlak love, Copy 89 ka sem a," tiin a zawhna chu ka chhang a. "I fel hle mai, nangmaha i mamawh i intum thei hi i fel ka ti. I nu leh pa eng nge an thawh a?" 

"Fel vang pawh a ni hleimem. Ka nu leh pa te chu engmah an thawk lo. Ka tlai palh ange ka kal nghal mai, ka lawm lutuk," 

"Awle, keipawh le. E, i kal hmasa leh awm sia, pĕngah khan min lo nghak la, kal rual ila , " a ti a.

.

"Min nghak rei em? Lawk, chawl deuh rih ang, a la hma tho, min nghah rei ka hlau a, ka lo hmanhmawh lutuk a, ka chau lutuk, " tiin a thaw hluam hluam a. Chhang lem lovin ka lo thlir reng a. " Tinge tikhan min en reng a ? " a lo ti a. "Reilo ve, ka thleng ve chiah a lawm. Awle, ding lawk ang," tiin ka dinpui rih a.

.

Chutia Mimii nen kan innel viau hnu chuan nuam lo tihna tlem ka nei ṭhin. "Riltam ve thei lova, lo kal rawh, chaw lo ei ve rawh," tia Break laia a Tiffin ei ve tura min sawm ziah chu a ni. Ka eipui ngai lem lo. Mi dang ka hmaizah vang leh a chawpai reng reng chu mi pahnih ei atan tlem ka ti em a ni ! Ka chaw lak ṭhatzia a hre lo mai mai a lawm. Ka chawlak thatzia hria se min sawm hauh lovang. Zana ka chhum sa, Vawkpui tlaikhat ei zet tura tam School ka kal hmain ka ei phawt zel a, chu chu ka nilenpui ṭhin. Tiffin pai ka ngai lo.

Miriami nen chuan kan inkawm nasa hle a, ka zing chanchinbu sem pawh an inah thingpui ka in zing ta hle. School kan kal dun a, kan haw dun ziah bawk. Inkawm zinga ta na na chu tunhmaa ka zah ang em kha chuan ka zah tawh lo va, a hmelṭhatna hmang chuan ka fiam ngam ve zeuh zeuh tawh a, a hma ang em emin zahlo mah ila ka ngainep ta tihna erawh a ni lo.

A pa thlan chungah chuan kan ṭhu a, "I ngai ṭhin ngawt ang tiraw?" ka ti a. Min chhang lo va, a hmelah chuan lungngaihna a lang a. A hnu deuh ah chuan, "Ka ngai thin lutuk a sin, " ṭah áw titihin a sawi a. Ka va en a, a mitah mittui a hnam tih ka va hmu a, ka khawngaih hle. Nu leh pa chán tawh ka ni a, a dinhmun tur chu ka hrethiam a ni. Tun hi a pa tel lova an Chrismas vawithum hmanna a ni. A lungngaihna mood a ta chu hruaichhuah ka tum a, mahse eng nge ka sawi ang, ? " Mimi, i pa hian unau dang a nei em ? " ka ti a. A mittui tling pam chu zawitein a hru phawt a. " Nau mipa pakhat a nei. Zarkawtah khian an awm a, min enkawltu ber a nia," Sawi zel tur ka va van thin em. Masi ni a ni a, midang thlan tlawh lo kal an lo kal ve a. Chu midang thawm ka hriat chuan ka ṭhiannu, a pa ngaia lungngai em em, a lungngaihna ka tawmpuina mood ata chu min hruaichhuak hian ka hria a, ka thaw a veng huai a ni.

Kumthar kan chuangkai a, School pawh kan tan leh tawh. Thla khat hnuah final exam kan nei dawn nghe nghe. Miriami nen kan la inkawm reng a, School kan la kal rualin kan la haw rual ziah bawk.

Final exam kan zo tawh a, khua lama haw mai lovin nitin hna hrang hrangah ka inhlawh a. Aizawl ka awmtira building pakhat bankhur ka laihna hlawh ka lak khan keima pualin Bank ah a/c ka hawng ve a, hun remchang ka neiin ka sum hmuhte chu ka nitin mamawh tur tlem tihloh a bang awm lovin chu ka a/c ah chuan ka dahlut thin a ni.

Result a chhuak a, first div ah ka pass a, kan Class ah pahnihna ka ni. Pakhatna chu tha famkimi Miriami a ni.

High School Sport a awm dawn a, chumi atana inpuachah nan nitin deuthaw kan School Playground ah item hrang hrang kan practice nasa thin hle. Ka tui ve na lam, Football Team ah kan School aiawhin thlan ve ka ni a. Kar hnih vel kan practice hnu chuan Aizawl dist chhung a School hrang hrang atangin zirlai tam tak lammualah kan pungkhawm a. Tournament chhung zawngin match 6 atangin goal 13 khungin Topscorer lawmman ka dawng a, Best Player a thlan ka ni bawk. Chutia School a ngawi chawi tak ni thin, Aizawl Dist chhunga zirlai tam tak zinga Football thiam ber leh pet goal tam ber lawmman ka dawng ta mai chu kan School a zirlai tam tak te chuan mak an ti hle a. A ṭhen phei chuan min ngaisang tan hle a. A nihna takah chuan lehkha zirin Aizawlah keimahin ka awm a, ka dinhmun a chhiat avangin hunawlah ka inhlawh reng a ngai a, ka inkhel hman lo mai a ni. Khuaa ka awmlai chuan Football ka tuiin tlaitin ka inkhel ziah a lawm. Real Madrid a min khelhtir turin Pathian hnenah ka tawngtai ṭhin bawk a ni! Inhlawhin inkhel hman lo mah ila, zingtin Chanchinbu semin km enge maw zat ka tlan reng a, ka fitness erawh a ṭha em em reng a ni.

Sport theih viau a ka lan avang chuan mipa mai nilo, hmeichhia thlengin min be chhelo kan school ah chuan an awm thar ta nual a. Chung zingah chuan Class X a mi, Estheri a tel ve a. Estheri hi kan School a hmelṭha pawla sawi a ni ve a, a pian a nalhin zomi hmeichhe pian atan chuan a pian a mawi mah mah em aw tih tur khawpin a sakruang a invuah mawi a. An khawsak pawh vantlang chunglam a ni anga sawi a ni. A inchei dan atang rengin michhe fa a nilo tih a hriat a, ṭhian kawm a thiamin ṭhian pawh a ngah hle. Hmeichhia zawkin min biak ṭhat a min kawmnel ta na na va biak chhiat thu va awm suh, keipaw'n Esi chu a fel ka tiin, kei ang michhe fa min kawm duh tlat chu mak ka tiin ka lawm hle nghe nghe a ni. Break lai te hian dawrah ka duhloh chungin min kalpui a, thil tuihnai tak tak, ka pawisa paia ka ei ve phak ngailoh tur te hi min ei pui fo mai a, inthlahrungin nuam lo ti viau thin mah ila Class-a ṭhut mai maia midang thil ei chhung zawng ṭhahnem ngaih vang pawh ni lova Dictionary lo bih mai mai ṭhin ai ngawt chuan nuam ka tiin manhla ka ti thin hle.

Chung Esi nen kan inzui ṭan atang chuan Miriami nen chuan School lamah kan kalho ngai ta lova, kan haw tlang ngai ta hek lo. Eng emaw chhuanlam siamin ka haw hma emaw, ka haw hnuah amahin a haw a, kan innghahna thin pengah min nghak ngai ta hek lo. A hmelah a hmaa Miriami, hmeichhe hlimthei tak ni thin kha hlimna ka hmu tawh lo va, a hmelah chuan eng emaw lungawilohna hmuin ka inhria a, ka biak reng rengin min be chhe chuang lova, mahse a hmaa zawhna ngah tak ni thin kha a rul tawk lekin ka zawhnate a chhang ta thin a ni. A hmaa hlim taka thingpui inho ṭhin kha keimahin ka in ta ṭhin a. " I in ve dawn lo mi ? " tia ka zawhin a in tawh thu emaw, a in chakloh thuin min chhang ta thin. Chutianga Miriami hlim hmel ka hmu ta mang lo chu hrehawm ka ti hle a.

Tukkhat chu hma takah School kal turin ka insiam zo tawh a. Miriami'n peng, kan innghahna ṭhin a thlen hma ngeia thlen khalh a lo nghah ka tum a ni. Kan innghahna thin penga thutna awmah chuan ka ṭhiani chu ka lo nghak ta ran maia. Minute 10 vel ka nghah hnu chuan Miriami chu a lo thleng a. Ka lo en reng a. A hmelah chuan ka lakah a lawm lo tih a hriat hle. A hma kha chuan ka lo nghah reng min hmuhin, " Ui, i hma thei e, min nghak rei tawh em ? " tiin min lo be vat thin kha a ni a, tunah erawh ka lo thu reng min hmuhin a ding deuh a, min be lova, min en nawn miah lovin kaltlang mai a tum. "Mimi, Mimi" tiin ka ko va, hre awm pawhin a lang lo. Ka va tlan a, a banah manin, " Eng nge ka lakah lungawilohna i neih ? " tiin hrawk titihin aw vin deuhin ka zawt a. Engmah sawi lovin min kuah tawp a. Nak ka ti hle a, ka awm ngai chuan ka awm a, ka kuahlet ve lem lo. "Hmeichhe dang kawm tawh suh aw," a ti sap a. Ka awma bei reng chung chuan a inhnit fei fei bawk a. Thil awmdan chu mi a nileng lo tan chuan a hriatthiam theih a, Miriami hlimloh ṭhinna chhan chu Estheri ka kawm ṭhin vang a ni. Miriami chuan min ngainain min hmel duh tih ka hrethiam ta a. Esi chu a lo thik ṭhin a ni tih ka lo hrethiam ta. " Awle, Awle, midang tumah ka kawm tawh lovang, nang chauh hi ka ṭhian i ni a, nang chauh ka kawm tawh ang che. I ṭap a mi ? Bang tawh rawh le, " ka ti a. Min la kuah reng a. " Ka duh che, " zawisap hian a lo ti a. Chu aw chu a va mawi em ! Ka beisei lo lutuk thil a lo sawichhuah avang chuan ka phu zawk nghe nghe a ni. Nghet taka kuahlet ve nghalin, "Mimi, keipaw'n ka duh che a sin," ka ti let ve a.

Chumi ni aṭang chuan Esi'n thil ei tura min sawm paw'n chhuanlam engemaw siamin ka hnar ta zel a. Min duhthu a sawia, ka duhthu ka hrilh tuka chanchinbu ka sem leh chu kan lai dun em em a, kan inena kan nui leh tawp zel a ni.

Tukkhat ka chanchinbu sem chu anu a lo damlo va, ngaihtuahawm erawh a ni lo., A nu awmpui a duh avangin School a kal hman loh tur thu Sir te hrilhsak turin min chah a. Miriami tellohna kan Class chu ruak huaiin ka hria a, Class te chu a rei ta bik riauin ka hre bawk. Ban vat vat mawlh ka chak a ni.

A tuk Chanchinbu ka sem lehin a ngaite bawkin thingpui ka in lut leh a, a nu chu a lo tha deuh tawh a, mahse Chawhmeh zuara chhuah erawh a la theihlo. Mimi te nufa hi an khawsak a tha lo ve hle a, anu Chawhmeh zawrhna atanga an Sum lakluh chu an ei in leh, an chhungkua mamawh zualpui lam khawmnan an hmang ber a ni. A sawi tawh ang khan Mimi-i hian pate a nei a, a patea te hi an Khawsak a tha hle a, Mimi-i pawh an duatin a zirna senso zawng zawng an tumsak bawk a ni. Mimi-i hi an ina awm tur emaw, Hostel-a awm turin an sawm nasa thin hle a, mahse anu kalsan a hreh avangin an sawm chhuak zo ngai lo a ni. Anu awmpui a la ngaih avangin School a la kal hman lo va. Ni hnih a kalloh chhunga Subject hrang hrang Note kan lak te chu Sunday-a ka inluah lama lo copy a duhthu a sawi a. "I nu a damlo bawk sia hetah ka lo keng anga i copy mai dawn nia," ka ti a. Anu damlo ngaihtuah vang ai mahin ka inluah chhe lutuk a hmu ang tih ka hlauh avanga an in lama ka note lak va copy tir tum ka ni mah zawk. " Kanu chu a tha tawh lutuk a lawm, a reng reng thuin i inluah pawh ka hmu chak ve a lawm, " a ti a. Ka rilruin, " Aw, hmuh chakna chhan tur a awmlo a sin mawle, hmuhtlak engmah a awm lo," ka ti a. Ka in chu ani anga hmelṭha mikhual turin a qualify mawlh lo a ni. Kallo tura ka hrilh tlat chuan a hmu chak ting dawn tih ka hriat avangin engmah ka sawi peih ta bik lo.

Mikhual ropui ka thleng dawn tih ka hriat avangin a nalh theih ang ber turin ka lawina run chu ka lo tifai lawk a. Ka mutbu tlem te chu ka thlep fel vek a, ka thawmhnaw nei tlem te chu a khaihna perek awmah chuan ka khai vek bawk a. Ka thil neih ve chhun reng reng an awmna tura fel taka ka dahkhawm vek meuh chuan ka thil neihtlemzia leh ka inluah, mi vantlang te Choka tia lek chu ka luah zawh si lohzia ka hrechhuak a ni.

Inkhawm ban hnu reiloteah ka kawngkhar kik thawm ka hria a. " Lo lut rawh, " tiin thawm lo awm chu ka lo chhawn a. " I in chu a lo awm thuk em a nih hi, ka zawng hmulo tep a lawm, " tiin Miriami ngei chu a lo lut a. " Ka sawi reng kha, chuvang a lawm ka lo lam ang che ka tih. Zampher ah khan lo thu rawh, thutna tur mumal pawh ka neilo," ka ti a. Ka zampher phah ah chuan bawkin ka note chu a copy mek a. A bulah chuan amah si deuhthaw a bawkin note pakhat zawk ka copy sak ve a. Ka thil ziahlai chu ka kut a kham deuh avangin ka tawp a, ka bula thil ziak mek chunglam Angel niawma hmelṭha, ka bialnu ni bawk Mimi chu ka thlir ngawih ngawih a. Ka lam lo hawiin, "Tinge khatia min en renga?" a lo ti a. 

"I van hmelṭha tak," zawi sapin ka ti a. Min en reng chung chuan, "Nangpawh," a lo ti ve a. A khabe invuah rem tak chu dim te a chawi sakin a hmui thianghlim takah chuan ka hmui ka chuktuah ta. Kan vawikhat tihna ve ve tih hriat takin kan zeilo dun hle a. Zeilo tak chunga eng emaw ti chhung kan hmui leh hmuia kan innawr tawn hnu chuan kan inthlah ve thei hram a. Chutia kan infawh hnua ka va en chuan a zak tih hriat takin a sen tawn tawn a, a va duhawm chiang tak em !

Tichuan, harsatna em em awm lovin final exam kan thleng a, ka titha ve hlein ka inhre bawk. Result a lan hma chawlh chhung zawng chu inhlawhna remchang ka hmuh apiangah ka inhlawh kual a. Result a chhuak a, first ah pass in kan Class ah pakhatna ka ni nghe nghe a. Pahnihna chu first tho a pass ve, Miriami bawk a ni.

Class X pawh a ngaiah tho Mimi-i nen kan lut zawm a. Hmelṭha ngang kha a nia Mimi-i chu duhtu dang an awm lo theih lova, mahse heltu dang avang chuan ka lungngai ngai lo. A chhan chu ka laka Mimi-i rilru put hmang ka hriatchiam em vang a ni. Mi dangin an lo star tih ka hriat chang pawhin a ruk takin ka in tithei em em zawk thin a ni. Mimi-i lo star tute zingah chuan School dang aṭanga lo lut thar, chhungkaw hausa tak fapa, Bike hlira School lo kal thin, LALMUANZUALA a tel ve a. Zuala hi pumrua tha tak, hmel pawh chhelo, ṭhian, Kid angreng deuh pathum a nei bawk a, a inla ngengin a chapo hmel ngawih ngawih bawk. Kan in Class-mate nangin kan inbe ngai lem lo. A duhloh chungin Mimi-i chu Bike-in a thlah ta fo mai a. A hnuah Mimi-i chuan ka bulah a duh vang reng a nih loh thuin a in sawifiah ziah bawk a, "A pawi hleinem," tiin tawngkamin sawi mah ila chhungrilah erawh ka lungawi chiah lova, inphur tawhlo hram se ka duh a ni.

Tlaikhat kan Class bang kan haw tur chu, Class 4 a mi naupang pakhat hian kan School chunga miin min hmuh an duhthu min hrilh a. Tunge tia ka zawhna chu an hming a hriatloh thuin min chhang a. Ka hawpui tur Mimi-i chu min lo nghak lawk turin ka chah a. In chung ka han thleng chu Zuala te ṭhian dun pali chu an lo awm reng a. A kid niawm pakhat chuan, " I lo kal ta maw, englo a nia. Miriami hi tibuai tawhlo la i na lo a ni mai. Zuala nen hian an ni tawh," a lo ti a.

Chhn tlakah ka ngai lova, engmah sawi lovin ka inher a, chhuk leh mai ka tum a. Zuala chuan, " A thusawi chu i hrelo a mi ? Nang ang mirethei leh fahrah khan Miriami ang in phulo a nia, kalsan vat ang che, " a lo ti khanglang a. Ka kal mek chu hawi letin, " Ka rethei thu chu i duhleh sawi rawh, ka fahrah thu erawh sawi tawhlo la i na lo mai ang," ka ti let ve ngat. "Sawi zel ta ila, engtin nge min tih ang? " a lo ti a. Engmah sawi lovin ka Bag dahṭhain ka Uniform kawr ka hlip a. "E, insual min cho ve a mi?" mi lo ti a. "I hman hun ka nghak . . . , " ka sawizawh hmain min lo zuan nghal a. In ring renga lo ding ka ni a, a kapah tak ka lo tlawh siah mai a, a thal chiang hle. A tilah ka tlawhfuh a ni ngei ang, a na ti lutuk chu a vial ngawng ngawng mai. Tho leh tur a awm tawh lo. A ṭhian pakhat min lo hnek tum chu ka lo kun zeuh a, a hnarah tak ka lo hnek bawk a, a hnar atangin Thisen a far zawih zawih mai. Kan thâwmah midang leh Teacher te an lo chho a. Midang pahnih nen chuan kan inkhawih hman ta lo. Thil awmzia kan Sir-in min zawt hlawm a, sawi zahthlak chin a awm tlat avangin ka ngawi tlat a. Sir-in, "In buai chhan ka zawh che u chu in hrelo a mi? " tiin vin deuhin min zawt leh hlawm a. Zuala Kid pakhat chuan thil awmzia chu a sawi ta a. 

A lo thlen chhoh tirha ka bula lo kal vat a min ngaihtuah leh hlauhthawn hmel taka, "I na em, engtin nge an tih che?" tia min lo buaipui vat tu Mimi-i chu Zuala ṭhianpan kan insual chhan a sawi a hriat chuan a zak hle. Kan vaia min zilh hrep hnuah, buaina bul ber Zuala chu Sir ten Office lamah an ko hrang daih a.

Kan haw kawnga Mimi-i sawileh danin, Zuala'n Mimi-i chu a lo bem a, bialpa a neih thu leh, a bialpa chu kei ka nih thuin a lo chhang a. Chuti ang vel avanga lo thinrima ka laka lo ṭuan ta vel chu a ni awm e. Kan School a in la pa em em mai ka tukdal aṭang phei chuan kan School ah chuan ka larin, min en RAJA hlawm hle. Chumi avang chuan ka nun dan ṭhin ka thlak lem lova, a hmaa ka thingtlang mizia, simple taka awm chu ka la chhunzawm a, School a descipline ber leh ngawichawi ber ka la ni reng tho.

Mawina leh nalhna lamah Pathian khian ka Sava notei (Mimi) chu midang zawng aiin a malsawmnain a vur bik ni ten ka hre ṭhin a, chuti ang zawnga ngaihtuah chuan a vannei pawh ka ti ṭhin. Mahse ka Duatlaite-i hi a va vanduai bik em ! A mamawh em em laiin a pain a kalsan a. Chumi hnua amah enkawltu ber, a pa aiawhtu ni thin, a patea'n he khawvelah Pa tih tur nei ve tawhlo turin a kalsan leh ta. A patea thihna chu a tuarna em em a, karkhat dawn School pawh a lo kal thei tawh lo. A pate a thih avang chuan an nufain a patea te in lamah chuan an han awm chho a, a changa ka han tlawh ve zeuh tih loh chu ka Enchinlohte-i chu ka hmu khât thei hle a. An chhiattawhlaia keia ngaih thu va hrilh reng lah a mawi si lo. A tello a School kal pawh chu ka tui lovin ka khua a har em em mai thin.

A patea thih aṭangin thlakhat a liam tawh a, an in lamah an lo awm thla leh tawh a, lunglen pawh a nep deuh tawh. A kalloh chhunga kan note lak zawng zawng a copy a tan an in lamah pe turin ka phei a. Amah a lo awm lova, a nu chauh a awm a, Dawrah a kal a ni awm a. Anu hi Nu mawi tíin ka ko mai thin a. A hrisel loh leh, a thawhrim em avangin a kum aia lang upa a ni. Chawhmeh zuara a chhuah fo avangin kan inbe tam lo va. A awm laia an in ka chuan erawhin, mi a kawm thiam hle a, fel min tih thu sawiin ka mizia chu chhunzawm zel turin min fuih ṭhin a ni.

Pangngai takin School kan kal zel a. A patea thihna chuan Mimi-i tan lungngaihna dang a siam leh zel dawn niin a lang. School Fee leh a mamawh atan tia thlatin Rs 2000-3000 a pate'n a damlaia a pek ṭhin chu a nute-i chuan an Chhungkuain Sum lama harsatna an tawh thu sawiin an pek chhunzawm theih tawhloh tur thu a Pasal a thih atanga thla 2 hnuah Mimi-i chu kohvin a hrilh a nih chu. Hmeichhe sual han sual thiamzia tak hi chu aw ! Chu thil chu Mimi-i nu'n min hrilh a ni a, Mimi-i chuan chuti ang thil ka hria tih chu a hre ve kher lovang. Chuti ang lungngaihna vang chu a ni mahna, tleirawl hlim thei tak kha a nui khât ta em em a, a zirna paw'n a tawrh phah hial a, 2nd term exam ah pawh a pass ṭawk ṭawk a ni. A lungngaihna chu ka hriat avangin ka lainat em em a, tih theih erawh ka nei lo hle a ni. An chhungkua harsatzia ka hriatin eng emaw tal tihsak ve ka tum a.

"A School fee tal ka tumsak tur a ni," tiin Principal hnenah an harsatzia hrilhin a fee (Rs 500 pm) ka tumsak ṭhin dawn tih ka hrilh a. Ka thil sawi chuan Principal chu a khawih hle. "Anih chu mawle, chuti angin an ni tih ka hre ngai hleinem. Fee chu keiman ka lo awl zawk mai ang, nang chuan i nakin hun a tan lo inkhawl zel zawk mai rawh," min ti a. "Sir, ni love, Pathian zarah inhlawhna ṭha tak tak ka hmu reng a, ka lo tumsak zawk ang. Heti anga mite ṭanpui theia ka awm hi ka lawm em em a sin. A thuhrimin fee i awlsak dawn tih hria se a duh miah lovang. Keiman ka tumsak tur pawh hi nang nen chauhvin kan hre tur a ni. An harsatzia mi dangin an hriat a an ṭanpui a duh dawn miah lo a ni. Fee a lo pek dawnin an neihchhun takmeuh emaw, an puk a lokeng dawn a ni awm si a. 'A damlai khan i patea'n a pe lawk vek tawh, ' i lo ti mai dawn nia," tiin.

A nu chu a damlo ngunin Damdawiin hial an pan ta fo mai a. Damdawiina an inenkawlna senso te pawh chu an hmelhriatte atanga an pukchawp a ni deuh ber mai ṭhin. Miriami sum lu a patea a boral tawh a, a nu Chawhmeh zuarin a chhuak thei tawh mang bawk si lo. An chhungkua dinhmun chu hmuh theih khawpin a chhe chak a. Ka tukkhat chanchinbu sem chu Mimi-i te inah lut kawi lehin, Numawii damkawr mu reng bulah chuan va ṭhuin eng nge a an ka zawt a. A ṭhat viau tawh thu a sawi hnuin a ngawi vang vang a. "Thanpui, hei i hriat angin kan dinhmun a chhe tawh em em mai a, i chanchinbu pawh kan laksak chhunzawm thei tawh dawn lo che a ni, " a ti a. Chu thu chuan min deng na em em a. Ka ngawih vang vang hnuah, " Numawi, chuti ang sawi mah ta che, Chanchinbu pakhat a latuten a man an pe em ti ah a publish tute an buai lova, kei a semtu pawh hi chhungkaw khatin an lak man an pek leh pek lo ah ka buailo a sin. A neitute an buaiphah dawn pawh lo ni teh reng se keiman ka hlawh aṭangin ka cut tir mai ang. Ka sem chhung chu ka pe reng ang che u. Tin, zingtin hian Agent zawng zawng ten copy 2/1 extra kan pai ziah a lawm, " ka ti a. Bathroom atanga lo chhuak Mimi-i chu an chhungkaw dinhmun vang leh a nu nena kan thusawi vel avang chuan a ni ngei ang, a mittui a tla tih ka hmu thei a. Diktak chuan a hma aṭang rengin Chanchinbu lak man hi an pek dawnin ka duh ngai lova, a nu'n a tih tlat ṭhin avangin ka laksak ṭhin a ni. "Aw, i van fel ṭhin tak em. A boral hma khan a patea'n fee a lo peksak vek tawh a ni awm a, chuti nilo se Mambawihi pawh hi a zir chhunzawm thei tawh lovang," a ti a.

Kawngpui bula Building pakhat an sakna ah thawkin masala kan chawk mek a. Chutih lai chuan ka thawhpui dangte chu an phun sap sap hlawm a, " Khi, khi a hmeltha lutuk " tih vel an sawi niin ka hria a. Muankima'n, " Saw, Thanpui, Mimi-i. Thanpuia bialnu a nih saw, " a tih ri chuan ka beng a verh chiang hle. Ka hawi ve nghal a. An hawina lam chu ka va en nghal a, Mimi-i leh Mipa pakhat Bike-a in phur, Bike aṭanga an chhuklai ka va hmu a, an inhuat hmel loh em em bawk. A mipa chu ka hmuh hnu ni tlata hriatna ka nei a. Ka hria e, Sunday vawikhat Mimi te ina ka va len ṭuma a nu damdawi leh eitur eng emaw zat lo khaia lo leng Police kha a ni ngei mai.

Kan awmna zawn an lo thleng a. " Mimi, Mimi " tia kohvin biak ka tum a, a lo hawi a min chhang hauh lo. A kalpuipa chuan, " I hmelhriat em ni ? " tia a zawhna chu, " Hrelo, " tiin a chhang a ni ! Mak ka ti a, ka sa em em a, ka zak hle bawk. Rilruin, ' Min hrelo a maw ? I duhthu i hrilha kha i hre tawhlo a maw ? Min hre ngailo tak tak maw ? " ka ti a. "I Mi hriatloh ti khan koh vak vak tawh suh aw, " tia a kalpuipa'n min auhkhum pawh chu ka hre ruai ruai a .Mimi-i te kan hnathawhna bul Restaurant an lut tur en zui chung chuan, "Miriam, Nicky Lalthanpuia hi i hre lo tak tak maw?" tiin ka ṭhianpa Muankima chu a phun sap a.

Ka haw chu ka zawi ngawih ngawih a. Ka thiltawn vel avang chuan Chaw chakna ka neilo phah a. Lehkhazir a lang lova, mut a chhuak hek lo. Tunlai min biak ṭhat duh loh chhan chu kha pa vang kha a ni ngei ang maw ? Bialpa a lo nei vang a ni maw ? Engtin nge khati tluka min duha min thlahlelh ṭhin khan min phatsanin midang min kawpsan theih zawk? Nge a der vekin min lo ti kual vel mai mai ṭhin zawk? A duhthu min hrilh fo va, min hmangaih thu a sawi ngailo chu tunah ka hrethiam ta. Lem ang min lo der mai mai ṭhin a ni.

Kei chuan ka duhin ka hmangaih takzet a sin. Ka thiam tawkin ka hmangaihzia chu ka lantir ve thin a nih kha. Tunah pawh hian ka la hmangaih ngawih ngawih a, ka la hmangaih em avang chuan a tana tha zawk turah ngaiin kei fahrah, inhlawh chawp ngawt aia an ṭhatpui zawk tur, chu Police nen chuan tluang taka inkawp zel turin rilruin duhsakna ka hlan a. Mittui tla zawih zawhin he thuthlukna hi ka siam ta. " Mimi-i ka hmuh reng tawh loh nan Chanchinbu pawh ka pe tawh lovang. Ka hlat theihnan School ah pawh ka be tawh lovang," tiin. A va hrehawm si em. Chumi zan chu chhin khat lek pawh chhing lovin Chanchinbu sem turin ka chhuak lehnghal a ni.

School kan kan rual ngai ta lova, kan haw rual ngai ta hek lo. School a kallo ngun ta viau bawk a, Chanchinbu ka pek tawh loh bawk avangin Mimi-i chu ka hmu khâtin ka ngai ngawih ngawih ṭhin a. Midang hmangaih a nei tawh avang chuan ngaia thlahlelh reng thei niin ka in hre lova, ngailo theih lah ka ni hek lo. Chutia ka hmeichhe hmangaihin midang a kawp ta chuan ka lakah nghawng a nei lian em em a. Ka engtih mah a tui tawh lova, tukhaw hriat lovin ka na ngawih ngawih a. Mimi-i chu ka hmangaihzia ka hrilh tam tawklo a ni ah ka ngai a. Ka hmangaiha ka duhzia hria ni se heti ang hian ka lakah a ṭuan thei dawn em ni tiin ka ngaihtuah ṭhin. A changin hmeichhe pakhat vang maia ka lungngaihna chu a nasa ka tiin nep ka inti bawk a. Mahse Mimi anga hmeichhe hmeltha leh duhawm avanga lungngaih chu zahthlakah ngaih loh chang ka nei bawk a. A chhan chu natpui tham a ni reng a ni.

Final exam neiin, last Subject chauh kan nei ta. Rilruah lunglenna nasa tak a lo awm lawk a. " Vawiin hi he School zirlai ka nih hnuhnung ber a ni dawn ta. Mimi ka hmuh hnuhnung ber ni pawh a ni hial thei. Hmuhni ka nei leh ang em ? " tihte ka ngaihtuah a. A ruk takin Mimi-i chu ka en ngawih ngawih ṭhin.

Result a chhuak a, first Div ah ka pass hlauh mai a. Ka lo tum lawk tawh angin Naktuk tlaia Mizoram chhuahsan tawh tur ka ni. A tawp nan tal tiin ka ngaih em em ṭhin Mimi-i te in lamah ka va kal a. Kawngka a lo inkalh a, a ngaihna hrelo taka ka din reng laiin an ṭhenawmpa lo haw chu chanchin ka zawt a. A nu a damlo a, damdawiin lama an in dahluh thuin leh chuta ṭanga a lo haw thuin min chhang a. Engtika lut nge, eng nge a natna tih vel ka zawhna min chhan pahin an ṭhenawmpa chuan, " An khawngaihthlak nufa khawp mai, damdawi leina tur takngial pawh an nei lo, ṭanpuitu an mamawh khawp mai, " a ti a. A thusawi chuan min deng na em em a. A rang aranga tlan haw lehin kum 3 chhung ka inhlawhna aṭanga ka Sum hmuh a/c a ka lo inkhawl, Vairam lama zirna chhunzawm tura ka kal dawn avanga ka lakchhuah, Rs 40,000 vel atang chuan Rs 15,000 la chhuakin Damdawiin lam chu ka pan nghal vang vang a.

Duty hnenah damlo chu ka nute a nih thu sawiin luh ka dil a. Thawm dim takin an awmna lam chu ka pan phei a. An nufain a nu damlo khumah chuan inkuah chialin an lo muhil reng a. An khum bula damlo thil dahna bawmah chuan Drip a tui chanve vel la awm, Serthlum pum 2, lapuah bawr khat leh Bisleri water bottle pakhat chauh hmuhtur a awm a. Chu chuan an ṭhenawmpa'n tanpui an ngai a tih chu a dikzia a ti lang a. He nufa khawngaihthlak tak hian ṭanpuitu an mamawh em em a ni. In kuah chiala an nufaa tui taka an muhil chu ka en a, ka khawngaih a ni. " Lalpa, ngati nge heti em em a retheihna tuar tur hian he mite nufa hi i lo siam kher ni ? " tiin rilruin ka phun a. He hla, " Ka lo kal leh ngei ang a ti, lawm r'u lungngaihte lawm rawh u, " tih chu he mite nufa khawngaihthlak tana phuah ni mai ten ka hria a. An tan Lalpa lo kalleh hun chu a nghahlelhawm zualin ka hria a.

Anu chu enin, "Numawi, retheite Pathian Chungnung-bera chuan damna pe mawlh che rawh se. I fanu tan hian i la dam a ngai a ni." Ka di hlui, min ti na em em tu, Mimi-i zawk chu enin, "Mimi, i nu hi lo enkawl tha rawh aw. Mangtha mai ule," tiin ka phun sap a. An nufain ka hmu leh ngai angem tih hre lovin chu room chu ka chhuahsan a.

Nurse thutkhawmna roomah lutin Nurse pakhat, fel hmel tak lo awm chu biain ka Pawisa pai chu ka pe a, a pek turte nufa hming leh an Bed no ka hrilh bawk a. "I hming min zawt se engtin nge ka chhan ang?" tia min zawhna chu, "Pathian chhiahlawh i lo ti mai dawn a nia," tiin ka chhang a.

Sum lama Support tu neilo ta na na chu Vairamah pawh ka inhlawh a la ngai reng a. Chhunah Class kalin ban aṭanga zan lam thleng Hotel-ah Waiter angin ka thawk a. Bangalore ka thlen hnu pawhin Mimi-i chu ka ngaiin ka rilruah a la cham reng a. Theihnghilh duh viau ṭhin mah ila thil engkim mai hian min hriatchhuahtir a, ka rilruah hian a thar zual zel dawn ni ten ka hre ṭhin. A nu kha a dam zel ang em tihte ka ngaihtuah a. An nufa pualin ka ṭawngṭaisak nasa em em a, an tan damna leh nunnawm zawkna ka dilsak ṭhin.

Pathian zarah harsatna em em awm lovin Cl-12 ka zo leh a, tunah chuan College ka kal ve dawn ta reng mai. Bengalore-a College ṭha ber pawl ah admission ka hmu hlauh mai a. Chu College aṭang chuan ka graduate nghe nghe a ni.

A hlawk zawk BPO a thawk turin hun rei tak ka lo thawh tawhna Hotel ka chhuahsan a. Ka inhlawhna aṭanga ka sum hmuh hmang chuan UPSC Exam-a ṭangkai tur lehkhabu leh Chanchinbu chhiartur ṭha tak tak ka lei theih phah a. Kum khat tawp ka theih ang anga ka inbuatsaih hnuin Civil Service exam ah tel vein, a mite ensan ngai lo, " Mi dil ula ka pe ang che u," titu chungnung bera Pathian chuan ka lo thawhrim ve na tlem te leh, chat lova ṭawngṭaia ka lo dil ṭhinna te chu min chhangin chumi ṭuma UPSC Exam-a ti ṭha ber pawl niin heng, Indian Top Services, IAS, IPS, IFS zinga ka duh ber thlang thei turin ka tling hial a. Chuti ang malsawmna ka dawn ni chuan lawm avangin mittui a luang a. Kum 10 chuang kalta a min liamsan tawh, ka nu leh pa rethei tak te chu ka ngai thar em em a, ka lawmna chu min ṭawmpui ve se ka ti a. "Kanu, kapa min hmu em? In fapa hi he ram zau tak, mihring maktaduai tam tak chenna ah hian Milian leh mi pawimawh ka ni dawn ta a sin," tiin mittui tla zawih zawhin ka sawi a. Ka nu leh pa an boral hnua an fa tak tak ang maia min enkawltu, an neih ui lova zirna min chhunzawm tir a, Aizawl thlenga min kaltirtu, ka patea te nupa ka rilru ah an lo lang bawk a. "Nute, Pate, ka lawm e. Ka tun dinhmun hi nangmahni vang chauha thleng thei ka ni. Tun aṭang chuan in rethei reng tawh bik lo'ng, in fapa ka puitling ta e," ka ti sap bawk a. Ka hmeichhe hmangaih hmasak ber leh awmchhun, engtiklai pawha ka theihnghilh ngailoh, Pasal nei tawh Mimi-i rilruah a lang lo thei lo va. "Mimi, i ṭhian, tunhma a rethei em em ṭhin, a sur a sa hnuaia inhlawh reng ṭhin kha tunah chuan ka phuloh malsawmna dawngin he kan ram, India rama Officer lian pakhat ka ni ve dawn ta a sin. Ka lawmna hi min lawmpui ve ngei ang tiraw?" ka ti a.

3rd Yr ka zir kumah Muankima'n min lo biain, thil tam tak kan sawi dun a, chutah chuan a ni ka rilrun tina em em tu thu ka hriat bawk ni. " Kha Police kha pasalah a nei a " chu chu Mimii pasal neih thu ka hriatna a ni. Diktak chuan midang lakah min phatsanin min tina em em tu ni mahse, engtikah emaw ka hringnunah a lo kirleh ngei rinna ka nei ṭhin. Chu chu Pathian hnena ka ṭawngṭaina thupui pakhat pawh a ni thin. Ka zirna ah pawh Mimii vang chuan theihtawp ka chhuah thin. Mimii tan pasal tlak nih ka tum a ni. Mahse, chung ka tumna leh Lalpa hnena ka dil ṭhin chu engmah loh mai an ni ta ah ka ngai hial.

Ka tette atanga ka ngaihsan leh nih châk, IPS ka thlang a. Kum 1 zet Police Academy-a kan training hnuin ram chhung leh pawn hmun hrang hrang kan fangkual bawk a.

Hazaribagh, Jharkhand-ah Assistant Supirentendant of Police (ASP) in ka awm a. Sorkar-in ka luah atan Quarter lian leh ropui tak mai min pe a. In chep leh ṭha lo taka cheng ṭhin ka ni a, ka in thar chu a lianin ropui ka ti a, ka luah zo lo hle a ni. Ka patea fate pathum ka bula awm a, zir turin ka chah thla bawk a, ka khawhar ṭhin pawh a zia deuh. A hminga Police Officer lian lo ni ve ta chu engkimah ka hniang hnar em em a. Tirhkah, ka ei min siamsaktu, ka in tifaitu, ka Motor khalhtu, ka in vengtu leh engtiklai pawha min vengtu Body guard thleng ka nei a. Office hna tihloh hna dang thawh tur awm ta lo chu ka awm thiam lo zawk hial a.

Ni e, High School ka zir aṭanga ka graduate thleng kum 10 vel zet kha hunawl nei hman loh khawpin Class ka neiloh apiangin ka inhlawh a ni a, tuna hunawl ka nei ṭhin hi ka awm thiam lo a ni ber e.

Office chawlh a ni a. Ka Computer hma ah ṭhuin Mizoram lam News en nan tiin FB A/C ka siam ve a. Mizo ṭawng Group a awma ka rin apiang ka search a ka zawmin ka like zel bawk a. Rilruah Miriami bawk a lo lang. FB a khawih ve ṭhin ngei ringin a hming chhuin ka search a, a lo awm ngei e. A thlalakte ka enkual a, hmelṭha ngang kha a ni a, a pic reng reng liker leh comment a tam hlawm em em a. Kar hmasa maia a upload te a awm a, a hmelthat ngaiin a la ṭha a, mahse tlem a upatna a lang ve deuh a. Lung a leng thar leh em em mai a. A Profile te ka check vel a, Relationship ah Married in ti lova Single a in ti tlat chu mak ka ti a, mahse tunlai kawppui nei tawh FB user tam tak tih dan ve maiah ka ngai a. Add ka chak viau nangin lunghlui kaithotu mai a nih dawn avangin ka add ta lem lova. Pasal nei tawh a ni a va add vel chu mawilo ah ka ngai bawk. Chumi ni atang chuan ka login apiangin Mimii profile chu ka check ziah a.

02. Nov a ni a, Office-a Coffee ina ka thut pahin FB ka login leh a. Ka tih ṭhin ang bawkin Mimii Wall ka check leh a. Darkar 1 liam ta velah he Status hi a lo update a. " Happy Birthday. Ka mipa hmangaih hmasak ber leh awmchhun, vawiin i piancham a lo ni leh ta reng mai. Ka lawmpui che. Ka ngaih che a va zual si em ! Khawiah tak awm ang che maw, i la dam tiraw?"

Vawiin hi Tu B'day nge? Keima B'day ngei a ni. Kum 27 kalta khan ka lo piang ve a ni. Hun loh takah ka nu leh paten min boralsan avangin ka B'day pawh ka hre chang lovin ka lawm ngai hek lo.

Kum 8 kalta 02. Nov chawlhni a ni a. Ka kawngka kik thawm a lo awm a, lut tura ka tih pawn a kik nawn fo avangin ka tho a ka va hawn chuan Mimii a lo ding reng mai a. "Happy B'day" tiin a lo nuisang a. "Ee. .ka B'day a ni tih pawh ka lo hre hleinem, i van fel tak em!" 

In chhungah kan lut a. Lehkhakhawnga thiltuam tlat a lo khai bawk a. Inchhung kan luh hnu chuan a thil khai chu enge a nih ka zawt a. "I maimit chhing tlat rawh aw." a ri rawk rawk a. "Han meng rawh le," ka han meng a. Khawvela ka Player ngaihsan leh duh ber pawl, Zinedine Zidane Real Madrid a a khelh lai Jersey a hming chuang ngei a lo lek kang reng mai a. Nui sang chungin, " For You " a lo ti a. Ka lawm lutuk chu Jersey chu la vatin ka ha chhin nghal mawlh mawlh a." I inhmeh lutuk. Lawmman ah enge ? " a lo ti zeuh bawk a. Lai deuh titihin ka va hnaih phei a, Mistiri thiam berin uluk taka a vuah niawma mawi a hmuiah tak ka va kiss vawng vawng a nih kha. Ka inluah a a Pic ka tar nasat em em, French Legend ZIDANE ka ngaihsan zia a hria a, ka B'day a min present a tan a patea Pawisa pek hmangin Kolkata ah a lo chah a ni awm e.

A Status chu kei min tih chhanah ka ngai deuh a. Mahse, midang a sawina pawh a ni thei tho bawk. B'day inang mipa tam tak kan awm âwm sia tiin ka ngaihtuah bawk a. A phatsan ni mah ila, a mipa hmangaih hmasak ber ni chuan ka in hre ve a. A hmangaih, a awmna chin a hriat tak loh chu ka nih ngei ka ring bawk si. Pasal a nei tawh a, mipa pakhat chiah la hmangaih anga a insawi chuan a pasal chu a ni ang. A pasal chuan a hriat lovin a tlansan a ni ngei ang. Ka rilruah chhanna awmlo zawhna hlir.

Chrismas hmang turin 10. Dec, tlai lam 1:35 ah chuan ka Body Guard Sanjay Yadav leh ka naute pathum nen Lengpui Airport ah kan ṭum a. Kum 10 vel lai ka lo bosan tawh, ka pian leh seilenna Mizoram ka thleng leh chu a tlang leh boruak dai em em te chuan engemaw tak hian ka lung min len hle.

Sainik Rest house ah kan innghat a. Kan thlen tukah ka high School chhuahna neitupa leh Principal ni bawk te inah leng turin, Mizoram Police Dept lamin Mizorama ka awmchhung zawnga ka hman a tan min pek, Bolero dumin Sanjay nen kan tlan phei a. Traffic tawt lutuk a zawite tea kan tawlh mek laiin Treasury Square pheia Chawhmeh thutpui nuho zingah ka mi hriat tawh hmuin ka in hre tlat mai. Chiangleh zual a ka en chuan Mimii ngei a ni.

Chutia High School a kal hnu pawha la pangchang em em thin, inchhung sekrek bak khawih ngailo, Mimii Chawhmeh zuara a ṭhulai ka hmu chu engemaw tak hian keimah ah khawngaihna a lo lut nghal a. An khawsak a harsa ve hle a ni.