VAIHLO CHU ZOZIAL AH

VAIHLO CHU ZOZIAL AH

~maro colneya bungsut

(A ziaktupa hian a tingaihnawm thiam em mai a, ka rawn c/p tawp mai e. A remti lo hran lovang chu maw!)

Silai a puak ri zawt zawt a, silai mu leng kal sual laka him tumin  civil mite chu an hmun him zawkah an bawk thap a. "Tlanchhe rawh u," tih tuar tuar ri chu dawih aw a ni lo. Mithi aiin minungin ram tan hna a thawk tam thei zawk tih a hriat chian avanga tlanchhe rih tura duhsakna aw a ni zawk.

Khawvela indona muala silai chelek tam ber mai AK-47  ri fiak thak thak mai leh ri in zawm zat mai chu chiang takin a hriat a. Chutih mek laiin Chu aia ri ring zawk LMG tia Mizo pa in a hriat, tun thlenga indona muala chelek  hlawh ber reng la ni Light Machine Gun chuan AK-47 te tha chhang dawlin chawl hauh lovin a ri  zit per per mai. Eng ang takin nge chu silai mu chuan hna a thawh dawn tih chu ngaihtuahna chuan a hawl kual zung zung a. 

Civil lam chuan hmun him zawk chak zawkin an pan a, chutiang ang puak rang silai ri zawng zawng zingah chuan kan Mizo sipai  tlemte awmkhawmte chuan eng angin nge silaimu an dawn ang tih chuan rilru chhung ril ber a luah a ni.

Ni e, Mizo sipaiten inrin lawkna pawh nei hman miah lova an duty na hmun, Mizoram ngei maiah an tharum hmanga hnawhchhuah chu na an ni a. Chutih mek laiin Assam lamin inkulh ngheh tumin an rawn thawk rip hle a nih kha. Sipai 200 rual aia tam mah an rawn thawk a, a hrechiang zawkte chuan sipai 300 vel zet an tling an ring thung. Ralthuam mai bakah an mammawh hrang hrang leh hliam senghawi na tur ni awm tak  ambulance te nen an rawn thawk chhoh hmuh chuan Mizo sipai te chuan an silai kurkum chhungah an kut zungchal an hawlh lut ziau ziau tawh. Mahse, hun nghah an la nei cheu.

Assam police ten nidang zawng aia thawm an rawn neih len avangin  Vairengte khawtlang chuan au rinna hmangin  ramri lamah chim thla turin an in au khawm ta. Vairengte tlangvalten an hmanraw thawhchhuahpui tha ber chu tiang a ni mai. Mizoram Police ten an nawr let a nih chuan silai a puak dawn tih an hria. Silai puah tir loh hram an duh avangin hachang thial chungin Mizoram police te chu a sir lamah an in sa seng a, he an in saseng hi social media lamah a darh thui hman viau mai.

Assam police te chuan motor tam tham tak rawn hmangin motor ah mipui hnawhdarhna hmanrua tam tak an rawn phur a. 407 Truck 2, Bolero, Mahindra Jeep te chu Mizoram chhungah an rawn chhawp lut ngam ngat a ni. 

Chhun a her a, boruak erawh a tang tulh tulh mai. Vairengte Auto Rickshaw thlang zawng chu Vai hlir an ni. Hetiang a nih mek lai hian Assam Police te hian Vairengte thalaite hi rikrapa nawrlet mai an tum a ni.

Chutiang vaupung mai maiin Vairengte thalai lam chuan tawlhkir an tum lo  nasa mai. Assam Police lam chuan duh tawka liana company lama an order ngei mai tiang chuan Mizo tlangval  an vua a. Vaiho in an mite an lo rikrap tawhna thin teargas an kap chhuak nasa hle bawk.  

Vairengte khawdaia Auto Stand bul maiah te chuan Assam Police te chuan motor an rawn a, thih trih hlek lo, ramhmangaih pu Vairengte Tlangval rualin an han nawrlet ve ta. An motor an tlan chhiat san ta.

Chutih mek lai chuan Assam lam atanga lo chho, Mizo nupa tuak khat motor lei thar hlim diai mai chu Assam lam mipuite chuan an vaw chhia tih leh a khalhtu pawh motor khalh hleithei lo khawpin an sawisa tih an hriat chuan a hma aia nasa in Mizo tlangval an thinrim ta. Assam police ten an tlanchhiatsan motor chu rei lote ah darthlalang zawng zawng a keh a, kawngsir ah nam leh reng a ni. Zanah phei chuan meichhem eng tha tak niin, a ma tawka kang niin an sawi.

Kolasib SP leh Executive Magistrate te pawh rang takin buaina thlenna hmun an thleng a. Chutianga buaina thleng chu  thu zai zap zawnga chinfel tumin an han bia a. An hmalaknate chu Assam  police leh official dangte hian eng atan mah ngai lovin dawhkan an lo kilpui duh lo zui.

Chutiang a nih avang chuan  Mizoram Police te chu hotu sang lam atangin an awmhmun ngaia awm turin hriattir an ni a. Tawlh lo tura thupek an ni ta. A tul thut anih pawha silai pawh hmetpuak mai thei tura inring turin thupek an ni.

Lang thei rengah Mizoram lam police mi 100 pawh tling lo tur chu an awm a. Chutiang  anih avang chuan Assam Police te chuan Mizo police te thu anga tawlh kir an tum mai loh thu an sawi ta. Chutih hun mek lai chuan boruak chu zen trang thra tak, zit phut mai thei tur ang mai hian a mung ut ut tawh a ni.

Kolasib SP chuan pawi nasa zawk a thlen hmaa Assam lam biak rem theih tak mialin tiin Assam lamten an rawn hnehchhuh tak camp-ah chuan a chhuk a. Assam lam police hotute pawh chuan inhnukdawh an tum thu sawi mahse an tawngkam chauh a ni tih a hriatthiam theih. Hetiang  anih mek lai hian Assam police te chuan Vairengte thalai te chu dimna tel miah lovin an la hlap zawt zawta, chawl hauh lovin teargas an la vawmkhum zel bawk.

Chutianga remna thu an sawi mek lai chuan Assam lamten Mizo police te duty post an luahlan na hmuna duty Assam Police chuan tlailam dar 4:33 ah chuan Vairengte thalai tawlh kir duh miah lo lam hawi chuan LMG chu a ti puak ta.  Assam lam tan  silai an hmehpuah chu an chhiatna , an tanhmun phehna, an zahna tur tute, tlawmzawk avanga an chhuan lam tur an ngaihtuahna bul tanna a ni ta.

Silai a puah rual hian Mizoram Police te chuan Vairengte thalaite chu tawlkir tura hrilhin, "Keimahnin kan han bei let ang e," an ti ta a. Hun an la nghak hret a, hmun him chin a tam zawkin an thleng tihah chuan Mizoram police te chuan vawi tam an hmehpuah chak tawh silai chu dimna leh timna nei eih lovin an hmet ta zawt zawt a.

Vawi tam Assam leh Mizoram lam lo in nawrtawnna tawh thin hmun chu silai rikna, indona mualah changin silai ri a chawl ta lo. Assam police mi 200 zette chuan tharum hmanga luah luih an tum, camp chhungah chuan an tlan lut a, a then kawngpui lamah hlau thlabarin an tawlh liam zawt zawt a.  

Chutianga Silai a rik chiah chuan Kolasib SP chuan tlan chhiatna tur a hre mai lo. SP Pu Faka chulai hmunah chuan a awm ve tih Mizoram police ten an hriat avang chuan duh thalin silai an hmetpuak ngam lo thung.  SP Pu Faka veng him tura an dah pakhat chuan a pu chuan silai mu a tuar palh ang tih hlauvin pu tu in dim thei ni tawh hek lo, hneh takin a pu chu kawng thlang lamah a hnuk liam ta. Hmun ralmuang an thleng nia an hriat tawh hnu pawh khan Assam police te, Mizo police silai mu leng hlauva tlanchhiaten an rawn hmuh mai ala hlauhawm viau mai.

Inkah tan tirh atanga rei lote ah silai ri leh a mu sur nasa lutuk hlau chuan Assam police tam zawk chu an tlanchhe deuh vek a ni. Assam police ten an hmalama Mizoram police tlemte an tlanchhia emaw an tih laiin an sirkil, tlang bawk pathum atang  chuan silaimu a rawn sur ta. Khawi lai ber nge kah tur tia Assam police lam an hawi kual lai chuan ral hmatawng a hote fuihtu ber pakhat chu a tlu a. Hun rei lote chhung mi pathum an tlu leh nghal. Chutiang a vang chuan Assam police tam zawk thisuk neite chu an chiai nasa ta mai. An silai paihin hmun him lam nia an hriat chu thih thapui nen an pan rawk rawk a. Assam ram hmangaihna aiin mahni nunna hmangaihna avang chuan chi thlauh phung an tlanchhe ta.

Silai ri a rik rual khan Assam police te chu Assam Type chhungah an tlan lut a, mahse, chu in tawm rengna chi a ni lo. Khawivanrial bu tawn darh chu nepte, silai mu chuan a rawn deng kaw ser suar nghal mai.

Assam police khurchhunga tawmte chuan an rin zawnna lam lamah chuan hawi chuan an puakrang chu an han hawl ve tak na a, a teuh ber pawlin Mizoram police te tanhmun siamna chung lam feet 10 chuang zeta sang thingzar chu a rawn hlawi thla ve hram a ni.

Silai a rik hnu lawka Vairengte thalai rualten hmun him an thlen lai chuan lei chhun vum  hliah chuan mi 6 vel an bawk thap a. Chulai zingah chuan Pitar kum 60 ralkai tawh tur hian Zozial ala pak khu hlat hlat a. Silai ri zawt zawt leh thil puak ri dur dur chuan a tha a ti khur hauh lo. A awka chhuak atang chuan thin phut zawk  a nei lo tih hriat takin a mit chu fiah takin a meng fim hle.

A zozial leh a hmui chu a in zawm emaw tih mai turin a in zawm reng a. "Vaihlo chu Zozialah ka chantir a. Vai pawh ka zial thei alawm, Ka thih hma in vai chu 40 chuang ka vawthlu hman ang," a ti chhau chhau mai. A ipte puiah enge a ah i tih chuan Chemtum leh Dum bur a ni.

Minute 47 vel zet silai a rik mek lai chuan Mizoram duty post khur chhung atang chuan Assam Police, LMG hmanga Mizoram police te lo chhanglet rei ber chuan silaimu a nei ta lo. A kawr a phelh a, a kawr hnuaia tawnzau var chu a silai hmawrah a rawn lek chhuak a, Mizoram lam silai ri a chawl nghal.

Assam police lam an in saseng dawn ta. In kahna avang hian Assam  lamah Sipai 6 zet an thih laiin Mizoram police lam erawh sipai boot tawt bun avanga ke nawhpilh chu hliamna pawl a ni. Heti a nih mek lai hian Vairengte thalaite zingah hliam an awm nual a, Mizoram police te zingah teargas in a perna avang hliam chhete nei an awm a. Damdawiinah first aid pek an nih hnuah chhuah tir leh nghal vek an ni. Sawi sawi tlak pawh a ni lo.

Assam police te hian puanvar rawn vai mahsela, Mizoram Police lam hian an pawh mai duh lova, Assam Police che zia ngaichangin fimkhur takin an thlithlai a. Thawm engmah a awm tak loh hnuah Mizoram Police te pawh hian inbeihna hi an chawlhsan ve ta a ni. Silai puak zawt zawt a rik zawha hlim avanga au khek tuar tuarte hlimna chu Mizo tute pawhin kan tawmpui vek a ni.

Assam Police 65 in hliam an tuar a, hliam tuar zingah hian Cachar SP Nimbalkar Vaibhav Chandrakant leh Dhalai police station OC te pawh an tel a, Silchar Medical College Hospital (SMCH) ah enkawl an ni. Assam lam police 6 an thihna ah hian Assam Chief Minister Himanta Biswas Sarma chuan tweeter kaltlangin Mizoram leh Assam ramri buai vanga boral ta Assam police chhungte chu a tawrhpui thu inkahna a thlen zan dar 7:30 khan a dah chhuak a ni.

Hetiang a nih mek lai hian Chief Minister Zoramthanga chuan a hun takah social media hmangin khawvel hmuhah Mizoram leh Assam inkahnaa bultumtu chu Assam lam an nih thu leh thal thlah hmasa tu an nih a sawi avangin khawvel hian Assam sipaite a dem reng tawh ang.

Ni e, ka pi kha, he ramri buainaah hian Mizoram mipuite kan tangrual a ni tih alan tira, pawl leh politics hmanga ram chhanna avanga hmingthat tumtute nasa takin ti zak rawh se. Ram hmangaihna lan tir hi dawhkan atang ni lo, a tak ngeia a lan tir avangin nu zahawm a ni kumkhua tawh ang. Ka khan Vaihlo chu Zozialah a chantir chiang alawm.

A tawp nan, tawngtai ralthuam hi silai eng anga puak rang leh tha ai mahin hna a thawk chak zawk. Chu ralthuam chu i engtik lai pawhin i lek chhuak thei reng e.