Strikes Back 8

SUDDEN-a chuan a sakawr Midnight-a zin chu a lo hreng nghet fel deuh chiah a. Sakawr dahna hmun lun angreng tak atanga George tate-I sakawr tur a va lak nen chuan   Dave-a chu a lo lan tawh leh tawh loh a han thlir kual zawr zawr a. A thianpa hmel awm a hmuh tak lohah chuan a dar chu a han thing nawk a, khawtthler chu zawh pheia amah va hmuh zawk tumin a sakawrah chuan a chuangkai dawn mek a. A ke veilama sakawr zin rahchhan a rah lai chuan hmanhmawh hmel taka rawn betu aw a hriat avangin a tawp chawt a.

‘Sakawr tha tak a nih kha’

Sudden-a chu rawn hawi kualin Zachary Barclay-a chu a han hmu a, ani chu bathlar chung dona ban nghengin duhdah angreng fe hian a lo ding tawh a. Chu Box B neitupa hmel phur angreng takah chuan a chhungrila thinrimna inup la awm reng chu a lang chhuak tawh lo. Sudden-a chu  bu nghat a, a invawrh kai ta nghal a.

‘Dollar za in ka lo lei ang.’

‘Ni love,’ tiin Green-a chuan a lo chhang a. ‘zawrh lai a ni lo.’

Dutchy-a in  kawt vela mi hawklak engemaw zat chuan Barclaya-a rawtna leh Slash 8 pa in a lo hnial thawm vel chu an lo hre ve ta a. An indawr zel dan tur hre chakin mi pathum pali vel chu an lo hnai nghal huang huang hlawm a.

‘Zahnih,’ Barclay-a chuan a han ti leh hram a, a hmel chu a rawn thim sawt a, chutah Green-a’n  a lu a lo thin leh takah chuan, ‘Zathum.’

Chu thu chu Saloon chhung lamah pawh chuan a darh rang kher mai. Mi pawh an lo pungkhawm nghal hluai a. An mitte chu sakawr chungchuang pa lak atanga lasawnin, Barclay-a pianhmang bumro pui maiah chuan a fu ta thup mai a. Thaw dep depin Box B neitupa rawtna, duhthusam a tha chu engtinnge Sudden-a chuan a chhanlet dawn tih an lo ngaichang thup a. Khawi ram pawh nise, sakawr tha tawk tak leina atan pawh Dollar zathum chu a tam mah mah tawh a ni. A lo thlirtu ho pawh chuan, Barclay-a mitmeng sen rum mai, khap fuk fuk mai thlir pah chuan, chu indawrna chuan eng anga vanneihna nasa nge a rawn thlen theih dawn tih chhutin an lo thik lek lek hlawm a.

‘Slash 8 hian pawisa fai an kawl tam lo hle a niang maw’ tiin pakhat chuan a bula mi hnenah a han hrilh sap a. Chu a biak mek pa chuan a lu lo thin hmawk hmawk pahin a thianpa chu ngawi tura hrilhin Green-a chhan let dan tur ngaichang chuan a hawi leh nghal thuai a. Green-a’n a lu a lo thin leh takah chuan a lo thlirtute lo hlauhthawn ang em em chuan thil a thleng ta lova.

‘Zali,’ Barclay-a chuan a lo ti leh thuaia, chutah. ‘Nang leh I sakawr nena in pahnih belhkhawm pawhin a hen tawh hrep lo’nge a. !’ a han ti zui a.

Barclay-a’n chu thu a phuhchhuah lai chuan, a lo thlirtu te zinga mi pahnih khat chuan chu Slash 8 daido pa awmdan lo inthlak ta chu an lo hmuh hmaih miah lova. Sudden-a chu a hmui a chip hmak a. A mitmeng pawh a duhawm teh chiam ta lo.

‘Ka hrilh tawh che kha, He sakawr hi zawrh lai a ni lo,’ vawt raihin Sudden-a chuan a lo ti a.

Barclay-a chu a hmel a dur ta hle a. Hei hi a tumdan a ni chiah lo a ni. A ngaihdan pakhatah chuan helai hmuna midangte hmuh lai hian mi thiltithei tak a ni tih entir a tum a, chubakah Chu Slash 8 pa chu han dah hniam vel a, Hanging Rock khua a mite mithmuha Zachary Barclay-an a duh tawh apiang chu a lei zel thei a ni tih han lantir vel chu a tum a ni a. Sum hi kuttum leh silai aia mawihnai deuh zawk a in lek na hmanraw tha tak mai a ni a. Amaherawhchu, Slash 8 pa laka kori a tu lemlo chuan a tibuai ve deuh hlek a. Chu pa chu a kum chanve hlawh zat ang tawp a tawktarh a ni a. Eng ang a sakawr chuanna lian leh tha pawh nei se, chutiang rawtna hnial tur chu an tlem viau ang.

‘Anih leh, I duh ang zat zat chu chhiar ang che,’ a han ti tuar a. ‘Kha sakawr kha neih ka tum a ni.’

Sudden-a chuan ngei hmel fe in Barclay-a chu a han eng vang vang a. Ngaihdan siam fel ta ni awm takin sakawr atang chuan a rawn chhuk ta a. Barclay-a chu a lo thaw deuh huai a. A chiang e, sum tam zawk a phut  a ni ngei ang le, chutiang chu a ni deuh tlangpui thin bawk a. A man te chu a chhiar fel tawh mai tawh dawn a ni maw !.

‘Tichuan…I hralh dawn ta a…’, hnehtu chan chang takin a han ti fiak thak a.

‘Ni chiah lo deuh e,’ Slash 8 pa chuan a lo ti a. Barclay-a chan tha chang inti awka chu, chu Cowboy, sakawr lakam vuan mek tawngkam chuan a ti buai deuh hlek a, ‘Rawtna ka siam ang. Minute nga I chuan theih chuan, a thlawnin I ta a ni mai.’ a han ti a.

Chu rawtna danglam tak lehlam atanga rawn ri chhuak ve thung an hriat chuan a lo thlirtute chu an ri mam mam a. Tha thawh zawnga intihhlimna lam a kawh deuh avang chuan Barclay-a pawh chuan mak a tiin, hnial chi ah a ngai lova. Sakawr chu fimkhur takin a han thlek a, a ngaihtuahna chu a vak kual zung zung a, chu sakawr chunga Green-a a chuan lai pawh khan ranch a hnathawk satliah aia sakawr fing danglam tak a nihna pawh a lo hmu lem lova.  Awmze nei taka zirtir a ni angem ?, a ring lo lam a ni. Chulai ram vela hna thawk cowboy tumah in an sakawrte trick (inbumna) danglam tak zirtir turin hun an nei lova, a nachang pawh an hre lovang. Chuanna a tana hman satliah a nih mai hmel a. A han enfiah kual vel thuak thuak pawhin Green-a sakawr chu sakawr lian tha tak, lal chuanna tur a tan pawh awm hliah hliah niin a lang satliah mai a. Chutia a han chian vel hnuah chuan a hlim ta riauva. Lawm angreng takin a rawn pen chhuak ta a.

‘Nih leh aw, Green !’ tih pahin a han nui hawk a. ‘Mahse, Zack Barclay-a’n tuma hnen atangin thilthlawnpek a dawng ngai lo. Ka han chuang ang a, ka dawrna che ang zat kha chu ka pe tho ang che.’

‘I sazupui chu han man fel hmasa phawt la,’ tia chhanna chuan a rawn pawtchat leh a. An inbiak tirh atanga chu Slash 8 daido pa awmdan thutak ran mai avang chuan Barclay-a rilruah chuan tlemin ngaihthat lohna a rawn awm leh deuh a.

Sudden-a chuan sakawr lakam chu Barclay-a hnenah hlanin a inthiarfihlim ta a. Chuveleh Hanging Rock tualchhung mi lo pung khawm zel te chuan inchawina an lo tan ve nghal a. 

‘Sakawr hi a neih theih chuan dollar nga ka thap e’ tiin pakhat chu a lo au lauh a. chutah a tawn tawnin inthapna chu an nei nghal luih luih a. Barclay-a’n Sudden-a hnen atanga sakawr lakam a han lak veleh atang phei chuan inthapna pawh a sang chak kher mai. Chutah zin rahchhanah chuan a ke a han nghat chho tan a. Sakawr bulah rawn ding chiah tihah chuan chu sakawr chu a rawn vir zawk a, a then thu a, Barclay-a ban chu inchi tlemte in a rawn hap thelh nghal fua a. Anchhe phuhchhuak chungin chu pa liana chu a tawlh let dawrh a. Pawisak nei lo hmel zeta Green-a lo ding chu no lo zetin a va melh a. Mipui chu an lo nui lum nghal hul hul a. ‘Barclay-a hi Sakawr chunga a chuan kai theih chuan a let hnih zelin ka thap e’ pakhat chuan a rawn ti leh a.

Chu aw a han hriat chuan Barclay-a hmel chu a thim nghal khuih a, a nghawng thazam te chu a rawn pawng tawlh tawlh a. Thawk lehkhatah a palen phu lohva rangin a zuang kai nulh a, a rahchhan chu rapin a ke chuan a han inchep nghet nghal a. Chu pa lianpui chevel leh rang taka a han insiamrem nghal chu ngaisang thawm a rawn chhuak hak a. Mahse, an phunri pawh a reh hman hma chuan chu ramsa lianpui chu a te tuarh a, thinrim theihtawpin a che nghal ta buan buan a. Boruakah chuan rang tak takin vawi tam a zuang zawk zawk a, thir ang maia khawngin a tla ding leh chawt chawt a. Boruaka a zuan kan pah chuan a tum nghawrna avanga a chunga chuang tana insiamremna hun pe duh miah lovin a taksa chu hma zawng te, hnung zawng te, saisir zawng tein a thing pah chiam chiam bawk a. Barclay-a ke veilam chu rahchhan atangin a phawng ta thuai a. chutah dinglam, second hnih khat kar lekin thil nih tur ang chu a ni zo ta….

Chu pa lianpui chu hnung lamah a eu awrh a, a ke chu a vawr khamphei zawk a. Na zeta chu ramsa boruaka a zuan kan leh zawk lai chuan Barclay-a chu sakawr zin atang chuan a thlawk chhuak nawlh a, pawnchhe tumtel paih ang thlawrhin leiah chuan a tla ta a. Thinrim meng bial pawp pawp chungin chu sakawr chuan leia let reng pa chu chil zui nghal a han tum a, chu ransa leh mihring inbuan tawk lo lutuk  thelh tur leh chu ransa thinrim tlemdai tur chuan a pu chu a rawn zuang phei ta zawk a.   

Thu a han pe that a, chu ramsa ropui tak chu a ding ta hle hle a. Chutah, a beng bulah a han hrilhru leh sap a, Sakawr thlunna thing khamphei lamah chuan a hruai kir phei leh a, a ke hnunglam tihrawlte chu a la khur zawih zawih a. Mipui ho chuan chu sakawr chu hmun an lo kian sawk sawk a. An makti lutuk chu an reh thuap mai a. Tumahin Barclay-a pawh chu an lo ngaihven tawh lova.

 Box B neitupa chu a tlakna ah chuan a let reng mai a. Tumahin tanpui tumin an rawn ngaihven lo. A kamsir atang chuan thisen a rawn far zaih zaih a. A hmel chu a dang var pap mai a. Tarchhia ang maiin muang chang leh sil thumin a rawn ding chhuak tuih tuih a. Vaivut leh thisenin a bawh thur mai bawk a. A mawza te chu a thler hne hnu mai a. Huatna namenlovin a lo khat ta… Chutah,  a hmel puthmang a lo inthlak a, anchhe lawh chungin a kawr awm chu a han keu a, ka kut chu a koki lamah a han phar a, hnarngul chen lek, a laite (Derringer) hlauhawm tak pairuk chu a han lek chhuak ta a. A tum chu a hriat reng mai a. Sakawr leh a neitupa chu thah a tum a ni. Slash 8 pa darpharh hlai tak lah chuan rem tawkin a chhawn van mai si a. Chutah a kut tangte chu a han hum ruh a, thinrimna avanga khawhmu lo lekin a hmehperna chu a kuai tan ta a. 

‘Thlauh rawh !’

Chu vauna awka vawt raih mai leh thihna rim nam ram ram chuan Barclay-a thluak nu but chu chemte ang maiin a rawn chhun harh zawk a.  A han inher chuan Dave-a .45 puakruk kausa kua chuan zawn em em mai hian a lo bih heu tawh mai a.  Chu cowboy chu tuma hmuh lem lohin Grace Tate-I sakawr kaiin a lo thleng phei a, chu paliana thil tum dan chu hriaiin, a hnunglam atangin a lo veh phei a lo ni a. Barclay-a chu a chhungril a tlangkang so tur ang maia sa pup pup chungin a in thunun hram hram a. 

‘Aw, han che zui talh la chu.. kah thlak sak che ka chak nen’ Dave-a chuan a lo ti bap a. 

Green-a pawh tunah chuan a rawn inher tawh a. Pen thum leka hnaiah chu Rancher hrawl pui chu a han hmachhawn a. ‘Hrep tak che hian !’ Barclay-a chuan a lo ti tuar a. Kha sakawr man atan khan sangkhat ka pe ang che, kahhlum atan pawh ka duh reng reng !’ a han ti a.

I hloh chiang kuan em kha maw, Barclay.’ tiin Green-a chuan hmusit zetin a lo chhang a. ‘Ka kawng atang hian inthirfihlim mai teh: rah hrual che hi ka chak lem lo a nia’ tih pah chuan Barclay-a hmel chiai buai nuai chu melh zui tawh lovin Sudden-a chu a inher a, Sakawrah chuan a invawrh kai ta nawlh a. Chu ransa dum lianpuiin a beng pawh tiphu chin eih lova a pu rihna a lo dawngsawng chu a hmuhin Barclay-a chuan anchhia a phuhchhuak leh sup a. Chung mi pahnih te  kawtthler vaivut dai phei a, hotel lama an kal chu a thlir zui vung vung a. Chutah chiah chuan chulai hmun a an rik laih laih na boruak chu Hotel atang chuan chiang takin an lo hmu vek tih a hre chhuak nghal a. Tate-I chu kawtah chuan a lo ding vang tawh mai lehnghal a. A lo hmu vek angem aw… ? A lo hmu lo a nih pawhin Pi Mulvaney-I chuan a hrilh phur khawp ang tih a hre mai a. A chhan pawh an inkawmngeih lem loh avangin.

Hotel pana kawng an paltlang pah chuan Dave-a chuan a thianpa hnenah chuan, ‘Mani inthah I tum em ni.. Barclay-a te ang pawisak neilo mihring te I hnungchhawn mai le ?’ a han ti a. Green-a hmel chu a thutak ta hle a, ‘Dave, ka lawm tak zet a ni—’

‘Khatiangin awm tawh reng reng suh ka ti che a nih chu,’ tiin a thianpa chuan a thusawi lai chu a lo pawt chat leh a. ‘I duh leh kan nula chu han ko chhuak la,. Kha utawk tur neipa kha ka han chheu darh nghal law law lo chu pawi ka ti tak tak a ni.’

‘Tunah chuan engto em em a tul tawh loh hi,’ tiin Sudden chu a lo then tha a. ‘Kan sap lalnu ropui tak lakah buaina tawk fang chu kan neih tawh kha. I awm loh hlanin a thian tha ber nen lah chuan kan lo inbengberek chiam mai leh nghal a.’

‘Barclay-an a hrilh apiang hi a awih vek I ring tak tak a law, Jim?’ phawk deuhin Dave-a chuan a han ti a. ‘A chhelo hran lo hle bawk si nen —’ a han ti zui zat a.

‘Nangmah khan zawt ve mai la ti nia,’ tiin Green-a chuan a lo thurawn a. ‘Slash 8 a kan hawn kawngah pawh hian a tu mah mah hi min biak lumlam tehchiam pawh ka lo ring lem hlei nem.’

Dave-a’n Grace Tate-I chuanna tur sakawr a kaih chu a pek phei theih nan kawng a han kian hlek a. A thianpa phur hmel leh a mitmeng helhhawlh angreng taka thiana va siam tuma a che vel chu a lo thlir reng a. ‘Tichuan, khatiang khan maw I han chhai vel a. A tha e, I duh dan ang chuan thil a kal zel mahna, Dave’ a han ti nauh nauh a. 

Kawtthler lehlamah chuan Zachary Barclay-a chu a lo inthuhun fel thei tawh a. A thawmhnaw a vaivut kaite chu a han bengfai tan ta a. Nui deuh sung chungin a lo thlirtute lam chu a han hawi a. ‘A tha e, thiante u, khatiang khan ka che chhe fo bik lem lo a nia. Mahse, ka titha ve thawkhat tho a lawm ti rawh u’  tih pah chuan Dutchy-a saloon kawngka lamah chuan a pen phei a. La inbenfai thuak tuak pah chuan. ‘Ti teh u I ngaihtuah tlang teh ang u, heath hian intur ka lam ngai vak lo na a, Hanging Rock tuallai vaivut han bar teuh hnu hi chuan Diego a hnena kal pawh ka peih tawh lo e a.’ tiin Saloon pawn lama la ding ho lam chu a han hawi a, ‘Keimah ang chanve tluk chauh pawha in tuihal chuan, chak zualpui chu I han inhnangfak ang u hmiang. Zack Barclay-a hmingin intur chu I han khulh hlawm ang u.’ a han ti a !’

Chu rawtna avang chuan Saloon vawt ruih mai chhunga mahogany (Thing chi khat hming) Bar lam chu an rawn pan nghal hum hum a. No hnih no thum a han tlak hnu rei vak lovah chuan Barcay-a pawh chuan infiamna chi khata a hloh tu zawka tang satliah ang mai a a inngaiin a dam ta deuh a. Amah an fakna thawm ri vel avang chuan a hlim ta viau a. Ka ransa nena an inbeihna ah khan vanduai thlak taka zin rahchhan a a tan thiam tawk loh vanga tla hma satliah ni maiin a in ngai ve thei ta a..

Bar lehlam, Barclay-a leh a chekkawi hote awmna atanga hla deuh ah chuan, Dutchy-a leh mi pahnih khat, Green-a kahhlum ngei tuma Barclay-a silai a phawi lai mitmeng lo hmu chiang em em tute chu, an lo titi ve sap sap a..

‘A hnung lam atang khan a thal tawp tawh mai dawn emaw ka lotia,’ pa pakhat chuan a lo ti sap a..

‘A thurualpuipa kha a lo awm hnai hlauh a, Green-a kha avannei hle niin a lang,’ tiin midang chuan a lo belhchhah ve leh bauh a.

‘Zack-a kha a vannei ngawt zawk a lawm,’ lo tawng hmasa zawk chuan a lo ti ve leh a.. ‘A sakawr kha a kap hmasa a nih chuan, khapa Green-a khan a phin darh chiang ngawt ang. Khatiang buaina ang chi chinfel dan hre tak mi niin ka hre tlat. A silai te kha, inchei nan ringawta a pai chu a nih loh hmel a ni.’

‘I ti dik ang ka ring,’ Bukhart-a chuan a Bar hru hauh hauh pah chuan a lo ti a,. ‘I ring sual lo khawp ang. Tin, kha tiang taka a chaldelh avang khan Barclay-a pawh hian a ngaidam lo khawp ang’ a han ti a.