Strikes Back 7

Nilaithawhtanni vawihnihna a lo thlen apiangin, khaw awmdanin a zir a, Kawng lama mawhphurtuten an ruahman angin, Santa Fe leh Las Cruces inkara vei thin Stage Coach (Khualzin phur Sakawr tawlailir) chu hmarlam kawng a zawh zel pahin Hanging Rock khua chu a rawn tlawh thin a. George Tate-a an vui tuk leh nilaithawhtanni chawhnu lam dar hnih a rik atanga rei vak lovah pawh chuan, Hanging Rock khawtthler chu a rawn zawh leh bup bup a. An driver Johnson-a hi,  nachhawkna chikhat a ngainat em avangin khawtual mi ho chuan  ‘Rye-a’ tiin an hre ber a. Vaivut khu rum rum karah a sakawr thlan hluam te chu han pawhdin pahin, a tawlailir brake (tihdinna) sei ruang mai chu a han kuai rawp a. A fukna (tawlailir hmalama a khalhtu thutna sang pir deuh bik) chung atang chuan rawn zuang thlain, ke a kalna hnaih ber Coach kawngkhar chu a han theh hawng  nghal a.

‘Hangin’ Rock chu a hun takah kan thleng e !’ tiin a han au a. ‘Inhnawhpuar nan leh Sakawr thlak nan minute 30 chhung aw !’

‘Rye’ Johnson-a chu, a riltam dangchar thu chulai vela lo awm khawm ho hnena han phulpui hlut chi mihring a ni lem lova, chuvangin, khualzinte pawh anmahni a an bungruate lo inngaihtuah a, senghawi ngaite lo inbuaipui mai turin a kalsan nghal hmiah a. Chulai hmun, Stage lo din fo tawhna bul chiah a a mah lo lawmve niawm taka lo ding hlim khup mai Dutchy-a Saloon lamah chuan a phei ta tuih tuih a. Khualzin ho pawh chu an zinkawng thui tak, hrehawm leh chep tak atanga hahdam turin hreh hmel takin an rawn zi mar chhuak taih taih hlawm a. A rawn chhuk hmasa ber chu Drummer (khuang vaw thiam)  ni ngei tur hi a ni a. A kut thlan dup mai a bawm pakhat kuah chungin a rawn chhuak a, bungraw dahna atang chuan a ip bah chi chu a han pawtchhuak khu rum rum a, a han hawl fai pah nawk nawk a. A hnungah chuan sumdawngmi tih hriat tak thawmhnaw duma inthuam hi rawn chhuakin, kawtthlera thil tulte ti a a vei kual nghal thar thar danah, khua chhuahsan leh nghal tum niin a lang a. Dan pangngai anga Dutchy-a bathlara Stage lo thleng lo chiau au tura mipui lo dingkhawmte chuan, chupa chu an lo enzui zuai na a, mi pakhat, a taksa inthen vel atanga palian leh rit tawk tak tih hriat tak lam chu an bengkhawn leh ta thup a. Thuneihna engemaw riau a thuam mihring, lukhum parh dum hlai hlep hlawp khum, maimaw puan tha chi a siam kawr nghawng nei ha leh nghawngawrh phe hlap hlap mai a ni a. Gambler (Pawisa khel mi) hlawtling thawkhat tak mahse bansan tawh niin a lo thilrtute chuan an lo hre hlawm a. 

A bungraw lek vel dan atanga mi chaldelh deuh run mai chi ni lo phei se chu, han belhchian chuan, a thawmhnawte chu vaivutin bawh paw hle mahse, puan tha chi leh mantam a siam tih hriat ngawih ngawih hi a ni a . A pheikhawkte pawh chu thlaler vaivut in a nihna angin lantir lovin, thim deuh bul mahse, savun tha chi a siam a ni tih hi a hriat hle bawk a. Chupa hmelhmang leh hmui pianzia atang chuan tawnghmang thiam leh kimtlang chhelo angreng tak niin, a sum leh pai neih ang pawh awmze nei tak a hmang chi niin a lang a. A pumpui thuin, hausakna leh thuneihna a thuam, a pian hrawl tak nena inhmeh tura chu thil chu hmang tangkai thiam tak niin a lang a ni.

Tunah tak erawh chuan a hnunga hmeichhe te lam leh tuihnai zet lam chu hawiin, a bungrua te Stage Coach atanga hlan thlak pui pahin, a hmai buang sen deuh char chuan nui hmel a pu mek a.  Chu hmeichhia chu kum sawmhnih ral kai manglo niin, chu paliana hnenah chuan lawmthu hrilhin a han nuih sak a. Chu a chet dan chuan, chhehvela awm te zawng zawng pawh chu a chhiahhlawhah a siam nghal vek a ni ber e 

‘Ka lawm lutuk,’ a han ti a, a nui sak a ‘I hawihawm hle mai. Kawng tluanin min uap lo la chu zinkawng hrehawm tak a nih dawn hi. Mr. Barclay.’

‘Ka nuam tih zawng tak a lawm, Miss Tate,’ tiin Barclay-a chuan urhsun zeta chibai buka kun chungin a lo chhang let a.. ‘Zack ti a min koh hi ka duh a. Helai hmuna I awm chhungin kan inhmuh fo ka beisei.’

Chu paliana tihtakzetna awka a vang chuan nula chu a sen tan tan a. Chu thil hmuh hrehawm lo tak avang chuan a chhehvela lo thlirtute lam pawh chu Barclay-a chuan a hrechang tawh mang lova. A kut piai ri fak pahin thupek a han chhak chhuak leh nghal zat a. ‘Nang kha, Lady (Hmeichhe zahawm chin kohna) ipkhai hi la la, Hotel lamah lo va kalpui teh !’  Thupek zawm ngal zar zar tur chhak chhuah chu a lo chin than tawh leh a nihphung ve reng a ni a. Midang laka thupek chu nise, tuna mi pawh hi zawm nghal vat a hlawh ngei ang le..

Barclay-a tana vanduaithlak takin, zahpah lemlova a tirh ngawt pa chu tu dang nilovin, Grace Tate-I’n a lo thlen tur thu a thirhrui hmanga a rawn hrilh avanga amah hmuak tura Dave Haynes nena khua a lo kal, Slash 8 daingul thar chu lo niin !. Intipasaltha taka Nula a lo chiau au lai chu aw vawt raih maiin a rawn tihtawp takah chuan, Barclay-a chuan a tih fuh vak loh chu a hre chhuak ve chiah a.

‘Helai phairuam lalpa hi niin I inngai a ni maithei a. Pu a. Mahse, I chhiahhlawhte chu kan ni lo aw  !’

Chutianga amah tihchhan deuh awka a han hriat chuan Barclay-a chu mak tiin a rawn vir zawk a, Sudden-a chu a hmain a lo la hmu lova. ‘Khawi lam ramhuai nge I nih a ? ’ a han ti leh puat a. 

‘A tha e, ka han sawi hmawr hmuh ang che: nangmah ngaisang tute zinga mi chu ka ni lo,’ tiin chhanna a han dawng leh a.

Thudang sawi leh tawh lovin Slash 8 pa chuan a darin Barclay-a chu a han nek sawn deuh a, chu nula tuaitir te hmaah chuan lukum phawkin a va inlan a. ‘Ka hming chu Jim Green a nia, ka pi. Slash 8 hi ka lo enkawl mek a. I inpeih veleh Ranch lama kir turin tawlailir pawh kan rawn keng a. Mahse, han inhnawhpuar leh hahchawlh zawk I duh ka ring a, Hotel lamah pawh ruahmanna ka lo siam diam a sin’ tih pahin a khabe chuan kawtthler lehlam chu a han hawi a. A tawng tawp lamah chuan a nui sak a, ‘ Engpawh nise I duhdante chu han sawi la.’

Grace Tate-I chuan dam raihin engemaw chen a han thlir vang vang a. Green-a koki chung lam atang chuan Zachary Barclay-a hmelhmang buai nuai mai, buaina siam duh mai hmelpu chuan a mit a la leh a. A vua leh vangte nena Hanging Rock kawthlera buaina siam bengchhen nghal rum rum mai chu duh lovin leh buaina so chhuak mai thei chu thelh turin Sudden-a banah chuan a vuan a, ‘Ka lawm e, Mr. Green, Mr Barclay-a hnenah hian chhunchaw kilpui ka lo intiam tawh sia, nakin deuhah Hotelah chuan min rawn lam mai thei lawm ni ?’ a han ti a.

‘Ngati maw, tehreng mai, Ka pi.’ Sudden-a chu chu nula aw dam raih mai leh Barclay-a nena awdun zel a duhna chuan a tibuai deuh hlek a.  Mahse, engmah a sawi zui ta lo. Kal kian mai tuma a inher lai chuan Barclay-a hma lamah a lo phei thuak a. A rawn hmachhawn zuai a..

‘Chu.. Green-a maw I nih,’ ke per dat pah chuan a han ti a, ‘I chungchang hi ka lo hre tawh a sin.’

‘Chutiang tho chu ka ni ve e,’ tin Cowboy chuan a lo chhang a. Chu awka naran tak chuan Barclay-a ngaihtuahna buai nuai chu a chingfel hran lem lo. Sudden-a chuan kal kian a han tum leh a, Chu Rancher chuan Sudden-a banah chuan a rawn vuan ta a. ‘Ngawi lawk teh.. rei lote chauh’ tiin a lo pawt buai leh a.

‘I kutbawr kha lasawn nghal rawh,’ tiin Sudden-a chuan a lo vau ta chhak a, a awka chhuak vawt raih avang chuan Chu Cowboy banah chuan tek a rawn tla ta emaw tih mai turin Barclay-a chuan a kut chu a dah sawn rawk rawk a. Chu Slash 8 pa in no lo zeta a melh reng avang chuan phur lo takin a inthiarfihlim ta zul zul a. Thudang phuhchhuah leh tur a ngaihtuah chhuah hmain Sudden-a chu mipui karah chuan put bovin, Dutchy-a saloon ah chuan a lut ta a.

Chu lai tak chuan, a lo thlirtute chuan chu paliana hmela thinrimna namenlo leh a inbengdai hram hram lai hmel chu an lo hmu thei a. A taksa hrawlpui chu a thinrim insumna avang chuan a inthing nawk nawk a. Stage atanga lo thleng ve Drummer pa pawh khan chu thil thleng chu saloon tukverh atangin a lo thlir ve reng a. Thil thleng lo hmu ve tu pa pakhat lam chu a han hawi a, ‘kha tiang zawnga tawng khum kha chu a tih chi vak dawn lo a nih saw’ a han ti a.

 ‘Hram tlahawlh lutuk lo la, Dixie,’ chu pa chuan a lo ti hruih a. ‘Saw ta mi saw Zack Barclay a nih saw aw, he lai velah hian a tam viau a nia,  ‘Zuang rawh ule utawk ho’ a tih apiangin ram hrang hrang pathuma utawk rual ho chu an zuang suau suau thin a nia. Lo ngai reng rawh. Khatianga Zack Barclay-a tawng khum hnua pang hima kal kiang thei mihring kha I hmu zen zen lo ang’

Chu Drummer chuan Zack Barclay-a dar pharh chhah mup chu a thlir zui vung vung a. Ani chu khawlai khu zetah chuan Khualbuk lam panin Grace Tate-I chu a lo  zui phei mek a. ‘Ani nena buaina neih chu ka duh lem lo vang’ tiin a han thaw hawk a.

‘Ti reng reng suh ang che!’ tiin thurawn khal ngengngawng tak a han dawng zuia. ‘Saw pa Green-a saw chu ni ta ila, Life Insurace (thih palh thuta hlawkna lo kal thei chi inventhawnnna) lam ka ngaihtuah nghal chung chung ang mawle.’

Chu Drummer mit chu Slash 8 daingulpa, bar nghenga Dave Haynes-a leh Dutchy-a nena lo titi sap sap lamah chuan a han fu leh a. A silai pai fual takte, a kawng fek rat leh darphar hlai hlap mai te, a ruangam sek phiar fat maite a han hmuh chuan a lu a thing nawk nawk a.

 ‘Engtizia nge nil eh ta ?’ tiin a bula mi chuan a han zawt a.

Chu Drummer chu Sudden-a dinna lamah chuan a han bu nghat a. ‘Ngaihtuah ve mah teh, saw pa saw tihbuai ka duh lo lehzual’, a han ti a.

 A hnu chawhnu lam deuhah chuan Dave-a leh Sudden-a chu Hotel kawtah chuan an sakawr atangin an chhuk a. innghahkhawmna pindan nuam angreng takah chuan an lut chhova. Chuta counter (Khualchhawn dawhkan) ah chuan dar hmerik te tak te a lo awm a. Dave-a’n dar a han tihrik takah chuan in hnung lam atang chuan an rawn chhawn nghal vat a. Irish nu upa lam pheikhawk khawro deuh tawh bun Pi Mulvaney-I chuan a lo chhuah chhoh thuai dawn thu a rawn hrilh a.

‘David,’ tih pahin a rawn en zauh zauh a, Anmahni tlawhtute chu a han hriat chian chuan. ‘Ekhai.. min va han theihnghilh rei ve.  Engatinge, chhun chaw fak tura in rawn kal loh reng reng a?’

‘A ril a tam vak lo a ni, Ka pi’ Green-a chuan a lo ti a.

‘Buaina te pawh kan han nei ve leh neuh neuh bawk nen, Mrs. M.,’ tiin Dave a chuan a rawn belhchhah ve leh a .

Chu nu tha pui mai hmel chu a lo ngui sawt a. ‘Nia.. George Tate-a tualthih thu ka lo hre ve chu ka tuar ve ngei mai’ a han ti a. ‘Kha thil thlen ni kha Khawtlang tan pawh ni lungchiatthlak tak a ni’ A han chawl det a, ‘Tate-a leh Barclay-a hian inremna chawhlui an kil dun hun hi hmuh ka lo inring viau nain, a thleng dawn ta lo a nih hi — David, I thianpa nen khan min hrethiam dawn nia aw.' tih pahin chik fe in Dave-a chu, Sudden-a a hmelhriattir lai chuan a lo en a.

 ‘Hei le, hunchhawn ram ang maia pa hmel un deuh hi Jim Green-a a nih hi, Mrs M,’ tiin Dave-a chuan chu inneitunu chu a han hrilh a.. ‘ I thenawm a tan a, Slash 8 daingul nih hi a tum mek a. Mahse ka vaukhan lawk ang che. Card a hmuh tawh chuan a buai chhe der a, Zu lam hi a duhrum rut bawk a. I fak vak erawh chuan a tuk lawkah khua hi a chhuahsan vang vang mai ang.’

‘Tak zet maw ,’ tiin fiamthu titak deuh a ursunsun angreng takin chu nuthlawi chuan a lo chhang a, ‘Slash 8 midang ho ang chiahin ka lo enkawl ang a, a kal hla thei lo tawp ang.’

Hlim takin an han inchibai lawp lawp a. Chutah tak chuan chu nuthlawi awm dan vel chu a mizia tak tak nen a inpersan hle tih a hre mai a. Chutah, ‘Duh leh intur man chu  a barrel zawngin ka pe zel mai ang chu, ka nute’ a han ti ve a.

Chutia an hnam ziarang ang deuha an han che vel a hmuh chuan Mrs. Mulvaney  chu a lo nui var var a.‘Aw, In duhawm lutuk, David. Kan pa boral ta Pu M-a pawh min tihrechhuak rum rum a lawm. A thlarau chu muangten chawl teh se. Mahse, he nu khawhar tak lenpui tur hian in lo kal khat hle mai. A.. in Miss tate-I chu ka han ko ange aw.’ a han ti a.

Chutia pa pahnihte makti a an men ran kual vel lai chuan an mahni kalsanin in hnung lamah a relh bo ta a. A hnu lawkah Grace Tate-I, a hnung lawka Zachary Barclay-a nen, inkalpawhna ah chuan a rawn lang a, han mangtha pahin chu paliana chu a beng bulah kun hniamin engemaw hi a han hrilh sup a.

‘Lawmthu ka hrilh nawn leh a che , Mr. Barclay,’ Grace Tate-I chuan a han ti a. ‘I ngilneiin, min tanpui nasa hle mai, ka theihnghilh miah lovang’

Barclay-a chuan Slash 8 pa pahnihte chu no lo zeta melh pahin a rawn kalpel phei a, khawtthlerah chuan a chhuak phei ta  a. Grace Tate-I chu rawn kal hnaiin a kut chu Dave-a  vawn turin a rawn pe.

‘David Haynes-a I ni ngei ang tiraw,’ A han ti hluai a. ‘Ka pa hian Ranch ami tute pawh hi in chanchin a sawi nasa thin a. Chuvangin, ka nel sa viau mai che a nia.’

Dave-a hmel pawisawi lo tak chu a lo sen tawn tawn a, a kut chu lo vawn pahin, a lo seh palh mai ang ti hlau niawm fahranin, a han thing a. Chutah Grace Tate-I chu Sudden-a lamah a han inher hlek a. ‘Nang hi James Green-a maw I nih. Silaia eizawng mi I ni tih min hrilh a.’ Green a chuan a kut a rawn phar ve miah lo tih chu a lo hmuh hmaih lo reng reng a, nuih zat hmel deuhin a dar a han chin ak ringawt a.  ‘I thu hriat chu a hrilhtu che a zir a niang chu’ zawi sapin a lo ti a. 

Hmeichhia chu a han petek deuha, a insiamrem leh thuai a, ‘Ka thil hriat atangin thil ka zeldin ve ngai lova, Slash 8 nena in inzawmna hian a daih rei vak tawh lovang, Mr. Green’ a han ti a. Chu thil chu Sudden-a chuan a chhang lem lo. Mahse, Dave –a chuan hrilhhai zetin chu nula chu a en ta reng mai a.

‘Chu.. chutiang chuan I ti ngawt thei dawn em ni,  Ka pi ?’ a ti chhuak thei hram a.

‘Ka thei a. ka ti a ni,’ Grace Tate-I chuan a lo ti tang at a.

‘Mahse,  Jim-a hi hetah  —’ a han tih tan leh lai chuan, nula chuan ‘Nakinah Ranch ah kan sawiho thei alawm. Chutah chuan a rang thei ang bera thlen ka duh. Helai phairuam dinhmun hi min lo hrilh hre nual tawh a. Tin, ka pa thihna chungchang pawh. In tawrhpuina pawh ka mamawh hran love’, tiin a lo pawt chat leh a.

’

Dave-a’n a ka an leh zuau lai chuan a kut chu a han vai a. ‘Hun engemaw ti atang khan ka pa thih tur chungchangah hi chuan ka lo inbuatsaih tawh a. Tunah a lo thleng ta a. Helai hmun mi  an arte thih mai maina hmun hi engvang damchhan tlaka ngai tlat nge maw a nih tih hi ka hrethiam thei ngai lo. A vuina huna ka awm lo chu pawi ka ti a ni deuh mai tih loh chu eng vakah mah ka ngai lo.

‘I rawn thleng vat hi mak ka ti angreng,’ Sudden-a chuan a lo ti bauh a.

‘Kei pawh,’ tiin vawt raihin a lo chhang a. ‘Helai Pathian hnuchhawn rama titi dan vel hi ka lo hriat thin dan ai khan a thing daih mai. Amaherawhchu, helaia ka lo kalna chhan chu Sweetwater phairuama buaina awm zawng zawng hi a rang thei ang bera tihtawp a ni mai’

‘Chumi kawngah chuan engtiangin nge rawtna I han neih deuh a, ka pi ?’ tiin a aw a maktihna lang deuh hlekin Dave-a chuan a han zawt.

‘Ka inchinfel theih veleh – Ranch hi hralh ka tum.’

Puka cheng hmanlai miin Rail Engine (khawl) makti lutuka an thlir ang mai hian Dave-a chuan chu nula chu a en tlawk tlawk a. A tawng leh hmain Sudden-a chuan Miss Tate-I ranch lama an phur phei thuai theih nan Tawlailir chu  la tura kal dun a lo rawt a.

‘Sakawr zin phah lo la rawh u,’ tiin a lo hrilh a. ‘Sakawr chung chuan dan ka la theihnghilh hleinem. Ka thawm-hnawte thlak zawk nan hun min han pe bawk ula.’

A thianpa in makti a chil lem ri khulh khulh chunga chu hmeichhia a lo la ngaihchan reng lai chuan Sudden-a chu a bu nghat a. Tawng tawh lovin an pahnih chuan kawngkhar lam an pan ta a.

Pawna an chhuah veleh Dave-a chuan a Stetson lukhum chu leiah a han paih tau nghek a,  vawi tam thinrimin a zuang nghal tawk tawk a.

‘I lukhum te kha I ti chhe mai mai ange,’ Suddena chuan a lo ti duh chauh a.

‘Huh? … Enge ? … Engvangin … Chu nu te reuh chu …….leili hriam reuh si, sual hmel reuh mang e, ka hmuh tawh zawng zawngah chuan meng pir  tak………... . .’

‘In sum teh….. in sum teh,’ tiin Sudden-a chuan a lo rawn a. ‘A thiamloh a ni hlei nem.’

‘A thiamloh a ni lo a…? A thiamloh a ni lo maw ? Sakawr zin tawngtawl tawh ang leka ngaiin a nih kha min biak vel…. Ranch hralh a tum thu te chu min la hrilh zui….’

‘A thei ngawt hlei nem,’ Sudden-a chuan a lo ti satliah a. ‘ inbengdai hram rawh aw ?’

‘Ka thei ringawt lo!’ tiin Dave-a chu a la sa hle a.. ‘Kha … nu kha ! Gila ramhuai ho zingah hmelthat  intihsiakna ah pawh tel se, a hnuhnung ber a ni ang.’ A thin so chu a phulpui zui bawrh bawrh a. Chutih lai chuan a thianpa  chuan pangngai takin a lo thlir reng a, a meizial chu zialin a lo zu hlat hlat a, engmah a sawi lo.  A tawpah chuan, Dave-a pawh eng tin tin emaw a inbeng dai chho thei ve ta a. A Stetson Lukhum chu a siam tha leh mawlh mawlh a. Green-a chuan then deuh tha chungin a thianpa tum deuh bura awm chu a lo thlir a. ‘Aw, engmah hi ngai ulh lutuk duh ma ta che, naute,’ tiin Dave-a chu a han hrilh leh a. ‘Khawpui atang a rawn kal kawng tluanin a benga thu lawilo fah char char tu Barclay-a a nei tih kha ngaihtuah la. He pa lah hi mahni ke hnuaia pangpar a nihna anga par tir mai mai tum lo chi a lo ni si a. Slash 8 pawh a la lei em lova, a mi chhawrte kan la ni hek lova, Miss tate-I nen pawh indawrin, an la innei em hlei nem.

Dave-a chuan nur deuhin. ‘Nia, chu chu a dik,’ a han ti sup a.

‘Ni chiah e. Barclay-a hian kuta thisen kai tlem a han tat ve hlek niin ka ngai mai a, chuvang a nia a han phul ve hlek ni. Miss Tate-I hian a chanchin kimchang a han hria ang a, a inthlak chiang khawp ang chu. Chuvangin, ngahnge sakawr zamtha tawk buatsaih saka I chuantir vat mai loh vang ni. Dutchy-a hmunah kan inhmu dawn nia.’

Dave-a chu a bu leh nghat a. ‘Jim, ka tihpalh, ka lo chiau ta hlut a. I han sawi takah chuan, I tidik a ni.   Barclay-a kha ka lo ngaihtuah miah lova.  A awm a ni. Nalh chu a nalh a ni tiraw ?’ te chu a han ti leh ang lawi a.

‘Chutiang zawngin ka sawi lo,’ tiin Sudden-a chu a lo nur deuh a, ‘Mahse, nia, a dik a lawm.’

Sen deuh tawn tawn chunga Dave-a sakawr dahna hmuna a phei hmawk hmawk lai chuan, then deuh tha chungin, Sudden-a chu Hotel bathlar atangin a rawn chhuk thla a, kawta sakawr thlunna hmuna a sakawr dahna lam chu a pan ve ta a. 

‘A la na ngang ngang hle mai tiraw, Night,’ tiin a sakawr chu  han hrilh sap a. Engpawh nise, a khaw hmuh a fiah vak lo a nih kha.. a duh duh a chhak chhuak mai a. Inchhungkur a thil engkim hming te pawh phuah thar vek a duh ta ve ang. Barclay-a hian thu a lo fah danin, a pa hian Jesse James pawh lo ruai ta se ti tha a ti zawk viau ta ve ang.’  a han ti a. Hrethiam ve niawm takin chu Sakawr dum chuan sakawr zin rahchhan a a ke chu a rawn seh fiam ve thuak thuak a. 

‘Nang pawh chu..?’ tiin Suddena chu a lo nur deuh a. ‘Vawiin chu thian ka tlachham hle mai.’

Chutia Sudden-a leh Dave Haynes-a te’n  Slash 8 neitu thar nena inhmuhkawmna an lo neih lai mek chuan, Zachary Barclay-a pawh chuan Interview a lo nei ve mek a. Chu erawh kawng tluana George tate-I bula a tawlh hruah hruah lai ai kha chuan nuam lem lo tak a ni. Hotel a chhuahsan hnu lawk khan Bank lamah  a phei tlang nghal a lo ni a. Chutah chuan Jasper De Witt-a’n a lo nghak a.

‘I va rawn inlan har ve,’ tiin De Witt-a chuan no vak lovin a lo chhawn a.

‘Vanneihna ka rawn tawng hlek a lawm maw le,’ tiin Barclay-a chuan phur angreng takin Banker chu a han hrilh a. ‘Ka chuan man pe a Santa Fe Stage Office-a ka awm lai khan, tu emaw chu a rawn lut ve a. Tu dang nilovin Tate-a fanu, New York atanga lo thleng hlimhlawl leh hmanhmawh fe a Hanging Rock lam pan nghal duh a lo ni a. Ka chuanna a chuang ve nghal turin ka ruahman ta nghal a.’

‘Grace Tate-I chu hetah a awm maw, hmm ?’ hlim deuhin De Witt-a chuan a han ti a. ‘A kiangah kawngtluanin hun I rawn hmanga maw ?

‘Kawngtluanin, meltin leh darkar tinin maw le,’ tiin induh deuh takin a lo chhang a. ‘A bengah pawh thawnthu ka rawn fah khat viau mai. Helai vela thil kal dan min rawn hrilh chu I titha e.’

‘A lo dawngsawng tha maw?’ De Witt-a aw chu Barckay-a beisei ang chuan a phur tehchiam lova. Mahse, a chhunzawm zel ta tho a. ‘Hnang varin ka hling fel diam tawh mawle,’ uang zetin a han ti a. ‘Hotelah ka rawn kalsan deuh chiah a ni. Buaina chhuak tur tihtawp dan tha ber chu ven hi a ni tih a pawm tawh a. Dan hremi an rawih lai a bia anga, ram man pawh bithliah fel nghal dawn tih min hrilh a. Tichuan Slash 8 chu ka hnenah a hralh ang. Slash 8 atang chuan buaina dang a tawh chu ka ring tawh lo lam a ni. Enge I ngaihdan ? ’ tih pah chuan a kut chum buang chuan a khel a han beng thuk a. Hnehtu inti hmel takin a pu chu a han en a. De Witt-a awmphung chu chhete pawhin a danglam eih lova. Chutah Barclay-a chuan a din dan chu buai nakin a han siam rem a.

‘Enge … Enge ni ta a?’

De Witt-a chuan, ‘Tunah nula chu I lo hmin fel ta a. Engtinnge Slash 8 Foremen hi ram hralh tura inbiakna I neih pui leh tak ang tihah hian ka lo buai deuh hlek a,’ a han ti a.

‘Nula chuan hralh theihna a nei lo I tihna em ni?’ Barclay-a chu a thaw halh a.

‘Ni teh hrep e maw le,’ tiin Banker chuan a lo pawtchat a. ‘Enquiry neih a nih tum khan ka va hre chhuak chauh a. Rawn hriattir leh tur chein a tlai lutuk tawh sia. Tate-a chuan Nula in kum sawmhnih pakhat a tlin hma chu Green-an thuneihna pumhlum a chang ang tiin lehkha a lo siam fel diam a lawm maw le. Chuvang chuan, Green-a pawmpuina tello chuan Nula hian hnim pakhat pawt phawi tur pawhin thuneihna a nei lo.’

Chu thupuan chuan Barclay-a chu a ti ngawi hmak a. Ngaihdan dang a rawn nei leh a. ‘Mahse, a ram dahkhamna chu I kawl kha,’ tiin Banker chu a han hriattir nawn leh a. ‘I kharsak mai dawn lawm ni ?’

‘A dik a lawm, Mahse, Green-a’n South Bend lama ranrual hralh tura indawrna a lo neih te a tihhlawhtlin hma chuan ka ti thei lo. He thil hi a tih vaih chuan, Ba te a pe tla thei ang a, Slash 8 chelh beh zui theihna kan nei lovang.’

Barclay-a chu sual hmel takin a han nui tha a. ‘A ruahmanna chu kan kalsualtir theih ka ring.’ A han ti a.

‘Chu chu Linkham-a pawhin min lo hrilh tawh a sin,’ Banker chuan a lo ti ngal ngal a. ‘Kan Green-a hi dah tha tura tih a ni a. A aiah George Tate-a a han kap teh ngawt a nih kha. Tate-a hi thah a tul miah lo ! Rep char mai tur zawk a ni a. Green-a erawh him takin a la leng vel a. Amah dahthat dan tur chungchang hi vei berah in nei hlawm pawhin ka hre love a..’

‘Hrep tak chuan, Link-a tihsualah chuan min mawhpuh thei lovang.,’ tiin Barclay-a chu a han insawi thiam a. ‘A thiltih dan dik taka enfelpui turin awm pawh ka awm hlei nem.’

‘I mi leh sa a la ni reng a lawm, Zack!’ tiin De Witt-a chuan a han vaukhan deuh talh a., ‘Amah nena kan inhmuh hunah chuan insawifiahna felfai zawk a neih a ngai ang aw.’

‘Hetah chuan awm ila chu, thil kal dan chu a dang deuh ang mawle,’ tiin Barclay-a chuan Banker chu  a han hrilh a.

‘Ka ring lem vak lo e a,’ tiin chhanna kha fak mai a han dawng a, ‘Hun remchang chu I la nei em em ang. Chumi chhungin…..,’ tih pahin hmalamah thutna chu a rawn awn phei a. ‘Kansas khawpuiah chuan enge I va hmuhchhuah tak ?’ Barclay-a hmelhmang chu phiarrukna in a lo khat a, chutah dawhkanah chuan a va kun phei a. ‘I lo ti dik khawp mai, Seth—’ tiin a han sawi tan a, Mahse, chu Banker hmel lan dan chu phung ang maia a lo hlauhawm tak a vangin a tawp leh chawt a.

Chumi ni a a vawihnihna a tan Barclay-a chu kuttum thlawk dawn mai inringin hnung lamah a han tawlh let dawrh a. Pa liantak niin, kawtthlera in rum nuainaah chuan a che thei viau na a, De Witt-a mitmeng vawt leh hlauhawm lutuk hma ah chuan a tihrawlte chu a tuiral zo  niin a lang.

‘I ka ziap zuap tehhrep kha, Mawla !’ Banker chuan a lo ti thawt a. ‘Kha hming kha I hmang leh tih ka hriat vaih chuan, I lei kha ka pawt dawk ang a, keimah ngeiin ramsate chaw ah ka pe ang.’

Barclay-a chu a khur dur dur a, hnek chawrh ang mai hian a ban te chu a phar huang a. ‘Khai a … ka sawi tih pawh ka lo ngaihtuah miah lova … Jasper, ka tihpalh takzet a ni … a thleng leh tawh ngai lovang…. Pathian hmingin, Jasper. Ka dangnalah ka tawlhthlu palh a ni e.’

‘A tawpna ni rawh se,’ De Witt-a chuan a lo ti khar khar a, ‘Pu Barclay.’ A hminghmerha a han lam deuh kalh hnu chuan a han chawl det a. ‘He khua ah hian I hming diktak hi puanzar a nih chuan, darkar khat pawh tling lovah khaihlum I ni dawn a nia aw. Kha hming kha I phuhchhuak leh a nih chuan, I thi ang - muang changin..’

‘I — I ti awm lo em mai,’ tiin, an pahniha hmingchhiat theihna hum tum a nia lan tum hram hramin, Barclay-a chu a phun sup sup a,. ‘Chubakah… heng hi nangma tan a ka tih vek a sin .... ’ a han ti a.

‘Engmah ka tana tih I nei love !’ De Witt-a chuan a lo ti leh puat a. ‘Senso zawng zawng tumtu ka ni a, I silai kapthiamte ka ruai a, I ranch ka enkawl a, hmeichhia ka ngaihtuah sak thin bawk che a, I in tur leh I thawmhnaw inbel zawng zawng nen. Heng ka thil tih zawng zawng ngaihtuah hi chuan min pawisa lo deuh a ni.’ A mitmeng vawt raih chuan ngainep zetin Barclay-a chu a melh ran mai a. Chu paliana chuan engmah a sawi lo.

‘Ka sawi hi hre reng ang che,’ De Witt-a chuan a han ti leh a. ‘Ka lungawina ang chiah zelin thil ka ti ang. Tun dinhmunah chuan han chhawr zui zel che hi pawi ka ti hran rih lo. Mahse, ka rilru hi ka thlak thut thei a nia.’ tiin, awka hlauhawm zet a rawn chhuah a, tlema awka pangngai deuhin a han chhunzawm leh a, ‘Tunah, vawikhat leh — Enge Kansas khawpuiah chuan I va hmuhchhuah a ?’

Ui dawih zawk chin chauh hrep hnu, puitu thar hmu leh ang maia tlawm zun hian Barclay-a chuan a han chhunzawm hram hram a. ‘Ka sawi ang khan… I lo hisap sual love. Ruahmanna chu a tha tluantling khawp mai a, Surveyors (Ram endiktu) ho pawh thla khat hnuah kawng duansa zulzuiin an lo che chhuak thuai ang’. Thlaleh ah chuan helai hmun pawh an rawn thlen ngei a rinawm. Relkawng pawh an siam tan……’

‘I mit te zek zuk kha…. I bawng awrawl pui kha tizawi deuh rawh !’ De Witt-a chuan a lo ti sur sur a. ‘I thil chhar chhuah kha henglai Hanging Rock hrik ho hian an hriat ve vek I duh em ni a ?’

Barclay-a chu thupha chawiin a han phun leh sup a. Chu pa, dawhkan phena thu chu, mihring pangngai pawh ni a mawi lo, vangvat lianchi ni mai awm in a lang a, chapona leh induhtawkna a lo neih ve te a  han palzam hmiah hmiah lai chuan hrehawm a lo ti hle a. Theih nise, dawhkan pela va ban phei a, a kut lianpui hmang ngeia chu nghawng cher thang mai chu va reh an chawp chawp pawh a chak rilru hle a. Mahse, A thil hriat zawng zawng chu Banker chuan a hre ve vek zel a ni tih a hrechiang hle a. De Witt-a’n a tham behna chu a nghet lutuk a. A  pu sual tak chuan a nihna dik tak chu a hrechiangin, a duh hun hunah ah chu chu pholangin a thahtir vat thei tih pawh a hrechiang em em a ni.

‘Tichuan.. ’ tih pahin, thil buaithlak deuh a ngaihtuah changa a tih fo thin angin, De Witt-a chuan a kut phah chu a han ti zum deuh a. ‘Ruahmanna duang fel turin kar ruk zen zawn kan nei a.’ A han ngawi leh vang vang a. Chutah, ‘Nang, Ka thian bumro pa, heta tang hian chhuak vang vang la. Green-an South Bend lama ranrual a khalh ve leh a che nghal thei turin lo inring ang che. Ranrual an khalh chu lo tikhawbaw ang che. Green-a pawh dang ang che. I hrechiang takzet em ?’ Tate-a thuneihna nen a inthuam chuan Green-a hian thil a ti thei mah mah a ni. Green-a a awmloh chuan Nula hian ram hralh mai loh chu duhthlan tur dang a nei lovang.’ a han ti a.

Barclay-a chu a lo bu leh nghat a. A hmaite chu a sen hlur mai a. A pu in khawngaihna tel miah lova a diriam buan buan lai chuan a thinlungah chu pa huatna chu a so bulh bulh mai a.. Thian tha tak awka a rawn chhuah leh pawh chuan a thinrimna chu a ti dai lo kher mai. De Witt-a hian a ngeih vaklo tih ahrechiang a. Chutiang chiah chu ama rilru puthmang pawh a ni. Mahse a langah chuan, ‘Thildang a la awm em ?’ tiin a han zawt a. 

‘Lo ngawi hmiah la, ka la ti hausa dawn che nia. Chu chu hrereng ang che ’ De Witt-a chuan a han ti leh a. 

Barclay-a chuan a hnar a ni tawh a ni tih a hrethiam mai a. Thinur ap teuh chungin kawtthler lamah chuan a petek chhuak ta nawk nawk a. 

Banker Office-a sualna in thla a zar ruihna hmun atanga chhun nieng sa vawl vawla a han chuan chhuah chuan ngai a awh leh ta deuh a. Mahse, a lo induhtawk ve na chuan a tuarin, khawiah mah a zia awm thei tawh dawn lo a ni. Zachary Barclay-a chuan a pu chu thah mai pawh a duh a ni. Mahse, Chu thil chu a tih vaih chaun amah pawh a inthat ve nghal tihna a ni mai dawn tih a hrechiang em em a ni.

A rilrua De Witt-a tlawm lai hmel ngaihtuah pahin ‘Inbumna pakhat I hriat hmaih a la awm, Sakawlh pa, chu chu ka khawih chet vaih chuan famkhua I lawi nghal a ni mai. Ka kut lawng ngei hian ka la that dawn che’ a ti rilru mawlh mawlh a.

Mahse, a tulum chhuak laklawh a vang chuan ngai a awh mai thei lova. A kut te chu a han hum ruh a, a han ti pharh leh a. Mi tihnat tur, tihbuai tur leh tihchhiat tur zawngin Hanging Rock kawtthler vaivut zingah chuan a vâk ruk ruk a. Chulai tak chuan Dutchy a Saloon kawta Slash 8 daingul pa, a sakawr dum lian taka lo chuang kai mek chu a va hmu fuh a. Chulamah chuan a pen phei ta pawk pawk a.