Strikes Back 6

A tuk zingah chuan, Gimpy-a chu New York-a Tate-a fanu hnena thirhrui thawn tur leh Sheriff hnena Rancher thah a nih thu hrilh turin Hanging Rock khaw  lamah Sudden-a chuan a tir chhuak a. ‘Enquiry (Endikna) kimchang thei ang ber kan duh dawn a ni tih hrilh ang che,’ tiin Gimpy chu thu a chah thlap a.

“Saw mi thau mawl a saw maw,’ tiin chu Cowboy upa lam chu a han rum ngal ngal a. ‘Thu tihtlak pawh a chhakchhuak thei ngut ange maw.’

Sudden-a chu a bu nghat a. ‘I tisual tam lo mai thei ni,’ a han ti a, ‘Mahse, tihdan phung pangngai kan zawh ve phawt a ngai a, chubakah, Tate-a fanu helai hmuna a rawn thlen tak tak hunah engkim ziaka a lo awm fel thlap kan duh dawn asin, a ni lawm ni ?’

Gimpy-a chu phur vak lovin a han bu nghat a. ‘I ruahmanna hi chu a fel fai ang tih ka ring, Jim. Ka rilru hi te hi a mang vek mai….. engkhaw sawi set set lova sakawra chuan a.. sapa vah vak mai hi ka chak ber. He hun khirh namai lo takah hian enge kan dinhmun chiah tih pawh hi ka hrethiam tawh love a. ?’

‘Tuna kan hmuh ang hi a ni mai a,’ Sudden-a chuan chu zawhna rul tawk vel chuan a lo ti ve mai a, ‘Slash 8 kan thunun zelna tur kawng chungchangah hi chuan zawhna a la awm dawn chauh a. Tunah rih chuan midang chungchang kan engto vak hmain a hahdam thei ang berin thil kalpui phawt ang u.’

Chu Bawng enkawltu pa uaithla lam chuan a hnar han a tum dat a, Slash 8 enkawl chho dan zel tur chungchang a zawhna awm thei tam tak te chu a ngaihtuah ve a ni. Mahse, engmah sawi zui tawh lovin Sakawr zin a bel fel a, khaw lam panna kawng tum zawh chuan a inchhep chhuak ta a.. Darkar khat hnu velah chuan Tarpauline a uluk taka tuam Tate-a ruang chu Sakawr hnuh chi tawlailirah dim takin an hlang a. Chhawchhumpa chuan khalhin Gimpy a sulhnu zuiin Slash 8 hote chu an chhuak ve ta nghal a. 

Ralthuam famkim nena Slash 8 sakawr chung chuang rual ho khaw dai an rawn thlen meuh chuan Hanging Rock khua pawh an lo phusa nasa hle tawh a. Khawtual mi hawklak deuh deuh ho pawh chu Enquiry lakna tur Dutchy-a hmunhma lamah chuan thutna tha chan loh hlauvin an lo phu lui lui tawh a. Chanchin thar chuan khua chu a lo luhchhuah hneh tawh khawp a. chutah, Sudden-a’n enquiry neihna hmun tur atan Burkhat-a Saloon pawh a lo hauh fel tawh a ni tih thlengin. Slash 8 mite pawh chuan an tum ram chu ngui nghiaiin an lo thleng ta a. Chutia Saloon kawtkai vela an lo inhawrkhawm lai chuan Sheriff Brady-a pawh ke a kalna ah chuan a rawn phei charh charh a.

‘ Kha lo kiang deuh teh u aw!’ In ti pawimawh tawkin a rawn au a.

‘ Hnung lamah khan tawlh deuh ula ! khatah khan hmun awl kha zuah deuh teh u!’

‘A awm teuh hi maw,’ chulaia lo ding ve pakhat chuan a lo ti a. ‘Shady hi chu mi tam tak hen a ni bik a nia !’

Chutia a pianhmang tihchhan deuha an lo chhaih avang chuan Sheriff hmai chu a sen deuh tun tun a. Mahse, chulam chu ngaihthahin thupek eng eng emaw chhak chhuakin a phe buai zui ta a. Chu lah chu an lo ngai pawimawh mang si lova. Mipui awmkhawm chu an innek buai sauh a. George Tate-a ruang an hlan thlak a, Saloona chhunga an zawn luh lai te chuan hmuh chian loh hlauvin chulaia awm ho chu an in nek luih luih a. Slash 8 mi leh sate chuan a hlawmin an zui lut a. Chu Putar ruang an dahna dawhkan sir velah chuan an inzar pharh a. 

Brady-a chu Slash 8 mi ho hmachhawn zawngin, dawhkan veilam sirah thuthmun a han rem a. A dinglam chiah ah chuan Hanging Rock tualchhung mi pangngai, Jury-atana phuahchawp deuha an ruat ho chuan thutna an rem bawk a. Slash 8 miten an hriamhrei langsar tak tak a an rawn pai a han hmuh chuan, Sheriff mit chu vawk ang mai a a zim sa tawh nak a laiin, a han meng zim leh zual sawt a. ‘Nangni ho hi Enquiry –a rawn tel tur nge in nih indona rawn chawkchhuak turin in lo kal?’ a han ti a.

‘I tihtur chu ti la a ni mai, Shady,’ Gimpy-a chuan a lo ti hmak a. ‘Engti kawng zawng pawhin I tumdan ang chu lo do let turin kan in ring e.’

The Sheriff hmel buh deuh nuai chu a dang sawp sawp a, tial ruanin a aw a han thian hruk a,. ‘A nih chuan thu ula, Mac Donald-an thupui a han vai dawn em ni’ a han ti tham chul a. Hei hi official inquiry a ni a, pangngai takin thil kan ti ang.’

‘A tihzia ngawt ang chu !’ tiin inthlahrung lo zeta chhanna a han dawng leh a. ‘Rak khawtlai mai mai lo khan tan vat rawh !’

Hmusit awka deuha an rawn tihna avang chuan Sheriff chuan lungni manglo deuhin a lo melh ram ram a. Chu thu rawn chhakchhuak tupa lah chuan eng he hu ah mah a lo ngai si lova; Chutah Brady-a chuan Dutchy-a thing tuboh chu lain a hma a dawhkan chu a han chhu dap dap a ‘In hmuhkhawmna chu tan a ni ta,’ a han ti lauh a. ‘He hmunah hian Slash 8 neitu George Tate-a thihna chungchangah engtin chiah nge thah a nih dan hmuchhuak turin kan awm a ni.’

‘A tualthi a ni !’ Sudden-a chuan vawt raih hian a lo ti a. ‘A tualthihna chungchang a thudik hi felfai taka chhihchhiah a nih theih nan he  hmunah hian kan awm a ni.'

‘A tualthi I tia law, Pu a,’ Brady-a chuan lo ti khauh a. ‘I thusawi chauh hi kan hria a.’

A lo ngaithla tute ho chu thil hriat chian lehzual chakin an phun ri ta mur mur a, Suddena-a mitmeng vur ang maia vawt raih mai avang chuan an reh leh duak a. Ani chu rawn kun pheiin zawi sapin, ‘Chu.. dawt sawiah min ngai deuh em ni, Sheriff ?

Vawikhat dang leh atan Sheriff hmai landan chu a lo inthlak leh ta a, chhang thing hmuar paih ang main a dang lup a. ‘Tumah engtinmah ka puh lo a nia,’ a ti chul a. ‘Thil chiang tak kan hriat hma chu tu thusawi rinchhan mahin thu kan keuh thlu fel thei lovang ka tihna mai a nia.’

‘Tate-a hi a hnung lam atangin a mah leh amah a inkap lovang tih hi chu kan rin ngheh phawt a him ang.’

Patches-a chu a lo inrawlh ve ta a. Chu khaw doctor awka chhuak ro tak chuan Brady-a thusawi leh tur intintuah mek chu a rawn titawp chiang kher mai. Brady-a leh Sudden-a in chhan tawn vel chhung khan doctor chu Tate-a ruang chungah a lo thingthi ngar ngar a. Tunah chuan a lo dingchhuak tawh a. Sheriff chu chik fe in a han en vang vang a, ‘ In inpeih tawh tak zet maw..?’

‘ I tlak fel vat teh ang u, Patches,’ tiin Lawman chuan nghakhlel ang reng takin a lo pawtchat a.

‘Nang kha’— tih pahin sir lehlama thil lo chhinchhiah fel a thu mek pa pakhat chu dam dapin  a han en a. Chu pate reuhte chu uar taka lo buin, a la ziah bak a khupa thil chhinchhiahna lehkhabu lamah chuan a han kun a. 

Doctor chuan tawng hran tawh lovin Brady-a chu a han melh deuh bik a. ‘Enge hrilh tur che ua min beisei le ? Tate-a hi dar kar sawmpahnih hma lam ah khan mitthi a lo ni tawh a. A hnunglam, chunglam atanga kahhlum a ni. — chu chu henglai vela inthahna thlen dan tlangpui a ni a. Kah a nih atanga minute tlemteah a thi nghal niin a lang. Zawh belhna I neih duh takin, hei hi mitthi taksa silaimu in a sut dan leh a taksa chhunga a kal kawi dan atangte, mitthi kutke khawng tawh dan atangte a ngaihdan ka siam a ni a. Mi thiambik chu ka ni lo nanga, Rifle silai tlanglawn tak atanga chhuak silai mu in a tihlum a ni tih ka hrilh thei che u a ni. Silaimu hian a taksa chhunga ruh a khawih  a, hei hian thihna ngei tura kah a ni tih erawh a tichiang hran lo. Hei le.. silaimu tang chu..’

Duhdah ang reng takin, silaimu sawi deuh tawh chu sheriff hma dawhkkanah chuan a han thehphei a, a khawr chung phuai angreng tak ipte a tanga a phawrh chhuah puathem fai lutuk lo chuan a kut chu a han hrufai zui nghal a. Brady-a leh kalkhawm dang ho hnungchhawn chuan a han inher a, Jake Burkhart-an bar dawhkana chunga peihsa diama a lo dah in tur chu a han inthlit ta nghal a.

.

Chutih lai chuan Brady-a chuan lunghlu endik tak hian uluk fahranin silaimu chu a kutphah chunga tuai letin a lo endik mek a. Mit chhing deuh sur chungin, ‘Patches-a chu a tidik a nih hi’ tiin a ngaihdan chu a han siam fel a.. ‘ .44 a ni maithei, henglai ram vela silai hi chu a inang tlang deuh vek a. Hei hi chuan hma min sawn tir ka ring vak lo.’ Jury ho hnenah chuan a han hlanchhawng a, an lo en liam liam a. An lu an thing ta hlawm a. Chutah, Brady-a chuan Sudden-a chu a han ko chhuak ta a.

‘Nang hi Tate-a nungdam lai hmu hnuhnung bertu chu I ni a. I hmuhdan ang chiahin thil thlen dan kimchang chu sawi tur I ni.’

Sudden-a chuan tawhsual an tawh dan chu kimchang thei ang berin han sawi leh dap dap a.  A chhui zui dan te leh Slash 8 mite lo thlen thleng chuan. Kartut kawr ruak a chhar thu erawh a sawi tello. A han sawi zawh chuan Brady-a chu a lo ding a, a rawn hmachhawn a.

‘Tualthattu chu I hmu lo em ni, Green?’

Sudden-a chuan a lu a lo thing mai a. Brady-a chuan a kut hnung suihin Slash 8 mi hote nen chuan a han entawn chhen a, chutah a tawp thut a, Green-a chu rawn kawk nghalin, zawhna a han phuhchhuak leh a. ‘George Tate-a tawng hnuhnung berah khan a Ranch leh a fanu I lo enkawl tur thu a sawi I ti em ni kha ?’

‘Chu chu a dik e,’ Sudden-a chuan a lo ti a.

‘Henglai velah hian I khawsakna a la rei lo hle a tiraw, Green. Engtinge chutiang taka Tate-a chuan a rin nghal nghawt theih che a ?’ 

‘Khawchhak lam atanga a fanu a rawn hawn hma a Ranch lo enkawl tlat tur mi a mamawh a lawm. Kum 21 a nih hma chu ka kutah a awm ang. Chu chu Tate-a thu min chah chu a ni e.’

Chu thupuan avanga makti a phun ri mur mur thawm chuan chulai pindan chhung chu a luahkhat nghal a. Brady-a mit mitmeng zim sun pawh chu a de ra a. 

‘A eng ti kawng pawhin Ranch tha tak chu I kutah a tlu lut dawn chiang a ni maw..’ tih pahin a han mitsir ralh a.

 ‘Chu chu eng I tihna nge ni a ?’ Sudden-a chuan vawt raihin a lo zawt let a.

‘Ngaihtuah duh suh. Eng silai chi nge I pai reng reng a ?’

‘.45,’ tih chu chhanna a ni. ‘chutiang chu ka sakawr zin a mi pawh a nia. Engatinge a ? George Tate-a hi ka kah a ni I tihna chu a ni em lo maw ?’

‘Ka sawi awmzia chu thah tumna rilru I nei maithei tih vel a ni,’ tih chu chhanna chang beng bawng tak a ni.

‘Nang thau mawl pa,’ tiin Sudden-a chuan a lo pawtchat a. ‘Chutianga ta neih tur zawng ni ila, Ranch dahkham sa leh ni sawm chhung leka tlachhe mai tur chu ka thlang lo’ng e..’ A lo thlirtu ho chu an lo nui dur dur a.

‘Chhan dang engemaw pawh a awm a niang chu,’ tiin Lawman chuan a lo chhang leh khauh a.

‘George Washington te pawh ka lo ni hial ang a, mahse ka ni love,’ Sudden-a chuan a lo ti bung vat a. ‘Heng hi zawhna atthlak tak a ni, Brady I hrechiang hle bawk. Tualthahna thlen hnu lawk minute tlemteah mi pahnih pawh an awm ve a ni.’

‘Takzet maw, engmah a tichiang chuang lo,’ tiin Brady chu a phun sup a.. ‘Ranch neih tuma inthurual vek pawh in lo ni thei tho.’

‘Engah tehlul nge chutiang a nih ang?’ tiin aw hriam leh awmze nei zet chu a rawn ri chhuak a. Brady-a chu Patches-a mitmei tur chuan a han inher a, A kiua hnunglam bar rinchhanin vawt ruih hian a lo melh reng a. ‘Green-a hian Tate-a a that niin lo ring chin ta ila, chu chu ngaihdan atthlak tawp a ni. A pahnihna ah chuan eng atan nge ranch chu a mamawh ang a ?’

Brady-a chu tanpuitu zawngin  a meng kual rulh rulh a. Dik tak chuan chu pa zawhna chhan dan turah chuan a ngaihna reng a hre lo a ni.

‘Engtinnge chutiang leh zel te ka hriat bik ang ?’ Brady-a chuan a han ti chul a. “He pa hian thil tum ruk engemaw a nei a ni. Kan hriat theuh angin Tate-a nen chauh an awm laiin a chhu hlum a, Ranch chu hralh a tum a ni. . .’ A aw chu a zuihral hi a ni ngawt a. Ngaihtuahna buai nuai hian a thu phuh chhuah atthlak zia chu a chhut let roh roh a.

‘Chu chu a dik ang — Ngaihtuah rawh !’ ti el zet aw chu bar lam atang chuan a rawn ri leh a. ‘Green-a khan hmunhma kha dahkham a ni tih a sawi zo chiah a. Nangmah anga thluak thawl leh mi a chauh lo chuan tuin nge maw chutiang Ranch dahkham sa te lei duh ang le, Sheriff?’

‘A tha a lawm . . .’ Brady-a chuan a dinhmun duhawm lo tak chu a hrechiang hle a, chutah, a chapona zawng zawng dah tha in, ‘Zawhna chu ka siam thiang a ni lawm ni ? A nih chuan eng thu leh hla dang nge kan neih tawh ang  ni ?’

‘Kan lai lang chho zel a ni lawm ni, Shady ?’ tiin zawt titih deuhin Gimpy-a chuan a lo ti ve leh khauh a.

‘Awka lo chhuah ve zel kha in sim deuh chuan, a ni mahna’,’ buh deuh nuai hian Sheriff chuan a lo ti khar khar a.. ‘Nang — Green-a kha. Tate-a tualthihna a I tel vena chungchangah chuan ka ngaihdan ka thlak ta e —’

‘Chutiang thu ka han hria chu a lawmawm e, Sheriff’ Sudden-a chuan a lo ti satliah mai a. ‘I chhawrbawk tehchiam lo a ni tiraw.’

Chu deusawhna thu avang chuan an nui leh ta hum hum a. Brady-a chu a dinhmun ngai awh leh turin a bei nasa tih a hmuh theih vek a. Pindan chhung chu a han enkual ruai ruai a. Hnunglam deuh a langsar vak lova lo ding ve De Witt-a chungah chuan a mit a fu leh ta a..

‘Pu De Witt,’ tiin Sheriff chuan a han ko a. ‘He pa sawi ang hian kan mi boral ta a Ranch chu dahkham a ni em ?’ Chu Banker awka chhuak chu a ro in, engto lemlo tih hriat tak hian. ‘Dahkam chu a nei a lawm, a zat  erawh in buaina a nih ka ring lem lo. Amaherawh chu, he enquiry neihna ah hian thil pakhat rawt ka duh ve a.’

Chuta awm ho chuan a lam an hawi ta thup a. ‘George Tate-a thihna ah hian helai tlangrama misual rualho hian tel vena an nei lo maw ?’

‘Shadows ho maw ?’ Brady-a aw chu a ring hle a.. ‘Engvangin nge George Tate-a chu an thah duh ang?’

‘Hmaituam thenkhatin an vau tih te ka lo ralhriat ve a. Chutah, Ranch atang chuan Green-a hian a um chhuak ta hlawm a ni awm a. Anmahni lambun a phuba lak hi an titlu ta a ni mai thei. Him dama I chhuak chu ka lawmpui ngawt mai che, Pu Green.’

Brady-a chuan zawhte in sazu a um ang mai hian chulai remchang chu a chuh ta vat a. ‘Thil ni thei tak chu a ni’ a han ti vut a. ‘Shadows ho nen in lo inbengberek buai tih ka lo hre miah lova, Green. Ngatinge ka hnenah I rawn report loh a. ?’

Sudden-a chu hnung lamah dawhkan nghengin a han awn deuh a, nuihzat hmel deuhin, ‘Nia, dik taka sawi chuan, Sheriff, Shadows hovin Bank an rawk avang khan anmahniho umin I buai em a, Slash 8 an rawn tihthaih avanga anmahni man tura rawn pun buangbar vel che kha awmzia a awm vak dawn lova.’

Chu Lawman vanduai tak chu hmusit zetin an lo nuih leh hluah hluah, mahse, a thing tuboh chuan dawhkan chu a han chhu leh bur bur a, chutah, thupek hnuhnung chu a han chhakchhuak leh a. ‘He thil thleng hian  tualthahna chungchangah thuthar min neih tir ta a ni’ tiin a han puang lauh lauh a. ‘Ti hian thu a vuaktlak ngam ta in ka hria… Heng Jury te hi, George Tate a chu inlambunna avangin Shadows hote kutah a thi a, an thah na chhan pawh phuba lakna vang a ni, tihah hian an lungrual tlang thei ngei ang.’’

A hnunga patling rual ho lamah chuan a han inher a. Jury te zinga an hotu ni ngei tur tualchhung pa cher den dawn chu a han bekbawr sur sur a. Chutah, ‘Tumahin finfiahna thuthar sawitur in neih leh hma chu heng Jury te hian – ka beisei dan chuan – George Tate-a chu Shadows ho thah a nih a rinawm, tiin thu an titlu ta a ni.’

 Thu khirh tak chingfel ta ni awm takin hnehtu chan chang takin a han hawi kual vel a.  A inrintawkna leh lungawina te chu a hnung lam atanga  Doctor rawn a tawng chhuah leh tak avang chuan a thamral chiang kher mai..

‘Tunah, kha kha kan pawm tlang ta a. Engtinnge hma I lak zui zel dawn le, Shady ?’

Sheriff chu hamhaih angreng takin a hawi kual ruai a.. ‘Tih leh tur maw ? Engti kawngin nge chumi chungchangah chuan hma la zel tura min beisei ? ‘He pa hian’ — Sudden-a lamah chuan a kutzungpui chu a han ti pir zauh a — ‘hnuhma a hmuh theih loh thu te, anmahni kaptu a hmuh theih loh thu te min lo hrilh tawh a. A eng chu nge ka tih leh tawh chuan ang le.. chuta va kala hnuhma va hmuhchhuah chu em ni ang ?’

‘Chungte chu I vawikhat tihna pawh a nih tawh loh kha,’ tiin awmze nei zetin an rawn chhang a. ‘Shadows ho an nih theih thu min hrilh tawh a. Mi leh sa rual (Posse) khawmin in vak chhuak anga, misual pawl in hmuh hma chu Badlands vel in hrut kual ngei tur a ni dawn lawm ni ?

Chu Doctor upa lam tawh rawtna chu a lo thlirtute zing atanga pawmpuina authawmin a rawn zui nghal nuai nuai a. Tualchhung mi awm ho zing tang chuang kuk thawm te, khek thawm te, ‘kan inhuam e Shady’… tih thawmte chu a ri nghal mur mur a. 

‘A theihloh tih in hria e !’ hnar tum dawt pahin Brady chuan a lo ti a.. ‘An tlangdung te saw bihrukna kua in a khat a sin. Mi leh sa khawmin thla khat lai pawh va thang ila.. engmah kan hmuchhuak dawn lo.’ Slash 8 pawlho lamah chuan a vir zuk a. ‘Nangni ho chungchang thu hi a ni a: Jury ho thu vuakthlak dan chu in pawmpui lo em ni ?’

‘An tih dan chuan lo ni vel mai mai phawt se’ Green-a chuan vawt raihin a lo ti a. ‘Thutlukna kan neih chhun a ni mai a. A mimal tak chuan, I Jury te thu leh hla chu ka ngaipawimawh lem love.’

A lo thlirtute ho pawh chu an ngaihdan hrang hrangte sawiho chuan hmun hrang hrangah an lo bial luih luih a.  A then te lah chuan, George Tate-a lo ni tawh thin ruang let reng chu, titi pui ni awm takin, an thah dan vel leh tlang rama misual pawh chetdan chungchang chu a bulah an lo sawi mawlh mawlh hlawm a. Mi engemaw zat erawh chuan Slash 8 ho ngui leh ursun angreng taka ding ngawi nghiai te chu chik fe in an lo thlir huang huang hlawm a. Chungte chu an hria a nih pawhin Slash 8 ho chuan an bengkhawn hran lem lova. Chutah, Brady-a chuan a thing tuboh chuan dawh kan chu a han khawng ri leh a, titi pawh a han leh ta deuh duak a. ‘Tumahin finfiahna thuthar  thawh belh tur in neih loh chuan, he inhmuhkhawmna hi dan angin tihtawp a ni e.’ a han ti leh nghek a. A tuboh chu a dah a, Gimpy-a leh Dave-a thukhawchang sawipuia lo ding mek Sudden-a lam pan chuan pindan chu a paltlang phei ta a. ‘Green, thu hrilh tur che ka nei a nia,’ tiin an titi chu a va pawtchat a.

Sudden-a chu amah hmachhawnin a lo inher a. ‘Han phuhchhuak ta che,’ tiin a lo sawm a.

‘A falin,’ Brady-a chuan a lo ti a. Chu thu avang chuan Slash 8 pa hmelmang chu lo inthlakin, vawt reih rawih in a tawn tawng chhuak ta a.. ‘Ka hnena I sawi duh apiang chu Dave-a leh Gimpy a bulah hian sawi nghal rawh’ tiin Lawman thlan hluam chu a hrilh ta khawl a. ‘I sawi emaw I theihnghilh emaw ka engto lem love.’

Brady-a chu a ang phuau a, a hmui chu a han chip leh a. A aw te chuan ngai rawn awh leh ta ni awm takin tham tuakin, ‘Ka vaukhan lawk duh mai che a nia — Nangma kutzalin dan rorelna lo kenkawh tum hlek suh ang che.  Thil thleng kip a kawi, Putar an lo vau thu ang te kha mimal taka ka hnena rawn sawi tur I ni a. Tun hnuah chuan, min rawn hrilh hre ve zel tawh ang che, I hria maw?’

Sudden-a mit chu phurlo zetin chu pa bial hmem hmawm chungah chuan a rawn fu a. ‘Nang utawk thaupa,’ tiin a lo pawt chat a. ‘Engvangin nge he khaw mite hian nangni ang Utawk tlaw lutuk ah hian arsi an lo tar tih hi ka hrelo na a, chu chu Hanging Rock khaw buaina a ni mai a.  Thu pawimawh ka hrilh mek che hi lo ngaithla tha hle ang che; chu chu hei hi a ni; Slash 8 buaina thlen tura I rawn kal vaih chuan mahni thlan I lai tluk a ni ang.’ A thu phuh chhuah te, chu pa chhah puiin a lo dawnsawn theih nan a han chawl det a.. ‘Engti kawng pawhin Slash 8 chuan an mitthite chu a lo vui zel ang. Relhbo rang mai teh !’

An inbiakna lo hre phak ho lawma an lo au dar dar lai chuan chu Lawmman chu ben sawk ang main a inthiarfihlim ta zal zal a. Slash 8 ho chu huat hmel fein a han melh zui ram ram a. Sudden-a chuan a chhuak lai chu ten hmel fe in a lo thlir zui reng a. Chutah, Dave-a leh Gimpy-a lam chu a han hawi leh a. ‘Patch-a pui roh hian Brady-a hi a ngainat viau loh na chhan chu ka hmu ta,’ a han ti zui a.

‘Patches-a hian tumah ngainat em em a nei hlei nem,’ tih chu Gimpy a lo chhanna a ni a, ‘Mahse, a rilru puthmang hi a tarlang hreh lem lova, chu chu khua a mi tam zawk te tih zen zen ngai loh a nia. A ngaihtuah zawng hi chu a sawi chhuak phawng phawng fo zel a nia.’

Sudden-a chu a lo bu nghat a, chutah, phur ta deuh thut niawm takin, Bar lamah chuan a phei vut a, Doctor chu a va kawm ta a. Hnaivai deuhva a han enchian takah chuan, Patches-a hmel puthmang upa leh rawih lam tawh chu a thawmhnaw leh a taksa faina lam a ngaihthah vang ni berin a lang a. Sudden-a chuan kum 45 aia a upat chu a ring vak lova. ‘In tur leisak che ka chak deuh a,’ tiin rawtna a han siam a, ‘Min rawn tanpui avang khan ka lawm khawp mai.’

‘Brady-a hi chu a huatthlaawm deuh thin a, Pu Green,’ tiin Patches-a chuan a lo chhang a, ‘Mahse, ka rawn tawng ve nachhan kha chu, nang emaw Slash 8 mi dang ho ka khawngaih vang cheu lam ai mah chuan dikna duh mi ka nih vang a nia. Mi khawngaih khawtlai vel turin hun ka nei lo a ni.’

‘Zawn nei leh tihtur mumal tak nei mihring hi chu an chuti chawk a sin,’ Sudden-a chuan a han ti a. A thusawiin chu Doctor a nghawng dan chu tek ang mai hi a ni a. A ding mar zawt a, a thil inlai chu a no kotlang atang chuan a fawk baw hlawp hlawp a. Chumi pah chuan Green-a chu rap lek lek hmelpu hian a en kual ruai a. A kut veilam chuan khur hlawk hlawkin Green-a kawr hma ah chuan a vuan a, tham tuakin, ‘Chu chu eng I tihna nge’ a han ti a.

‘Khai a, Zu ngawlvei I ni lova, mi dukdaklo mai mai I ni bawk lo,’ tiin Sudden-a chuan a lo hrilh a. ‘Chumi awmzia chu I inthup emaw, zu leh sa tlanin I han theuleu kual rih emaw a ni thei. Keimah ngei pawhin ka lo tih tawh thin a nia. Zu hi chu I nghei a ngai a ni. Doctor.’

Chu pa chuan rei tak tak Cowboy chu a han en vang vang a, chutah, a han meng khup leh deuh a, luhlul zetin a lu chu a thing ta nawr nawr a. A taksa cher leh ruh theng thawng chu a khur ta der der a.

‘Ti ti thlak ang,’ Green-a chuan a han ti a, thil engmah thlenglo niawm takin, ‘Bank pawisa vawngtu chuan a thih hmain engmah a sawi lo maw ?’

‘Engmah a sawi lo.’ Patches-a chu hla tak atanga rawn tawng ni mai a mawi a ni, zawi zawiin a mit mengte chuan ngai rawn awh lehin, Green-a chu pangngai takin a han en leh a 

‘A tawng miah lo maw?’

‘Teh nang. Ngati nge chu chu I zawh a?’

‘Dik takin ka hrilh ang che, heng Shadows mi tlaktlailo ho thil engemaw tak hi a kawl em niang aw ka ti deuh a. Anmahni zinga mi hmelhriat a nei a ni ngei ngei ang. A ka hup an duh avanga kap an ni ngei ang tiraw ?

‘Thil I chhut thiam angreng mang e, Pu Green. Rin dan dang te I la nei hial lo maw ?’

‘Tlem a zawng chu nei e,’ Sudden-a chu a then sak a. ‘Chungte chu engtikah emaw ka la hrilh ve ang che.’

Patches-a chu a lo bu nghat a. ‘Ti ngei rawh, Pu Green, ti ngei ang che. Tin, I ngaihdan I siam kual vel pahin he zawhna hi lo inzawt bawk teh aw..Kha Banker - De witt-a khan engtin nge Shadows hovin Tate-a an tlawh tih kha a lo hriat le.. ?’

‘Nia.. keimah pawh ka lo inzawt fo tawh a lawm,’ nur deuh chungin Green-a chuan a lo ti a.

‘Chutiang chu keipawh ka lo ngaihtuah dan a ni, Pu Green. Ni hman nuam le, ka Pu’ tih pahin mawihnai angreng fe in a han kun zauh a, Saloon atanga chhuak tur chuan kawng a keu kaw phei ta sawt sawt a. Green-a pawh chuan a mi leh sate ho chu a va pawh phei ve leh ta a. Tatea ruang pawh Slash 8 lama kir turin Wagon lamah an hlang leh a. Chhuak turin an inpeih ta  a.

‘Patches putara hnen atang chuan engmah hriat I va nei nange a ? tiin Dave-a chuan a han zawt a.

‘Thurawn tlem a zawng,’ Sudden-a chuan a lo ti a. ‘Mu hma thin la, zawhna atthlak deuh deuh zawt thin mihring lakah inthiar fihlim la. I thih hma chu I dam ang a ti.’

Dave-a chuan an Foreman chu an hma tihtur chungchang leh an haw kawng chungchanga a rawtna te a han hrilh a. Sudden-a chu a nui sak a, engmah a sawi lem lova. Mahse, Gimpy an, ‘Patches-a hi eng ang mi nge ni a I hriat ? ’ tia a han zawh chuan chu Slash 8 daingul thar chu a nui lova, a chhang let hek lo.