Strikes Back 5

George Tate-a leh Sudden-an Hanging Rock khua chu an chhuahsan mek lai chuan chawhnu lam ni tawhin, ni pawh tlang phenah muangchangin a her liam ruai ruai a. Slash 8  lam panna kawngṭum an zawh mek lai chuan Tate-a chuan a rilrua a vei leh a maktihna a lo insum hram hram chu a han puahchhuahpui ta phawng mai a.  A mi chhawrpa, hmel danglam map lo mai chu a han chhuahchhal deuh a. ‘Jim, eng rilru nge I put a, Bank-ah khan khatia I khawsak teh tlat a?’

‘Nia,’ tih pahin Sudden-a chu awmze nei deuhin a han nui sak a, ‘Min lo lawm dan boruak leh a hmel put hmangah khan thil intu lo deuh awmin ka hre tlat a.’

‘A pangngai viau lo mi,’ Tate-a chuan a han ti hram a. ‘A nih leh engati nge ranrual hralh chungchang kha khati khan De Witt-a hnenah I sawi a? Marty Black-a’n kan bawng a lei tur thu I sawi awm pawh ka lo hre miah lova.’

‘A tumah mah kha ka sawi hleinem,’ nur deuh chungin Sudden-a chuan a lo ti a, ‘Ka ngaihtuahna a thil awm thei ka tarlang mai mai a nih kha. A lan dan chuan, De Witt-a pawhin a lo hre bik lo niin a lang a. Mahse, ka hrechiang ngam chiah bik lo.’

‘Heng thil vel hi ka va hrethiam ve chiah lo em, Jim. Newman-a nena kan indawrna ah hian zen khu rim nam deuhin I ring em ni? Tin, chutah chuan De Witt-a hian inrawlh ve a rinna I nei  a nih chuan chu chu rin harsa ka ti mang e.’

‘Rin a harsa vak em ni? Ka rin thu mai piah lamah, thil ni thei tam tak chhui dawnin De Witt-a hi a phusa hle ang tih rinna chhan tur a awm a lawm?’

‘Peh hel kual vak vak lovin, Jim. Han sawi tlang mai la.’

‘Awle,  khua a kan titi dan ang khan kan remruatna hi hria an tlem poh leh tuten emaw an tih sukuk theihna hun remchang hi a tam lo a ni mai. De Witt-a hi kan sawi anga mi depde lutuk  chu a lo ni lo a nih pawhin, titi hi kan vawrh fimkhur loh palh a, a hre lo turin an lo hriat vaih chuan kan tumdan hi he lai phairuam pumpuia puanzarna tluk a ni dawn a sin.’

‘Min finkhalh leh ta,’ tiin Rancher Putar chu a phun sup a. ‘Mahse, kan titi phungleng hi chu Banker pa kha hrilh ve mai a pawina ka hre lem lo a sin.’

Sudden-a chuan a ruaitupa chu a han en deuh vang vang a. Tate-a chuan a lo sawi chhunzawm leh a, ‘A leiba dang a ṭhin dan chung chang ka zawh kha I la hria em?’

Sudden-a lo bu nghat a hmuh chuan a han chhunzawm zel a, ‘Ka zawhna chhan chu ka leiba beitham tak hmang ringawt kha chuan Mine a hnathawktute hlawh a pe dawn lo tih ka hriatchian vang a nia.’

Barclay-an Loan liantham a lo puk a, chungte a chhiar tel a nih lem loh chuan, khatiang dollar singhnih lai khuh zo tur hmalakna lian tham dang a awm tlat lo a ni. Tichuan, pawisa chu khawi aṭangin nge a hmuh chhuah tak ang le? Tin, Loan dang  a awm tak si loh chuan, ka Loan min ṭhin tlut tlut nachhan ang a awm a ni. Hnatawktute hlawh pekna senso tur chu a ni lo phawt ang a. Ka hre chhuak a nih hrep chuan….’

‘De Witt-a leh Barclay-a hi engtiang taka inṭhian ṭha nge an nih ang le?’ Sudden-a zawhna avang chuan chu Rancher Putar sakawr zina thu lai chu a che lawih a. A mi chhawrpa thil chhut uluk zia chu a ngaihtuah neuh neuh a.

‘Chutiang chu zawhna atthlak tak a nih chu, Jim,’ a lo ti a.

‘A atthlak emaw thlak loh emaw, enge a chhanna ni ang?’

‘Ka hre chiah lo na a, Barclay-a hi chu kar hnih khat thangin a zin bo zeuh zeuh thin tih chu ka sawi thei. De Witt-a nen hian an inhmu zing viau em tih lam chu engmah ka hre law. Anmahni chungchang hi a bik taka han hriat chian em em na pawh chu ka lo nei hran lem lova. Ngati nge chu chu I zawh a?’

‘Nia, vawiin khan Barclay-a chu khuaah a awm ngei ka'n ring deuh ngawt mai mawle,’ tiin Sudden-a chuan a lo hrilh a.

‘A hlat vak loh ka beisei kei pawh,’ Tate-a chuan a lo ti a. ‘A foreman, Linkham-a kha khuaah ka hmu tlat a, mi pakhat I hmuh chuan a dang pawh an awm hla vak ngai lo va.’

Sudden-a zawhna leh titi vawrh dan vel avang chuan chu Putar chu a rilru a kal thuiin, a inngaihtuah muk nasa ta mai a. Mahni ngaihtuahna ve ve kawmin mel engemawzat chu ngawi rengin an han kal leh ngawt ngawt a. Kawngṭum mumal lo leh zim takah an lut ta thuai a. Chutah chuan an sir lama kham ko chung atanga lo tla lung, upat hmel tak tak leh tlang lian leh hriam pui pui chu inkhelhna chi khat rem khawm ang mai hian an kawngtum zawh mek sir velah chuan a inhung thluah mai a. Sudden-a hriat dan chuan, an hma lam hla vak lovah chuan kawng pengthuam alo awm anga, chuta ding lam pang ber, tlang bulṭhut hrula bel ang reng tak kawng kal chu Slash 8 panna kawng ṭum chu a ni tawh ang.

Banker te nena an inbiakna thu leh hla te chu a han chhut let neuh neuh a, a rilruin an thusawi tak te kha a han thlir nawn leh a. Chutah, a lukum chu a thlawk lawp a. Silaimu tlawk fua ri in a rawn zui a, an chung lam lungpui kar atanga silai puak ri ṭeng zet chu a han hre nawn leh nghal zat a. Ngaihtuahna hmang buai zui lovin, thawk leh khatah rang elkhenin Sudden-a chu a sakawr aṭangin leiah a bawkthla nghal ta vat a. A piah deuh ah a tih ang chiah a, Tate-a Sakawr atanga a let thla tawp a va hmuh chuan a thaw deuh huai a. Sakawr pahnih pawh chu, khawthlang lama Sakawr zirtir ṭhan tih hriat takin, an lakam te chelhtu an awm tak lohvah chuan, kawngtmṭum zuiin tawite an tlan a, an bul vela phaitual hnim chu an petin an ding ta a.

A kiu rinchhana inbengkang hretin Sudden-a chuan phun sapin Tate-a hnenah, ‘Kan chhak lam lung kar khawimaw laiah khian a awm a ni. Min lo veng la, ka’n…’ a thusawi lai chu a tawp chawt a, Sudden-a’n silaimu thlawk pumpelh tura Sakawr aṭanga zuangthla nia a hriat laiin, a tlakna a ṭang khan chu Putar chu a la chesawn leh miah loh tih a va hmu a. A chhan chu a vankai chaw ta ruih mai le !!  Chu Putar leh rengna lam pan chuan a theih ang angin a bawkvak phei ta a. Yard tlemte a hla a a la awm lai pawh chuan chu Rancher thaw ri hrawp hrawp chu a hre thei a. A va thlen phei chuan Tate-a chu vaivut zingah, bawkkhup zawngin, hmai lei siin a lo mu a. Sudden-a’n a han kawih zangthal chuan Chu rancher putar kawr hma lam chu thisenin a lo bual huh hnuang tawh a. Khaw la eng riai ruai hnuaiah chuan a hmel pawh a lo duk tluk tawh a. Sudden-a chuan mitthi hi a lo hmu tam tawh a. Chuvangin, chu Rancher Putar pawh chu a damrei tawh dawn lo tih a hre mai a. Tate-a lu chu dim takin a han chawi kang a. Rancher chuan a mit a lo meng a. Zawimuangin a rawn melh a. A tawng ta a.

‘A va….han… na …em,’ chau takin a phun sep a. ‘Min…kapfuh…a…ni…maw.’

‘Zawi muang khan le, Putar,’ Cowboy chu a phun sap a. ‘Tui ka’n lak ang che.’

‘Ni..lo... kal… suh!’ Tate-a chuan Suddena kawr ban chu a hmer ngawt ngawt a.

‘Thil..ka… hrilh…du..h che….. a ni…..’

‘Nakinah le,’ inpetruh fan fan chungin Sudden-a chuan a lo ti a. ‘Doctor ka’n ko vat ange.’

‘Hun… I khaw..h ral… mai..a .. ni.’ Tate-a chu a han inpet ruh hram hram a. ‘Jim … Ranch.. kha.. aw.’

Putar-a na tuar hmel chu hlauthawng leh lungngai hmel in a rawn thlak ta  a. ‘Ranch chungchang chu lungkham reng reng suh.. engkim ka lo enkawl vek ang’ tiin Suddena chuan a han tiam ve ta chhak a.

‘Pringle-a’n … kan… thu..thlung… eng.. kim.. a .. hria.’ Putar chu a han khuh khak a. A hmui duk vek tawh atang chuan thisen a han chhak chhuak a. Thutchhuah a rawn tum a. A rawn meng zau leh kawk a. ‘Grace-i … kha.. lo enkawl.. rawh.. aw .... ’

‘Tehreng mai,’ Sudden-a chuan nem takin a lo chhang a. ‘Grace-i chu ka lo enkawl ang. Chawl hahdam tawh rawn ka pu. Inah ka hruai haw ang che.’

‘Inah…. maw….’ Rancher hmuiah chuan hahdam taka thaw huai ri a rawn chhuak a, a han insawi leh nawk nawk a, a taksa chu Sudden-a ban rinchhanin zawimuangin a hahchawl ta riai riai a. Chu Cowboy chuan Tate-a chu a chatthla ta a ni tih hriain, a lu chu dim takin leiah a nghat ta a. Sudden-a chuan a hmui chu a pet mar tlat a. A mit te chu a rawn pawl paw chhuak ta phat a. A silai a phawi a, a tawlhsawn ve ta nghal a.

A han hawi vel thuak thuak a, zawi muangin hmalamah chuan a tawlh tan ta a. Anmahni lo lambuntu chuan a lo chan nawn leh palh takin tih thu ah a bul vel lung insir khup kar te chu a thlek ngun em em a. Khawilai hmun mai pawh chu a reh ngawih ngawih mai! Cowboy chu a han bu nghat a ‘Ka buai lai khan hmela chu a kal bo tawh a ni maw’ tiin amah leh amah chu a phun sap a, ‘Mahse, chian dan kawng khat chiah a awm.’ Tih pahin, a ding chhuak phut a, a piah lama phen tur awmna lamah chuan a zuang phei zawk a. A taksa ven loha a intarlan zawk lai pawh chuan, rawn chhang lettu silai puak thawm reng a awm ta lo. A rawn dingchhuak leh zuai a, sir lam te, hmalam te a melh kual leh zung zung a. A dinglamah chuan, kawng ruh hlui mumal lo angreng takin ngil takin a rawn pawh a. Chumi lamah chuan beiseina nen thawm nei hauh loin a che chhuak leh ṭan ta a. Lei char chu a han bih a, hnuhma thar phut deuh hi a han hmu a. Khua lah chu a thim chak nasa si a, chu hnuhma, chunglam lung insirkhup lam pana kal chu Slash 8 pa chuan a chhui chho ta a. Thing ṭang tliak chhe te, mi nazawngin an hmun loh tur lo awm a han hmuh chuan a chhui dik zel tih a hre mai a..

Hniam taka kunin lei chu a bih pah reng a, tuemaw in an lo paltlangna hnuhma te chu a hmu ta zel a. Hnim paltluk thenkhat te pawh chu an la rawn tho chhuak tha thum hman lova. Tin, lei chara Boot rahna hnuhma fiahlo tak a han hmuh te chuan lambuntupa kalna awm tur chu chiang takin a hriat theih mai a. Yard sawmnga awm emaw vel a kal leh chuan hnimbuk leh lungpui insirkhup chu a paltlang a. A han ding mar a. A zawn mek hmun ah chuan a lo awm reng tawh a.

A hnuai lam atanga hnimbukin a hliah tlat Juniper thing thlar phenah chuan Lungphek, silai ngulin a khak rân nuai leh kawr sen rawng lazai lo awm chuan a mit a la ta vat a. Chu lung behchhana kawnga kalte bawk chunga lo chang paha, nghenna hnuhma hmun hnih, lei nem laiah chuan a hmu leh a. Chulai hmuna han bawh ve pah chuan Sudden-a chuan kawngṭum leh Tate-a ruang piaha Sakawr hnim pet lai chu chiang takin a hmu thei a. ‘A-B-C ang mai a awlsam a nih hi le’ a han ti leh sap a.

Thir tle fiahlo tak lo awm chuan a mit a la leh a. Lung keh kâk kâr aṭang chuan Kartût ruak chu a han hawlh chhuak a. ‘Remington puakrang — a va dangdai ve.’ Piah deuh lawkah chuan Sakawr innawhna hnuhma a hmu leh a. Anmahnilo changtupa tanhmun atang chuan Sakawr hnu chu chhui lehin, kawng tum tluang pangngai a pawh thlengin a chhui thla a. Chutah chuan hnuhma tam takin a lo chhilh ta a. Tualthattupa chu chhui zel ngaihna a awm rih loh tih hriain, a sakawr awmna lamah a let phei leh ta a. Chutah, a lam rawn pan Sakawr thawm hriain, kawng sir phen tur awmna ah chuan a tlum lut vat a, a silai phawiin a kau ta nghal a. Kar lovah Dave Haynes leh Gimpy chu chulai hmun ualau laiah chuan rawn tlan thlengin, leia mihring let reng leh Sudden-a hmel hlauhawm tak, inring elkhena lo bawk reng an han hmuh chuan an sakawrte an pawt ding chawt a..

‘Hremhmun dar ri a ni maw, Jim,’ Gimpy chuan a han ti a, ‘Eng thil nge thleng ta le ?’

‘Hmar lam phul hmunah kan lo awm mek lai a nia, Silai puak ri kan hria a. Kan lo tlan ta char char a ni!’ tiin Dave a chuan a han hrilhfiah a. ‘Minute sawm kalta khan tawhsual in lo tawk tawh niin a lang. A zialo hle mai’ a han ti leh a.

Gimpy-a sakawr atanga a lo chhuk a, Tate-a ruang bula a thingthit mek lai chuan Sudden-a chu a lo rum nghat a.

‘Aw hremhmun te u!! Putar chuan a tuar ta maw. Tu tih nge, Jim?’

‘Ka hmu ve hman lo,’ Sudden-a chuan a lo ti bauh a. ‘Varak tla lai ang mai kan ni e.’

Lambun an nih dan leh chunglam lung hmuna a thil han hmuhchhuah chungchang te chu a han fah ve mawlh mawlh a.

‘A ṭha e, Heng lai velah chuan kawr sen chu a tam mai a. Chu zawng a tangkai vak lovang, mahse, henglai velah hian Remington Puakrang chu a tam vak lovang.’ Gimpy-a aw chu a fiakin a thinrim ta kher mai.. ‘Barclay-a inkulhna lamah chuan va kal ila, zawhna chhan har tak tak chu va zawt nghal ila a ni mai a lawm.’

‘Tunah tak chuan chutiang thil hlauhawm lutuk va sawi chu a atthlak khawp ang,’ Sudden-a chuan a lo ti satliah mai a. ‘He thilah hian Box B an inrawlh tih chianna tur engmah kan nei lo. Tin, an silai te endik turin kal mah ila, chuti maiin an lo phal kher nang. Min lo entir a nih pawhin, silai kaw hmawr atanga chhuak silaimu leng vel  bak a ni lovang. Nilo…. Min lambuntu kan thian duhtak Remington chungchang hi chu engemaw chen thurukah I vawng phawt ang u. Chet thawh nghal rum rum chu awmzia a nei lo ang a ?’

‘Khai a, I tidik khawp ang,’ Gimpy chuan a lo ti ve mai a. ‘Hetianga dinhmuna kan pu ka han hmu mai kha chu… Ka insum zo lo deuh a lawm maw le...’

‘Ka hria a lawm,’ Sudden-a chuan nem takin a lo ti a. ‘Hun rei tak atanga I lo belh ber kha a ni si a.’

Gimpy-a chuan a lu a thing nar nar a. A chhang zui lo. Chu rancher Sakawr chu a rawn kai a. A sakawr zinah chuan puan a han phah a. Chu hmun reh takah chuan rum nghat nghat chungin Tate-a ruang chu a sakawrah an phuarbet fel a. Slash 8 lama an kir leh chhung kawng tluan pawhin tumah an ṭawng lo. A khat tawka rum nghat nghat ri leh thinrim mitmeng sen ram chunga hachang thial bap bap rite chuan a dawt leha thil lo thleng tur chu enge maw chen a entir lawk thei awm e.