Strikes Back 2

A tuk zing chaw eikham veleh chuan Tate-a chuan Sudden-a chu Corral lamah  a phei pui a. Chutah chuan a naute pawh vawiin lama an tihtur chungchanga thupek dawng turin inpeih sa diamin an lo awm hlawm a. Tate-a chuan a bik taka ama thachhang dawl turin thutlukna a siam tak thu te chu a han hrilh ve hlawm a.

‘Lambun te pawh ka lo tawk thut thei a,’ tiin a hote chu a han hrilh a, ‘Ka chungah thil pawi a thlen hlauh chuan, Green-a hian Slash 8 enkawl hna chu a kutken zui ang. Tun aṭang chuan, in zinga mi a ni ta. Zawhna a awm em?'

Gimpy-a chu a rawn bai chhuak a. ‘Hotupa, tun thleng hian i foreman ka la ni char char a. I tidanglam duh a nih pawhin hnialna ka nei hran love. Indona a lo sosan zel hunah Jim-a hian thil tamtak min zirtirin, chetlak dan turah pawh min kaihruai thei ngei ang le.'

‘Gimpy, kum engemaw zat chu ka foreman I lo ni reng tawh thin a,’ tiin Tate-a chuan a han sawi a. ‘He ram bial chhunga mi tha ber I ni tih pawh ka hrechiang hle a ni, Jim-a pawh huam telin — I sadai kan thiat lo’ng chu maw, tiraw.. Jim. Tin, Gimpy-a hian helai ram vel hi a kutphah tluk zetin a hrechiang bawk. Nang chuan I la hrechiang rih lo ang a. Tichuan, a chhe ber dawnin thil thleng thei tur hi ka —’

‘A khai, Hotupa, khami chungchang kha chu sawi ve ziah teh suh khai,’ Dobbs-a chuan a lo tih khalh a, ‘Lusun ang maiin min awmtir dawn a lawm le. Ka chungchang thu ah chuan, Jim-a hian sakawr lu lam leh mawnglam a hriat hran phawt chuan a tawk mai, a bak hriat tur tul ang zawng zawng chu kan kawhhmuh mai ang. Tin, Jim-a’n Slash 8 a lo zawm ve hi a bik takin a lawm ber pawl chu ka ni awm e’

Slash 8 hnathawktu dangte hnen aṭanga chu thu remtihna leh pawmpuina thawm a lo ri chhuah ve zel takah chuan Green-a pawh a tlangnel lehzual sawt a. Chumi ni atana an hna chungchang rel vel chu Gimpy-a kutah dahin Tate-a pawh chu Inpui lamah letin a pen phei ta charh charh a. Gimpy-a chuan Slash 8 ram vel fan kualna ah Green-a chu ṭawiawm turin Dave Haynes chu a ti a. Chu thupek chu Green-a leh Gimpy-an an dawnsawn dan hriat tumin a han hawi a.

‘Sakawr zin te ka han bel fel anga, ka hman a  ni mai,’ chu Cowboy la upa lo tak chuan a han ti a. ‘A ngai kher lovang, Green,’ Curt Parr-a chuan a rawn ti lauh a. ‘I sakawr tur chu ka lo buatsaih diam tawh a lawm.’ tih pah chuan Sakawr In lamah a kutzungpui chu a han tipir zauh a. “I sakawr khan chawlh a mamawh rih takin, Sleepy-a hi ka lo buatsaih ta mai a. A tha a thum tawh deuh nain, I bo palh pawhin a hruai haw zel thei ang che’ a han ti a.

A thusawi pah chuan nuihzat hmel takin a han then sak a, midangte pawh chu an tihtur lama kal darh tum ta mai lo chuan ner ru deuh chungin an khawtlai zui ve ta zel a. Green-a chu a ngaih a tha ta vak lo a. A chiang chiah lo nain, Parr-a chuan in lawmluhna dangdai tak a ruahman ni turah a’n ngai ngawt a.  

Dave Haynes-a’n chu sakawr, zawi hmel tak a mit chhing suar suar leh mei uaithla nghuau a ding zun mai, nur fe a han en lai te chu a lo hmuh hmaih reng reng lova. Nui var var pahin Parr-a chuan Sakawr chu a tualzawlah a rawn kai chhuak a. Green-a hnenah chuan a lakam hrui chu a rawn hlan ta a. Parr-a hnen atanga a lakchawn rual chuan a dar a han thing nak a. Sakawr zinah chuan a invawrh kai ta nghal a.

Sakawr zin rahchhanah a ke pawh a nghah fel hma chuan chu ransa chu a ṭê tuar a, a lubawr tihniamin boruakah a zuang kang zawk a, thir ang maia khawngin a tla ding leh chawt a, Sudden-a inring fumfe hman lo chu a ṭhutna atangin a phawng hlawl ṭep chu a ni e. Mahse, a khupin a inchep nghet vat a, a lakam chu a pawt mar ta tlat a. chutih lai chuan a chakna zawng zawng sawm khawmin a lu lamah chuan a tawlh chho pah hret hret bawk a. Chutah, Sakawr chuan a tihdan a thlak thut a, a chunga chuang chu haw em ema thin thlak ngei tumin a lu lam leh mawng  lam chu a vawr chhawk ta chhen a. Sudden-a chuan sawkawr hma lama khen pah chuan a rihna chu hmalamah a han pe leh hret a, chu ransa kawlh tak pawh chuan a tum a hlen thei ta lo. Chutah, Sakawr chu a inthing leh nawk nawk a, a vir kual a, a taksa chu a theih ang angin  a thên kual vak vak a, Haynes-a sawi dan takah, a tih dan hriat zawng zawng bakah tlem belhin a chhunga chuang chu a hnung atanga thin thlak  tumin a han bei leh chiam nain Sudden-a chu inpet ruh tlat chungin a la ṭhu hram hram a. Tum ruh tih hriat takin a khabe chu nghet takin a chip tlat a, chu ransa mawng lamah chuan a han vaw ṭhuai ṭhuai a. A hnar aṭang chuan thisen tlem a rawn far a. Sakawr chuan hmalamah a lu leh nghawng hmanga ṭan a siam theih loh nan a lakam chu a pawt mar tlat bawk a. 

Sakawr chu hnunglamah a ter leh ta ut ut mai a. Tun ṭumah chuan a chunga chuang chuan a tumdan chu lo hrelawkin a pistol chu a phawi zawk a, silai ngul chuan sakawr beng chung deuhah nikhaw hre lo deuh thaw a awm turin dimna tel miah lovin a chhu ta nghek mai a. Sakawrin a beih nasat poh leh a chhu nasa ve zel a. Chutah, Sakawr chu thinrim theihtawpin a hram a, kawt vel ah chuan a ṭum kual leh ta chiam a. A lo thlirtute chu an darh ur ur a, Green-an namen lova a lakam hrui a pawh mar a vang chuan zim te te in a tlan kual thei tawk tawk a. Nakin deuhah chuan chu ransa chu a ding ta hlawl mai a, a taksa te chu a thlan hluam a, a kamsir atangin chilphuan a tla bawrh bawrh a. A meng pual ru a. Mahse, a lo hmin tha hle tawh a lo ni. 

Rei vak lo ah Sudden-a chu Sakawr aṭanga rawn invawrh thla in, a silai  ngul chu a han zut hauh hauh a. Dave Haynes-a chu rawn pen chhuakin, ‘Kan tih a ni miah lo a nia aw.. Jim’ a han ti a. 

‘Kha Sakawr khan min tihlum thelh chu a ni e, teh hrep mai chuan,’ Sudden-a chuan a han ti a. ‘A kawlh viau nain a ṭhat phian kha.’ Chutah Parr-a lam chu hawiin a mitmeng chu a nelawm loh kher mai. ‘I lungawi bawk em ?’

Parr-a lo nui hmel deuh chu a reh chiang kher mai. Green-a mitmeng chu en ngam lovin zahzelah a ke chuan lei chu a thai vel ta mai mai a. Chutah a huaisenna zawng zawng sawm khawmin a rawn dak chhuak a, ‘Fiamthu mai mai a nih kha Green — Hetiang hian mithar chu kan enchhin ziah ṭhin.’ tiin a han chhang a.

‘Chu chu dawt a ni e,’ Gimpy-a chuan a lo ti hmak a. ‘Tumah he tuboh chungah hian an la chuang ngai lo. I hriat ve reng kha.. Curt,’ A thusawi tawp lamah chuan a nur hle a. ‘Mi pahbmnih khat chuan an lo tum chhin tawh a ni mahna?'

Green-a chu za lo tak leh vawt raih mai hian a han ṭhen sak a. Parr-a chuan a lo ring sual deuh a ni. ‘I chuang tawh reng reng em, Parr?’ tiin a han zawt a.

‘Tu maw.. kei hi maw?  Ka damchhung pawhin ni love!’ a rawn ti tuar a.

‘A ṭha e, han chuang ve la, enge thleng kan lo en ang chu,’ Sudden-a chuan a ti ta a, Chutah lo pumpelh tura Parr atan chetna hun awm hman miah lovin a phusa ta nghal vat a. A kut pakhatin a kawr awmah a ṭhâm a, a kut lehlamin a kawnghrenah manin Parr-a lo inrin loh dan deuhin awlsam angreng takin a chawi kang thut a, Sakawr-in piah lama a hungna hmanrua tladarh nuai karah chuan a theh vâk phei ta tawk mai a. Parr-a chu lu lei vit zawngin rem lo zetin a tla khu sut mai a.

Anchhe lawh pahin a rawn ṭhingthi chhuak nuai a, a silai chu a han dap a. Chu lah chu a tlakna lamah a ni lo zawngin a lo inher sawn daih si a. Green-a chet leh hma chuan a silai chu a khawih hman ngei mai, Mahse a han hawi chhuah chuan puakruk kua in a lo bih heu tawh mai le..

Parr-a tum dan hrethiamin Sudden-a chuan inthazo takin pal chu a zuan-kahlen a,  chumi pah chuan a hma lawka a lo tih tawh thin angin, a silai chu a han phawi leh zauh a. Fit hnih khat bak an inkarah chuan a tla tawh awm lo ve.

 ‘Fiamthu a nih kha aw, Parr,’ Sudden-a chuan a lo ti ve hmak a. ‘I kal thui zel duh takin, a hla deuh hlekin ka hria a.’

Parr-a chuan lu thing chungin nui hmel a rawn chhuah lui ṭawk ṭawk a. Green-a chuan a hriamhreite a paia a thawlh luh leh hmain  Parr-an muangchanga a silai kawm aṭanga a kut a lasawn lai chu a lo thlir reng a. Parr-a chu lo dingchhuakin, a han inbengfai nawk nawk a. A hmel sawi bui maia huatna namen lo lo lang chu thup turin tlemin a han kun deuh a.. Tlema a inthunun theih deuh hnu chuan, Corral lama Green-a lo ding reng chu a han hmu a. A kut chu a han phar chhuak a.

‘Inhuat zui lovah kan ti a niang chu, Green,’ nui hmel sawi bui chungin a han ti a. Green-a chuan a kut rawn dah chhuah chu hmu lo ang main a lu a lo thing ringawt a.

‘Inhaw zui love,’ a lo ti ve a. ‘I fiamthu kha lo vawng tlat la. Mahse, tihsual nawn chi a ni lovang aw.’ 

A tawk fang entirna a pe tawh bawk a, Parr-a lak aṭang chuan inherin Haynes-a chu a titipui zui ta a. Parr-a chu hmel thim tak chungin a insaseng hnu hnu a. Engmah sawi leh tawh lovin a sakawrah a lawn a, tualzawl atang chuan a kal chhuak ta a.

Dave Haynes-a chuan Parr-a insaseng lai chu a lo thlir reng a, midangte pawh an sakawra an lawna, an tihtur lama an kaldarh lai chuan, lo thlek vang vang chungin ‘Ka hrilh dawt mai ang che, Curt Parr-a chu thian atan I vuan dawn ta lo chu a ni ta phawt mai a.’ nur neuh nang chunga a han tih takah chuan buaina lam a kawk mah mah awm e. Sudden-a lah chuan sam zetin. ‘Mi in an tum talh chuan – an kawm tur ang chi ṭhian chu an tlacham chuang hleinem,’ a han ti a chutah, ‘Kha ngaihdan atthlak tak kha tu rawt chhuah nge a?’ a han ti a.

‘Hotupa nen chaw in bar lai khan Curt-an a rawt a,’ tiin Dave a chuan a han hrilh a. ‘Kan ti manglo ṭheuh na in, I hriat ang khan, I chuan theih pawh kan lo ring lo hrim hrim a. Khatiang khan Sleepy-a hi tumahin an la ching phar thei ngai miah lo a sin.’

Sudden-a chu a han ner sawk a. ‘Nakin deuhah ka bei ṭha leh leh ngat ang mawle. Tunah tak hi chuan ka hnungzang hi Sherman-a leh a sipai rual te  chil hrep hnu ni maiin ka hria.’ a han ti a. Curt Parr-a chungchang chu ngaihven zuiin Dave-a hnenah chuan a zawt zui ta zel a.

‘Thla hnih khat lek kalta atang khan Tate-a hian a ruai a,’ tih chu a chhanna a ni a. ‘Jess Stackpole a thah a nih lai thleng khan Stackpole a hnena thawk a ni awm e. — chumi hma chuan Tom Sheppard-a’n a ruai ṭhin. Curt-a’n hna mumal nei lova a teihawi mai mai thu leh riltam dangchara awm reng ai chuan Barclay atana thawh mai pawha duh thu a sawi avang khan kan pu hian a la ta a nih kha.’

‘A chhawr tu te tan chuan vanneihna a thlen lutuk lo a ni maw’ ti el lek lek hian a lo tlip ve zaih a. 

‘I sawi awmzia chu  . . .?’

‘Engmah’. tih pahin a en ngai a en leh vang vang a. ‘Le.. ram fang tura kan zin kawng chu tan dawn ila...’

Green-an ama sakawr pangngai a zin a han bel fel hnu chuan chhim lam hawiin Ranch chu an chhuahsan ta a. Awih tlan deuh euh euh lai an thlen hma loh chuan an kal char char a. Phul hmun chu a tir lamah awih chhete in a inpharh chho a, an hma lawkah chuan a awih bung chho ta vut a.. Chung lai velah chuan far thing arsi ek kai that tawh hi a ding thulh mai a. Mesas tlang chung zawl ruangam chu kawkilah a lang ruih bawk a. Dave a pan mekna lam pang tlang bulthut lamah chuan minute 90 vel an han kal leh char char a. Tlangdung awih leh hriam tak a rawn in pharh leh a. Kalkawng pawh a mumal ta vak lova. 

‘He kawngtum hi chu South Bend lamah a chhuak phei a — kual deuh takin,’ tiin Dave chuan a lo sawifiah a. ‘Mahse, tlang velah hian thil hlu laih chhuah tumin an ker kaw nasa lutuk a, bakah dynamite hmangin lung hal nasa a, chu chuan leilung leh lung inthuah thip te hi a tinghet lo viau mai a. Chuvangin, helai hmun paltlanga kal hi chu a hlauhawm teh a nia. Phairuamah khuan kawng nuam zawk deuh a awm a.’

Sudden-a chu a bu nghat a. ‘He kawng lam aṭang hian ka rawn lut a sin. Chu….he kawng hi an zawh ngai tawh vak nange ?’

‘Aw, tangkaraw lai chhuak mi te I nih a, tangkaraw zungzam tla hlang te tawn fuh mial beiseina I neih te chuan, a nih loh chuan, South Bend kal tur ho reng reng chu Kurung awmna hrulhah an kal ṭhin alawm. Khai le, helai hmunah hian kan sakawrte chu kan hnutchhiah mai a ngai dawn a nih hi —’ tih pahin kham bulṭhut a thing ṭawi liai awmna hmun chu a han kawk a. A chhanna pawh nghak lo lem lo chuan Sakawr aṭangin a han chhuk nghal a, chulai hmunah chuan a sakawr chu a thlung ta nghal a.. 

‘Tlang lawn lam te hi enge I an ?’

‘Hriau thil ang mai awlsam ni turah ka ngai,’ Sudden-a chuan a lo ti a. ‘Chutiangin ka ti thei lutuk bik dawn emaw ni le.’

‘A nih chuan, heta hi zirna hun thatak I nei thei dawn e,’ tih pahin Dave a chu a han ṭhen sak a, an hma lawk chho ulh phihrit angreng takah chuan kal an han siam ṭan ta a. Ni lah chu, a hma a sakawr nena an kal laia thlifimin a rawn chhem heuh heuh ang kha a ni tawh lova, lung chhanah chuan a lo sa vin hle tawh mai a. Chung mi pahnihte chu an thlan a tla nghal zawih zawih a.

‘Khai a, tiang hian kan lawn hrep dawn tih lo hria ila chu Midnight-a ai khan Pegasus  kha lo khalh chhuak zawk ila tha tur.’

‘Pegasus…. a ? Tunge a, Injun-ho lal em ni ?’

‘Ni teh nang. Pegasus chu Greek thawnthu a sakawr thlawk thei a nia.’

‘Huh. Sakawr thlawk thei chungchang ziaktu ho chuan rul hriak an in thu te pawh an ziak tel hial lo maw.’

Pa pahnihte chu an lawn chhohna lamah chuan an hah tawngkhawng ta khawp mai a. ‘Hetia kan insawi chhoh vak hian chhan mumal tak a neih chu ka lo ring ve ringawt a—?’ Green-a chuan zawt pah titih deuhin a han ti a.

‘Tehreng mai,’ tih pahin Dave chu a thaw hlawp hlawp a. ‘Khilai aṭang khian helai ram pumpui hi ka thlir kual pui thei dawn che a sin !’

‘A ṭhat phian dawn chu,’ tiin a lo chhang mawl leh tawp a.

Mesa chuanchung lam chu an thleng chho ta thuai a. a lo tiam tawh angin Dave-a chuan chu phairuam pumpui inpharh durh mai, thlir ninawm lo tak mai chu a han kawhhmuh a.

‘Hmarlam hawi zawngin kan awm mek a tiraw,’ Sudden-a chuan a han ti a. 

‘Saw…… lai —  khawthlang lam deuh a saw — lui lama mual dung inkhawh thla saw Thunder Mesa chu a nih saw. Sweetwater luiin Thunder kurung a finna laiah intan bung a. Chu chu thing ṭona niawm tak dum phei raih lai saw a ni a. Chutah, hmarthlang zawngin a inkhawh phei leh a ni. Thunder kurung lehlam saw South Bend chu a ni tawh mai a. Tichuan, a hmun leh kan awmna inkar, Thunder Kurung awmna letliam lawkah sawn Tangkaraw laihchhuahna hmun chu a awm’

Kut khum meuhin Sudden-a chuan, chulai ram chu a han thlir ve a. Phairuam a lo luhna lai ni awm tak te chu a han en kual a. ‘Lui hmar lam epah sawn ram chhengchhe deuh niawm tak chu ka hmu tawh tlat in ka hria,’ a lo ti ve vat a.

‘Badlands a nih chu,’ tiin Dave-a chuan a lo hrilh a. ‘Barclay-a ram leh Mesa inkarah an thu ve a, laiking in bel a rawh chem chem na lai vel saw. Sawlai saw’ tiin hmar thlang lam chu a han kawk leh a.  ‘Kan hnuai lam, khuuuulai deuhah khuan Slash 8 pawh I hmu thei ang.  Dinglam hla deuh saw han thlir leh la —  kutṭang ang deuha lung lo poh chhuak saw I hmu maw?’ Hla taka ni eng thlarah chuan Sudden-a chuan ang dinglam hlek hla deuhah Mesa thlang inkham sung mai aṭanga lung lian tak rawn dak chhuak chu a hmu ta a. chu chu hmar lam aṭangin chhim zawngin phairuam tawp lamah a inkham kual ruih mai a..

‘Saw saw  Hangin’ Rock a nih saw,’ tiin Dave-a chuan a lo hrilhfiah leh a. ‘Lung te deuh zawkin a kamki lung kehthem lian zet mai a ni a, en ngawt chuan naupang mai mai pawhin an nam lum theih mai hmel a, mahse, khawih che tur chuan lunghalna tam fe chu a ngaih ka ring. A letliamah sawn Hanging Rock khaw lian ve deuh, han inbenbel ve duh mai theihna tur, Sallon pahnih khat vel, dawr engemaw zat leh chenna in pawh a tawk fang chu a awm a sin.’

Sudden-a chu a bu nghat a, Dave a hnenah  chuan Slash 8 ramri chin awm ang chu a han zawt leh a.

‘Chu zawng, a harsa hlei nem,’ tiin a thianpa chu a rawn chhang a. ‘ Hmar lamah chuan Lui chin saw a ni mawi a. Chhimlamah chuan kan awm mekna Mesa tlang bulṭhut hi a ni leh mai a. Khawchhak lamah chuan.. saw… hriau tiat leka lang ve ve Hanging Rock bulṭhut saw a ni leh mai a.  Khawthlang lamah saw chuan saw lai deuh a hmun bawk thlik thlek I hmuh saw.. ‘Bonito’ kan ti a. Saw saw khawthlang lam ramri chu a nih saw, a piah lam  saw a duhawm vak tawh lo nain kan bawngte chu an va la tla phei zauh zauh mai. Stackpole-a ram ṭhin a nia’

‘Barclay-a ram a lo ni ta a tiraw. Bawng in va khalh khawm changin buaina in nei thin lo maw ?’

‘Tun thleng chuan… la nei chiah love,’ tih chu chhanna a ni.

‘Chu lam kawngah chuan kan inveng thei turah ngai ang aw,’ Sudden-a chuan a lo ti a. ‘Tirawh.. I tawlh sawn dawn ang hmiang.’

A thianpa chuan enge maw chen a han en vang vang a, hmel buai nak hian a han zawt a, ‘ I thei ngei dawn tih I chiang maw ?’

Green-a chu a lo nur deuh nang a. ‘Nia, ka ramvah tiang nen lo chuan a harsa deuh mahna , Mahse.. ka tibuai thei ve viau ang.’

‘Hrui awm se chu, kan han uaithla zung zung mai tur.’

‘Zuangthla ila kan thleng rang zawk ang a,’ tiin Sudden-a chuan a lo chhang ve leh a. 

Pa pahnih te chuan fimkhur takin an chhuk ṭan ta a, Sudden-a chuan hma  a hruai a, rah tur ber hriat a har in, kal a hahthlak kher mai. Kham pang chu a ro in a tle sut mai a, thli a rawn thaw a, kham pang thli bengna lamah chuan an bet rawk rawk a. Kawng chanve vel an kal tawh ang tihah chuan Dave-a chu Sudden-a hnungah a rawn thaw huam huam a, chutah chuan lung a rap hrual a, makti leh hlaua a rak tuar chungin an zawh mek kawngṭum aṭang chuan kham lamah a vir thla ta nawk nawk mai a. A vanneiha siamin, boruak a awm lai chuan a taksa a inher rem hman a, kham pang mam pur maia lung tohlawt lo poh chhuak hlek chu a man hman hram a. Lung hriamte chuan a kut, hmai leh taksa te chu a hrut pilh pheng phung a. Chung lam kawng ṭumah chuan  Green-a chuan fimkhur takin a lukhum te a han  dah te  te phawt a, kham kotlang ah  chuan rawn dakin, a rawn au ta a. chutihlai chuan ani chu insehruh tlat chungin a lo uai tang hram hram a.

‘Dave — Dave,  I tha maw?’

Teh nang le … mi a pa. Ka thi chiang ngang mai.’ tih pah chuan a aw chu a theih anga ringin a han chhuah hram hram a, thing lian vaklo pakhatin a rawn delh leh awk a, a thlan chu a chhuak ṭuam ṭuam a. Ama taksa rihna bakah a beisei loh deuh a chu thing zung  rihna chuan a uai belh leh hlek a vang chuan a vawnna chu a pit hret hret lehnghal a. Engpawh huamin a taksa chu a chet rem leh hlek a. a chung lam fit sawm vela Green-a, mangang hmel taka a rawn hawi thla chu a han hmu a. Chutih lai chuan Sudden-a chuan a ngaihtuahna a lo hmang kual zung zung a. 

‘Che lutuk lo khan I silai paina kawnghren kha I phelh thei mai angem?’ tiin a rawn au leh a.

‘Beisei phawt ila,’ tiin thei leh thei lovin a rawn chhang a. ‘A remlo teh na in.’

‘Min hnial buai lovin, I kawnghren kha phelh la, suihzawm tum la,’ tiin Sudden-a chuan a lo pawt chat leh a. ‘Ka kawnghren hi ka han suihzawm ve ang a. Ka rawn pe ang che. I ta nen chilh zawm lo tum teh aw.’

A thianpa ruahmanna zulzui chuan Dave-a chuan a kawnghren chu a phelh tan ta a. A chevel chu a muangchangin, fimkhur a ngai kher mai. A chet pah chuan thing zung tang tlat pawh chu engtin tin emaw a thing thla thei ta a. A kut te chu a thlan nasa kher mai.. mahse a inpeih ta. Green-a chu kham kovah chuan rawn kun hniamin, a kawnghren suihzawm sa hrui anga siam chawp chu Dave-a lamah a rawn rawlh thla ta a. Dave-a chuan a ban chu chunglamah a lo ban vak a. A kuttang zawng zawng nena a rawn tipharh pawhin a ban phak lo chiah chiah a ni. Thing bung dang rawn tla in a rawn den leh pah chuan a lu ah leithrilin a rawn tlak chum chum a. 

‘Awmzia a va nei tampui lo ve, Jim,’ tham deuh tuakin a han ti a. ‘Ka chet apiangin he thing hrep hi a che ve zel a nia.’

Thudang sawi lovin, Green-a chu kawng ko ah chuan a rawn bawkkhup thla a. A pheikhawk phelh vatin kham koah chuan a rawn uai thla ve ta a. A ke chuan rahchhan tur rinawm deuh a han dap pah a. 

‘Jim, Pathian hming.. tum lo mai teh a!’ Dave-a chu a rawn au thawt a.

Sudden-a chuan a chhang lo. Kham panga a rahchhan leh vawn tur lamah chuan a ngaihtuahna a sawr bing tlat a. A rawn hawi thla zawk a, a chalah chuan thlanfim a rawn bawl chhuak tuam tuam a. Dave a lu zawn atanga fit tlemte  a rawn thlen thlengin a rawn tawlh thla zel a. Lung filawr ah chuan a kut pakhata inchelh tangin, a kawnghren siamsa nghet taka a rawn seh thlak pah chu, Dave-a kawnghren lo siamsa, theihtawpa sanga a lo ban chhoh nen chuan a han zawm a. Nghet taka a seh leh theih nan a khabe lamah chuan a han sawn chho leh a. Nghet taka seh bet tlat chungin chhuk lam ai maha harsa chuan zawi zawi in a han ban chho leh tan ta a. A kut leh mawza te chu lung hriam tak avang chuan a thi in a thler phengphung tawh a. Dave-a chuan chumi mila rawn tawlh chhoh ve hret hret pah chuan a lo thlir chhova, Green-a kawr dumpawl chu thlanin a bual huh zuih tawh a. Chu mi hnuaia a  tihrawl  te pawh chu tha tawp chhuah tih hriat takin an phiar tawng tawng a.

Kawngtum a Green-an a kut hmanga tanchhan rem tak a siamtheih hma chu chatuan tlukin a rei awm e. Chutah, ngaihṭha deuh niawm takin a han thaw halh a, a ke chuan ṭanchhan rem zawk a neih theih nan kham pang chu a han chhir dawt dawt a. Chutah a na te pawh  hrechang tawh lo chuan a thianpa lamah chuan a rihna zawng zawng sawmkhawmin a han tang ta a. Dave-a pawh chuan an hrui siamchawp chu lo manin, kar lovah him takin kawngah chuan an inpawt chhuak ta a. Chau chhe lek lek leh thlan hluamin kawngah chuan engemaw chen an han thu chawl leh rih a. An thaw dun hlawi hlawi mai a.

An thawhah zualpui te a lo reh takah chuan, Dave-a chuan Sudden-a lam chu hawiin, hmel thutak tawkin, ‘Jim, he I thiltih hi chu ka theihnghilh thei tawh lovang.’ a han ti a.

‘Kan en zel ang chu,’ tih pahin a lo nuia. ‘I kawppui putar hian hetiang hian naupang ka pawt fo peih dawn lo a nia. Pakhatna ah chuan, a hahthlak lutuk, pahnihna a tan Ka thihphah tep a nia’ — thâm ṭuakin a lo ti a.

Minute tlemte an han chawlh leh hnu, an hahdam fel takah chuan, Mesa tlang bulthut lamah chuan kal an siam leh ṭan ta a. Dave-a chuan kham pang chu a han melh leh zawk a. A thih teuh zia a ngaihtuahin a chil a lem khawlh a. He pa, nui zen zen lo hi lo awm ta lo se chuan….. a lu a thing nar nar a, ‘Tunah chuan Nick Putara nen kan inchibai lawp lawp tawh awm sia’  tih pahin a han phun sep sep a. An sakawr thlunna an thlen veleh Dave a chuan bawkkhup meuha lei fawp pahin, ‘Hei aia na a ka thleng thla lo chu ka va han lawm em’, a han ti a.

  ‘Kha aia na a i thleng thla lo chu ka va han lawm em… kei pawh,’ tih pah chuan Green-a chu a sakawr lamah a bai phei a. A rawn lehawi a, ‘Khai a, tla tlang zel mahla kha aia I nat theih dan kha chu zaah sawngnga chauh a lawm’ Dave-a chuan angaihna hrelo tak leh zawhna hmel chuan a rawn en a.

‘Lu vit zawngin I thleng thla ngei ang a,’ tiin a han hrilh zawm leh a. ‘Chutiangah chuan engmah I sawh na lovang.’

Chu insawisakna fiamthu rawngkai lek lek Dave-a’n a chhanna chu a hriat tham mang tawh lova. Chutah, Sudden-a chu han then leh sak a, hma hruaiin Slash 8 lam hawnna kawng tum chu an zawh zui ta zel a.

A hnulam chu mi ni tlaiah chuan, chaw ei dawhkanah an kut an han dah chhuak theuh a. Dave a kut pilh leh rang nuai mai te, Green-a kut tang pem leh a bai suih suih te chu Shorty-an a lo hmu hmasa ber a. ‘Nangni pahnih chu, in tum tawk tak in sual hrep emaw, or  chutiang chiah a beihletna in tawng emaw a ni ngei ang a ? tiin a han zawt a. 

‘Teh nang,’ tiin Dobbs-a chu a lo inrawlh ve a, ‘thirlen an suasam a ni ngei ang.’

‘Sawlai khurah khan tangkarua laihchhuah tumin an bei hrep te pawh a ni mahna,’ Gympy-a chuan a lo ti ve a.

An rindan leh an puhna hrang hrangte chu chu mite pahnih chuan sawifiah pawh tum lem lova an ngawih mai mai lai chuan Goerge Tate-a chauh chu chutiang anga ngaihdan siam lo awm chhun a ni awm e. Sudden-a chuan chumi ni a thil thleng chu a nih ang angin a lo hrilh tawh a. A hnuah Dave-a ka atangin a chin chhuakin dawp chhuak leh vek a.  Thil chiang tak ni a lang chu Green-a chuan a thianpa mualphona tur chu thupsak a duh a ni. 

Sudden-a’n thutthleng nghenchhan a nghen ar ar lai chuan a kut hmel thar chu Tate-a chuan chik takin a lo thlir leh a. A han kiai sak a. ‘A tha e, tlangvalte u,  dik taka sawi chuan in rin ang kha a ni lo vek — Chawlhni a lenchhuah satliah pawh a ni bawk lo a nia.’

A thian dangten an ngaichang thup tih a hah hmuh takah chuan leh Chawchhumpa lo luh ve avanga an reh tak duakah chuan thil mak tak leh ngaihnawm tak a han phuahchawp ta a. Sudden-a thusawi chu mak a ti bawk a, Chawchhumpa pawh chu chhuah leh tum ta mai lo chuan a tawi khawtlai ve ta a. ‘Dave-a leh kei chu Mesa chuan chung lam, kawng tum pawh awm mumal tawh lohna ah khan kan awm a. Far thing a ding ngaw khup a, a thim deuh khup a, hling a tam bawk si. Dave a leh a sakawr chu an talbuai a. Kei pawh chuan nuam ka ti ta lo khawp mai a. Ka chiang chiah lo nain, enge maw tak thleng tura hriatna hi ka nei tlat a. In lama kir leh mai kan tum lai chuan ka hmuh tawh a lian ber mai tlangram sakeibaknei chu thing zing atang chuan a lo dawk chhuak zawk a, Dave-a hnungah chuan a lo bei chawt a.’, A thusawiin a khawih dan chu ngaichangin a han chawl hlek a.. a sawi chhunzawm leh ta a. ‘Ka chhuk vat a, kah rem taka a awm theih nan ka lam khum ta vak ringawt mai a. A sawt lo hle mai a; Sakei leh Dave-a chu rul leh a vun ang maia inhnaihchilh in an awm tawh si a. Chutih chhung zawng chuan ‘Vaw thla rawh…la sawn rawh’ tiin Dave-a chu a lo au tuar tuar a.  Tah chuan ka tih theih awmchhun tiin – ka silaite ka paih lawk a ka kut lawng hian ka mat bet ta a ni.’

Ngaithlatute chu a han chawlh leh det lai chuan an lo thaw dep dep a. A han chhunzawm leh a, ‘Chu sakei chuan Dave-a chu seh ngei a tum avang leh a sa hrang khat tal keih thlak ngei a tum a vang chuan  Mexican puan ang maiin min thing thla a. Hei ka kut tang vun te pawh a pilh hlawk hi…Mahse ka hlau lo em a, Dave-a a thial bawrh bawrh lai chuan uluk taka inngaihtuahin hnung lamah ka tawlh hlek a. Ka pian a hnu lama ramsa ka pet tawh zawng zawnga la na ber turin ka ke thiah kan tem tir a nih kha. Vawikhat chu hetiang deuh hian picnic laiin a rawn kal a, ka lo chet khum hlak tawh nghe nghe a. Tichuan maw.. Pute u… Sakei biang ruh a ka petna lamah ka ke pawh a tliak teuh kher asin. Dave-a chung atanga lir sawn hlawl khawpa pet tu chu tunge tih hriat tumin a rawn inher a. Tichuan, a chaw kil mek chungah pawh chuan eng thil chiah nge thleng hriat tumin Dave-a hmel chu han thlir vung vung a. Min han melh tawn leh a, San Antone aṭang pawha chiang taka hriat theih tur khawpa ringin a han hram vak a. Ngaw karah chuan mei hem vut vutin a insaseng bo ta a ni. Ka rin dan chuan Dave-a pawh khan a lo melh rum ve hle a ni phawt ang a.’

Chutah meuh chuan, za lutuka nui thawm a rawn chhuak nghal hluah hluah a. George Tate-a meuh pawh khel beng meuhin a lo nui hawk uar uar a, tichuan Green-a chuan a hmawr a han bawk ta a. ‘Thiante u…Chu chu Dave-a pilh ran nuai nachhan leh ka kalbai nachhan chu lo ni ta phawt se, chanchin pawh a thui thei vak lo, A ni pawh.. a tawk fang chu kan dawn tir ve kha,’

Nui thawm zualpui a han reh deuh hnu chuan, George Tate-a chuan, ‘Nau te u, kan hriat ang kha a ni e. Khua kan kal velah Green-a hi zu khilai tur a ni.’ tiin a han nemnghet ve leh a. Remtihpuina thu a rawn ri nak nak a, Gimpy-a chuan a rawn belhchhah ve leh a, ‘Mike Mountford titi kotlanga kan dah lai ang maiin, a sawi ngaihnawm thiam mai a’ a han ti a’. ‘Mounford-a maw?’ tiin Green-a chuan a han zawt a. ‘Tunge a?’

‘South Bend lampang a Ranch te tak te nei a nia. Engtik niah emaw chuan I la hmu ve ang chu,’ tiin Tate-a chuan a lo hrilh a. Chu inhmuhkhawmna chu an duh aia hmain, an rinloh leh ruahman lawk miah lohvin a lo thleng ta nghe nghe a ni.