Strikes Back-19

‘Daw heh pa!’

Chu thu chuan thihna thu a rawn puangzar ta emaw tih mai turin pindan boruak chu a reh nghal tlawk tlawk a. Pindan chhunga midang zawng zawng ai pawh chuan a rawn tihchhan ber pa chu a nghawng nasa leh zual ber awm e.

Barday-a hmai pha deuh dui lamah chuan zahzelah a han in her teh ngawt a. Ani chu Green-a lam panin a lo che chhuak mek a.

‘Enteh hei, Green,’ a ti buh nuai a, ‘Khatiang khan I rawn ti ngawt thei lovang—’

‘Brady, I arsi inbel kha I tihzahawmlo nasa teh a nia..’ Sudden-a aw vawt raih chuan Lawman kallai chu a tiding chawt a.. ‘Rinhlelhna hi ka lo nei deuh thin che a — He ruahmanna ah hian I tel ve niin ka lo ngai a, mahse, I lo mawl ve hrim hrim a nih hi. Chu chu I nihphung ve reng a ni. Ka hrilh dawt mai ang che. Kha lai tlumtherh dangnal pa kha ka be duh!’

A sawi pah chuan Slash 8 pawlho awmna lam chu a rawn pan a. Anni ho chu an lo ri ham ham a, an Foreman lo kir leh chu lawm em em in a darah te chuan an lo beng a. Tawngkam tawi fel takin Sudden-a rawn thlen hma a thil lo thlen tawh dan te chu Dave-a chuan a lo hrihfiah thuak thuak a. Barclay-a ruang let reng a han hmuh chuan Sudden-a chu a insehruh nasa kher mai. Kunin Judge Putar chu a han bekbawr leh a, a thil hriat duh ang a lo hrilh lai chuan a lo bu nghat ngat a, Chutah, a rawn dingchar ta a…

‘Tichuan, Barclay-a chu I duh dan danin I lo puh kual vel a maw’ De Witt-a hnenah chuan a han ti a.

‘Kha chu mahni invenna a ni, Mr. Green.’ A hlauhna zualpui chu reh tawhin, luhlul hmel deuhvin a dinhmun chu a han siamrem a. ‘Min rawn tihdan teh ngawt kha a awmlo in, dan bawhchhiatna a ni tih hi ka sawi ngei a tul a ni.’

‘Tlaivar thakin hemi chungchang hi ka lo ngaihtuah tawh a sin,’ the Slash 8 pa chuan a lo ti vawt raih a. ‘Tunah hian ka han hrilh leh ngat teh ang che. Mi dawthei tak I ni, Pu Banker. Bumhmang, rukru leh tualthattu I ni..’

Chu thu a han phuh chhuah leh takah chuan, maktihna avanga thaw hap hap ri chu mipui aṭang chuan a lo chhuak a, chutah Brady-a bawk chu rawn che chhuak lehin, ‘Green, I silai tanchhan ringawt kha chuan khatiang thu kha phuh chhuak vak vak lo la a tha zawk ang. Mr De Witt-a hian a lo sawifiah zo chiah a.’

‘Lo tawng suh,’ deuhsawh zetin Sudden-a chuan a han ti a. ‘Ka duh dan danin ka tawng ang. Lo inrawlh sek tawh lo la. Kan Banker hi thu tlem azawng zawhfiah tur ka nei a nia.’

‘Ni a, tawlh kir rawh, Shady, khawthlirna I dal a nia!’ tiin tu emaw hi a rawn au a. Chu Sheriff vanduai tak chu deusawh zetin an lo eu dur dur a. Sheriff chu kun ngaihin sir lamah chuan a insaseng ta vat a.

‘I duh duh chu min zawt thei mahna, Mr. Green,’ inti zahawm fe in De Witt-a chuan a lo ti a. ‘Amaherawh chu, chhan ka tum lem lo tih ka hrilh a ngai che hi pawi ka ti khawp mai. Chutianga tih theihna thuneihna pawh I nei lo ve ve’

‘I ti diklo leh ta’ De Witt’ Suddena chuan a han ti a. ‘Ka nei ve ve’ tih pah chuan a silai paina kawnghren kara ipte ruk atang chuan Silver Badge hi a rawn phawrh a. Dawhkanah chuan duhdah fein a han theh phei a. Brady-a chuan lo chharin, thu inchhu chu hlauthawng leh makti takin a han chhiar ri a. ‘Deputy United State Marshall!’

‘E heu.. a thil han tih dan vel chuh’ tiin Dave-a chu a lo phun sap a. ‘Silai chelek a hnehsawh ropui si’

‘A sa huai a lo hupbet reng chu a mak love!’ tih pahin Grace-i chu a han en zawk a. Ani chuan a maktih zia chu a lo thup hleithei lo a. ‘Jim-a a hmuh hmasak bera a tihdan vel kha a hrechhuak uar uar ang chu’ tiin Dave-a chu a han nui sak a.

Chu lai pindan chhunga mi naran aia chungnung fe, Green-a thuneihna chhinchhiahna a han hmuh chuan De Witt-a erawh chu a khawng vek hi a ni mai a, a thil neih chuan a entir miau mai si a. A koki chu tla nghal hnawkin a hria a. Ngaina lo fein a melh ran tawh mai a.

‘Tunah chuan zawhna ka zawt tawh ang che, Banker,’ Sudden-a chuan a han ti a.

De Witt-a chu a lo bu  ringawt a. A khawhmuh chu a phe ruai a. a ngaihtuahna chu a vak kual zut zut a. He ramhuaipa hian engchen tak hria ang maw?

 ‘Pakhatna ah chuan, Barclay-a Sum enkawltu Banker I ni a tiraw?

De Witt-a chu a lo bu leh a. ‘A nih chuan, a sum chetvel dan zawng zawng pawh I hre ngei ang a.. a dik em?’

De Witt-a chu a vawithum nan a lo bu leh a. Khawi lam hawizawng tak chuan kalpui zel ang maw?

‘Swetwater phairuama Ranch zawng zawng neitu hi Barclay-a a ni tih heng mipui ho hi I lo hrilh ngar ngar a tiraw?’

De Witt-a chu a rawn dak chhuak deuh a. ‘Ka hriat chinah chuan, chu chu a dik e,’ a han ti a.

Sudden-a chuan a lo hnuchhawn leh hmiah tawh a. Chutah, Judge Pringle a lam chu hawiin, ani chuan a lehkha ip aṭangin lehkha chhah fe hi a lo phawrh tawh a. Sudden-a chuan tupawhin an hmuh vek theih tura keng langin, ‘Hengte hi dan ang taka ziahluh leh chhinchhiah, Carpenter Ranch te, Stackpole Ranch te, Diamond S te neitu nihna lehkha a nih hi. Tu hmingin nge a awm han ring chhin teh, Banker?’

De Witt-a chuan hrilhhai fein a lo en a. ‘Barclay-a a ni mai ang chu’ He silai hmangthiampa maksak tak hian engtin nge a in ziahluhna lam thleng thlenga a lo hmuh chhuah theih le? A pawi chai love, engmah finfiahna a awm chuang lo. 

Judge Pringle-a chu lo dingchhuakin, ‘Green-a’n Mesila a kal a, heng lehkha te enfel tura min tih khan, a â ta emaw ka tia. Rinthu a thudik chhui dawn ringawt hi a tawk lo tih thu min hrilh a. Tunah chuan a dikzia ka hmu ta. Chhinchhiahna a hming awm hi Zachary Barclay-a a ni lova, Mahse mipakhat, a hming ‘Seth Miller’ a ni. Helai vela mi tumah hi chutiang hming pu an awm si lo.

‘Bah! chu chu a nihna diktak thupna tura Barclay-a’n hming lem a hman pawh a ni maithei a sin’ tiin De Witt-a chu a lo inrawlh vat a.. ‘A thiltihdan velah hian a fing kherek kual kawi teh a nia. Engkim hi min hrilh in ring bi em ni?’

‘Engkim lo deuh pawh a hrilh che niin a lang’ eilo fe in Sudden-a chuan a lo ti a. ‘Mahse a pawi love. Seth Miller-a nihna diktak nen lo chuan Barclay-a hian heng hi a ziahluhtir thei lo reng reng.’

‘A lo ni mahna,’ De Witt-a chuan a lo ti vawt raih a,. ‘Chung thleng thlengte chu min hrilh hleinem.’

‘Kan zawh ve theih tawh miah loh turin I siam tawh tlat si a lawm,’ ro zetin a lo ti let a

‘Zawhna dang leh. Bull Pardoe-a hi I hre ngai em?’

‘Aih. Chutiang hming ka hre ngailo.’

‘A va nuihzathlak ve. Ani chuan a hria che a sin.’

‘Mi tam takin min hria a lawm, Green. Henglai velah chuan mi hriat lar kan ni ve a.’

Mipuite boruak tang zualpui a han reh takah chuan, De Witt-a pawh a inringtawk telh telh a. Amah chhuahchhaltu chu a melh na ngam ve ta khawp mai a.

‘Chu chuan, Burley Linkham-an a lo hriat ve na chhan che pawh a sawifiah nghal a ni maw?’

‘Linkham-a chu ka hria a lawm. Barclay-a Foreman a ni thin a. Barclay-a’n thupek te, thu leh hla hlan chhawn nan ber a rawn hmang thin a.’

‘Barclay-a Foreman a ni lo tih a sawi a sin.’

‘Eng I tihna nge?’ Chuti chuh! Green-a hian Linkham-a hi a lo dawp tawh em ni dawn aw… fimkhur a ngai tlat!

‘Linkhama chuan Barclay-a foreman anga a awm te kha chu tlang bumna mai mai a ni a ti a. Nangma tana thawk niin a in sawi a, Barclay-a thih hnua, he lai ruam I neih hunah Box B enkawltir I tiam thu a sawi a sin.’

Pindan chhung reh takah chuan, De Witt-a chu a ding ngawi reng a. A rilru chu sazu ang maiin a vak kual zut zut reng a. Engtin emaw he ramhuai hian Linkhama chu a tawngtir a ni ngei ang le. Linkham-a chu amah tanlo zawngin a tawng a ni ve mai a. 

De Witt-a din ngawih reng lai chuan Sudden-a chuan Dave-a lam chu hawiin thu a han hrilh zauh a, ani chu mipui karah chuan a kalna tur keu sawt sawtin Saloon pawnah chuan a put chhuak ta daih a

‘Engvangin nge hetianga mi I zawh kual chiam chiam mai le tih hi ka hrethiam lo takzet a ni,’ De Witt-a chuan a han ti zaih a. ‘Tunah hian, Burley Linkham-a te ang mihring le lo takin min sawi chhiat dan vel hi heng mipuite hi awihtir I tum em ni ? I thuneihna chu engpawh ni se. I huang chin I pel thui viau tawh tih a chiangin ka hria!’

A lo thlirtute chu khawngaihna lantirin an lo phun mur mur a. Chumi thawm a han hriat chuan, Sudden-a chuan zawi zawiin chu Banker pa chuan mipui te thlawpna a hmu tan leh mek tih a hre chiang hle a. He pa chhuanlam hi a daikhalh vat loh chuan loh theih lohin a a dan kawlawkna  atang chuan  a put leh thei tih pawh a hai lo. Dave-a, Saloona a lo luh leh lai chuan a va hawi phei a. Beram ang maiin, chibuh deuh nuaia phuarhlawm mi pahnih chu a lo chhawm lut mek a. Tuemawni  hi a lo au hluai a.

‘Hey! Kha chu Burley Linkham a ni reng mai!’

‘Tunge khati taka ching pawr che a, Burley?’

Linkham-a chu a landan ah rel chesual atang a damchhuak chhun hi a ang êm lah tak a. Chutah, Pardoe-a, ban awrh hnuangin, thawmhnaw khawn uaih leh phelh phungin a lo awm bawk a. Dave-a chuan bar bula hmun awl laiah chuan a rawn nawr phei a.

‘Hepa hi I hmuh tawh thu I sawi a ni lawm ni?’ tiin Sudden-a chuan Pardoe-a en chung chuan a lo ti a.

‘Teuh lo!’ De Witt-a chhanna chu a chang kher mai.

‘Anih, Burley Linkham-a hi chu I hre deuh tiraw? Chu Banker chu a lo bu leh nghut a

‘A tha e, nang kha ka hria che !’ Linkham-a chuan a lo ti ngul ngul a. ‘Ka hre lutuk che.. teh hrep chuan.’

‘Bah!’ De Witt-a chuan a lo ti hmak a. ‘Hetiang mi, dawtsawi hmang mi tawrawt tih hriat reng reng te engtin nge ka hriat ang?’

‘A chhan chu Burley Linkham-a hi Shadows hotupa a ni a. Pardoe-a hi a tha chhang dawltu a nih hi.’

Pindan chhungah chuan thinrim ang thawm a ri nghal nuai nuai a. A vawikhatna atan, he phairuam tihthaihtu mi pahnihte chu, he hmunah, ah hmai hma ngeiah, Hanging Rock mipuite chuan an han hmu thei ta chu a ni a. Tu emawni hi thutphahah chuan rawn zuangkaiin, ‘Hrui han la teh u, I khai hlum ang u !’

Sheriff Brady-a chu a rawn zuangtho zawk a, bengchheng khap daih nan a ban a han phar a. ‘A tawng leh apiang chu Jail-ah ka khung nghal ang che u’

A vawikhatna atan, Sheriff mum kang mai chu tumahin an lo nuih ta lo. Thlirtute ho chu an ngawi thap a. An mi huat em em Shadows mipahnihte an zinga an awm lai chuan, an thinrim inup chu engtik lai pawha puak chhuak thei reng a ni. Zen tang em em mai barrel chunga thu reng ang an ni. Chu chu hriain, Sudden-a chuan a zawhna siam dan kawnghmang chu a han thlak hlek a.

‘Linkham, tunge in hotupa ber? Tunge thu pe thin che u?’

‘Engati nge…… amah hi!’ tih pahin Linkham-a chuan Banker chu a kawk va mai a. ‘De Witt-a hi... Ka hrilh tawh reng che kha!’

A thu phuhchhuah avang chuan an phek buai nghal ta nuai nuai a. Mipui ho chu nasa takin an inhnial nghal luih luih a. A thenin Linkham-a chu dawt sawi thei dinhmuna a din tawh loh avangin, thudik a sawi a ni an ti a. A thenin engphiar tawng tawngin Banker chu lo tan pahin, Linkham-a te ang mihring thusawi hi chuan dollar khat pawh a man lovang an lo ti a.

‘He thil hi chu tawrh theih piah lam a ni ta, Green!’ De Witt-a chuan a lo ti hmak hmak a. ‘Hetia din reng a, heng mi phatsan hmang ho nena hun hman reng hi ka duh ta love.’

‘Phatsan hmang ho a…, I tia law?’ tiin Linkham-a chu a lo phun sup a. ‘I khaw hmuhna kha anchhe dawngin awm rawh se, De Witt, keimah chauh chuan min khaihlum bik hauh lovang. Ka pawt lut ve ngei ang che. Chhia ka chham e.!’

Sudden-a chu a lo thlirtute hmachhawn chuan a han inher a. ‘He thil phuahrem dan hi chu pakhat chauh a awm. Pardoe-a chu Bank rawk chungchangah a inpuang tawh a. Linkham-a hian Tate-a kha a lo lambun bawk a. Chutia a sawi lai chuan Tate-I hmui atang chuan hlauhlawp ri a rawn chhuak feih a. ‘De Witt-a thupeka che an nih thu an sawi a ni.’

‘Barclay-a chu tirhkah mai mai a ni a. Kawng lehlamah chuan, Banker khan mi dawthei tak an ni a. He an ruahmanna tenawm tak phenah hian Barclay-a a awm a ni a ti bawk si a. Mahse, engtin emaw chuan thudik chu kan hrechhuak thei tho mai thei a ni. Judge Pringle a’n Mesila a dan dik taka ziah luh lehkha a chhiar lai khan Linkham-a emaw Pardoe-a emaw, a tu mah mah hetah hian an awm lova….’ 

‘Chuti a nih chuan a tu emaw tal hi chuan he Banker hi Jasper de Witt-a ti lova hming danga an koh in hre mial lo maw ?’

Linkham-a hmel chu a ngui ruih mai a. Chu pa lianpui chuan a ngaihtuahna chu sawrbing ngial a han tum a…

De Witt-a chuan Slash 8 pa in a dan kawlawk nalh zia chu hrechhuakin a haw kher mai. Linkham-a’n a lo hriat ve vaih chuan………

‘Hetiang mai maia chhaih kual turin he laiah hian ka ding duh tawh lo!’ De Witt-a chuan a han ti tuar a. ‘Ka chhuak nghal dawn.’

‘Seth!’ Linkham-a awri, hremhmun rim nam rum rum chu Banker pa tawnglai chuan a rawn ri chhuak a.

‘Barclay-a khan vawikhat chu ‘Seth’ tiin a ko a ni!’

Linkham-a hmui atanga chu hming tehhrep a rawn rik chhuah lai chuan De Witt-a chu hmun awllai paltlangin pen engemaw zat a lo kal hman tawh a. Thinrim theihtawpa riat nawk nawk pahin a rawn vir zawk a, Sheriff Brady-a awm chu a kokiin a han su nghek a, ani lah chu zei lo fein Sudden-a lamah a petek phei tuang tuang a, chu chuan second hnih khat lek chhung Slash 8 pa khawthlirna chu a hliah deuh hlek a. Chulai kar te ah chuan, De Witt-a chuan Grace-i ṭhu lai chu a phih tho nawk a. Brady-a kawnghren atanga a lak puakruk chu nula biangah chuan a han chuktuah nghal a……

‘Tumah kha che reng reng suh u!’ a han ti sap a, ‘A nih loh chuan nula hi a thi a ni mai. Ah, nang kha?’ Dave Haynes-a chuan Banker pa ngaihtuahna lakpen beiseiin, inrawlh tumin sir khatah chuan a lo insawn hret a. Puakruk chu a ri dur a, chutah Dave-a chu hnung lamah a petek phei nawk a, a kut chuan silaimu fuhna lai chu a han hup a, a kut kar atang chuan thisen a rawn val chhuak pawp pawp a.

‘In zavai khan fing hle ah in inngai a ti rawh u’ tiin De Witt-a chu a ner sung a, tumah che ngam awm hek lo le. ‘Tumahin in hre chhuak thei lo a ni. Ni e, Shadows hotupa chu ka ni a lawm. Seth Miller-a chu ka ni e. He hmunah hian engmah nei lovin ka lo kal a… Nangni kha awm hle hle rawh u!’ tih pahin a pistol chu a han vilik kual a. Chu silai kua nelawmloh fahran maiin a rawn tinzawn takah chuan, Gimpy-a leh Mac Donald-a rawn che chhuak mek pawh chu an ding khawng ta reng mai a. ‘Thil tha tak lo thlir lawk thiamna mai lo chu engmah ka neilo. Mi a ho! Beram rual ang mai in ni. He phairuam hi relkawngin a rawn paltlang dawn. Ram zawng zawng ka nei vek tawh. Maktaduai, maktaduai tel man a ni dawn! Chung zawng zawng chu ka ta vek tur a ni,’ Sudden-a chu no lo zetin a han melh a. ‘Mi pakhat chu, I rawn inrawlh buai man hi chu I hmu dawn. Thi rawh. Hrep tak che hian!’

Pistol ngul chu a han lekkawh ta a. A hmehperna a kawih mek lai chuan a hnung lam atangin aw in a rawn ko ta thut mai a.

‘Seth Miller!’

Kawngka lamah chuan mi mit chu a fu ta ṭhup mai a. Patches-a, Doctor ruangam chu a rawn lang a. A kawng zawn atang chuan laiphir kausa hi a rawn lek kawh to mai a. Mahse, an lo hriat thin, hmuihmul buk tak leh zu ngawlvei Patches-a kha chu a ni tawh hlek lo mai le. Chu pa chu a harhfim hle a, a rawn inchei fel thlap mai bawk a. A din danah te chuan khurhna chhete mah a awm tawh lo.

‘Seth Miller, vawiin ni ang hi kum hnih chhung ka lo nghak tawh a sin’ Doctor chuan a han ti a. A awki chu a changin, a vânkai chaw ruih mai. Tu nge I nih ka hre reng che a sin. Min hre ve em, Miller?’

Chu Banker hmel chu a thil rap em em nei ang mai hi a lo ni ta a.

‘De Witt!’ tiin a han thaw hawk a.

‘Ni e, Miller, Jonathan de Witt-a, a fapa I thahsak tak, a dinhmun leh a hmingthatna zawng zawng I luahlan sak tak a kha ka ni e. I siamtu tawk turin I inpeih tawh em, Seth Miller?’

‘Ni lo —  ti suh! Nula hi ka.. ka that a ni mai!’ Miller a chuan a lo ti tuar a.

‘A nih leh han ti la.. ka that tho tho dawn che a,’ ngaihsam zetin Doctor chuan a lo ti hmiah a.

‘Nilo … nilo, enteh — ka inpe e. Silai pawh hi ka thlauh dawn e,'

‘Enteh!’ tih pahin Grace Tate-i thidang lek lek tawh chu sir lamah a han nam sawn rawk a. A puakruk chu chulai thingzai nawi phut dupah chuan a thlauh ta nghal a.

Doctor in ten hmel zet a Banker pa a lo melh reng lai chuan Slash 8 mi leh sate ho chuan Grace Tate-i chu chulai hmun hlauhawm aṭang chuan an lo hnuksawn vat a.

‘Thah tlak pawh I ni lo’ tih hmak pah chuan a laiphir chu a han lek hniam a. Chulai kar te ah chuan De Witt-a kut chu a awm zawnah chuan a phe chho leh zawk a, Laite (Derringer) phir ṭhaih mai hi a tualthahna kut chuan a rawn lek chhuak leh zawk a. Thil sual ti leh tura chu silai a lekkawh hma hret chuan a rawn puak thuai a. Pai chawn chawn chungin chu silai puahna lam chu a han hawi hram hram a. Sudden-a chu a kuta puakruk khu hlat hlat keng chungin a lo ding reng tawh a. A meng rum hle mai bawk a.

Na ti tak chungin, thinrimna avanga â vek tawh hmel a rawn pu a. Chatthla mek chung chuan a hmelma lianber chu kalpui ve ngei tumin a silai chu lekkawh leh hram hram a. A chanve vel a lekkawh tawh ang tihah chuan Jonathan de Witt-a chuan a laiphir mu chu a rawn chhuah ve ta thung a. A puak ri dur a, Miller a chu pawnchhe hlawmkhawm paih ang maiin bang ngheng chuan a hnawl  phei ta rawp a. 

‘Dan ka bawhchhe lo tihna tiraw, Jim,’ Doctor chuan a han ti a, ‘Kha chu ka dikna ve niin ka hria.’

A hmelmapa kah leh tuma Banker pa in a silai a lek kawh laia phen tur zawnga dawhkan leh thutphah phena biru mipui ho chu muangchangin an dawn ding chhuak ta hlawm a.

Linkham-a chuan chu ruang sawp nulh mai chu a han en a. Green-a lam hawi leh pah chuan, ‘Green, hei chen ka dam chhung hian nang anga silai phawirang hi ka la hmu ngailo reng reng. Amah leh amah a inkap ni maiin a lang a lawm maw le’ a han ti a. 

Chu chu Seth Miller-a hun tawp dan leh  a thlanlunga inziah dan chu a ni ta.

Ni engemaw zat hnuah chuan Slash 8 Ranch-a mut pindan zau nuam tak, ni chhuak dawng iar maiah chuan Slash 8 mi leh sa mi tlemte te chu an thu bawr laih a. Green-a chu a thianpa Dave-a mangtha turin a lo lut a. Ani chu duat takin Grace-i’n a lo enkawl hliau hliau a. Miller-a kahna kha a ruh khawih lovin hliam tenau mai a lo ni a. Curt Parr-a kahna, a dar hliam zawk chu enkawl ṭhat a ngai tiin Grace-i chuan a tilui deuh tlat a. Chuvang chuan chawlh hahdam tirin, a lo ngaihsak ang reng hle a ni. Chutiang boruak hrethiam taka Chawchhumpa leh Gimpy-a’n Sudden-a an lo dawnsawn takah chuan chu Nula, la naupang tak hmel chu a lo sen ṭan ṭan a. Nuam a ti ta vak lo deuh a.

‘Khai a, Jim,’ remti lo tih hriat deuhin Dave-a chuan a lo ti a. ‘Chuti vut vut tur em ni dawn. Dik tak chuan min chhuahsan hi a ṭul lo a sin mawle.’

‘Nia, Jim. Engah nge I chen ve nghal mai loh ang?’ Grace Tate-i chuan alo ti ve a. ‘Hetia I awm ve hi kan lawm tehreng nen’

‘Nilo ve, Helaia ka awm a ṭulna a awm tawh lo. Kum rei loteah helai ruam hi ram hausa a ni tawh dawn a. Tunah chuan De Witt-a – Kha hming khan ka ko leh thin – Miller-a’n helai ruam a lo ṭhambeh tlatna kut chu tih tliahin a awm tawh a. Helaiah chuan min mamawh tawh hleinem,’

‘Miller-a kha engtin nge bur bun nachang I hriat zawk a, Jim?’ tiin Dobbs-a chuan a lo zawt a.

‘Thil pakhat a sawi kha. Shadows hovin Slash 8 an rûn tih a sawi khan, helai mite aṭang chuan kha thu kha a hre dawnlo a ni tih ka chiang a’

‘Patches a chungchang kha a nuihzat thlak ang reng tiraw,’ hlim deuhin Gimpy-a chuan a lo ti a.

‘Nia, hremhmun a paltlang chu a ni ngawt e,’ Shorty-a chuan a lo ti ve a.

Kha misual Miller thih hnu khan Patches-a chuan a chanchin chu a hrilh ta hlawm a. A fapa, Jasper de Witt-a chu Hanging Rock khua a Bank rawn tiphuisui turin khawchhak lam atangin an hotuten an tir a. Miller-a, Santa Fe vela pawisa khela lo thep kual vel chuan engtin tin emaw lemchangin a fapa chu a lo hmu a. A thuruk chu a lo dawp chhuah sak a. Chutah, Miller-a chuan thatin, a lehkha pawimawh leh a nihna te chu a ruksak ta a. Tichuan, Hanging Rock-ah lo kalin mitthi ai chu a rawn awh ta a ni. Bank kaltlang chuan, helai hmuna rail kawng siam a nih tur thute a lo hria a. Chumi zulzui chuan ruahmanna a lo duang ve ta a ni.

‘Jonathan de Witt-a, Patches-a tia kan hriat zawk tak a chuan a fapa a reh tak hmiah avangin a chunga thil thleng chhui turin khawthlang lamah a lo kal ta a. Bank-a lo awm pa chu a fapa a ni miahlo tih a hmuchhuak ta a. Santa Fe lamah chuan kir leh vatin, chanchin a han zawt kual a, a fapa chu Miller-a tih hming pu nen an hmuh dun ṭhin thu a hre ta a. Chupa pianhmang chu Jasper de Witt-a anga lo awm ta mihring nen khan a inang chiah a ni.

‘Mahse, a kehsawm ta vek a. A thin a ṭhawng hle a, hlauhna te pawn a man ta a ni mahna, zu in lamah a ṭuan a, an la rawk zui lehnghal a. Tanpuina dil turin khawchhak lamah a kirthei ta lo a ni. Miller-a chungchangah chuan finfiahna a nei thei hek lo. Chuvangin, khuaa zu ngawlvei anga changin, Miller a chet pelh hlek changa phuba lak tum  ranin a khel kual ta ringawt mai a ni.’ tiin Sudden-a chuan a han hrilhfiah ve ta hlawm a. 

‘Tichuan, Judge Pringle an Registration Certificate-a Miller-a hming a rawn tarlan takah khan Patches-a chuan Miller-a hun a thleng ta niin a hria a.’ Dave-a chu lo inrawlhin, ‘Saloon-ah khan ka hmu reng a sin. Silai la turin a relh chhuak zauh a ni ngei ang. Kawngka a a rawn lang leh chiah kha chuh… Miller-a kha… thlahrang hmu ta ah a inngai niin ka hria.’

‘A fapa nen an inang hle niawm tak a ni,’ Sudden-a chuan a lo ti a.

‘Chuvang a nia, a inzuah buk a, a tal duhdah tak em em. Miller-a’n a hriat chhuah kha a hlau em a ni..’

‘Miller-a khan a kokiah silai pahnih hnih em chu a pai ka lo beisei miah lo va,’ tiin Shorty-a chu a lo thaw hawk a. Kha tih lai a thil thlen dan hlauhawm tak kha a han ngaihtuah lêt a. 

‘Takin, Jim, Khatiang taka silai hmanthiamna kha khawi aṭanga I zir nge?’

Sudden-a chuan a lu a lo thing a, engmah a sawi lo.

‘Ka rin dan chuan,’ tiin Shorty-a chuan phur deuhin a han chhunzawm a, ‘Kan hriat thin Sudden-a hi pawisa chawiin I inzirtir a niang.’

Pindan a chhuahsan zawk hnua lo kir leh chiah, Grace-i chuan Shorty-a titi vel chu a rawn hre hman a. ‘Shorty, chu chiah chu a nia lawm!’ a rawn ti hluai a. ‘Jim-a te ang mihring leh khatiang dan pawna hnawl misual hlauhawm tak dinhmun te kha chu dang tak a nia’

Sudden-a chu thawh pahin lungawi takin a han nui var var a. ‘Miss Grace, Judge Pringle I tlawh leh hunah chuan, thu bengvarthlak tak tak I hriat ṭeuh tawh ka ring.’

Grace Tate-i chuan a ngaihna hrelo deuhin Foreman chu a lo en ha a. ‘Eng I tihna nge, Jim?’

Sudden-a chuan nui chungin a han melh chhuk a. ‘Thawnthu sei tak a ni. I mamawh hun atan khek rawh’ a lo ti ringawt a.

‘Takzet maw!’ a lo ti vat a. ‘Nangma chungchang thu leh I thawnthu ngaihnawm tak a nih dawn chu. A ṭha e. Tunah chuan kaldarh a hun ta. Kan damlo pawhin hahchawlh a mamawh ve tawh ang. Khatia in rik luih luih a, in zuk khuk luai luai reng te chuan a hahchawl thei nang. Kha kha.. kal teh u.. Jim, nang pawh kha.’

‘Minute nga lek hun min pe teh a, ka pi, chuan ka kal ang e’

 ‘I kal chhuak thuai lem lovang chu tiraw?’ Lamṭang a tana duh tih hriat takin Grace-i chuan Dave-a chu a han en a. Chu Cowboy la tlangval tak chuan a lo ngenpui ve a. 

Sudden-a chuan lu thin pahin ‘Ka chet chhuah mai a ngai ang, hnathawh turin min hmuak reng a ni’ a han ti a.

A tawp a tawpah chuan Grace-i chuan khuma mu chu a han fawp zauh a, Dave-a chuan a lo hnial der a. A kuta kawngka la vuan chung chuan, ‘Minute nga tak tak ni rawh se, second khat pawh belh lovin’ a han ti a. 

A han chhuah takah chuan Dave-a chu a thianpa lamah a han hawi a. ‘Jim, Sudden ti a an koh ngawt nachhan che ah hian thil tam tak paltlang I nei tih ka hre mai. Min hrilh ve duh angem?’

Sudden-a chu a han hawi vel thuak thuak a. Chutah, a rawn nui ta var var a. ‘Khai a, hrilh che mah ila I ring chuang lovang’ tih pahin a han ṭhen sak a.

A ban chu a rawn phar chhuak a. Chung ṭhian rinawm pahnihte chu an han indawm vang vang a.

‘Enkawl ṭha hle rawh aw, Hmeichhe ṭha tak a nih kha,’ Sudden-a chuan a han ti a.

‘Ka hria alawm. Nang pawh inveng fimkhur hle ang che aw’ Dave-a chuan a lo ti ve a. A hrawka hnawhtu awm ang maiin chutianga thu sawi zel harsa a ti ta riau a.  

‘Kum kha leh chen kha ka lo bei tawh a, hei ka la ti thei ve zel a lawm’  Sudden-a chuan a lo ti halh a.

Che chhuak turin a han inher a, kawngkaah chuan a ding leh det a, ‘A hmasa ber chu ka hming chawiin in lo phuah dawn nia, huh’

A ṭhianpa chu a lo ngawi vang vang a. Green-a mangṭha na thawm te chu a han hria a, chutah bathlara a pen thawm, a tawpna atan, a Sakawr hramri leh kawta sakawr ke chhep ri chu phairuam kawngṭumah chuan a zawi tial tial a. Phairuam chhuahsanin, kir leh tawh lo turin a liam ta. 

‘Kan va ngai dawn che em, Jim,’ tiin a han phun sap sap a. ‘Ka lo ti ngei ang’

A TAWP TA