Strikes Back-17

Burley Linkham-a pawh a ngui ruai mai.  Darkar thum kalta khan Jasper de Witt-a Office ah a awm a. A chapona leh induhna tla rawih rawih khawpa tawng khum a ni leh pek a nih kha.

‘Tichuan, Parr-a chu I pistolin I lo vua a, I kaltir leh ringawt a maw, ber bur pa ? De Witt-a chuan a lo ti hrep a. ‘Chu chu em ni tuna min hrih kha ?’

Linkham-a chu a bu nghut a. Chu Banker pa awki atang chuan thil a tisual a ni tih a hre chiang hle a. Engtin chiah nge a tih sual dan erawh chu a chhui thiam hlei law. Mahse, Banker thinrim zia erawh chu a hai lo kher mai. 

‘Hnuhma fel tak nei tur hian ka ring thei dawn lo che niin a lang, ber bur che hian.’ Chu Banker chuan a han ti salh salh a. ‘Pakhatna ah chuan, Green-a aiah Tate-a I han that ringawt a. Chutah, I mawlzia belhchhah turin Parr-a I han chhuah leh ringawt a. Khapa khan nangmah khaihlumna khawp thu leh hla a pai a sin. Che buan lutuk mai, thingtum leh milem ang maia thluak nei lo I nih hi. I engkim hi ka ngaihtuah vek tur em ni ? Parr-a hian tuemaw dilchhut deuh leh tawng duh deuh tawng fuh palh ta se la, a thil hriat te hi a sawi chhuak vek mai thei tih te I hre lo mi ? Kum kha leh chen atanga fimkhur taka ruahmanna ka siam chhoh te hi tuemaw kamtam deuh pakhat in a tih khawbaw mai mai turin ka phal lo tih te hi I hria em ?’ tiin De Witt-a chu a per tawk tawk mai a. Linkham-a’n buh deuh nuaia a insawithiamna chu a kut thinkumin a te tuar tuar a. 

‘Lo ngawi hmak ang che, mi a pa ! Thil ka’n ngaihtuah lawk teh ang.’ 

Linkham-a chu lungni vaklo chungin a ngawi ta roh roh, Banker pa vei kual nghat nghat lai chu lungawi lo zet leh luhlul hmel takin a en run run a. A chhungril ngaihtuahna te chu hriatpuitu lo awm se chu, a thu dawnsawn dan chuan a ngeng a chhun hle a ni tih an hre thei ang.

‘Khawiah nge Parr-a chu a kal tak ang le aw ?’ tiin Banker chuan a rawn zawt leh thut a.

‘Ka — Ka hre miah lo, ih.. ih −’ Linkham-a chuan a lo ti nuah nuah a. ‘Ding miah lova  a sakawr chunga chuanga, kal char char turin ka hrilh ringawt a. A hmel put hmang atang kha chuan thil dang a tih ka ring miah lo.’ Chutah, tlema inthiam chawp rilru deuhin, ‘A ngam pawh a ngam lovang. Ka tihthaih nasa em mai.’

‘Mahse, kan tawmbuk erawh chu a hre ngei a lawm’ tiin Linkham-a chu a bu nghut a. ‘Tin, midangte pawh a hre vek che u a ni lawm ni ?’ zawhna pawh ni lovin thudik hriam taka insawikhumna a ang zawk mah a.

Linkham-a chuan lo chhanlet duh viau mahse, a chhanletna hun pawh pe lovin De Witt-a chuan a han sawi zawm zel a. ‘I hmuhchhuah a tha ang, Burley, heng lai  velah hian a khawsak vaih chuan I chhe vek a ni mai. Dinhmun hlauhawma I din hlek pawhin ka thlahthlam nghal ang che. I nunna chu Parr-a kutah a awm a nih chu aw. Zawng chhuak vat rawh, I hria em ? Parr-a hi a thi ngei a ni tih finfiahna I neih theih loh chuan rawn kir tawh suh ang che. Hmanna tur che ka nei tawh lovang. Ka thusawi chu I hrethiam em ?’ A mitmeng hlauhawm tak chuan Linkham-a chu a en ra mai a. A nghawng cher leh ruh theng thawng te chu a sai hlawk hlawk a. Linkham-a chuan Parr-a a hmuh thuai tur thu a sawi nuah nuah pah chuan a ke chheh chu a han siamrem hlek a

‘Thil dang te … enge chanchin ?’ tiin ngaihtha vak lo chungin a han zawt a. 

‘Thil dang zawng zawng, I rawn sawi ang chi kha chu  kan duh dan angin a kal vek. Burley, I tel emaw tello emaw chung hian thil ka kalpui thei vek tawh. Ka tan chuan engti kawng pawhin a danglam thei tawh lo. Naktukah Brady-a’n Slash 8 chu a han lilam fel ang a. Nula chuan Pawisa a tuak chhuak thei dawn si lova, Barclay-a’n Ranch chu Bank atangin a lei ang. Nula chu khawchhak lamah a kir leh mai dawn a ni. Chutah tak chuan, Slash 8 michhawr te chu  Nang leh I ho ten in lo dahtha dawn a ni. Chu chu hlen chhuah theih ngei tum ang che u. In theih loh erawh chuan, nangmah thlak tu tur hi ka hmu thei reng a nia. 

‘I ti ngawt lovang,’ Linkham-a chuan thawk hulh pah chuan a han ti a.

‘Ka ti dawn, Burley duh tak, darkar sawmhnih pali chhunga Parr-a I hmuhchhuaha, a thi ngei tih finfiahna I rawn neih theih loh chuan ka ti khawp ang. Ka sawi ang kha I hlen erawh chuan kan inremsiamna ang kha a hlawkna kan tel tan ang. Box B enkawl hna chu I kutah a lut ang a, he phairuam hi kan nei dawn a ni. Chumi hnuah kan rallak sumte kan insem ang. Tunah kal nghal la, hun khawhral vak chi a ni tawh lo a nia.’

 Linkham-a chu a bu nghat a. a thlanin a bual huh chuap a lukhum chu a han khum tha a, De Witt-a Office chu a chhuahsan ta a. A chhuah hnu chuan De Witt-a chuan a thutna nghenchhan chu a han ngeng ar ar a. A kut zungtangte chu a han insiktir thap a, Linkham-a hnena a thusawi dante chu a han ngaihtuah kir a, ‘A tha thawkhat a lawm’ tiin a han inhrilh sap a. ‘Nang leh kei hian kan rallak sum chu kan insem thei dawn khawp e. A nuam teh ang chu.’ tiin a nui ta var var a.

Linkham-a chuan a sakawr zin te chu a han bel fel a, Muangchangin khua atang chuan a inkhalh chhuak ta a. De Witt-a’n paihchhuah a tum dan vel a han ngaihtuah chuan a rilru ah thinrimna a rawn lut vawt raih raih a. A ngaihtuah lehlamah chuan a lungkham hmasak ber tur chu Parr-a awmna chu niin a hria a. Chu pa chu khawiah nge a kal tak ang le ? Ranch a Parr-a a rawn lan lai khan a la hma hle a, Parr-a ran lan laia Zack-a a lo la mu hlauh chu a vanneih thlak angreng viauin a hria a. A chhan chu Parr-a mi enthlak dan vel chu a hre hman lo tlat a ni. Barclay-a’n ngainat dan leh a kut dinglam angmaia a ngaih dan a han ngaihtuah chuan a hmui chu a tikum phut phut a. ‘De Witt-a hian he Rancher pa hi a bum hneh thin mang e. Keimah hi De Witt-a kut dinglam chu ka ni zawk reng sia, ‘Ruahmanna a niin a siam buai laiin, kei chu sakawr chungah ka lo chuang vel mai mia chu a ni thin si a. ’ tiin Linkham-a chu a inngaihtuah a. De Witt-a chuan an inremsiamna zawng zawng hi an zawh fel hunah Barclay-a invaivung velna hi chu chhawrna tur a awm tawh loh tur thu a lo vawi tam a hnenah a lo hrilh tawh thin a. Sual tih hriat ngawih ngawiha then vur vur chungin a sawi awmzia tur awm chu a han ngaihtuah a, hrethiam nghal maiin a inhria a ni. De Witt-a thil ruahman dan kip a kawi hi a lo ngaihtuah ve fo tawh thin a, mak a tiin, felfai pawh a ti thin hle a ni. Barclay-a hi ram chungchang velah hmathehah thiam takin a hmang tlat bawk si a.

Ni, chutiang chuan a lang lamah Barclay-a pui bawmin Linkham-a hian Box B chu a tanpui thin a. A nihna takah chuan Barclay-a chetdan enthla tur leh chumi pah chuan Linkham-a’n Shadows a kaihhruaina ah hian inphen nan a hmang a pah bawk a lo ni reng a. Barclay-a chuan mawl takin Box B leh Shadows inkungkaihna thup tlat a nihna kawnga ruahmanna hi a hmingthatna emaw a lo ti ve a. Dik tak chuan, De Witt-a thu leh hla vek a ni a. A thupekin Padoe aleh a thiante chuan Box B Ranrual ngei ngei pawh tlem tham te te in thla tam fe kalta a tang khan an lo ru tawh thin a ni. Thil kal sual palhin, Zack-a hi an duhdan pel a kal dawn ta ang se, dan bawhchhiatna thil tih engemaw zat phawrh chhuah tur a awm nghal dawn a. Ranch chhinchiahna hrang hrang Diamond 8, Box B etc. te chu Barclay-a hminga dah vek a ni si a. Ranrual lah chu a tul huna phawrh chhuah mai theih turin Canyon-ah a awm dul mai si a. A nih loh chuan, nakinah dan ang thlapin De Witt-a Company ta a ni mai dawn a ni. 

Linkham-a chuan a lu a han thing a. De Witt-a hi a che felfai mah mah a ni. Bank rawk chungchang te kha, a finzia lanna chu a ni awm e. Chulai phai ruama dahkham awmchhun itawm tak thing chhuak tura mahni Bank han rawk vel chuh… A fin kherek thlak mange. An ruk sum thukru tlat tura thu a han pe leh tlat te chu a fin thlak mah mah tawhin a hria a. Thupek ang chiah lo deuhin Linkham-a chuan pawisa chu hmun dang daih khawiah emaw  a la thukru reng a. Hei hi De Witt-a’n fin rawl a thawh leh lutuk palh a, a rawng huai ser tur chu a ni. Chutiang a thlen vaih chuan, Burley Linkham-a chuan nuamti takin Mr Jasper De Witt a rinloh lamah a zen kaw duai ang a, ro sum chu lain, Mexico ram khawi laiah emaw  dam chhungin a chen hem hem tawh mai dawn a ni.

Mahse… a hmasaber atan Parr-a chu…… Slash 8 lamah chuan a kir thei tawh lo hrim hrim ang a, Pardoe-a te ho chuan a lo lan veleh a kahhlum turin thupek an dawng nge dawng lo tih pawh hrechiang ngam lovin, an tawmbuk lamah chuan a kal ngam bawk hek lovang. Chu chuan thil pahnih a kawk a, Parr-a chu Badlands lamah chhim lam panin a kal emaw..  chu chu a nih loh hmel zawk mah. A nih chuan, Parr-a sakhmel pem nuan mai chu a han ngaihtuah a, South Bend lamah emaw, Las Cruces lamah emaw a kal a ring deuh a. Chuta tang chuan Texas, Arizona, California a lo ni leh ang a. A sakawr chu a han tur chak pah sauh sauh a.

Burley Linkham-a chuan Curt Parr a chu a lo hmu miah lova. Ani erawh chuan a lo hmu kar thung a. Khawthim hnua kawng zawh leh zel tum chuan kawng tum sir lawkah chuan a lo inkhuar a ni. Parr-a’n Sakawr chungchuang lokal a han hmuh chuan a sakawr rawng atangin Linkham-a a ni tih a lo hre nghal mai a. Thutluknaa siam ta vat a. Green-a nihna diktak leh Shadows ho thuruk zawng zawng hre tura an tawmbuk pana a kal thu Linkham-a hnena a lo hrilh chuan Dan mite lo thlen hmain Burley a chuan inthiarfihlimna hun remchang a nei thei dawn a ni. A lawm ngawt ang. Amah an hmuh rual ruala kah theihna thupek a lo chhuah tawh pawh chu a sut duh mahna. A tana intuamhlawmna tur chungchangah pawh a ngaihdan a sawhsawn maithei a sin. Tichuan, Curt Parr-a chu rawn  intarlangin, a ban a lo vai a, a lo ko ta a.

‘Burley! Burley Linkham! Ka biak che a ngai ! Pathian hmingin, Burley, Ka biak che a tul lutuk’

Linkham-a chuan a sakawr chu a han pawt ding a. A duhthusam anga rangkachak pawisa an rawn pe thut tlukin a lawmin mak a ti a ni. Parr-a chu a lo awm reng a, a ban a lo vai a, engemaw sawiin a lo au chul bawk a. Chulai chhun ni eng hnuaihah chuan thil awmdan teh thut chu chu a hrethiamlo lek lek zawk a. Chutah, timna chhete pawh nei lovin a kap lir nghal tawp a. Chu Slash 8 mi leh sa lo ni tawh thin chu vaivut zingah chuan a let kawisawi ta reng a. Ani pawh chuan a sakawr pawt herin an tawmbuk lam chu a pan san ta nghal a.

Chulai hmun atanga an tawmbuk inkar zawng chu hlim angreng takin hun a hamng a. A vanneihna chu rin harsa pawh a ti angreng a. A chian nan a mi thahpa zungbun a laksak chu  a ipte a tanga phawrhin a han en leh a. A hming CP tih inchhu te chu a han thlir vang vang a. Nui vur vur chungin Canyon luhka ah chuan a inkhalh lut ta a. Tumahin an lo chhawn loh avang chuan a nui hmel chu a reh ta hmak a. 

‘Pardoe-a mai mai chuh !’ tiin a phun nuah nuah a. ‘Helaiah hian vengtu dah tur tih hi vawi engzat tak hrilh ngai ang maw ? Hrawk chung lam chauh hian thil hi a um e zung zung a’ tih pah chuan a sakawr khelah chuan a han kheng a, Bukte panna kawngtumah chuan a lim phei ta zuai zuai a. Sudden-a lo thlirna kawi zau lai chu a rawn tleng phei ta thuai a. Sudden-a chu a thuthmunah chuan a han zi mar talh talh a, tukverh atang chuan kawngkhar phen lamah a insawn phei ta a. Pardoe-a a han en zawk chuan nikhawhrelovin a lo la awm reng a.

Linkham-a thinrim ang thawm chu muangchangin a rawn ri phei zel a, kawt zawlah chuan a tawp ta a. Sudden-a chuan bathlar rahka chupa Boot-in a rawn rah rik ruap ruap chu a lo hre thei a. Kawngkhar chu a intheh hawng thuai a, Linkham-a chu kawngka ah chuan a rawn petek lut ta a. ‘Pardoe !— Eng teh chiam nge —’  tih chu Sudden-a, kawngkhar phen atanga lo chhuak a hmuh hma a a sawi theih chhun chu a ni ta. Sudden-a chuan rang takin a puakruk ngul chu a rawn vai chhuk pawp a. Mahse, Linkham-a lo chetdan chu a rang zawk ta deuh hlek a ni. A pa len ngaihtuah a rang fahran hian a lo thle zawk a. Sudden-a kut rawn vai chuan a lu tak chu tum mahse, Box B pa koki chu navak lovin a fuh ta zawk a. Linkham-a chuan savawm kawlh ang mai a rum chhur chhur chungin a silaiah chu a chuh a, a han vuan chawt a. Mahse, tun tum ah chuan Sudden-a chuan a tum chu a hlah ta lo. Silai ngul chuan Linkham-a banrekah tak chuan a lo hem leh nghek a. 

Linkham-a silai chu thing chhuatah chuan a tla ri bawl a, amaherawh chu, linkham-a pawh a awm mai mai bik lova, a kut veilam chu a rawn vai ve nghal pawp a. Chu chuan Sudden-a bekah chuan rawh fuhin, boruakah a kang lawpa, bang chu a va deng ta dawt mai a. A balance chu hlohin hnung lamah a han petek phei a, chutih lai chuan rawn thah nghal law law tumin Linkham-a chu a rawn thawk phei nghal ta bawk a. 

‘Pu Inkhelh thiam Green-a, chu leh ?’ tiin Linkham-a chu a rum nghut a. ‘Tun tum chu I tawlailirte hi ka han siamthat sak teh ang che!’ tih pahin a ban seipui chu, Sudden-a hrawka reh tumin a rawn phar phei huang a. Slash 8 pa chuan a taksa chu a lo siamrem hman tawh a, Linkham-a rawn phei mek chu a .45 chuan a lo tin ta teu mai a. Box B Foreman chu a ding chawt a. A mit thau leh zim pui chu a de sur sur a. Chu silai kaw hur mai atang chuan a mit lasawnin Green-a mit meng zim san chu a han melh a. A dar chu a han thing nawk a.

‘Min that dawn em ni, Green? tiin a han zawt a.

‘A tul tlat chuan le,’ tiin Sudden-a chuan a lo chhang a.

‘Chu chu ka ngaihdan a ni,’ tiin Linkham-a chu a lo bu nghut a. Chumi pah chuan Sudden-a lamah chuan a bawh phei nghak ruak a. Sudden-a chuan na zetin a lo hnek chawrh a, a tum chu hlen thei lovin a balance chu a hloh a, chhuatah chuan a tlu thum ta dup a. A khup lehlam thingthiin a rawn thu chhuak leh a. Sudden-a chu a melh ran mai a.

‘Min that zawk mai rawh, Green,’ a han ti ngul ngul a. ‘A nih loh chuan, khawiah pawh ka rawn umzui ang che anga ka chingfel tho ang che. A nih leh mipa diktak angin kan insual dawn lawm ni ?’

Sudden-a chuan chupa, savawm ang maia hrawl chu, a han thlek vang vang a. Linkham-a chu a rit zawkin, a lian zawk hle a, inbei tawklo tak chu an ni ngei ang le. Chu pawh nise, a that duh ta chuang lova, Chutah, Linkham-a te ang hi chuan tharuma an mahni chaldelh tu te chauh an hlau thin tih a lang reng mai a. Duhthlan tur a tlem hle mai. Kawng lehlamah chuan chu pa huasen zia a hmuh chuan a ngaisang ang reng a.

‘Mipa dik tak I ni, Link,’ a han ti a. Sudden-a chuan a kawnghren a phelh lai chuan chibai a lo buk der ngial a. A kawnghren theh phei tak chu a enzui kher lo chu a vannei ta a ni. Kawnghrenin a kut a chhuahsan hman awrh ang tihah chuan Linkham-a chu a rawn ding thut a, ban phar huang chungin a rawn bawh phei ta fua mai a. Sudden-a biangah chuan a rawn vai fuh chawrh a, chumi rual chuan lehlamin beng kiu rum rum khawpin a rawn vai fuh bawk a. Sudden-a chuan a theih ang anga lo bei let vein, a dul nemah chuan a lo hnek pawp pawp a, chumi pah chuan chu pa kuttum hrawl tak khawih phak lohah chuan a han insaseng thei hram a. A ke chheh siamremin, Sudden-a chuan Linkham-a lo thawh phei leh hun chu a lo nghak ta a. Bawng kawlh ang maia rum chungin Linkham-a chu a lo zuang phei leh a, Amah aia pate leh zang zawk chu bawh beh tumin Sudden-a ke lamah chuan a ban chu a phar huang mai bawk a. Sudden-a pawh chuan Linkham-a tumdan chu hriain a lo inring nasa mai bawk a. A ding lamah chuan lo pen sawn hret a, a kuttum pahnih chu suihzawmin tuboh chhut ang maiin a kawng zawn vela Linkham-a rawn zuang phei lai chu tukhumah tak a lo tuk ngheng mai a. Linkham-a taksa chuan chhuat thingphel chu a deng nghing lawih a. Bang vela thleng leh no an dah ho chu a nghawrah chuan an tla ri rum rum a. Chhuatah chuan a bawkkhup zawngin han mu ren rawn a. Beih leh dan tur a ngaihtuah run run bawk a.

‘Khatia lam kual vel lo khan, engvangin nge mipa taka min sual ve mai loh a.’ Linkham-a chuan thaw hulh hulh pah chuan a lo ti a.

‘Kan thiam dan ve ve in le’ Sudden-a chuan thaw hlawi hlawi chungin a lo ti ve a. ‘Min rah pherh vek I tum chu a ni lo maw;

 ‘A tha a lawm . . .’ tih pahin Linkham-a chu a lo ding chhuak leh tual tual a. ‘Chutiang chiah chuan ka ti ang che !’

Sudden-a lamah chuan a rawn zuang phei leh a, natakin  rawn vai phei pah bawk a. A rin loh deuhin, tun tumah chuan Sudden-a chu lo persawn tawh lovin hmun leh hmunah an inhnek ta siah siah mai a. Minute hnih chhung chu tihtak zetin chu mite pahnih chu an indinchilh a, tha tawpin an inhnek ta mial mial mai a. Thisen chu chhuatah a per darh nuai a. Sudden-a kawr chu a thler hnuang a, a hmai te chu a duk thluah tawh mai a. Linkham-a pawh, a mit lehlam a vung phui vek tawh a, lehlam pawh a hmuhnawm tawh lo kher mai. A tawpah chuan thaw hlawi hlawi chungin an inthen ta hlawl mai a. 

Sudden-a chu a la ding hram hram a. A chuap tan chuan boruak thianghlim duham takin a han hip kawk kawk a. Linkham-a pawh hmai duk tluk chungin a pai chawn chawn a, thawk la in a buai hle mai a.

‘Hrep tak che chuan!’ tiin a habal chhak chhuah pah chuan a phun sup a. Tate-a ka thah zan khan nang pawh hi lo chingfel law law che ila a tha tur’ a han ti ngul ngul a.

Chu thu Linkham-a hmui atanga a rawn rik chhuah lai chuan Sudden-a mitah chuan tualthah pawisak lohna thinrim tawpkhawk mitmeng chu a rawn lang chhuak ta a. The Box B pa pawh chuan a hai lo kher mai. A la ti deuh muai muai nain, a tihsual chu a hrechiang ta ngang mai le. Green-a chu sakei kawlhin a saseh tur a pan ang mai hian muangchangin linkham-a lamah chuan a phei chat chat a. A mitah chuan tualthah duhna sar a zam raih mai bawk a. A na leh a chauhna te chu a rawn reh duak a. Thinrim tawp mitmeng nena rawn pan mektu chu a lo hmuhin Linkham-a chu chhuatah chuan hlauvin a lo tawm ping chal mai a. A hlauhna te thup nan na elkhenin Sudden-a lamah chuan a lo vai pawp a. Mahse, awlsam takin a lo bum a, Linkham-a chu rawn hnaih chilhin, a rawn mai tawih khawih ta bawrh bawrh mai a. A kuttum thir ang mai ruh tang mai chuan Linkham-a chau tawh tak chu dimna tel reng reng lovin a hnek ta chawrh chawrh mai a.

Sut ban nghenga nikhawhrelova awm reng Pardoe-a pawh chu an thawm ri rum rum avang chuan a rawn harhchhuak a. Linkham-a hmel pawr phung leh thi hne hnu chunga Slash 8 pa in chhuat laia a um kual lai a han hmuh chuan ‘Aw Pathian’ tiin a lo phun sup a. Linkham-a chuan beidawng tak chunga a lo beihlet vena te lah chu thiam tak leh vawt raih maiin lo vai kiang zel a, a palian zawk chu a thingthit rawp thlengin a khawih chawrh chawrh reng a. Sudden-a chuan umzui zelin, a kutthlak te lah chu zahngaihna leh khawngaihna tel tawh miah lo a ni tih hi a hriat hliah hliah a. A tawp thei dawn ta lo emaw tih hnuah Linkham-a chhuata a han tluk thlak takah chuan Pardoe-a chu a lo thaw huai a. Linkham-a chu thing tum mawih tawh ang maiin chhuatah chuan a tlu thla hnuk a. Mitthi ang maiin a let ta der mai a.

 Pardoe-a’n a lo en reng lai chuan Green-a mit, tualthah chaka thir ling ang maia sen vam huam chu zawi zawiin a rawn reh tial tial a. A hmel chu a rawn nur chhuak nang a, inchhir hmel a rawn pu a. Chutah, zawimuangin a rawn ding mar ta a.

Pindan chu kan pheiin a silai paina kawnghren chu a chhar a, a hreng ta mawlh mawlh a. Tumah biak bik pawh nei hran lem lo chuan, ‘ Kha zawng kha kan thawnthu chu a ni e’ tiin a han phun sap a.

A vawikhat hmuhna ni mai awm hian Pardoe chu a han en a. Chutah, thu hniamin, a phuarna te chu a pelhsak ta mawlh mawlh a. A han pawt ding a.

‘Ti rawh le, Bull, buaina dang min thlen tawh suh ang che. Sakawr chunga chuangin kan kal thuai thuai a ngai a nia. Linkham-a hi min han chelh pui teh’ a han ti a.

Chupa banrekah chuan chelhin Slash 8 pa thu ang chuan a che chang ta thuai thuai a. A hnu a a han ngaihtuah let leh pawhin khami tum khan Green-a khan thlawk rawh pawh tise, khatianga Green-a mitmeng hmuh leh ai chuan a theih dan dana thlawh mai a tum duh hialin a ring a ni.