Strikes Back-16

Sudden-a chu a hriat miah loha amah rawn man chhuaktu hmachhawn tur chuan a han vir zawk a. Pa hrawl pui mai, hnar chiam deuh buih hian a Remington Rifle chu nghet taka humin a lo tin run tawh mai a. Chu pa chu Bull Pardoe-a, kha zan duhawm lo taka Slash 8 neitupa George Tate-a khaihlum thelh tu misual te hotupa kha a ni tih a han hre nghal mai a. Pardoe-a pawh chuan a rawn hre ve chawpchilh nghal mai a ni tih a nuih vun vun danah chuan a lang mai a.

‘A tha e, a tha e,’ tih pahin a han ner nung a, ‘Hei chu kan silai pahnih hmang thiam mi huaisena kha zuk ni reng chuan... Smitty-a kha I rawn pumpelh a ni maw ! Khawilam thli chhia in nge helaiah rawn len lut che a?’

‘Rul ka rawn veh a, a bu pawh ka rawn hmu ta ngei a lawm hei….’ tiin a lo chhang ve khauh a.

‘Rawn phuar hlawm law law turin I rawn kal ka bei sei,’ a lo ti teng leh chhuai a. ‘Nang han deusawhna hun remchang hi ka lo zawng reng tawh thin a sin, Huaibak pa, tun anga hun remchang hi ka hmu tawh hrep lovang…’

A sawi pah chuan Pardoe-a kut zung chal chuan Repeating Rifle hmehperna chu a kuai na tial tial a. A mitang pa pawh chuan ngawi rengin a lo en ran mai bawk a. A kawih nat tak tak hma deuh chuan.., 

‘In hotupa berin min hmuh hun thleng chu nghah tha I ti ve lo maw.?’

‘Chutiang a awm lo —’

‘Hetah hian maw —  Ka hre ve reng e a. I ngaih angin ka mawllo a nia, helaia pawl tlemte hi I kaihhruai an ni lo tih ka hria a nia aw,’ tiin Sudden-a chu a lo inrawlh buai leh a. ‘Thluak I nei ve ik nange a?.’

‘Ngawi hmak la a tha zawk ang,’ palian a chuan a lo ti chhur chhur a. ‘Ka ngawih tir hma che hian.. chutiang rilru chu ka pu hman…’

‘A.. kha zawng kha a ni mai e,’ tiin Sudden-a chuan a tawng lai chu a lo pawtchat leh a.. ‘Helai hmun ka rawn hmuh chhuah dan te hi lo ngaihtuah tawh reng reng em ?’

Pardoe a hmel chu a ngaihna hreloin a buai nak a. Chulai tak chu remchangah lain Slash 8 pa chuan a han chhunzawm leh a. ‘Curt Parr-a kha a tawng a nia aw,’ tiin amah mantu pa chu a han hrilh a. ‘Thu ka hrilh darh vek tawh a, ka chungah hian engpawh thleng se a pawi tawh vak hlei nem. Ka thurawn duh che chu maw, helai hmun zimte atang hian insaseng bo dan hi ngaihtuah rang mai rawh. Dan chuan a rawn rek bet tep tawh che u a nia.’

‘Min bawl kual mai mai a ni,’ Pardoe-a chuan nuam ti lo zetin a ti ngul ngul a.

‘Engti kawng pawhin I tan chuan lungkham tur a awm tawh hlei nem, kha .. hmetpuak tawh mai rawh’ ngaihsam zetin Sudden-a chuan a lo ti a. Ngun takin a lo en ran mai bawk a. Pardoe-a chuan ngai a rawn awh leh vat a. Chutah, invaukhanlawkna pawh awm lovin rifle ngul chu a rawn vai pawp a. Sudden-a chalah chuan a rawh khawng ta chawrh mai a. Chutiang chuan a chet lo ring sa deuh lo phei se chu  pawi a rawn khawih nasa lehzual ngawt ang le. Sudden-a chu a thingthi nghal hnawk a. A lu chu a thing nawk nawk a, a khawhmuh chu a phe nghal ruai a. Pardoe-a a inthlahdah deuh theihna a nih phawt chuan eng thil pawh nise a tha a ni mai. 

Pardoe-a chuan tihsual nei turin a rawn hnaih chilh duh hlek lo mai a. Chutiang chu ti ta lo chuan nuihsawh zetin, ‘Tirawh le, mihuaisen, I zeldin thubawl chu han chhunzawm zel la, ka awih viau mai thei a sin, I ke chheh kha han siamtha rawh le’ a han ti a

Sudden-a chu a lo tho chhuak a. Na tak tuar angin a lang der tlat a. Dik tak chuan, a rawn vuakna avang chuan a lu chu a na tluk tluk mai a. Pardoe-a chuan a Rifle chu a han vilik leh a, ‘I silai paina kawnghren kha phelh la, leiah thlauh la, kalsawn nghal ang che’

Sudden-a chuan thupek chu a han zawm a.  Chutah Pardoe chuan, ‘Tunah, Bukte lamah sawn hma hruai la, kal rawh le, inbumna te kha I hmang ngawt ang e, sa hrangah I chang nghal a ni mai’ a han ti leh hruk a.

Pardoe-a chu a hnunglam pen li vela hlaah rawn kal zelin, Rifle kausa nen inring rengin a awm a. Sudden-a chuan thupek zawm zel mai loh chu duhthlan tur a nei lo. Bukte an hnaih deuh takah chuan chulai a lo awmho chuan rawn hmuin an rawn pan hnai ta a. 

‘Enteh u. Sawilai a ka vahvelna a ka thil rawn hmuhchhuah hi’ Pardoe-a chuan a han ti lauh lauh a. ‘Slash 8 a kan thian silai pahnih hmangthiam deuh kha a nih hi, a silai tello chuang eng vak a lo ni bik lo.’ Mi dangte chuan an rawn din hual a. Sudden-a chuan an zinga pakhat chu a biangki leh a khabe chu a la duk deuh tih a han hmuh chuan…, ‘Tha maw, Ray,’ hlim hmel deuhin a lo ti a. ‘Kawngka ah I intauh palh elo ?’ 

A va biak pa chuan thinrim deuhin a hmaivun a lo chuar nghal nawng a. Rawn pen chhuakin a kuttum chu a han lek a. Pardoe-a chuan a lo khap ta a.

‘Tha ba chu kan nei theuh a lawm’ Pardoe-a chuan a lo ti hmak a.. ‘A chinchhiahna ka pu a, chutiang bawkin nangni pawh’ tih pahin a beka silaimu thawina hnuhma chu a han khawih a. ‘Chuan Morley-a a lo ni leh a’

‘Aw… a tu hi nge Morley-a chu ni a ?’ awka zang vah hian Sudden-a chuan a lo zawt a.. ‘Thunder Ravine a silaimu dawlhtu kha em ni ?’

‘Morley-a chu a thi tawh, Hmela,’ Pardoe-a chuan alo ti ngal ngal a, ‘Mahse, nang pawhin I hmu ve thuai dawn e.’

‘Insum deuh rawh, Bull,’ dam dapin Sudden-a chuan a lo ti a. ‘Linkham-a’n ka chungchang thu hi rel a duh ang tih kha hre reng la.’

‘Linkham-a chuan ka tumdan ang chiah hian I lubur thlawh darh hi a ti ve tho vang.’ Pardoe-a chuan a lo ti leh hmak a. ‘Engtin nge kan tih ang, thiante u ?’

Misual dingkhawm ho atang chuan rawtna a rawn ri chhuak tliar tliar a.

‘Silaimu sen kher a ngai em ni,’ Ray-a chuan a ti sar sar a. ‘Phuar hlawm ila. Tate-a damdawi kan pek tum ang kha pe ve ila a ni mai a lawm’

‘Ngaihdan tha tak a nih chu,’ a ding lama pa cher den dawn chuan a lo ti a.. ‘Hrui han la ila.’

An mitang chungthu an reldan tha lo tak chuan an vel boruak pawh chu a hmet ngawi duk hian a hriat a. An mitang pawh chuan a hmela a rilru puthmang lantir loh hram hram tumin ngaihtuahna a lo hmang kual zung zung a. A rilru chuan a hmaa dingte ho chu an hmel leh an hming a lo hmehbel kual neuh neuh a. Ray-a chu a hre tawh a. Vengtupa kha Pardoe-a sawi danin Smith-a a ni a. Chu pasang cher den dawn, irish awphawi deuh chu Callaghan-a ni ngei tur a ni. Morley-a chu a thi tawh a. A palina, hmuihmul nei leh patawi deuh chu Robert-a a lo ni leh a. Sakawr bula ding pa chu Mac Almond-a a ni bawk ang. Pardoe a rawn tawng leh chuan chu pa, sakawr bula ding chu a ko ta chiah reng a.

‘Mac,’ a han ti that a. ‘Hrui kha min rawn pe rawh.’ tih pahin Sudden-a chu a Rifle ngul chuan a han hawlh leh a. ‘Boruaka I lam hunah chuan I zawiawi vak tawh lo maithei a ni, mihuaisenpa !’ Nuihsawh zetin a han ti leh a. ‘Enge sawi duh te I nei em ?’

‘Ka sawi duh chu silai phen atanga putar khaihlum tum bak lo chu thiam pawh in lo nei lo a nih hi. Inhmachhawnin George Tate-a tak ngial pawh i cho ngam thlawt lova, hnung lam atangin I han lambun a nia.’

Pardoe-a chu sual tih hriat ngawih ngawihin muang chang in a rawn nui chhuak ta vur vur a. ‘I tisual leh ta, Mihuaisenpa!’ a han ti a. ‘Lo la na lutuk lo la, ka han hrilh ang che. Linkham-a’n a nih kha kap, a tum tak chu i lubur thlawh darh kha a ni nain, he Remington hmang ngei hian mawle. Chuvangin, nuihza siam an kan lo chul hlek che a nih pawhin a lung ni vak bik lovang chu maw. Hetianga nangmah chauha kan han tawng hlawl che hi I sakhmel pawh a mawi zual kan ti khawp mai’ tih pah chuan Sudden-a nakah chuan a Rifle ngul chuan a han hawlh leh a. Tun tum chu Sudden-a pawh a lo inralring fel ve ta…..

Pardoe-a tawng lur lur lai khan mit la lutuk si lovin inches khat lek lekin a lo tawlh sawn hret hret a. A duhna takah a awmhmun a lo rem fel hman tlat tawh a ni. Nal zaih mai leh khawlphe anga rangin Rifle ngulah chuan a lo man chawt a, a han phih nghek mai a. Pardoe-a chuan balance a hloh a, hmalamah rawn petek pheiin a rawn si dawrh a. Chutah, chu misualpa nghawngah tak chuan a ban pakhatin nghet em emin a lo kherh kalh ta chaih mai a. Chumi rual deuh thaw chuan Pardoe-a puakruk pai lamah chuan a kut vai thlain, a thianten chet nachang an hriat hmain a silai chu a rawn vilik chhuak leh nghal a. A vawihnihna atan, sar zam raih mai mitmeng leh .45 kaw hmawr khur hauh lo chu an hmachhawn leh ta ran mai a. An ding khawng ta reng mai a ni.

‘Ti zawk hian mawle, thiante u,’ Sudden-a chuan a han ti a. A aw chu vur ram tuipui kama vur tlang hlawm ang maia vawt  ni ta. ‘Tunah, in kawnghren te kha muangchangin phelh ula, kalsawn nghal rawh u’

A tawng lai pawh chuan chhete mahin Pardoe-a nghawng a kuahna chu a thlahdul lo reng reng a. Hnunglamah a kuai eu khawng tlat a, Pardoe-a chu boruak tlachhamin a meng kal rulh rulh mai a. Misual palite chuan Sudden-a chu an hmachhawn a, hreh hmel an han pu deuh dawn nain, Green-a kuta puakruk chevel an hmuh chuan thihna rim a nam a ni tih hriain an kut te chu an kawnghren Buckle lamah chuan an han phar thla ta a…Chutah, Pardoe-a chu a che ve ta thut mai a.

Inrinlawkna pawh awm lovin, chu paliana chuan a kaiza a tihlep a, a taksa chu tihniam ta thut mai a. A rihna chuan Sudden-a chu uaiin, Chuvang chuan Sudden-a chuan a balance a hloh tep a. Chulai second khat dan maiah chuan Paliana chuan a kiu chuan hmalamah a rawn nghawk vak a, a au pah tuar bawk a. ‘Rawn khawih ru le, thiante u !’

Sudden-a chu, Pardoe-a rawn nghawkna a vang chuan hmalamah a petek phei hlek a, chutah, misual hnar tliaka pawh chu sir leh lehlamah let phei vatin, a thian ten an rawn kah theih nan a insaseng fel nghal a. 

Sudden-a silai puak hmasa ber chuan a dar vei lamah rawn dengin Bukte bathlar ngeng rawk chuan a vir phei nawk a, thu deuh titih in, nikhawhrelo deuh thaw, mahse thil thleng mek hmuhnawm tak lo hmu zui zel thei chuan a la awm ve tawk tawk a. Pardoe-a chuan Ray-a’n a bawm atang a silai a pawt chhuak lai leh midang ho zawng te, silai keng chunga phen tur zawnga an zuang zawk zawk lai chu a lo hmu reng a.  Sudden-a taksa pawh chuan leia vaivut chu deng khu luihin a let zui nghal tawp tawp chu a han hmu bawk a. Ray-a silai puak ri dur chu a han hria a, Sudden-a chu a han en a, ani pawh chuan a vawihnih nan a lo hmet puak ve chiah a. Ray-a mit leh mit inkarah tak chuan a verh ta sawr mai a. Sudden-a silai chu vawithum nan a rawn puak leh dawt a, Callaghan-a chu ke vawr thawtin a len leh lawp a. Mac Almond a tlan lai chu a ding chawt a, a rawn vir zawk a, Green-a chu a rawn kap nghal thuai a. Mahse a thelh tlat mai le. 

Green-a silai chu a vawili nan a rawn puak leh thuai a, Mac Almond-a chu Sakawr huang hungna deng dawtin a leng phei leh lawp a. Chutah chuan chelovin a let ta reng mai a. Chutah, Green-a chu kawt laia tui kuang phenah chuan hmuh theih lohvin a lum phei ta. Pardoe-a chu anchhe lawhin a han phun sup a, chet chhuah a han tuma, a dar hliam na avang chuan a thu leh hnawk a. Hauhuk kahthlak ang maiin a zal ta der mai a. 

Chutah, makti leh na ti chung chungin chhekin atanga sakawr nena Robert-a a rawn tlan chhuak lai chu a lo thlir leh a. A rawn tlan chhuah pah chuan silai a rawn hmet puak thuai thuai a. Green-a tawmna lai chu rawn paltlangin kah hlum ngei tumin a rawn thawk phei a lo ni a. Kar lovah Pistol-a kah phak a ni ta lo.

Robert-a silaimu in hma a tuitling a den per chuai chuai lai chuan Green-a chu a awmna ngaiah a lo tawm reng a, Robert-a’n kawt lai fai chin a pelh phei lai chuan Pardoe-a chu anchhe lawhin a lo phun leh sup a. Chutah, Green-a chu a tawmna a tanga rawn zuang chhuakin, tui kuang chu a rawn bawh liam a, Pardoe-a thlauh tak Remington Rifle tla reng chu a rawn hum chawt a. A rawn thingthi chhuak a, rang takin Rifle chu a darah chhuangin a hmet puak ta nghal a. Pardoea chuan hreh hmel zeta Robert-a a sakawr atanga a hlawm thla tawl chu a han hmu a. A taksa in lei a den chuan a khu luih a. Sakawr pawh chu chuang an awm tak lohah chuan thui vak lo a han tlan leh a,  a ding ta a. A lakam hrui chu leiah a hnuk duah duah a.

Slash 8 pa vaivut kai luai mai leh a mitmeng sar zam raih maiin a lam pana kawt zawl a rawn paltlang phei lai chuan Pardoe-a chu bathlar rahka ngheng chuan a tlu thla leh hnawk a. Ten hmel em emin a rawn chhuk melh ta ran mai a.

‘A tha e, Pardoe — inbeihna chu zawh fel a ni ta !’ a han ti chhak a.

Pardoe-a chu tawng a han tum a, aw chhuak tur reng reng a lo nei tawh lo. Khawthlang ram hmun hrang hrangah hian a lo chetla nasa in, silai nena che thei tak tak pawh a lo hmu hnem ve hle tawh a.  He ramhuaipa ke pahnih nei lakah hian enge a sawi tak ang. Puakruk pakhat chauh nen amahin mi paruk lai a tuk zal thuai ta mai chu a ni si a. Pardoe-a chuan beisei ru ang reng deuhin Green-a taksa chu, silai mu khat tal chuan a fuh ve mahna, tiin a han en a. Chutiang awm engmah a hmu si lo. Chau zetin anchhia a han phuh chhuak leh teh ngawt a. Chutianga a lo awm run run lai chuan a nakah a rawn chhir dawt a. A taksa chu a na chhuak chuai hian a hria a. Na a tih dan chu mitmengah pawh hai rual a ni lo.

‘Pardoe, duh thlan turin a hmuak che, hriat duh tlem a zawng ka nei a, min hrilh chuan fair taka min beih theihna remchang ka siamsak ang che. A nih loh chuan ka that nghal ang che. Thah nghal che hi a fuh ber em tih ka inngaihtuah mek a nia’

Pardoe-a chu a lo bu nghat a. Chu ruangam nelawm loh tak chu hnial turin a huaisenna in a tlin tawh thlawt lo a ni

‘Khawiahnnge tunah Linkham-a hi a awm. Engtikah nge he hmun hi a rawn thlen chiah dawn.’

‘Dar engzat nge?’ tiin Pardoe-a chuan chau zetin a lo zawt a.

‘Dar ruk vel a niang.’

‘Chutiang a nih chuan Link-a chu kawng lakah a rawn thang mek ang.’

Sudden-a chu a nui ta a. A nuih dan chuan Pardoe chu a hnem hran lo hle a. Chinghne kawlhin a eitur sazuk sahrang a ngaihtuah laia a lawm hmel hi a ang zawk mah in Pardoe-a chuan a lo hria a. 

‘A nih chuan kan lo nghak ang,’ Sudden-a chuan zang vah hian a lo ti a ‘I tana chanchin tha pawh a rawn thlen mai thei a sin’

A rawn kun hniam a, pardoe-a ban tha lamah chuan lain, hnuk titih khai titihin inchhungah chuan a hruai lut ta a. Inchhungah chuan kil khat a buhpawl awngphah mam lemlo takah chuan a theh thla hnawk a. Pardoe-a chu alu bag ang dah maiin a let hnuk a.

‘A va zang hran lo ve, a in sawi ang chuan a sehhel lem lo hle mai,’ Sudden-a chuan a ti nuah nuah a.

Chutia a sawi pah chuan, a kawr chu a hliam tuamna turin a han pawtthler a. A hliamte chu a han tuamsak nawk nawk a. Tlemin a han dah rem leh deuh a. Ban rinchhan chuan nghet takin a phuarhlawm ta tlat a. Pardoe-a chu nikhawhrelovin a let ta reng mai a. A ka ang phuau atang chuan a rawn ri chhuak burh burh a.

‘Lo mu mawhnai ve mai mai phawt teh,’ Sudden-a chuan a han ti a. ‘Engtik niah emaw chuan I lal fapa chu rawn kalin a sakawrin a la rawn phur che mahna. Fawh chu a fawp kher lo maithei che a ni.’

Chutia a tih pah chuan hmanhmawh takin a chhuak leh a. Kawt vela ruang let phung leh an hnuhma te chu a thian fai tan ta a. Ruang te chu hmun khata a hnuh khawm fel hnu chuan inchhungah a lut leh a. Tukverh pakhat tanchhan chuan awmhmun a rem ta a. Remington Rifle chu a khupah chuan khangin, kawngtum chu a lo thlir ta veng veng mai a.