Strikes Back-14

Dave-a chuan Slash 8 thleng turin darkar li lai hun a hmang a. Ranch a lo thlen chuan Gimpy-a leh Ranch bathlara lo chhuak mek, Grace Tate-I, chuan an lo dawngsawng a. A sakawr zinah chuan a rawn invuan tang hram hram a. A thawmhnaw te chu vaivut leh thisenin a khawn uaih mai a. A hliam hmuamhma aṭang chuan thisen tharlam a la rawn chhuak nguai nguai bawk a. Thisen chhuaha insam buaih buaihna atanga rawn dam chhuak chhun ni mai hian a lang a.

Midangte pawh chu Bunkhouse aṭang chuan an rawn chhuak phawk phawk a. Dave-a, a sakawr aṭanga a chhuk tur chu kut nem no takin a lo pui a. Inpui ber lamah chuan lak phei a ni ta a. Chutah chuan, hnial tuma a ban vai chu Grace-i chuan ngai pawimawh lem lovin leh no taka biain, a koki hliam te chu a lo enkawl vat vat a. A hliam an khawih lai chuan Dave-a chuan chumi ni a an chunga thil thleng te chu tawi kim thei ang berin, tham chhalin a han hrilh ve hlawm a. Phatsantu Parr-an a lo lambun thu a han sawi thlen veleh chuan thinrim leh nelawm lo taka rum ngal ngal thawm  a ṭhiante zing aṭang chuan a lo chhuak a. Shorty-a chuan, ‘Eng vanga.. chutiang mi bawlhhlawh lutukin….’ a lo ti ngal ngal a. 

Dave-a pawh chuan dim leh duat taka Grace-i’n a hliam te a han khawih chu ngaihthah liam mai harsa a tiin, thiam taka a han tuam vel lai chuan nuam a tihna chuan a fan chiai chiai a. A ngaihtuah bing lutuk tur ven nan a bula lo kalkhawmte chu Green-a nen an awm loh hlana thil thleng a awm leh awm loh te a han zawt ve a.

Gimpy-a chu ngui raih hian a lo bu a, Grace-i’n remti tih entir nan a lo mitmei zeuh takah chuan a han sawi chho ve ta a.  Khami zing khan Grace-i nen an dahkham rul turin Hanging Rock khuaah an lo zuk kal ve a lo ni a. Bank an thlen chuan De Witt-a chuan hawihawm der takin a lo chhawn a. Slash 8 dahkham chungchang an sawiho hmain Sheriff Brady-a chu awmve se a ti ta deuh tlat a.

‘Engah tehreng nge chutah chuan Brady-a chu a awmve a ṭul tlat a?’

Dave a tawngkam hman ai maha tawi fel chuan De Witt-a Office a thil thlen dan chu a han sawi leh zuai zuai a. Brady-a chu rawn thaw lut huam huam a, De Witt-a sirah chuan thuthmun a rawn rem fel hnuah Grace-i chuan pawisa chu Banker dawhkanah chuan dah thlain, chhiar turin a han ti nghal a. A han chhiar a, mitko san ak chungin a rawn hawichhuak a.

‘Hetah hian Dollar singkhat leh sangnga chauh a awm a, Miss Tate’ makti hmel takin a han ti a.

Grace-i chuan a thil sawi chu lo ngaihven zui lem lovin, ‘Ka ngaihdan chuan he thila sum fai inrawlh zat chu dollar singkhat leh sangnga a ni, Mr De Witt’ a han ti mawl leh tawp a. 

‘A nih chuan, I hriat sual hlek a nih chu, Ka pi. Hei vang tak hian a nia Sheriff Brady-a pawh lo awm ve se ka tih nachhan,’ tih pahin a pawhdawh chu a han hai a, lehkha phek pakhat hi a rawn phawrh a. Hanging Rock Bank lehkha pek chhuah thin niin, Loan puk tura George Tate a leh Bank inremna lehkha a lo ni a. ‘Sum fai inrawlh zat hi, dik tak in, dollar singli leh sangnga a ni tih in hmu thei ang. Tunah chuan I hrechiang tawh ang chu maw?’ vawt raihin Banker chuan a han ti a

‘Ni lo, Ka la hre lo va, ka hre dawnlo bawk. Thil tihsual palh a awm a ni tih ka chiang, Mr. De Witt,’ Grace-i chuan a lo ti let ve sak a.

‘Kha kha I pa hming ziah hnan a nih kha. A ni lo mi, Miss Tate?’ tiin De Witt-a chuan a han zawt a.

Grace-i chu a lo bu ringawt a, chutah Banker chuan a sawi ta zel a. ‘A zat chu dollar singkhat leh sangnga aiin a tam ngei tih chu i hre tawh ang maw? Tin, hetiang sum tlem lutuk hian in dahkham chu kan ṭhing lovang cheu tih hi I hrechiang bawk tur a ni.’  

A thil sawi avang chuan boruak a reh ta ṭhap mai a. Chutah, Banker-i’n an dahkham te an rulh theih nan ranrual hralha pawisa an tuak hun chhung an lo nghah hram hram thu te, an nghah zel theih tawh dawn loh thu hrilh paha hrethiam tura a tih lai te chuan Grace-i chu ngawi rengin a lo ding tau ringawt a.

A tawp nan De Witt-a chuan, ‘A tira kan hun bi tuk chhung anga dollar singthum dang in tuak chhuak leh thei a nih loh chuan in dahkham rulhna hun chu kan khar mai a ngaih ka hlau ngawt mai, Miss Tate. Pa rilru pangngai tak ka nih avangin I mi chhawrpa Green-a kha ni sawm chhung hun ka lo pe a. Chu hriatthiamna hun chhung chu darkar sawmli leh pariat a la awm a. Chumi hun thlen hma chuan sumtuakna hun chu in la nei a. In hlawhchham erawh chuan, dahkham rulh hun chu khar a, Slash 8 Ranch chu mipui vantlang hnena lilam turin Sheriff Brady-a hi ka ti ang…. Sheriff?’

Brady-a chu lo pen chhuakin induh leh mahni inngaipawimawh takin, ‘Darkar sawmli pariat’ a han ti nghat a. ‘Tichuan, Slash 8 chu hralh tura lilam a ni ang’

Gimpy-a leh a pi chuan rukru ang maiin khua chu an chhuahsan ta zal zal a. An pahnih chuan Banker pa in a sawi anga huntiam chhunga dollar singthum lai mai tuak chhuah theih beiseina chhete pawh an nei lo chiang hle a ni.  

‘Chutiang chu kan lo khawsak dan vel chu a nia,’ Gimpy-a chuan a han ti a. ‘Nangni chauh hi in talbuai bik lo ve.’

‘Brady-a chuan Ranch chu a hralh ngawt thei lovang, Dan pawh a ni lovang!’ Dave-a chuan a han ti a.

‘Chulai tak chu a lungchhiatthlak lai chu a ni, Dave,’ tiin Grace-i chuan ngui takin a han hrilh a. ‘Dan a ni a. Engkim an tih dan kip a kawi chu Dan dik tak vek a ni. Kan khinglet thei miah lovang.’

‘Chuti maia awlsam chuan ka pawm dawn lo, Ka pi,’ Dave-a chuan a han ti a. ‘Tu emaw vervek taka thil ruahman tu an awm a ni.’

‘Aw, Dave, chu chu a dik nameuh mai! Thil awmdan han thlir vang vangin Ranch hi Mr. Barclay-a hnenah ka hralh mai a ngai dawn ta a nih hi.’

‘Barclay-a hnena hralh maw? Teuhlo lutuk!’ Dave a chuan a lo ti hmak a. ‘Chutiang thil chu I ti thei lovang!’

‘David, Ka tih ngei a ngai a ni. Barclay-a chuan a man awm tawk ang talin Ranch hi a la khul thei dawn a. Hun tawp thleng ka nghah chuan Ranch hlutna awm tawk ang sum dere pawh ka nei thei dawn si lova. Engkim ka hloh dawn a ni.

‘Chu lai tak chu a lawm ka man thiam chiah loh chu,’ Dave-a chu a nui deuh a. ‘Engvangin nge Barclay-a chuan, darkar sawmli pariat chu nghak a, dollar singli leh sangnga chu a pek dawn ringawt che a?’

Grace-i chu alo sen ṭan ṭan a, chutah, a kha chu a chih deuh a, ‘Thil…. In sakhi thing chunglawnna a awm a. Zachary Barclay-a chuan amah nei turin min tia,’ a ti chhuak ta hlawl a.

Dave-a chu a rawn ding chhuak hlawl mai a, inbengdai tura a lo chelhna chu thing thlain, ‘Sawtiang mi bawlhhlawh saw I nei ang maw? I thei lovang!’ A awki chu thinrimna avangin a ṭeng chhe hle mai a.

‘Aw khai a?’ tiin Grace Tate-I chu a hawi lawl lawl ringawt a. ‘A nih leh enge a theihloh na chhan tur ka zawt thei ang che angem?’

‘A chhan chu min neih dawn avangin, Chu chu a ni mai!’ Dave-a chuan a lo ti hmak a. Chutah, chu thil a sawi chhuak ngawt chu a han ngaihtuah chiang a, a nih tur ang  ni tawh tho tiin luhlul chhuahin a phun zui sup a. A hmai te chu a sa ta hut hut mai a. ‘Kha kha a ni mai… Heng buaina zawng zawng hi kan chinfel hunah I ta ka ni ang.’

Grace Tate-i chuan a lo en ran mai a. A mit chu a lo de chhuak ta sar sar mai a. Dave-a chuan a kokiah vuanin a han pawt hnai a. Chulai kar hun te ah na na na chuan midang lo awm ve te pawh an hrechang ta lo.

‘Miss Grace, kha thil kha sawi theihna ka nei lo tih ka hria,’ Dave-a chuan a han ti a, ‘Mahse, tuna ka sawi tur hi chu sawi theihna ka nei a ni. South Bend lamah ka inkhalh phei ang a, hetah hian Judge Pringle ka rawn hruai ang. Eng thil pawh lo thleng se, Barclay-a chuan eng pawh lo tiam che mah se, ka rawn let leh hma chu engmah lo ti suh aw. Lo ṭang tlat ang che. Chu chu min tiam rawh. Judge Pringle nena kan lo kir hma chauh. Chu te chauh chu min tiam thei ang em?’

Grace-i chu tihtak zetin a lo bu nghat a. Chutah, Dave-a nen chauh chuan an lo thlah fal reng tawh tih a han hrechhuak vat a. Dave-a pawh chuan hrethiam ve nghalin, thudang sawi tawh lovin, a petek chhuak a. Kar lovah Lui lama kawngṭumah chuan sakawr tlan liam  thawm an hre zui ta nghal a. A hrilhhai lutuk tur thup nan Grace-i chuan a mite lam chu a han hawi a, ‘A sawi ang khan ka ti dawn a ni’ a han ti teh ngawt a.

‘Chu zawng a phurawm deuh a lawm, Ka pi,’ Gimpy-a chuan a lo ti a. Chutih lai chuan Grace-i chu a lo sen tan tan a. Room atanga eng in a lo chhun chuan a hmel tai têk chu a lang chiang leh zual a.

Mesa tlang chuanchung lam chuan a hnuaia thlaler zawl inpharh chu a zuk ner kum nung hian a hriat a.  A bul ṭhut kham hrulah chuan Sudden-a chu a chevel a. Nisa leh khaw lum hrehawm tak chuan a delh rit churh hian a hria a. Mahse, chulai hmun vela misual ho tawm kuk hriat chhuah a chakna chuan ama hrehawm tawrhna pawh chu a chhawk angreng viau a. A luhna lai Canyon bang chu vei lam zawngin a inher phei mek a, ruam kumkar zim leh thui tak chu a zawh phei ta zel a, a tawp lam mel khat vel a hla ah phei chuan a lo zim lehzual ta hle a. Sudden-a thlirna aṭang phei chuan a ping ta hial em ni chu aw tih tur a ni a. A chung lamah chuan laiking pianhmang ang deuh hian lungpui chu a inchhawng pawng thluah a.

‘Khawthlir tu emaw tal chu an dah ngei ang mawle? Sudden-a chu a nui deuh a.

‘A nih duh hmel tlat. Khaw lum hi hrehawm ti viau mah ila, hun remchang chu pe lo zawk teh ang.’

A sakawr aṭang chuan chhukin hling bawn karah chuan a sakawr chu a han thukru a. Chulai chu a hlim nawm deuh bakah rawn paltlang an awm pawhin a sakawr chu an hmu mai dawn lo a ni. 

A pheikhawk chu a han phelh a, Canyon tawplam chu muang changin a pan phei ta hret hret a. Bang inhung deuh lai a thlen phei meuh chuan a ke chu lunghriam leh vaivut sa a vang chuan a thip sup sup tawh a. Mahse, chu pawh chu ngaihsak hlei thei lovin amah hual veltu lung pui inchhawng kar vel te chu a mit var tak chuan uluk em em in a en kual reng a. 'Tunah, helai kurung hmun hi thlir chian deuh ka duh dawn chuan behchhan mumal deuh neih chu a ngai ang a’ tih pahin a han ṭhen sak a. ‘Sawlai mualdung awih tlan deuh saw a rem ang’ a han ti leh sap a

Lungpui chungah chuan bawkin, muangchang leh ngun em em in a hma a hmun awih tlan inpharh chu a han thlir kual a. Che miah lova a bawh lai chuan laiking in a rawn kan thuak a. Lung chungah chuan sava hlim a rawn lang zawk a, mulukawlh pakhat hi eitur remchang a awm ni a hriain fuk a rawn tum hi a lo ni a. Ramsa ruang mai a ni lo tih tilang turin Sudden-a chu sir lehlamah chuan a let phei a. Chu veleh, rang zetin a thlawk leh ta phurh a. Hetiang sava ang chi hi chu an dawihzep em em a. An ei duhzawng pawh nise, mahni inveng him tura an la chet tawk tawk theih chhung chuan an hnaih ngam ngai lo a ni.

 Hun chu minute tinin, darkar bi te te in a kal ve keuh keuh a, a dawhtheihna te pawh chuan awmzia a rawn nei tan dawn ta a. A chunglam yard sawmnga vela Canyon bangah chuan niin thir a chhun tlet zawk hi a hmu ta a. Chu chuan Mihring an awm ngei tih a tichiang ta. ‘Nangmah maiin em ni I nih ang le aw?’ tiin Sudden-a chu makti deuhin a han tawng chhuak a. ‘Awle.. han en chian law law  a tha ang, buaina  a awm pawh a lo beisei ka ring chiah lo ve a.’ a han ti a.

Inches khat te te in a vawn leh rah pelh palh hlau tak chungin lung hmunah chuan a kual zawngin a lawn chho tan ta a. Vawikhat rah pelh palhah pawh a awmna a hriattir nghal dawn a ni tih hriain fimkhur em emin a inham chho zel a. Lung lianpui ding to lur mai bula tlema zawl chin deuh chu a thleng chho ta a. Thirin lung a khak ri leh mihring khuh khak ri te chu a han hria a, Lung kar vela ri thangkhawk avanga ri lo chhuahna chiah hriat a harzia hriain fimkhur em emin Vengtupa awmna lai niawm a a ngaih chu a hnaih phei zel a. Lungpui ah chuan bawkphek thlar chungin a hmawr aṭang chuan a han bih thla kual a. Pa sanghet deuh hnung lam hi a zuk hmu ta a. 

Vengtupa chu chhuata lung phek inphah, Canyon luhna lam zawng zawng chiang deuha a lan theihna phenah chuan a lo awm a. Slash 8 pa in vawikhat a han en zawk chuan chu pa chu a muthlu a ni tih a hre nghal mai a. Hlimthla ang maia chevelin chupa chu a va hnaihchilh a, a .45 chu phawiin a luburah tak chuan a chhu ta bur mai a. Vengtupa chu hmalamah a lirphei tawp a. A ka ang phuau aṭang chuan chilphuan a lo chhuak burh burh a. chu chu a hmuhin Sudden-a chu a han ṭhen sak a.

‘Han kaihthawh ngawt che chu ka zak deuh a’ tiin a han phun khum a. Rang tak leh nghet takin a phuar nghal a. Chulai hmun atanga chiang taka lang thei canyon chhuat chuan hnuai zawl lamah chuan a chhuk leh ṭan ta a. Canyon chhuat lam aṭang erawh chuan hnimbuk in chulai lung hmun paltlangna hnuhma chu a hliah tlat avangin, lung keh kar a luh pheina lai chu a thupbo hneh hle a. Chung thil chu a han hmuh chuan Sudden-a chuan ngaisang angreng takin a lu a han thing nar nar a. ‘Hmun ṭha tak chu a va ni em! Tute pawh nise, helai hmuna chengte hi chu damchhungin hmuhchhuah theih pawh an ni dawn lo a nih hi.’ a han ti leh sap a.  A sakawr awmna lam chu a pan leh ta a.

A pu in a hnutchhiah na hmunah chuan dawhthei takin Midnight-a chuan a lo la nghak reng a. Sudden-a lo thleng chu lo lawmin a chik nghur nghur a. A chunga a lawn lai te chu a lu chuan a lo nul thuak thuak a. ‘Chet chhuah I va chak tawh awm ve?’ tih pah chuan Sudden-a chu a han ṭhen sak a. ‘A ṭha e, kan kal lehna turah chuan ei tur tuihnai tha tha pawh I hmu ngei dawn e,' a han ti a.

Kawngṭum hmuhfiah hleih theih loh khawpa chianglo chu hling bawn sang pui pui karah chuan kal zelin kham pang karah chuan a lut phei a. Canyon chhungah chuan Sakawr leh a chung chuang pa chauh lo chu thil che dang pawh awmin a hriat loh a. Lung sen ver vur hmuna luikawra tui luang del del awmna chu a thleng phei a. Chulai hmun thim ruih ah chuan sava hram hriat tur ik pawh awm lovin a reh tlawk tlawk a. A piah lawkah erawh chuan nizung a rawn inkap lut raih a. 

Hmalamah chuan phei zelin hmun ualau deuh laiah chuan Sudden-a chu a inkhalh chhuak phei ta thuai a. Phur angreng takin a han hawi kual a. Phul hmun chu mel chanve ai maha zauvin a leh lam lehlamah chuan a lo inpharh a. A sir tawn tawnah chuan tlang bulṭhut awih bung vut maiin a hne kual vek bawk a. A bulthut leilung chu ṭiau vaivut sen chi hi a ni a. Chulai phairuam chu mel chanve vela zau niin, a lai takah chuan luite tui fim tak hi a luang ri her her a. A velah chuan bawng thau tha tak tak hi an tla a. Chulai phai ruam chu ranrual in a khat a ni ngawt e.

‘Khai a… Khuanu siamsa ran huang zuk ni ngawt ale..!,’ tiin Sudden-a chu a inngaihtuah rauh rauh a. ‘Heng ho chu mahni in leh lo ang maia nuamsa in a cheng zuk nia le.’

A lo hnai ber, ran rualkhat tlatna lamah chuan a sakawr chu a han pawt her a, a han en thuak chuan an chhinchhiahna chu a hriat ngai mi pawh a ni mang lova; Box 48, Diamond 8 tih te chu a han hmu a. A han meng zim sat a, a khupa Midnight-a kaihruai pahin a sakawra hruisen intel chu a han phelh a. Ranrual zingah chuan rang taka tlan lutin a la nau deuh pakhat chu a han thlur bing a, awlsam zetin a han phihawk a. Hruizen in a awk chiah tihah chu bawng ven sakawr zirtir than tak chu a ding chawt a, bawng pawh hruizen chuan a phih thal nghal tawp bawk a. Sudden-a chu leiah a lo chhuk fel reng tawh a. Bawng chu a thawh leh hmain a ke hnung lamah hrui chuan a vet nghal a. Chu ransa chu Sudden-a’n a chhinchhiahna a en chian lai chuan a lo bu ruah ruah a.

‘An hna thawh dan mai mai chuh, Bawng chhinchhiahna tihdanglamna hmanrua chu an hmang ngei a. Mahse, heng chhinchhiahna te hi tu ta nge maw ni le?’ makti angreng tak chuan a ti bal bal a.

An tihdan chu a langtlang reng mai; the Diamond 8 chu Slash 8 an chhunzawmna a ni a. Tlema han deh danglam zeuhin, Chhinchhiahna thar, Box 48 chu Box B atanga awlsam taka siam theih a ni bawk ang. Tunge heng chhiahchhiahna neitu hi ni ta ang le ?

Chal chuar nang nang chungin Sudden-a chu a sakawrah a han lawn leh a. A ban a han vai kual pah chuan hruizena a ran phuar hlawm reng pawh chu a chhuah nghal a. Midnight-a chu Canyon hmar lam hreta kawng kawi lamah chuan a han kaihruai pah a. Kawi lai tak an thlen phei chuan sakawr aṭangin a han chhuk leh a. A hma lawk, yard sawmnga velah chuan In te tak te hi a lo ding a. Meikhuchhuahna a mei khu a lo chhuah ngiai ngiai danah luahtu an awm ngei tih a lang a. Khawthim thleng nghak turin Sudden-a chu a bul thingbuk phenah chuan biruin awmhmun a khuar ta a.

Hun chu darkar tinin a ral ve zel a, Ni pawh tunah chuan a rawn hniam ta hle a, ni zung te chuan canyon khawthlang lam bang chu rawn chhunin, thing hlim te pawh sei pui pui an ni ta..

Pa pahnih hi In aṭang chuan an rawn chhuak a. Pakhat zawk chuan in hnung lama sakawr huang chu a pan ta a. Midang pahnih an rawn chhuak leh a, a palina chu bathlarah chuan a thu a. Sakawr huang lama liam ta kha a rawn lang leh a, sakawr pakhat, zin phahsa a rawn kai a. Chutah, mi pali te chu dingin engemaw chen han an titi leh a. Sudden-a chu a tho kang deuh uaih a, A landan chuan misualho zinga pakhat chu a kalchhuak dawn niin a lang a. Vengtu a han phawk tak kha a thlak dawn te pawh a ni maithei. Lungbang ngheng chuan hnung lamah a han tawlhkir deuh va, a mit chu In leh a vela mite chungah chuan a fu reng a. 

A hnunglam atang aw teng deuh chhuai rawn ri chuan a ke pen chu a titawp chawt a. ‘Min tlawh turin I lo kal a ni maw?’ tih ri a han hriat chuan Vengtu dang an lo awm reng tih a hre ve chiah a.