Strikes Back-13

Badlands paltlangna kawngtum an zawh mek chu uluk elkhen a an chhui zel chung pawhin a hriat theih chang chauh hi a ni a. Dave- a phei chu a bo deuh rum rum fo mai a. Chulai thlaler vaivut zinga a thiamna tawp hmanga a ṭhianpa in hnu a chhui theih zel dan a hmuh chuan a ngaisang ang reng hle mai a. Chutah, Dave-a chuan thlaler phaizawl kin china thing ding bawr deuh laih a han hmuh chuan a thaw hawk a. A thawm chu hriain Green-a chu a rawn thu mar a, then sak chungin, ‘Kan hmaah tui a awm a ni maw, inbualna khawp a awm em loh pawhin hman tur tawk fang chu a awm ngei dawn e’ a han ti a.

Dave-a chuan  ‘Khai a,’ a lo ti hluai a. ‘I hmui ngap zet kha I chiah huh hmain thleng phei vat teh ang. Chuti lo chu in tlak lohin I ti nu vek palh ang.’ 

Dave-a phur lutuk in a lo beisei miah lohvin, Sudden-a chuan a lukhum chu a phawk lawk a, Dave-a sakawr beng bulah chuan a han vaw ta thlawp mai a. Dave-a chu a kang lawp a, a hnu minute engemaw zat chhung chu a sakawr talbuai thunun tumin a han buai zui leh rih a. A han thunun fel meuh chuan Slash 8 Foreman chu vaivut khu chum chum karah Tui awmna hmun lamah chuan a lo dawk pur pur tawh a. Dave a chuan kutzungpir hmuh meuhin Green-a chu a han phunkhum chiam a. Chutah, amah umzui chuan a duk phei ve ta puat puat a. 

‘A, awm hle hle laia khatia I rawn tih thut mai le, I ti ang lo hle mai, min vawrh kual nasa hman teh a sin,’ a han ti nang nang a.

Tuikhur awmna a va thlen phei meuh chuan Green-a chuan thing ding hlim belin mei a lo nun fel tawh a. A sakawr pawh chu a zin te lo phelh fel tawhin, chulai hmuna phul ṭo te chu petin a lo tla mek a.

 Dave-a’n a bula a sakawr lakam a rawn singsak lai chuan ‘I va thang rei bik ve a?’ tiin Green-a chuan  a ngaihna hrelo der deuhin  lo zawt a.

‘E.. min hrilh leh lo zawk mai teh, ka kalsan chiah che khan kalna tur hre lovin I lo bo khawtlai leh rih a ni maw. Ram hmelhmang I chhinchhiah thei si lova, hetiang te chuan engtin nge haw kawng te pawh I hriat theih ang le. I sakawr hi chu I zirtir ṭhat deuh a ngai a ni… ’ a han ti a.

 Dave-a lungni mang lo inhrithla ang bawrh bawrh thawm a ngaihthlak lai chuan a lo nuih vak vak a. Tawngkam te lah chu a thiam ve phian leh nghal a. A lungawi lo zualpui a reh ta tih hriat takin Dave-a chu a han thaw hulh a. Chutah Green-a chuan, ‘Coffee te I duh ang chu ka lo tia, chutiang a nih chuan nang, tui awmna ah sawn va kalin bel hian tui va thal khat la. Chumi pah chuan I duhtawkin I in hnangfak nghal dawn nia, khatiang an hla mawi kha ka hla hre ngai lo reng reng’ a han ti a.

Fiamthu titak deuha Suddena lu han vai thawi thuak pah chuan Dave-a chuan coffee bel chu a la a, tuikhur lam chu a pan ta a. Tui tlan ramsa hnu a lo chiar dup a. A han thlek zawk a, tlangram sakei hnu hi a han hmu tel a. Chutah, Sudden-a lam hawiin a inher a, a han au a… Silai puak ri pawh chu a lo hre miah lo a. 

Pa pahnih te’n tui awmna an lo thlen lai chuan, Parr-a pawh, chulai mualpawng chunglam chhip ah chuan awmhmun lo khuar fel tawhin, an chevel chu a lo ngaichang reng a. Haynes-a’n tui a thal chiah tihah chuan chetna hun remchang a lo hmu ve chiah a. A che nghal ta vat a..

A silai hmeh puah hmasa ber chuan thing tum paih ang thlawrhin Dave-a chu tui aṭang chuan a lenchhuak lawp a. Sakawr zin a dahna hmuna a rifle lak tuma theihtawp a Green-a zuan phei lai chuan Parr-a chuan a silai mu hnihna chu rang takin a thawn thla leh nghal a. Parr-a silai mu hnihna chuan Slash 8 Foreman chu a hnunglam thing hlim hnuaiah chuan a sir zawngin a hnawl phei leh nawk a. Chutah chuan a ban pakhat pharchhuak a, a lehlam delh betin, che zui tawh lovin a let ta reng mai a.

Parr-a chuan minute nga vel a han nghak a. Chutiang a rei chu a han nghak leh a. A tu mah mah chu an che lo. Haynes-a chu a tlukna ah chuan a let reng a. Parr-a chuan a awmna aṭang chuan thisen rawn luang chhuak ngiai ngiain tui a zuk pawlh sen tan mek chu chiang takin a hmu thei a. Sudden-a mutna thing hlim hnuai chu a thim deuh hlek a, a hmu chiang thei vak lo nain, a taksa ah chuan thil che a hmu lem lova. Parr-a chuan a inphenna thingbuk chu a han vai kiang deuh hlek a, a silai ngul chuan a lukhum chu thingbuk chunglamah a han hawlh lawr leh a. Engmah thil thleng a awm chuang lo. ‘An pahnihin ka tukzal ta!’ tih pahin a chil a’n lem khawlh a. ‘Ti khan I tan chuan thil engkim a zo ta, Mr. Green fing thiampa. I thianpa pawh a vanduai tel ta a nih kha. Vawiin chu kalpui a thlang sual deuh tihna a ni mai’ tiin a han phun sup a.

Parr-a chu a tawmna chhip aṭang chuan thawk awlsam inti tak chungin hmanhmawh miah lovin a sakawr lamah chuan a tleng thla a. A hnuai  zawl a thlen chuan a Winchester Rifle ah chuan mu thar thunin a kan kau leh phawt a. A sakawr chu kaiin a tawmna lungpui phen aṭangin chumi te inkhuarna lam pan chuan fimkhur takin a tawlh chhuak tan ta a. A hma lawkah chuan Dave-a chu thisen chiah piah nuaiin che lovin a la let reng a. Chumi a han hmuh chuan anmahni lambun tupa chu buaina siam zui rual a ni tawh lo tih a hre mai a. 

Tui chim chin chu a thleng phei a, chutah Green-a mutna lam chu a han pan leh a. Ani chu chulai phul rawng buang deuh chungah chuan hmai lei siin a lo la let reng a. A sakawr lakam chu thlahin, kawih zangthal tumin ke chuan Green-a nakah a zu thai chiah tihah Green-a chu a a rawn che chhuak thut a. Parr-a ke ah chuan lo manin, thawh pahin a chawikang ta thut a. Lambuntupa chu hnung lamah a invawrh lawp a. Parr-a Rifle chu a puak thuai a, mahse pawikhawih nei lovin boruakah a thamral ta ringawt a. Ruh chuktuah ri tuar in leiah chuan a tla thum tawk a. Rifle pawh a kut atangin per nghal nawlh bawk a. A chunglamah chuan Sudden-a chu sar zam raih mai mitmeng nen kak deuhin a lo ding fel reng tawh a, .45  chu Parr-a hmai atanga inches thum lekah che map lovin a lo lekkawh reng tawh mai a. Lambuntupa chu hlauin a khur nghal zawih zawih a. ‘Min kap suh’ a ti ta chul mai a!’

‘Ka ti ngei dawn,’ nelawm loh zetin Green-a chuan a lo ti a. ‘I khaw hmuhna hi ka chheu darh vek dawn – chutiang chu ka nuam tih zawng tak a ni bawk – mahse, tunah rih chuan tangkaina I la nei a ka hriat avangin chauhin ka zuah lawk che a nih hi.’ A sawi awmzia chu a chiang tawk khawp mai. Chutah Parr-a chu a lo bu rawk rawk a. Green-a’n rang tak leh nghet taka a phuar mawlh mawlh lai pawh chuan kawhmawh bawl ngam lovin a lo dawh tha hle hle a. Chutah, a hmel takah chuan thamin a kuai khup thawk a, a kut phuarna chu a kerek phuarna nen a han thlunzawm leh chat a. A bawkkhup zawngin thalfang ang maia khawngin a let ta reng mai a.

‘Tunah, Dave-a hi a thi nge a dam tih ka thlithlai dawn a. A la thawk ngei theih nan I lo ṭawngṭai a ṭha ang’ Sudden-a chuan a han ti leh hmak a. Amah that thelh tupa chu en zui tawh lovin Dave-a leh rengna lamah chuan a kal phei ta nghal a. A han enfiah thuak thuak a, a rilru chu a nuam ta deuh hlek a. Parr-a silaimu chuan a dar ruh chunglamah fuhin, a khing-khang ruh karah a tlang hi a lo ni a. Chu Slash 8 tlangval la naupang tak chu a thisen chhuah hnem avangin a chau hle dawn a. A lan ang ngawt ai chuan a ṭha lo maithei bawk a ni. 

Sudden-a chu a thaw huai a, Dave-a kawr chu pawtthlerin, hliamte chu a tifai a, a tuam phui sak ta a. Darkar chanve hnuah chuan Dave-a pawh a rawn harh chhuak a, Thing kung nghengin a rawn thu chhuak hram hram a. Maktihna a khat mitmengin a thianpa chu a han melh a.

‘E heu, Vanram chu a ni thei lovang — Hetiang hmelpu Angel chu awm ve an phallo tawp ang’ chau zetin a rawn ti chhuak a. Foreman in dim baksak lova a theh thlukna hmuna Parr-a lo lum khawng reng chu a han hmu a. ‘Parr-a hian enge a lo tih ve a?’ Chutah Green-a chuan anmahni a lo lambun thu a han hrilh chuan ‘Kha kha maw min kaptu chu! Engvanga min lo lambun teh ngawt nge a nih a, Jim?’

‘A la sawi lo chu a nia,’ tiin Green-a chuan a lo hrilh satliah mai a. Chutah awmze nei fe in, ‘a sawilo cheu a nih chuan…’ a han ti a. Duhsakna tel lemlo taka Chu Slash 8 pa pahnihin an han en ram ram takah chuan Parr-a chu a lo dâng sâwp sâwp a. A rilru dawihzep tak chuan tlanchhuah dan turte chu a han ngaihtuah ngial nain, tum pawh a tum chhin ngam lo tih a inhre chiang hle a. Green-a hi a thi a nih ngawt loh chuan tlanchhuah chu thil theih loh tawp a ni tih pawh a hre chiang hle a ni. Green-a lah chuan a rilru hria niawm takin a rawn en uluk hle leh nghal a. Chutah, dinchhuah pahin a rawn chhuk melh ta ran mai a.

‘Tlanchhuah tumna rilru te kha I lo nei a nih chuan, theihnghilh nghal ang che. Kan hun min khawhraltir ta sa sa bawk a. I han titi dun lawk teh ang. Zawhna bengvar thlak tak tak ka zawt dawn che a, chhanna ngaihnawm tak tak min min lo pe zel dawn a ni’ a han ti a. Parr-a a lo ner nung chu a han hmuhin, Dave-a lam chu a han hawi a, ‘Taka, Injun ho chawi seilen ka nih thu hi ka hrilh tawh che em kha?’ a han ti a.

Chu hliam tuar pa chuan makti tak chungin a lu a lo thing. ‘Aih, chutiang I sawi awm pawh ka va hre lo ve, Jim,’ tiin a lo chhang a. 

‘Tereuh te ka nih laia thil thleng a nia,’ tiin Sudden-a chuan a lo hrilh a. ‘Commanches hovin min rawn beih lai chuan Tawilailir chhungah ka lo awm a. Mi zawng zawng an that vek a. Mahse, Commanches ho hian mipa naupang an thah ngai loh avangin min hruai ta daih a. Kum rei vak lovah Piutes ho hnenah min hralh leh a. Min enkawl seilian chho ta a ni.’

Dave-a chu a lo bu nghat a. Green-a thil tum diktak chu hrechiah lo mah se, a titi pah chuan a khabe chu sawizawiin a tiche lui vak vak tih a hre thei a. Tichuan, Green-a thusawi ngaithla chuan a lo ngawi reng a. A lo mu thlu ṭep ṭhin a.

‘An mi leh sate an zirtir zinga pakhat ṭha em em chu an mitangte an ṭawng tir dan hi a ni. Helam kawngah hi chuan an zei hawi teh asin. Patling ngat pawh nise, minute sawmpanga chhung chhaih dawl zo hi ka la hmulo reng reng. An ṭawng vat lo a nih chuan, an ṭawng tawh ngai lo ṭhin’ a han ti a. 

Sudden-a tum dan chu lo man thiam ta in, Dave-a pawh chuan a lo bawl kual ve vat a. Parr-a mitmeng kal rulh rulh pawh chu a hmu reng a. ‘Chutianga mitang an tawngtir dan ‘trick’ chu an zirtir ve reng reng che em?’ Awmze nei taka a thle kual leh a then vel dan atang chuan a thianpa chuan a thil tum a lo man tawh a ni tih a hre thei a. Dave-a thil man chak dan chu tha a ti hle a ni.

‘Tehreng mai,’ a han ti a. ‘Tlem a zawng chu kan hman pawh a ngai dawnin ka hria. Parr-a hian kan hriat tur ṭul min hrilh tur a nei nual a. Vehthlem ngai vak lohvin min hrilh mai thei a,’ Parr-a chuan luhlul hmel fe in chil a han chhak phurh a. ‘A nih loh chuan… a turu ber chi kan hmang ang.’ Tih pahin Green-a chu vawt raihin a han ṭhen sak a. ‘Chutiang chi a sawisak chuan minute thum vel an dawl tlangpui’ a han ti a. Chutah, awki hniam reih rawihin Mangas, Coloradas leh Cochise vela Red Indian te nena Indona chanchin chu a han sawi chhova. Chutiang thil vel chu mingo tumah in an la hmuh ngai loh thu te, chanchin sawi darh tura nungkhaw chhuak an van pharh thu te, Commanche inrunna rapthlak zia leh Wagon ke bial ṭanchhana indo dan trick te,  insuatna rura tak tak thleng thin te chu uar thei ang berin a han sawi a. Chhim thlang lama hnam mawl hrang hrang ten an damdawi thiamna hmanga mi an thah dan leh na an tawrhtir dan rapthlak tak tak te chu kimchang takin a han sawi ta a. 

An mitang pa a han melh zauh chuan a thusawi chuan awmzia a rawn nei ṭan ta mai reng a. Chutah, Sudden-a chuan a Sakawr zin ipte atangin Bowie Knife (In vihna/insualna chi chemte lian leh sei tak 5-12 Inches vela sei, kum zabi 19 na lai vela khawthlang thir chher thiam James Black-a’n Jim Bowie hming chawia a chher thin -MH) chu a han phawi chhuak zal zal a. A hriam lam chu Dave-a hliam a buaipui laia a mei chhem na thukah chuan a han rawlh lut a. An piah hnim buk zingah chuan lut phei lehin, thingṭang ro engemaw zat nen a rawn kir leh a, chung te chu a tawk te tein a elh tliak leh hmawk hmawk a, meiah chuan a vur belh leh ta vek a. A chet dan vel chu Parr-a chuan a lo thlir ve reng a, hlauvin a lo meng zau kawk kawk a.

‘Eng … enge tih I tum a?’ a han ti khur hluk hluk a.

Green-a chuan chu zawhna chu a lo haider hmiah a. A thianpa kiangah chuan a han thu hniam leh te te phawt a.

‘Ka hrilh lawk che hi a tha ang — a nuam vak dawn lo a nia,’ Dave-a hnenah chuan a han ti a

‘Tha lutuk!’ rin aiin Parr-a hi a sehhel ve turah beisei ila, I beih ve fe chu a ngai ang. Hmuhnawm ka tih dawn khawp hi maw!’ phur zetin Dave-a chuan a lo ti a. 

Green-a chu a bu nghat a. Parr-a lam chu a pan ta a. A phuarna te chu a ngheh that leh that loh uluk takin a han enfiah leh te te phawt a. Vawikhat dang a han bu leh nghat a, a mitang pa chu kalsan lehin Chemte lo ling sen ta huam chu thuk aṭang chuan a han lek chhuak ta a. Fimkhur taka kengin chhuata lo bawk reng pa lamah chuan a kir phei leh a. Ani lah chu te chul pahin a lo tal laih laih a, awmzia a awm lem hlei lova. Green-a hmel chu a rumin a ruh ṭhah mai a.

‘Parr,’ a han ti hriam hrak a, ‘Helai mel sawmnga huam chhungah hian tumah hmuhtur an awm lova, lo awm pawh ni tehreng se, nang chhan tur che hian an rawn phe buai peih lovang. Mi tlaktlailo tak I ni. Tuna ka thil tih tur hi kan chunga I thil tih tum bawlhhlawh tak nena tehkhin kha chuan nep tak a ni. Tunah hian thil hriat duh ka nei a, rang takin..’ tih pah chuan a chemte ling vur chu Parr-a hmai thlan hluam bul lawk lawkah chuan a han vilik kual a.

‘I — I ti thei lovang!’ Parr-a chu a lo thaw hlawp hlawp a. ‘I ti duh lovang … Mingo I nih kha. Chutiang Injun ho tihdan chu I hmang lul lo ange.....’

‘Ka ti thei a, ka ti dawn bawk,’ Green-a chuan a lo ti rap rap a, ‘I khabe I chet that duh loh vaih chuan….’

‘Zawhna pakhatna– Tunge in hotupa?’

Parr-a chuan hreh hmel a han pu deuh a. Chutah, rin loh takin a lu a thing ta a. Sudden-a a hlauhna chu thukhat, Barclay-a leh Linkham-a a hlauhna chu a kawng a hran leh daih a ni. Green-a hian Indian ho na intawrhtir dan chu a hman duh tak tak a ring lo.

‘I a hle mai!’ Sudden-a chuan a lo ti bung nghat a, ‘Mi a tan hun ka nei lo.’

A rawn kun hniam a, Parr-a kawr chu a phih thler ta hawk mai a. A kokiah chuan nghet takin a han chelh a, Chemte sa chuan Parr-a vun chu a hem hnai ta tial tial a. Chu thil hriam sa vur mai lak atanga inven tum chuan Parr-a chu a tal laih laih a, a inhnit hlup hlup bawk a. A hlawhchham chiang kher mai. Inches chanve leka hnaia a taksa a rawn hem takah chuan a rak ṭhawt a, a rawn puak chhuak ta a, ‘Barclay-a! Barclay-a’n min ruai’

‘Kha thil hrep kha la kiang teh!’

‘Barclay-a chuan mimal takin em ni a rawih che a? Sudden-a chuan a han ti leh kher a

‘Ni lo, mimal thil a ni lo. Linkham-a’n mi rawih vel zawng zawng chu a tum a. Mahse, Barclay-a Foreman a nia, thuhmun reng a ni’

‘Barclay-a hnenah ni lovin Linkham-a hnenah chanchin I thlen thin tihna a ni maw?

‘Aw, aw, ka hrilh tawh che chu! Chemte ka dahthla tawh teh.... ’

‘A tha e, full mark I hmu ta phawt. Tunah, zawhna puitham deuh: Tunge Shadows hi kaihruai ber le?’

Parr-a chu a inseh ruh a. ‘Ka hrilh thei lo ang che — Min that ngei ngei dawn a sin!’

‘Chawimawina tangkapui ka pek che I ring bik em ni?’ Green-a chuan alo ti tuar a. Chemte chu a mit bulah lekin, ‘Hrep tak che chian, Sawi vat rawh!’

‘Linkham-a! Linkham-a’n Shadows chu a enkawl’

‘I chiang maw?’

Parr-a chu a lo bu leh vat a.. ‘Pariat an ni; Morley-a, Smith-a, Callaghan-a, Roberts-a, MacAlmon-a, Ray-a, leh Bull Pardoe-a. Bull Pardoe-a hi Linkham-a awm loh lai in hotu chan a chang ṭhin. Chutiang chu a ni deuh reng bawk.’

‘Hnar ruh tliak pa kha a ni em?’

Parr-a chu a bu  nghat a. A luhlul chhuah vena te chuan a vawrtawp a thleng tawh a, tihlawm a tum hi a ang mah mah tawh zawk. ‘Amaherawhchu, Bull-a chuan thupek a chhuah ngai lo. Link-a hrilh ang angin a ti mai thin. An tawmbo deuh chawt thin.’

‘Khawiah maw?’

‘Canyon (Kurung) pakhat a awm. Chutah chuan ka hruai ang che’ Parr-a chuan a han ti a. A mitmengah chuan finrawl thawh duhna hmel a rawn lang zawk a.

‘Khawiah mah I kal dawn lo, Parr,’ Sudden-a chuan vawt raihin a lo ti leh hmiah a, ‘I thluak thawl tak kha lo vawrhvir vak suh. An tawmna hmun chu chiang takin min hrilh ang a. Dawt sawi miah suh ang che. A nih loh chuan hma ka la ang’ tih pahin a chemte chu a han melh leh zauh a.

‘Kurung chu, ka hrilh tawh che ang kha a ni a,’ Parr-a chuan a lo ti hmawk hmawk a. ‘Thudik tak ka hrilh ang che. Badlands paltlangin hmarthlang hawi zawngin I kal ang a. Tlangdung bulṭhutah Canyon chu I thleng ang. Laiking angmaiin tlang dung chu a lo bawk ang a, hai rual a ni lovang. Canyon chu en thuak chuan engmah awmlo ang mai a ni a. Mahse, zawl zau vaklo a awm a. Tah chuan Buk inzar a awm a. Chu chu an tawmna chu a ni’

Green-a chuan ringhlel angreng deuhin a mitang pa chu a han thlek vang vang a, chutah, ‘Parr, I daw niin ka hre tlat’ a han ti a.

‘Aih!’ Parr-a chuan a lo ti thawt a, ‘Ka daw lo!  Min rin a ngai a nia!’

Green-a chuan a lu lo thing a, Bowie Knife chu meiah chuan a han rawlh lut leh ta a. 

‘Green, I ti thei lovang!’ tiin Parr-a chu a lo ṭe tuar tuar a. ‘Chutah chuan ka awmve reng tawh a lawm. Thudik a ni. Thudik tak ka hrilh che a nia!’

Parr-a hnungchhawn mektu Sudden-a chu a han nui sak a. Thutlukna siamfel ta niawm takin a han bu ta nghat a. Chutah, a mitang hmachhawn chuan a rawn inher a, ‘Ka la enfiah ang chu,’ tih pahin Dave-a lam chu a han hawi leh a. ‘Nangmahin Slash 8 ah I haw thei angem?’ a han ti a.

Dave-a hmai chu a sen tawn tawn. ‘Khai a, Jim, ka ṭha alawm. Min hruai ve rawh’ a han ti a.

‘Ni love, Dave, Ranch lama I haw theih chuan, chutah chuan lo awmla ka duh a ni. Kei chu an buk enthlithlai chuan ka han kal ve thung ang a. Darkar sawmli pariat chhunga ka lo kir lo anih chuan, South Bend lamah I kal anga, Judge Pringle a hnenah thil thlen dan zawng zawng I lo hrilh ang. Ani chuan thil tih zel dan tur chu a lo hre vek mai ang. Tunah chuan min hnial lo la. Ranch ah chuan an mamawh em em bawk dawn che tih ka hre tlat. Tin, I hliam te kha enkawl vat vat a ngai bawk a ni.’ Sudden-a chuan han ti a.

Dave-a chu a han rum ngal ngal nain, a rilru ah hetiang dinhmun a ding chung chuan a foreman tan hnawksak mai a ni dawn tih a hai bik lo. 

Sudden-a chuan Parr-a chu a lo hmachhawn leh tawh a.. ‘Tunah hian ka chhuah dawn che a ni, Parr,’ a tih lai chuan mitang chu a lo meng zau kawk kawk a ‘I hmui hmai vel ka en hian I pu hian kalbo turin thu a pe tawh che niin ka hria a. Enga pawh chu lo sawi se, ka han belhchhah ve nghal ange, he ram aṭang hian chhuak rawh. Helai velah ka hmu leh che a nih chuan keimah ngei hian ka dah tha ang che’ tih pah chuan a han kun hniam a, Parr-a beng bulah chuan engemaw ni hi a han sawi a. Parr-a chu a che lawih a, makti lutukin a han en a. 

‘Nang hi —’

‘Ni e, keimah ngei hi!’ tiin Sudden-a chu a lo inrawlh buai leh a, ‘Tunah chuan ka ti mai mai lo tih I hre ta bawk a’ tih pahin a phuarna te chu a han zai chat zung zung a. ‘Kal bo nghal rawh’ a han ti nawn leh sak a. Chu misual pa chu thlabar em emin a petek nawk nawk a. A sakawrah chuan a chuang a, thim thamah chuan a put bo ta thuai a.

‘Thil finthlak tak niin I ngai chu a ni phawt ang a, Jim?’ tiin Dave-a chuan a lo zawt a ‘I han pan tur thu hrilh turin a kal nghal vat mai lo’ng maw ?.’

‘Ni love,’ Sudden-a chuan a lo ti a. ‘Parr-a kha chu tukzal a ni tawh. Amah pawhin a inhre chiang khawp ang chu. Silaimu khat pawh a hen lo. Tikhan kal tir ang. Sangha lian zawk kan tur kan neih tawh kha’ 

A hnu lawkah chuan pa pahnihte chu an sakawrah an chuang a. Dave-a chuan khun khan fe in a thianpa chu ban a han vai khum lauh lauh a.

‘Dam takin le, Jim,’ a han ti a. Sudden-a chu a lo nui sak a, a che chhuak ta a. A thianpa chuan, chu pa sang thlerh thlawrh, a sakawr dum lianpui nena thim thama liam ta chu, a thlir zui vang vang a. Chutah a kawng tur chu a zawh ve ta nghal a.