Strikes Back 12

A tuk leh zingah chuan Sudden-a chuan  ama sawi dan takah  ‘a sapa vah’ vel mai mai tur thu chu Slash 8 hnathawkte bulah chuan a han puang a. Engmah a chin chhuaka hrilh zui lem lovin a sakawr chu a buatsaih mawlh mawlh a, pawnthuah tel nen, chaw te funin, a ralthawlah chuan tui a han thun khat leh thap a, Lui lama kawng tum kal chu zawhin a thawk chhuak ta a. Amaherawh chu thui pawh a kal hmain a hnung lamah sakawr thawm a han hria a, a sakawr pawtding meuhin a lo nghak ta a. Luhlul hmel pu deuhin Dave-a chu a lo thleng a, a bul a rawn thlen chuan a sakawr chu pawt dingin, then sak chungin a lo kalna lam chu a han kawk a.

‘Khai a, eng thil nge I tawh dawn tih pawh hrelova chutia nangmah chauha kal te chu a,’ tiin Foreman chu a han bia a. 

‘Enkawltu nurse I mamawh awm sia tiin keimah chauha kal ka lo titlu ta mai a sin.’

Sudden-a chuan a thianpa la naupang tak mai chu a han hnial deuh nain, dik taka sawi chuan kalpui neih pawh chu pawi a ti hranpa lem lova. Sweetwater lui dung zui zawnga an kal pah chuan a rilrua a thil vei te chu Dave-a hnenah chuan a han hrilh ve a.  ‘Heng Shadow mihring ho hi chhui zui ka duh deuh a,’ tiin a han hrilhfiah a.

‘Engtik lai mai pawh hian, tute mai pawhin pawl lian tak an nih thu an sawi ziah mai a. Chutiang chu em ni dawn aw?’ Dave-a chuan a han ti vang vang a.

‘I chaw ei zozai kha hmang tangkaiin ngaihtuahna han hmang ve ik ta che,’ Sudden-a chuan a lo ti nghat a. ‘Ka hriat chinah chuan, tumahin mi pali aia tam hi a hun leh hmun inangah an hmu ngai lo.’

‘Chu chu a dik,’ pawmpui takin a naupang zawk chuan a lo ti a, ‘Mahse, chu chuan engmah a finfiah chiang thei chuang hlei nem.’

‘Ka hria a lawm,’ a thianpa chuan a lo ti a. ‘Ka chhui kual nasa reng a ni.’

‘Sawng lai velah sawn vaivut an thap kual mai mai turah chuan I ngai lo’ng chu maw, Jim?’

‘A ni thei tho bawk,’ a lo ti satliah mai a. ‘Kan hmuh chhuah tak loh leh, engmah hloh tur kan nei chuang hlei nem.’

Dave-a chuan pawmpui tih hriat takin a lo bu nghat a. Lui dung zawh chuan an kal zel a. Zing ni chhuak thiang takah chuan phaizawla phul hnim tote chu an duah hluah hluah a. A kar velah te chuan sava (Skylark) an hram chiah chiah a. Hla taka Mesa tlang inchawrdawh thluah maite chu an lang dumpawl ruih a. Slash 8 bawngte pawh chu an velah chuan thlamuang takin an tla noh noh a. Rei vak lovah chuan lui te zawkin a rawn finna lai chu an va thleng a. Chu lui chu Dave-a’n ‘Benito’ tia a lo hrilh tawh kha a ni a. Lui infinna lai atanga chhak deuhah chuan daikai theihna lai tura chhinchhiahna a lo awm a. Chulaiah chuan lui chu daikaiin a kam lehlamah chu an va thleng a. Chutah chuan hriattirna thuziak rawng ti deuh riai ruaia inhnawih lo in tar chu an han hmu a. An han thlek vang vang a.

BOX B RAM A NIH HI

KIR RAWH

NANG KHA.

‘An nelawm awm hle mai a. A ni lawm ni ?’ Sudden-a chuan a han ti deuh nghat a.

‘Tehreng e. A hriat nghal mai a lawm. Mi duk dak lo engemaw zat chu eng enge maw tiin an vak vel reng ang chu.’

‘Lungkham duh mata che, Nauva — Box B pangpar chu kan lawh sak dawn hleinem. Kan kawng zawh tur chu saw lam saw a nia’ tih pahin kawlkil lehlam, laikingin bel a rawh cham chamna lai chu a han kawhhmuh a.

‘Badlands maw!’ Dave-a chuan a han ti hluai a. ‘Saw tah sawn kal i tum a maw?’

‘Tlang lawn ang deuh kha a ni dawn a,’ then sak pahin Sudden-a chuan a han ti a. ‘Nia.. a hahthlak khawp ang. I duh chuan haw leh mai ta che.’

Dave-a chuan hmel nur deuh chungin a lu a lo thing nasa mai a. ‘Teuh lo mai. Saw laia va tla lut tura at I so dawn phawt chuan, I inchhuih khawloh palh veng tura lo zui ve zel che hi ka tih theih tawk a ni ang..’

‘Takzet maw… I fel mang e,’ tiin Sudden-a chuan a lo ṭhenkhum sak a. ‘Ka chau hlum dawn nia ka hriat veleh ka au vak mai dawn nia aw.’

Sakawr chungchuang pahnihte chuan Barclay-a hmunhma hrula kawngtum chu zawh zelin Badlands vaivut dur hmun chu an thleng phei ta thuai a. Ram hmelhmang chu a lo inthlak ta a. Chutianga, ram hring tha hmun an paltlang hnu lawk a, hmun ro leh tihbaiawm tak a lo awm thei mai chu rin thiam pawh a harsa hle a ni. Nisa chuan an pahnih chuan a em tlawk tlawk a. Lei lamah lah thir bel chhuan sat ang maiin a lum chuan a rawn ur huk huk bawk a. Dave-a’n a thianpa a han melh zawr chuan a lo inngaihtuah mukin, an sakawr rahna hrula hnuhma fiahlo tak kal zel chu uluk elkhen bihin a lo chhui zel hi a lo ni a. An kal zel lai chuan chulai hmun zawl reh ruih mai ah chuan an kalna paltlang zawngin rannung pahnih hi an tlan zai zai a. An chung lamah chuan mulukawlh pakhat hi beisei nei hmel takin a thlawk kual a. Cactus thing sang pui pui te chuan khawhhar hmel takin an zarte chu an lamah an rawn phar du hlawm a. Thlaler  sava chi khat (Road runner) chu an hmalam lung hmun pan chuan a tlan zawi zawi a. Khawilai hmunah emaw chuan thlaler rulin a mei a tih rik chheng chheng te chu an han hria a. Mahse a reh leh ta thuai a.

Chhun pachang nisa chu tawrh hleihtheih pawh a ni ta lova. Chutah, a thianpa in chawlh a han rawt takah chuan Dave-a pawh tihzia tih hmel fe in a lo thaw huai a. An pahnih chuan chawlhna tur lungtum behchhan zawngin an han hawikual a, piah deuhah chuan lung inchherchhuan pakhat, a hlim hnuaia chawlh rem fahran mai chu an han hmu a. Chutah chuan chawlin, sakawrte chu tui te an han pe a. Thingro te fawmkhawmin, mei an chhem a, Cofee te lumen, Green-an eitur a kente chu an ei ta a.

‘Eitur engmah I rawn keng ve miah nange a?’ tiin Sudden-a chuan a thianpa chu fiamthu titak deuhin a han kap pah a.

‘Khai a, Hetiangin picnic turin kan kal dawn tih hre hek lovi,’ Dave-a chuan a lo ti vat a. ‘Lo hria ila chu, Sangha te, artui te, a.. eitur tha tha I hriat zawng zawng  ka rawn pai tur a nia…’

‘Caviare (Sangha tui aṭanga siam kamram tui tak - MH), I tihna mi?’ tiin Sudden-a chuan a lo zawt a.

‘Chu chauh lo pawh,’ Dave-a chuan phur zetin a han ti a. ‘Khawchhak lama an ei ang chi tuihnai tha tinreng mawle.’

‘Khai a, I ti tak tak lovang,’ Sudden-a chuan a lo ti a. ‘Heng eitur tuihnai hmel tak tak hi ka lo temchhin ve tawh a. Mahse, a hmel landan ang lo takin ka a fah mang hlek lo a nia.’

‘Chaw dawr changkang tak taka an thil siamte chu a dan a dang a sin,’ tiin Dave-a chuan nuihzat deuh tak chungin a lo chhang a.

‘Khai a, a thente chu a lo tui fu mahna’ Sudden-a chuan a han ti a. Chutah, then sak chungin, ‘Pa rumra angreng deuh, Kansas khawpuia bawngrual khalh a zin te pawh min ti hrechhuak e a. Chutiang ang dawrah chuan a lut ve ngawt a. Chah tur ber pawh a hre leh si lova, Chanchinbu phek hlai zet tiat lawih Menu (eitur inziah tlarna) an rawn pe ta a, tihngaihna hre lova a khalh kual a khalh kual hnuah Bawngsa kanro a han chah a. Bawngvun kanro char zet an rawn chhawp a. Pu Jesse-a chuan a han beihngial hnuah a thinin a tuar ta lova, tirhchhiah chu kovin, ‘Enteh hmel a, I thil rawn chhawp hi chhum that leh a ngai, la kir leh rawh’ a han ti a. Chu tirhchhiah pa chuan makti taka petek dawrh chungin, ‘Ka pu, kan eisiamtu hian eisiam a thiam lo I tih na em ni ?’ tiin a han  zawt a. Ani lah chuan eng danga chhang lovin chu pa cher den dawn hnungah chuan a han chum chawrh a. ‘Texas ah chuan hetiang ngawt ai hi chuan kan bawngte pawh kan chawm tha a sin’ a tih hrep a sin le. Chuvangin, kei chuan, khang I han sawi eitur tuihnai tak tak ai kha chuan Bean kanro mai mai pawh ka thlang zawk e’ a han ti a

Chaw chu an fak zo ta. An thlengte chu vaivut chuan an nuai fai thuak thuak a. An meichhem pawh an Cofee inbang chuan an leih hlum nghal a. Chumai duh tawk lovin vaivut chuan an chhilh leh vek a. Darkar chanve chhungin an sakawrah chuangin khawthlang lam panin an thawk chhuak leh ta a. An hma lawkah chuan thlaler Rose par, lunghlu pianhmang ang pu hi an hmu a. Chhun nieng ah chuan a langsar hle a. Chu hmun reh lutukah chuan Dave-a chuan thawm rawn nei lehin, an thlen chin tur chungchang chu a thianpa a han zawt leh a.

‘Kan hma lam zel kawngah sawn’ tih chu chhanna a dawn chhun a ni a. Engmah hriat belh tur a awm lo hle a ni. ‘Deuh teh ngawt chuan, cactus thing te pawh hi an titipui tlak zawk ta ve ang’ tiin a han phun bal bal a. Chik taka lo entu chu awm se, chhan let pawh a beisei hran lem lo tih an hmu thei ang. A dar chu a han chhin ak a, nisa elkhenin a em avanga, a beng sir atanga a kawra thlan far zaih zaih te chu ngaihthah tum hram hramin Dave-a chu a sakawrah chuan a thu ngui nghaih mai a. Chutichuan, pa pahnihte chu an hmalam tawp chin pawh hmuh phak loh a thlaler ram inpharh ah chuan an kal zel a.

Curt Parr-a pawh a rilrua lawm lo tak chungin Slash 8 atanga a ban hnu khan Hanging Rock a inkhalh thleng tawh a. Chutah chuan a lungawi lohna te chu zu a phumbo tumin a in piap piap mai a. A no a tlak tam poh leh a rilrua huatna leh thinrimna chu a pung ting mai a. Chutah, Diego-a Tequila (Zu chi khat) um khat a ruah tep tihah chuan Zachary Barclay atana a la hlut dan turte chu chiang takin a ngaihtuah chhuak ta a. A rui lungpuam chu a inngaihtuah chho zel a, Slash 8 a a thawh chhanah hian a hmasa berin Box B neitupa hian mawh a phur a, chutah midangte pawh. Tunah chuan Barclay-a mawhphurhna liau liau a ni ta. He ram a chhuahsan hmain a thawh hah man awm tawk chu kar chhuah ve ngei a tum ta a ni. ‘Ka tihsak tam ve tawh bawk che a lawm maw le, Zack. Awmze neiin indawr ve tawh ila’  tiin a han phun sup a.   

Box B a thlen phei chuan khua a eng chiang tawh hle a. Zing ni chhuak eng mawi tak te pawh chuan Parr-a tawnah chuan awmzia a nei teh chiam hran lova. Chutiang zing karah chuan tuma hmel hmu lovin Box B inpui ber kawt lai chu a thleng phei ta a. Tukverh atanga eng rawn chhuah danah chuan tuemaw chu amah dawngsawng turin a phusa mek niin a lang a. Vannei inti ru tak chungin rahka ah chuan a petek chhova, kawngka chu a han tuk ri ta a. A rawn intheh hawng nghal thuai a, Burley Linkham-a ruangam hrawl takin a .45 ngula a hmaia a rawn nawr tak nawkah chuan a penṭawng luhai chu rehin, vawt a ti nghal sung sung a.

‘Keimah ka nia, Link, Curt Parr-a,’ tiin a han thaw hlawp hlawp a. Linkham-a hmel puthmang chu a danglam eih lova, chutiangin a puakruk pawh a lek hniam hek lo. Parr-a rui lungpuam inhnit deuh hlup hlup chu a melh run mai a. Parr-a rui pawh a harh kawk kawk mai a. 

‘Burley, pathian hmingin, keimah ka nih hi, Curt-a. Barclay-a ka hmuh a ngai a ni,’ tiin a han insut leh hruih a.

‘Eng atan?’ tiin chhanna leh zawhna a rawn fawmkem nghal a.

Ngaihtuah chiang mang hlei lovin a hma ni tlaia Slash 8 a thil thleng leh a ban thu vel chu a han sawi zuah zuah a. Tin, a lo thawh hah ve tawhna awm tawk kar chhuah a mamawh thu te chu a han  sawi a. Chutah, Linkham-a chuan vin deuh hian, ‘Chutianga I vanduaina ah chuan engah nge kan lo tuamhlawm teh ngawt ang che?’ a lo ti khur khur a. 

Parr-a chu fimkhur deuhin a han tawlh let hlek a. A theih ang tawka awki pangngai chhuahin, ‘Link, I hnena engkim kan rawn thlen thin avang hian kan Hotu ber I ni tihna a ni miah lo a nia aw. Zack-a biak ka duh a ni.’ 

‘Eng chungchangah maw, Curt?’ Linkham-a awki chu a nem ta sawt a, a zawi sap mai bawk a. Parr-a pawh a ngaih a tha ta deuh hlek a. Linkham-a hian a pawimawhna hi a hai lo a ni. Zack-a hian a mamawh ve tho si a.

‘I hriat ang khan, ka chhuak dawn a, chanvo engemaw ka mamawh’  Linkham-a hnenah chuan a han ti vawt ve raih a.

‘A tha a lawm, nia, I kal dawn nia. Engvangin nge Zack-a chuan I chanai chu a pek teh ngawt ang che ?

‘A chhan chu, thil hi ka hre hnem ve tawk a’ tih chu Parr-a luhlul chhuah theihna awmchhun a ni tawh a.

Chu pa lianpui mai, amah leh Barclay-a inkara tlazep tlat chu haw em emin a ding reng mai a. Linkham-a lah chuan lainatna a nei lovin, tanpui a tum hek lo. Barclay-a chiahin a ngaihthlak duh a beisei a ni.

‘Enge I hriat chu, Curt?’ Linkham-a awki chu a dam raih mai a.

‘A tawk e,’ Parr-a chuan a lo ti hmak a. ‘Tunah Zack-a min biak tir rawh.’

Linkham-a lo dawnsawn dan chu a danglam eih lova, muangchangin a kut ding lam chu a han che tual tual a, tawite na zeta rawn vai pawpin, a puakruk ngul chuan Parr-a hnarkawnah tak a khawng ta chawrh mai a. Parr-a chu a tawlh let dawrh a, bathlar atang chuan a tla liam thla ta a. Natuarin a vial nghal ngawlh ngawlh a. A hmai atang chuan thisen a rawn dir chhuak nghal zur zur a. Linkham-a chuan engahmaha ngai lo tih hriat takin a lo thlir zui vung vung a.

‘Engmah I hre lo ve,’ tiin vaivut zinga let reng, chu ruangam sawprawp angreng tak hnenah chuan, a han hrilh sup a. ‘Engmah I hrilh bawk lovang’. He ramah hian naktuka I la awm chuan ka that ang che. He thu hi vawiin ah ka puang zar nghal ang, Parr. Box B mi leh sa tupawh in an hmuh che chuan nangni ang ramsa tlaktlailo thahna thupek hi an nei vek tawh dawn a nia. Tunah, keimah ngeiin ka thah hma che in, heta tang hian chhuak nghal rawh!’

Linkham-a chu ngawi rengin in chhungah chuan a lut leh hmiah a. Thil thleng chu  minute tlemte chhungin a zo vek a. Fimkhur takin Barclay-a mutna pindan chu a han hawng a, a han ngaithla a. Thawri atang chuan Barclay-a chu a harh lo hrim hrim niin a lang. A han bu nghat a, ‘A thil hriat loh chu buaipui a ngai lo tihna a ni mai’ tiin amah leh amah chu a han phun sup a. Sual tih hriat ngawih ngawihin a han nui sung a, Parr-a insingsa vel thlir tur chuan tukverh lam chu a pan ta a. Ani chu thisen kai hnuangin sakawrah a lo lawn mek a. Zing ni chhuakah chuan chulai hmun atang chuan a inkhalh chhuak ta a. A sakawr pen nghawrah chuan a taksa na chuan a rawn tur ut ut a.

Curt Parr-a ruangam chu a hmuhnawm hran lo hle a. Thisen chuan a kawr hma zawng zawng a luan huh hnuang bakah a kekawrah te chuan a per nuai a. A hmai lah chu a chal leh khabe inkar zawng zawng a vung kawh luah a, a duk rui mai bawk a. A sakawr ke pen apiang mai chuan anchhe lawhin a hmui nâ leh vung luah avang chuan a phun chhuak a. A rilruah chuan, Pa rinawm tlet tlawt, hetiang dinhmuna a lo awm nachhan a mawhphur tu ber chu, anchhia a lawh mial mial reng a. Chu Slash 8 Foreman chunga phuba lak dan tur ruahmanna tha lo tak tak te chu a ngaihtuahna ah a lo lut zut zut a. 

Ni chu a rawn tlangsang a, a lum ta khawp mai a. Parr-a chuan Badlands chhung hla tak chu dai lut tawhin, lui lam panin a kal zel tih a han inhrechhuak zawk a. A duh vang reng pawh ni em em lovin Box B a chhuahsan hnu khan South Bend lam hawiin khawthlang lamah  a kal zel a lo ni a. A rilru pakhatah chuan Sweetwater phairuam chu a rang thei ang bera chhuahsan a ngai a ni tih chu a rawn ri tluk tluk a. Tunah chuan, Box B mi leh sa te chu Linkham-a’n thu a pe vek tawh ang a. Parr-a an hmuh rual rual a kap hlum nghal turin Linkham-a’n a hrilh hlawm ngei ang le. Ni a sat zual ang zelin a tuihalna chu a nasa a. A hma zana zu a lo in nghekna leh zing lama an in chapcharna vel avang te pawh chuan a tui chu a hal zual em em a. A mitthla ah te chuan chu thlaler vaivut chhuat a tui luang dum dum leh tui tling pawl raih tle neuh neuh ni awm tak te chu a han hmu lehnghal a. A nui ta hawk a. A han inngaihtuah fim leh deuh a, tui a hmuh vat loh chuan a tlusawp mai dawn a ni tih chu a inhrilh mawlh mawlh a. A hma a lungpui insir khup lam pan chuan a sakawr chau tawh tak chu a han kheng kal a, Badlands a tui awmna a hriat chhun a pan leh hmain, a hlimah chuan chawlh hahdam hlek a tum a ni. 

Chutianga dinhmun buaithlak leh chhe taka a awm lai chuan mi pahnih inkhuarna hnuhma a han hmu ta a. Chawp leh chilhin a na chu a theihnghilh nghal vek a. Ramsa ang maia thil hlauhawm  rim a hriatna chuan a taksa te chu a inralrin tir ta nghal a. A kal muang lutuk deuh em ni le? Box B mi leh sa engemaw zat a hma lamah chuan an lo awm reng tawh em ni le? Sihal vakvel ang maia inring leh fimkhurin chulai hmun vel chu a han thlir kual a. Tumah hmuh turin an awm lo. Mei chhemna chu a han dek a, a la lum vang vang a. Chumi awmzia chu heng mite hi an kal chhuahna a la rei lo hle a, a rei berah minute sawmpanga bak chu ala liam lo mai thei a ni.

Hmun ualau lai chu rul ang maia tlengin a tan tlang phei a, a sir lama lung intiang sang deuhah chuan lawn chhovin, a chhipa zawl deuh lai chu a thleng chho ta a. Chulai aṭang chuan khawilai pawh chu hla tak thlengin a lang vek thei a. Lung sa huamin a ur nat em avanga anchhe phuhchhuak sup sup chungin uluk em em leh mit zim sanin thlaler vaivut inpharh tle neuh neuh chu a thlir kual ta a. Hla tak, mel khat velah chuan sakawr chungchuang mi ruangam ni awm tak pahnih, khawthlang lam pana muangchanga kal mek hi a va hmu a. ‘A tha e. An kal muang bawk a, an hnungah a zui ve zel theih ang chu, zanah chuan an piah tlang bawk kha an thleng thei tawh ang’ ti rilru chungin a inher a, a khawthlirna atanga chhuk mai a tum lai chuan, sakawr chungchuang pakhat zawk chu a hriat tawh hnu ni tlata hriain, kut khum meuhin a han thlir leh a. Green-a a ni ngei mai le!!

Rinhlelh tur a awm lo, a chil chu a lem khawlh a. Chutiang sakawr dum lian tha chu he phai ruamah hian pahnih a awm thei lo. A hma a kalte zinga pakhat chu Slash 8 Foreman a ni tih a hria a, chu chu Curt Parr atan chuan a tawk em em a ni. A ṭawngṭaina chu chhanin a awm ta nia ngaiin, a awmna aṭang chuan chhukin, a sakawrah lawnin chau tawh tak chung chuan chu mite hmalam pan chuan a kual zawngin a kaltir ta a. A taksa nate chu a theihnghilh ta vek a. A kal pah chuan ri lovin a phun mawlh mawlh a. A rifle chu phawi chhuakin a kawmah a han beng thak  thak a.

‘Tunah chuan, Green, ka thawh ni a thleng ve ta !’ a han ti sup a.