Strikes Back 10

Bathlara a ṭhutna aṭang chuan Grace-I chuan Corral sira Foreman hnathawk lai chu a hmu thei reng a.  Barclay-a hawn atanga rei fe hnuah chuan, Barclay-a, Ranch a a len chhung khan engtik lai pawhin a awm hla ngai lo a ni tih a han hrechhuak leh hnuhnawh a. An titi hre phak lo tawk, mahse an chevel hmu phak tawka hnaiah a lo awm char char a. Chumi a’n hriat chhuah atang chuan Green-a leh David-a hian Barclay-a hi an lo lawm lem lo tih chhungril takin a hre ta a ni.

Barclay-a chu amah ep chiahin a ṭhu a. An chawchhum pain no vak lova melh paha a rawn chhawp in tur vawt raih mai chu a dut hruih hruih a. Chawchhumpa ngaihtuahna chu hrethiamin Grace-I chu a lo nur deuh a, chu chu a lo hmuhin Barclay-a chu awmze nei zetin a lo kiai suk a.

‘I Foreman chuan min ngaina lem lo niin a lang,’ tiin a han hrilh sup a. ‘A ṭha e, zir tur pawimawh tak chuan a la hmuak vat dawn a lawm. Slash 8 ka lei hunah chuan tunge hotu tih chu a la hre vat mai ang. Chumi chhung chuan I lu um mawi lutuk kha chuan lo inngaihtuah buai duh suh’, a han ti vei ngial a.

Chu paliana han bawl kual velna avang chuan Grace-I chu a lo nui ringawt a, chu chuan Barclay-a chu ti phur zual sauhin, a han titi chhunzawm zel a, ‘Vawiin chu ka vanneih ni a ni ngawt e.. Hetia ka'n hmu leh che hi ka lawm em em mai bakah ka ṭanpui theih dawn bawk che avangin.’

‘Min ṭanpui dawn maw?’ tiin Grace-I chuan makti hmel takin a han zawt a. ‘Engti kawngin maw, Mr. Barclay?’

‘Zack tiin min ko la ka duh a ni,’ a han ti deuh duam a. ‘A tha e, he inphiarrukna. . .’

Grace Tate-I chu a ngaihna hre lo hmel takin a rawn dak chhuak zawk a. ‘Inphiarrukna a?’ a rawn tinawn ve leh sap a. ‘Chutiang chu a awm I ring……’

 ‘Nia, inphiarrukna hi a lian viau maithei a ni.’ Barclay-a chuan a lo ti zawm leh zat a. ‘Mahse, Hei hi lo ngaihtuah la; henglai thil thleng vel ka hrilh tawh zawng zawng che ah khan thil ngaihtuah tur tam tak a awm a ni. He Ranch a neih theih nan hian Green-a hian thil a ruahman thuk hle niin ka ngai tlat a ni. Han ngaihtuah let vang vang mah la, helai a a lo lang hlawl hi thil thleng palh mai chu a ni lo maithei a sin?’

Grace-I chu a lo bu nghat a. Barclay-a chuan a sawi chhunzawm zel a. ‘Helai a lo thlen atanga darkar tam pawh a ral hmain Putar – I pa nen khan amahin Ranch a enkawl theih nan indawrna an nei a. In rintawkna a hlawh chhuah theih nan thil a ti a. Chu chuan I pa pawh a hneh hle a nih kha. Chutiang khawpa mi fing phakar chu a nia Green-a hi. Kum I la tlin loh avangin Green-a hian Ranch enkawlna chungchanga thuneihna a pum-hmawm theih nan rawtna a siam a. Chumi kawngah chuan I pa nunna chhanhim niawm takin a lang a. Chuvang chuan, Tate-a khan a rawtna chu a lo pawmpui ta  ni. A nihna takah chuan hengte hi chan chawp vek  a ni. Ranch an rawn beihna niawm takin ruahmanna a siam a nih kha. Chu chu midang tumahin an hriatpui lova, In chawchhum chauhin a hmuhpui a ni. I la hrereng emaw, I pa phuarbeh a ni a, chutah chhanchhuah a han ni leh a. I pa chuan thuneihna pumhlum pek chu rem tiin, chumi zulzui chuan Judge Pringle-a hnenah pawh thu an thlen ta a nih kha. A dawt lehah chuan I pa chu thah a han ni ta a – chutah pawh chuan hriatpuitu dang awm miah lovin Green-a chauh chu a hmuna awm a ni leh a. Tichuan, henglai vela Ranch tha ber pawl chu a pumbilh ta mek a nih hi. Kum I lo tlin meuh chuan a sawrfu zo vek tawh ang.’

Chu Rancher zeldin thubawl chu a awihawmin, thil diklo tak inmung a awm ngei chu a nih duh hmel riau a. Grace-I ngei pawh chuan awihawm hle in a lo hre ve a ni.

‘Mahse, Judge Pringle a chungchang hi?’ tiin a han zawt a.

‘Bah!’ tiin Barclay-a chuan a lo pawtchat leh a. ‘Dan hremi sual tak tak ka hriat ho zinga a hmasa pawl chu a ni lo tawp mai. Ka hriat chinah chuan amah leh Green-a hi an inthurual a nih hmel.’

Grace-I chuan a lu a lo thing a. ‘Chutiang ngawt chu a nih theih loh hmel,’ a lo ti sap a.

‘Judge Pringle-a chuan Green-a hian mi pangngai tak takte thlawpna pawh a nei tih min hrilh a – chungte chu a chhui chiang vek tawh bawk’

‘Inthurual an nih chuan chutiang chu a sawi dan tur a ni reng a lawm,’ Barclay-a chuan a lo ti a.

‘Chung pawmpuina leh thlawpna te chu a hmuh reng reng che em ?

 Grace-I chuan a hmu loh thu a pha lem lo a. 

‘Kha maw, ka sawi ang chiah a nih chu,’ tiin Barclay-a chuan a lo hnial a. Chu a thusawiin a thawh dan ngaichang chuan a han chawl hlek a. Chutah a titi chhunzawm leh ta zel a, ‘Mahse, kan ṭhian fing vervek tak ruahmanna hi a tisukuk zawnga herpui dan kawng awmin ka hria a’ Grace-I chu zawhna a khat hmelin a rawn dak chhuak a, chutah a han sawi leh a, ‘Nia, a ruahmanna hi tih sukuk dan kawng dang a awm a lawm. Enteh, Nula, ka hmuh tirh phat atang che khan ka duh nghal che a. Mihausa tak ka ni a, ka la hausa zel dawn bawk a. I Ranch leh ka Ranch hi kan suihzawm chuan helai ruamah hian lalram kan din thei dawn a ni. Chu chu buaina zawng zawng tawpna tur a ni bawk. Tichuan, he pa, awki hniam tak, Green-a leh mi maksak ho, Shadows an tih te hian min tibuai tawh ngai lovang tih ka chiang a ni. Nula.. nang chu Lalnu I ni ang a, I duh apiang I nei thei tawh ang. I remtih chuan ‘aw’ min pawh mai la’ tiin a sa rawng huai chu a han ser tan ta a., ‘Sakawr chungchuang satliah mai mai lak atangin thupek I dawn a ngai tawh lo bawk ang. Ka neih zawng zawng chu I ta a ni ang. Engtinnge I tih dawn le?’ a han ti a.

A mitmeng phurna a khat chuan it takin Nula chu a suangtuah zui vung vung a, a vun rawng ngo paw phiai mai te, a biang sen no chek mai te, a sam mawi tawk chauha kir chhap mai, a dar vaw siau mai te, a mithmul silk puan nem tak ang mai a awm siar te chu a han thlir a. Aw Pathian, a va han chhelo tak em! Hei hi chuan Banker meuh pawh tichhe vek thei turin chakna a pek theih mai bakah, a mizia induhtawk tak te chuan helai ruam hotuber nihna a pe thei ngei ang le. 

Grace-I chu makti fahran leh mitkhaplek lova Barlcay-a melh  reng chungin a ṭhu a, a fakderna leh chawimawina te chuan a rilru a hneh hran lem lova.

‘Tunah hian min chhan nghal a ngai lo a nia, Nula,’ tiin Barclay-a chu a thaw hulh a. ‘I lo inngaihtuah dawn thu tal chu min hrilh la. Mahse, hrereng rawh, pa dawhthei lutuk chu ka ni lo a nia, thutlukna I siam fel vat a, inneih thuai hi ka duh a ni.’

Rulin chethei lova a aikaih tawh chawngzawng ang maiin Grace-I chu a lo bu ringawt a. A dinchhuah paha a kut han beng thup ri te chuan a thisen chu a fan chuai a. Mahse, thildang a han sawi leh chuan tlemin a zia leh ta deuh hlek a.

‘Engmah lo lungkham duh suh,’ a han ti leh a. ‘Green-a mize diktak hi chu lipse ka tum khawp a nia. Hrereng la — Amah tih sukuk dan awmchhun chu pasala min neih hi a ni mai.

Thudang sawi tawh lovin a inher vut a, a sakawrah chuan a chuang a, chulai hmun leh boruak atang chuan a inkhalh chhuak ta a. A hnung lamah chuan Nula chu makti, rilru buai nuai, thinrim leh a thusawi vei zui deuh bawk siin a kalsan ta a. Chu chu a duhdan tak pawh a ni a. A tum dan chu zawm turin a ti tlur hran lo nain, kawng lehlamah chuan Green-a’n a bum kual velna lakah chhanhim a tum te pawh a ni mahna.

Grace-I rilru a, chu pa tawng tlem tak, Green-a’n a enkawl dana a lungawi lohna naran chu Barclay-an a han bawl phawn viau takah chuan tihtak zeta thinrimna ah a rawn inlet ta a. A nihna takah chuan Green-a a dodal chuan a hmakhua atan pawh a ṭha dawn lo a. Chu chu hmu thiam thei lo turin, a mit chu tih delin a awm tlat si a. Barclay-a thu leh hla mi hruaisual thei tak chuan a rilruah rinhlelhna a rawn tuh ta a ni. Chutiang thil chu awih famkim vek lo mah se, Green-a chu amah vengtu sual leh ṭhalo tak niin Barclay-a chuan a rin tir ta tho tho a. A tuk leh a Green-a’n South Bend lama hralh tura ranrual khalh an tum thu a rawn hrilh pawh chuan, chutiang rilru pu chuan a lo dawngsawng ta chiah reng a.

‘Tunah khan kan tlangvalte chuan bawngte pawh an khalhkhawm zo chiah a, naktuk hma takah kan chhuak dawn a. Khua pawh a nawm hmel e’ tiin Sudden-a chuan a han hrilh a.

‘Engtikah nge rawn kir leh in inbeisei a?’ tiin a lo zawt a.

‘Kan tluan chuan Nilaithawhtan ah,’ a lo ti a. ‘Kal lamah chuan ni hnih tal chu thang a ngai dawn a, haw lam erawh nileng pawh kan thang lovang.’

‘Pawisa chu hetah I rawn hawn leh ang maw?’

‘Engvang teh ngawt chuan maw, ka pi’ Sudden-a chuan a lo ti a, chu zawhna chuan a deng nain, a ti hrilhhai kher mai ‘Khuaah te kalin, Bank-a dahkham te pawh I pek tlak a ngai dawn a, I rualin ka rawn kal ve khawp ang’ 

‘Tehreng mai,’ Grace-I chuan a lo ti vawt raih a. ‘Dahkham chu engzat nge ni a?’

‘Dollar singkhat leh sangnga tiin I pa in min hrilh a,’ tiin Green-a chuan a han hriattir ve a. A pung engemaw zat chu a awm tel ngei ang. Ka rin dan chuan Bawng kan hralhna man aṭang hian kan pek tlak theih bakah, hnathawktute hlawh leh ran chaw pawh kan lei thei ang.’

Grace-I chu a lo bu nghat a, a inher a, in lamah chuan a kal ta daih a. Sudden-a chuan a lukhum chu hnung lamah a han kuai dak a, a khabe chu a han nuai nauh nauh a ‘Kan thian Barclay-a chuan a beng mawi tak chu a hnawhkhat tha bawk maw. Ka rin dan chuan pawisa zawng zawng nena pilbo daih turah min ngai a ni ngei ang le’ a ti bal bal a. ‘Kan pi ropuii lehkhabu vohbikah chuan ka hming chu a chuang lo chiang hle ang chu. Pinkerton ho pawh min rawn chhui zui tir ta se mak ka ti vak lovang’ 

Chumi zan, zanriah eikhamah chuan an awmkhawm laiin Green-a chuan ranrual an khalh dan tur ruahmanna tlangpui chu a han sawi zar zar a. ‘Khaw en veleh kan chhuak ang,’ a han ti a. ‘Gimpy, nang chu kawng lo kawhhmuhtu ah ṭang la ka duh che a ni.’ A han tih chuan chu Cowboy upa lam leh hruanghrau pui chu a lo bu nghat a. Chutah Dobbs-a chu a lo ṭhen sak a.

 ‘Gimpy-a te chu hna samkhai deuh lam buaipuitu ah ring zawk ila. A upa ve deuh tawh sia.’ a lo ti a

‘In ringtawk lo em ni,’ Green-a chuan a lo ti a. ‘Gimpy-a hi in zingah chuan hna buru ber khawih ṭhintu a ni a. Chuvang chu a nia hemi hna atana ka ruat nachhan. Tlangram paltlangin South Bend lamah kan kal dawn a ni.

Chu thupuan chu Slash 8 sakawr chung chuang mite chuan makti leh rin harsa ti thawmin an lo chhawn nghal vat a. Sudden-a chuan a thil puanzar avanga Curt Parr-a meng hnual ta raih hmel pawh chu a lo hmuh hmaih lo kher mai.

‘Jim, I ti tak tak a maw’ makti takin Dave-a chuan a lo ti a.. ‘Kha laiah khan Bawng rual khalh ngaihna a awm reng reng lo. Kan hloh ṭeuh lo vang maw ?

‘Kan zavaia thla vuah tur kan nei te a nih em loh chuan’ Shorty-a chuan a lo ti ve a.

‘Nang chu a hnuhnung berah kan vuah sak turah che lo ngai rawh’ tiin Dobbs-a chuan a ṭawng lai chu a lo pawt chat a. Chutah, titak deuhin, ‘Mahse, Jim.. a tidik a ni’

Pawmpuina thawm a rawn ri tluar tluar a. Chutah Curt Parr-a chuan a han zawt ve a, ‘Thunder Ravine paltlanga khalh chu enge a sualna viau? A awlsam bawk sia. Mahse, ni e, ranrual tlem tham te chu uluk elkhena vila khalh chuan buaina liantham chu kan tawk lo mai thei’

‘Ni chiah, vawikhatah pahnih te tein kan kaltir ang a, chutianga kan tih chuan darkar sawmhnih pali hun kan hmang ang.’ Tiin Sudden-a chuan a lo chhang a, ‘Shadows ho pawh an lo ṭhu mai mai lo turah ngai ila.’

‘A nih chuan, buaina a lo thlen I ring deuh tihna a ni maw, Jim?’ tiin Dave-a chuan helhhawlh angreng deuhin a lo zawt a.

‘Kan kawng zawh lamah chuan maw.. teh nang’ tiin Sudden-a chuan a lo chhang a. A ipte aṭang chuan lehkha them pawt chhuakin, an kawng zawh dan tura a ruahmanna chu a han kawhhmuh ve ta hlawm a.. ‘Dave, khalai mesa bula pumpelh min lo kawhhmuh tawhna lam pan khan Ranch aṭanga chhim lam hret ah kan inher chho dawn a ni,' a han ti a. Dave-a chu chulai hmun thlir chuan a lo nur deuh nung a, a huphurh hmel an lo hmuh chuan midang ho chuan an lo nuih ta dur dur a. Mesa kawng lama an hmabak chu an hrechiang tlang ta hlawm viau tihah chuan, ‘Miss Tate-I nena South Bend-a in va thang hlan khan ka haw pahin ka rawn chuan vel a, a letliam lama kal theihna tur tlangkar kal khan kawng tum a awm a. A awlsam vak dawn lo nain, Bawng rual zawh theih tawk chuan a ulh lutuk love’ tiin a han hrilhfiah leh ta hlawm a. 

‘I sawi danah thil laihchhuahna khur hlui panna kawng kha a ni maw ?’ tiin Gimpy-a chuan awih loh hmel zetin a lo zawt a. 

‘E heu, Jim, kum a la vei rei lo teh a sin – lung lum leh kawng min thut thut a la hlauhawm teh a nia. Nikum lawk khan tangkaraw zawng miten lung an hal nasa a, chu chuan kha lai leilung kha a tinghet lo zo vek a nia.’

‘A tha e, a awlsam ang tih ka sawi ngai reng reng hlei nem,’ tiin Green-a chu a lo nur nang a. ‘thil tihtheih an nih thu ka sawi mai chauh a ni’. Chu chu ka ruahmanna awmzia chu a ni e’ nelawm loh zetin a han ti zui a.

 ‘Kan zinga mi engzat nge kal dawn a?’ Curt Parr-a chuan hriat a lo duh ve a ni.

 ‘Nang, Kei, Dave-a, Gimpy-a, leh Shorty-a,’ tiin Foreman chuan a lo chhang a.

‘Dobbs, Chawchhumpa thlaveng tur hian lo awm la ka duh che a ni. Engkim I lo thlithlai ngun em em tur a ni. Miss Tate-I hi a mal chauha awmtir ka duh lo bawk. I hrethiam maw?’

Dobbs-a chu hrethiam tih hriat takin a lo bu nghat nghat a. Zingah hma taka chhuah an ngaih thu inhrilh nawn lehin an inhmuhkhawmna chu an titawp ta a. Bunkhouse a an luh khawm pah chuan Sudden-a thu puan chu an chai zui luai luai a.

A tuk khaw en hnu lawk chuan kal an siam ṭan ta a. Sudden-a chuan Bawng rualte chu an mahni kal dan phung pangngai a khalh turin a hote hnenah kaihhruaina a lo pe lawk vek tawh a. Chumi zulzui chuan bawng zinga an hruaitu ber ‘Old Mossy’ an tih mai chu chhim lam panin tlang sang lam panna kawng hawi zawng chuan an thlem chhuak ta bur bur mai a. Green-a chuan tlang sang lama kurung kawng ṭum inherh chho lai, an kalkawnga kal harsa ber lai paltlang chu thil theih nimah se, hriat lawk loh hlauhawm tam tak tawh tur a awm tih a hriat avangin, an bawngte chu hahdam leh dinhmun ṭha thei ang bera chulai hmun thlen pui chu a duh a ni. Chutiang chuan an tluang angreng ta phian a. Mêl khat te te in buaina tawk lovin muangchangin an kal zel a. Mesa tlang bulṭhut chu an thleng phei thei ta mai a.

Tlangkar kurung (canyon) kalkhan inṭanna thlen hma mel tlemte an thlen chuan, Gimpy a chu a hma lama a ṭanhmun aṭang chuan a rawn inkhalh kir a. Chutah, Sudden-a chuan eitur lam buaipui tura chawlh a han rawt a. An chawchhumpa in a lo buatsaihsak tawh sa an chawfun te chu la chhuakin, tilum hran lem lovin ei turin an buatsaih mawlh mawlh hlawm a. Bawng rualte pawh lungawi hmel takin an chawl ṭhup a. Amaherawh chu, chulai awih tlan a han khalh chhoh chu a chakawm lem lo hle  a ni. 

‘An nelawm loh hlawm riu reu khawp mai’ tiin Gimpy-a chuan an hma lam kawngṭum chungchang chu a han hrilh hlawm a. ‘Hahchhiau palh hlek pawha rawn tla nghal rum rum thei tur awm takin an inchhawng iaih uaih hlawm mai. Mahse.. 'Jim, I sawi ang khan kan paltlang thei ang’ a han ti a.

Chu chanchin thar lawmawm angreng tak nen chuan, ei leh in lam an bei zo ta bawk a, an bawngrualte chu an chet chhuahpui ṭan leh ta a. Kalkhan (Pass) inṭanna chu an han thleng chho tan a. Gimpy-a sawi chu a lo dik chiah a. An lu chung lamah chuan a hma lawka Silver (Tangkarua) laitute’n lung an lo hal kehthem hrawl pui pui chu a rawn inchherchhuan thla thluah mai a. An ranrual pen nghawrah chuan lungthil te chu a rawn tla er er a, kawng ṭumah chuan a rawn insawh keh leh chuai ṭhin a, a khu rum rum mai bawk a. Slash 8 hnathawkte chuan chulai kham karcheh kawng ṭum an paltlang lai chuan a khawm thei ang bera ranrual chu kaltir tumin an theihtawp an chhuah a. Thingbuk hniam te te awmna an thleng phei a, tlangkar kawng bumboh angreng tak paltlang tur chu an hmaah a lo awm leh a. Chulai tlang kar kawng zim leh bumboh tak an kal lai chuan Cowboy ho chuan an mit lehlamin an ranrual khalh an vil a, lehlamin an chung lawka lung lum mai thei tur melh pahin inring em emin an awm reng mai a. 

‘Heng lung ho chuan min ti thlamuang lo mang e’ tiin Shorty-a chuan Dave-a chu a han hrilh sap a. ‘Lung sang tam inthuahthip kara inphumbo maithei reng kan niin ka hria.’

‘Thing te kha han dek la, I ngaih-ṭhatlohna chu a zia deuh mahna,’ Dave-a chuan a lo ti mai a.. ‘Thil ni lo lo kha ngaihtuah lo la. Chuti a nih loh chuan Bawngte chu sawi loh, keimahni ngei pawh hi awmze neilovin kan talbuai vak thei a nia. Eng pawh thleng thei reng a nih hi!’ a han ti leh a.

Ranrual hnukhawi lama awm Sudden-a pawh chu vaivut hak bawrh bawrh paha thupek chhakchhuakin a lo buai hle a. Chulai kurung bang sang lai chu buaina tawk lova an paltlang theih mai a lo rin rilruk lai chuan, inrinlawkna pawh awm lovin pistol vawi hnih a rawn puak ta ṭhuai ṭhuai a. Curt Parr-a lamah chuan rang takin a tlan phei a. A kuta puakruk la khu ngiai ngiai chu hrilhhai angreng deuha a lo en rengin a va hmu a.

‘Eng thil rapthlak nge tih I tum tak, Parr?’ Sudden-a chuan thinrim takin a ti chhum hmak a. ‘Tlang pumpui hi tih min vek I tum em ni ?’

‘Ka tihpalh takzet a ni, Green,’ Parr-a chuan a lo ti thuai thuai a. ‘Silai hi a paiah hian a tawt deuh a. Ka han phawi a, chutah a rawn per ta ringawt a lawm maw le. Engtin chiah nge a thlen theih ka hre bik lo.’

‘A nih chuan I silai kha I sakawr zin ipah khan khung nghal rawh’  Green-a chuan a lo ti hmak a. ‘Chuan, a thlen nawn tawh loh nan fimkhur hle ang che. A nih loh chuan he tlang hian a chhilh vek mai ang che !’

Chu Cowboy phakar tak insawifiahna chuan a hmin lo hle nain, tun atan chuan a lungawi rih phawt a ngai a ni. Parr-a chuan Slash 8 ranrualte chunga chhiatna thlentir duhna chhan engemaw a nei em niang aw? ‘A nih duh hmel viau mai,’ tiin Sudden-a chu amahin a han phun sap a. Ranrual chu hmalama kaltir zel turin thu a han pe pah a. Amah chuan Parr-a chiang taka hmuphak reng thei tur chuan a sakawr chu a kaltir zel a.  A lo rin ruk ang ngeiin Parr-a chu a sakawr aṭanga chhukin a va hmu a. A sakawr ke a lo en vel lai chuan a bulah a va thleng phei ta a.

‘Sakawr hi a ke a bai tlat mai, Ka tellovin in lo va kal zel ula a tha zawk ang. Ka lo umphak ve leh mai ang che u’ Parr-a chuan a lo ti a.

‘Chuang rawh. Kan en ang,’ tih chu Sudden-a chhanna a ni.

‘Engtizia nge, min ringhlel deuh em ni?’ tiin Parr-a chuan a han zawt leh khang khang a.

‘Chuang mai rawh !’ Sudden-a chuan a han tin nawn leh a, ‘Chuan, I sakawr kha heng ho lakah hian veng fimkhur tawh la’ tih pah chuan kawnga lung hriam tak tak let phung ho chu a han kawk a.

‘I tihdan kher kher chu awmzia a va nei . . .?’

‘Engmah chutiang a awm lo!’ tiin Sudden-a chuan a lo pawtchat leh hmiah a. ‘Thudik tak ka sawi mai a nih chu. Kan let leh hunah I duh tawkin I muangchang dawn nia. Tun atan chuan mi leh sa awm thei ang zawng zawng ka mamawh a ni. Ranrual kha khalh ṭha hle hle la. Buaina min thlen belh tawh suh ang che.’

A thusawi hnuhnung lam chu muangchang leh chiang kelhkawlh a sawi a ni bawk a, chu bakah chu Slash 8 daido pa in na zeta a melh reng na chu tuar ngam lovin, Parr-a chuan mitmeng ṭidai chungin muang-changin leilam a bih ta reng a. 

Tunah chuan chulai ruam kar pawh chu a lo inpharh zau ta hret a. Kalkhan (Pass) bulṭhut chu an va thleng phei a ni ta nghal mai bawk a. An hma lamah chuan Mesa hmar lam hawi zawngin tlang pawng leh awihtlan chu zawi zawiin a lo inpharh thla tawh a. An hma lawkah chuan khuavang ri kham sa ni awm tak, lung bangin a hual vel, mel khat bial vel tur lung hmun deuh reuh tlang bawk lian vak lo a lo awm a. Chu chu zan riahna atana hmun duhthusam niin, an bawng rual te pawh chu an chawlh khawmuan pui ta a. Slash 8 ho chuan an riah puan te la chhuakin, chaw ei khamah chuan thi ang derin an mu ta phung hlawm a.

A tuk leh zingah chuan kal an siam ṭan leh ta a. Chulai kawngṭum awih tlan thla a awlsam angreng taka ranrual an khalhthlak zel lai chuan an rilru te pawh chu a harh sawng sawng a. Sudden-a chuan an hma lama Gimpy-a’n nalh lutuk lem lova bawng khalh tuten bawng awih nana hla an sak thin, a sa ul ul ri chu a hre thei a. Parr-a pawh hmel tum burin midang te kiangah chuan ngawi rengin a kal ve hnu hnu zel a. Tunah chuan engmah buaina tawk lovin hma an sawn veleh hret hret a. Canyon (Kurung ka ti mai-MH) nelawm lo tak pawh an pel fel ta a. An hma ah chuan sakawr tawlailir kawng ṭum tluang pangngai zau hek hawk, South Bend lam kalna leh Thunder Mesa Mine (thil laihchhuahna)  panna chu a lo inpharh ta a.

Chulai kawng pengṭhuam an thlen chuan Gimpy-a chu mawhphurhna a han hlan a, Parr-a chu lo mitmei ṭha hle turin a han chah nghal bawk a. Chutah Sudden-a chuan Bawngrual kal mek hma lamah chuan a lo va tlan hmasa ta a. Mine khur bula Pat Newman-a office te fel renrawn, mahse changtlung angreng takah chuan lut pheiin Pat Newman-a chu va hmu ta a. Amah tlawh tupa a lo hmuh chuan Pat Newman a chu a lo meng zau kawk a. 

‘Kan indawrna sut turin em ni I lo kal?’ tiin Sudden-a chu a lo zawt a.

‘Teh nang. I tukverha dakchhuak turin ka rawn hrilh mai chauh che a ni e,’ tiin nui sangin a lo chhang a.

Newman-a chu chulai kawngṭum thlir theihna tukverh lamah chuan a inher vut a, hla vak lovah chuan Slash 8 mi te bawngrual khalhin an palkhûk vaivut khu par chhuang luih luih chu a han hmu a. Sudden-a lam chu a lo hawi leh a, a kut rawn phar chhuah pah chuan, ‘Kan inthapna ah chuan hnehtu I ni ta e’ a han ti a. ‘Ti rawh, huanga an khung vel lai chu I han thlir ve ang hmiang’

Pa pahnihte chu, thil laihchhuah sa (Ore) an thilfimna/thliar faina hmun, sipai riah buk (Barrack) ang maia an sak tlar thluahna sir a bawng huang bulah chuan an kal phei dun ta a. An kal pah chuan an kawng lo zawh thlen dante chu Sudden-a chuan Newman a chu a hrilh mawlh mawlh a. Bawng rual te chu Newman-a Foreman leh a ho te’n chhiar paha huang a an khung lai chu an lo thlir dun a. Khaw lum churh mai leh vaiut khu kara an hna hahthlak tak an thawh zawh chuan, Newman a chuan Sudden-a chu a Office lamah a sawm phei leh a. Slash 8 mi leh sate chu ei leh ina lo hrai puar turin Miner hote chu a han chah nghal a. An kir leh hma lawk chuan Sudden-a chuan Dave-a chu sir kil khatah chuan a pawt phei a. ‘Ei leh in lam in tih zawh veleh, lo kal la, min rawn hmu ang che. Tin, midangte pawh in inthunpuar fel hnuah haw nghal turin I hrilh anga. Kei chu Thunder Ravine kawng lamah ka rawn haw dawn thu I lo than kual dawn nia.’ a han ti a.

Dave-a hmel landan atang chuan chu a thupek dan chu mak a ti hle tih a lang thei a. Mahse, zawhna chhak chhuahna hun pawh pe tawh lovin Slash 8 Foreman chu a inher a, Newman a chu zawm turin a Office lamah chu a pan phei ta nghal a. Chutah chuan pa pahnihte chuan Mine a an chawchhumpa eisiam tui tak chuan an inhnangfak ve ta nghal a.

‘Hei chu in chhuang ve thawkhat ang maw, Slash 8 a kan ei ṭhin chu a tluk teuh hle mai’ tiin Sudden-a chuan a han thlir kual vel a.

 ‘Hei aia in bawl tui thei a nih te chuan, min sawm ve leh nghal law la la mawle’ tih pahin Newman a chu a lo nui a.

 ‘Sawm I ni e,’ Sudden-a chuan a lo ti ve mai a.

Thleng te chu sir lehlamah hnawlin, an sumdawnna lam hawi zawngin pa pahnihte chuan titi an vawr chho ta a. Newman a chuan Lehkhabu ah chuan ziakin a zat tur awm ang te chu a han chhut chhuak a. A belhkhawm na chu a mikhualpa chu a han hmuh ve a.

‘A zat ah hian I lungawi em, Mr. Green?

‘A nih mai hmel e a,’ Sudden-a chuan a lo ti sap a.. ‘A lu nung zanga chu pakhat dollar nga hisapin; chu chu dollar singhnih leh sangnga a nia.’

‘Ka bum leh bumloh che pawh I ngaihtuah chang tawh vak lo a ni maw,’

Newman-a chuan kutzungtang thliak meuhin, ‘Marty Black-a ka pek thin ang zat pawh min la zawt miah lo mai.’

‘Khai a,’ tih pahin Sudden-a chu a lo nui a. ‘Min lo bum ta ang la, ka hrechhuak leh dawn tho a. Chutiang thilah chuan dawhtheihna ka tlachham ve riau a nia.’

Newman-a chuan a mikhualpa kawng bawra silai pahnih fual hnalh a a pai chu a han thlek zawk a. Chutah, ‘Ka rin dan vel a ni,’ tiin a han phun sap a. ‘Kha kha ka leina tur zat chu a nia. Black-a ka laksakna ang zat chiah in a man chu I dawng dawn nia.’

‘Chutiang bak lo te chuan ka lo chhut bik hlei nem,’ Sudden-a chuan a lo ti ve mai a. ‘Ka hriatthiam loh tak chu, engtin nge hetianga dinhmun ṭha a khi lai tlang kalkhan paltlanga in rawn khalh thlen theih mai chu le tih hi a ni,’ tiin Newman-a chuan a lo zawt chik leh ta deuh a.

‘Kan rin aiin a lo awlsam a lawm maw le’ tiin Sudden-a chuan a lo chhang satliah mai a. ‘I duh leh ngaihven zawng a nih chuan pangngai taka in pe char char tawh turin indawrna mumal tak kan neih theih ka lo ring viau a sin’

‘Hei aia tlawm deuh hian min rawn pe thei lawm ni?’ tiin Newman-a chuan a han dil deuh a. ‘Kan senso hrim hrim hi tihhniam lam ka lo rilruk deuh a.’

‘Ruahtui hul tawh lamah thal laiin ti ila,’ Sudden-a chuan a lo ti a.. ‘Tun lai tak hi chu Bawng hralhna hun ṭha ber pawh a nih chiah loh hi a...’

‘Kan la sawi dun leh dawn nia,’ Newman-a chuan a lo ti a. ‘A man lamin a zir a, hetianga dinhmun tha a in rawn thlenpui zel theih dawn chuan, in bawng hi ka lei char char tawh ang’

Chutianga indawrna an han siamfel leh takah chuan pa pahnihte chu an han inchibai leh a. Newman-a chuan Safe (pawisa bawm thir rinawm taka siam) aṭangin ranrual man tur a tana an pek tur zat chu a han chhiar chhuak a. Dave-a a rawn kir a, midangte pawh an haw ṭan tawh thu a rawn hrilh lai chuan Sudden-a chuan lawmthu a lo sawi mek a. 

‘Thunder Ravine paltlanga rawn inkhalh haw I tum chu I ti tak tak chiah maw ?’ tiin Dave-a chuan a han zawt a. Sudden-a a lo buk nghat lai chuan chu Cowboy chuan rawl ring angreng deuhin, ‘Hetiang zat sum leh pai paipawn chung chuan, tawhsual tawh te pawh tawh palh hlauhawm tak a sin’ a han ti hluai a. Dawhkana pawisa Note intiang chu a han melh a. 

‘Keiman ka keng dawn hlei nem,’ tih pahin Sudden-a chu a lo ṭhen sak a. Dave-a’n a ngaihna hrelo hmel taka a lo en lai chuan a han hrilfiah chhunzawm a, ‘Nangma’n I keng dawn alawm, ka ṭhiankhamlawn thiampa. Tichuan, midangte nen a rualin in haw ang. Takin.. Parr-a kha eng tik lai khan nge haw tura a kal chhuah?’

‘Eng.. engtin nge I hriat a’ tiin Dave-a chuan makti takin a han zawt a. ‘A tha e, I tidik chiah, a ril a ṭam loh thu sawiin minute sawmhnih liamta khan a relh chhuak ta a nih kha.’

‘Ka ring reng a,’ Sudden-a chuan engto hmel vak lovin a lo tibauh va. 'Hei le – fimkhur pui viau ang che, nangni leh kei ang mi naran kum sawm lai hlawh zat zet a nih kha aw.’

Dave-a chuan a seh thut mai ang tih hlau niawm fahranin dawhkana pawisa Note tel intiang chhah fe chu a han en a.  Chutah fimkhur takin a han khawm a, a ipte ah chuan a khung ṭha ta vat a.

‘Remchang I zawng thiam ang reng hle mai. Chutiang chu a ni tiraw,’ thutak angreng deuhin a lo ti a..

‘Enga.. Lalnu ropui I rawk ve theih tum a ni dawn lawm ni?,’ Foreman chuan a lo ti a. ‘Uluk takin kawng kha en zel la, pangpar te kha thliak khawtlai mai mai suh ang che aw.’

Newman-a chu chung pa pahnihte inbiak dan vel a han hriat chuan a lo nui var var a. An inzah tawnna leh an inṭhian ṭhat em avanga chutiang fiamthu titak rawng kaia insawisakna tawngkam chu hmang niin an lang a. Mikhual naran lakah chutiang tawngkam chu hman nive ta se chu, boruak kal dan a danglam daih thei awm e.

‘Khang thil vel kha enge a awmzia min hrilh ve duh ang em?’ tiin Sudden-a chu a han zawt a.

‘Tehreng e a,’ tiin chu Slash 8 pa chuan a lo chhang a, ‘Shadow mi rawkrailo ho hlir hi vawiin thlengin hlimin an lo lam tawh ṭhin a, tunah pawh an rimawi te nen an lo inpuahchah viau tawh mai thei a. Mahse, tunah chuan Slash 8 lam kan lam hun a thleng ve ṭan dawn a ni’ a lo ti mai a.

Mine Manager nen chuan an han inchibai leh a. South Bend lam kawng ṭum zawh a Sudden-a a inkhalh liam hnu chuan, chu Sakawr chungchuang, pa sang thlerh thlawrh, darpharh hlai hlap mai kalna hnu tlang lam chu, Pat Newman a chuan a thlir zui zui vang vang a. A thutlukna lo siam tawh nemngheh na ni awm takin amahin a han bu leh nghat a, Chumi thla a thil lawmawm awm chhun tawng fuh tih hriat takin a office lamah chuan lungawi fe in a lut leh ta a.