Pu Tawma In-9

PU TAWMA LEHKHA THAWN 

Hotu tha tak leh awmna nuam tak a hmuh avangin Tawma chu a lawmin, vannei a inti hle a. Kawr leh puan tha tak tak a nei a, ei tur lah tha tawk tak a hmu bawk a, hna hahthlak pawh a thawk bawk lo va. A hnathawh ber chu Pu St Klera nupui lenchhuahpui a, sakawr tawlailir khalh a ni a. Ina a awm changin Ivi a awm thin a, Ivi chu a duh em em thin a. 

Pu St Klera chuan Tawma thatna leh tangkaizia a hrechhuak deuh deuh va. Pu St Klera chu pawisa lamah a fimkhur lo hle a, a tangka enkawtu ber lah chu fimkhur lo deuh mai a ni bawk a, a tangka chu a riral hle mai a. Pu Selbia khan Tawma hi a tangka enkawltuah a hmang a, a ring em em thin a. Tawma lah a rinawm kher bawk a, ama ta angin a ren thin a. A pu thar tangka a riralzia a hriatin pawi a ti hle a, a riral lohna a ngaihtuah a. Pu St Klera’n Tawma rinawmzia a hriat tak avangin a pawisa enkawltuah a siam ta a. Pu Selbia’n a rin angin a ring ve ta a ni. 

A pute duhsakna hmuin nuam takin a awm a, mahse inlam a ngaih a reh thei chuang lo va, a nupui leh a fate a ngai thei hle mai. Hun awl a ngah a, a hun awlah chuan Pathian Lehkhabu a chhiar thin a. Pathian Ni-in Tawma hmenah Ivi a kal thin a. Lehkhabu chhiarin, hlate an sa dun thin a, Pu Tawma chuian a awmna lam chanchinte a hrilh thin a, a in lam a ngaih pawh a nep sawt thin a. 

Mahse hum a lo rei deuh deuh va, a chhungte a ngai zual deuh deuh va, ''Lehkha thawn tur a ni e,” tiin a ngaihtuah a, lehkhathawn ziak a tum ta a. Pu Selbia hnena a awm lai khan an fapain lehkha ziakte a zirtir thin a, a thiam nial nual a, la theihnghilh a inring lo va. Ivi lehkha a dil a, pindanah lehkha ziak turin a lut ta a. Lunglehkhaah a ziak chhin a, hawrawp thenkhatte a lo theihnghilh nual tawh a, harsa a ti hle mai a. A hriat chhun leh a ziahthiam pawh chu hmanna tur a hre lo va. Ngun deuh maiin a ngaihtuah a, a lo ziah lai mek chuan Ivi a lo kal a, Pu Tawma hnung lam atangin a rawn en a, “E, Pu Tawm, eng thil mak tak nge i ziah le?” a ti a. Pu Tawma chu a mittuite a lo tla phung mai a lo ni a, a mittui te a hru a. “Ka chhungte lehkhathawn ziak ka tum a, ka puitlin dawn hauh lo mai a,” a ti a. Ivi chuan, “Ziakpui theih che ka va duh tehlul em! Ziak hi ka zir tawh a, mahse ka theihnghilh leh nual tawh a ni. Khawi nge, ka theihtawpin ka lo ziahpui ang che,” a ti a. An pahnih chuan ngun takin an ngaihtuah dun a, ziak an tum ta a. An thiam lo dun hle mai a, hawrawp mal malte chu a dik nge dik lo tiin an inrawn zel a. An han ziahfel hnu chuan lehkha ang awm hle in an hria a. Ivi chuan, “Pu Tawm, a mawi hle tawh a nia. In chhungte’n an hmuh hun chuan an lawm awm teh e. I chhungte I kalsan a, nangmaha I awm mai hi a pawi ngawt mai. I haw leh theihna ka ngaibtuah ang. Ka pa hnenah pawh ka la sawi ang,” a ti a. 

Tawma chuan, “Ka pi pawhin, ‘Tangka ka han khawl anga, ka khawl ngah hunah ka rawn lei leh ang che,” mi ti a. A fapa pawhin, “Ka rawn lam ang che,” mi ti bawk a, tangka pawh min awrhtir nghe nghe asin,” a ti a. Ivi chuan, “Chui chu a rawn lam leh ngei dawn che chu. A lawmawm ngei mai a!” a ti a. Tawma chuan, “Ka nupui hian min ngaihtuah em mai a, ka awmna te hrilh a, ngaihtuah tur ka nih lohzia hrilh ka duh a ni,” a ti a. Chutih lai tak chuan Pu St Kler-a a lo kal a, Tawma a rawn au va. Tawma leh Ivi chu an tho thuai a, Pu St Klera chuan an lunglehkha chu a han en a, “Hei, engnge ni ta!?” a ti a. Ivi chuan, “Pu Tawma lehkha thawn tur kan ziak a nih kha. A mawi I ti hle lawm ni?” a ti a. A pa chuan, “Keiman ka lo ziaksak ang e. Tawma, tawlailir han puahchah la, I leng teh ang, kan len hawnah ka ziak ang e,” a ti ta a. Ivi chuan, “Ka pa, Pu Tawma lehkha chu ziah ngei ngei tur a ni. A pite’n a awmna an hriat a tul a ni. An la rawn lam leh dawn a, an tiam diam nghe nghe a ni. Pu Tawmia’n tunah khan min hrilh a ni,” a ti a. Pu St Kler-a chuan a rilruin, ‘An tiam mai mai thin a, lei leh chu an tum tak takin ka ring lo. An nupui fanaute an thentir dawna an hnemna mai a ni ang e,” a ti a. Tawma chu tawlailir a puahchah tir a. 

An leng an hawn chuan lehkha chu a ziahsak a, Pu Tawma chuan hlim zetin dak lnah a thlak a.