Pu Tawma In-7

THIAN PAWL ZINGAH ELIZI-I A AWM

Tawma Leh a neitu tharte khawthlang lam pana an kal lai chuan Kanada ram lam panin Elizii te nufa chu an kal ve a. Kawnglak ah chuan mi ngilnei tak an tawk zel a. Khaw pakhat a va thleng a, chutah chuan ‘Thian Pawl’ invuah an awm a. Mi ngilnei, zaidam tak an ni a. An inchei dante a inang vek a. Puan var, uk deuh lam hi an sin a, an hmeichhiate chuan puan var lukhum hlai deuh an khum a. Bawih neih hi tha an tihzawng a ni lo va, thil sualah an ngai a. Bawih tlanbo apiang an tanpui zel thin a; an puih avangin hremte an tuar a, mahse an sim duh chuang lo va. Bawih tanpui chu danin sualah ngai mah sela, thil sualah an ngai ve thei lo. 

Thian Pawl zinga hmeichheho chuan Ellzi chu an duh hle mai a, an hnena awm ve rengah pawh an duh a. Thian Pawl zinga nu pakhat Rakheli chuan Elizii hnenah an zinga awm ve atan an duhzia te a hrilh a, Elizii chuan, “Ka awm ngam lo a ni. Zanah hian mut pawh ka mu tha thei lo va, ka muang thei mawlh lo mai. Ni zana ka mumangah phei chuan min umtu khan min rawn umpha nghal a,” a ti a. Rakheli chuan, “Ka fanu, chuti em chuan hlau ma ta che. Bawih chhuak kan khuaa an man leh reng reng an la awm ngai lo a ni,” a ti a. 

Chutih lai tak chuan Rakheli pasal Simeona a lo kal a, a nupui hnenah, “Lo kal teh, ka be duh lawk a che," a ti a. Rakheli chu a lo kal ta a. A pasal chuan, “Elizii pasal hetah hian a awm asin,” a ti a. Rakheli chuan lawm hmel pu zetin, “I ti taktak maw?!” a ti a. A paal chuan, “Ti tak tak e. Reilote ah hetah ngei hian a lo kal mai ang,” a ti a. Rakheli chu Elizii awmna lamah a kal leh a, chaw chhum inah a awm a ni a. Chaw chum in nena inzawm pindanah a lut a. “Ka fanu, lo kal teh, thil hrilh tur che ka nei e,” a ti a. Elizii chuan a hlau hle mai a, khur chungin a kal a. Sumeon-a pawh kha a lo awm ve a. Elizii hlsuhzia chu a hmu a. “Elizi, hlau suh. Thil tha a ni e,” a ti a. 

Rakheli chuan a khar a, Elizi-I kiangah a kal phei a, “Ka fanu, i chungah Lal’pa a tha em em mai. I pasal pawh a lo tlanchhuak ve tawh a, zaninah a lo thleng ang,” a ti a. Elizii chuan thu tam a sawi thei lo va, “Zaninah, zaninah,” a ti ringawt a. A awmna chu vir deuh muai muaiin a hria a. Rakheli lam hawiin a tlu ta a. Rakheli chuan a lo dawm a, dim tein a pawm a, khumah a mut ta a. 

An tlanbo tirh zan atang khan a mu tha thei tawh lo va. A mutchhuak a lo tawngkhawng bawk a, tui takin a muhil ta a. 

A mumangah chuan ram nuam tak, chawlhna ram hring nghual mai hi a hmu a. In nuam takah hian a fapa Hari-a nen hlimtakin an lo infiam a. Chu In chu an in niin a hria a. Chu mi inah chuan a pasal lo kal a, a pen rite hria a, an awmna lo thleng a, a kianga lo ding angin a hria a. Chutih lai tak chuan a han thangharh a, A mumang a lo ni lo va. A pasal chu a lokal tak tak a, a kiangah a lo thu reng tawh a lo ni a. Ni a tla tawh a, khawnvar an chhi tawh a, Reilo te chhung chu an hlim hle a.