Pu Tawma In-18

PU TAWMA’N ZALENNA A HMU 

Awfelin Pu Selbia nupui lehkha a thawn a, Pu Tawma hralh leh mai tur a ni tia a hrilhna kha dak lnah engemaw tiin an lo hreng tlai hle mai a, Pu Selbia nupuiin a hmuh hun lai chuan a pasal a na hle mai a. Chuvangin Tawma chu lainat hle mah se engmah a ti hlei thei lo va. Pu Selbia chu a thi leh ta nghal a. A nupui chu a lungngai em em mai a, nimahsela Pi Khlawii hnena Pu Tawma lei leh a tiam kha a theihnghilh lo va. Nikhua a lo rei deuh va, an ram thenkhat a hralh a. A fapa Zawra kha tangka a kentir a, Pu Tawma lei leh turin a kal ta a. 

Zawra chu Pu St Klera awmna khaw lamah a kal a. A va thlen chuan Legria’n a lei ta tih an lo hrilh a. Legria awmna chu hria reng an awm lo va. Zawra chuan a zawng a zawng a, thla engemawti hnuah chuan a awmna lam a hrechhuak a, chu mi lamah chuan a kal ta a. 

A thlen ni chu Tawma Legria’n a sawisak nek hlim chhawng a ni a. Legria inah chuan a kal a, Legria hnenah chuan, “Bawih pakhat, Tawma i lei an ti a. Ka pa bawih a ni thin a, lei leh tumin ka lo kal a ni,” a ti a. Legria chu a la thinrim hle mai a, hmai sen teuhvin, ‘'Lei phiangsen e mawle? Ka lei sual nasa ngei mai. Thu awih lo, hel hmang, misual tak a ni. Ka bawihte a tlan botir vei nen. Amah ngei pawhin a tlan botir tih chu a pha lo va. An tlan bona lam ka zawh leh, “Ka hre na a, ka sawi thei lo,” te a ti vel a. Ka vuak nek pawhin a sawi duh lo va, saw laiah sawn thih a tum a ni awm e. A thih pawh a thi a ni thei e,” a ti a. 

Zawra chu a thinur hle a, mahse engmah a sawi ta lo va, “Khawiah nge a awm, ka hmu duh a ni,” a ti a. A sakawr chelhtu naupang chuan, “Saw laia bukah sawn a ni,” tiin a lo kawhhmuh a. Zawra chu a kal thuai a, buk chu a va thleng a.

Pu Tawma chu lei chhuat, buhpawl phahah hian hian thi ang derin a lo mu a. A sirah a thingthi a, “Pu Tawm, Pu Tawm, meng la, vawi khat talin min han be leh the. I nau Zawra kha ka ni asin. Min hre lawm ni?“ a ti a. Pu Tawma chu a lo meng a, zawi tein, “Zawra, i ni maw? I ni tak alawm. Ka duhthusam ang a ni ta. Min la theihnghilh lo a ni maw? Ka thin a dam ta huai mai. Ka lawm ngei mai. Tunah chuan rilru nuam takin ka thi tawh ang,” a ti a Zawra chuan, “Thi love, Pu Tawm, i thih ka phal lo ve. Lei che tumin ka lo kal asin. Thih thu te chu sawi teh suh aw,” a ti a, a mittui a tla zawih zawih a. Pu Tawma chuan, “Zawrte, i tlai lutuk a ni. Lalpa'n min lei tawh a, min hruai dawn ta a ni,” a ti a. Zawra chuan, “Ni lo ve, Pu Tawm. Hetiang buk chhe tea heti fakauva hrehawm leh na a i awm hi ka lung a chhe em mai,” a ti a. Pu Tawma chuan Zawra kut a vuan a, “Zawrte, i mi han hmuh dan hi Khlawii zawng hrilh suh ang che, a rilru a hrehawm lutuk ang a, a tuar zo lo ang e. “Ropuina a lut turin a kal, tumah a nghak thei lo a ni e,”han ti ang che. Naupangho mawlh kha ka han ngaihtuah thin a, ka ngai hle thin a. Ka kalnaa lo kal ve turin han hrilh hlawm ang che. Ka pi leh pu te kha chibai min han buk la, mi dangte pavh kha ka han ngai hle thin asin," a ti a. A maimichhing a, hlim hmel pu tak chungin a muhil ta a. Pu Tawma chuan Zalenna a hmu ve ta a ni. 

Legria huan bulah chuan thingzar hnuai hmun tha tak a awm a, chutah chuan Zawra’n Pu Tawma thlan a lai a. A thlanah chuan lungphun pawh a inphun lo va. Lungphun a ngai lo ve, an phumna chu Lalpa’n a hria alawm. 

Pu Tawma thlanah chuan Zawra chu lungchhe takin a thingthi a, a kun a. “Aw Pathian duh tak, min ngaithla ang che. He ram bawih anchhia hi a bo theihna turin vawiin atangin ka theihtawpin ka bei ang,” a ti ta a.