Pu Tawma In-17

ZAWRA LEH ELIZI 

Thian Pawla mi pakhat ina khum nuam takah chuan Tawm Lawkara chu a let a let vel a. Thian Pawl pitar pakhatin a enkawl a. Tawm Lawkara chuan dam lova khuma mut reng chu a ning hle a, a puante a tlawh hlim a, tawng mawi lo tak takin a ang nuah nuah thin a. A enkawltu chuan a puante a siamfel sak a, a khuh tha leh thin a. ‘Hram tlahawlh lutuk teh suh khai, a mawi lo ve,” a ti thin a. Tawm Lawkara chuan, "A lum em mai a, hram tlakhawlh lohna rual a ni lo a nih hi,” a ti mai a. A han ngawi vang vang a, “Zawra leh Elizi kha hetah an la awm e?” a ti a, a enkawltu chuan, “La awm e ” a ti a. Tawm Lawkara chuan, “An theih anga rangin ral lehlamah kal sela a tha ang,” a ti a. A enkawltu chuan, “An kal dawn asin,” a ti a. Tawm Lawkara chuan, “Lawngah enthlatu tur kan ruat a nia, ka thianten min kalsan aiah kan thuruk ka hrilh ang che. Inchei danglam sela a tha ang. Lawng chhuahna tur khuaah vengtu kan ruat bawk a, mi eng ang nge an nih te kan hrilh a, an inchei danglam loh chuan an lo man mai ang," a ti a. A enkawltu chuan, “Ka lawm e, Tawm Lawkar, I tih ang chuan inchei danglam tur in ka hrilh ngei ang,” a ti a. Zawra leh Elizi chu a hrilh a, an lawm em em a. Tawm Lawkara an enkawl ta kha tihzia an ti hle mai a. 

Elizi chuan a lu a met a, mipa angin a inchei a. A pasal hnenah chuan, “Ka mawi hle lawm ni?” a ti a, a nui var var a. A pasaJ chuan, “Engti pawhin inchei la, i mawi zel ang chu,” a ti a. Elizii chuan, “I va hlim lo ve. Kanada chu ni khat kal chauh a ni tawh an ti a, kan thleng tep a ni tawh alawm. Ni khat leh zan khat lawngin kan kal ang a, kan thleng dawn a nih chu,” a ti a, a hlim hle a. Zawra chuan, "Kan hnaih tawh ngei mai. Kan zalen dawn tawh a ang hle mai. Zalen dawn aruaiah hian min man leh ta mai sela chu ka thi thei mai ang,” a ti a. Elizii chuan, “Hlau ma ta che, kan Lalpa'n min chhanchhuah a tum loh chuan heng thleng thlengin min hruai hleinang. Kan kianga awm zelin asin ka hriat, Zawra,” a ti a. Zawra chuan a nupui chu a fawp a, a thlamuang ve ta hle a. 

An thlen in nu khan Haria chu hmeichhia angin a chei a, ‘Hari-i’ an ti a. A nu hnenah an rawn hruai chuan a nu kha a hre lo tawp mai a, mi dang daih emaw a ti a, a kiangah pawh a kal duh lo va. Chutianga a hriat loh chu a tha a ni. A la naupang lutuk a, a nu kha hria se min an lo man phah zawk thei a. An thlen in Nu chu an zingah a kal a, Hari-a chu a pawm zel a. Zawra chuan lawnga kalna tur lehkha a la a, a laklai chuan mi pahnih inbia a hria a. Pa khat chuan, “Lawnga lo kal apiang hi ka lo en zel a, an la tel hauh lo mai,” a ti a. A thian chuan, “Hmeichhia chu mingo ang a ni a, mingo zawna i zawn loh chuan i hre lo vang. A pasal pawh a ngo hle a nia. A kutphahah ‘H’ ang taka ser a awm,” a ti a. Zawra chuan a kut chu a thukru deuh va, thiandun inbia te chu a en a. A hlau hle a, mahse a hmelah a tilang lo va. A lei zawh chuan Elizii-te awmna lamah a kal ve ta thuai a. 

Lawng chu a kal har an ti hle a, a kal hun an nghakhlel em em a. Reife hnuah chuan dar a ri a, an kal tan ta a. An kal ni chuan khua a tha kher mai. An kalna tui chu a mawi hle a, zankhuain an kal a, zing lamah chuan Kanada lampang an thleng ta a. An thlen dawn ruai chuan an nupain an in kaihkuah a, lawngah chuan an vei an vei a. Dar a ri leh a, lawng chu a ding ta a. Khawmualah chuan an penchhuak a, lawng chu a kir leh ta a. 

An lawm em em mai a, an lawm lutuk chu an mittui a tla zawih zawih mai a. An fapa chu a ban lehlamah an vuan a, an nupain an thingthi a, an tawngtai a. Zalenna ram an thleng a, an zalen ta a ni.