Pu Tawma In-16

PU TAWMA PU THAR 

Ivi a thih khan a chhungteho chu an lungngai hle a. Tunah zet chuan an lungngai mai pawh ni tawh lovin an thlaphang ta hle mai a.

An pu ngilnei tak chuan a thihsan ta si a, eng ang lekin nge an awm dawn tak an inngaihtuah a, an lungngai hle a. An hlauhthawn ang ngei chuan rei lo teah an chanchin tur an hre ta a. An pi chuan, “Ka hralh vek dawn che u a ni,” a ti a. A pasal a thih tawh avangin a nu leh pa hnena haw a tum a, bawih a duh tawh lo a ni. 

Pu Tawma chu a khawngaihthlak teh e. A tan chuan a lungngaihthlak lehzual ngei mai. Haw dawn a a inhriat avangin haw lam hlir a ngaihtuah a. Rei tak a thangbo hnuin a chhungte a hmu leh dawn a ni a, a rilruin a chhungte hlir a ngaihtuah tawh a. A ngaihtuahna zawng zawng chu a thlawn a lo ni dawn ta a. A pu ngilnei tak leh a zalenna chu a chan ta a ni. Haw tum nak alaiin a chhungte a hlat deuh deuh dawn ta zawk a ni. A ngaihtuahin a lungngai hle a, ‘I duhzawng tih ni rawh se,’ a han ti dawn a, a sawiin a sawi thei hlawl lo va, a hnuk a ulh teuh mai a. Beiseina pakhat a la nei a. A pi hnena sawi sak turin Awfeli tirh a tum ta a. 

Awfeli hnenah chuan, ‘‘Awfel, ka pu khan bawiha mi chhuah a tum a, lehkha pawh siam tan tawhin a lnsawi a. Ka pi hnenah hian min sawisak la, min ngaihtuah thei ang em? Kan pu duhzawng leh a tih tum a anih avangin a chhunzawm a duh ang chu maw?” a ti a. Awfeli chuan, “Tawma, ka’n sawi ange. Ka theihtawpin ka han sawisak ang che. Beisei zawng ka nei mang lo va, mahse ka han sawi teh reng ang e,” a ti a. 

Pu St Klera nupui hnenah chuan a han sawi a, Pu Tawma bawih a chhuah turin a dil a. Ani chuan, “Ka chhuah lo tawp ang. Tangka tam tak ka chan thei lo vang. Engnge maw zalenna te chu a han duh le?! Bawiha awm hi atan a tha zawk daih alawm,” a ti a. Awfeli chuan, “ZaIenna chu a duh em em a ni. A pu khan a lo tiam tawh bawk a,” a ti a. 

“A duh phei chu a duh ta ve ang. An duh theuh hlawm a, mi lung ni lo, mi vui thei, an nih loh ang nih duh mi an nih tlat vang a ni,” 

“ Tawma hi chu mi tha tak, hnathawktu tha tak a ni a. I hralh chuan hotu tha lo takin a lei mai thei asin,” 

Chutiangte chu ka awih lo tawp mai. Mite hi an sual an ti thin a, an ti mai mai a ni. Mitha tak an ni vek zawk,”

Awfeli chu a beidawng ta deuh va. I pasal khan a thih dawnin Tawma chhuah hi a thuro ohhiah pakhat a ni asin. Ivi hnenah pawh khan, “Ka chhuah ange,” tiin a tiam tawh a ni. I chhuah ngei tur niin ka hria,” a ti a. Pu St Klera nupui chu a tap a, “Tumah hi ka chunga tha leh ngilnei in awm lo a nih hi,” a ti a. Awfeli chuan sawi sei sawtin a hre ta lo va, a ngawihsan ta a. Pu Selbia nupui lehkha thawn a, Pu Tawma hralh tur a nihzia hrilh a tum ta zawk a. A chanchin an hriat chuan rawn lei an tumin a ring a.

Pu Tawma leh bawih dangte chu hralh turin dawrpuiah an hruai ta a. Dawrpuiah chuan hralh tur in an awm ta ran mai a. A leitu tur awmte chu Pu Tawma chuan a han thlir vel a, Pu St Klera anga mi tha leh ngilnei hmelpu a zawng a, mahse chutiang mi awm chu a hmu hauh Io va. Mipakhat, pa tawi deuh, hmelchhe deuh, kut bal deuh hian Pu Tawma awmna lam chu a rawn pan a. Tawma chu a han en a, A ka a keusak a, a hate a en a, a han a hmet bawk a. A tumin a zuantir a, Sakawr leh bawngte an lei dawna an en ang meuhvin a en vel a. 

Pu Tawma chuan a awm dan leh a tawng danah leh a han en vel danah chuan mi sual leh mi nunrawng a ni tih a hria a. “He mi hi ka pu ni suh se,” tiin a rilruin a tawngtai a. Mahse a pu tur a lo ni a. A hming chu Legria a ni a. Pu Tawma chu a lei a. Midarg tam fe leh hmeichhe pahnih a lei bawk a. Hmeichhe pakhat chu a la naupang deuh va, nu tel lova la tlahrang ngai lo a ni a. A pu chu a hlau hle a. Pakhat erawh chu upa lam tawh a ni. An pahnih chuan khaidiatin an thlung dun a. Mipa ho chu an kut leh ke-ah kawl an bun theuh va, lawngah a chuanpui ta hlawm a. 

Lawnga an kal chu an lungngai hle hlawm a. Tun tumah chuan Ivi ang an awm lo va, Pu St Klera ang an awm bawk si lo. Bawihho tan hlimna reng reng a awm lo. 

Legria chuan Tawma a lei veleh a thuam tha tha, Pu St Klera’n a pekte kha a laksak a, a thuam chhe ber a inbeltir a. A kawr tha deuh deuh chu mi hnenah a hralhsak a. Legria chuan a bawihte hlim lohna ngawt ngaihtiah ang hrimin a tinawmnahin a tihrehawm hle mai. Tiang hi a vai a, a vei thar thar a, “Ngui takin awm suh u, mi ngui hmel hmuh ka duh lo a ni, hlim takin awm rawh u” a ti thin a. 

Legria in chu lui atangin a hla lo hle mai a. Legria leh hmeichhe pahnih kha tawlailirin an lo kal a, mipate chu kein an kal a, an hah hle mai a. An ril te a tam a, an tuite a hal bawk si a. Rei fe hnuah Legria in chu an han thleng ta hlawl mai a. 

Legria chu Pu Selbia leh Pu St Klera te angin a tha ve lo va, mi nunrawng leh ergmah thiam nei lo ang a ni. La hmun a nei a, la parte chu a bawihte’n an en thin a. Legria in chu in tha tak a ni a, a neih hmain mi hausa pakhat In a ni a.Tunah chuan enkawl loh leh chei loh a ni a, a chhe hle tawh a. A in chu a chhe hle na a, bawihho awmna in nen chuan tehkhin rual a ni lo. Bawihho in chu thing in a ni a, a bang awngah te chuan ruahte a lut thei a. Tukverh pawh a awm lo va, a chhuat chu lei a ni a, bungraw dang pawh a awm lo va, buhphal chuah a awm a ni. 

Pu Tawma chu a hlim lo hle mai. Pindan te deuh, fai taka vawn theih tal neih a inring a, chutiang awzawng a lo nei thei lo va, pindan khatah mi pali panga te an awm a. Pu Tawma hrehawm ber lai a ni awm e. Bawihte chu zingah lo lamah an feh a, nilengin hna an thawk a. Legria leh a chhiahhlawh hotu pahnih Kumbova leh Sambova te chu tiang kengin an vei reng a. Zanah in lamah an hawng a, anmahni rawng an han inbawl chawp leh a. An hah tehlul nen, buhpawl chungah an mu hahdam thin a. Ni tin chutiang hlir chuan an khawsa a ni. 

Tukkhat chu Pu Tawma kiangah hmeichhe pakhat a lo kal a, Hna thawhna ah a tel ve ngai lo va. Nu sang deuh, hmeltha deuh tak, mingo ni mai awm a ni a. Pu Tawma chuan tunge a nih a, khawilam atanga lo kal nge a nih a hre lo va. Mahse mitha zinga awm thin a nih avangin michhia Ieh tha chu an hmelah a hria a. Tawma chuan hnathawh pahin a han en thin a, hmeichhia chuan la par chu a lawr rang hle mai a. Tawma ruala lei, hmeichhe pakhat pawh kha an kiangah chuan a awm ve a. A chau hle mai a, mi hriat tham hialin a tawngtai chhuak a, a khur thin a. Tawma chu a kiangah a lo kal a, a la par lawrsa chu pitar phurah a dah a. Pitar chuan, “Khatiangin ti teh suh aw, i tan thatlohna a awm mai ang,” a ti a. 

An lapar lawr chu zantin an buk a, a lawr tlem apiang an vaw nek thin a. Tawma chuan pitar chu a rawn pek belh leh a. Pitar chuan, “Min han pe min han pe suh ka ti. An tih dan tur che i hrelo a nih hi,” a ti a. Tavma chuan, “Zingtin pawh min ti se, nangai chuan ka tuar thei zawk ang,” a ti a. Nula sang deuh khan a lo hria a, a lawr sa chu a tham teuh va, Tawma phurah a dah ve thung a. “Henglai mi awm dan hi i hre lo a nih hi, hria la chuan hetiangin i ti lo vang. I awm rei deuh hunah mite tanpui i peih lo mai ang. Mite tanpui hman a ni lo va, mahni inven ngawt a tul mai a ni,” a ti a. An pahnihin pitar chu an tanpui a, a phur a khat ta a, hrem pawh a pumpelh tawhin an ring a. An tanpui lai chu Sambova’n a lo hmu reng a, Legria hnenah a sawi a. Legria chu mi nunrawng a ni a, in tanpui pawh a lawmlo a ni. 

Sambova leh Kumbova hi bawih an ni a, mahni bawihpui chungah chuan ngilnei awm tak an ni a, mahse chutiang an ni hauhlo mai. Misual tak an ni a, an sual avangin Legria hian bawih dangte vengtu leh enthlatu ah a hmang a ni. Pu Tawma hi a chak a, a len avangin Legria hian a lei a ni. Sual sela chu hotu tha tak a ni ang a ti rilru a. Tawma chuan mi ngilnei tak, zaidam tak a lo ni si a, Legria chu a haw ta hle zawk a. Pitar an puih zan khan pitar phur chu midang phur ang bawkin khat ve mah se, Legria chuan ‘A tam tawk lo’ a ti lui tlat a. “A thatchhiat aiah vuak tur a ni,” tiin Tawma chu a tir a, Tawma chuan, “Ka pu, min ngaithiam rawh, chutiang zawng min tihtir suh, ka tih duhzawng a ni lo ve," a ti a. Legria chuan Tawma chu a vin a, thinrim zetin, “Enga ni? Ka vaw thei lovang i ti vei maw?” a ti that that a. Tawma chuan, “Ni e, Ka vaw thei lovang. Nileng leh zankhuaa hnathawh tur i tih chuan ka thawk ang, ka dam chhung chu ka thawk ang. I mi tihtir tum hi zawng a dikin ka hre lo ve, ka pu,” a ti a. Tawma chuan chutiang a sawi lai chuan zaidam tak leh hawihhawm tak zelin a sawi a. Legria chuan a zaidam leh hawihhawmna chu a dawih vang emaw a ti a, a thin a ur hle mai a, a tawng hlei thei lo va. “A dik lo, te i han ti ngam vei maw ?” a ti ngal ngal mai a. Tawma chuan, “A dik lovin ka ring a ni. He pitar hi a hriselna pawh a tha lo va, a chak lo a ni a. Han vuak chu a nunchhiatthlak hlein ka hria a, ka vaw hauh lo vang. Ka pu, min tihhlum i duh chuan min tihlum mai rawh. Heng kan zinga mi vuak ai chuan thih pawh ka duh zawk a ni," a ti a. 

Legria chuan, “Tehlul vei che chuan, mitha anga lan i han tum vei a. I Pathian Lehkhabuah “Chhiahhlawhte u, inhotute thu awih rawh u,” tih I chhiar ngailo vem ni? I hotu ka ni lovem ni? I thlarayu leh i taksa hi ka ta a ni lo vem ni?” a ti a. Tawma chuan lawm tak hmel puin, “Ni lo ve, ka Thlarau chu i ta a ni lo. I lei a ni lo va, i lei thei lovang. A vawng theituin a lei tawh a, a man a pe tawh asin. Min tina thei lovang,” a ti a. Legria chuan, “Ka thhei lovang maw? Kan la hria ang chu. Sambo, Kumbo, thlakhat chhunga a theihnghilh loh tur khawpin han sawisa teh u,” a ti a. Pitar chu a tap a, Sambova leh Kumbova chuan Tawma chu an hruai ta a. 

Nula sang deuh, Tawma nena thawk dun kha a hming chu Kasii a ni a. A pa chu mingo a ni a, a nu erawh chu mihang a ni a. A pa’n mi tha khawsak dan angin a lo enkawl a. A pa a thi thut a, bawihah an hralh a ni. Legria khan a lei a; bawihah a nei tak nang a, a hlau deuh hle a. Mitha pangngai a ni tawh tih a hria a, lovah pawh a fehtir ngai lo va. Nikhat kha a thawh theihzia entir nan ama thuin a thawk ve mai a ni. 

Tawma chu buk chhe zetah na tuarin a rum a. Zan reh deuhvah a awmna buk kawngkhar chu min an rawn hawng a, mi pakhat a lo lut a. Pu Tawma chuan, “Tunge ni? Khawngaih takin tui min han tulh teh aw,” a lo ti a. Mi lokal chu Kasii a ni a, Tawma chu tui a tulh a, a mutnate a siamthat sak a. Tawma chuan, “Ka pi, ka lawm e,” a ti a. Kasii chuan, “Ka pi min ti suh. Nangmah ang bawka bawih rethei ka nih hi. I huai hle mai, mahse engmah a sawt chuang lo vang. Legri thu thu a ni mai a, I tih dan hi sim zawk mai rawh,“ a ti a. Pu Tawma chuan, “Engtin nge ka sim theih ang?” a ti a. 

Kasii chu Tawma bulah reife a thu a, ama chanchinte a hrilh a, a retheihzia te a hrilh a. Legria nunrawnzia leh a huatzia te pawh a hnlh a. Tawma chuan Kasii chu thlamuan a tum a. Kasii a ngaihtuah avang chuan a natna pawh chu a hre chang lo zawk a. Kasii’n a hawsan hnu chuan Pu Tawma chu a hlim hle . Hun thim berah pawh thian pakhat mah nei lovin Pathianin a dah lo tih a hria. Kasii chu Tawma chungah a tha hle a. Legria hnenah pawh Tawma chu a theih angin a chhan thin a. Tavma a lei ruala a lei bawk nula pakhat Emmelini chungah pawh Kasii hi a tha hle a. Emalini leh Kasii chu Legria inah an awm a, bawih dang zawng chu ah an awm ve lo va. 

Zan khat chu Pu Tawma muhil a thangharh a, a kiangah chuan Kasii a lo ding reng a. Kasii chuan, “Pu Tawm, Legria a rui a, a muhil der mai a, a la harh lawk lo vang. Awlsam takin i that mai thei ang. I thah chuan kan zavaiin kan zalen dawn a ni,” a ti a. Pu Tawma chuan, “Ni lo ve, chutiang tur a ni hleinem. Thil sual atangin thil tha a chhuak ngai lo ve. Ka that thei lo vang,” a ti a. Kasii chuan, “Anih leh keiman ka that ang,” a ti a, kal a tum a. Pu Tawma chuan a dawm a, that lo tura thu a tiam hma chu a thlah duh lo va. “Kasi, mi thah zawng thil sual nasa tak mai a ni a. Legria a sual hle a vangin keini kan sual ve kher tur a ni lo,” a ti a. Kasi chuan that lo turin thu a tiam ta a. Pu Tawma chuan, “Emmelini nen hian tlanbo thei ula chu tlanbo mai turin ka fuih zawk a che u. Mi that lova in tlanchhuah theih chuan tlanbo rawh u. Mi erawh chu that suh u,” a ti a. Kasi chuan, “Pu Tawm, i tlanbo tlang ang u hmiang,” a ti a. Pu Tawma chuan, “Ni lo ve. Nangni erawh chu in theih chuan tlanbo rawh u. Keizawng tlanbo lo ve,” a ti a. Kasi chuan, “Tlanbo kan tum ang,” a ti a. Pu Tawma chuan, “Amen, Pathianin tanpui che u rawh se ” a ti a. 

Legria ram atangin bawih pakhat mah an la tlanchhuak hlen ngai lo va, tlanbo tum te chu an awm tawh thin a, mahse an man leh a, nasa takin an hrem thin a. Kasi chu a fing hle a, Legria man theih hauh loh turin an ngaihthuah chhuak a, an tlanbo ta a. 

Legria’n an tlan bo tih a hriat chuan a thinur hle a, man leh theih loh a inring lo va, mi dangte a man leh thin angin man leh mai a inring a. A bawih te leh a ui sathiamte a han khawm a, an zawng ta a. Elizi te zawngtu ai kha chuan an tam a, an zawng nasa zawk a, khawnvar nen an zawng mur mur a. Kasii leh Emmelini chu an man theih lohna tur an thleng tawh a, nasa taka an zawn hnuah an bei a dawng a, zawn ngaihna an hre ta lo va. 

A zawng tura Legria kal chhuak chu a thinur hle a, beidawnga a lo haw leh chu a puakkeh lek lek tawh mai a. Pu Tawma chuan an tlanna lamte hriain a ring a, zawh chhuah a tum a. Legria chuan a ring dik hle a. Tawma chuan a hre ngei mai a, amaherawhchu zawh chhuah a tum chu a hlawhtling dawn lo a ni. Tawma chuan a sawi duh tlat lo mai a. Tawma hnenah chuan, Thah che ka tum a ni tih I hria em?” a ti a. Tawma chuan hlau hauh lovin, “A tum pawh i tum ta ve ang,” a ti a. Legria chuan, “Hmeichhe pahnih tlan bo tate awmna min hrilh loh chuan ka tum taktak a ni,” a ti a. Tawma chuan muang takin, “Engmah hrilh tur che ka nei lo ve,” a ti a. Legria chuan, “Ka hre lo, i ti ngam maw?!” a ti a. Tawma chuan, “Hriat chu ka hria a, mahse ka sawi thei lo,” a ti a. An pahnih chuan an ngawi dun vang vang a, Legria chuan Pu Tawma chu a vaw thlu der mai a, engmah hre lovin chhuatlaiah a lum reng a.