Pu Tawma In-15

Ivi’n a chhungte a thlah

Ivi chu a lo na zual deuh deuh va, nidang angin a infiam peih tawh lo va. Ama pindanah a awm nileng ṭhin a. A natzia chu hai rual a ni tawh lo va.

Mitinin an hmangaih a, an tih theih zawng chu tihsak an châk ṭheuh va. Tawpsi takngial pawhin pangpar a rawn Iaksak a, a chungah ṭhat a tum hle a. Pu Tawma lek phei chu Ivi pindanah a awm reng tih theih a ni. Ivi chu achangin a awm hle hle thei lo va, puakte a châk ṭhin a. Tawma chuan zo takin a paw ṭhin a, a puak chu nuam a ti hle a. Tawma chuan huanah te a lenpui a, a dam laia an thutna ṭhin ahte khan a thutpui a, hlate a sak sak a. A tih ve theih zawng a ni a, Ivi puak chu a châk hle mai a, a bulah a awm reng ṭhin a. Ivi nat zual deuh chin chu a pindanah pawh a mu ngai lo va, a pi (Ivi) kawngkhar bulah chuan pher a phah a, a mu ṭhin a. 

Nikhat chu Ivi’n a sam a ni Awfeli a hlehtir a, an bawihte a ko khawm a, ‘Min hriatreng nan’ tiin a sam chu a pe ṭheuh hlawm a. Bawihho chu an lung a chhia a, an ṭap ṭheuh hlawm a. “Kan hrereng ang che. Nangmah avangin kan theih anga thain awm kan tum ang,” an ti hlawm a. 

Chu mi hnu rei lote ah chuan Awfeli chu pindan atangin a lo chhuak a, “Tawma, rang takin daktawr va ko rawh,” a rawn ti a. Tawma chu a theih anga chakin i tlan a. Zing lamah chuan Ivi chu a thi a, a khumah an zalh a. Pathian hnenah a kai ta a ni. 

A pa chu a lung a chhe hle mai a, a hlim thei lo va, Ivi chu a duh em em a, a tel lo chuan kim lo a inti em em a. ‘Tawma hi bawihah rawn chhuah ang che’ a ti a, chhuah a tiam kha a hrereng a, chhuah ngei pawh a tum a. Dan hre mite hnenah a kal a, Tawma chhuahna tur a ngaihtuah a. Dan ang taka bawih chhuah chu a harsa hle a, vawi leh khata han tih theih mai a ni lo va. 

Ni khat chu Pu St. Klera’n Tawma hnenah, "Tawma, bawihah ka chhuah dawn che a, i thuamte lo tel lawk la, kal lo inpeih sa diamin awm ang che,” a ti a. Tawma chu a lawm em em mai a, a hmelah pawh a lawmzia chu a lang a. “Lalpa chu fakin awm rawh se,” a ti a, a ban a phar a. Pu St. Klera chu a lawm lo deuh va. Chuti taka chhuah Tawma’n a châk chu a ngaithiam mang lo va. 

“Tawma, he laia i awm chhungin hrehawm pawh-in i awm si lo va, chuti fakauva han lawm tur chu em ni le?” a ti a Tawma chuan, “Ka pu, chutianga ngaih tur a ni lo ve. Zalen a ka awm dawn avangin ka hlim a ni zawk e,” a ti a. A pu chuan, “I awmdan pangngaia I awm hian I tan a nuam zawk a ni Iawm ni, Tawma?” a ti a. Tawma chuan, "Hnai lo ve, ka pu. Nuam zawk awkawng lo mai," a ti a. A pu chuan, “Pindan te, i silhfen te leh i ei leh bar tur ka pek ang hi nangmah chuan i nei thei kher nang,” a ti a. Tawma chuan, “Nei thei hauh lo vang. Mahse kapu, mi dang ta ṭha tak inbel a, mi ta tui tak tak ai chuan mahni ta chhe deuh deuh inbel a, mahni ta tui lo deuhte pawh ei ila ka duh zawk a ni. Chu chu ka ngaihdan a ni a, mihring awm dan niin ka ring,” a ti a. A pu chuan, “A ni ta ve ang. Thla hnih khat hnuah min hawnsan mai dawn a ni a, I haw lohna chhan tur a awm lo ve,” a ti a. Tawma chuan, “Ka pi, I mangan chhung chu ka hawng lo vang. Ka tanpui theih dawn che chuan i duh chen chen ka awm ang,” a ti a. A pu chuan, “Ka mangan chhung i awm chuan engtikah nge ka mangan a reh ang le?” a ti a. Tukverhah a dak a, Tawma kokiah a vuan a. “Tawma, ka nau, ka chelh lovang che. I nupui fanaute hnenah haw la, an za vaiin chibai mi han buk ang che,” a ti a.

Chutih lai chuan Awfeli a lo lut a, “Tawpsi chungchang thu hi sawipui che ka duh a ni,” a rawn ti a. Pu St. Klera chuan, “Engati nge, eng nge a tihsual leh tak Ie?” a ti a. Awfeli chuan, “Engmah a tisual lo. Tunlai phei hi chuan a ṭha hle tawh asin. Tawpsi hi tu bawih nge? I bawih nge ka bawih?" a ti a. St. Klera chuan, “Ka pe tawh che alawm,” a lo ti a. Awteli chuan, ‘‘Ṭawngka maiin min pe a, dan angin min la pe hleinem. Bawiha hralh leh theih mai a nih zawngin Kristian ni tura zirtir pawh hi a sawt lo ve. Mi pe phal takmeuh a nih chuan dan angin lehkha ziak meuhvin mi pe rawh khai,” a ti a. Pu St. Klera chu fiamthu duh mi tak a nia, Awfeii chu a fiam a. "Bawih neih hi sualthlak i ti a, tunah bawih neih i duh ta a ni maw?” a ti a. Awfeli chuan a tur chhên avangin lehkha a ziak a, hretute neiin Tawpsi chu Awfeli a pe ta a. 

Pu Tawma bawih chhuahna tur chu an la siam lo va. Zan khat chu Pu St.. Klera a lêng chhuak a, a lenna lamah chuan mi an lo insual a, thelh a tum a, amah chu chem zumin an chiu vak mai a, thichhawngin an zawn haw a. Daktawr an ko va, a pem chu a tuamsak a, mahse a hliam a nat em avangin a tuar zo lo ta a, rei lo te ah a thi ta a.