Pu Tawma In-14

IVI LEH TAWPSI

Kum hnih kum thum a lo ral a, Pu Tawma chu Pu St. Klera te hnenah a la awm ta reng a. An khaw lam pawh ala hnaih chuang lo va. A awmnaah chuan a hlim bawk nain, a nupui fanaute a ngai thei hle ṭhin a. 

Lungngaihna a lo nei ṭan leh ta a. A pi Ivi chu a duh em em mai a, a hlim chhan ber a ni a. Ivi chu a dam lo zeuh zeuh ṭhin a, a lo na zual tan ta hle mai a. Tawma chuan cher deuh deuh leh dang deuh hret hret a a hmuh avangin a lungngai tan hle a. Tun hma lam angin Ivi chu a infiam peih tawh lo va, a awm mai mai pawh hah hliah hliahin a inhria a. Awfeli pavhin a chhe sawt tih a hria a, Pu Klera pawh a hrilh hial a. Pu St.. Klera erawh chuan a fanu chu a duh em avangin a natna Iam chu a ngaihtuah duh lo va, a chhiat sawtzia pawh a hmu phal lo va. A nu erawh chuan amah chauh lo chu midang na ve thei pawhin a ring lo va. Ivi chu a cher deuh deuh va, Awfeli leh Tawma chu an lungngai deuh deuh va. Pu St. Klera pawh chuan a lo hmuchhuak ve ta a, daktawr an ko ta hial a. 

Hapta hnih chinah chuan a lo ṭha leh deuh va, infiam te a lo peih leh ta deuh a, a nui ri an hre leh ta a. A pa chu a hlim em em mai a, Awfeli leh daktawr erawh chuan a ṭha hlen dawn lo tih an hria a, an lungngai lo chuang lo va. Ivi pawhin dam hlen tur a ni lo tih a inhria a, mahse a lungngai chuang lo. Pathian hnenah a kal dawn tih a inhriat avangin. 

Ni khat chu a pa hnenah, “Ka pa, thil thenkhat hrilh che ka duh a, ka sawi theih lai hian hrilh che ka duh a ni,” a ti a. A pa malchungah a thu a, a awm a ngheng a. “Ka pa, zêp pawh a tulin ka hre tawh lo ve. Ka kalsan hun che a lo thleng dawn tawh a, Iokir leh hauh lo turin ka kalsan dawn che u a ni,” a ti a. A pa chuan, “Bawihte, chutiangin an ngaihtuah ngai lo ve. I ṭha leh tawh alawm,” a ti a. Ivi chuan, “Ka ṭha chuang lo tawp mai. Ka hrechiang a ni. Ka kal thuai tawh dawn a ni,” a ti a. A pa tawng ve hmain a sawi zawm leh a. “Kal chu ka duh a, mahse kalsan che u ka hreh em a ni. Ka lungngai mang e,” a ti a. A pa chuan, "Chutiang lam thu zawng sawi lul suh. Engah nge I lungngaih em em le?” a ti a. Ivi chuan, “Kan mite hi ka ngaihtuahin ka lungngai a ni. Ka pa, bawihah hian chhuak vek se ka ti a ni. Bawih zawng zawng hi chhuah dan hi a awm lawm ni?”a ti a. A pa chuan, “Thil harsa tak a ni. Bawih neih hi tihdan ṭha lo tak zawng a ni ngei mai a. Mi tam takin ṭha an ti lo va, kei ngei pawhin ṭha ka ti lo a ni. Kan ramah hian bawih hi awm hauh lo se ka duh a, mahse han tihbo ngaihna hi a awm mang hrih lo a ni,” a ti a. Ivi chuan, “Ka pa, mi ṭha tak, ngilnei tak ini a. Mi hnenah te lêng la, bawih chhuah turin thlem la, in tithei mai lawm ni? Ka thih hnuah pawh min han hrereng la, keimah avang talin bawih chhuah turin han bei zui ang che," a ti a. A pa chuan, “Thih hun tur te chu sawi teh suh aw,” a ti a. Ivi chuan, “Ka pa, ka thih hunah chuan Pu Tawma tal hi bawih ata chhuah turin min tiam rawh,” a ti a. A pa chuan, ‘‘Bawihte, i duh ang chu engpawh ka ti ang. Thih thu zawng ngaihtuah tawh suh,” a ti a. 

Chutia an inbiak lai chuan Awfeli pindanah chuan an bengchheng ta hlut a. Awfeli chuan Tawpsi a rawn kai a, “Lokal rawh. I pu kan hrilh tur a ni,” a ti a. Pu St. Klera chuan, “Eng nge ni ta,” a lo ti a. Awfeli chuan, “Eng dang nge ni ang? He nau hi ka kawl thei ngang lo a ni. Ka inkhawm hlanin hla lo zir rawh ka ti a, kawng ka kalh khum a. Hla zir a hnekin ka chabi dah a lo la a, ka kawr dahna thingrem a lo hawng a, ka puanthate nau lem siamnan a lo pawt thler a. Hetiang mi reng reng ka la hmu ngai lo ve. A tihngaihna ka hre ta lo. Ka zirtir ka zirtir pawhin engmah a sawt chuang lo. Ka kham hlui in ka tawng a, ka vuaknek pawhin a sawt chuang si lo. Hrem dan dang dang pawhin ka hrem a, a sual ngaiin a sual reng mai si,” a ti a. Pu St. Klera chuan, “Zawngi, lo haw the,“ a ti a. Tawpsi chuan a va pan a, “Engah nge I sual hle?” a lo ti a. Tawpsi awmzia a enin a nuih a za rilru hle a. Tawpsi chuan, “Ka rilru sual vang a niin ka ring, Awfeli pawhin ka rilru sual vang a ni ang a ti a lawm,” a ti a. Pu St. Klera chuan, “Awfeli’n i tana ṭha tur a tih nasatzia hi i hre !o em ni?” a ti a. Tawpsi chuan, “Ka pu, ka pi hlui pawhin chutiang chuan a ti bawk ṭhin asin. Ani min vuak chu a na deuh va. Ka sam te a pawt a, ka luin kawngkharte a nawr ri bur bur ṭhin. Mahse ka ṭhat phah chuang lo. Ka lu hi pawt kawlh vek mah se, ka thatphah chuangin ka ring lo. Ka sual em a, mihâng sual ka ni reng mai dawn a ni,” a ti a. Awfeli chuan, “Ka enkawl lo mai ang, ka intibuai thlawn peih lo ve?” a ti a. Ivi chuan ngawi rengin a lo ngaithla a. Tawpsi chu a banah a kai a, a awmna kiang pindanah a luhpui a. “Tawpsi, engahnge I sual hle, engah nge ṭhat i tum loh? Tumah hmangaih i nei lovem ni,” a ti a. Tawpsi chuan, “Hmangaih thu ka hre lo. Fu hi ka duh hle a, ka hmangaih a nih leh a ni ang a, chuti mai chu a ni,” a ti a. Ivi chuan, “I nu leh i pa i hmangaih lavm ni?” a ti a. Tawpsi chuan, “Nu leh pa ka nei lo, ka hrilh tawh nghe nghe che kha,” a ti a. Ivi chuan, “Ka theihnghilh a ni. Unau te, nite pawh i nei lo maw?” a ti a. Tawpsi chuan, “Nei lo, engmah ka nei lo,” a ti a. Ivi chuan, “Tawpsi, ṭhat i tum phawt chuan.... ” a ti hman chauh va, Tawpsi chuan, “Eng ang pawhin ṭhat tum mah ila, mihâng ka ni tho tho mai. Ka vun hi lip ila, vun ngo pu dawn ila zawng ṭhat pawh ka tum tur a ni a,”’ a ti a. Ivi chuan, “Mihâng pawh ni la, mi’n an hmangaih thei tho ang che. I ṭhat phawt chuan Awfeli pawhin a hmangaih ang che," a ti a. Tawpsi chuan a ring lo nasa a khawp a, a nui mai a. Ivi chuan, "I ring nange?" a ti a. Tawpsi chuan, “Ring lo, mihâng ka nih avangin min duh lo. Keimah ang khawih ai chuan uṭawk khawihte pawh an duh zawk ang. Mihângte chu tuma'n an duh lo. Mihângin engmah an ti thei lo. Pawi ka ti lo ve,” a ti a, a pawi tih lohzia entir nan a faifuk a.

Ivi chuan Tawpsi-I kokiah a vuan a, “Tawpsi, ka hmangaih che asin. Nu leh pa leh ṭhian pawh i neih loh avangin mite’n an tiduhdah che a ni. Ka hmangaih che a, mi ṭha I nih ka duh a ni. Sual taka i awm hian pawi ka ti a, ka lungngai a ni. Rei lote-ah ka thi dawn a, keimah avang talin ṭhat tum la ka duh a ni. Kei zawng hetah ka awm rei tawh dawn lo asin,” a ti a. Tawpsi mittui chu a tla ta zawih zawih mai a. Mi'n an hmangaih thei a ni tih a ring ta a. A kimki a, a ṭapchhuak ta a. “lvi, ṭhat ka tum tawh ang, ka tum ngei ngei ang. Tun hma khan ka tum ngai lo a ni,” a ti ta a.