Pu Tawma In-13

TAWPSI

Tuk khat chu Awfeli buai lai tak hi Pu St. Klera’n a han au va. “Lo chhuak teh, engemaw entir tur che ka nei e,” a ti a. Awfeli chuan, “Enge ni a?” a ti a. Pu St. Klera chuan, “Engemaw ka rawn lei che a, enteh hei,” a ti a. Mihâng hmeichhe naupang kum riat mi awm hi a kai chhuak a. A hang khawp mai a, a mit chu a var ra mai a. A sam chu a inhlawm hrang hil hel a, a kawh sing serg hlawm a. A puan chu a chhiain a bal hle bawk a. Awfeli chuan, “Hetianga chhia leh bal hi ka la hmu ngai lo,” a ti hial a. Pu St. Klera hnenah, “Engah nge maw hetiang te i han hruai le?' a ti a. Pu St. Klera chuan nuichungin, “I zirtir atan mawle,” a ti a. Tawpsii hnenah chuan, “Hei hi i pi thar tur a nih hi. Tha takin awm ang che,” a ti a. Tawpsii chuan, “Aw ka pu,” a ti a, a meng kal mai a. Awfeli chuan, “Engah nge maw heng ang te hi i tih le? Hetiang chu i ngah tawh a, I in an khat tawh alawm. Kawngkhar bulah te, dawhkan hnuaiah te, chhuatlaiah te, chaw chhum inah te pawh an mu thliah thluah hlawm a. Engah nge i la zawn belh fo le?” a ti a. Pu St. Klera chuan, “I zirtir atan ka tih chu maw le,” a ti a. Awfeli chuan, “Ka duh awzawng lo mai. I neihsa pawh hi a tawk lutuk tawk a ni,” a ti a. Pu St. Klera chuan Tawpsi hriat lohva Awfeli hrilh a duh a, Awfeli chu a han kal hranpui deuh va, “Tihtak zetah chuan a neitute hian an tiduhdahin an vel reng reng mai ṭhin a. Nitin maia a ṭap thawm hriat ka ningin ka lei mai a ni. Ka pe ang chia, i zirtir ṭhat theih ang angin zirtir ang che,” a ti a. Awfeli chuan “Chuti chu zirtir teh ang hmiang. A bal kher mang e aw,” a ti leh vawng vawng mai a. Pu St. Klera chuan, “Tikhan hruai la, tu te emaw bual faitir rawh khai, puan ṭha deuhte pe la," a ti a. 

Tawpsii han bual fai meuh chu thil awlai a ni lo va. Rei fe an bual a, an bual fai zawh chuan Awfeli chuan, “Tawpsi, kum engzat nge I nih tawh?" a ti a. Tawpsii chuan nui deuh ṭhi ṭhe in, “Ka hre lo, ka pi," a ti a. Awfeli chuan, I kum zât i hre lo maw? Tuma’n an hrilh ngai lo che a mi? Tunge i nu?” a ti leh a. Tawpsi chuan, “Nu ka nei reng reng lo,” a ti a. Awfeli chuan, “Nu ka nei reng reng lo a? Khawia piang nge I nih?” a ti leh a. Tawpsi chuan, “Ka piang reng reng lo,” a ti leh mai a. Awfeli chuan, Chutiangin min chhang tur a ni lo. Ka fiamthu a ni lo ve, khawia piang nge i nih a, i nu leh i pa tunge an nih min hrilh thuai rawh,” a ti ta a. Tawpsi chuan, “Ka piang reng reng lo, nu leh pa pawh ka nei hek lo. Engmah ka nei lo,” a ti a. Awfeli chuan tih ngaihna a hre mang lo va, “Anih leh I pi leh pu hnenah chuan kum engzat nge i awm?” a ti a. Tawpsi chuan, ‘'Ka hre lo, ka pi" a ti a. Awfeli chuan, "Kum khat nge, a aia tlem nge, a aia tam?” a ti leh a. Tawpsi chuan, “Ka hre lo," a ti zo vek mai a. Awfeli chuan, "A nih Pathian hi mi sawi i hre tawh em?” a ti ta thung a. Tawpsi chuan mak tiawm takin a en mai a, Awfeli chuan, “Tunge siam che i hria em?” a ti a. Tawpsi chuan nui chungin, "Tu'n min siam ka hre hleinem, ka lo chawrchhuak ve mai a ni. Tuma’n min siam ka hre lo ve,” a ti leh mai a. 

Awfeli chuan mak a ti hle a, "Puan thui i thiam em?” a ti leh a, Tawpsi chuan, "Thiam lo ka pi,” a ti a. Awfeli chuan, "Eng nge i thiam? I pi leh pute'n enge an thawhtir ṭhin che?” a ti a. Tawpsi chuan, "Tuite ka chawi a, thlengte ka sil ṭhin,” a ti a. Awfeli chuan, "En rawh, Tawpsi. Ka awngphah phah dan tur ka han zirtir ang che, ka duh tui hle a nia. Dik taka phah dan i thiam tur a ni. Hei hi a chung lama awm fo tur a ni a, hei hi a lu lam tur a ni. I hrereng ang em?” a ti a. Chutia Awfelin a han entir lai chuan khum kianga kut kawr leh puan them chu a lo ru zauh va, a kawr ban chhungah a hnawh chho va. Awfeli lo hawi leh lai chuan inkuangkuahin a lo ding leh diam hman tawh a. “Khai le, Tawpsi, ka tih ang takin han ti ve teh,” a ti a. 

Tawpsi chuan Awfeli tih ang takin rang takin a han phah a, Awfeli chu a lawm hle a. A phah zawh dawn ruai chuan a kawrban chhunga puan them a hnawhluh kha a lo lawr ta a. Awfeli chuan a han pawtchhuak a, “Hei, enge ni? Naupang sual, I rûk a ni maw?” a ti a. Tawpsi chu zak chuang miah lovin a ding ran a, mak ti zawk awm mahin a awm a. “Ka pi, I ta a ni maw? Engtin nge maw ka kawrban chhung a a lo luh mai chu le?” a ti a. Awfeli chuan, “Naupang, dawt dawt sawi suh. I rûk a ni,” a ti a. Tawpsi chuan, “Ka ru teuh lo em mai. Tunah chauh khan ka hmu a, a hmain ka hmu reng reng lo,” a ti a. Awfeli chuan, “Tawpsi, dawt sawi hi sual a ni tih I hre lawm ni?” a ti a. Tawpsi chuan, “Ka sawi lo, ka ru lo a ni,” a ti tlat a. Awfeli chuan, “Tawpsi, chutianga dawt i sawi chuan ka vua ang che,” a ti a. 

Tawpsi chuan, “Ka pi, nileng pawhin min vua la, ka sawi ang lo chuan ka sawi thei chuang lo vang. Kha puanthem kha ka la reng reng lo a ni. Khuma I dah kha ka kawr banah a lo kai palh a ni ang,” a ti tlat a, a ṭap deuh pur nghe nghe a. Chutianga dawt chiang taka a sawi avangin Awfeli chu a thinur hle mai a, Tawpsi chu a han sawi nawk nawk a. “Chutiangin dawt min hrilh suh,” a ti a. Chutia a han sawi chuan a kawr ban lehlam atangin kutkawr a lo tla leh ta a. Awfeli chuan, “En rawh, puanthem kha ka ru lo i la ti ngam ang maw?” a ti a Tawpsi chuan, “Kutkawr hi zawng ka rûk a ni a, puanthem kha zawng ka rûk a ni lo,” a la ti ta fan a. Awfeli chuan zaidam takin, “Tawpsi, I inpuan chuan tun ṭum chu ka vaw lovang che,” a ti a. Tawpsi chuan, “A pahnih chuan ka rûk a ni,” tiin a inpuang ta a. “Pawi ka ti em em mai a, ka ru leh tawh hauh lo vang,” a ti leh a. Awfeli chuan, “He In a I awm hnuin thildang i ru em? I inpuan chuan ka vaw lo vang che,” a ti a. Tawpsi chuan, “Ka pi, Ivi ṭhisen ka ru,” a ti a. Awfeli chuan, "Naupang, thildang enge i rûk?” a ti a. Tawpsi chuan, “Rosi bengbeh ka ru bawk,” a ti a. Awfeli chuan, “A pahnihin va la thuai rawh, ” a ti a. Tawpsi chuan, "Ka hâIral tawh, a lak theih tawh loh,” a ti a. Awfeli chuan, “Va la thuai rawh. Chuti lo chu ka vaw nek ang che,” a ti a. Tawpsi chu a ṭap ta a. “Ka hâl tawh, Iak tur a awmlo,” a ti a. Awfeli chuan, “Engah nge i hâl?” a ti a. Tawpsi chuan, Ka sual vangin ka hâl mai a ni, ka hâl lo thei lo a ni,” a ti a. 

Chutih lai chuan Ivi a lo lut a, a ṭhisen chu a rawn awrh si a. Awfeli chuan, “Ivi, i ṭhisen kha khawi lam atanga i hmuh leh nge ni,” a ti a. Ivi chuan, “I hmuh leh a! Nilengin ka awrh asin. Nizan pawh ka lo dah theihnghilh a, zankhuain ka lo awrh mai a,” a ti a. Rosi a lo lut ve leh a, a bengbeh a rawn beh bawk a. Awfeli chuan, “Hetiang mite zawng a tihngaihna ka hre mawlh lo ve,” a ti a. Tawpsi hnenah chuan, “Tawpsi, engah nge heng i rûk loh puite, ‘Ka ru’ i tih?” a ti a. Tawpsi chuan, “Ka pi, inpuang la i ti alawm. lnpuan tur dang ka inhre lo va, ka ti mai a ni,” a ti a. Awfeli chuan, “Tihlohte ti anga sawi turin ka ti hleinem che. Tih loh tia insawi chu dawt sawi a ni ve tho bawk asin,” a ti a. Tawpsi chuan, "A ni maw?” a lo ti a, Awfeli chuan, “Tawpsi, engah nge englote i rûk ang? Tha takin an enkawl dawn che a, I rûk ai chuan ka pe zawk mai tur che alawm,” a ti a. Chutianga zaidam leh thain tuman an la be ngai lo va, Tawpsi chu a lungchhe zawk hial a.

Tawpsi chu engtia tih mi nge ni ang tiin Awfeli chuan a ngaihtuah a, a tihngaihna a hre lo hle a. A tihdan tur angaihtuah chhung chuan pindan thimah a khung a. Awfeli chuan Pu St. Klera hnenah, “He nau hi vuak loh chuan a tihngaihna ka hre lo ve,” a ti a. Pu St. Klera chuan. “Vaw ta che,” a ti a. Awfeli chuan, “Naupang zawng vuak loh zawngin an ṭha thei lo a ni,” a ti a. Pu St. Klera chuan, “Ṭha awma i rin ang chuan ti ta che. He nau hi zawng chaicheh leh suankual pawhin an vaw thlu tawp a, nasa takin an sawisa ṭhin a. Han vaw ta mah la a sawt chuan chu ka ring mang lo ve,” a ti a. Awfeli chuan, “Chuti chu engtia tih tur nge ni ang le? Hetiang nau reng reng hi ka la hmu ngai lo,” a ti a. Pu St. Klera chuan a chhang lo va, Awfeli chuan ṭha a tih ang anga tih a tum ta a. 

Lehkha chhiarte, puanthui te a zirtir a.Tawpsi chuan lehkha chhiarlam chu a ngaihsak a, a thiamthei hle a; puanthui erawh chu a duhzawng a ni lo va. A hriau a tihtliah luih loh leh a paih bo ṭhin a. A puanthui laite chu a tibawlhhlawh a, a changin a thukru bo ṭhin a. Ni rei lo teah Awfeli pindan dahfel dante a tham a. An vên chhung chuan rang takin a siamfel a, an ven loh erawh chuan a tiṭha duh ṭhin lo va. Khum te phah ṭha lovin, lukham thuina te a phelh a, lukhumah te a hmang a. Khum ban ah te a lawn a, a letling zawngin a chhuk leh a. Awngphahte chhuatah a phah a. Awfeli kawrte a ha a, darthlalang ah a inen a, a faifuk a, a insiamchhe ṭhin a. Awfeli tihngaihna hre lo chuan, “Tawpsi, engah nge i sual hle ni aw!?” a ti leh ringawt ṭhin a. Tawpsi lah chuan, “Ka sual vang a ni,” a ti mai a. Awfeli chuan, “Tawpsi, engtin nge maw ka tih dawn che le?” a ti a. Tawpsi chuan, “Ka pi, min vaw nek mai rawh. Ka pi hlui te chuan min vaw ṭhin a, vuak loh zawngin hna ka thawk ṭha ngai lo a ni,” a ti mai a. Awfeli chuan a vaw ve bawk ṭhin a. A vuak lai chuan nasa tak in a ṭap a, ngaihdam a dil chung ṭhin a. Darkar chanve lek chinah a ṭhiante zingah a thu a, nuihza a siam leh a, “Awfeli’n min vua a, min vaw lo thei lo a ni,” te a ti mai mai a. A ṭhiante ho hnenah chuan, “Mihangte u, misual in ni vek, tute pawh mi sual in ni. Mingo pawh misual an ni, Awfeli pawh in a ti a ni. Mihâng erawh chu an sual lehzual deuh niin ka ring. Tuma'n sualah chuan min khum lovang. Ka sual em avangin tumah pawhin min duh lo a ni. Khawvela sual ber ka ni ang,” a ti a, a chiar hlut a. A bingbilet a, lawm awm takin a nui sen sen ṭhin a.