Pu Tawma In-12

NI DINI

Pu St Klera in han rem that vel leh a bawih te chet fel zirtir leh tihfai chu Awfeli meuh pawhin harsa a ti hle mai. An bawihte chu anmahni thuin an lo awm rei lutuk tawh a, an lo che tawp thangin, an bal thang tawh khawp a. Awfeli’n han tihfai deuh a tum chu an ngaithei mang lo va. Engpawh ni se, tihfai deuh leh tihthat deuh chu a tum tlat a. Zingah a tho va, in tifaiin a nileng thin a. Nileng lenga a tul thin chu Pu St Klera nupuiin a hmu thin a, a lo ning zaw mah mai a. 

Inpui lam chu a han tifel ta deuh va. Chaw chhum in lam erawh chu a la tifel chuang lo va, a la tawp hle mai a. An chaw chhumtu chu Ni Dini an ti a. Chaw chhum chu a thiam hle a, mahse a che tawp deuh a ni. Awfelin chaw chhum in a tlawh hmasak ni chuan dawhkan pawhdawh a han en a, “He pawhdawh hi enga tan nge ln hman,” a ti a. Ni Dini chuan, “Engkim dahna a ni mai e,” a ti a. ‘Engkim dahna tih mai awm reng a ni. Pawhdawh chhungah chuan sawhthing te, hla bu te, rawmawl te, sahmul la te, la phiar te, vaihlo zial te, pheikhawk chhia te, chhangper te, thleng te a awm a. Thleng pakhatah chuan sahriak thih mi a awm nghe nghe a. Pawnchhe thema purun infun te pawh a awm bawk. Inhrukna puan bal te, hriau leh la te a awm bawk a. 

Awfeli chuan, “Dini, sawhthingte hi khawia’n nge i dah tnin?” a ti a. Dini chuan, “Khawi laiahpawh ka dah mai. Kha lai no kehah khan thenkhat chu ka dah a, a then chu khing laiahte khian ka dah bawk,” a ti a. Ni Dini vek chuan, “Kha kha maw? Tukina ka dah a nih tak kha maw le. A laksawn samna apiangah ka dah thin a ni,” a lo ti leh a. Awfeli chuan sahriak awmna thleng chu a la a, “Hei hi engnge ni?” a ti leh a. Dini chuan, “Ka sahriak thih Iai a nih kha. A lak awlsamna ah ka dah a ni,” a ti a. 

Awfeli chuan, “I pi thleng tha ber sahriak dahnan I hmang a ni maw?” a han ti a, Dini chuan, “Ka hman hmawh a, ka han hmang lawk mai a ni. Vawiina ruah leh mai ka tum a ni,“ a ti a. 

Awfeli chuan a rawmawl a han la chhuak leh a, “Hei rawmawl pahnih a awm bawk a,” a ti a. Dini chuan, “A bal tawh a, suk atan ka dah a nih kha,” a ti leh a. Awfeli chuan, “Puan bal dahkhawmna tur I nei lo vem ni ?” a ti a. Dini chuan, “Khami thingrem kha chutiang dah rana ruahman a ni a, mahse a chungah khan chhangte ka nuai thin a, thildangte kan dah bawk a, ‘a hawn vel a harsa e’ ka ti a, ka hmang lo a ni,” a ti a. Awfeli chuan, “Chhang nuaina tur chu I nei reng alawm. Engati nge i hman zawk loh?” a ti a. Dini chuan, “Thlengte ka dah teuh thin a, a hman hleih theih loh a ni” a ti a. Awfeli chuan, “Thlengte chu sil fai a, a hmuna dah nghal zeI tur alawm,” a ti a. Dini chuan thinrim deuh takin, “Thleng sil zelte chu I tiduh e a! Kan hnathawh hi nangni angin min hriatpui emaw ni? Thlengte kan silfai nghal zel a, kan dahthat dim diam zel chuan kan pu-in chaw ei ni a nei mang lo vang e,” a ti a. Awfeli chuan, “Purun pawh heta hi a awm,” a ti a, Dini chuan, ‘‘Kha laiah ka dah anih tak kha maw le, ka lo hre tawh hauh lo asin. Tuna hman atan ka tih a ni nghe nghe asin le,” a ti a. Awfeli chuan thildangte chu a han chingchhuak leh a, Dini chuan, “Ka pi, ka englo dah i tihdanglam vek chuan a buaithlak hle ang. lnpui lamah han awm ta la, hun ka neih hunah ka tifel vek ang. l awm zawngin engmah a tihtheih loh ve,” a ti a. Awfeli chuan, “Chawchhum In hi tihfel vek ka tum a ni a, ka tihfel hnu chuan fel takin i vawng zui zel tur a ni,” a ti a. Dini chuan, “Nangni ang milianin hetiang an tih ngai reng reng ka hre ngai lo ve. A tul lo ve, lo awm mai mai zawk rawh,” a ti a, a vei ngat ngat a. Awfeli chuan a theih ang angin a tifel nghal zel a.

Awfeli chuan a tum angin a titha hlei thei lo va, a beidawng rilru hle a. Pu St Klera hnenah a sawi a. Pu St Klera chuan, “Dini chu ama tih tihin tihtir zawk mai rawh khai. Chawchhum a thiam viau a nia. A tih dan kan hmuhpui zawngin chaw kan eitui mang lo vang. I tittha thei chuang lo vang. Ama tih ang angin tihtir mai la, a upa tawh a, thil thar zirtir theih a ni lovang,” a ti a. Chaw chhum in chu Ni Dini thu thua awm turin an ruat ta zawk a.