Pu Tawma In-11

ZAWRAN ZALENNA A ZAWNG 

Zawra leh Elizii kha thla rei fe an inthen a, hrehawm tam tak an tuar hnua Thian Pawlho inah an inhmu leh ta kha an hlim dun hle mai a, thu inhrilh tur pawh an ngah dun hle mai a. Zawra chuan a pu tlanbosan a, Elizi te a rawn umzia te a hrilh a, Kanada lam pana an kal dan tur te an ngaihtuah a. Simeona’n, “A umtu che u an lo hnai tawh hle mai,” a rawn tih avangin zan laia chhuah nghal an tum a. Rakheli chuan kalkawnga an sin tur puante leh an eitur te a ngaihtuahsak bawk a. 

Tlailam ni tlak dawn tawh hian Thian Pawl a mi Fina a lo kal a, “Heilia misualpa mi rawihte an lo hnai ta hle mai,” a rawn ti a. Zawra leh Elizii chuan zanlai pawh nghak lova khaw thim veleha kal an tum ta zawk a. An zanriah ei kham chuan an chuanna tur tawlailir a lo thleng tawh a, an kal ta a. Tin, khaw thimah chuan an theih anga chakin an kal a, Zing lam dar thum hun ang velah chuan an hnung lamah Sakawr tlan thawn an hre ta a. Tawlailir khalhtu Fina chuan a tawlailir chu a han tiding a, ‘‘Simeona zu nia maw leI Simeon, engtizia nge ni le, an lo hnai ta hle elo'’ a ti thuai a. Simeona onuan, “Ka hnung lawkah sawn mi sawm lai an lo kal a ni,” a rawn ti a. Elizi chuan hlauthawng zetin, “Engtin nge kan tih tak ang le?” a ti thuai a, Fina chuan kawng chin te a hre vek a, tawlailir a khalh chak sauh sauh va, tlang sang tak bul an va thleng a, chu mi tlang chhip chu en mai chuan lawn theihna awm pawh a ni lo va. Kham sang tak ang a ni. Fina chuan kalna tur a hria a, tawlailir a tiding a. “Simeon, tawlailir hi i theih ang a chakin khalh haw ta la, tanpuitu tur han sawm la, lo let leh thuai ang che u,” a ti a, an theih anga chakin an kal ta a. Kawng chu a chhe hle mai a, mahse rin aiin an kal chak thei zawk a. Simeona chuan tawlailir chu a khalh haw ta a. 

Tlangchhip an thlen chuan Fina'n, “Hetah zawng kan him ta deuh ve. An lo lawn ve pawhin a mal malin an rawn inzui dawn a ni a, an lo kal phawt chuan lo kap ang che,” Zawra hnenah a ti a. A umtu te chuan tlang bul chu an va thleng ve a, mi ruakhau deuh Tawm Lawkara leh sual awm tak hmel pu, pa te deuh hian an rawn ho va. Tlanga lawnna kawng chu an han zawh ve a, an hmu ta a. Tawm Lawkara’n hma a hruai a, an lawn chho ve dawn a, Zawra’n a zu au va. In duh chuan lo lawn chho rawh u. Amaherawhchu ka lo kap ngei dawn che u a ni,” a ti a. Pa te deuh , misual hmeI pu tak khan a silaiin a han tin a, a kap zawk ta mai a. Elizii hlau chu a au va, silai mu chuan Zawra hmai a thawi vuai a, a hnunga thingah chuan a lut siah mai a. Tawm Lawkara chu a lawn chho zeI a, Zawra chuan a lo kap ve a, a nakah a thawi a. A lawn chho lui zel a, an zingah a zuanglut a. Thian Pawla mite chuan mi an kap ve ngai lo. Zawra’n a khalai chuan Fina chu a hnungah a lo ding a. Tawm Lawkara a lo zuan luh chuan hma lamah a lo kal a, ‘Thiana, hetah kan duh ve lo a che,” a ti a. A nam vak a, tlang pang awih takah chuan a nam lum ta a. Thingin a puante lo man suh se la chu lum hlum ngei tur a ni a, a lo man hlauh avangin a lum hlum lo deuh va.

Mi nunrawng takte hi mi dawihzep tak an ni duh hle a. An hotu an hliam a, tlanga an nam lum tak avang chuan an tlanchhe ta phiar a. An sakawrah an chuang sawk sawk a, an hotu Tawm Lawkara pawh hre chang lovin an tlan ta daih mai a. Tawm Lawkara chu a rum dur dur mai a. Tlang chhipa mite’n an tlan chhe ta tih an hriat chuan an lo chhuk a, ‘Simeona lo nghah ngawt ai chuan i lo va hmuak ang u,’ an ti a. Thui an kal hmain Simeona chu midang pahnih hruaiin an lo thleng ta mai a. Fina chuan hlim takin, “Tunahah chuan kan him ta alawm,” a ti a. Elizii chuan, “Chuti chu sawlaia pa rum dur dur hi va en teh u khai! A khawngaihthlak alawm maw le " a ti a. Zawra chuan, “A ni tak e. Kristian kan ni si a, kan tanpui tur a ni. Kan zingah i hruai ve ang u khai," a ti a. An hmelma ni lova an thian zinga pakhat ni zawk awm maiin, dim takin an zawn a. Tawlailirah an hlang a, an kalpui ve ta a. Mel sawm lai an kal hnuin In pakhat hi a lo awm a, chutah chuan an thleng a. 

Tawm Lawkara chu khum nuam tak leh fai tak, nidanga a mutna thin aia nuamah chuan an mut a. Zawra leh Elizii chu kut insuih rialin huanah chuan an lengdun a, an hlim hle mai a. Kanada an hnaih hle tawh avangin him tawh hleiin an inhria a.