Pu Tawma In-10

Pi Khlawii Loisvil khuaah a kal 

Tlai lam a ni a, khua a lum hle mai a. Pu Selbia te nupa chuan kawng an hawng huai a, lenkhawmna pindanah an thu dun a. A nupui chuan, “Khlawii’n Tawma lehkha a hmu tih i hria em?" a ti a. A pasal chuan, “Lehkha a hmu a ni maw? Tawma’n thian a va nei zu ni dawn a le! Engtin nge a khawsak le?” a ti a. A nupui chuan, “Chhungkaw ngilnei takin an lei niawm a ni. An titha hle a, hnathawh tur pawh a nei mang lo a ni awm e,” a ti a. A pasal chuan, “A lawmawm a nih chu. Tawma chuan nuam a tih hle dawn chu. Lo kir leh pawh a duh tawh lo vang chu le," a ti a. A nupui chuan, “Lo kir leh chu a chak viau a ni awm e. ‘Engtikah nge min rawn lei theih dawn!' te pawh a ti a ni awm asin," a ti a. A pasal chuan, "Lwi theih ni a awm meuh dawn lo a nih hi maw! Kan leibat pek nan mi pakhat ta kan puk a, chu mi pek nan chuan mi dang ta puk leh a tul a, that ni hmel kan hmu mang dawn lo ve,”’ a ti a. A nupui chuan, “Engemaw ti talin kan ngaihtuah tur a ni. Kan sakawr thenkhat leh ramte hi hralh ila maw le,” a ti a, a pasal chuan, “Mai mai thin a, engmah i hre lo ve,”' a ti a. A nupui chuan, “Enge emawti tal chuan kan ngaihtuah dawn lawm ni? Khlawii rengin a nasa si a,” a ti a. A pasal chuan, “A tir khan lo tiam tak loh tur hi a ni a. ‘Kan leithei dawn lo ve’ tiin Khlawii hril law law mai ila a tha zawk lo maw ka ti hial tawh a ni,” a ti a. A nupui chuan, “Ka hrilh thei lo vang. Tangka hmuhzia kan hriat ngang loh leh mite hla ka zirtir ang a, zirman ka la tal a ni ang chu,’’ a ti a. A pasal chuan, “Chutiang te zawng a sawi pawh sawi teh suh aw, ka awih teuh lo em mai, ' a ti a. 

Chutih lai tak chuan Khlawii a lo kal a, ar en turin a pi a rawn ko va. Ar en atan a ti taktak lo va, chhuanlam atan lek a lo ni a. A pi hnenah chuan, “Ka pi, engah nge tangka thu I ngaihtuah buai duh? In kuta awm hi engah nge in chhawr mai loh?” a ti a. A pi chuanan nupa a titi a lo hria tih a hreta a. Khlawii thusawi chu a hre tha duh lo va. “I thusawi chu ha hrethiam hauh lo mai,” a ti a. Khlawii chuan, “Mi thenkhat chuan an bawihte hi mi dang hnenah an in hlawhfaktir thin a. ‘Louisvil khua ah chawchhum, hapta khata cheng thum hlawhin an duh,’ an ti a; chutah chuan min kaltir mai ula, Sali hian ka thawhai a lo thawk ang a, chutichuan tangka ka hlawhchhuak ang a, kan pa leina pawh kan nei thei ang chu,” a ti a. A pi chuan, ”I fate i kalsan anga maw?” a ti a, Khlawii chuan, “Sali’n a lo enkawl mai ang chu,” a ti a. A pi chuan, “Louisvil khua chu hla tak asin?!” a ti a, Khlawii chuan, “Hla ang hmiang,” a ti mai a. A pi chuan, ”Kal ta che, Tawma pawh i hnaih deuh mahna! I hlawh zawng zawng chu Tawma lei nan kan khawl zel ang,” a ti a. 

Khlawii chu a hlim ta hle a, “Puan te, pheikhawk te pawh lei a tul lovang a, ka hlawh zawng zawng kan khawl thei ang. Ka pi, kum khatah hapta engzat nge awm?” a ti a. A pi chuan, “Hapta sawmnga leh pahnih,” a ti a. Khlawii chuan, “Hapta tin cheng thum anih chuan kum khatah engzat nge ni ang le?” a ti leh a. A pi chuan, “Za leh sawmnga leh paruk,” a ti a, Khlawii chuan, “Tawma leina khawp hlawh chhuak turin kum engzat nge thawh ngai ang le?” a ti leh a, a pi chuan, “Kum li kum nga lai a ni ang. Mahse a vaia i thawh chhuah a tul lo vang. A then a zar chu ka tum ve ang,” a ti a. Khlawii chuan, “Nang em ina mite hla i zirtir chu kei pawhin ka remti lo a ni. Ka kuta ka thawh theih chhung chu chutianga i tih chu ka awih lo a ni,” a ti ta a. 

Louisvil khaw lama kal tur chuan a inbuatsaih ta a. Pu Selbia fapa Zawra hnenah pawh a hrilh a. “Tawma hnenah lehkha thawn la, hrilh ve ang che,” a ti a. Zawra chuan Tawma lehkha sei tak a thawn a, Tawma’n a lo hmuh chuan a lawm hle mai a. Khlawii hlawh zawng zawng chu an khawlsak ta zel a.