Cleopatra-2

Part 1                                                                        Chapter 2

HARMACHIS HELNA, SKEIBAKNEI THAH THU LEH ATOUA-I THU LEH HLA....!!

Heng thil a thlen hnu hi chuan Ptolemy Hmarchate-a pawn min rawn tibuai ngai ta lo a. Tin, hrilhlawkna in Pharoah la ni mai tur ni a  a sawi naupang zawngchhuak tur pawn a sipai te a rawn tir ta ngai bawk hek lo. A chhan pawh, ka nau lubung chu mi tilreh khan Alexandria hmun a a lalin ah a hawn sak a, Cyprian uain leh phenglawng te nen a lo lawm a, a hmei ho hma ah a ri bung bung mai a ni. Mi tilreh pa hnen ah chuan lubung chu a chhipsam ah khai a a hmuh-theih tur a rawn lekchhuak tur in thu a han pe a. A rawn lekchhuah chuan ani chuan nasa tak in a lo deusawh vel a,  a chapal chuan a biang ah te chuan a han hlap vel bawk a. Chutah, a hmei zing a pakhat hnen ah chuan pangpar lallukhum siam a, lubung chu khumtir tur in thu a han pe bawk a. Chumi hnu chuan ṭhingthi in lubung chu chibai a buk el leh te te a. Chutih pah chuan nasa takin a deusawh pah reng bawk a. Mahse chu hmeichhia, pangpar khimtir tu chu ṭawng hmang thiam tak hi a ni a, Ptolemy hnen ah chuan, "Ṭhingthi a chibai i buk kha i tidik chiah a ni. He nau hi Pharoah diktak chu a ni a, Pharoah awm tawh zawng zawng a ropui ber a ni. A hming pawh Osiris a ni a, a lalthuthleng chu Thihna a ni," a ti a.

Chung thu a lo hriat chuan Auletes/Ptolemy chu a mangang ta hle mai a, a khur ta hial a. Mi vervek tak a nih avangin thihna ruam a luh chu a hlau takzet a ni. Chuvang chuan hmeichhia kha, a thusawi ṭha lo tak te avang khan a tihlum ve ta nghal a. A sawi Pharoah rawngbawl tur in a tir liam ve nghal a ni, tiin a au chiam chiam mai a. A hmei dang te ho chu kalbo tirin, phenglawng tum te pawh chu a tawp tir a, a tuk thleng in a in in rui ta a. Mahse, Alexandrias ho chuan hemi chungchang hi hla an phuah ta a, tun thleng in khawlai vel ah an la sa fo a ni. Chu hla chu hetiang hian a intan a:

Ptolemy hmarchathak-a chuan,  

Mitthi leh thi mek te chungah chuan, 

A phenglawng, lungngaihna a khat chu tum in,

Hremhmun meikhu chungah chuan a lam vel a.

Chu thihna hlim hnuai ah chuan,

Hmeichhe unau thum te nen,

Chawl lovin a phenglawng chu a tum ang a,

A chhiahhlawh pawh utawk nise!

A uain pawh chu ram a tuihna chu ni bawk se.

  - Ptolemy hmarchathak-a

Chung kum te a liam hnu chuan, naupang te ka la ni a, eng thil chiah nge Egypt chuan a paltlang tih reng ka hre lo a, helai a sawilan ka tum ber pawh a ni hek lo. Kei, Harmachis hian, hun ka neih tam loh avangin keima chanchin nen a inzawmna neih thil chauh helai hmun ah hian ka sawi dawn a ni.

Hun te a lo kal zel a. Ka pa leh min zirtirtu te chuan min thlahtu kal hmasa te ṭawng dan, pathian te pawh in an hman thin ṭawng hmang chuan min zirtir ṭhin a. Chutiang chu naupang in an thiam tur a beisei a ni. Michak tha tak niin ka lo ṭhanglian ta zel a. Ka sam te chu pathian Nout sam ang mai in a dum hlap mai a. Ka mit pawh lotus pawl mi ang mai in a pawl râm bawk a. Ka vun te lah chu hmun thianghlim chhung a Alabaster ang mai in a var thinghlim sar mai bawk a. Tunah chuan heng ropui na te hian a taka min rawn chenchilh tak avangin zahpui hauh lovin ka uanpui thei ta zawk a. Tin, ka châk em em bawk a. Abouthis ah chuan ka rualpui ah inbuan a min hneh tur emaw fei leh virvawm in vawm thui siak a min ter pha tur tumah reng an awm lo. Chuvang chuan Sakeibaknei veh chu ka chak zek zek ṭhin a, mahse ka pa ti a ka koh ṭhin chuan, ka nunna chu thil ho mai mai khawhral atan chuan a hlu mah mah a ni, tiin min khap tlat ṭhin. Mahse, a hma a kun a chibai ka han buk  a, a thusawi awmzia chu min hrilhfiah tur a ka tih apiang hian, a mit chu a meng nûr a, pathian in a hun te ah thil zawng zawng chu min la hrilhfiah mai tur thu in min chhang leh thin a. Chu chuan ka thin a ti rim takzet ṭhin a, pawnlam ah ka chhuak tau hial thin a ni. A chhan pawh, chutih lai vel vek chuan kan khua Abouthis ah chuan tleirawl pakhat, ka kum rualpui hian a thiante nen a pa ran vulh rawn lak tum sakeibaknei hi an that a ni awm a. Ka chakna leh theihna te min itsik reng tu anih avangin, an chetṭhat lai chu remchang ah hmang in, kei chu mi dawihzep, a ramchhuah ve ṭum pawh a sakhi lâ leh sihal tih vel mai mai bak veh ngam lo ang ten min lo sawi darh vak mai a, chu chuan ka thin a khei takzet a ni. Hetih hunlai hi kum sawmpasarih ka nih lai a ni a, patling tih tur ka ni ve tawh a ni.

Chutia ka pa, puithiam hma a rilru na taka ka awm lai mek chuan tleirawl pakhat hian mi rawn ko a, min rawn nuihsawh vel a ni. Miten an sawi hmang in Temple sir a lui lung kam, Abouthis atanga mel thum vel lek, lui dung sir a hnimbuk vel ah chuan sakeibaknei a awm niawm a an sawi thu chu mi rawn hrilh a. Chutah, min la nuihsawh reng chung in, a rual a chu sakeibaknei zuk that tur chuan ka kal ve ngam leh ngam loh min zawt zui a, nge nu ho bul ah ṭhu in, ka sam phiar hi ka khuih tir mai mai zawk dawn, tiin min rawn ti el vel a. Chu thu chuan ka thin a khei takzet avang in ka pa min zilhhau na pawh chu ka hrechang tawh lo...chu pa hnen ah chuan, amah chauh a a rawn kal dawn phawt chuan chu sakeibaknei veh tur chuan ka kalpui ang, tih thu ka hrilh ve ta a. Tichuan, mi dawihzep ka ni chiah nge chiah lo chu kan hre mai dawn a ni, tiin ka chhang ve ta ngat a. Chutia ka han chhan takah chuan ka remruat na chu min pawmpui duh leh ta mai lova, kan hnam mipa zawng zawng in kan hriat ṭheuh ang in sakeibaknei chu mahni a veh ngai a ni lova, vehpui neih ngei ngei a ngai a ni. Chuvangin, tunah chuan ka nuihsawh let ve ta thung a ni. Chutah, ani chuan a thal leh a mu  leh chemte hriam tak chu a va la ta a. Kei chuan ka feikibar, rit nelh nawlh chu ka lekchhuak ve ta thung a, a fawng chu thing hlingnei aṭanga siam a ni a. A fawng tawp ah chuan, kan vawn pial loh nan, tangkarua hmang a siam theibuhfai lem hi a awm bawk a. Tichuan, ngawi reng in sakeibaknei awmna lam pan chuan kan kal dun ta vang vang a. A hmun kan va thlen chuan kawl ah ni a tla dawn ruai tawh a. Chuta lui dung sir vel a chirhdum ah chuan sakeibaknei hniak chu kan va hmu ta thluah a, lui kam sir a hnim buk zingah chuan a hniak chu kan chhuilut ta a ni.

"Awle, tunah chuan, i insawithei bawk a, hnimbuk kar ah hian hma chu i han hruai dawn em ni, nge keiman ka han hrui dawn zawk?" ka han ti a, hma hruai nghal tur ang mai chuan ka han awm vel a.

"Ni love, ni love...chutin, thinrim viau mah ta che. He ramsa kawlh hian a lo zuan che ang a, a lo pawtdarh vek mai ang che. Chu ai chuan, helai aṭang hian ka thla hian hnimbuk kar vel hi ka han kap ang a. Sakeibaknei hi a lo muhil a nih chuan ka thal mu hian a han kaitho mai dawn a lawm," tiin a thalmu chu a phawi nghal a.

Engtin nge a nih theih pawh ka hre bik lo, mahse thal mu chuan sakeibaknei mu lai chu a han fuh teh mial a. Ani chu rawn harh in, kawlphe ang a rang in a tawmbuk hnimbuk kar aṭang chuan a rawn zuangchhuak nghal a, kan hma ah tak chuan thinrim eng phiar hian a rawn ding a. A mawngtam lehlamah chuan thalmu chu a bur vu mai a, a baksam te chu thimrim luat avang in a thur suau  mai a,  a meng eng rum mai bawk sia, thinrim takin a han hâhum zui a, a hâhum ri chuan lei te chu a nghawr nghing ur ur mai mawle.

Kei chuan, "I thal mu khan kap rawh....a rawn zuan rual chiah in mar takin lo kap ang che!" tiin ka han û tuarh tuarh a.

Mahse, kan mi insawithei pa chu, a huaisenna zawng zawng in a thlawh-bosan zo tawh chu niin. A kâ chu a lo ang phuau ringawt mai a, a kutzungṭang te chuan thahrui reng an neih tawh loh avangin a thalmu te chu a thlauh ta daih a. Râk chêl chûl chung a tlanchhe daihin, keimah chauh va sakeibaknei chu bei tur in min hnutchhiah ta daih mai a nih chu! 

Mahse, chutia tlanchhe hman a ka inrin tawh loh avang a ka tawpna lo thleng mai tur nghak a ka din reng lai chuan sakeibaknei chu a ṭhu hniam sut sut a, sang deuh mai hian a rawn zuang thut mai a. Kei chu min zuan khum daih in engtin mah min khawih fu lo. Chutah, a han zuang leh vak a, kan mi insawithei a tlanchhe mek chu a hnunglam aṭang chuan ava zuan tlu tawp mai a. A kutbawr hrawl zet mai chuan a lu ah chuan a beng a. A beng na bawk a, a luruh chu bang a artui kan vawmkeh ang mai hian a keh nghal rawp mai a ni. Kâ pawh chhawn lovin a hmun ah la la chuan a thi nghal a. Sakeibaknei chu a ruang chung ah chuan ding in, hnehna hlado chham ve niawm tak hian a han hâhum vak vak mai a.  Hlauh luat avangin ka rilru chu a buai nuaih tawh mai a. Eng thil chiah nge ka tih pawh hrechiang lo chuan ka fei chu ka lek a, au vak chung in ka bawh phei ta ringawt mai a. Chutia ka bawh phei rual chuan sakeibaknei chu a lo ding kang ve nghal a. A kut hrawl zet chuan mi rawn ben a tum a, mahse, kei chuan ka theihtawp a nâ in a hrawk ah tak chuan ka feikibar chuan ka lo chhun a, a nâ ti lutuk chuan a kut pawh chuan min rawn beng fuh ta mang lova, tlem in ka vun a thler ve deuh tih mai loh chu engtin mah min khawih na ta lo a ni. 

A hnung lam ah a tlu dawp mai a. Ka fei chuan a hrawk ah thûk takin a chhun a. Chutah rawn tho leh in, na tuar a rûm hum hum chungin, patling aia sáng sáng hian vawihnih lai a han zuang awrh awrh a, a kut hmalam chuan fei chu a beng bung hmawk mai a. A han zuang leh awrh awrh a, a hnunglam ah bawk a tlu leh ta a, a rapthlak ngei mai. Chutah, a hliam atanga thisen chhuak zozai chu tuar ta lovin, a chakna te chuan a kiansan ta a, bawng thi tur ang mai a hrâm in, a hnuk a chat ta ni.

Chutih chhung zawng chuan kei, tlangval chhuakhlim ve mai chu, hlauh avang in ka lo ding khur zawih zawih mai a. Hlauhawm zawng zawng a kian hnu thleng chuan ka khur zawih zawih mai a ni.

Mahse, chutia, min hmusit em em tu ruang ka thlir reng lai leh sakeibaknei ruang ka en reng lai chuan, hmeichhe pakhat hi ka lam pan chuan a rawn tlan thut mai.  Ani chu ka pa nupui hmasa, Atoua-i kha a lo ni a. Ka hriat hauh lovin, ka nunna chhan nan tiin ama nun chu ka tana hlan a lo tum reng chu niin. Chulai lui dung vel ah chuan hnim damdawi hlo lakhawm in a lo feh a, sakeibaknei a awm hnai tih reng hre lovin (sakeibaknei te hi a tlangpui in hetiang luidung a hnimbuk vel ah hian an khawsa ngai lova; thlaler ah an khawsa tlangpui thin, Libyan tlang pang vel ah te), râl aṭang chuan ka che vel chu min lo hmu a. Ka kiang a rawn thlen veleh chuan ka Harmachis nihna chu zahna lantir in, thingthi in chibai min buk ta a, lal chhungkua a mi ngei ti a min kovin, zahawm na leh duhsak na tinreng te chu ka phu ve reng an ni a, pathian pathum te vohbik niin, pharoah a, chhandamtu ka ni, tiin min fak ta chiam mai a.

Mahse, kei chuan a hlauh luat ah a rilru a buai zo niin ka hria a. A thil sawi te chu enge a awmzia ka zawt chiang leh ngat a;

"Sakeibaknei tihhlum chu thil ropui tak a ni reng em ni le? Tun a i thil sawi zawh chiah ang em em kha chu a tihlum tu hian a phu thei dawn em ni? Tunhma pawn sakeibaknei tam tak lo tihlum tawh te pawh an awm a. Pathian Amen-hetep-a, Osiris mi ngei pawh khan ama kut ngei in za rual vel chu a that a ni lawm ni? Ka pa pindan bang ah pawh tunhma a sakeibaknei a lo thah ve tawh thu te kha a inziak a ni lawm ni? Midang pawh in hetiang te chu an lo ti fo tawh a ni lawm ni? Chuti si, engati nge heti tak mai a thu i rawn sawi tak chiam mai le, nang hmeichhe mawl hian?"

Chung zawng zawng ka han sawi phiar phiar chhan pawh, chutia, sakeibaknei ka han tihhlum zawh chuan naupang rilru takin, eng vak mah awm lo ang hian ka han awm leh hnuhnawh vel a ni. Mahse, ani chuan chibai min buk chu a bâng duh chuang lova. Hming zahawm leh ropui tak tak, helai a ziahlan zahthlak khawp a ropuiin min ko mawlh mawlh bawk a.

"Aw, lalpa. I nu khan a lo sawilawk dik hle mai. Thlarau thianghlim, Knepth chu amah ah khan a lo awm chiang a ni. Nang pawh pathian aṭanga chhuak i ni ngei e. Han en mah ta che, he sakeibaknei hi Rome khawpui ah a in hrosa vel a, tin, helai a mitthi pawh hi Ptolemy entirna a ni. Nile luikam a hnim hring, ramdang hnimin a ṭo hnan ang mai in ani pawh hi Macedonian hmanrua mai a ni. Mahse, nang chuan Rome lal ram a sakeibaknei chu i la tudai dawn a ni. Macedonian uicho te chu an la tlanchhia ang a, anni chu Roman sakeibaknei in a la hneh ang a, nangin Roman sakeibaknei chu i hneh veleh ang. Tichuan, Khem ho te chu vawikhat dang leh atan zalen an lo ni leh ang, zalen..! Mahse, thil thalo lak ata intithianghlim tlat ang che. Aw, nang lalchhungkua ami, Khem te tan a beiseina meipui hian, Pathian thupek te zawm tlat la, tiṭiau tu hmeichhia chu hlau ang che. Ka sawi ang zel khan, a lo la thleng ngei dawn a ni. Kei chu ka rethei a, ka bawlhhlawh a, lungngaihna in ka khat a. Sawi loh tur ka sawi avangin nas takin ka lo sual ta a. Chumi avang chuan ka chhûl atanga chhuak ngei, ka ril a rah fa, ka tupa ngei pawh ka chân phah a ni. Chung zawng zawng te chu i tan phal takin ka pe a sin. Mahse, min thlahtu te aṭanga finna chu ka la nei reng a, pathian te finna chu. An hma ah chuan mi tinreng te hi intluktlang vek an ni a. A nur hmel te chu mirethei lak atangin an hawisawn tir a. Pathian nu Isis chuan min rawn bia a, nizan khan ka hnenah thu rawn sawi in, helai hmun a rawn kal a, hnim bawlhlo te lakhawm tur leh i hnen a chhinchhiah na te chhiarchhuak turin min rawn ngen a ni. Tin, ka sawi ang ngei khan a lo la thleng ngei dawn a ni. Nang hian thlemna te i hneh a, i paltlang phawt chuan ropui na in a lo hmuak dawn che a ni. Lo kal teh le, aw, lalpa.." tiin lui kuang hmawr, tui thûk na lai leh dum pawl ruih lai ah chuan min hruai ta a. "Tui ah khuan zuk en la, nangmah rawn enlet tu che khu chiang takin han en ta che....a mit leh chal vel te khu lallukhum thuahhnih khum nan a tawk viau lo maw? Khung mitmeng inngaihtlawmna a khat te khuan lalte ropui na a entir lovem ni? Engkim siamtu Ptah hian khu taksa khu lal thuam te inbel tur leh a en tu a piang ten nangmah kaltlang a pathian an hmuh theih na tur a a duan a ni dawn lawm ni?" a han ti a.

Chutah, amah vek chuan aw sin tliang ril rel, a pitar aw chuan, "Aih, aih...min bum thei lovang, naupang. Sakeibaknei ham na hliam te hi, rul tur hlauhawm nei chuk ang mai a, tur hlauhawm tak pai a ni a. Uluk taka enkawl a nih loh chuan a pun ang a, i mang lam ah sakeibaknei leh rul hlir i hmu ang a, a nat lutuk avangin i la tuar zo lo mai ang. Mahse, ka hre vek a ni, ka hria....Ka âtna hi engmah lo mai a ni bik lo a nia. Thil reng reng hi a inbuk tawk vel vek a. Âtna nasa tak atangin finna a lo chhuak a, finna atang in âtna. La! la! la! Pharoah meuh pawh in khawi atangin nge pakhat a rawn inṭan ang a, khawi ah nge pakhat dang a tawp ang tih reng a hre bik lo ve. Tunah chuan tikhan zawhte ang mai in i en ngai kha en hu reng tawh lo la. I hliam ah te khan heng hnim hnah damdawi te hi ka han bel ang a, ni ruk chhungin naupang kum thum mi ang mai in i dam leh vang mai ang."

"Thildang ah chuan buai vak duh suh, tlangval.  Philea ah emaw Abouthis ah emaw Abudus emaw riahrûn rem thin a kha, tuna ka hotu pathian tih dan ang in, a khawiah pawh chuan riah hmun lo rem se, kan duh aia hma in kan la hrechhuak tho dawn si a- Osiris vang in thla bial zana Osiris hma a inhlanna thilpek tur ang mai in i taksa te chu ser leh thianghlim lo lakah an fihlim ang."

"A ni lawm ni, pipu duhtak te u.." tiin chulai hmun a inlarna hmuh a puanchhuah lai lo hre vetu  mi lo awm ve ho te chu a han zawt a, kei erawh chuan chung mipui ho chu engtik lai khan nge an lo kal khawm tih reng ka hre hauh lo mai a.

"Ani chu ka dawi hla chhampual hmang in mal ka sawm a, ka damdawi vohbik tan kawng ka sial theih nan. Dawi hla chhampual aia thil tha zawk a awm chuang lo. Chu chu in awih lo a nih chuan in nupui te nau pai thei lova an chin hun ah ka hnen ah in rawn kal dawn a nia. Osiris temple tlawh kual a, tawngtai vak vak ai fe in a hlawk zawk a, thil a ti thei zawk bawk...chu chu ka tiam a che u. Thei kung rah ṭha mi ang mai in in nupui te chuan nau an pai zung zung tawh mai ang. Mahse, chutah chiah chuan enge sawi tur tih in hriat a ngai ve thung dawn a ni. Engkim mai hi man nei lo a awm si lova...la la.!"

Chung thil zawng zawng ka han hriat chuan, kei Harmachis hian, ka lu ah ka kut ka nghat a, ka mumang mai a ni lo maw tiin ka han insik vel a. 

Mahse, chutih lai tak chuan ka han dakchhuak a. Chung mipui pung-khawm zing ah chuan putar pakhat lu ṭuak vâr vau tawh, engkim mai ngun tak uluk tak a lo chik vel reng leh keimah pawh ngun taka min thlithlai rengtu chu ka va hmu ta a.  A hnu deuh a ka hriat leh dan chuan, ani chu Ptolemy tana enthlatu hnathawk, nausen ka nih lai a pharoah hnen a min that mai tur a thurawn petu kha a lo ni reng tih ka hrechhuak ta a. Chutah chiah chuan engvang a Atoua-i kha atthlak taka ṭawngchhuak nge tih pawh ka hrethiam ta nghal bawk a.

Chu putar chuan, "I dawi hla chhampual te kha a mak dangdai hle mai, ka pi, Pharoah chungchang emaw double crown chungchang emaw Ptah, nau pai theih dan tur kalphung duangchhuak tu chung-chang pawh engmah i sawilang leh si lova...a ni lawm ni?" a lo ti a.

"Ni e...ni e...dawi chhampual thenkhat chauh a nih kha, mi mawl....tunlai ah he ram a hlim leh lawmna rimawi thlen tur hian pathian Pharaoh the piper aia tha tunge awm thei chuang ang le..?"

"Thutiam nan chuan Macedonian lal Alexander lallukhum thuahhnih aia tha zawk a awm dawn chuang em ni? Tin, nang chuan engkim i hre vek si a, Mithridates ho in Cos hmun a an lak phei kawrfual te kha an la la lêt lo em ni reng reng? A ha hnuhnung ber tu pawh Pompey a ni lawm ni, a ni em? Ropui na nen a a len vel lai khan Pompei khan Alexandera kawrfual inbel khan a leng vel thin a nih kha. Ui note in sakeibaknei vun a sin hi a ni ringawt..! Tin, sakeibaknei sawi takah chuan, he tlangval thil tih hi han en ta che u...ama fei ngei hmang in he sakeibaknei hi a chhunhlum a, tin, nangni thingtlang mite hi a hmuhpui tu leh hriatpuitu in ni bawk. A lawmawm takzet a ni. Sakeibaknei kawlh tak a ni sia a. A ngho leh a ke tin te hi han en mah ta che u, a ke tin mawlh mai hi..! Keini ang kum upa tawh tan phei chuan a ke tin ringawt pawh hi thihdan pui tham a nih hi mawle..! Tin, a taksa saw, a ruang saw...a la che deuh hrut hrut mai lehnghal a."

 "A ni tak e. Ani hi zawng tunah chuan Osiria a ni tawh miau a...a taksa te zawng nen hian. Han ngaihtuah mai phei hi chuan darkar liam ta mai a mihring thi thei pangngai ve mai kha a ni si a!"

"Awle..ruang sawngbawltu te hnen lam ah la phei tawh rawh u le.  Ni sa hnuai a a awm reng chuan a puam ang a, a puakkeh mai ang....a ruang sawngbawl a, zai hawng tu tur te tan hna a ti awlsam zaw phian maithei bawk. A ruang chungah hian tangka dere pawh an seng dawn si lova. Natron ah ni sarih chhung....chu zawng chu a chan tawk a ni tawh mai si a. La! La! Ka lei han tawng hnem zia hi aw, khua lah chu a thim dawn ruai chu a ni ta der mai lehnghal a. Ti ta che u....kha tlangval ruang khawngaihthlak tak kha, sakeibaknei ruang nen khan, inla sawn dawn lo em ni a? Khai le, nang tlangval, tikhan sakeibaknei ham na hliam ah khan he hnim hnah damdawi hi bel tlat la, na engmah i hre lo mai ang. Thil eng eng emaw hi ka hre ve nual a nia, nang, ka tupa chungchang ngei pawh hi! Duhtak, duhtak, puithiam lalber in a fapa, pharoah kut a thi ta aiawh a a fapa atana a la che hi ka lawmpui takzet che a ni. Tin, i cher hle mai...khatiang a Harmachis diktak in sakeibaknei a tihhlum theih kha ka lo ring ngai lo hrim hrim, a tihlum hauh lovang tiin thu ka lo tiam hman hial a sin!  Mi vangtlang, lal thisen kai lo, hnamchawm zing ami in hmachhawn zawk rawh se, ti in ka lo sawi hman hial a sin!"

Chutia a sawi lai chuan enthlatu putar khan, "Thil i hre tam a, a tawng pawh  i chak hle mai!" a lo ti nghut a. 

Tunah chuan a lo beisei lawk loh ang hlir in thil a kal a ni ber e, "Awle, nangni tlangval thenkhat khan he tlangval ruang hi Abouthis lam ah zawn phei ula. Midang zawng khan he sakeibaknei vun hi min lih pui rawh ule. A vun hi i hnen ah ka rawn thlen ngei dawn a nia, tlangval," a han ti leh a. "I phu vang ni hauh lovin....khatiang a mahni a sakeibaknei beih kha mimawl ber tihawm tawk chiah a ni a, mimawl chuan a thil tih man chu a hmu ngei tur a ni dawn lawm ni....a tana chhiatna chu! Mi chak zawk a i ṭhanlen chhoh hma chu nang aia chak zawk bei ngai tawh suh ang che," a ti ta a.

Mahse, kei erawh, hrilhhai takin kan inlam pan in ka haw ta a.