Cleopatra-1

Part I                                                                       Chapter-1

HARMACHIS THLAH, HATHORS THLARAU HRILHLAWK NA LEH NAUPANG PAWISAWI LO TIHHLUM NA

Abouthis a zâl thin Osiris hming in he thudik hi ka ziak e:

Kei, Harmachis thlah hi, pathian Sethi chawi len, egypt a pharoah te rorel hma daih ata tawh thlahtu te atanga biakbuk chhung a puithiam hnathawk tu, leh Osiris mithmuh a mi thianghlim leh Amenti a lalna chelh tlak ka ni. Kei, Harmachis hnam, pathian te fa, Double crown Lal thisen thlah zeding dik tak, mi te leh mi lian, mi hausa leh rethei te tan a Pharoah ka ni. Kei, Harmachis, beiseina kuhmum thliak a, vaivut a paih a raphrualtu, ropui na kawngpui aṭang a peng a, pathian aw theihnghilh ṭhak a hmeichhe thu ngaichang a, ngaithla zawktu chu ka ni e. Kei hi Harmachis, tlukchhiat na in a hneh, zahna tinreng lo hnungpuak tawh leh, thlaler tuichhunchhuah a tui tling, a mamawhtu ten an bawh huam huam ang mai a lungngaihna leh ṭahna in a bawh vel, engkim mai in a phatsan tawh, tuna a ropui na tur leh nakin zel a a ropuina tur zawng zawng nen a kâng ral vek tawh leh tih tur hmabak zawh loh in a hmuah hian, Abouthis hmun a riah run rem ṭhina hming chuan, he thudik hi ka puangchhuak e.

Aw Egypt......Khem ho ram duhlai, he thi thei mihring chawmliantu lei tha.... ka phatsan hnu ram....oh Osiris..! Isis...!! Horus...!!

Nangni Egyptian te pathian, ka phatsan hnu leh in temple chhip zum, van tawnga sang, leh ka hawisan rinna te.....Eld ram pharoah lal thisen, he ka thisen zam a luang,  leh dinhmun sang ka hawisan tak te nen....Aw, thil tha tinreng zunzam zawng zawng te nen..! A tawp khar na, inbuk tawk tur a ka kut a innghat......aw, hei hi lo hre teh u, chhiatna rapthlak tak lo thleng tur te nen, he thudik ka puanchhuah min hriatpuitu atan lo ṭang rawh se.

Hetia ka ziah lai mek pawh hian, Nile luikam leiṭha piah lam a tuipui chu thisen ang mai in a sen duk khuih mai a. Ka hma lam a Arabian tlang te chu ni lo chhuak chuan chhun in, Abouthis tlang pawng let liam ah te chuan a tla leh a. Min hriat reng tawh loh na hmun Abouthis biakbuk ah te chuan puithiam te chuan ṭawngṭaina an la hlan reng a. Thil hlan te pawh an la hlan reng a, an ṭawngṭaina ri te chu lungbang leh inchung vel ah te chuan a la thangkhawk rum rum reng tho a ni. Chutih lai chuan he ka tanna tanin chhawng sang  atang hian an puanzar phe vel chu ka thlir reng a, Kei, zahna a khat hian.

Abouthis in bang sang a an ṭawngṭai na thangkhawk, hmun thinghlim leh hmun thinghlim inkar a thangkhawk kual ve te chu ka hrethei a ni.

Abouthis, aw, boral tawh Abouthis..! I lam ah ka thinlung ka rawn hlan e..! I pindan ril ber te thleng a thlaler vaivut in a bawm khah hun tur ni te chu a rawn thleng ta si a..! I pathian te chu thiamloh chantir an ni ta, aw Abouthis..! Rinna thar lo chhuak chuan thianghlim a in lo ruat thin te chu ala rawn chhaih nawmnah ang a, tin, i kulh bang kaltlang in sipai hotu te leh sipai hotu te an la in ko tawn ang. Ka ṭap a, ka mittui thisen in a far a, heng thil thalo te hi ka sualna avanga rawn thleng a ni si a, tin, a zahna pawh chatuan a ka ta tur a ni.

Ngaiteh, heta ṭang hian ziak a dah a ni e.

Helai hmun, Abouthis a piang hi ka ni a, kei, Harmachis mi hi. Tin, ka pa pawh in Osiris mittlung in, Sethi biakbuk ah rawngbawltu puithiam dinhmun sang a luah a ni. Tin, chu ka pianni ah vek chuan Egypt lalnu Cleopatra pawh a piang ve chiah bawk a.

Ka naupan lai chuan kan kawttual aṭang in leilet zawl a mite hnathawk chu thlir in ka hun tam zawk ka hmang ṭhin a, a vantlang mimir biakbuk chhung a anmahni duhthu ngei a an lut chhuak suau suau te chu ka thlir reng ṭhin a. Ka nu chanchin erawh engmah hriat ka nei lo, hnuntui dawn rual lek ka nih in he khawvel ah min hnutchhiah in hriat loh ram ah min kalsan ta si a. Mahse, a thih hma lawk kha Ptolemy Auletes, Piper-a an tih bawk lal lai a ni a. Ka pa nupui hmasa Atoua-i min hrilh dan chuan, khatia a boral hma lawk khan ka nu chuan Egypy lal chhungkaw chhinchhiahna rul lem, dar leh tangkarua a siam, ka pa hnathawhna pindan dawhkan chung a awm chu la in ka chal ah chuan a dah a. Tin, chutianga a ti lai lo hmu tu te chuan ka nu chu pathian ten tibuai in, an ti lungngai niin an ring a, a khawsak zia maksak tak chuan nakin zel a MACEDONIA Lal ram tawp dan tur a lo entir lawk ni in an ring tlat a. Chutih hun ah chuan EGYPT lal tiang chu Egypt lal thlah thisen kai diktak kut ah a let leh tawh ang a.

Mahse, ka pa nupui hmasa chu, a tihsual, eng thil nge a nih ka hriat ve ngai loh tur thil avangin pathian nu Sekhet-in nau pai thei lo tur in anchhia a lawh ta a. Chuvangin Ka pa, puithiam Amenemhata tan chuan kei chu a fa neihchhun ka ni a.  Chutiang a hnukchat mai tawh tur ka nu in ka chunga a thiltih dan a rawn hmuh chuan vanlam a kut te pharchhovin hmuhtheih loh Pathian chu a chawimawi a, chhinchhiahna a rawn thlen tir avang in. Tin, chutia chibai a buk lai chuan Hathors Hrilhlawktu thlarau te chuan ka nu chu rawn chhungkhat in, inlarna an rawn hmuhtir ta a. Hnukchat tawh mai tur a ngaih ka nu chuan chakna thar rawn nei leh in, min muttir na nau thên bawm hma ah chuan vawi thum lai mai hmai lei si a bawkkhup in pathian chibai a buk ta zak zak mai a.

Ka mithmul chungah chuan lal chhungkaw chhinchhiahna chu dah in ti hian a au chhuak ta a:

"Nang chithlah tu chhul, chawimawi in awm la! Nang lal thlah nausen hi fak in awm rawh se..! Nang pharoah la ni mai tur hi chawimawi in awm se la! Nang Pathian, leilung ti chereu tu, Nekt-nebf chi atanga chhuak pathian, Isis thlah atanga rawn chhuak chu fakin chawimawi in awm rawh se..! Thinghlim takin awm la, Egypt ram chhung ah rorel in, a tlukchhiat na tur lak ata chhanchhuak ang che. Mahse, i ko a tla mawhphurhna hlehchhuah kawng ah i hlawhchham a nih erawh chuan Egypt Pathian te anchhia zawng zawng chu i chungah tla thung rawh se. I hma a Lal thlah kal hmasa ta te zawng zawng chunga anchhia nen, Horus hun lai atanga lalna lo chelh tawhtu te zawng zawng nen. I damchhung hun te anchhe lawh in awm se la, i thih hnu ah pawh Osiris chuan lo hnawl che rawh se. Set leh Sekhet te chuan nasa takin lo sawisa che sela, i  sualna zawng zawng te tih thianghlima a awm hma loh chuan. Tichuan, Egypt te pathian, hming mak tak tak nei te chu heng Egypt mite biakbuk ah hian chawimawi leh fak in lo awm leh sela. Awpbet tu te tiang chu tihtliah in awm bawk rawh se. Ramdang mite pen ri pawh hriat tur a awm tawh lovang a, heng zawng zawng hi i chakloh na te avangin thil lo thleng tur ang bawk in tih hlawhtlin in a awm ang."

Chutia, inlarna te a puan zawh chuan zawlnei thlarau pawh chuan a taksa chu a chhuansan leh ta nghal a. Chu veleh, ka nu chu ka mutna nau then bawm hma ah chuan tlu nghal in, a thaw chu a tawp zui ve ta nghal bawk a. Kei pawh chu ka muhil chu ka rawn ṭhangharh nghal a, ka ṭap ta chiam chiam a.

Mahse, ka pa, Amenemhat, puithiam dinhmun sang chelhtu erawh hlau leh thlabar in a khur ta a, a chhan chu, Hathors Hrilhlawktu thlarau in ka nu hmui kaltlang a hrilhlawkna thu an puanchhuah te kha Ptolemy phatsan na thu leh a laka helna a ni si a. Khang hrilhlawkna thu te khan Ptolemy beng a thleng a nih vaih chuan, chu hrilhlawkna in a a sawilan naute tihlum tur chuan Pharoaha-n a mite a rawn tir nghal dawn si a. Chuvangin, ka pa chuan kawngkapui leh tukverh te chu khar nghal in, chulai hmun a lo awm ve zawng zawng leh ka nu inlarna puan te lo hre ve tu zawng zawng te chu a hnathawh na pindan dawhkan chung a lal chhungkaw chhinchhiahna thianghlim leh, pathian engkimtithei-a hming leh chhuat a ruang let reng ka nu hming te chuan tu hnenah mah vawiin a an thil hmuh leh hriat te kha sawichhuak hauh lo tur in a intiam tir ta hlawm a.

Chung hriatpui tu te zing ah chuan ka pa nupui hmasa, Atoua-i pawh a awm ve a. Ani chu ka nu damlo enkawltu ber kha a ni a, tin, ka nu kha a hmangaih hle bawk a ni. Tunhma in engtiang chiah in nge an lo inlaichin a, engtiang chiah in nge an la inlaichin chhoh zel dawn tih lam chu engmah ka hre lova, mahse, hmeichhe lei hi zawng, engmah hian a phuarbet thei lo a chha chu ni e. Tichuan, chung thil thleng te chu tlem a ngaia a neih chhoh hnu leh, a hlauhna te chuan an kiansan deuh hnu chuan a fanu, ka nu boral hnu a ama hnute tui a min chawm tu hnen ah chuan a inlarna thu hriat te chu a hrilh chhawng ta a. Chung thuruk te chu a fanu pasal thlaler a hnathawk chaw pe tur a an kal kawng a a hrilh a ni a. A pasal chu milim chhertu a ni a. Lungpui sakhat aṭangin thlan chung a dah tur pathian lim te a kher ṭhin a ni. A nu chuan a fanu hnen ah chuan nakin lawk a pharoah la ni mai tur leh ptolemy lalna la paihthlatu tur enkawltu leh pawmtu nih chu in uluk a ngai dawn in, fimkhur a ngai awm hle mai, tiin a fanu hnen ah chuan a hrilh a. Mahse, a fanu chuan chutiang thuruk lutuk a han hriat chuan a pai dai mai mai thei ta hauh lo mai a, a ka chip zo ta thlawt lovin, zanlai ah a pasal chu kai thovin, a beng bul ah chuan a thu hriat te chu a hrilhru ve ta a, tichuan, ama chhiatna leh a fa lo la piang tur, ka unaupa hrawn tur nunna nen lam a an vai a an chhiat vekna tur thil chu a lo ti ta a ni. A chhan chu, a pasal chuan a thianpa a hrilh veleh chhawng a, mahse, a thianpa chu ptolemy tana enthlatu a lo ni reng si. Chuvangin, chung hrilhlawkna thu te chuan pharoah beng a lo thleng ta a ni.

Amah enkawltu damdawi lam thiam pakhat ṭawngka aṭanga ka hriat leh dan in, chung thu a han hriat chuan pharoah rilru chu a buai ta khawp mai a. Mahse, a lang a pau chuan hlau lo ang a awm in, Egypt te pathian hming te chu fiamthu thawh nan a hmang in, Roman senate te chauh chu atan a pathian, ṭhingṭhi a chibai a buk tur awmchhun an ni, tiin a inhrosa dum dum ṭhin a. Mahse, a ruk tak chuan a rilru chu a buai em em a, a hlauthawng nasa a ni awm e. Zan a mahni chauh a a awm lai te hian a te tuarh tuarh mai thin a, pathian dik tak pawh ni ve lo, pathian suak, Serapis hnenah te ṭap chung a ṭawngṭai in, pathian dang hnen ah te pawh ring tak tak in a ṭawngṭai ṭhin a. A muthilh hlan a tu ten emaw an lo thah mai leh a thlarau chu thlarau hremtu te kut a an lo hlan mai a hlau em em mai a ni. 

Chu mai bakah, chutia a lal na chu dinhmun derthawng tak ah a ding ni a a hriat veleh chuan pathian chhiahlawh te hnen aṭanga thuthawn eng emaw tak hriat beisei in temple ah te chuan thilpek hrawl tak tak a thawn ṭhin a. A bik takin Philae biakbuk a pathian thu puangchhuaktu hnen atang chuan eng emaw tak hriat a beisei leh zual a ni. Chutia, hmasang Abouthis biakbuk a pui-thiam dinhmun sang chelhtu nupui thi mai tur hmang a hrilhlawktu thlarauvin, nakin a chu nu fapa ngei chu pharoah dinhmun rawn luahtu tur a ni tih a puan thu in pharoah beng a han thlen chuan, ani chu a lo hlauthawng ta em em mai a. Amah vengtu zing a a mi rin deuh deuh te chu ko khawm in, lawngleng hmang a Nile lui kân a Abouthis hmun ah va kal in, chu hrilhlawk na in a sawi naute lu chu va tan a, bawmrang ah thunin a hnen a thlen tur in thu a pe ta a. Amah vengtu te chu Greek mite an nih avang in chutiang a hrilhlawk na thu leh Egypt mite puithu na tih vel chu an pawisa ve lem lo a ni.

Mahse, mak tak mai in sipai te chuan na lawngleng chu rei tak hman loh a lo awm tawh a ni a, rawih tawh tak a nih avang leh lui a an inkar kai hun tak chu lui tui kam ber lai tak a lo nih lehzel avangin an lawngleng chuan lui mawng chu a zuk hawlh ta mai a, tichuan, Abouthis kai ep chiah a chirhdup ah chuan an tang ta tlat mai a ni. Hmar thli lah chu nasa mangkheng in a rawn thawk a, an lawngleng chu a pil dawn ta mai a. Chuvelleh chuan vengtu sipai te chuan lui tui chawi tur a rawn kal mipui te hnen ah chuan an lawngleng te nen a rawn kal,  anni chu rawn chhanchhuak tur in an va ngen a. Mahse, Egyptian mi te chuan Greek mite chu an huat tlat avangin tuman chhanchhuah an tum lo. Vengtu sipai te chuan pharoah mi tirh te an nih thu an sawi hnu pawh chuan mipui te chuan chhanchhuah an la tum chuang lo a, engvang a chulai hmun a rawn kal chu nge an nih tiin an la zawt duh lek chauh a. Chutah, vengtu sipai zinga tel ve, mi tilreh pakhat, a hlauh luat avanga rui tak mai a zu in chuan, chulai hmun ah chuan hrilhlawk na in a sawi nausen, Abouthis biakbuk puithiam dinhmun sang luah tu, Amenemhat fapa, nakin lawk a pharoah la ni mai tur leh Egypt ram atanga Greek mite la umchhuak tu tur tihlum tur a rawn kal an nih thu a rawn auchhuah pui ta lung lung mai a. Chu veleh, mipui te chu hlauhthawnna in an khat ta a, chutia, ringhlel a tuilairap a awm reng ai chuan tiin an lawng-leng te chu a thlun phelh in, chu zurui pa thusawi chu enge a awmzia tih pawh hre miah lovin, chhanchhuah hna chu thawh an tum ta mai a. Mahse, an zing ah chuan lo neitu pakhat, ka nu ṭhian hnai tak leh inlarna a puan lai pawh a a bul hnai a lo ding ve chu a awm ve a. Chung thu te a hriat velleh chuan a theih tawp a chak a tlan in, darkar khat hmun thum a then a hmun khat lai mai chu tlan hlir in a rawn tlan a, min muttir na hmun a rawn thlen hma loh chuan. 

Vanduaithlak takin, chutih lai chuan ka pa chu kulh bang sang vei lam a thlanmual tlawh a a thangbo lai a lo ni hlauh mai a. Pharoah a sipai te lah chu sabengtung chungah chuang in theih tawp in min rawn umzui bawk si a. Chutah, loneitu chuan ka pa nupui hmasa, Atoua-i, a kamtam avanga chung chhiat na zawng zawng rawn thlentirtu hnen ah chuan min thah tumtu vengtu sipai te chu an rawn hnaih hle tawh thu chu hmanhmawh takin a hrilh a. Engtia hma lak tur nge tih hre lovin, hrilhhai takin an han in en he haw a. Min thukru ta ringawt se, pharoah a sipai te chuan min hmuh hma loh chuan kan in leh a vel chu an lipse mai dawn si a. Mahse chutih lai tak chuan loneitu pa chuan kawngkapui lam chu va en in, naupang lo infiam chu a va hmu a, chu veleh, "Hmeichhia, saw nau saw tunge..?" tiin a han zawt a. Ani chuan, "Ka tupa a nih saw,"ti in a lo chhang a, "Haemachis lalfapa, heng thil thalo zawng zawng bul tum tu naupang unaupa hrawn a nih saw," a ti zui zat a.

Loneitu vek chuan, "Hmeichhia, i tih tur chu i hria e...tun ah ti nghal rawh..!"a ti leh a, "Pathian thinghlim hming in thu ka pe a che," a han ti zui a.

Atoua-i chu a khur nasa ta mai a, a chhan pawh chu naupang chu ama ril a rah ngei a nih vang a ni.  Mahse, chuti chung chuan a tupa chu a bualfai sawk sawk a, silk puan silhfel a thuam in, ka mutna thin nau then bawm ah chuan a muttir ta a. Kei vethung chu ka hmai ah te chirh tat in, ka tlereuh leh incheina te chu min phelh sak a, kan tuallai a tuihawk leh chirh vel ah chuan min infiam tir a, kei lah chuan lawm takin ka lo zawm ve mai bawk a.

Loneitu pawh chu a biru ve nghal a. Chu veleh vengtu sipai te chu rawn thleng chawpchilh ve nghal in, chu in chu Puithiam dinhmun sang chelhtu Amenemhata chenna a ni em, tiin ka nu hrawn chu an rawn zawt a. Ani chuan a nih thu a lo chhang in, inchhung lam a lut tur in a sawm nghal a. An chhawl te a hal tawh em avangin khawizu leh bawnghnute a hlui nghal hlawm bawk a.

An ei a an in zawh chuan an zing a mi tilreh pa chuan nau then bawm a mu chu Amenemhata fapa a nih leh nih loh a zawt ta nghal a. Ka nuhrawn chuan, 'Aw, ni e," ti a lo chhang in, nakin a pharoah la ni mai tur a nih dan vel hrilhlawk na te chu a hrilh ve ta hlawm a.  Mahse, Greek sipai ho chu an nui mai a, chutah, Sipai pakhat chu a tho lawk a, naupang chu  la kang lawp in a chemsei chuan naupang lu chu a ṭan ta nghal a. Mi tilreh pa chuan pharoah thupek ziah na lehkha chu rawn phawrh in hmeichhia chu a entir a, pharoah hnen aṭanga phalna hmu vek a thil ti an nih thu a hrilhfiah nghal bawk a. Atoua-i chuan anni kal tur chu, a pasal hnen ah a fapa chu a lu tellova lal a la nih tur thu hrilhsak tur in a ngen zui nghal a.

Chutia, an tih tur ti zo fel, an kal tur chuan tual a ka lo infiam lai chu min rawn hmu ta a. An zing a pakhat chuan Harmachis lalfapa chauh lo pawh naupang dang saw ta saw a la awm e, tiin a rawn auchhuak a. Eng emaw ti chhung chu min thah ve tur nge tur loh tiin an han inngaihtuah buai leh rih a. Mahse, a tawp a tawp ah chuan engmah ti lova min kalsan zai chu an rel ta a. An rawn kal chhan ber, ka lu bung ni a an ngaih, ka unaupa hrawn lu bung chu keng in an chhuak ta a, naupang pawisawi lo han thah ringawt mai chu, an thisen in chuti takin a ngam bik lo a ni.

Nakin ah chuan an thah tak naute nu kha bazar atangin a rawn haw ve ta a. Thil awm dan a han hriat chuan nasa takin a thinrim ta a, a pasal nen chuan Atoua-i chu thah ve nghal a, kei chu pharoah kut a min pek chu an tum ta a. Mahse, chutia an buai lai chuan ka pa chu a rawn haw ve chiah a, thil awmdan te chu a rawn hrethiam nghal in, Chutia buaina lo siamtu, an thah tak naute nu leh pa te chu man tir in, temple hmun thim ber lai ah a khung tir ta daih a. Chuta chin chu a tu amah in an hmu leh ngai ta lo.

Mahse, vawiin ni thleng hian kha naupang kha ni lovin keimah ngei hi khang sipai te khan min that zawk se tih hi ka duhthusam a nih bakah, pathian duh dan pawh a nih ngei ka ring nghet tlat a ni.

Chuta chin chu Amenemhat, puithiam dinhmun sang ber chelhtu chuan Pharoah mi leh sa ten an thah tak aiawh a a hmun luah tur in min ruat ta a ni.