Bung-9

 Kid Rodelo by Louis L'Amour

BUNG KUANA

An zinkawng chhunzawm tura an insingsak leh lai chuan khawvar lam arsi pawh an chung lamah a la eng de neuh neuh a. Cholla hling buk te chu a chhun tle sur mai a. Chulai tlangkang hmun hlui a lei leh lung ral lam tawh te chu an kalna tur kawng ti rualrem lo thei tur ang berin an rawn biboh pawng chhuak nuk hlawm a. A landan chu a nelawm loh hle ringawt mai a ni.

 An zavai chuan an ngawi nghiai hlawm a. An sakawr zin han hreng nghet vel thawmte, thuamphurtu sakawr te thilphurh an siam ṭha vel thawmah chuan savun innawt ri hi a chik leh ṭawt ṭawt ṭhin a. An bungraw phurtu sakawr rualte pawh chu an chawrche takzet tawh a ni. Rangkachak chu pound za chuang hreta rit niin, an han phurh reng takah chuan an hah rimtawng ve tawh em a ni.

Rodelo-a pawh a sakawr phenah chuan dingin, a silaite chu uluk takin a lo endik mêk a. A mu pawh a inthun ṭha a, a mu dangte pawh phawrh mai theih turin a inthiat ṭhap a. A inpeih ta hle mai. A paia a thun leh pah chuan a han sawi thawl nghal a. Rang taka phelh theih turin a hrenbehna chu a han dah thâwl sa deuh a.

Nora-i chu sakawrah a han chuang hmasa ber a, midang te pawh chuan an zui ve nghal thuai a.  Tumah chu kal nghal mai lovin an ding khawmuang hlek a. Chutah, Rodelo-a chu hmalamah rawn inkhalh pheiin hma a hruai ta a. An hmaa kawngṭum hlui leh chiang tawh lo tak chu zawh zelin, engemaw chen khawchhak lam a han pan phawt a, chutah chhimlam zawngin a han her leh a. Pinacate ram hêl deuh zawngin a kalpui ta a. Harbin-a chu a bulah rawn kalin, "Khawi lam zawnga kal zel nge I tum a?" tiin a han zawt a.

"Chhim lam panding I duh chuan I kal thei ang. Tunah chuan kan hel kual mek a nih hi."

"Enge chutah chuan awm a?"

"Khuarkhurum zau deuh a awm. Chu khuarkhurum leh Pinacate tlang chhip inkar chu I la hmuh ngai miahloh lung hriam tak tak indelh thuah ûrhna leh tlangkang lung keh them lum khawmna a ni a. Kaltlangna kawng a awm a nih pawhin kei chuan ka la hre ve ngai lo a niang. Tin, thim thamah phei chuan ka tum chhin buai dawn bawk lo."

Rûm nghut chungin  Harbin-a chu a tawlh kir leh hnu hnu a. Rodelo-a chetdan engkim chu a ringhlel em em vek tawh a ni. A rinhlelhna chu a zual tial tial a. A thin a ram hle tawh a. Engtik lai pawha puakkeh mai thei dinhmunah a ding reng tawh a ni.

Rodelo-a chuan kawngṭum chiang vak lo chu thlangin, lung lianpui  dum deuh keh kâk karah chuan a luhthlak pui ta a. Cholla ngaw hmun a lo lang a.  Kawng dik tak an zawh zel theih nan a hma a kawngṭum chu uluk taka enin a han thlir vang vang a. Kal theihna tur khan engemaw zat chu a han hmu a. A engamah chu a lang chiang thei lova. A tawpah  zawh tur ber chu a thlang fel tain, chu lamah chuan muangchangin a kal leh ta a. Cholla hnim zam te chu a vaikiang pah hram hram a. A hling ther fur mai te chu taksa a a luh palh vaih chuan amahin a lut thuk zel thei lehghal a. A na duh em em a ni. Yaquis ho an awm hnaih leh hnaih loh pawh an hre si lova, chutiang lunghmun ah chuan awri a thangkhawk thui theih zia hriain tumah pawh an ṭawngri ngam lova.

Tuikhur an chhuahsan hma khan Rodelo-a chuan tui a lo in ṭeuh tawh a. Nora-i bula han kal pah chuan, "Thlalera khawsa ṭhin Indian ten vawikhat chu min hrilh tawh a. Taksa in tuiril a hloh reng reng chuan thisen a mi a kalral hmasa ber a. Hling ilo velin min thai rin palh chang pawha thisen a chhuah tawh mang loh dan aṭang khan I hre mai lawm ni. Chutiang chu a dik a nih chuan, chetvel a tih harsat bakah rilru thlengin a khawih buai thei ṭhin. Mingote chuan an tuithawlah a tam thei ang ber ken an tum ṭhin a. Indian ho erawh chuan a remchan dan angin an in nghek nghek zawk ṭhin. Chu chuan mi a chelh rei thei zawk tih an hre tlat a."

Tun dinhmunah chuan an la tuar nep rih viau nain, a hma ni engemaw zata an taksain tui a tlakchhamna kha tuikhur tui an in khan a ṭhen a zar chauh an hnawh khat thei a. Tui an in tam theih dan em em chu hmuhnawm tak hi a ni ringawt tawh mai a ni.

Cholla buk kara engemaw chen an kal hnu chuan hmun veng lai deuh an thleng ta a. An han hawi kual hlawm a. Badger-a chu Rodelo-a lamah rawn inkhalh pheiin, "Dan, sakawr rual zingah hian sakawr kebai a awm tlat mai," a han ti a.

Rodelo-a leh midangte chuan an han bâwr deuh laih a. Sakawr kaihza chung chiah ah chuan Cholla ṭang chu a lo bet fur mai a. A ke ah chuan hling te chu lo bur furin, a hnungzang chu a lo thi ṭuam ṭuam bawk a.

"Kan chhuah zalen mai a ngai dawn a ni," Rodelo-a chuan a han ti a. "A phur te kha sakawr dangah sawn a ngai dawn a. Kan theih dan danin kan in phurh sem mai a niang chu."

"A thi angem?" Nora-i chuan a lo ti a

"Amah hi maw? Keini ho aiin a sehhel zawk daih a lawm. A ke leh a hnung vel hi chu hun engemaw chen a na mai thei a. Mahse, Tuikhur lamah khan a bai thleng thei ang. Tui pawh a tam tawk kha maw."

"Enge a ei ang?"

"Nizana a ei ang kha a ei mai ang chu. Ram beram ki sei chi in an ei ang te, hnim awm thei ang ang a ei ang a, a dam chhuak thei ang."

Midangin a phur an lo hlânthlak lai chuan Rodelo-a chuan hling tang te chu pakhat te te in a lo phawi sak a. Chutah a mawngah chuan a han beng taih a, sakawr chu an chhuah ta a. Hun an khawhral leh nual ta mai. Chutah anni ho pawh chu an che chhuak ve leh ta nghal a. Tunah chuan khua pawh a lo eng tawh a.

Dinhmun pangngai angah chuan Cholla in a hliam sakawr kha chu a dam leh vat dawn a. Tin, chhawr rim tawh loh niin, ama tlat tlatin a tei vel tawh dawn bawk nen. A hrim hrimin, Cholla hlingin a chhunna hi a na bik em em a. A ṭangin mi a man fuh tawh lah hian lak kian mai mai a harsa hle bawk a. Rodelo-an hling a phawi thiam dan awlsam ber chu chemte a kher chhuah emaw, hmawlh a chehbeha phih chhuah thut emaw  a ni deuh mai a. Vun leh tisa kara inphum nghet tawh laklawh ve thung chu, a phawina hmanruah a awm loh chuan ha hmanga seh beha  phih chhuah a ngai ṭhin a ni. Tuna an kawng zawh mêk lunghmuna kawng-ṭum hi khawilamah nge a chhuah phei tih Hat-a chuan a hrechiang em em a. Chuvangin, an chevel hmu phak renga pakhat a dah bak midang ho chu an hmalama lo chang turin a ruat fel vek tawh a ni.  

Ni pawh kâwlkilah a rawn chhuak leh ṭan ta a. Lung te chu meilingah an chang ta emaw tih mai tur a ni a. Thlaler boruakah chuan laiking bêl rawh chem chem leh thil hmuhsual palh a tam leh dawn hle  a ni. Dan Rodelo-a chuan a hmaia thlantui luang zawih zawih chu a hre thei a.  A kawr hak karah chuan luang thla zelin, a awm lamah a luang zawih zawih mai a. Indian ho vang chauh pawh nilovin, chu thlaler boruak avang pawh chuan a sakawr khalh pawh a fimkhur hle a. Yard khat lek lek a hla ngaihtuah chungin a kalna kawng chu a thlang uluk hle a. An ke pen tin maiah chuan Cholla hling te, Ocotillo te, rah sual palh mai hlauhawm em em lung tohlâwt hriam tak tak a awm fer fur a. Chutah chuan a sakawr chu dim takin a kaihruai zel a. Engkim mai chu hling, zum leh hriamin an inthuam ta vek emaw tih mai tur a ni a. Thilnung che thei tawh phawt, hnim leh ramsate chu chulai hmun rapthlaka dam khawchhuak tura inruahman vek an ni hian a hriat a. Thlalêrah chuan, hmun hlim nuam lamah pawh rul te an lo inkual reng thei a. Lung nâl leh phihrit tak tak chunga kal dan te thiam a ngai a. Hmun awih ṭên chhe tak tak a kal dan te pawh hriat a ngai hle a ni. A chang leh ṭiaudup thûk tak tak te daikai a ngai a. Chutiang kara han chet vel chuan thahrui a hehin pachang meuh pawh an chau chhe thuai mai ṭhin a ni.

Tunah chuan Rodelo-a pawhin silai nen an ri rup rup har vak tawh dawnlo a ni tih a hrechiang hle a. Tun aṭanga hun reiloteah hian tupawh mai chu nunkhaw chhuah hram hram tumin thi leh thau pawlhin an ṭang tawh dawn. Chu chu tute pawh hian an hai bik lo. Helai hmunah hi chuan thihna leh nunna inkar hi a zim em em tawh a. An sakawr ke pawh tliak palh thei reng a ni a. Chutiang a nih chuan, ke in an kal a ngai ang a. Tlanchhuahna reng a awm tawh lo. Tui tello chuan vanneih berah pawh darkar sawmhnih pali vel chu an daih mahna. A damchhuak chhun te pawhin ni thum ni li bak an daih lovang.

"Nangmah kha in veng fimkhur hle ang che," tiin Rodelo-a chuan Nora-i chu a han hrilh a. "Cholla bukah khan I intauh palh vaih chuan a hling dawrzawn khat aia tamin a chhun nghal dawn che a nia. Pakhat lek chhun pawh hremhmun rim nam rum rum khawpa nâ a nia."

Tunah chuan kal chak lam chu an buaina pawh a ni tawh lo. A chang leh awih êm êmah te an kal a. Cactus hling leh lung hriamah te chuan an inhliam pheng phung a. Tawlhthlûk palh hlek pawhin hling zinga tlak nge lung hriam a insawh tih a ni mai. An hmalama kawngṭum, khân niawm tak lo veng deuh chuan a ngaih a tih ṭhat vak loh avangin Rodelo-a chu vawihnih lai a ding a, sakawr aṭanga chhukin a va enchiang ta ngat nghe nghe a. A fimkhurna chuan rah rawn chhuahin, chu kalkhân pahnih chu kawng diklo lam a lo ni a. 

Harbin-a hmel chu a nelawm loh kher mai. Rodelo-a lam chu a melh âwl lo va. Nora-i chu Rodelo-a bul hnaia a awm deuh zel avang chuan chu Gunman thikthu chhiatna chu a lo zual ta deuh deuh a. Tom Badger-a erawh chu dam khawchhuah lam hi a thiam ve zawng tak a nih avangin, a insûm thei em em a. Engmah pawh a sawi ve ngai lo.

Tlângkâng vaivut phihrît lai chu an thleng phei ta a. Gopher-a lawn chho ṭan chiah chu a tawlh ta thut a. Hnung zawngin a tlu ta a. Cactus hung karah chuan a hlawm thla nawk a. A sakawr din chhuah leh  tum tal vel pawh Cholla hling chuan a lo chhun sup sup a. Gopher-a chu a rawn bawkvak chhuak a. A hnungzâng  leh a nâk velah chuan Cholla ṭangte chu a bet nghal fur mai a.  

Harbin-a chu thinrim deuhin a au tuar a, "Mi a pa, zeilo lutuk mai.! Nangmahin inbuaipui ang che! Kei chu ka kal zel dawn!"

"He hmunah hian kan awmho vek a," Rodelo-a chuan a lo ti a, "Thukhat vuain kan awm tur a ni."

"Tunge chutiang chu a ni ti a?" Harbin-a thinrim chu a alh lo chauh a ni.

"Keiman," Rodelo-a chuan a lo chhang a.

Engemaw chen chu a reh ta ṭhap mai le. Harbin-a chuan a dinglam zawnga Rodelo-a hmachhawn thei tur chuan a sakawr chu a han pawt her hret a. A kut chu silai bul chetah a dah ta. "Tuifinriat kam chu a hla vak tawh lo bawk a. kan mamawh tawh lo che." A han ti a.

Dan Rodelo-a chu leiah chuan chhuk tawhin, Gopher-a bul chu a lo thleng phei tawh a. Chemte chu a kut velamin a keng a. Engtiang takin nge chem vawm chu a la thiam ang tih te chu a han ngaihtuah a. Silai a chuh emaw chemte vawm emaw zawk zawk chu a ti thei ve ve a. Mahse, Tâninah kum khat lai a tân tawh avangin a inhman lohna a rei tawh viau mai si.

Chêt an thawh hma hret chuan silaimu hi a lo ving thuak a. Silai puak ri thangkhawk rum rum chu an hre nghal a. Chutah, an tuithawl pakhat atanga tui baw hawk hawk ri chu chiang takin an hre ta vek a.

"Min la mamawh," Rodelo-a chuan a han ti sap a. "Tui neilovin I awm dawn."

Harbin-a chuan thutiam engemaw han chham sup sup pahin Tuithawl atanga tui buak zawh thleng chuan a thlir tlawk tlawk a.

Rodelo-a pawh chemte nen a hna tur lamah chuan a bur nghal char char a. Gopher-a taksa a cholla hlîngte chu a han phawisak hmasa phawt a. Chutah a sakawr lam chu a han pan leh a. Badger-a chu amah pui turin a sakawr atangin a lo chhuk thla ve ta bawk a. Gopher-a leh Nora-i chuan sakawr an lo chelh lai chuan Badger-a puihna in hlîng te chu a phawichhuak ṭan ta a. Sakawr natuar kawlh deuh pawh chu, an ṭanpui dawn a ni tih hrethiam niawm takin a awm ve ta hle hle a. Darkar khat lai hun an hmangral leh ta. 

A tawpna tur hlîng phawi pah chuan, "He lai hmun hi I chhuahsan ang ule," Rodelo-a chuan a han ti a. Cactus bawn hmun kara hmun veng deuh laiah chuan kal an siam ṭan leh ta a. Chutah a hnung lama Cholla zar silaimuin a rawn chhawk ṭhawt chu a hre thei a. An inring leh ta ṭhap a. Tumah hmuh an neih tâk lohah chuan an che chhuak leh ta a. 

Khawlum êm êm hnuaiah chuan a muangthei ang berin an che vel leih leih thei chauh a. An veilamah chuan tlangkang rawn chhuahna khuar-khurum chu a awm thluah a. "Hêng lai velah hian tlângkâng za tam a awm ngei dawn a nih hi," Gopher-a chuan a han ti a "Hetiang zat a tam hi ka la hmu ngai lo."

"Brady-a chuan zanga aia tlem lo a chhiar thei," Rodelo-a chuan a lo ti a. "Kum engemaw zât kalta khan he lai velah hian a awm a. Ramchin chu midang ho ai chuan hre tak a ni."

Tlângkângin a rawn vawrhchhuah lung ho chu khuarkhurum kotlângah chuan an intiang ûrh mai a. Lei chhungril sa luanna hmunhlui chu a lei thar deuh zawk ten an khuh chhawng leh a. Khuar leh khichat a awm nek nuk a. Cactus lah chu khawi laiah pawh chuan an duah hluah hluah mai a.

Chhûnlai velah pawh chuan an la thleng hla lo hle mai a. Vawi khat pawh her dikloh palh vaih chuan khurkhurum pawhtu kawnga kal a ni mai a. An han kir leh rih ṭhin a. A tawpah chulai hmun awih leh leimin dam leh tawh awmna hmun paltlangna kawng chu an hmuchhuak ta a. Mahse, kawngṭum awih lutuk an kalna ah chuan sakawrte chu an tlu leh phat phat ṭhin a. An ke te chu an ti-na zo vek a.

Vawikhat phei chu  tlângkâng vâp hmunah darkar khat chhung lai an kal a. An hmui hmai leh thawmhnawte chu a bawh thûr mai a. Chûng tlângkâng awmna khuarkhurum kotlangah te chuan fimkhur elkhenin an kal a. Vawihnih lai chu theih ang ang a sakawrte tha an ren a tul avangin an chhuk a, ke in an kal nghe nge a ni. Tan khawh thei tawh miah lo tura vuak zal tawh Sal ang maiin chau takin an kal hneng hneng mai a ni.

Vawikhat chu laiking hian kawng a rawn kân zawk a. Chubak chu thil che eih pawh an hmu leh tawh lo. Rûl leh ramsa eng chi mah hmuh an nei ta rih lova. Vawi tam chu Indianho pawh hmu in an inhre na a, inkahna erawh a awm zui ta rih lo.

Leilung sa lutuk avang chuan hmun tinah laiking bêl rawh chem chem hmuh tur a awm a. Hla taka tlangdung te chu a rawn lang hnai kuar a. An hma lawkah chuan diltui tling niawm tak te pawh an hmu thei a. An va thlen phei chuan a lo hla leh duai a.

"Kan mitvaiin thil kan hmu sual mai mai a nih hi," Badger-a chuan a han ti a.

A hmuite chu a rêp khi phawk phawk tawh a. An ka leh hrawkte chu a ro huam huam a. Tute pawh chuan an tuithawl la neih chhuna tui inchhek ri chu chiang takin an hre thei vek a.

An rin aia hmain tlângkâng hmun bumro tak aṭang chuan Phaizawl, thlaler hnim chi khat, Chasimo leh Creosote ṭo-na hmunah an chhuak thla hlawl a. Chungte chu a hlawma ṭo lovin yard za tam bialah chuan khat dan inang ṭhapin an lo ṭo buk leih hlawm a. Anni pawh a khawma kal hlei thei lovin yard tlem te te a inthlau nuaiin an kal a. Nora-i leh Gopher-a chu an kal hnuhnung ber a.

Chu chawhnu lam thlaler boruak reh ruih chu silai puak thawm chuan a rawn luahkhat ta. Rodelo-a sakawr ke hma lam bul chiah chu silai mu pakhatin a dawn dêng khu laih a. Ani chuan rang em ema a silai phawiin a lo chhang lêt nghal vat a. An chhak lung lianpui kar chu a han rin kah teh ngawt a. A hnunglamah chuan thi tur au rawl hi a han hria a. A sakawr chu a han pawt her vat a. Chutih rual chuan, midangte pawh an bul vela lung hmun lamah chuan phen tur zawngin an sakawr nen an tlan darh sung sung a. Mahse, Gopher-a chu a lo tlu reng tawh a, a thi fel dêr tawh nghe nghe a ni. Sakawr chung chuang chunga tlanpelh pah chuan, Rodelo-a chuan vawihnih lai chu kah fuh a ni tih a han hmu a. A lu ah leh a nghawng-ah.  Sakawr rualte pawh chu an lo let phung mai a.

Rodelo-a chu hmun ualau laiah chuan dingin hlauhawm lo kalna lam chu a hmachhawn a. Che hlek a awm pawha kap mai thei turin a inring em em a. Mahse, Yaquis ho hmel awm ang reng reng a hmu lo.

Rangkachak chu sakawr rual tlu phung ho thil phurhah chuan a awm a. Gopher-a sakawr erawh a la dam a. Mahse, cholla hmuna  a tlakna avang khan a dinhmun chu a ṭha lo hle a ni. Tunah chuan behliang mûn hun vel a ni tawh a. Engtia hlâ nge an kal tawh ang le? Mêl li emaw mêl nga emaw vel a ni tawh angem? Chu ai pawh chuan a tawi mahna. Tunah chuan Gopher-a chu a thi ta, Sakawr tha tak takte pawh an boral ta. Tuithawl pawh an nei ta lo.

Rodelo-a chuan Gopher-a sakawr chu a han man a, a zinte chu a phelhsak ta a. Badger-a leh Harbin-a lungpui phen aṭanga an rawn chhuah a, Nora-i’n a rawn zui phei mek lai chuan sakawr rual phur te chu a lo phelh mek a. Sakawr zin ipa rangkachak a dah sawn lai chuan an rawn pui ta a.

Badger-a chu Gopher-a leh rengna lamah chuan in herin, "Thil theihnghilh I nei dawn tlain ka hria, Joe." Tih pahin Gopher-a ipte aṭang chuan rangka-chak pawisa dollar sawmhnih tlang hi a han phawrh a. "Khang Injuns ho tana hnutchhiah ringawt atan chuan a ṭangkai awm lo em mai."

"Vanneihna thlen turin han vawrh teh," tiin Joe-a chuan a lo rawt a.

Badger-a chuan boruakah chuan a han vawrh vir a. A man leh hma chuan Joe-a chuan rang zeta lo banin a hum ta hmiah a.. "A lawmawm e, tihder hi chu I nuam ṭhin e," tih pah chuan a han ṭhen sak a.

Tom Badger-a chu a ding vung vung a. A mitmeng chu a vawt ruih mai. Chutah a sakawr lam chu a pan ta a. Rodelo-a chuan tuithawl la awm chhun chu Nora-i pek pahin, "In rawh," a han ti a.

"Ka la awm thei a lawm."

"A sawi ang chuan ti mai rawh," Badger-a chuan remtihpui tih hriat takin a lo ti ve a. "In rawh le, Nula."

Harbin-a lam chu a han melh leh zauh a. "Teh reng mai," a lo ti ve a. "I dam khawchhuah hi ka duh a lawm."

Engemaw zât chu a han lem a, chutah Rodelo chu a pe lêt a. Ani chuan Badger-a pe ve lehin, ani in Harbin-a, a hnen a rawn kir leh meuh chuan a mawng kil luah pawh a awm tawh mang lova. Mahse chu ringawt pawh chu hmui leh a dangro hnawn nan chuan a ṭha thawkhat hle a ni.

"Paih daih teh," Harbin-a chuan a lo ti a. "A ruak ri kha ka ngaina lo."

"Tuikhur dang hmu leh ta ila? Engin nge tui kan ken tak ang? Tumah chuan thlalêra tui thawl paih mai mai chu an ti vak lo ṭhin a sin.."

"Thil min hriat chhuahtir zawk mai," Badger-a chuan a han ti a, "Chu chu kan nula hian Tui awmna a hriat thu kha a sawi a… I la theihnghilh lo’ng chu maw?"

"Tuifinriat lam kan panding tawh ang chu ka lo ti," Harbin-a chuan a lo ti a said. "Engtia hla nge la ni ang le?"

"Hla tak a ni," tiin Rodelo-a chuan a lo chhang a.

"Hla lutuk i ti reng mai a. Tui zawngin hun kan khawhral chiam anga, kan hmu zo leh si lo ange?"

"In bumkawina chi khat te pawh a ni thei ang chu," Rodelo-a chuan a lo ti leh mai a. Badger-a chuan Nora-i en chungin. "Tui awmna chu I hria em?"

"Tui awmna ka hriat chu, Pinacate chhim tawp lamah a ni."

"Tuna kan awmna aṭang hian a hnai viau tawh ang."

Engmah sawi leh tawh lovin an che chhuak ta a. Dan Rodelo-a bawk chuan hma a hruai leh a, Nora-i hma chiahah chuan kalin, "Ram chin chhinchhiahna engemaw hriat I nei em?" tiin a han zawt a. "Hei hi khawi lai hmun nge a nih engtin nge kan hriat ang?"

"Ka hriat theih mai ka ring."

Rodelo-a chuan makti takin a han thlek zawk a. "He ramah hian I kal tawh  elaw?"

"Naupang chhia mai ka la nih laiin."

Sakawr chungchuan pah chuan Rodelo-a chu a rawn inher thut a. "A nih chuan nang hi Nora Reilly I ni hrim hrim ang!"

"Nora Reilly chungchang enge hriat I neih?" tiin a  lo zawt a.

"Gulf-a lawng chhia kha......... kum sawmpariat emaw sawmpakua kalta a thil thleng kha.. Mi tlemte Yuma kai turin lawngin an kal a. Li tengsâwla tui fawn avangin an lawng chu lungpuiah a insawh keh ta a. Mahse an kai thei a, ramri lam hnaih khaw te tak te Sonyata lamah an kal ta niin ka hria.."

Engmah sawi lem lovin Nora-i chu a lo bu nghat a.

An kal zel a. Bungbel kehthem hi an hmu ta phut a. Tuiêk buang lam hian a lo bawh nual tawh a. Rodelo-a chuan en chian deuh tumin a han pan hnai a, muangchangin a sakawr chu a han hel kual tir a. Lungpui hmun khat lai chu rawng var hian a lo inṭial a. Hmanlai mite hnuhma niawm tak hian a lang a.

Chulai hnuhma chu sakawr nen chuan a han chhui hlek a. Bungbel kehthem tam zawk a lo awm a, tui pai nana an hman ṭhin bêl chikhat, Olla te chu a han hmu a. Tui luankawr angreng deuh chu en zuiin tuikhur chu a han hmu a. .. a lo kangchat vek a..

"Tui chu awm ngei tur a nia sin maw le," thâm deuh ṭuakin Badger-a chuan a lo ti a. "Ruah pawh a sur reng sia."

Tuikhur châwmtu tui luankawr khar chiaha lungpui lo tla hmuk chu Rodelo-a chuan a han kawk a. Tui luang chu chulaiah chuan tawpin vaivut ah chuan a relh bo ta niawm tak a ni. A sakawr aṭanga chhukin lungpui lam chu a pan ta a. Lung chu lum sawn tumin a han bei ta a, a tawpah chuan sir lamah chuan a kuai let thei ta a. Pa pahnihte lah chuan puih an lo tum lem hlei lova.

"Engvangin nge khatia hun I khawhral vak a?" Harbin-a chuan a lo ti a. "Helam kawngah hian kan kal tawh dawn chuang hleinem."

"Midang tuemaw chuan an la mamawh maithei a sin."

Rodelo-a chu a sakawrah chuan a chuang leh a. Lung lumsawn tuma a beihna lamah khan a chau hle mai a. A chakna la neihchhun te pawh chu a hmang zo ṭhelh chu a ni e. Papago Tanks an chhuahsan aṭang khan an tui neih chu a zo a ni thawthâng tawh a. Nisa hnuaiah an kal hrep tawh bawk nen. Tunah chuan an thisen te pawh a khang thei deuhthaw tawh niin a lang. An chevel pawh a muang raih ta mai..

Mahse, Olla awmna an kalpelh pah chuan a han chhar hram a. A sakawr zin hmalamah chuan a keng pah ta a. Tui an hmuh leh palh tak hlauh chuan a ṭangkai dawn khawpin a hria a ni.