Bung-7

 Kid Rodelo by Louis L'Amour

BUNG SARIHNA

Dan Rodelo-a chuan a puakruk hren behna chu phelhin, a kut chuan silai chu a han lek kual vel a. Buaina siam chu a duh lo. An zingah hian tum bulfûk tak neiin a lo tel ve a ni. A thiltum chu silai hmang kher lova tihpuitlin theih nise a duh ber a. Chutiang lo zawng chuan thil kal ta se, loh theih lohvin Harbin-a nen chuan silai a inbeih ngai ta se, enge a an ang tih chu a hre ngam chiah bik lova. Harbin-a hian a mi thah tawh te hi tihpalh thil maia that a ni lo tih erawh a hrechiang em em a ni. Chuvangin, silai kapthiam leh mi hrât-khawkheng tak a ni tih pawh a hai lo. Tom Badger-a erawh hi chu pa thluak vawt raih mai leh fimkhur thiam em em, mi chotuah thiam tak a ni a. Chutih lai erawh chuan, a tu ve ve pawh hian Gopher-a lo tel ve hi an hisapah a tello tih erawh chu a rindan a ni thung. 

Rodelo-a hi a telvena ni miahlo dan bawhchhiatna avangin taninah khung a ni a. Chu chu thuhran nise, mi pangngai tak takte laka a hming-chhiatna leh thil sual ti ve tlata an hriatna chu a rilru tina bertu chu a ni. Heng zawng zawngah hian pawi sawilo a nihna chu fiah a, tarlan a duh a. Chumi hnuah helai ram bial hi chhuahsan hmiah a tum bawk a ni. A kalpui ten an rin loh em em na leh hnawk an tihna chhan - an thil neih vel chuan a tibuai hran lo. A neitu dik tak hnena pek kir leh erawh a tum ruh hle a ni. 

Nora-i chuan mei vilin Coffee chu a lum so mek a. Badger-a chu mei eng piah deuhah, anmahni hnungchhawn titih deuhin a thu kun nguih a. "A fan reih rawih nâ-in, a va manhla si em!! Danny, tui awmna min hruai thleng leh ta." a han ti a.

"Inthun khat tha hle rawh," tiin Rodelo-a chuan a lo chhang a. "I theih ang tawka tam kha in la. Thil duh awmlo ber berin min la hmuak mek a ni."

Harbin-a chu a lo ngûk hruih a. "Mahni chauh pawhin ka tawn tlang thei tawh awm em mai."

Rodelo-a chuan a koki a han san ak a. "I duh dan dan chuan I awm thei  alawm Harbin, mahse, ka puih theihna chen chenah chuan tumah hi tawhsual tawkin boral lo se ka ti mai a ni. Helai hmun leh tuifinriat kam inkarah hian ṭiaudup tam tak hmun hrang hrang a awm a. Tuiin tur lak lehna pakhatmah a awm tawh bawk si lo."

Harbin-a chuan a rawn en run a, "I insawi theiin, I inngai ropui lutuk deuh a nih mai chu a, a ni lawm ni?"

Rodelo-a chuan a chhang lo. Kawng bumboh leh zinkawng hrehawm tak avang chuan Harbin-a chuan nuamlo a tiin a thinchhe tûk a, tualthah hial pawh a pawisa tawhlo a ni tih Rodelo-a chuan a hre tlat.  

"Coffee chu peih a ni ta," Nora-i chuan a lo ti a. "Lo kal ula, a la lumlai hian I in teh ang u."

"Lo in chiah ila," Rodelo-a chuan a han ti a. "Cofee no khat lek pawh a tui em em tawh mai chu a nih hi à,"

Nora-i chuan a han thli khat a, a han pe a. Harbin-a chuan rang deuhin a rawn ban vut a, chutia a rawn chuhna lamah chuan a baw zo ṭhelh a. "Keima’n ka in dawn!" a han ti tuar a.

"Teh reng e," Rodelo-a chuan a lo ti mai a, "In rawh, Harbin."

Harbin-a chuan thinrim takin a melh run mai a, " Enge a awmzia hmela? Intihbuai I hlau deuh em ni?"

Rodelo-a chuan a koki a han sân âk a. A nui lek lek nghe nghe a. "Enge kha thilah khan intihbuai a ṭulna? Coffee te chu kan in ṭheuh dawn a. I chang hmasa ber thei ang."

"A no hnihna pawh ka in leh dawn!" Harbin-a chuan a cho riau a ni. Mahse, Rodelo-a chuan hun a la ti lo. A la nghak thei a lawm..

"A ṭha e, no hnihna pawh chu chang nang che."

"A zavai hian in vek duh ta ila!"

"Engtin nge keini hi ni ve dawn, Joe?" Badger-a chuan dam dapin a lo ti a. "Ka no chanai chu in ka duh dawn a sin."

Nora-i chuan No dang chu a rawn pe leh a. "Hei hi la rawh. Coffee chungchang mai maia intihthiamloh chu a ho em mai."

Thawk leh khatah Joe Harbin-a chuan Nora-i kuta no chu a beng thla tawp a. A silai chu a chuh ta nghal a. A phawi chhuak zawk a, a hmetpuak nghal thuai a. A hmanhmawh deuh avangin a tum tak chu kap thelhin Rodelo-a hnunga Tuithawl khat thapa an dah chu a silaimu chuan a deng ta sawk a.

Rodelo-a chuan rawn hnaihchilh nghal vatin, a zuan phei zawk a, a koki chuan Harbina kawngah chuan na takin a va su a. Harbin-a chu leiah a vir thal nghal tawp a. A silai a lek rem leh hma chuan Rodelo-a chuan a rawn chhir thlak sak ta a. Chhechham buan buan chungin a rawn tho leh a, a kut lam chu a rawn thawh ta thung a. Mahse, hnek nat a tum lutukna lamah a ban a vai kau zau deuh ta tlat mai. Chulai kar teah chuan Rodelo-a chuan a biangki ruhah tak veilamin a lo hnek siah a, dinglamin a han nawn zui leh nghal sak a, Harbin-a rawn thawk phei lai chu a ding chawih a, veilamah a her lawp a. Leiah chuan a thal leh ta tawp mai a.

Badger-a chu rawn zuangtho vatin Rodelo-a chu a rawn chelh a.. "Duh tawk tawh teh! I insual lo hram ang u!"

Makti lutukin Harbin-a chu engemaw chen a han let rên rawn a. Ngawi rengin a rawn tho chhuak a. "A ṭha e, Rodelo," a han ti a. "He I thil tih avang hian ka la that ang che."

A awki chu a vawt ruih mai. A tawngkam chhuak aṭang chuan Rodelo-a hnek thluk pa leh Tanin a tang hrep pa kha a ang ta lo tawp mai le. A vawikhat na atan Rodelo-a pawh chu a hmulthi a ding ur ur a. Harbin-a en kal chung chuan ngawi rengin a han ding vang vang a. Chutah, "Chutiang chu I tum a nih chuan I mawl hle a niang, Harbin," a han ti a. "Tang tlan chhuak hlim hlawt I ni a, tun aṭanga ni hnih khatah hian Mexico-ah I awm emaw, Isacher-a lawngah chuan I chuang dawn emaw pawh ni se, tun darkar aṭanga Gulf i thlen hma chu min mamawh dawn a ni. Lawng chhuat I rah chiah hma chuan min mamawh hle bawk ang."

Harbin-a biangki chu a rawn pawng nghal ṭawlh ṭawlh a. A khabe chu a kak raih bawk a. A kut chuan a tuai hoh hoh a.  "Min chhinchhiah ta bawk a, tumahin hetiang hian hnuhma an la hnuchhiah ngai lo." makti hmel lek lekin a han ti a.

A coffee no chu a la a, a silai pawh chu lak tum tawh chuang lo chuan a kal kiang a, piah deuha lungpui chungah chuan a ṭhu tûm bûr mai a. Nora-i chuan Badger-a, Gopher-a leh Rodelo-a te no chu a lo thlit khah sak a, a tawp berah amah chuan a in ve ta a. Tumah ṭawng tawh lovin Coffee chu an in tliar tliar a. Thli vawt vin tak mai chu a rawn tleh a. Dan-a chuan mei chu a han vur belh a, thing ṭangro dang fawm belh turin thim thamah chuan a pilbo ta a.

Mei chu a alh hlap hlap a. A khu te chu a rimtui riau hian a hriat a. Arsite chu an eng zual sawt hian a hriat a. Thli thaw lah chu a vawt ang tual tual a.

"Gulf velah chuan tui a awm angem le?" tiin Badger-a chuan zawhna a han siam a.

"Tlem a zawng chu a awm ang chu a ... A ṭhen erawh chu a intlak loh a."

"Mahse, tui hna intlak awmna chu I hria a ni lawm ni?"

"A hre khawp ang, engkim hriaa a nih kha" Harbin-a chuan a lo ti hmuar hmuar a.

Badger-a chu tuithawl awmna lamah chuan a kal phei a. An dahna hnuai lei chu a lo hnawng chap a. Silaimu denna thlira a han lak kan pah chuan a thil hmuh tur chu a ring thiam nghal mai a. Tuithawlte chu an dah tlar a vangin, silaimu chuan a pathumna thleng chuan a lo deng pawp phei vek hi a lo ni a. A lo ruak vek tawh a. 

Harbin-a chuan Badger-a’n tuithawlte a han envel leh leia a thlauh leh lai chu a lo thir reng a. "Tuithawl pahnih chu kan la neia, min daih ngei tur a ni ringawt," a han ti sup a.

"Anih leh sakawrte hi?"

"Kan kal chhuah hmain tui kan pe fel vek ang a, an daih thei mai ang."

Sakawrte chu an chawrche tawh nasa a ni tih an hre vek a. Lung khawkrawk kara zinkawng bumro tak zawhpui leh ṭiaudup paltlanga kalpui chu a huphurhawm lam chu a ni e. Harbin-a chu rawn pheiin, leia let reng a silai chu a chhar a, vaivut kaite chu tuai faiin a paiah chuan a han khung ve leh ta mai a

"Khawiah nge an awm tak le?" Nora-i chuan a han ti hluai a. "Indian ho kha ka tihna a nia."

"Sawlai lawkah sawn, kan meichhem hmuphak reng in an awm ang. Kan aw te pawh hi a hre phak hial mahna. Hetiang thil velah hi chuan tawn hriat an nei ṭha tawh khawp a. Zanin chu kan mit leh beng kan chhit ngun a ngai teh ang chu"

Rodelo-a chu a rawn tho chhuak a, a sakawr lam chu a pan phei a. Tui awmna lamah chuan a kai phei ta a. A duh tawkin tui chu a intir a. An meichhemna vel chu a han thlir phei a, râpawm riau hian a hria a. A sakawr bulah chuan engemaw chen a awm hnuah, a ei theih zawng awmna tur hnim buk lam chu a panpui leh a. Mei eng hmu phakreng chuan a tlattir a. A chauhzia chu a hre chhuak uar uar a, mahse thin thiin a mu ngam bawk si lo. Tumah chu rin a nei lova, Nora-i tak ngial pawh chu a ring lo. Eng ang mihring nge a nih chiah a hre thei lo va, chutiangin ani pawhin a hriat a ring bik lo.

He lai ramvela ram chin a lo hriat tawh te chu hriatchhuah leh tumin a han bei ngial a. Hriatchhuah lah chu a nei tam thei bawk si lo. Tinijas Atlas chhim lama tuikhur awmte chu innghahna tlak tui awmna a hriat chhun te an ni mai a. A chang phei chuan an kangchat deuh vek ṭhin lehnghal a. Tui lo tlin tam dan leh a lo la thianghlim danah ruah surna pawh a la rei vak lo niin  a lang a. Pinacate atanga khawthlang lam chu hnaih chi miah loh a ni a. Paltlang theih chu nimah se, khuarkurum a tam avangin chu lamah chuan a la kal thui vak lo reng a ni. A ram chu a bumbohvin, paltlang chi rual pawh niin a lang lo va. Khawchhak lam erawh chu a zia lutuk lo nain, tlang sang pui pahnih in a karcheh laiah chuan kawngṭum hriat har tak chu kalin tuikhur te pawh a awm a. Mahse, chutah chuan a la kal bik lo nain, Yuma Indian hovin an sawi ṭhin a hre tawh tlat a ni. Chung Indian te chuan Pinacate rama lo cheng tawh thin Sand Papago ho hnen atanga an hriat a ni nghe nge a ni. Tui a awm emaw awmlo emaw kawng him zawk ni chuan a la lang ta reng reng a. Chhimlam hlekah chuan tuikhurte chu awm mah se, khaw-chhak lam a kal chu a fuh zawk mah niin a ngai a ni.

Engvangin nge a nih nih ni tura an rik deuh rup rup tawh mai loh tih chu a han ngaihtuah a, chutih rual chuan a rilru pakhatah chuan tuna a dinhmun ah chuan a la ngamawm rih loh a ni tih chu a rawn lut nghal a. Pakhatna ah chuan an la tam hneh lutuk. Chu lovah, inkahna thleng lova thil tih puitlin hram chu a duh a ni. Anmahni um mek tu Indian ho ang chuan a nghak ang a, a khel kual ang a. A kalpuite ho chu  anmahni a an intih-chhiat hun chu a nghak dawn a ni. Chutiang zawnga thil kalpui chu engvanga duh kher nge a nih? Nora-i vang em ni? Nge, a chhungrila mi pangngai rilru tak a la put vang zawk chu em ni ang?

Awlsam taka pût bovin, thlalerah chuan a bikbo san thei reng a. Tuithawl la awm chhun chu a ta a ni lehnghal. Mahse, a tello chuan an dam khawchhuak zo dawn bawk si lo. A kalpuite dinhmun chu chhe tak tur hi a ni ringawt.

Thli thaw chu a vawt kher mai. Rodelo-a chuan arsite chu a han en a. Khawpuiah chuan chinchang hriat nan an zawna mi an chhehvel an en fo ang hian thlalera chetla ṭhangte chuan ram chin hriat nan van lam an en fo hi thilmak a ni lem lov a. Sava te leh ramsa te ziarang an hre em em pawh a mak hran lo. An dam khawchhuah nan a pawimawh tlat a ni. 

Meichhemna lamah chuan a kir phei leh a. Mahse, mei engin a chhun phak loh deuh chiahah chuan a han ding khawmuang leh rih a. Indian ho chu lo hnai palh ta se, an inthemthiamna tura tan ringawt chuan a duh bik lo a ni.

"Ralveng chu kan indah a ṭul dawn a ni," Badger-a chuan a han ti a.

Harbin-a chu rawn thovin "Ka’n ti hmasa ber ange." tih pah chuan Nora-i lam chu a han hawi a. "Ti rawh le, kal ang."

"Engvangin nge kei kher?" Nora-i chu a lo phâwk ang reng hle a.

"Min awmpui ve dawn a lawm. A nih loh chuan ka muthlu mai dawn a sin."

Tom Badger-a chu a lo chek tluk tluk a. Engmah chu a sawi lem lova. Joe-a chuan a han en a. "Enge chu chu a nuihzatthlak vak na?"

"Engmah a nia. Kei, Gopher-a leh Danny-a hi tunge min kai harh ve ta ang tihah hian ka lo buai deuh a."

"Ka venpui ve theuh ang che u anga ni mai a lawm," Nora-i chuan nuihza insum deuh chungin a lo ti a.

"Ralveng hmasa ber tur chungchangah chuan ṭhum vâwr ila a ni mai alawm."

"Chu chu a ṭul lovang," Joe-a chuan a lo ti a.

"Ṭhum chu I vâwr ang u, Dan," Badger-a chuan a han ti a. "A inkhairual ber ang."

Inkhelhna chi vawrh lung hi a rawn la chhuak a. Mipa ho chuan an ven hun tur atan chuan a hmai hrang hrang chu an han in-rin-sem sap sap a. A vawrh dawn chiah tihah Nora-i chuan lo chhuhsakin, "Min theihnghilh dawn a lawm."

"Ralvenga I din ve a ngai lo ve," Harbin-a chuan a lo ti a.

"Joe-a chu ka thlawp e," Rodelo-a pawh chuan a lo ti sap a. "A tam thei ang ber chawlh hahdam I mamawh kha, Nora."

"Chutiang chu in ni ve vek a lawm. A reng reng thu ah, Sakawr chungah ka chuang ve a, tui pawh ka in ve a, ka chanai min sem ve zelin, ka ei hek ve tho a." tih pahin vawrh lung chu a han vawr a. "Râlvêng pahnihna tur ka ni in ka hria," a han ti a.

Rodelo-a chuan a puan sin tur lak pah chuan, "Tupawh ralvengin awm ula, Sakawr kha mitmei ṭha hle ang che u. Kan hloh vaih chuan kan chhe vek a ni mai," a han ti a

Gopher-a chu ralveng hmasa ber tur a ni a. Sakawr awmna hnaih deuh, hnung lam aṭanga rawn veh hnaih theih miah lohna lai, lungpui ṭanchhan a, an riahna pumpui hmu thei vek a ṭanhmun siam tur chuan a kal phei ta a. Rodelo-a pawh chuan lung in chherchhuan deuh lai, thli upna lai deuh chu hmu fuhin, chutah chuan a han in-sam vel a.

 An riahna hual vel chuan thingṭang ro an fawm sa te chu an chap darh leh vek a. Tu pawh rawn kal hnai dawn se, thingṭang rap tliak ri lo chuan an awmna hmun chu an rawn thleng thei dawn lo a ni. Rodelo-a chu Blanket chuan a intuam a, midangte mutna hmun ṭheuh chu chiang taka a chhinchhiah fel leh thlap hnu chuan a muhil ve ta chauh a.