Bung-7

 Zan rei fe thlenga an kal hnu chuan thlate pawh alo êng ta bawk a, harsatna nei em em lovin phul hmun kha an va thleng phei leh ta hlawl mai a. An harsatna ber chu thla êng a lan hmaa an sakawrte thim tham zinga an kal hlei thei lo chu a ni mai a. An chet vel dan misual hoten an hriat hun hunah chuan an rawn um zui loh vek pawhin remruatna dangdai tak nen an rawn bei zui thuai ngei ang tih chu Texan pa chuan chiang takin a hria a ni.

Phul hmun an kal pelh veleh atangin chupa chuan zawn nei tih hriat zet hian an vel chu a melh deuh ruai reng a. Kawrkam (Canel Plane luikam) hmun ualau lai tak maia thingkung lian tak mai lo ding thim khuk mai bul an thlen chuan Texan pa chuan a sakawr chu a han pawt ding ta chawt a, "Ranch kan thlen hma int tur pakhat kan la nei," tih pahin a sakawr atang chuan a chhuk thla ta thuai a.

Midangte pawh chuan 'eng tak chu ni ang maw?'  ti rilru nauh nauh chungin an sakawr atang chuan chhuk thla ve thuai ringawt a. Texan pa chuan an miman an phuarbehna sakawr chu a pan phei ta a. 

Zan thlaengin a hmel rum rut mai a han chhunte phei chuan a hmelma te tan chuan huphurhawm tawp a tling chiang hle awm e. 

Chung misual zinga pakhat awmna a va thlen chuan an phuarna hruizen chu a phelh ta mawlh mawlh a, chu pa chu a palen ve tehreng nen Texan pa chuan hnehsawh zet hian a hlang thla nawlh a. Canel Plane lui tuiah chuan a hnim ta bawrh bawrh a. 

Chutah misualpa rawn harh chhuak tur rawn rum  tuah tuah lai chuan an phuar behna hruizen hmawr lehlam chu thing lianpui zarah chuan a han theh liam nawlh a, a hmawr lo uai thla leh chu manin a valh ta mawlh mawlh mai a. A valh zawh chuan a pawt zip chho ta zar zar a, chu hrui chu thingzarah chuan nghet tha fe chuan a suih ta chat mai a. Tunah zet chuan engnge tih a tum tih  chu hrilh leh kher an ngai ta bik hauh lo.

A rinawm tawk em? tiin a han pawt chhin vel a. 

A in phelh put mai lovang tih a chian hnu chuan a hmawr lehlam, a kuta awm chu nghawng tawk nei hauh lo chuan a valh leh ta malh malh a. Midangten an lo an thap lai chuan an mi man pa khaihlumna tur chu a peih fel ta der mai le!. 

Engnge an tih dawn tih chu an hrethiam ta bawk a, Marshal tih loh midang palite phei chuan an phur zawng tak mai a lo ni ve nghe nghe a. Chutah,  Bata leh Fredy a chuan phur fahran hian an mi man pa chu dimna tel hauh lo hian an han ching tho ta lawp mai a. Khaihlum thuai thuai chu an nghakhlel tawh hle a ni.

Mahse Marshal ve thung chuan thu pe aw tak si hian "Tunah chuan inkhaihlumna a la awm mai rih lovang. Sheriff ka nih ang ngei in he mi hi rorelna hmaah ka hruai phawt anga, a chung thu chu Judge in a rem ang a pianga hrem tur a la ni zawk ang," ti in an thil tum chu a rawn hnial ve ta tlat mai le!

Chuveleh 'Sheriff han tih ri chuan Texan pa beng chu a verh ta zar mai a, mak pawh a ti viau nghe nghe a, mahse a tum chu a tum a ni a, tuma'n an dang ngai lo. Chu chu a thu tawp a ni bur mai thung a.

Texan pa chu rawn tawng chhuak veleh in, "Kan zingah law-man an tel ve tih reng ka lo hre hauh lo a ni. Mahse a pawi vak chuang lo ve. Rustler hrem dan chu kan hre theuh ang a, chu chu tunah hian kan ti ngei ang. Rorelna a dintir tih mai mai zawng a nep lutuk, tlanchhuahna chance kan pe tam mai mai a ni. Tuna kan Judge ropui ber chu hei hi a ni rih bawk ang," tih pahin Texan pa chuan a pistol .38 Revolver kawm chu a beng ta thak thak mai a. A thu hnial chu ngam awm loh tak a ni ta. A hmel han en mai pawhin a sawi ang chuan a ti duh ngei ang tih pawh a rinhlelh awm bawk hek lo.

Mahse Sheriff chuan, "Chutiang tihluih theihna dan chu in nei thei ngawt lovang, " a han ti leh ta hram a.

Texan pa chuan, "Anih leh Rustler ho pawh khan J.L cowboy tam tak an thah lai khan engnge tihtheih an neih bik? Nangni ho ngei pawh hi thi mai tura an mankhawm tak na te hi, engnge theihna an neih? An silai chiah kha an theihna a ni mai a. Rawn tanpui hman lo hlauh phei che u ila chuan naktuk ni tla tur chu in thlirliam mai mai tawh hauh lo mai thei a sin," a han ti ve leh ta charh charh a.

Midangte pawh chuan chu chu dik an lo ti hle a. Thenkhat phei chuan Texan pa thusawi thlawp tih hriat tak hian, "A sawi ang chu a dik chiah a ni. Jim a leh kan thian dang zawng zawngte thisen leh thihna kha hetiang Rustler bawlhhlawh ho sang tam tak nunna pawh hian a hen lo reng reng, kan khaihlum nghal tur a ni," ti in a lo pui ve thuai bawk a.

Hmaisen teuh chungin Marshal chuan, "He thil hi puitlin tuma tilui a piang chu Texas sorkar hmingin ka man nghal ang," a han ti leh ta nuah nuah a.

  Chutah zet zawngin Texan pa thin chuan a tuar ta ngang lova, a kut bawr dinglam chu a vai phe thla vuai a, a kuta 38 Revolver Pistol rawn chawr chhuak zawk chuan Marshal awm zawn tak chu a tin zawn ta siah mai a, "Marshal, vawikhat chauh pawh mi han hnial leh teh! Hepa hrep ai pawh hian i thi hmasa zawk ngei ang tih hre mai rawh," a ti ta chheu chheu mai a.

Chu tawngka ah chuan thihna rim a nam tel tlat a ni. Marshal ngei pawh chuan chutiang taka mihring thinrim hmel chu a la hmachhawn ngai lo reng reng a, huaisen tia miten an lo fakna thin pawh chu tunah zet chuan a bo hneh kher mai. A nunna zuah anih theih nan chuan ngawih a chuh ve ta nge nge a.

  Chu an mi man pa pawh chu a rawn harh chhuak fel ta chiah tih chuan sakawr chungah an hlangkai nawlh a, a nghawngah chuan hruizen in valh pap chu an thun ta a. An pawt zip zui nghal hmiah bawk a. Chutihrual chuan a kut chu an hnungkhirh sak nghal hmiah bawk a.

A chunga thil thleng mêk chupa chuan a rawn hriat chian tak meuh chuan a hmel chu a dang var nghal pawp pawp a. A nunna laksak lo hram tura a ngenna te chu Texan pa chuan a ngai pawimawh tawh lo kher mai lehnghal a. "Sual rawngbawl hi zawng atir lamah chuan hlimawm viau thin mah se an mangan ni ah meuh chuan an rak ring duh viau thin reng a ni," a lo tihsan duh lek tawh mai si a.

Vawilehkhatah chu pa chuan na sakawr khelah chuan a han bensak ngheng mai a. Chu veleh sakawr chu hlauvin a tlan duk nghal zawrh a, a chunga chuang boruaka a han inkhai then ta luap luap pawh chu ngaihsak tawh hauh lo chuan a tlan liam ta daih a. Chu pa thlabar mangan hmel leh au chhuah tum niawm taka a hrawk han ri burh burh te chu chu zan thla êng reh ruih mai ah chuan rapthlak tak a ni. Hruizen in a pawhzih hmaa a han au rawihte chu a ringin hlauhawm a tling a, mahse hrui in a reh pin tak hmiah veleh a au chu a tawp chawt a, a inleng uih uih ringawt a, a tal rei lo hle mai.  A thih dawn tepa boruak hip tur tlachham ang maia a insep durh durh lai te chuan awmze nei lo fe in a ke chu a leng vak vak a. Boot Hill lam a panna tur kawng kawk niawm taka lei chhuah tut chuan a zal ta rawih rawih a.

Texan pa chuan a pistol hum lai chu a paiah a thun lut zauhva, "Tunah chuan Ranch kan pan thei tawh ang. Hetiang mi, sual rawngbawl ringawt thupuia neih laklawh tawhte hi chu an thih thuai loh chuan an hnawk sak rei mai mai thin a nia," tih pahin Black Nill chungah chuan a zuang kai nawlh a, Ranch In lam pan chuan an in zui leh ta thliah thliah a.

Zanlai thleng pawh chuan J.L Ranch neitupa Jonathana chuan muthilh zai reng a la rel thei hauh lova, Benvo khaw Marshal leh a nauteho in zui chhuak te chu a ngaihtuah tak zet a ni. An va che vannei em ang chu maw.?' tia a hahdam zawnga a ngaihtuahna han dah ve a tum ngial pawhin a thei silo. A hmaa a nauteho, khati zozai an han thi phiar maite kha a ngaihtuah lo thei lova, a rilru chu a hah tak zet zet a ni. Chutah, a fanu chu a han ngaihtuah leh a, chumi hapta ngeia rawn thleng tur chu a ni si a; an boruak rip tak mai avang chuan rawn haw rih lo tura lehkhathawnte a duh rum rum tawh a. Mahse, chu pawh chu tunah chuan a tlai zo tawh a, lehkha chu va thawn ta teh reng mahse Lori chuan Arizona a rawn chhuahsan ni tura a sawi atang chuan a tuk lawk mai chu Benvo khaw Rel

Station a rawn thlen hun tur a ni tawh mai si a.

Chumi ni ah pawh an naute an la rawn haw lo cheu anih chuan amah ngei chu Benvo khaw Rel Station pana kal a ngai dawn a ni. Ranch ah chuan Minky chauh a awm ang a, cowboy naran pakhat chauh tan pawh duh tawka suasam theih a ni tawh mai dawn a. An naute chu han beisei theih chi a ni der rih silo. Tunah pawh hian an la dam nge, an thi tawh.? La dam pawh nise a tukah chuan an la rawn kir hman lo mai thei si a, ti te in a inngaihtuah vak vak a, a ngaihtuahna pawhin chin lem a nei thei tawh lo.

 Chutia, a inngaihtuah hah em em laia sakawr rualkhat rawn tlan ri tuk tuk thawm chuan a ngaituahna ram a ta chu a hruai peng hneh kher mai. Rustler ho an nih loh chuan tun ang zan rehah tunge rawn tlawhtu tur awm ta ang.?

 Chuveleh a thova, a bang laia a Carbine Rifle chu a chuh lawk a, varanda ah chuan pen chhuak vatin ralkhata sakawr rualkhat lo tlan, Ranch In lam rawn pan, thla êng hnuaia fiah lo taka rawn lang tham thamte chu varanda atang chuan in ring tak chungin a lo nghak ta ran mai a. Rustler ho ngei an nih ringin engemaw ti kawng tak chuan huphurh ru hle. Mahse a leh lamah vethung chuan Rustler ho ngei ni sela, dimna tel map lova kah vir chawi chawi mai chu a châk ang reng hle a, Amah pawh a thi ve ngei ang tih chu hre reng mahse thihchilh hmiah a pawi ti tawh dawn lo a ni.

A beisei phak hauh lohva Ranch tualzawl an rawn thlena an naute ho ngei an ni tih a han hmuh meuh erawh chuan a Rifle ken lai chu a dah rang kher mai! Lawm em em in naupang chhia ang mai in tualzawlah chuan a chhuk thla ta hmawk hmawk a. Mahse a nauteho zinga Texan mi ni ngei tur, palian zet mai a han hmuh takah erawh chuan a phurna chu a reh leh deuh rawih a. Chu pa a rinhlelhna chu a nasa in a hmelah pawh a lo lang chhuak hial a ni ngei ang. Fredy a chuan, "Pu Jonathan, hei hi kan thian chhar thar anih hi. Ani hian min rawn tanpui hlauh lo phei sela chuan Rustler ho kutah kan thih hun nghakin tunah te pawh hian kan la tawm tlawk tlawk ngei ang," tiin thil thleng leh awmdan zawng zawngte chu hmaih nei miah lovin a rawn sawi chhuak ta zar zar a. A hmelah chuan chu Texan pa a ngaihsanzia a lang chhuak  thei hial a ni.

Fredy a sawi kar lak zeuhvah te chuan Bat a pawh chuan chanchin lawmawm deuh chu sawi ve châk hmel takin a han âng hman zuau thin a, mahse dawhthei takin Fredy a sawi zawh vek atan a khek leh ta zawk ni ngei tur a ni, engmah lo sawi ve lo chuan ngawih a chuh leh ta hram zawk a.

Chutah zet zawngin Jonathan a mitmenga rinhlelhna awm pawh chu Texan pa a ngaihsanna mitmeng chuan a rawn thlak rang kher mai le! Inthiam lo hmel tak chuan, "A zia lo hle mai; kan boruak tawng mêkin a zir lo bawk a, hmelhriat loh leh hmuh ngai loh chu han rin nghal ngawt mai harsa ka ti deuh em a ni," a rawn ti chhuak ve ta a. Chu Texan pa pawh chuan a dinhmun tur chu hriatthiam pui tak chung hian, "Thil tih awm loh tak a ni hauh hlei nem!  I dinhmun angah hian ding ve ta zawk ni ila chuan hmelhriat loh khual chhawn tur chuan silai kausa ngei in asin ka lo hmachhawn zawk ang ni," tih pahin a sakawr dum lianpui ațang chuan a rawn chhukthla ve ta a.

Jonathana sawmna angin an vai chuan Ranch in chhawng chungah chuan an in zui chho ta vek a. Benvo khaw Marshal tih loh midang zawngte chu Texan pa chungah chuan an lawm hle theuh va. Rustler hovin an hrenna hmun a rawn chhuichhuah mai dan te chu makti tak chungin hriat hlan pawh an nghakhlel a, an lo zawt sek sek hlawm tawh mai a. 

Texan pa erawh chuan, "Ka vanneih vang chauhva rawn tanpui thei che u ka ni," ti chauhvin a lo chhang mai a. Mahse a vanneih vang mai a ni hauh lovang tih erawh chu a mitmeng leh a hmel landan atang chuan ahriat em em tlat a ni.

Minky pawh chuan zanlai leh lai lo pawh sawi phal tawh bik lovin an nauteho leh an mikhualte ei leh intur chu phur takin a buatsaih ve sawk sawk a. Nidang pawha an tih ngai loh dan deuhvin Jonathana chenna pindanah chuan a rawn chawi luh sak a, hlim leh puar tlang takin chumi zan rei tawh takah chuan zanriah an kil ho ta a ni.

Jonathan a chuan a saruh khel lai chu lek lawrh lawrh chung hian, "Kei hi Jonathan ka nia, he Ranch neitu hi ka ni ve a, mahsela kawng tam takah kan naute taihmakna leh rinawmna azara hetiang hlawhtlinna hi nei thei chauh ka ni. Anni hian a tul tur ang zawng zawng chu ka thawh ve ngai hauh lovin an ti zel a, anmahni avang liau liauva hetiang lo ni thei ta hi ka ni. Kan hriat theuh tawh angin tunhnai te mai ațang khan buaina kan tawk ve ta zeuh zeuh reng mai a, mahsela buaina tenau deuh mai mai anih avangin keimahni theih ang tawk tawkin kan buaipui ve mai thin a, tunah erawh chuan kan buaina hian reh lam ai in punlun lam a pan ta tial tial mai si a. Lohtheihlohna avangin hei Benvo khaw Mar-shal Tima tanpuina hi ngen turin Fredy a leh Bata te hi ka va tir a, ani pawhin ka va ngen na chu ngai pawimawhin leh ka manganna min hriatthiam pui takin a rawn thawk ve ta nghal vat a. Theihtawp min chhuah sakna lamah misualho man hial a lo tawh phah ta anih hi.

 "Tin, kan mangan tawpah beiseina pawhin a suangtuah phak hauh lovin hei nang i lo lang ta hlauh mai a, i chungah ka lawm tak zet a ni, tih mai bak chu ka lawmzia.....a, han sawi vak ngaihna pawh ka hre lo," ti in Texan pa lam hawi chuan a han sawi charh charh a, A lawmzia chu sawi chhuak thiam in ti chiah lo mah se, a hmel atang chuan a chiang em em tho a ni. 

Texan pa chuan nuam tihloh hmel zet hian. "Lawmthu sawi vak pawh a ngai reng reng lo, a hun takah ka lo inrawlh ve a ni mai ah kei chuan ka ngai a ni," a han ti dul raih thung a. Engmah ngaihsak zuilo chuan ei leh in lam chu a buaipui chhunzawm ta zel a.

Marshal Tima chuan a mitmengah leh chet danah pawh phur lo tih hriat ngawih ngawih hian, "Kei chuan kan thil han tih tak ngawt dan kha tha ka ti hauh lo mai thung. Khatiang anga kan che leh dawn anih chuan helaiah tih tur ka nei ve lo ve. Naktuk zingah Benvo khaw lam panin ka chhuak leh tawh zawk mai ang,"  a rawn ti ve ta bul bul mai thung a.

 A hma zawnga a rilțam ve tawh tehreng nen khan a chunga Texan pa thil han tihdan atang khan a rilru a nuam thei hauh tawh lova, a theihnghilh theih tlat loh avangin a thil ei lai pawh chu tui tihna reng nei ve awm pawhin a lang thei lo a ni.

Jonathan an engemaw sawi tuma a kâ a ân zuau lai chuan, "A tha e, Marshal, i duh ang anga i awm chu a thiang a lawm. Amaherawhchu, hei hi hrereng ang che. Rustlers tupawh ka man theih apiang chu ka khaihlum nghal zel dawn a, chu chu khaw thlang lam rama Rustler hote kan hrem dan pawh a ni. Chu chu min dan tuma i chet vaih chuan Rustler hote aia i chan a thatna tur a awm bik chuang lo tih hi hria ang che," Texan pa

chuan a ti ta hmiah mai a.

 Chu Texan pa chuan misual lutuk, pawisak nei lo, Rustler an man pawh a nunna humsak hram hram tum anga a lo tawng kha a ngaihtheih loh zawng tak anih avangin a rilru nen a inmil thlawt lova. Sheriff.... Eng.... riff pawh ni raw sek sek, a zah duh tawh lo a ni. An miman pa an khaihlum dawn a a sawi tawh ang khan a chungchang chu Judge rel tura khek chu ni se, atan tlanchhuah theihna hun pawh a awm phah mai thei reng a ni.

Chu Marshal pa chu a Deputy ngei ngei pawhin a thiltih dan ah chuan an tan bik tawh lo a ni tih chu an hmel atangin a lang reng mai a, chutiang bawkin midang hote pawh chu an ni. Deputy pakhat zawk phei chuan, "Keini pahnih pawh hian Amigo (thianpa tihna tluk) thusawi chu kan zawm zawng tak a ni. Benvo ah chuan naktuka haw leh mai i tum anih pawhin keini chu kan haw dawn lova, i duh chuan Deputy nihna atang pawh hian min ban mai rawh; He thilah hian kan in hnamhnawih tawh laklawh a, a tawp thlen hma chuan kan chawlhsan ve thei lovang," a rawn ti ve ta hmiah mai a.

Jonathana lah chuan engmah hre ve hek lo,  a ngaihna hre lo zet chuan a lo hawi kâ ve ho ringawt a. Chu chu Fredy an a hmuh chuan rangtakin thil awmdan chu a hrilhfiah ve nghal vat a. Rustler pakhat an khaihlum tak na a duhdan in an lohna avanga chu thil chu rawn thleng a ni tih Jonathan an a han hriat ve chuan a sa ve ta phat mai a. 

Chuveleh, "Marshal, kei pawhin i thil tum dan chu ka duh zawng a ni bik ta hauh lo mai. Kan nauteho lainatna nei hauh lova min thah sak a, ka bawngrual zawng zawng min thahsak tuma, chumi a an hlawhchham hnuah pawh min ruksak chiam thintute chungah chuan ngilneihna ka chhuah bik ang a maw? Chu zawng thil theih loh tawp a ni,"a rawn ti ve ta siah siah mai a.

Marshal chuan sawi ve tur pawh hre tawh lo chuan a kå ta ho reng ringawt a. Midangten an hmuh ve hauh lohva a mitmenga phuba lak tumna leh tualthah duhna lo lang chhuak ta chu Texan pa chuan a lo hmu ru reng mai a. Rustler ho chunga fimkhur a ngai ang bawkin chu Marshal pa chungah pawh chuan fimkhurna thlah thlam hauh loh tur a ni tih chu a hrechiang ta hle mai le!... 

Chumi zan rei tawh taka an zanriah eikham tak veleh chuan, "Kei chu helaia tap reng mai thei ka ni lo, kan sulhnu kha chhui leh turin ka va kir leh tang e. Naktuk zing, tukthuan kil pui hman tur che u erawh chuan rawn kir hman leh hram ka tum ang e," tih pahin Texan pa chuan a lukhum parh hlai tha hlep hlawp tak mai chu a khum ta a.

Jonathan a chuan mak ti zet hian, "Tunah hian i kir leh mai ang a maw? Chawlh hahdamte pawh i mamawh hle awm si a, a tha ber lovang a?" a han ti chhuak ve ta hluai a.

 Texan pa erawh chuan zawi sup hian, "Pu a, Ka dinhmun tur chu ka in ngaihtuah ve thei ang. Kei min ngaihtuah lovin in nauteho hi ngaihtuah zawk rawh. Chawlh hahdam an mamawh hle ang. Naktuk atang chuan hnathawh tur pawimawh lutuk tak hlir buaipuiin mawng pawh hung hman lo lekin an buai tawh dawn hmel si a," a han ti churh churh a, a chhuak chu a ni zui ta mai a. 

Engemaw sawia han chhan let veleh tuma Jonathana'n a han auh leh dawn chuan Texan pa chu pawn lamah a lo kal liam hman der tawh a. Reiloteah chuan sakawr tlan ri chu an hre zui nghal thuai a. Ama duh thu a a lokir leh hma chuan an hmu leh tawh kher lovang tih pawh an hre sa nghal vek a.