Bung-6

 Kid Rodelo by Louis L'Amour

BUNG RUKNA

Dan Rodelo-a chuan arsi te chu a han thlir a, thlalêra zan khaw vawt dai raih mai te chu a han hip vang vang a. Lawmawm thar riau hian a hria a. A nun lo hman tawh dan te chu a han thlir kir pawhin nuam leh awlsam tak chu a awm lem lo. A nu hova nuam leh hlim taka an chenna an in leh lo te chu a han ngaihtuah thleng a. Khatih lai kha chuan engkim kha a hlimawm ṭhin asin mawle. Engtia rei nge chutiang nun tem lova a thang bo tak le?

Tunah chuan mi râwva pui pui ho nen thlalêrah zinkawng an zawh ho ta chu a ni ta si a. Amah ngei pawh chu chutiang mite zinga chhiar tel chu a lo ni ta reng mai. Kuttum hman thiam leh phawiran dan a zira thihna leh nunna in ro a relna hmunah chetla in, thifa hnuk chatin a bei mek a ni a. Beidawnna ruamah mi beidawng leh pawisak reng reng neilo ho nen an nunna atan an bei mek a ni.

Patling rual pawisak nei miah lo ho leh….. nula a la awm bawk nen.

He nu hi eng ang mihring nge a nih le? Engvangin nge heng mi râwva hote nena zin kawng zawhho chu a duh mai le? Dan Rodelo-a chuan a chetlak leh dan tur kimchang chu a han ngaihtuah vang vang a. A ruahmanna a tel miahlo Nora Paxton-i a awm tlat bawk si.

Patling pali leh hmeichhe pakhat, thihna in a hualbeh tlat tawh, an tawpna chu anmahni umtu Yaquis ho aṭanga lo thleng tur nge a nih ang a, chu thlaler hmun rapthlak ah chuan an tlu hlum zawk mai dawn le….

An tuithawl lian ber chu a pawp tawh a. A dangte pawh a ruak chu a ni deuh thaw tawh mai a. A awm chhun chu an sakawr te’n an mamawh dawn a, a bak chu an dang hnawn tham lek ṭheuh chu a la bang mahna. A tuka an kal chhuah leh meuh chuan an tui neih zawng zawng chu a zo tawh ang..

Tui tello hian mihring hi eng chen nge an nun theih anga, eng tia hla nge an kal theih ang le? Ni khat… Ni hnih tal pawh a ni mahna. Pa pakhat, thi ngei tura ngaih tawh, huatna leh phuba lak chakna in a nawr avanga nithum lai dam chu a  hre tawh ngei mai a. 

Cofee lumna tur daih ngawr ngawr chu an la nei a. Cofee te an han lum peih fel chuan an ṭhukhawm a, an in ta a. Mitin chu an mahni ngaihtuahna kawmin an buai ṭheuh va. Dan Rodelo-a chuan hetiang dinhmuna an han din takah chuan a tihtur chu a hre chiang em em a. Tualthattu a ni lo va. A tira thil thlen dan ang chiah khan a tawp thleng turin a bei ang a, thudik chu a puang chhuak dawn a ni.

Inkahna te pawh a la thleng hial mahna. Joe Harbin-a anga silaia eizawng mi chu a ni lo va, Tom Badger-a ai pawh chuan a rang zawk maithei. Mahse, a chiang ngam bik lo va. Chutiang tum tur chuan mi a nileng a ni bik lo va. Mahse, tumruhna leh bansan mai mai lohna nei turin a sehhel ve tawk chuan a inhria a. Chu chuan a la chelh ding hram hram ni berin a hria a ni.

"Enge chanchin?" tiin Joe-a chuan Rodelo-a chu a han en a. "Nang hi tui awmna hre ber tur chu i ni."

"Kan bei zel ang chu. Khaw en hunah kan che chhuak leh dawn nia."

"Anmahni thu thu a ni zawk in a lang," awmze nei zetin Badger-a chuan a lo ti a.

"Min tihtir em em ang," Rodelo-a chuan a lo ti a.

Indian ho nihphung a lo hriat tawh avangin chu chu a chiang ve tlat a ni. Hei hi Indian ho tih dan ve reng a ni a. An hmelmate hrehawm tawrhtir dan chi hrang hrang hrang an hre hneh em em a. An huaisenna te, an tawrh theihna te, an teirei peihna te chu enchhin an duh ngei ang le. An hmelmate an tei rei theih poh leh an hnehna chu a hlu ting mai dawn a ni.

Chutah, Hat-a lah mi â nileng a lo ni si lova. Hun chu a kutah a awm a. A hmelmate chu thlaler khawlum leh sa, tuihâlna leh rilṭâmna ten a hmeh chauh va, beidawnga ramsa ang mai thinrim leh thuhnu dâwn lova an chêt buan buan hun chu nghakin a insum rih mai mai a ni.

Silai hmetpuaka an rawn tihṭhaihna chu enchhinna hmasa mai a ni a. An mi ûm te chuan rang tak leh fimkhur taka an lo chhân let avang chuan Yaquis ho chuan a hun a la thleng rih lo ni mai ah an ngai a. Rawn ûm zel pahin ni hnih khat an nghak ang a, hun an tihah an rawn che leh mai dawn a ni.

"Tui awmna hmun chu I hre ṭhin tiraw?" tiin Nora-i chuan a lo zawt a.

"A awm theihna tur awm lai chu ka hria. Lui tui luang hawk hawk ang chu beisei lo la. Chutiang a lo awm a nih pawhin, a awmna hmun hria mihring tumah ka la tawng lo. Tui tling pangngai ang chu Tinajas Altas ah emaw Raven's Butte ah emaw, Papago Tanks lamah emaw a awm a, Tule Wells ah pawh a ni mai thei, hmun chengker deuhah a nia. Kan hmuh theih ka ring."

"Hmu ngei la a ṭha zawk ang," Harbin-a chuan a lo ti a.

Rodelo-a chuan a han melh zawk a, "I vanneihna piah lam I thleng palh ange aw," a han ti sap a. "Nang aiin ka chan hi a ṭha a nia."

"Nang hi maw?" tiin Harbin-a chu a lo ner nûng a.

"Silai nen eng ang chiah nge i nih tih hi ka hria a. Nang erawh chuan ka chungchang engmah I hre ve lo."

"Ka hriat tur ṭul engmah a awm lo ve."

Pawisak nei lovin a ṭawng buan buan tak nâ a, Dan Rodelo-a thusawi chuan engemaw ti takin amahah nghawng a nei ngei dawn a ni. Harbin-a chu rinhlelhna a khat, tumah ring ngai lo chi a ni a. Rodelo-a chuan enge a tum chiah tih chhutin a buai ru viau tawh ngei ang le. Silai hmangthiam a hriat tawh ho te zinga mi tuemaw ber hming dang invuah nge a nih ang, tu chiah nge a nih ang le?

Harbin-a rilru chu a han vâk kual zung zung a. Chûng a mi hriat tawh ho leh an chêttlatna te chu a chhui kual zung zung a, Jim Courtright, Ben Thompson, Commodore Perry Owen, Doc Halliday, John Bull, Farmer Peele ... pakhat te te in a han chhiar nghauh nghauh a, mahse tuemaw a la hriat loh chu a awm ngei tur a ni. Chu chiah chu Dan Rodelo-a beisei chu a ni. Harbin-a chu inngaihtuah buai se, amah chu vengthawng deuh reng se a duh a ni.

Heng mite hi thlalêra chetla ṭhang an ni lo tih Dan Rodelo-a chuan a hre chiang em em a. Badger-a leh Harbin-a chu phaizawl tui ṭhatna hmuna che chi an ni a. Tom Badger-a chu Indian thlah chanve niin, ram lawi peltu a ni ṭhin a, chutah bawng rûk ching a lo ni leh a. Khualzin phur tawlailir rawkna ah pawh vawi hnih khat chu a inhnamhnawih tawh mai thei bawk. Bawngvulhtute ho indona ah pawh a lo tel nual tawh mai thei.

Harbin-a lah chu bawng enkawl ṭhin niin, Denver leh Rio Grande vela an laipui pu ber ṭhin ah aṭang leh a. Chutah, tualthat tura rawih theih chi niin, silaia eizawngin khaw engemaw zatah a han tei kual leh a, Bawngvulhtute ho indona ah te telin tunah chuan misual ûm mek a lo ni ta a. A tualthah hmasak ber pawh card denna inkhelhna ah a ni nghe nge a ni. Hmun ro leh ram khawkrawk an hriat ve chu Rockies chhak lam phaizawl leh a chhehvel a awm chu a ni mai a. A tumah chuan hetiang thlaler ang chi a dam khawchhuah dan kawng hmang chu an hre dawn lo a ni. Badger-a erawh hi chuan a lo hre mial mahna.

Khua a lo var chuan an che chhuak leh ta a. An hmui te chu a ro rup a, a rep khi ter tuar a, an mitte chu a thip hlur tawh a. An piah deuh hla vak lovah chuan an ke pen rual zelin vaivut khu laih laih hi a awm a, Chu chu Harbin-a’n a han hmuh chuan thutiam a chham nuap nuap a.

An kal chak thei tawh thlawt lo chu a ni. Pinacate ram lah chu lungchang leh hriam tak tak, khawkrawk em em mai a ni a. Hmun tinah chuan Cholla (thlaler hnim hling nei chi khat) a to buk luih a. Thlalera kal ṭhang deuh ten Cactus zuang thei an tih mai, Cholla chi khat phei chu han hnaih deuh emaw, deh palh vaih chuan, a hling zum leh hriam tak tak chuan a lo man bet tlat ṭhin a ni.

 Cholla hnim chu balhla ang deuhin tawi bawng deuh, vawn palh rem tak hian a peng kâk ṭuai a. Peng tin chu hling zum em emin a khat vek a. A hling pakhat lek chhun pawh chu a na vin tuk mai bawk si a. A chang te chu a thlawn awlsam hle a, chuta ṭang chuan a rawn ṭiak leh zung zung ṭhin a ni. Chung Cholla te chu bit takin an ṭo a, a ṭhenah chuan ṭ9in khat hmun lai te an awh hial a. Chulai tlangkang lei hmun chu an ngeih viauin a lang lehnghal a. An duah hluah hluah mai a. Hmun thenkhatah phei chuan mual pawng chanve dawn chu an luah a. An hling eng pup mai chu thlaler ni eng hnuaiah chuan a lang tle sur mai a.

Chutiang kara sakawr chungchuanga kalmeuh chuan, an ke pen tin chu fimkhur a ngai tak zet a. A ṭangte chu awlsam taka thlawnin sakawr ke te, sakawr zin te, an thawmhnaw te chu a lo kai a. Engmah chu him dam tak tak a awm thei lo. Taksa a a luh palh vaih phei chuan a tang tlat a. Lakchhuah mai pawh a harsain a na duh em em a ni. 

Dan Rodelo-a chuan tlângkang lei hmun leh Cholla buk  karah chuan an kalna tur vaikiang pah zelin hma a hruai a. Ram hmelhmang duhawm lo tak chu a ni. A chang leh tawlhthluk palh hleka sakawr ke tih tliah hlauhawm em em na hmun lei khi chat kar te kan a han ngai a. Khuar khurum thuk tak, tlak palh vaih chuan mel za dawn lai lum theihna tur te a lo awm a. A ruam mawngah chuan hnim hlingnei Cactus a ṭo khat tlat a. Chung te chu Cholla buk chuan a hual leh a. Zawhte in mi ham tuma tin an chhuah ang mai hian an hling te chu a rawn lawr fur mai a. Hla takah chuan  tlangram beram ki sei chi an hmu leh zauh bawk ṭhin a. Chutiang chu an paltlang mek Pinacate ram lai vel awm dan chu a ni.

Nora-i chuan a rawn hnaih leh a. A hmel chu a bumrovin a phawk hle a. A hmui te chu a rep khi tuar a, a thi hne hnu mai bawk a.. "A la hla viau em le, Bay lam ka tihna a nia, Dan?" tiin a han zawt a.

"Hla thawkhat e."

"Eng thil nge lo thleng zel ang le ?"

A han en vang vang a, Chu chiah chu a lo ngaihtuah ve mek chu a ni. "A tam ang tih a hlauhawm khawp mai. Yaquis ho an lo lan hunah chuan I lu kha veng tha hle ang che. Bakah, Harbin-a rilru puthmang chu I hriat kha."

"Nangni pahnih kha enge in sawi a?" tiin Harbin-a chu a rawn au tuar a. "Ka nula a nih kha I biak mek, Rodelo, chu chu theihnghilh suh ang che."

Dan-a chu a sakawr zinah thu chung chuan a han inher hret a, "Chung te chu amah hian a la rel fel  ang chu."

"A ti hrep lo va nge a! Keima’n ka rel fel vek tawh, min hnial duh a nih chuan engtik lai pawhin ka inpeih e."

Dan-a chu a sakawr zinah chuan a han thu rem leh zual sawt a. A kut chuan puakruk chu a la hnaih lutuk hran lo. "I hmingthanna hi I chhuang lutuk palh ang e, Joe. Tuemaw chuan an enchhin palh mai ang che."

"Engtik lai pawhin ka inpeih e."

Tawng chuan hmui a na mai mai tih hriain, Rodelo-a chuan a chhang zui ta lo. Nisa hnuaiah chuan uluk takin a mit a han len a. Ram chin chhinchhiahna a lo hriat tawh sa a zawng a ni. Mahse engamah chu a hmu lova. Tuikhur awmna chu a hla tawh vak lo tho mahna.

Tuk pum chuan tui neilovin an kal zel a. Ni a lo tlangsang a, An sakawr te chu an kal pai ta nawk nawk a. Rodelo-a chuan an chung lam deuhah chuan lungpui dum deuh hi a han hmu ta phut a. Chumi rual chuan chu lam hawi a khuai thlawk hian a rawn su chawrh a.

Sakawrte pawh chuan tui rim an hria a ni ngei ang, an pen chak deuh sawt a. Chutah, an zavai chuan an thleng phei ta. Nora-I chuan a en ta tlawk tlawk a. Tom-a chu lungawi lo zetin a lo phun bul bul bawk a. Tui chu a lo tling ngei mai, mahse ram beram thi puar huar hi a lo lang lup lup mai a. A thihna chu a rei tawh hmel viau leh nghal a.

Joe Harbin-a chuan Rodelo-a lam chu hawiin, "Hei hi maw tui hmun min hruai thlen theihna awm chhun chu?" a ti rum ta ûl a.

"A thiamloh a ni hleinem, awmze neiin khawsa teh," Tom-a chuan a lo ti sup a. "Harsatna ruamah kan awm ṭheuh a, keimahni kan intihbuai leh phei chuan kan tâl chhuak dawn miah lo a nia aw."

Gopher-a pawh chuan Rodelo-a chu a lo en ve reng a. A hmelah chuan hlauthawng hmel a lang a.

"A dang remchang a awm leh mai ang," Rodelo-a chuan a han ti a. "Heta tanga darkar khat kal velah hian."

Chau tak chungin an sakawrah an lawn leh a, an sakawrte hreh chung chung chu chhim chhak hawi zawngin an tur chhuak leh ta a. Him dam taka an chhuah theih loh mai hlauh-thawnna rilru chuan a man ṭan ta hlawm a. An taksaah chuan tui tlakchhamna chuan nghawng a rawn nei ṭan a, darkar tinin a zual tial tial mai lehnghal. Hun remchang a neih laia tui a lo in vak avang khan Rodelo-a chu midang te ai chuan a ziaawm deuh a. Nora-i pawh, a thurawn a zawm avangin, zia tak a ni.

Dan Rodelo-a chuan an kal pah chuan ram hmelhmang chu a thlithlai reng a. An hnuai lam zawlah chuan tui a awm dawnlo tih a chiang sa a. Tuikhur awmna, a ṭhenah phei chuan tam fu a tlin ṭhin na Papago Tanks chu an bulhnai lawk khawimaw laiah hian a awm ngei tih chu a hria a. Mahse, engemaw chhinchhiahna chu a awm tur a ni. Chunglai ram khawkrawk landan chu a inang deuh pût a, hriat hran a harsa em em mai si a. 

Thei leh thei lova a sakawr ṭanla hram hram te chu a hai lo. Rit a tiin, chawlh a châk a ni a ni tih pawh  a hre reng mai. Eng pawh huam a mel hnih khat a han tur leh hram hram hnu chuan a han hawi chhuak a. "Kan sakawrte hi daih rei tura kan duhchuan ke a kan kal mai hi a ṭha ber ang," a han ti a. Chutia a han sawi takah chuan midangte pawh chu thatho lo zetin an chhuk ve ta sap sap a. Rodelo-a bawk chuan ke a kalin hma a han hruai leh ta a.

Tumahin thil ei lam pawh an ngaihtuah lo. Tui tellova thil ei chu a finthlak vak loh reng a ni. Rodelo-a hmui te chu a rep khi tuar a, nâ a ti hle bawk a. A taksa in tui a tlakchham tawh vangin thi tur pawh awm lovin a ro hulh mai a. Midangte tana rawn zui awlsam turin muang tein a pen a. Kalkawnga vawn chhan tur lung filawr te chu fimkhur taka khawih loh phei chuan thir ling khawih ang maiin a sa vin tûk mai a ni.

An hma lawkah chuan hmun tohlawt deuh a lo lang thim raih a. Ni êngin a han chhun chuan a hlim chu a sen deuh rûm a. Chulai hmun chu a ni thei tawh mai angem?

A mit chu a han nuai chat chat a, ramchin chhinchhiahna engemaw a zawng a ni. Hetiang hmun ro leh khawkrawk hi chu a lan dan a inang deuh put a, ram chin hriat a har em em a, chuvangin hetiang hmun paltlang ṭhin te pawhin ramchin chhinchhiah tumin an kal tawhna te an thlir kir awllo ṭhin a. Ni awmdan a zirin ram hmelhmang te a lo inthlak daih chang a awm ṭhin a. Thlîr dan leh thlîrna hmun a zirin hmun inang pawh a landan te a dang leh daih thei ṭhin a ni.

Rodelo-a ngaihtuahna chu a bîng mup mup mai a. A ram chin hriat tawh dante chu chhûtin inngaihtuah fim hram hram a han tum a. A sakawr chu hmalam panin thei leh thei lovin a kai pah hram hram bawk a.

Lung te lah chu an tumtlangin an hriam hlawm nasa si a. A kil tin mai chu chemte hriam em em tluk zet niin, an thawmhnaw leh pheikhawk te chu a tai thler hne hnu tawh mai a. A han hawi kir a, a ṭhiante hmel landan a hmuh chuan a phu zawk a. Nora-i kawr chu cactus hling chuan a lo tai thler nuai tawh a. A pheikhawk bun pawh a phuai fap tawh mai. A pawnfen te chu a pawr tawh hle mai a. Chu chuan an zinkawng rura zia chu a tarlang chiang hle a ni. Gopher-a hmel chu a cher kuam a, a chauh hmel em em bawk a. Badger-a leh Harbin-a pawh chuan hmui hmai ṭha a lawi an pu tawh lo. An bungraw chhiava te te ken phurtu sakawr te pawh an hnunglamah chuan mumal nei lo zetin an rawn inzui kawi nuai a. Tunah tak hi chuan Yaquis ho chuan rawn bei ta se chu hnehna an chang awlsam teh ang chu.

Pen hnih khat a han kal leh chuan Rodelo-a chuan ram Beram ki sei chi hniak chu a hmu ta a. Pinacate ramah chuan thlaler ram beram hi an awm nual ṭhin reng a. A han bih kual deuh a, hniak dangte pawh chu a hmu ta zel a. A then chu thlaler sihal hniakin a lo chhilh bawk a. An vai chuan an pan lam a inang vek mai! A ding chawt a, chulai awih tlan chu fimkhur takin a han enthlithlai leh phawt a, lung insir khup karah chuan a her lut phei ta a. 

Papago Tanks lam pan tur awm ang hnu chu a hmu zui hran lova, mahse a hniak lo hmuh tawh dan leh a rinthu belhin tui awmna tur hmun awm ang lamah chuan kal a tum ta a. An kalna kawng lah chu thliin a rawn len vaivut te chuan a bawh thûr a, a phihrit em em mai a. Chu lai hmun chu ram bumro leh fan chi miah loh hmun ni mah se, tui beiseiin an kal a ngai miau mai si a. 

Ṭiaupho lungpui ang chi a lo hriat ṭhan em em hi a hmu ta thut a. A inher leh hret a, Tlangkang aṭanga insiam lungpui liantak insi khup karah chuan a lut thla a. Tuikhur kam ṭiaupho zim te chu a thleng thla ta a. A bulṭhutah chuan feet sawmhnih lai tura thuk tui khawhthla in a hawrh khuar hi a lo awm a. Chulai ah chuan feet li nga vel laia thuk hian tui a lo tling a. A hnung chiah, hla lo teah chuan dil dang feet sawmpahnih zeta zau hi a lo tling kung bawk a. Chung tuite chu Lung lianpui awn deuha inchhawng hian a lo hliah a. A hnuai tui te chu a vawt thain a fim kûk mai a.

"Dil hnai zawk ami hi sakawr te intir ila, a piah deuha mi saw kan in ve thung dawn nia," Rodelo-a chuan a han ti a.

Tui chu tlem te te in a han in hlek hlek a. A kutphah te chu a han tihuh a, a vawhna te chuan a rawn ti harh sawng sawngin a hria a. Tlêm te te a lemin, a hrawk leh a pumpui  a fan thla raih raih te chu a han ngaichang a. Muangchanga a in nual hnu chuan a sakawr zin aṭangin tuithawl te chu a han la a, a han tikhat a. Chumi hnuah Nora-i tuithawl te chu a han tikhat ve leh a. Chutah, a sakawr chu tuiin turin a hruai phei ta a, tlem a intir a, a kai sawn leh rih a. A hnu deuhah duhtawka in turin a han hruai leh a.

Hei hi an buaina tawpna chu a la ni mai rih dawn lo tih pawh a hre chiang em em a ni. An tuithawl lian ber chu hmantlak a nih tawh loh avangin an duhangin tui an keng tam thei tawh dawn lova. Adair Bay chu engtia hla nge la ni ang? Mel sawmhnih aṭanga sawmhnih panga vel lai a ni angem le?

An sakawr chau leh pawr tawh tak nen chuan ni khatah mai chuan an ban hman miah lovang le. Engemaw chen chawl hahdam pawh nise, ni hnih thum lai chu an la duh ngei ang le. Vanneihna chuan a la umzui zel rih chu a ni phawt a. Amah tak phei chu a vannei bik chuang hian a hria a. Mahse, eng chen nge chu vanneihna chuan a daih ang le?

Van dumpâwl lam chu a han thlek zawk a. A tuk lehlam lum dan tur chu a rin hriat theih mai a. Helai hmunah hi chuan chhun lamah an rahna vaivut sat zawng chuan 110 degree te thlengin, zanah erawh a vawt vîn leh em em a. Chhûnah chuan ṭiau vaivut sâ leh thli ro tleh chuan hnawng awm thei zawng zawng chu a hîp ral vek ṭhin a. Mihring an ni emaw, ransa an ni emaw pawh nise, savun ro châr tlat ang maiin an taksa a hnawng awm zawng zawng chu a hip kang vek ṭhin a ni. Chutiang khawpa sâ ah chuan tui in tur a awm loh chuan, darkar sawmhnih pali chhung mai pawhin pachang meuh pawh an thi tawp thei a ni.

Nora-i chu a sirah a rawn kal a. "Tunah hian enge kan tih dawn?" tiin a han zawt a.

"Kan chawl hahdam ang, tuifinriat kam thleng thei turin ei leh in lam pawh kan theih tawkin kan inhnangfak ang chu.."

"Buaina kan tawh I ring em?"

A lo ngaihtuah mek a ni. "Aw, kan tawh ka hlau khawp mai. Indian ho pawh an awm reng a, tunah chuan min rawn beih ngei a ngai tawh dawn tih an hria a ni."

"Enge kan lo tih ve theih?"

"Tui kha in char char mai rawh. I taksa in a pai theih chin chin kha. I tihrawl te kha ti hnawng la. Chuti chuan I daih rei deuh mahna."

A sakawr chu tui in turin a kai phei leh a, chutah a bula hnim ṭo a ei theih ang ang te pet turin a chhuah ta a.

Joe-a’n a rawn pan lai chuan thingro a hmuh theih ang ang a lo fawmkhawm mek a. Gopher-a chu a sirah lo kalin, Badger-a chu a rawn hnuhnung ber a.

"Tuikhur ṭha tak chu a nih kha, Rodelo," Harbin-a chuan a han ti a. "Thupha ka chawi e. Kalkawng chu I lo hriat zêk hi mawle, tiraw."

"Ka la hre zel dawn a lawm."

"Chu chu enge a awmzia?"

"He thihna hlim hi kan la kalpel lo a nia, Harbin. Tuifinriat kam lam chu mel sawmhnih panga vel lai a la ni ang. A ni lo berah ni hnih tal chu kan la thang ang."

"Takzet chuan! Ni khatah mel sawmsarih lai pawh ka kal ṭhin tawh a sin."

"Tuna I sakawr dinhmun angah hian maw? An chawrche tawh em hi, Harbin."

"An thei em em ang."

"Ngawi mai mai teh, Joe," Badger-a chuan a lo ti a. "A ti dik maithei a sin."

"A ti ve ekthlawk a nih hi! Hun min khawhral pui mai mai a ni. Ani hi mamawhna kan nei tawh lo reng reng."

Dan Rodelo-a thing fawm zo chu a rawn tho chhuak a. "Cofee lum ila," Nora-i hnenah chuan a han ti a, "Inhnawhpuar teh ang u. Hun harsa ber lai chu kan hma ah hian a la inchhawp a nia."

Harbin-a lam chu a rawn hawi ta a. "Min mamawh teh meuh mai. Min la mamawh zual zel dawn. Khang Indian hote nen khan in inbeih a la ṭûl ngei dawn a. Dah nêp lutuk lo la a ṭha ang. Kum tam tang tlanchhuak te hi an lo um tawh ṭhin a. An hlawhtling ziah bawk,"

"Lo kal se la.. an lo thlen hma poh leh a ṭha ting mai alawm."

"Helai aṭanga khawthlang lama ṭiaudup hmun saw I hria em, Harbin. Sakawrte leh mihring te an bo pil hmiah hmiahna hmun a awm asin, chhuah an tum poh leh an pil thuk zel mai a ni. I tuithawlte kha a pawp nual ta se la? He hmun aṭanga kal chhuak tur hian kawng a la thui fu asin. Mi rura tak tak engzat nge chutiang dinhmunah chuan lo ding tawh I hria em? An hming mal man fak pawhin dawrzawn khat lai chu ka hrilh thei ang che….. Chung mite chu he hmun leh tuifinriat kam inkarah mai pawh hian an bo pil vek tawh a sin."

"Ka ring lo ve a."

"Thu awmze nei a sawi a ni," Badger-a chuan a lo ti a. "Kan dinhmun uluk taka thlir chunga thil kan tih a fuh ang."

Gopher-a chuan thingṭang fawm belhin mei chu a han vur leh a. Nora-i chuan lo enin, "Engvangin nge Gopher tia an koh che a?"

A lo ṭhenkhum sak a. "Lei laih hi ka hrât ve a, leiverh tam tak ka siam tawh ṭhin asin. Chuvang te chu a ni mahna Gopher min tih tâk. Kan inkawp ve zauh zauh ṭhin a," tih pahin Badger-a chu a han mitmei zauh a.. "Kei aia a len zawk avang hian Badger-a an tia, chuan kei hi Gopher-a ka lo ni ta a ni."

An eiin an in zo ta a. Tiauvutah chuan pakhat te tein chau zetin an tlu ta phung a.

"In khuh ṭha hle ang che," tiin Rodelo-a chuan Nora-i chu a han hrilhlâwk a. Thlaler thli a rawn tleh dawn a. A vawt khawp ang"

"Vawt a?" awih loh hmel deuhin a lo ti a.

"I ruh chuktuah zawng zawng kha a hmet khawng vek mai ang che. Kha hei hi sin tel rawh. Inkhuh ṭha hle rawh."

Tuifinriat kam lam niawma a rin chu Rodelo-a chuan a han thlir a, hmun sang deuh aṭang chuan ram inpharh duai chu a hmuh theih tawh mai thei. Mahse, thlalerah hi chuan thil hi a landan ang ngawt hi a ni ṭhin lo va. En ngawta lang si lo harsatna chi hrang hrang tawh tur a la inthuah ṭun a. A kotlang va rah chiah hma a hriat lawk harsa em em, vaivut khuarkhurum te, tlak pil hmak hmak theihna tur tiaudup hmun te, vaivutin a khuh si, tlangkang lung hriam em em, pheikhawk at duai thei chi te a la awm ṭeuh a ni.

A chhungrila hriatna mak tak aṭang chuan.. atukah  chuan engthil emaw tak thleng ngei tura hriatna a nei a ni..