Bung-6

Texan pa in sikret tlawn engemawzat a zuk ral meuh chuan khua pawh a lo thim chiang ta hle a, chetchhuah a hun ta tih hria in a sakawr awmna lam chu a pan phei ta a. Saddle bag chhunga mosacin (Red Indian pheikhawk) chu phawrh chhuakin a sakawr chung chuan ppheikhawk boot rit leng lung rawng sang ai ah chuan a bun ta mawlh mawlh a. A chhan pawh a chet dan turah chuan thawm nei hauh lo, rûl tleng ang maia thawm nei lova thawh chhuah a ngaih dawn vang a ni. Black Nill beng bulah chuan zawite hian, "Black Nill, ka kal bosan dawn che a, ka rawn let leh hma chuan thawm nei hauh lovin helaiah hian min lo nghak reng dawn nia, " a han ti sap sap a. Black Nill pawh chu a lo bu ve loh loh a.

      Indian pasaltha che chhuak ang maia thawm nei lo chuan lungpui karah zel chuan a tawlh phei ta hruah hruah a. Chhunglam a va thlen chuan thawm ngaichangin a han ding leh vang vang rih a. A awmna atanga yard sawmhnih vel tura meialh hlap hlap lang leh a bul lawka meizial han fawh det vat vat thin tih mai loh chu thildang engmah hmuh tur a hre lo.

   Chu mei êng awmna chu kual deuh zawng hian a pan phei ta hrauh hrauh a, a kal muangin thawm a dim bawk a, chu mei êng awmna thleng tur chuan minute sawm lai a hun a hmang nghe nghe a ni. Mei bula thu chuan a rawn hmuh ve hauh si lohvin a bul lawk chu Texan pa chuan a thleng phei ta der mai a.

An inkar chu hnai tak anih thlengin Texan pa chu a la tawlh phei ta hrauh hrauh zel a. Chu mei lum bula thu pa lah chuan a hnung lama thihna thla rawn inzar phei mek chu hre hauh lovin a zial zuk lai mawlh mai chu ngaihtuahin a fawp vung vung reng a. Ralvenga ding chu a ni ve ngei awm si, chuti taka a han in thlahdah mai chup Texan pa chuan mak pawh a ti hial zawk nghe nghe a.

 An Inkar chu fit sawmpahnih vel chauh a ni tawh bawk a, tawk tawh hle in Texan pa pawh chuan a hre ta a. A pistol chu phawi in a dawt lamah chuan a hum sauh sauhva. Chuveleh theihtawp tak meuhvin chu pa lamah chuan a zuangphei ta dawrh mai a. 

Meilum bula awm pa pawh chu thawm hria chuan a rawn vir ve vut bawk a, mahse a thawm hriat hun a tlai lutuk ta deuh a ni. Texan pa chuan a luruhah tak mai tuboh ser nga laia chhut ang tluk hiala nâ chuan a chhu ta nghek mai a. Chutah meuh zawngin chu pa chu boruak kham khawp hip tur hmu zo lo ang mai in a thaw hawk hawk a, engmah pawh hre lo chuan a let zui ta hlawl mai a.

 Chupa chu mei êngin a en phak loh chinah chuan Texan pa chuan a hnuk phei nghal vat a, a rawn harh chhuah hun pawha che thei hauh lo turin a kut leh ke a phuar sak hmiah bakah a kâ pawh chu romol in a hnawh sak ta hmak bawk a. 

A duh anga a tihfel zawh chuan a piah lawka In ni ngei tur, ding thim muk lam pan chuan a tawlh phei leh ta hrauh hrauh a. A va thlen hnaih chuan In zawng a lo ni ngei mai reng a, mahse a chhung atang chuan êng pakhatmah a rawn chhuak hauh lo thung. Chu In chu kal pelin a piahlama In pali lai lo ding leh a dangte chu mak ti zet hian thlir ta vawng vawng mai a.

Hetiang taka tawmkuk tha leh biru an han thlang fuh chat thei chu fing pawh a ti hle a. Tunah chuan hnathawh tur chanve chu a thawk zo tawh a, a huphurhawm zual chanve dang a la hmabak a ni.

Tun tuma a tih tur hmasa ber chu J.L mi leh sa ni ngeia a hriat saltangte chu him taka hruai chhuah phawt a ni a, nakin hnuah amah puitu tangkai tak an la ni thei dawn tlat a ni.

In hran hran chu uluk zet hian a enfiah zung zung zel a. Inchhung lama zu in thawm leh card khel han inhnial laih laih thawm tih mai bak chu thawm dang hriat tur pawh a awm lo. Ralvengtu pakhatmah pawnah chuan an dah lova, mi pakhat bak chu zan duty tur chuan a ngai an ti lo a ni ngei ang!

In dang zawng zawng atang chuan êng a rawn chhuak raih vek a, ralveng an dahna bul lawka in thimbik kha an mitang an dahna anih loh vek pawhin sakawr dahna In atana an hman a ni ngei in a ring ta a.

 Enchian hmasak  ber phawt chu a rilruk ta a, chu lam pan chuan a tawlh kir leh ta hrauh hrauh a.

      

      Chu In thim muk a va thlen phei leh chuan bang vel chu a han zut dan dan a. Lung bang vek hi a lo ni a, a kual chhuaka a zut chhuah vek pawh chuan kawngkapui tih bak chu tukverh emaw, boruak luhna tur (vantilation) chhete pawh a awm lo reng reng a ni.Chu Texan pa pawh chuan kawngkapui, tala lian zeta a inkalh bur avang chuan a mi chhanchhuah duha te pawh chulai inchhungah ngei chuan an awma ring nghet ve ta hmiah a.

Kawngkapui lah chu a inkalh bur mai si a, chu mai bakah lung bang a tauh pawp theite anih nghal loh chuan chhunglam han luh theihna tur awm reng a awm hauh silo. Engtia tih nge tha ber ang ti in a han in ngaihtuah leh ta zung zung a. Thawm nei miah lova lut tur chuan kawnghnih chauh tihtheih a awm a, chabi hmanga tala hawn leh tala invuahna in kilh bet kar thlawn chiah chu a ni mai!

Beisei vak lo chung chuan a tihtheih awm chhun, a chhut thlukpa awmna lamah bawk khan a va kir leh a, ani lah chu harh chhuah tum hian a lo rum tuah tuah tawh a. Chutah a pistol phawi in vawikhat dang a han chhu leh pawp a, engmah hre lo bawk chuan a thal ta der  a. Chutah a kekawr ipte chu a dap sak nghal zung zung a, a beisei ruk tak, mahse a beisei ngam chiah bawk siloh an lungin tala hawnna chabi chu vanneihthlak takin a dap hmu ta khiah mai le!

 A lawm tak zet a ni tih hriat tak hian a han nui sak a, a hawn duh tala awmna lam pan

chuan a kir leh ta vat a. Kawngkapui chu thawmdim thei ang ber chuan a hawng ta vat a, chhung lamah chuan penhnih chiah a penlut a. Nawhalh a han nawh ên chuan chhuata mi panga lai mai phuar hlawm chunga lo let reng, chau hmel tak tak te chu a hmu ta mai reng a. Anni chuan chau tih hriat tak hian an lo melh ve hram hram a. Ranch a an thil ei bak kha engmah pawh an la ei chhunzawm leh hauh loh avangin riltama thih mai chu an hmabak ni in an inhre tawh a ni.

Texan pa chuan anmahni ho hriat theih tur tawk leka zawi leh fiah si chuan, "Nangmahni hi tanpui tura lo kal ka nih hi, thawm engmah neih loh phawt rih a tha ber ang," ti in a hrilh nghal vat a. 

Chuveleh anni ho chu thlahrang hmu ta ni awm tak hian an hawi phawk ta hra mai hlawm a, thil lawmawm ani tih pawh  an hrechang tawh lo hial zawk a. Nawhalh êngah chuan chu Texan palian tak, rorum hmel zet mai leh khabe kual lian tha reih rawih, zaidam hmel tak si an han hmuh chuan an chauhna te pawh chu an theihnghilh ta vek emaw tih mai tur hian a hnu reiloteah chuan an rawn tho chhuak ta sang sang hlawm a. Mak an tih vang nge ni, tumah reng chuan tawng chhuah zai rel pawh an awm lo!. 

       Texan pa chuan a bakmeh chemte hmangin chungho phuarna hrui chu a zai chah sak ta hmawk hmawk hlawm a. Chutih pah chuan, "Engmah zawhna in zawh hun pawh anih loh hi. Ngawi rengin ka tih ang a piang zawm zel ringawt mai rawh u, hmun ralmuang kan thlen hunah duhtawkin in la tawng zawk dawn nia. Tun tumah hi chuan min rawn hmuh fuh vaih chuan tumah hi kan dam khaw chhuak hauh lovang," tiin a hrilh leh ta malh malh a.

   Ngawi reng chung leh thawm dim em em chuan an in zui chhuak ta dam dam hlawm a. Mahse chulai hmun chu chhuahsan mai theih lohna kawng hnih an la nei tlat mai. Sakawr an mamawh ang a, chu bakah zan duty thlaktu tur rawn chhuah hun hun chu an tlan chhuak tih an hriat hun a ni dawn a, zanthim hnuaiah zawng ram chin an in hriat hleih nasa mai dawn bawk nen, an rawn hual bet rang hle dawn a ni.

Tutenge annih pawh in hriattirna hun awm hek lo, Texan pa chuan chung a mi chhan chhuahte zinga palian ber chu hruai hrangin mei chhemna bulah chuan an kal a, "Mei hi tlemin tuah êng la, helam hi rawn hnuchhawn tlat bawk la, aw i hriat pawhin rawn hawi kir hauh lovin muhil der tlat ang che," tiin a chah ta zung zung a, a kirsan leh ta a.

Midangte kiangah chuan a va kal leh a, lang lo thei tur ang bera a thuttir vek hnu chuan a kawr ban chhung lama chemte vawm chi a pai chu phawi chhuakin thil lo thleng tur chu a nghak ta ran mai a.

Rei pawh an nghah hma in chu lungin thim tak rawn hnaih tu ber In pakhat chhung atang chuan kawngkhar lam hawia rawn pen chhuak ri thlarh thlarh thawm an chu an hre ta a. Chu pa chu rawn kal zelin ngaihthat lohna engmah pawh nei hauh lovin lung In kawtzawl lam pan chuan a rawn phei zel a. Meichhemna bula muhil ni awm tak a han  hmuh chuan, "Sleepy tih awm tak reng zawng i lo nih hi. Muhil kaihthawh chawp i ngai ziah mai a." a rawn ti phei bawrh bawrh a. Meichhemna bula awm chu a thianpa duty kha a ni lo tih reng a hre hauh si lova.

Chu pa chuan a lo bihrukna lai zawn a rawn pelh phei chiah chuan Texan pa kut bawr, a chemte humna kut dinglam chu a phe ta vuai a, chemte chu boruakah a thlawk phei vung thuak ta mai a. Chu pa tukkhum thlung ah tak chuan a va bur tlum ta thawih a. A tukkhuma chemte vawt raihin kua a rawn hreuh tak thut avang chuan chu pa chu a han zuang awk a. Aw rawl pawh chhuah hauh lovin leiah chuan a tal khur ta ngawt ngawt a reiloteah a zal ta raih raih a.

      Chu a mi thah pa chu hmuh mai mai theih loh tur laia an hnuhsawn hnu chuan meilum bula an thuttir pa nen an vai chuan misualho kulh râpthlak tak chu an chhuahsan ta vang vang a. Marshal leh a hote chu chau hle tawh mahse an chunga thil lawmawm tak lo thleng thar ta avang chuan namen lovin phurna an neiin chauh pawh an hre tawh meuh lo emaw tih hial turin an hlim a ni. An kal pah chuan Marshal chuan, "Khati taka chemte hman" a han ti dek dek a. Texan pa chuan, "Dam a chhuah i duh chuan i hmui kha chip hmiah ringawt mai rawh," ti in a rawn khap bet leh ta vat a. Marshal pawh chuan tisual in ti hmel tak chung chuan ngawih a chuh ve leh ta vat a.

      Misualho kulh luh dawna Texan pa in sakawr a dahna hmun an thlen chuan, "Helaiah hian min lo nghak ula in chuanna tur sakawr ka va ngaihtuah ang e," a han ti a. Marshal bawk chuan chhan leh tumin a ka chu a han ang zuau hman a, mahse Texan palian puia chu hmuhtur a lo awm leh tawh hauh lova. "Pa ngaihsan awm tak zawng a ni ngawt mai, a huaisen leh remhriat dan bakah a chemte vawm thiamziate reng reng mai kha! Engtinnge, henglai misualho tawmkuk pilril lutukte a rawn chhui chhuah theih mai chu le!!

Ngaisang tih hriat tak hian Benvo khaw Marshal chuan a han thlir zui vawng vawng a.

   J.L cowboy Bat a pawh chuan, "A khela a thil paite pawh kha inchei nan mai zawng a pai tawp lovang le,"a lo ti ve nang nang a.

    Texan pa kal ta chu fimkhur takin a phei zel a, a kuk thluk pa chuan harh chhuah mai a la tum rih lovang tih a finfiah te te hnu chuan In tawp ber bula carrol ni ngei tur a hmuh, a enchian tak lem loh kha panin rûltleng ang maia thawm nei lo chuan a tawlh phei ta zal zal a. Inchhung lam thawm pawh chu pindan tin maiah chuan a tha tlang tawh hle a. An hnathawhna ah duhthusam an la thlen theih zel vang pawh ni ngei in Texan pa chuan a ngai a. An awrawl per chhe tak tak atang te chuan pawh an rui fe hlawm ngei ang tih pawh. Mahse, chungte chu a ni tan chuan a duhthusam an ni deuh deuh mai si a.

In tawp ber zawn a thlen phei chuan thawm a han ngaithla leh vang vang a. Chu In tawp ber a mi chu a dangte ang lo takin thawm a reh dak mai a. chu bang awng leh tukverh kar atangte chuan a rawn de chhuak sat sat thung a.

  

     Chu In bangbul setah chuan va kalin bang leh a beng insiktir meuhvin chhunglam thawm chu a han ngaithla leh vang vang a. Thawm zawng a awm ve ta ngei mai, mahse inchhung hmundang atanga thawm lochhuak nen chuan a

danglam daih thung:

Inchhungah chuan hmeichhe hlim han nui ri hawr hawr leh a khat tawka mipa aw thum bel bul rawn tawng chhuak veleh zoh thin te, zu no chhunga zu han thlit lut ri kar kar thinte chu thawm hriat tur awm chu a ni mai a.  Chutah zawngin,  chu In chu misual pawl hotu ber In a nih ngei pawh a ring ta hmiah mai a. Kawngkapui chu han chhir hawn a, a hnathawh tur hmabak huphurh awm tak chu puitlin nghal law law mai te chu a han rilruk deuh thut thut a.

       Mahse chu em chu tun atan chuan thiltihtheih a ni lo. Engemawzat te chu a that thei ngei ang! Amah pawhin a thih phah hial ngei ang a. A tam zawk tlanchhuakte chuan an thil tum chu puitlin turin beihpui an la thlak thei dawn tlat a, chu chu Jonathan a tan chuan thlarau sual hnathawh ai pawhin a tawrhhlelhawm zawk ngei ang le!!

         Chu In sira corral lam pan tur chuan a inhera penhnih chiah a pen hman tih chuan a piah lawka In kawngkhar chu a rawn in hawng thuai a, Texan pa pawh chu bang hrulah chuan a tawlh lut leh rang kher mai. Ama thawm a rawn hriat avanga lo chhuak a ni ang em. Chutia a lo in chhut neuh neuh lai chuan vung fahranin chu pa chu a rawn pen phei thuak a. Texan pa chu hmu miah lovin a rawn kal pel phei ta vut a, corral bulah chuan a va ding ta chut a, chutah chhuak em em awm fahran chuan a va zung ta tur tur a. A kekawr dawr kilh tha mawlh mawlh chung chuan a rawn kir phei leh a. Bang bula mihring ding thim mak mai chu han hmu vaih sela chuan a râk nasa hle ngei ang le!!. Mahse a zu in hnathawh bakah a kekawr dawr mawlh chu a bih ngur ngur avangin hmu hauh lo bawk chuan a phei ta zel a, a rawn chhuahna kawngkharah bawk chuan lutin kawngka chu a khar leh ta hmiah a. Chutah zawng Texan pa pawh chu a thaw ta huai a, thil kaldan a buar chuar teuhzia a han ngaihtuah chuan lungphute chu rang ta leh ring ta sawt hian a hria a. Chawlh muanna chi a ni lo tih hria in rang takin corral lamah chuan a tlan phei a ta vat a.

A hma lawka mi pakhat a va kal tawh avang khan chu Texan pa va kal ve pawh chu sakawrte chuan eng he hu ah mah an lo ngai hran bik lem lo a ni ngei ang, thawm chhete pawh chhuah lo chuan an awm theih phah ta hlauh a.

 Corral hnungah chuan sakawr panga lai hi an lo thlung a. Corral chhunga an dah veloh danah chung sakawr pangate chu an mi man te sakawr anih ngei pawh a ring ta a. Corral chhung a mi sakawr pakhat, jean pawh phahsa diam chu a kai chhuak bawk a, chung sakawrte chu nel takin a chul thuak thuak a. A kamis hak lai chu phelhin a han pawt thler kawk kawk a, a sakawr kaih chhuah turte ke zawng  zawng chu a tuam sak ta hmiah hmiah a. Texan pa hi sakawr chan chin hre tak leh han tih vel dan pawh hre lutuk tak mai anih avangin thawm chhete pawh nei hauh lovin amah lo nghak reng tute awmna chu a va thleng ta thuai a. 

        Sakawr pakhat chungah chuan a kukthluk pa nikhaw hre lova tlu reng kha an phuarbet a. Midang zawngte erawh chu anmahni sakawr ngei theuhvah chuan chuangin misualho tawmkuk chu an chhuahsan ta thuai a