Bung-6

Violet Scented Breath

Blofeld chuan amah thuthualtu te chu duhtawkin a han en a, a rin leh beisei ang ngeiin pakhat chiahin alak atangin a mit chu inthiamlohna nei tih hriat deuh mai chuan a lasawn vat a, vawihnih lai an lo finfiah tawhna chu ama mit ngeia hmuin a finfiah ta a ni. A kut pahnih chu dawhkan hnuaiah chuan muangchangin a lathla a, a kut lehlam chu a malchungah a dah thung a. Lehlamin ipte a zen leh a, rangkachak bur, te reuhte hi a han phawrhchhuak a. Dawhkanah chuan dahin a chin chu a han hawng a sweet lam chi rawng senduk hi a phawrh leh a, a hmawm ta nghal a. Thu ngaihnawmlo tak a sawi dawn hi chuan a thaw leh thusawi tihdanglam nan heti hian a ti ziah thin reng a ni. Muang si, fiah tak leh dam tak in heti hian thu a sawi ta a.

"Kan memberte hnenah kan hmabak lianber mai, Plan Omega kha sawifiah tur ka nei a. (Blofeld hian 'thiante u, gentlemen tih te leh colleaques te..' tih vel hi a chuangtlai a tih avangin a hmang ngai lo) Mahse chumi lam kan thlurchhoh hmain fimkhur thu hla ah thildang sawikai a ngai a ni," tiin Blofeld chu a han hawikual a, a rinhlelh pangngai bawk khan a mit chu a lo lasawn leh vat a.

"Kan Executive chuan kan kum hmasa kum 3 chhung hi chu kan hlawhtling hle a ni tih chu an pawmtlan theih ka ring. German section a kan thawhpuite zarah Himmler-a rohlu chu Mondsee atangin him takin kan lachhuak thei a, lunghlute chu kan Turkish Section in an lo tiral leh a, kan pawisa hlawhchhuah chu Pound 450,000/- a ni. East Berlin a MWD Headquarters a safe leh a chhunga awm bo ta daih pawh kha kan Russian Section ah chhuiluh a ni miahlo bawk a. He safe leh a chhunga thil awmte hi CIA-te hnenah dollar 500,000/- a hralh a ni a, Italy-a Pastori Circuit Heroin kan lo lambun chu Firpone Interrest, Los Angeles ah dollar 800,000/- bawk a hralh leh a ni a. Czech ho indona a hman tur Germ, Pilson Chemical Factory atanga rukchhuah chu British Secret Service te chuan Pound 100,000/- in an lei leh bawk a. Cuba ram, Havana khawpuia cheng German SS Gruppenfuhver Sonnlag kan blackmail-na ah chuan dollar 100,000/- chauh kan hlawhchhuak thei thung, chu pawh chu a neih zawng zawng a ni lehnghal,"

"France Heavy Water Specialist, Peringue pawh Berlin kaltlangin Communist lamah putluh a tum a, hei vang hian Deuxieme Bereau chuan Franc vaibelchhekhat lai min pe a, tichuan kan sum lakluh zawng zawng chu a hnuhnungber chhiar telloh chuan Pound maktaduai khat leh a chanve a ni a, mahse hengte hi tunlaia pawisa innghahna tlak ber an ni lawi si a ni. Swiss Franc leh Venezuala Bolivar te-a thleng a ni a, tichuan kan hriat angin kan senral leh hmantur dahtha in member tinte chuan Pound 60,000 theuh in dawng dawn a ni. Hei hi a tlem tham hlein ka hria a, kum khata pound 20,000 chauh hlawh ang in ni a. Mahse Plan Omega chuan tuna kan thil kalpui dan pawh hi thlak duh mah ila, thlak theih hialna tur sum thahnem tak a rawn hlawhchhuak thei dawn a ni. Zawhna kan nei em?"

Mi 20-te chuan an chairman chu an thlir thup mai a. An rilru ah chuan lungawilohna an nei hran lova, mahse an lungawi thu han sawi tum erawh an awm chuang lo.

Blofeld chuan sweet dang chu a hmuam leh a, chutah muangcharh hian, "Anih leh engkim a tha ah ngai ila; Tunah thlakhat kalta a kan hnathawh hnuhnung ber, Dollar maktaduai khat kan hlawhna chungchang kha sawi tawh ila," a ti a, a veilam a thu tlarte chu muangchangin a han en a. "Ding rawh le, No 7," a ti ta a.

Blofeld-a'n ava biak, Marius Dominique chu muangchang hian a rawn dingchhuak ta a. Ani hi Union Corse a mi te incheina rawng lar lam deuh inbel, pa satha lam leh hmeltha tak mai hi a ni a. A kut zawi taka thlak hnalh paha Blofeld-a mit ah tak chuan ring tawk tih hriat deuh mai hian a en a. Blofeld pawh chuan ngun deuh mai hian a lo en ve na a, a chik ber zawk chu no 7 bula thu, Corsican mi no 12-na, Pierre Borraud a ni. Hepa hi dawhkan sei tak tawpah chuan Blofeld hmachhawn zawng chiah hian a thu a, atir lama Blofeld-a lak ata mit lasawn reng tu kha a ni. Mahse tunah chuan hlauhtur nei tawhlo hmel a pu a, a mitmenga hlauhthawnna pawh chu a kiang tawh a ni.

Blofeld chuan thupui fun tak hian, "In la hriat theuh ka ring a, he operation ah hian Las Vegas ah hian Las Vegas a Principality Hospital neitu Magnus Blomberg a fanu kum 17 mi chu kidnapped a ni a, Magnus hi Detroit khawpui a Purple Gang mi leh sa anih bawk avangin pawl tam takah inhnamhnawihna a nei a. A fanu hi Monte Carlo-a Hotel de Paris atanga rukchhuah a ni a, lawngin Corsica ah hruai a ni a. Nula lakkir leh nan hian Dollar maktaduai khat phut a ni a, Mr. Blomberg chuan a lo aw e nghal mai a. Tichuan SPECTRE thupek angin pawisa chu thelret lawngah dahin Italy tuipui kam, San Remo bulah hnutchhiah a ni ta bawk a. Zanah he thelret lawng hi kan Sicilian section te chuan an lawngin an va chhar ta a ni. He section hi an chetfel em avangin faktlak an niin ka hria. Thelret lawngah hian transistorized radio transmitter an lo hnutchhiah tlat mai a, hei hi a lo buaipuitu te hian an lo hmuchhuak ta hlauh mai a ni. He radio hi French Navy ten thelret lawng chhartu te zawnchhuah nan a an lo dahruk a ni a, mahse Sicilian section te fimkhurna azarah hei hi an hrechhuak hma hlauh a ni. Pawisa kan dawn hnu chuan kan inbiakremna angin nula chu a nu leh pa hnenah thawnkir leh a ni a, mahse amah thupnan leh venthawn thilah a sam rawng erawhchu tihdanglam a ni a. Nula chu kut tuar miah lova thawnkir kan ni emaw kan intih lain Nice khua a Police Commissariat chuan hren anih lai khan pawlluih a ni tih an hre ta a ni," a han ti chuar chuar a.

An ngawi thap mai a, heti hian a sawizawm leh ta a. "Pawlluih anga sawitu chu a nu leh pa an ni a. Nula hian a lo duh ve reng pawh nise, kan Organisation chuan 'he nula hi khawih miah lovin kan kir leh ang' tiin kan sawi tawh a. He thil thleng hi tum reng vang emaw, vanduai vang emaw pawh ni se, nula chu khawih chingpenin a nu leh pa te hnenah kan kir leh tihnana a ni a. Pawl lian leh chak, thil tithei tak kan ni a, mawi leh mawilo kan dawn lo. Mahse kan memberte chuan SPECTRE hi chungnung larhin a che thin tih an hrereng tur a ni. SPECTRE ah hian thununna awmchhun chu mahni inthununna chiah a ni. Inzawmkhawm, in rintawnna avanga chak leh thiltithei kan ni a, kan zinga pakhat chaklohna chu kan chhiatna bul a ni. Hemi chungchanga ka rilru puthmang chu inhria a, tunhma a hetiang thil avanga inthenfai hna ka thawh thin dan pawh inhria. Tuna kan buaina sawi laiah chuan tul ka tih danin ka ti tawh a, nula nu leh pa chu dollar maktaduai chanve leh thupha chawina ka kir leh tawh a. Hei hi thelret lawnga radio transmitter an lo thuhruk hrereng chunga ti ka ni. He thil hi police ho tih pawh a ni mai thei. An thil chin deuh a ni. Engpawhnise, he thila kan sumhmuh chu a tlakhniam tak avangin kan chan a tlem hle theuh dawn tih a chiang a. Hemi chungchanga thil tisualtu chu thiamloh ka chantir tawh a, a chunga hremna hlendan tur pawh ka ngaihtuah fel diam tawh a ni."

Blofeld chuan dawhkan sira no 7 chu ngun deuh mai hian a han en a. Chu Corsican chuan hlauhna nei miahlo hian a lo enlet a, chu thilah chuan a fel fihlim tih a inhrechiang a, tunge mawhphurtu a hrechiang bawk. A insangmar teuh va, a hlauh vang phei chu a ni lo. Midangte ang bawkin Blofeld a remruat chu a sual ngailo tih hriain, a kutah a innghat tawp mai a ni. Engvanga ani chu thurchhuak nge a nih chu a hrethiamlo hle a. Mahse Blofeld chu a dikloh ngailoh avangin ngaihthatlihna a nei hranlo.

Blofeld chuan chupa huaisen dan chu a hai hek lo va, a chhan pawh rindan a nei nghal mai. Dawhkan hmawr lehlam a table no 12 hmai a thlan tla zawih zawih pawh chu a hmuhhmaih chuanglo. Chu thlanchhuak chuan a thil tihtur chu a tiawlsam zawk dawn a a hriat avangin Blofeld chu a han bu leh nghut a.

Dawhkan hnuaiah chuan a kut chu a han chet a, thil engemaw hi chelhin a han herhzui ta a.

Pierre Borraud taksa chu electric Volt 3000 zet mai chuan a han man ta a, a hnunglam atanga chhuih zawt ang mai hian ani chu a ding zawk mai a. A samdum, khawng tak mai chu a tho suau mai a, a hmai a sen nghal awp awp mai a. A mitmeng a pawng zawrh mai a, a lei chu kang dum zel zul hian rawn chhuah a. A kut, a hnung leh a malpui atang chuan a rawn khuchhuak rum rum bawk a. Blofeld chuan a han herhlet leh a, pindan chhung thim ta deuh ruai pawh chu a endan pangngaiin a rawn eng leh ta a. Tisa leh thawmhnaw kang rim chu inchhungah chuan a rawn nam nghal chum chum bawk a. No 12 taksa chu a sawphnawk a, a khabe chuan dawhkan tlang chu a tauh zui chawrh a, inchhung chu a reh zui ta tlawk tlawk a.

Blofeld chuan zawi fiah fek fawk hian, "No7, thu rawh le. I awmdanah ka lungawi tawk e," a ti ta a. Hei hi fakna tawngkam an hmansan ber a ni.

No7 chu chelo leh danglam chuang miahlo chuan ala ding reng a. Blofeld chuan, "No12 rilru kha lakpen a ngai tlat mai a, rinhleh kai a ni tih a inhriat avangin tihloh theih a ni lo, mualpho takin kan buai mai ang tih a hlauhawm a ni," a han tih zawm leh a.

A thusawi chu pawmpui tih hriat tak mai hian dawhkan kiltu thenkhat chuan an lu an lo bu nghat nghat hlawm a. Blofeld-a tihdan kha finthlak hle hian an hria a ni. An thilhmuh kha tumahin mak an ti lutuk lo va, Blofeld chuan an zavaia hmaah dan a kengkawh thin. Hetiang thil hi tunhmain tumhnih a thleng tawh a. A vawikhatna ah chuan pawikhawihtu chu Blofeld chuan a thinhnun tlang zawkin air pistol-in a kap a. An inkar chu pen 12 vellai anih avangin a kapfuh thei chu a mak viau zawk a ni.

A hnuhnung zawk chu Blofeld-a dinglam chair ah a thu a. Blofeld chuan a nghawngah hruizen a thehawk a, a chet hman hmain a hrekhlum hman der a ni. Chung mi pahnih te leh tuna thi ta te hi an boral a ngaih avangin tihhlum an ni a, an memberte pawh chuan an bula ruang let reng pawh chu hre awm pawha langlo hian thuthmun an rem a, an chairman thusawi chu an nghak ta a.

Blofeld chuan a rangkachak bawm ken chu a chin a, a ak bo ta a. Chutah zawi tak, fiah tak bawk si hian he ti hian a han sawi leh ta a. "No 12 thlakna tur hi Corsican section chuan tha an tih zawng an rawn thehlut ang. Mahse chu chu Plan Omega kenkawh hnuah ni se a pawi loving. Hemi chungchangah hian sawifel ngai a awm nual mai a, German Sector-in an awih, Sub-Operator G chuan thil pawi tak mai a tihsual avangin kan chet hun tur thlengin a khawih pawi tlat mai a. Hepa, Macau a Red Lightning Tong mi leh sa hi inphiarrukna leh thuruk thup ah chuan rintlak viau awm tak a ni a, England chhim lama clinic pakhatah lo in thukru tura hriattir a ni a, inthupna remchang tak mai a ni nghe nghe a ni."

"He Sub-operator hna ber chu hnaite a Bascombe Down Airfield-a Pilot Petacchi biak pawh zeuh zeuh a ni a. He airfield hi Bomber Squadron Training-na a ni. A khat tawkin Petacchi taksa fit leh fitloh bakah a rilru puthmang thlengin min rawn hrilh leh chhawng tur a ni a. Min rawn hriattir chhun chu a tha a, Petacchi pawh chuan rilru dang ala pu chuang lo. Sub-operator G chu tun atanga ni thumah D+1 lehkha thlak tura tih a ni a, mahse vanduaithlak takin hepa hian finglo tak main he clinic a awm vet ho nen hian inhmuhthiamlohna an nei pek a. Hei vang hian kang nasa tak tuarin hospitalah a awm mek a, kar khat vel zet chu a che thei dawnlo tihna a ni. Mahse chet dan tur ruahman thar a ni leh tawh. Petacchi chu influenza natna hrik pek a ni a, hei hi a hman chuan flight nei thei lovin kar khat vel chu a damlo ngei dawn a. a dam veleh a a thlawh hmasakna ber chu min rawn hrilh vat dawn a ni. A thlawhchhuah tur ni chu Sub-operator G hriattir a ni ang a, chu hun chu ani pawh a that deuh tawh beisei a ni a. Ani chuan ruahman angin lehkha chu a thlak zui ang. Kan chet dan tur thar zulzuiin Special Executive chuan Zeta biala thlawhdan tur kawng chu a ruat thar bawk ang. Tin, Sub-operator G chungchangah chuan innghahna tlaklo mihring a ni a, German section chuan hma thar a la tur a ni. Chu chu in hria em?"

German mi pathumte chuan an hrethiam tih entir nan an lu an lo bu nghut nghut a.

"Thildang erawh chu ruahman ang vekin a la fel hlawm a. No chu Zeta area ah a inbengbel fel tawh a, rohlu zawng mi anga an insawi chuan mi rin a hlawhtir hle. An yatch-a hnathawkte pawh uluk taka thlanfel vek an ni a. Rin ai takin thu an awih a, khawmual, innghahna tur mumal tak an nei tawh bawk. He hmun neitu, English mi hi pa ti kher kher tak mai, buaina duhlo zet mai hi a ni bawk. Zeta area ain kaldan tur pawh ruahman fel a ni tawh a, in thlawhchhuah dan tur a zirin in thuam pawhin Area F leh D ah a lo nghak reng tawh che u a ni. In thuam ka tih ah hian in rohlu zawnna a sum thawhtu in nihna leh a hmun ngei a telve in duhna a tilang dawn a ni. Millionaire khermei tak tak anga in inlan a ngai dawn a ni. Pa fing leh thluakfim tak tak innih hlawm avangin in sem senna chu a rintlak dawn chiah em tih en tura kal ang in ni dawn a ni. In vain in tihtur in hre theuh anga, in chanpual chu in hriatchian hle ka ring bawk,"

Dawhkan kil a thute chuan an lu an bu nghat nghat a, an inthupna chungchangah chuan inthup lutuk a ngaih hranpa lemloh avangin tihzia an ti hle a. Marseiles atanga Cafe neitu anga kal tur chu a takah pawh Cafe enkawl hrep tawh anih avangin hetiang lam hi chu sawitur a hre em em a; pakhat leh chu wine dawrlian neitu angin a kal anga, ani pawh hetiang lam hi chu naupan lai atanga lo tem hrep tawh anih avangin a ngaihtuahawmlo hle mai bawk. Hetiang theuh hian uluk taka dawp pawh nise insawi fihlim thei tawk turin an nihna lemah chuan an chiang ve tawk a ni.

Blofeld chuan, "Tuichhung luh lamah section tin ten thil awmdan sawi ula a tha ang," tiin a veilam a Yugoslav section chu a han en a. Anin a han sawi chuan section dangte pawh chuan duhthusama tha anih thu an lo sawi ve tliar tliar bawk a.

"Tui chhungah chuan kan hmanruate a him leh himloh hi thil pawimawh hmasa ber a ni. Tin, tuihnuaia hman chi CO2 silai kha in chian ka ring bawk a. Tunah chuan Sicilian section ten kan thil buaipui 'Bullion' lo dawnsawn dan tur an ruahmanna chu ngaithla teh ang u,"

Fidelio Sciacca chu hmaichik deuh leh cher lampang a ni a. Han en mai chuan School zirtirtu, Communist zirtirna lam awn tak ni mai awm a ni. A saptawng chu a thiante aia a dik zawk avangin an section aiawhin heti hian an hmalak tawhdan chu a han sawi a. "Kan hmun riruat chu uluk taka endik tawh a ni a, duh ang thlap niin ka hria. Tunah hian a hun leh hmun pawh kan chairman en theih main ziahsa ka nei thlap tawh a ni. Kan hmun ruat chu Area T kan vuah a, Mount Etna hmarthlang lam, thinghmun awh chin chunglam meter 2000-3000 inkar a awm a ni a. He hmun hi khaw tereuh te, Bronte chunga tlangkang lei leh chirhso phuhchhuah, ro tawh awmna, hmun reh leh tlawhpawhloh tak a ni a. Thlawhna a thil rawn thlak lo dawnsawn nan Km 2 bial hualin alo chhartu tur ten hmehen in chhinchhiahna an siam ang a, chu bial lai takah chuan Decca Aircraft Homing Signal bakah Navigational Aid dah a ni ang. Bullion phurtu thlawhna chu ka rindan chuan Mark IV Transport Comet a niin ka ring a, feet 10000 a sangah darker khat a mel 300 vel a chakin a rawn thlawh ka ring a. An thil phurh a rih tham deuh avangin parachute pawh pakhat mai chu a tawk dawn lo va, ram chhengchhia leh khawkrawk anih avangin uluk taka tuam a ngaih ka ring bawk. Zan thimah pawh rang taka lo hmuh mai theih turin Dayglo emaw, rawng eng chi hnawih nise a tha bawk ang. Chung neuh neuh chu SPECTRE in memorandum-ah alo ziaklut vek tawh a, mahse fimkhur thu hla-ah ka rawn sawi nawn leh mai a ni e,"

Blofeld chuan a awki atanga ngaimawh leh engto tih hriat deuh mai hian, "Anih leh alo chhartu turte chu," a lo ti bauh va. "He district a Capo Mafiasi hi ka patea a ni a. Fa pariat lai mai neiin a hmangaih hlawm hle a. A hnenah chuan a fate awmna hi ka thawhpui ten chiang takin an hre vek tih ka hriattir tawh a, ka sawi awmzia chu a hai bik lo. Mahse a thlawn ngawt chuan min tanpui ka phut bik lo va, kan duh ang a tihtheih dawn chuan Pound maktaduai khat pek tur anih thu ka hrilh bawk a ni. Ka ngenna hi Capo Mafiasi chuan a pawm vek a, Bank rawk lam nia a rin avangin a dang chu atan hriatloh a him zawkin ka hre nghe nghe a ni. Kan khawtlaina tur tlem I rawn sawi khan kan thil ruahman a rawn tidanglam chuang lo. Sub-operator 52 chu pa rintlak tak niin ka hria. Ka hnena Halli Crajtor min pek kha ka hlanchhawng a, thil ruahman angin 18 megacycle ah thu alo ngaichang reng ang. Tunah hian Capo Mafiasi chu ka bepawp reng a, an chhung hnai nupuia a neih avangin an inlaichin viau nghe nghe a ni,"

Blofeld chu minute hnih vel a han ngawi vang vang a, chutah, "Ka lungawi zan mai. Chumi baka tih leh tur, Bullion tihral lam chu operator 20 kutah awm se. Ani hi hetiang lama tawnhriat ngah a ni a, mi rintlak tak a ni bawk. Kan Bullion chu Catania a thlen hunah MV Mercurial in a phur anga, Suez Canal paltlangin Portuguese India ah a lutthla ang. Kalkawngah Arabian Gulf a hmun ruatsa ah Bombay a Bullion (hei hi rangkachak ti ila a dik ber ang) lama sumdawng intelkhawm lawngin a lo tawk ang a, he lawngah hian Bullion chu a hlutna ang pawisa dawn anih hnuah hlan a ni ang a, tuna rangkachak man pangngai hi a ni tur a ni. Tin, Swiss Franc, dollar leh Bolivar chu pawm vek a ni ang. Heng sum tam tham tak hi semsawm a ni ang a, Goa atanga kan thlawhna hawh hmangin Zurich-a Bank22 a deposit box ah sem sawm a ni ang. Heng deposit box chahbi te hi he meeting zawhah hian member te hnenah hlan ani nghal bawk ang. Chumi hnu chuan member tin ten an chanpual chu fimkhur takin an hmang thei tawh ang. Ka thil ruahman chu tha kan titlang em?" tiin midang chu a han melhkual a.

An lu an bu nghat nghat hlawm a, an zinga Polish Electronic Expert chuan, No 18-na Kandinsky chuan thu pehhel tehchiamlo leh tlang deuh hian, "Kei chu hetiang hi ka hre tehchiam lo va, mahse eng navy berin emaw Bullion pgurtu lawng chu lo dangin an thilphurh chu an lalet leh thei mai angem? Khawthlang lam ram chuan Bullion chu Sicily atanga lakchhuah a ni ngei dawn tih an hre ve tho dawn si a, chhui zui turin thlawhna leh lawng te chu awlsam takin an tir zung zung thei dawn si a," a rawn ti a.

Blofeld chuan, "Swiss Bank a him taka pawisa kan dahtheih hma chu bomb pahnihte chu kan sut dawnlo tih I theihnghilh ta mai a nih kha. I thil ngaihtuah chu a hlauhthawnawm lovang. Chu ai chuan pawldang tuin emaw kan lawng chu tuipuiah an suam thut mai ang tih a hlauhawm ber zawk a ni. Khawthlang ramte chuan ramdang hriatloh turin thu an zep hram hram ang tih ka chiang a ni. Thu leh hla a putru anih vaih chuan chi-ai na nasa tak a thleng ngei dawn a ni. Zawhna dang ala awm em?" a han ti a.

German sector-a mi, Bruno Bayer chuan, "Area Zeta ah chuan No 1 chu thuneitu ber a ni a. Chutia thuneihna I pek chuan thil engkimah thu a nei ber dawn tihna em ni?" a rawn ti ta khauh mai a.

Blofeld chuan German ho mizia a hriatchian em avangin chu zawhna chu mak a ti hranlo. Thupek awih hnam an ni a, German general-te pawh khan Hitlera remtihna nia an hriat hnuah chauh Supreme Command thu kha an awih a ni.

Fiah fek fawk hian, "Special Executive hnena fiah taka ka sawi taw hang leh nagmahni pawhin in vote ang khan ka che theilo emaw, ka boral palh emaw anih chuan No1 chu ka aiawhtu tur a ni. Plan Omega chungchangah chuan SPECTRE Deputy Commander a ni a, kei chuan HQ-a awmin kan lehkhathawn ina a boruak ngawngchhuah dan ka lo thlir dawn a ni. Pawn lamah chuan No1 chu hotu ber a ni thung ang. A thupek chu ka thupek ang bawka zawm tur a ni. Hemi chungchangah hi chuan kan thu a rual vekin ka hria," a ti ta a. Ngun deuh mai hian a han melhkual a, a thusawi chu an pawmtlang hle tih a hriat mai a.

"Aw le, Tunah chuan kan meeting chu a tawp ta. No12 ruang hi a lo buaipuitu turte chu ka lo hrilh mai ang. No 18 khan Megacycle20 na ah No1 min biakpawhsak a, kha waveband kha dar 8:00 atangin French Post Office te chuan an hmang tawh lo a ni" a ti ta a.