Bung-5

 Kid Rodelo by Louis L'Amour

BUNG NGANA

Tunah chuan muangchangin chhim lam an pan mêk a. An ding lamah chuan Gila tlângdung hriam leh bumro tak chu a bawk ûr mai a. Boruak pawh a lo dai deuh tawh a, An chawl zauh zauh ṭhin nâ-in, an kal tluang angreng phian a. Tlemin an lawnsang chho leh deuh a. An sakawrte chu rei lote an han chawlh tir leh zawk a. Tumah chuan titi han vawrh vel pawh peih lovin an ngawi nghiai hlawm a. Engemaw chen an kal leh hnu chuan Rodelo-a chuan sakawr lakam chu Harbin-a hnenah hlanin Wagon hnung lamah chuan a tluzal ve ta a.

Badger-a chu rawn thu chhuakin a meizial chu a han ṭan a. Rodelo-a melh zawk pah chuan, "I la mu miah nange a?"

Rodelo-a muthlu chu a rawn harh kawk a. "Nia."

"Heng tlangdung hi chhim zawngin eng thleng nge a inkhawh a?"

"Ramri thlengin."

"A paltlangna tur kalkhan a awm em?"

"Aw ... engemaw zat chu hriat ka nei. Indian ho pawhin a dangte pawh an la hre nual mahna."

Badger-a chuan chu thil chu ngaihtuah vang vang pahin. "Helai ram vel hi I hrechiang viau tiraw?"

"Mingo in an hriat theih ang chin chin chu ka hriat ka ring. Mahse, hrechiang lutuk chu ka ni bik lo. Tui awmlohna ram, a awm chhun pawh hmuh har em emna hmun a ni a. Tinajas Atlas velah te phei chuan tui awmna aṭanga hla lo teah thleng zo lovin mi an thi fo ṭhin. Kan kawngtum zawh lai chuanchung lam lungpui kehkâk karah ah te khian tui tlinna a lo awm leh  zauh thin a."

"Chutiang chanchin chu ka hre tawh a lawm." Inngaihtuah muk deuhin Badger-a chuan a lo ti a. "Pinacate lamah pawh tui awmna chu I hre fu tiraw? Hei hian a sawi a," tih pahin nula muhil mêk chu a han thlêk zawk a. "Chhim lam leh Papago Wells khawthlang lamah te pawh tuikhur chu a awm  zauh zauh a ni tiraw?"

Dan Rodelo-a chuan a silai chuh mai awlsam tur chuan a han ṭhu rem hlek a. Engtin nge he nu hian chutiang chu a lo hriat le? Hmun âwm anglo tak tak, Yaquis ho te pawhin an hriat lohna tur a awm a. Chutiang chiah chuan Yumas hote pawh an ni ve tho a, mahse, an ram a ni miau mai a. Engtin nge Nora Paxton-I chuan chûng thleng thlenga a lo hriat ve theih zawk le?

Chutah, phur vak lo chungin, "Aw ni e, chutiang hmun chu a awm a lawm. Mahse hmuh a awlai lo ṭhin teh a nia. Mahse chutiang thlaler tuikhur ringawt chu innghahna tlak a ni lo fo.  A changin a lo tling khat a, a chang leh a lo kangchat vek a, a chang leh a lo hnâm chauh ang tein a awm ṭhin a."

Khawvar hma darkar khat vel a la awm tihah chuan Wagon chu an han tiding a, An lukhumah te chuan tui chhungkhatin sakawrte chu an han intir a. "Ei leh in lam tihna hun remchang kan neih lai tak a ni," Rodelo-a chuan a han ti a "Hun remchang kan neih leh hun chu a fân raih tawh ang."

"Min rawn hmuchhuak ngei ang tih hi I chiang a maw?"

"Yaquis ho khan maw? Kan inchawi dawn em ni."

Mei an chhem a, Coffee te chu lumin, Sam-a dawr atanga an eitur lei; sarep, artui leh chhang te nen chuan an inhnawhpuar ta hlawm a. Rodelo-a chu a inthlahdul lo reng reng a. Harbin-a leh Badger-a chu rin ngam chi an ni lova. Gopher-a lah hi, a hniak tam lam lam um chi a nih avangin a lakah fimkhur a ngai hle bawk si. A khaw hmuh chu a chianloh palh a hlauh avangin mei eng pawh a en ngam lova. Midang zawng zawngte chetla hmu thei vek turin a hnung lam deuhah ṭhuthmun pawh a rem hram hram ṭhin a ni.

A tawpah chuan an meichhemte chu ti mitin, kal an siam ṭan leh ta a. An kawngṭum zawh mek chu tlang dung bulṭhut ah, a hlat zawngin a kal mek a. An chhehvelah chuan mit tlin tawk a thuiin thlaler ram chu a inpharh duai a.

Rodelo-a chuan thlang letliama thil thlen dan tur chu a ring thiam mai a. Hnuchhui thiam elkhen, Hat-a kaihhruai Yaquis te chuan mitang tlanchhuakte hnu chu chhuiin hmun tin an dap vel mek ang a.  Chhim zawngin an han chhui phawt ang a, chutah khawchhak leh khawthlang lam an han dap leh ang a. Hnuhma an hmuh mai dawn loh avangin Lui kam lehlam thleng in an dap maithei. Mahse, Wagon hnuhma chu an ringhlel ang a. Wagon an hmuh loh avang in Misual ho chuan an hmang zui zel ta ah an ngei ngei ang.

Hat-a chuan thil awmdan chu a man thiam nghal mai dawn a. Vaivut dur hmunah te chuan chhinchhiahna siamin, a hote, hmun hrang hranga  hnuchhui tur dap ho chu a ko khawm ang a.  Tunah chuan a hote dawrzawn khat aia tam mah nen an hnu chu chhui fuh tawhin an rawn awmzui mek tawh te pawh a ni mahna.

Engtia rei nge hun an hman ang le? Hat-a chuan Gold City ah a chhui lut ngei ang a. Sam Burrows-a chuan engmah chu a hrilh lo maithei a. Mahse, Wagon an hmang zui zel a ni tih hrechhuak turin hun a duh rei vak lovang. Chuvangin, Wagon chu nakin lawkah kalsan mai a la tul dawn a ni. Wagon hnuktute pawh tui ren nan chhuah vek a ṭul dawn a ni. Gold City lamah an haw leh thei mai ang. Chuta ṭang chuan chhim lam pana intlansiakna chu an ṭan tawh dawn a ni. Hun tam vaklo chu an hlêp tawh nain, minute tina an hun hman dan chu a pawimawh tawh dawn a ni.

 Joe Harbin-a chu a rahchhanah chuan ding kangin hnung lam chu a han thlir a. Vaivut pal khuk awm hmel erawh a hmu lem lova. Yaquis ho an rawn hnaih hunah chu hai rual a ni dawn lo tih hriain, Badger-a erawh chu a hawilet duh lem lova. "Sakawr tha te hi kan ren a ngai a ni," a han ti a. Wagon atang chuan an chhuk dial a. Ke in an kal ta a.

 An hma lawkah chuan Tinajas Atlas tlangdung hmingthang tak chu a lo inkhawh ruih a. A chuanchung lamah chuan tuikhur awm zauh zauhvin, he lai kawng ‘Devil’s Road’ an tih mai, a zawh tu mi tam takte nunna lo chhan tu a ni a. Chutihrual chuan ram chinchang hrelo mi tam takte tluk hlumna hmun pawh a ni ve tho a. Chhim zawngin ram hmelhmang chu a khawkrawk ta telh telh a..

Dan Rodelo-a chuan  Badger-a chu lo nghakin a han ding det a. "Yaquis ho hi kan hnu hloh tir tumin hun remchang dang i zawng leh hlek teh ang u."

Badger-a chuan nuihzat deuh chungin, "Chutiang chu a theih dawn emaw ni le."

"Hun kan khawhraltir hlek thei ang." Tih pahin an hmalam hla vak lova lungpui insir khup lam chu a han kawk a.. "Saw saw I hmu maw? Saw mi piah chiahah sawn he tlangdung paltlangna kalkhan zimte a awm a. Chu chu zawh ta ila. Chutih lai chuan anni erawh chuan kan penna tak hrelovin chhim lam zel an lo pan ding ve thung dawn a ni. "

Badger-a chuan ringhlel deuh chungin a han thlir vung vung a. "Kal khan a awm tak tak maw? Ka lo la hre ngai lo reng reng."

"Wagon hi kan kalsan tawh dawn a ni," Rodelo-a chuan a han ti a. "Heta tang chuan sakawr chungah kan chuang tawh ang"

"Kan him zawk ngei ang le," Badger-a chuan hrethiam takin a lo ti a.

An sira vaivut mualpawng thur lama Rodelo-a’n a hruai phei lai chuan ni chu a lo tlangsang tawh viau a. A lo hnai ber vaivut mualpawng chhip chu Harbin-a leh Gopher-a te nen chuan hai khuarin Wagon chu an phum ta a. Uluk takin an vur hnan leh vek a. Karlovah an khuh fel ta mai a. Chutah, vaivut te chuan an hnuhma pherh nuai mai chu an a theih dan dan in an chhilh leh ta bawk a. Tunah chuan an hnuhma pawh hmuh mumal theih a ni ta lo.

Sakawra an chuan leh hnu chuan Rodelo-a chuan tlangdung inkham ruah lamah chuan a her pui ta dawrh a. Minute sawmpanga vel pawh an la kal lovang tihah chuan ruam kalkhan zim zet maiah chuan an chuang chhuak ta a. Mel khat vel an kal leh chuan a chuanchung lam feet sangkhat vela sangah chuan an chho zel a. Gila tlangdung chu an paltlang ta a. Chulai kalkhan chu zawh ngai loh tih hriat takin a lo ṭhing ṭhuap a. Tlangram beram ki sei chi ho hnu chu a chunglam zel pan chuan a awm chuk a.

Gila paltlangna kawng chu mel nga/ruk vel tur hi a ni a. Wagon an hnutchhiah hma khan an sakawrte chu tui an lo pe fel vek tawh a. Tui ṭin engemaw zat leh Bungraw ritsak thenkhatte pawh an hnutchhiah tel bawk a. Chu chuan a tizangkhai hle tawh nghe nghe a. Mahse, Dan Rodelo-a chuan an hmabak sut zel tur chu midang ho ai chuan a hrechiang zawk hle a. A awlsam dawn lo a ni tih pawh a hai lo.  

"Kan paltlang thei angem le?" tiin Gopher-a chuan a lo zawt a.

"A then azar hi chuan kan thei mahna," tiin Rodelo-a chuan a lo chhang a.

Chhim lam pan zelin ‘Devils’ Road’ an tih mai kawng ruh hlui, mi tamtak an lo tluk hlumna lamah chuan a hruai tan ta a. Tunah chuan, Gila tlang dung hriam lai chu zawh tawpin Tinajas Atlas lamah an her phei leh mek a ni.

Chhun pachangah chuan khua chu a lum hle mai a. Rodelo-a chuan sakawr chu a han kal muantir deuh a, a chawlh tir deuh zauh zauh reng bawk a. An hnung lam kawngṭum pawh a en awl lova. Nora-i pawhin an zinkawng hrehawm tak chu rin aiin a ti thei phian tih a han hmu a.

Sakawr chungchuan rem turin a pawnfen chu a inzai kak a. Mexican ho hak chi kawr a ha a. Midangte ang bawkin silai pawh a hum ve rân mai a. Joe Harbin-a chuan a ta neih deuh teh ngawt a. Mahse, a lo hnial hran lem lova, an dinhmun mek chu phunnawi lovin a pawm ve zel a. A duh thu pawh a sawi lova, a duhloh thu pawh a sawi hek lo. Nula sehhel ve tak chu a ni. Rodelo-a pawh chuan chu chu hriain, en bik deuh chi niin a hre ta a ni.

Hnunglam a hawikir zing ber chu Gopher-a a ni awm e. Harbin-a erawh chu a hawikir khat khawp mai. Inringtawk taka awmin sakawr chu a thunun a. Dar chhah mup mai niin, midangte  mamawh vak lo chi a ni reng bawk a.

Ni pawh tunah chuan a vanlaizawl ta. A sat hian a sa huam huam a. Van dumpawl ah chuan chhum chete eih pawh a awm lo reng reng a. Ni zung chuan a em puak mai ang tih hlauhawm khawpin a chhun tlawk tlawk a. Thaler chhuat chu an rin phak piahlamin a sa a. An sakawrte chu chau tak leh beidawn hmel deuhin chu thihna thlazar hnuaiah chuan an pen hnuk hnuk mai a. Hla takah chuan vaivut tlang pawng hi thlaler chhuat zawl aṭang chuan a ṭo chhuak lurh a. Tunah chuan Gopher-a pawh a hawikir peih tawh lo. Kun ngaihin a sakawr zinah chuan a thu a. Nisa chu a tuar tlawk tlawk a.

"Hmun hlim lai deuh kan zawn a tha ang, chuti lo chu kan sakawrte hi kan tihlum tak ngial dawn," Rodelo-a chuan a han ti a.

"Hlim a?" tiin Harbin-a chu a lo phun sup a. "Khawiahnge chutiang chu I hmuh reng reng ang le?"

"Khilam tlang kar khuar velah khian a awm ang."

"Kei chu ni love," Harbin-a chuan a lo ti a. "Mexico lam ka pan anga, chutah Gulf-ah."

"Sakawr I chawlh tir phawt loh chuan chu chu I ti thei lovang," tiin Rodelo-a chuan a lo chhang a. "Kan tur nasa mah mah tawh a ni."

Harbin-a hmaiah chuan thlan leh vaivut luanna a rang ruai mai a. Rodelo-a lam a rawn hawi chuan a mit chu tualthah chakna in a lo khat ta a. "Engahmah ka ngai lo che," a han ti a, "Chuan kan zinga I rawn tel ve aṭang tawh khan engti kawng mahin ka ring bawk lo che."

"Ka telve tlat sia lawm," tiin Dan-a chuan a lo chhang a. "Ka nghawng thleng ka rawn dai ve tawh miau a."

"Kan thlak danglam thei a lawm," tih pahin Harbin-a chuan a sakawr zina Rifle chu phawiin Rodelo-a chu a tin ta teu mai a. "Helai hmun aṭang hian kan tidanglam nghal ang."

"Mawl tak in tawng pung pung suh," tiin Rodelo-a chuan a lo chhang a. "Ka tello chuan he hmun in paltlang theihna kawng hi a awm lo. Tui te hi a vang elkhen a nia. Awmna hriat chat chat a ngai a sin."

"A hria a lawm." tih pahin Harbin-a chu Nora-i lamah a han thle zuk a. "A hmun te chu min hrilh vek tawh."

"In thlen chiah hma chuan a innghahna tlak a nih leh nih loh a hriat loh… Ruah tui tling mai mai pawh a ni thei a sin. Tunah phei chuan a lo bo vek tawh mai thei a ni. Hetiang khawlum hnuai ah hi chuan chutiang ruahtui tling mai mai mai chuan engtia rei nge a daih a I rin le?"

Tom Badger-a chu inrawlh tum lem lovin a sakawrah chuana lo thu ngawi reng a. Harbin-a hi thi mahsela engmah a tan chuan hloh tur a nei lo. Mahse, Rodelo-a sawi chu a dik a nih chuan, tui chungchang chu thu hran leh daih a ni. 

"Insum teh, Joe," a tawp a tawpah chuan a rawn ti ve ta a. "Dan-a hi a dik a ni. He lai hmun hremhmun ai maha lum leh rovah hian tui tellovin eng chen nge kan daih a I rin le?"

Joe Harbin-a chuan a hmui rep khi tuar chu a han khawih zoh a. A kut vawt  in a han deh takah chuan thudik chu hrechhuak ta niawm takin a han ngawi vung vung a. Nia, tih theih dang vak a awm lo reng a ni. Kir leh thei an ni tawh si lova. Paltlang nge thih tih chu an ngaihtuah ber tur a ni mai.

"Aw, theihnghilh rawh!" a han ti a. "I kal zel ang u."

Dan Rodelo-a chuan kawngṭum lang ruih ah chuan kal a han siam ṭan leh chu a lo thlir reng a. Gopher-a chuan zui nghalin, chutah Badger-a a lo ni leh a. Nora-I chu a bul chetah chuan rawn kalin a rawn ngheng deuh titih a.

"A la that mai ang che, Dan," a han ti a.

"Maithei."

"Mi engemaw zat pawh lo that tawh a nia."

"Engtikah emaw chuan amah ngei pawh hi an la that ve ang – kei ngei pawh hian ka la ti mahna."

Nora-I chuan chik deuhin a lo en a. "Khatiang khan silai hi I hmang tawh ngai reng reng em, Dan?"

"A chang chang chauhin," a lo ti ve mai a.

A kimchang, khawiah nge, engvangin nge tih vel chu hrilh kher ṭulin a hre lem lova. Nora Paxton-i chanchin hi a hre tlem em em a, chutiang bawkin midangte pawh. Joe Harbin-a’n a zuam viau chhung chuan a tan pawh hun remchang a awm ve tho tih a hrechiang a ni. Loh theih lohva inhmachhawn hun a lo awm pawhin Harbin-a chuan zuam sualin, a thattu zawkah a ṭang mai dawn a ni.

Rodelo-a chuan a hmaia thlantui luang te chu a han hui pawk pawk a, hnung lam chu a han thlir a. Hla taka laiking ber rawh mer mer leh tui tling niawm tak tle ser ser bak chu hmuh pawh a nei hran lova. Yaquis ho chuan an rawn umzui a nih pawhin sawng laiking bêl rawh mer mer na piah lamah sawn an la awm a ring a. Chutah, midangte chu a zui ve ta zel a.

Amah chauh chuan chutianga helai hmun an paltlang theih dan tur zawnga khelh kual vel dan chu a hria a. Eng dinhmunah chiah nge an din tih te, han inbum kual vel dan tur chu eng ang taka rura nge la ni zel dawn tih te chu. A thiltih mek chu ama tana ti chu  a ni phawt mai a. Eng ang mihring nge a lo nih chiah tih te chu an la hre chho dawn chauh a ni. Chutah a ṭul dan a zirin midangte pawh a kang kai chho ve zel ang chu.

Amah thah duh maithei reng mihring hote nen zinkawng an zawh tlang ta chu a ni si a. A lo inrawlh ve ngawt avanga amah haw em em leh zawhna hlira khat hote chu. Chutiang mihring chu Badger-a leh Harbin-a chu an ni a. Gopher-a pawh chu a ni ve mahna.... Hun an tihah chuan tute pawh chuan an that hmiah mai dawn a ni. Tui chungchang a ni emaw, Sakawr chungchang emaw, silai vang emaw, engvang pawhin a ni thei. 

Tun dinhmunah chuan, Nula nena an inbiak zin deuh vangin Harbin-a chuan a haw em em tih a hria a. Mahse he thil hi chuan pawimawhna a nei lo thuai dawn tih Rodelo-a chuan a hrechiang em em a. A tawpkhawkah chuan an nunna atan ṭheuha beiin an buai dawn a. Chutianga, thihna nena inchibai mai thei dinhmuna an din tawh ngat chuan, hmel mawina te, mipat hmeichhiatna te chuan an rilruah hmun a chang dawn tawh miah lo a ni.

An lo tawnhriat ,henkhat leh mi sawi aṭangin an hmaah chuan engin nge lo hmuak zel dawn tih ngaihdan chu an nei ṭheuh hlawm nain, Dan Rodelo-a chiahin chiang takin a hria a. Ani pawhin a chinchhuak chuan a hre bik lo. A nihna tak hrechiang turin tumah  dam khawchhuak an awm theilo maithei bawk. An hmalama ram inpharh duai mai tluka hmun hrehawm chu he ramah hian a awm awm lo ve. Tui an nei tam tawk lova. Tuikhur lah a tlem rapthlak mai si a. An tui  neih chhun lah mi pakhat leh a sakawr daih vel tawng tawng a ni mai si a.

Rodelo-a chuan a hma a sakawr chungchuang ho chungchang chu a han ngaihtuah dan dan hlawm a. Tom Badger-a chu dam raih mai leh hlauawm em em a ni a, Joe Harbin-a chu pa thinchhia leh paurau tak, thin thawk thutah pawh tuathah mai duh chi a lo ni a. Gopher-a chu sazu ang mai a tlanchhiat inpeih reng, chiai hma tak, mahse danbeh chuan pawisak reng reng nei lo tur chi a ni ve thung a. Anih leh Nora-I hi? Nora-I chungchang chu mak a ti deuh hlek a. Tunge a nih chiah? Engtin nge heng ho te nen hian an inthurual theih? Enge a duh? Khawiahnge a kal zel dawn?

Chik takin a han thlir ngial a. A nungchang zahawm thlarh mai te chuan a tibuai mah mah zawk a.  Mi rin loh ang deuhin, pianpui finna nei tha leh zirna kawngah pawh engemaw chen intuaihriam niin a lang a. Ramri vela hmeichhe rura deuh angin tuma buaipui ngai a ni bik lova. A tawngkam a felfai em em a. Joe Harbina hian cheibawl viau mahse, a nula chu a ni lo tih a lang reng mai a. Badger-a lah hian an tlanchhuah zelna tura khawlhkham siamtuah ngaiin a ngeih vak lo lehnghal a.

Badger-a chuan bungraw ritsak ken belh chu a ngamawm loh tih a hrechiang a. An tlanchhuahna kawng chu a rura in harsatna tam tak an hmaah a la awm teuh a. Chutiang dinhmunah chuan ngaihven ngai reng chi chu awm lo se a duh a ni. Chung zawng zawngte han ngaihtuah chuan, Nora-i chu an tui ken tihektu satliah maiah a ngai a ni.

Chawhnu lam nisa hnuaiah chuan kun ngaihin an kal thliai thliai a, an hmui te chu a ro hulh a. An tui ken te chu tlem tlemin an in deuh reng a. An sakawrte tui pe turin an chawl zeuh zeuh reng bawk a. Tlai lam a lo nih chuan an khawhmuh phe ruai te chu a lo zia deuh a. Hla taka tlang te chu a lang pawl ruih a, a sendangin a lo inthlak leh a. Ni chu a tla hniam zel a, thil hlim te chu sei pui pui an lo ni ta a. Ruam kumkar te chu a lo thim ta ruih a. A landan chu a rapawm zawk lek lek a. Van lam chu a sen ṭial ruai a, chhum te chu rangkachak rawngin a hlawm neuh neuh hlawm a.

Dan Rodelo-a chuan hnung lam a han hawi a. Engmah a awm lo. Vaivut khu eih pawh a awm lo. Nitlak hnua thlaler pahizawl landan chu a lo mawi angreng phian lehnghal a.

Tom Badger-a chu a han pen muang deuh a. A hmai chu thlan leh vaivut in a luan rang nuai a.. "Tinajas Altas hmun tak chu a la hla em?" tiin a han zawt a. "Hla e." tih pahin Rodelo-a chuan an zawh mek tlangdung hniam lai deuh lam chu a thlir phei a "Helai hi  vangtan zawngin kan kân phei leh ang a, hun remchang dang zawng lehin Raven’s Butte kianga tuikhur lam khi kan pan dawn nia. Tui chu a awm ve hlek ṭhin."

Amah chuan hma a hruai ta nghal a. An kalkawng chu a rualrem fahran lo hle mai a. Lungkhawkrawk hmun niin, thim thamah pakhat te te a inzui a ngai a. Raven’s Butte chhim thlang lam epah chuan tuikhur chu an han hmu a. Rodelo-a chu a han chhuk a. "Sakawr tana duhtawk intur chu a awm dawnlo a nih hi, mahse an mamawh zualpui chu a phuhru thei ang chu." Tui in tur chuan sakawrte chu an rawn hruai ta ṭheuh a. An sakawr ten an in lai chuan a lo chhiar nghauh ngauh a. Sakawr te’n an in zawh meuh chuan no hnih khat bak a bang tawh lova. 

Raven's Butte an chhuahsan hnu chuan chhim lam pan zelin kein an kal ta a. Mel sarih vel ani tawh ang tihah chuan Dan Rodelo-a chuan Tinajas Atlas lam pan ding chu a titlu ta a. Chutah chuan tui a awm ngei ang a. An tuithawlte pawh tikhatin, sakawrte pawh tui an pe leh thei dawn a ni. Tui awm thei ang apiang chu an mamawh si a.

"Injuns ho an awm ta lo ve," Gopher-a chuan thawveng takin a han ti a "Min hloh ta a ni ngei ang." Harbin-a chuan ngainep hmel fe in a lo en run run a. Engmah chu a sawi lem hlei lova. Badger-a zawk chu rawn tawng chhuakin, "Mahni inbum duh ma ta che, Nauva. Hnung lamah sawn an awm reng alawm. Min rawn zui char char a ni."

"Min rawn nanchin mai hi I ring tak tak em?" tiin Nora-I chuan Rodelo-a chua a han zawt a. "Chutin an hmanhmawh vut vut lovang," a lo ti a. "Min rawn nangching thei reng tawh ang. Mahse, thlaler hmun hrehawmna hian min hmeh zawi hun an nghak phawt ang."

Tinajas Atlas an thlen phei meuh chuan khua a thim chiang tawh viau a. hmun zawl lai deuh, mual pawngin  hliah laiah chuan riahbuk an sual ta a. Nora-i chuan Sam Burrows-a dawr aṭanga an eitur lei dahna bawm chu hawngin Sa rep chu a han zai lêp a. Ei leh in lam pawh ngaihtuah hlei thei lovin thlaler nisa hnuai a an zinkawng bumro tak avang chuan tupawh mai chu an chau em em vek a. 

Tunah chuan thla pawh rawn chhuak tanin, chutah Tom Badger-a chu a rawn tho thurh a, an tui um engemaw zat chu lain, "Tui a awm leh awm loh I han en teh ang," a han ti a.

Rodelo-a chuan hma a hruai a, helai hmunah hian vawikhat chu a lo kal tawh avangin zin veivak thenkhatin lawn awlsam nana hrui an thlun chu a hmu thuai a. "Tuikhur thlangta zawk chu tiauvutin a chhilh deuh vek tawh maithei a. A chhak zawk a mi khi kan en dawn nia." Badger-a hnenah chuan a han ti a.

Tuihawk luan tawhna in a hawrh khuar, lung kehkak karah chuan tui chu a lo tling pum mai a. Tui khawhthla awmna hlui hi a ang zawk mah a. "Khuai thi te pawh an lo lang nuai nuai maithei a. Mahse a pawi lo ve," Rodelo-a chuan a han ti leh a.

Badger-a chuan a kutah chuan tui chu a han dah vang vang a. A vawt tuiin, a thianghlim khawp mai. "Kar hmasa mai khan ruah te pawh a sur niawm tak a nih hi le."

An tuithawlte chu an thunkhat a. Dil kama lungah chuan an han ṭhu chawl vang vang a. Tui te chu an han in leh ṭhin a. A boruak vawt avang chuan an harh sawng sawng a. An ngawih vang vang hnu chuan, "I awmdan hi ka hrethiam chiah lo," Badger-a chuan a han ti ta hlawl a. "Dan kengkawhtu I ni meuh chuan ka hre si lova. Mahse mi sual leh bumhmang chu I nilo tih a chiang bawk sia. I hun I khawhral mai mai chu a ni."

"Pawisa duh lutuk mihring ah min lo ngai mai teh," tiin Rodelo-a chuan a lo chhang liam puat a. "Khawi dangah nge hetiang dollar singnga lai te chu kan han hmuh tawh chuan ang ni? Chutiang thil vel vang chu a ni e," Chutah "Nang enge I dinhmun ve?" tiin a han leh zawh a.

Badger-a chu a lo chek hluk a. "Ka man thiam ta chiah mai, ṭhian a. Dollar singnga chungchang chu lo ni ta se, engtianga ṭhensawm tur nge tih hi kan buaina leh lungkham tur a nih ber hmel tiraw?"

"Hmun thumah kan then mai ang chu, Thildang enge la awm ang?"

"Ama lakchhuah a nih avangin a thendarh lam chu Joe-a thu thu a nih ka ring?"

Dan Rodelo-a chu a dingchhuak ta a.. "Kan sakawr awmna lamah kan kir leh vat a ṭha ang. Joe-a hian ngaihṭhatlohna a lo neiha min lo kalsan daih mai chuan kan che lo hle ang, a ni lawm ni?"

An chhohna kawng bawkah chuan an lawn chhuk leh ta a. Lung bang nalah chuan fimkhur takin an ke an nghat thla zel a. Lei an thlen takah chuan, Rodelo-a chuan a han sawi zawm leh a. "Tom, Kan pahniha kan hriat angin, kan chanai tam lam hi chu keini ni lovin Yaquis ho hian an rawn rel fel zawk dawn niin a lang."

"Nia," tih pahin Badger-a chuan ngui zetin, "Min chhawk ṭhen nual dawn niin a lang."

Zan boruak chu a vawt kher mai, ralveng in chhawka ruatin, an mu ta a. Khawvar hma darkar khat velah chuan Harbin-a chuan a rawn sawi tho ta hlawm a. Langlo thei ang berin mei an chhem a, coffee te lumin, an sarep neih chhunte nen chuan an in hnawhpuar vat vat a. Sakawrte pawh tui an duhtawkin an intir fel vek hnuah, leilung a lang ṭan riai ruai tihah chuan sakawrah chuan an chuang fel hman leh vek tawh a. An hmaah chuan thlaler chu chintawk awm lovin a inpharh duai mai a. Thui tak erawh chu a la hmuh theih rih loh a. 

Tlang dung hriam inkhawh zui mai chu ramchin hriat nana hmangin, thlaler chhuata tlangkangin a rawn vawrh chhuah lung hriam leh khawkrawk tak tak karah chuan kal an siam ṭan leh ta a. Thlalera ṭo chi hnim buk hrang hrang Creosote, Agave leh Cholla te chu an velah chuan a awm pheuh pheuh a.  

Ni pawh a la rawn chhuak fel lovang tihah chuan hnung lama kal Joe Harbin-a chuan, "Kalpui kan nei tlat mai," a han ti a. An rawn dak chhuak ṭhap a, an han hawi kir chuan hla taka  awmze nei tak meikhu ding chho laih laih chu an hmu ta a.

"A tha e, kan lo beisei reng tawh kha an nia," Badger-a chuan a han ti a. "Kawng hrang hranga kan hnu chhui ho chu saw meikhu sawn a ko khawm tawh dawn a ni." Han thlek kir leh zawk pahin "Lo nghah ngawt chu awmzia a awm lovang."

An kal ta zel a. Ni chu a rawn chhuak a. Chhun khawlum sa chu a inṭan leh dawn ta a ni. An kal muang leh ta tial tial a. Gopher-a chuan tlan deuh rum rum mai chu a duh a. "I sakawr kha I tihlum mai ang, nauva," Badger-a chuan a lo ti mai a. "Sakawr kha I la mamawh dawn chauh a nia aw."

Indian pakhat mah an hmu ta lo va. Rodelo-a chu a chang changin a han hawi kir leh zawk ṭhin a. Indian ho chu khawi lai aṭang pawha rawn lawr thei mai an nih tawh avangin, an hmalam leh sir lam te chu ngun em emin a en pah reng a. Yaquis ho chuan an hual hneh tawh viauin a ring a ni.

"Khawchhak lam I pan zel a nia," Harbin-a chuan a ti ta thut a. "Eng rilru nge maw I put le?"

"Pinacate lamah mawle," tiin Rodelo-a chuan a lo chhang a. "Helai ram velah chuan hmun khawkrawk leh nelawm loh ber lai chu a ni na a, tui a awm a. A tul dan a zirin ṭanhmun khawhna hmun remchang a awm bawk.."

"Min kalthui pui lutuk tawh tawh lo ang chu maw?"

"A hla vak lovang. Tunah chuan Gulf chu kan awmna aṭanga chhim lamah a la awm a. Adair Bay pawh chhim lam hret a la ni e."

Tumah chu an ṭawng tawh lova. A hnu deuhah chuan khawthlang lamah meikhu an hmu leh a. Sakawrte chu an kal muang ta hle a. Chutah, Rodelo-a chu a chhuk a, a kai ta a. A tih ang chuan midangte pawh chuan an lo ti ve nghal sap sap a. Nora-i chu a kiangah chuan a rawn kal leh a. Tunah chuan a hah rimtawng takzet a ni tih a lang ta. A hmai te chu a tla dawk mai a. A mitkhurte chu a thuk dek a. "Hetiang hi a ni dawn tihngaihna reng reng ka hre lo," a lo ti a.

"I theih dan danin tui kha in zel ringawt mai rawh. Tui tlakchhamna hian I rin aiin I hriatna kha a khawih chhe thei a nia. Ṭhenkhat sawi dan chuan a ni hmasa ber darkar sawmhnih pali chhung chu tui hi in char char mai tur a ni a. Tuiin a daih chen chen che chu in char char tur a ni. Tui awmna a I awmlai chuan a tam thei ang ber I in ang a, chu chuan rei tak a chelh ding thei ang che ang a, I paltlang thei ve mai ang," tiin thurawn a lo pe a.

"Kan paltlang thei angem le, Dan?" chu chu a hming ngeia ko meuha a biak hmasak berna a ni.

Koki san ak pahin. "Kan paltlang thei ang ... a then a zar hi chuan. Mahse, kan hma lama kan tawn tur hi hremhmun dik tak a ni dawn a. Chu chu I ringhlel lovang chu tiraw?"

Khawchhak lam hawia han thlek pah chuan, "Hei hi Camino del Diablo ... the Devil's Road an tih thin kha a ni a. Rangkachak zawn runpui lai khan helai velah hian mi zathum aṭanga zali lai chu an tlu hlum a sin."

Tuna an awmna hmun lai takah hi chuan thlalera to chi Creosote buk te, Cholla te, leh thlaler pangpar Ocotillo chu a awm thluah a. Chung karah chuan kalkawng dap chawpin a mal te tein an inzui thliah thliah a. Chhim lam panin an her phei zel a. Hmun sang lai deuh an thlen chuan Joe Harbin-a chu a ding ta a. "Engvangin nge helai ah hian ṭanhmun khawha kan lo lambun mai loh ang le?" a han ti a. "A lehpek awm lo turin lo chimih vek ila a ni mai a lawm."

"Tichuan min hual bet ang a, Tui lovin min dang char tlat ang a maw?" tiin Dan-a chuan a lo chhang a.

"Eng tui maw?" tih pahin Tom Badger-a chuan Rodelo-a chu chik fe in a han en a.

"Tule Wells a awm alawm, khawchhak lamah khian, a la hla deuh nain. A rei lutuk loh nan Papago Tanks lam kan pan ding phawt dawn nia."

Tunah chuan ram hmelhmang chu a chhengchhe sawt ta khawp mai a. Tlangkangin a vawrhchhuah lung kelki leh kehthem te chu remlo zet zetin a let phung mai a. Rodelo-a chuan khuar ruam deuh duk sira helkual pah chuan midangte chu a han kawhhmuh ve a. Hei hi Pinacate ram hmawr chu a lo ni tawh a. Hmarlam chu a lo chheng chhe telh telh a. Tlangkang dam leh tawh in a siam lung chang tlang hriam tak tak te, tiaudup hmun te,  Tui awmlohna tih hriat em em mai hmun khawk rawk tak tak lai te chu an kawng zawh mek chuan a paltlang a. Tlangram beram te, thlaler rul leh laiking te mai lo chu thil nung awm thei pawhin a mawi lo a ni. Mahse, chungte chu an paltlang ngei a ṭul si. An nunna chhanhim tumin ṭiau dup hmun lamah chuan an tlan mek chu a ni si a.

Chulai hmun khawkrawk kar, a ṭul thut pawha ṭanhmun siam mai theihna ah chuan riahbuk an sual leh ta rên râwn a. An bul vel chu a ro châr ngawih ngawih a. Khua a lo var leh a, an tihdan pangngaiin an che chhuak leh a. An tui neihsa te chu an in deuh reng bawk a. A tlem tial tial mai leh nghal.

An thin pawh a chhe sawt hle tawh mai a. Harbin-a chuan a sakawr chu anchhia a han lawh bawrh bawrh a. Gopher-a pawh a phun bul bul reng a, midangte chu rum deuh deuhin a en kual a. Dan-a pawh a insum hram hram a. Nora-i chauh chu pangngai taka awm thei awm chhun a ni tawh awm e. Ani pawh chu a hmaifang pangngai pawh a pu thei tawh bik lo. A mitkhur te chu a thuk dêk tawh a. Zana an chawlh leh a tura, a sakawr aṭanga a chhuk tur te chu a tla thla hi a ni deuh ber a. Mahse, engmah sawisel chu a nei lem lova.

Chu mi zan chuan Yaquis ho chu an rawn hnai ta hle a. Mahse, inbeihna em chu a la thleng rih lova.

Harbin-a’n riahbuk sualna tur a lo ruahman vel lai takin an lo lang thut a. Thlaler ram ruak ni mai a lang aṭang chuan silai hmetpuak chungin an rawn barakhaih thut a. An bo leh nghal diak a. Lung behchhanin silai nena inring rengin an lo nghak a, mahse an rawn kir leh tawh lo. Engemaw chen hnuah an rawn kah mai ring deuh chungin Badger-a chu a han ding chhuak a. A reh vawng vawng mai. Thawm engmah a awm tak lohah chuan Badger-a chuan a sakawr lam chu a han pan phei a. Chutih lai chuan midangte pawh muang changin an lo tho ve ta phak phak a.

Thawk leh khatah aw ṭial ruai mai leh sîn deuh rût hi a rawn ṭawng chhuak a. "En teh u," a han ti a.

Silaimu chuan an tuithawl lian ber chu a lo verh pawp hawk a. Tui chu a lo pût ral vek tawh niin. Leia tui buakna hnuhma chu a dum reih chauh a.

 "Coffee I buatsaih phawt mai teh ang u. A la daih em ang chu," Rodelo-a chuan a han ti a.