Bung-4

 Kid Rodelo by Louis L'Amour

BUNG LINA

Tom Badger-a chuan a sakawr chu kawngsirah a han pen pui a. "Hmuh theih loh tur khan awm rawh, Joe, Tuemaw an lo kal a nia." Harbin-a pawh chu silai phawi pah chuan a han insaseng ve nghal a. "Kan hmuh duh lem loh mihring emaw a ni maithei, tuman min hmu lo se kan duh si a."

Sakawr lokal mek chu engemaw chen a rawn kal deuh par par a, chutah, a muang ta a. an zawn a thlen chuan a ding ta hial a. A chunga chuang pa chu a rahchhan ah chuan a han ding a. Thawm riva a ngaichang te pawh a ni mahna. "An reh ta hmak mai a, an thawm ka va hre ta lo em" a han ti a. Chutah ring deuhin, "An thawm ka va hre ta lo ve aw." tiin amah chauh chuan a tawng lawng lawng a. 

E khai!" Harbin-a chuan nuam a ti ta hlek lo mai a, "Gopher-a a ni tlat mai !"

Amah hmu tur chuan an rawn inkhalh chhuak ta a, Barbin-a ai mah chuan Tom Badger-a chuan nuam a ti lo leh zual a. An sulhnu chu luikam lamah kaltirin, chulam kawngah chuan chhim lam hawiin Yaquis ho chuan an veh zui an beisei a. Gopher-a chuan chutiang chu hre ve hek lo le. Kawng tum awmsa zuiin ngil takin helai hmun hi a rawn pan tawp chu a ni si a. Chutiang a nih chuan, an lo thawhrimna kha a thlawn mai a ni dawn ta a ni.

"Nangmahni khan hun remchang min siam sak a lawm," Gopher-a chuan a lo ti a. "In han tlanchhuah takah khan tupawh mai kha nangmahni man tumin an sahawk ta a. Tang zinga pathum chu kan rawn tlanchhuak  a. Pahnih chu an kaphlum ta a nih ka ring."

"I kal vat vat teh ang u," Badger-a chuan hmanhmawh zetin a lo ti a. "Rodelo-a pawh a lo  awm reng tawh maithei a. Rangkachak khawpui kan thlen hmain a lo kal bo hman palh ange."

Chu zan boruak reh ruih maiah chuan an sakawr zin chik ri mai lo chu thawm dang a awm lova. Tom Bader-a chuan a hmasa berah muangchangin a kal tir a, mi dangte chuan an zui ta thliah thliah a.

Gopher-a chu buaina mai a la ni dawn a. Mahse, chu zawng amah a lo hrat khawkheng ve viau a nih loh chuan chinfel harsa a ni lem lovang chu. Gopher-a chu a chaurau teh reng nen, a rawn tlan chhuak thei chu a vannei khawp mai. Mahse, a vannei tluan reng thei ange maw. An hma lama thil lo thleng turah chuan vanneih ringawt chu a tawk lo viau ang.

 Gold City (Rangkachak khawpui ka ti mai – MH) chu an lo thleng ta a. Kawtthlerah chuan an sakawrte chu an kaltir zel a. Dawr atang chuan eng a rawn chhuak reih a, mahse ding ta lo chuan an tlang phei zel a. An kal tumna in ruakah pawh chuan eng a awm tlat mai le !! 

"Min lo hmakhalh a ni maw," Badger-a chuan a han ti a.

"Inchhungah sawn awm an awm tlat," Harbin-a chuan a han ti a. "Chu chuan ka thil chu a hmuchhuak tihna a kawk chuang lo. Keimah lo midang tumahin an hmuchhuak lovang."

"An lo tham chhuak anga, an lo tel fel diam tawh I a lo ni mai angah," Gopher-a chuan a han ti a.  "Tichuan, a chhunga awmte pawh halin, an chhuahsan diam tawh a va nih hmel ve ?"

Joe Harbin-a chuan an kal tumna thenawm chiah In bulah chuan a Sakawr chu kaltirin, a han chhuk a, a silai chu a phawi nghal a.

In chhung lamah chuan Dan Rodelo-a chuan hmel pangngai tak puin a lo nghak reng a. Nora-I chu inkahna a awm palh pawh a silai mu leng vakin a tawh lohna lai turah thuthmun a rem tir a. Clint-a chuan khum hmawr a thu chungin a lo thlir ran a. "Pawnah sawn mi pakhat mai lo deuh chu an awm a nia," a han ti a. "Nangmah chauha lo chinfel I tum em ni ?"

"Lo ni ta se."

"Mi a tak I nih chu." Amah en ran chungin Clint-a chuan a lo ti a.. "He thil atang hian engtin nge ka inthiarfihlim ang aw ?"

"Nangma bul tan a nia. I thianpa lah chu I that der tawh lehnghal. Khatah khan I thu reng thei a, finrawl chhuahin I tlan chhuak thei bawk. I him hlen mial mahna."

"Hetah hian ka awm ang e."

 "Chu chu ti reng ta che. Joe Harbin-a pawnlamah sawn a awm a nia.."

"Tichuan ?"

"He rangkachak chanchin I hriat theihna awmchhun chu a hmeichhe kawp atang chauh khan a ni. Chutah, Joe-a hi a thikthu a chhe teh mai a nia aw."

"Keimah ka ni hleinem !" Clint-a chuan a lo ti a. "Jake-a zawk a lawm."

"Chungte chu va hrilh la. A lo ngaithla duh mai thei che a sin."

Pawn lama kawtah chuan pheikhawkin lung a rah rik chu an han hria a. Aw hian a rawn ko ta a, "Hey, Danny ! Lo chhuak rawh !" 

"Ekhai, chu anmahni an nih ngei chu, Clint," Rodelo-a chuan a han ti a. "Ka tah khan lo thu reng la, he thilah hian kan pahnihin min rawn hmer tel ngei dawn a nia. " Clint-a chu a tho thurh a, "Chhuah ka duh, Heta tang hian ka chhuak nghal dawn  a nia."

"I duh ang chuan awm la ti nia."

Clint-a chuan kawngka lam chu a pan ta a, a han tawi khawmuang leh deuh a, "Silai lamte hi engtinnge niang?"  Dan Rodelo-a chuan a kawnghrena a zeh lai chu phawi chhuakin a ngul lam hawizawngin Clint-a chu a han pe a.. "Tunah kawngka lam kha hawi nghal rawh. I rawn leh hawi vaih chuan ka kap nghal ang che."

Clint-a chuan silai chu a la a, kawngka lamah chuan a petek phei ta a. Chutah a han au vak a, "Hey, Danny-a ka ni lo a nia ! Rawn chhuah a, inbiak ka duh!" Dan Rodelo-a chu kawngka phenah lo awmin a pawh nghehna a lo thlah dul a.

 "A tha e," Joe Harbin-a aw chu a fiah tha khawp mai. "I ban chung lama phar chung khan lo chhuak rawh" Clint-a chuan kawngkhar chu hawngin rang takin a tek chhuak a. A silai ken chu a han hmetpuak ta nghal a. Pathum ngawtin an lo kah rawn avang chuan hmet puak nawn leh thei tawh lovin a tlusawp ta a. 

Ti khan lo awm reng ang che," tiin Rodelo-a chuan Nora-I chu a han hrilhru sap a. Thim zingah chuan hlimthla ang maiin a put bo ta zauh a.

Gopher-a chu kawngkaah chuan rawn pen lutin, a han ding leh det a. Chhuata ruang let reng chu a han thlir ta a. Harbin-a leh Badger- pawh chuan an rawn zui lut ve a.

Tom Badger-a chuan zawi muangin pindan chu a han thlir kual a. Nora- I chu a hmu ta a, a en vang vang a, Chutah ruang let reng lam chu en lehin, "Han kuai let teh," tiin Gopher-a chu a han hrilh a. Ani chuan thingthi in Jake-a ruang chu a han kuai let a. "Danny-a a ni miah lo mai," mak ti tak chungin a han ti a.

"Jake Andrews a nih kha," Harbin-a chuan a lo ti khauh a "Chuti a nih chuan, kan thah tak kha Clint Wilson-a a nih dawn chu"

"Clint Wilson-a maw ?"

"A dang chuang hlei nem," tiin Harbin-a chuan a lo chhang rum rat a. Nora-I lam en pah chuan  "A nih nang tu nula nge I nih ve ?"

"Heng mipa ho kianga kal ve hi ka nia... Tu nula mah ka ni lo. Nora Paxton-I ka ni."

"Helai hmuna kan kal chhan chu I ti nghal teh ang u," tiin Tom-a chuan nghakhlel hmel zetin a lo ti a. "Joe, Hmeichhia kha ngaihtuah lutuk teh suh. Khatiang kha chu Mexico-ah an tam lutuk."

"Anmahni bula awm I nia maw ?" Joe-a chuan a han ti leh hram a.

"Gulf lamah an chhuk dawn a, Chu chu ka kal tumna ve tho a nia. An bula kal ve turin min sawm a. Kawng dang a awm si lova."

"Gulf-ah maw ? Engvanginnge chutah kher chuan I kal dawn a ?"

"Sumdawnna… ka sumdawnna thil….. engti kawng mahin nangni a kaihhnawih love."

Harbin-a chuan then khum sak chungin. "A sual tampui love, ka pi. Kal I la duh reng a nih chuan kan rual pawhin I kal thei tho a lawm.."

Badger-a pawhin a rawn en ve ta a. "Engtinge Gulf thenga kal theih an inbeisei dan ni reng reng a ?"

"Wagon an nei a, khawtthlerah khan a inhun kha. Papago Wells ah an kal phawt dawn a ni."

"Anih engtin zel ?"

"Chulai hmun leh Gulf inkara tui awmna hmun chu ka hria a. Chu chu min hruaive an duhna chhan pakhat a nih ka ring."

"Chutiang tui awmna hmun a awm tih pawh ka lo hre ngai miah hlei nem," Badger-a chuan a han ti a.

"A awm a lawm, diltui kang ngailo, tui tui tak mawle"

"A dik a nih chuan, kan buaina tam tak chu a kiang ta zuk nia. Awle, kan rualin I lo kal ve dawn nia."

Badger-a chuan thingrem leh lehkha tla darh nuai chu a han en vel a. "Rangkachak engmah ka va hmu lo ve. Rodelo-a chuan a la lo tih I chiang a maw ?"

"Amah kha a ni lawmni tun lawka awm reng kha ? Pa sang deuh, hang lampang leh la upa lemlo tak kha ?"

"Kha kha kan Danny-a sawi chu a nia."

"Helai hmun a chhuahsan kha chuan engmah a neilo chu a nih kha." Nora-I chuan a lo ti a. Chutah, a han sawi zawm leh a. "Clint-a’n Jake-a kha a kap a. Jake-a’n kha thingrem a hmuh veleh khan rangkachak a hmuchhuak ta ah ngaiin a that ringawt a lawm."

"Clint-a te ang tih atan chuan a vawi khatna lek pawh va nih suh"

Nora-I chuan a han ngaichang vang vang a. Rodelo-a chu pawnah a awm reng tawh angem le ? Enge a ruahmanna ni ta ang ?

"Rangkachak chu la ila, heta tang hian I chhuak teh ang u," Badger-a chuan a lo ti a

Harbin-a chuan meichhemna atang chuan thukthai tuiek lam tawh hi a han la a. Bang leh bang hawlh chiaha inkham liang hnuai zawnah chuan thutthleng chu a han hnuk phei bawk a. Thulthlengah chuang chuangin, liang khi karah chuan thukthai chu a han rawlh a, a han kar kau hlek a. Liang karah chuan pindan kawkel hi a rawn lang ta a. A han kar chho leh deuh vak a, rangkachak tlang ho chu chhuatah a rawn tla ta phawk phawk a. Nora-I chuan lo chharin Barger-a hnenah chuan a han pe a, "Rangkachak dik tak a nih hi," a han ti a.

Harbin-a chu a hlawhtlin na vang chuan a then sung a. "Lo thial vel mai mai teh, a tam khawp mai hi maw, Bawihi."

Badger-a chuan Gopher-a lam chu a han hawi a. "Sakawr zin leh a ip ho kha va ngaihtuah teh, rang takin, tunah !"

A kal chhuah tak hnu chuan Harbin-a chuan, "Ani kha engtin nge kan tih dawn ?"

Badger-a chuan dar san ak pahin. "Kan zinkawngah hian a tanpuina hi mamawhna kan nei dawn a. Mazatlan kan thlen hunah dollar sawmnga vel I pe ve anga, a kal hrang tawh mai ang chu."

Gopher-a chu Sakawr zin leh a ipte awm pali kengin a rawn kir leh a. Chutah chuan rangkachakte chu an han khung vat vat a. "A rit teh ang chu," Tom-a chuan a lo ti leh bauh a. A han ingaihtuah vang vang a, "Sakawr pahnih dang neih belh leh ila ka ti mange aw."

Dan Rodelo-a chu thawm nei miahlova che velin, in hmalam khawngkhar bul chu a rawn thleng phei tawh a. A kut dinglama silai lekkawh chungin kawngka inhawng laiah chuan a pen chhuak ta a. Thil awmdan thlir chuan a lo ding ve reng a. Tom Badger-a chuan a lo hmu hmasa ber a, zawi muang leh fimkhur takin a ban a phar ta tual tual a. Dan Rodelo-a silai kap lai hi a la hmu miah lo nain, a thiam thawkhat ang tih chu a ring mai a.

"Kha zawng kha a ni e," Harbin-a chuan a han ti a.

"Ka lo en ve reng reng teh ang," tiin Gopher-a chuan a han dil a.

"I duh ang chuan han ti la."

 Gopher-a chu thutthlengah chuan chuang chho vein, pindan kawkel ah chuan a kut chu a zen lut a, a han dap kual vel a.  "Ka hmu e!" tiin a han au a. Phur tak chungin tlang hnih dang chu a rawn phawrh chhuak leh a.

"Kawl rawh," Harbin-a chuan a lo ti a. "Kha kha I chanai ve tur a nih kha."

"Kha zawng kha ka chan ve tur I tihna maw ?"

"Tanin atangin I rawn chhuak chiah a ni lawm ni ?"

"Joe Harbin-a hi chu a rilru a thain, khawngaihna te hi a ngah thin a nia." tiin Dan Rodelo-a chu a rawn inrawlh ve ta a. A awki chu a nem hle mai a. Chutah,  Harbin-a chuan a kut chu silai chuh mai thei turin a han phar kak a. 

"Tum duh suh, Joe."

Muangchangin Harbin-a kut pawh chu chunglamah a phar tual tual a, chutiang chuan Gopher-a pawh chuan a lo ti ve a. Fimkhur takin Harbin-a chu a rawn inher a, Rodelo-a chu a han thenkhum sak a "I tha maw, Danny? Kha silai kha kan lakah chuan hman a tul lovang. Thian kan nih kha. I la hrereng lawm ni ?"

Rodelo-a chu a lo nui sak a. Harbin-a hian a ngaina ngailo tih a hre chiang hle a ni. "A nih chuan in zingah ka lo tel ve chu rem in ti lo hran lovang chu tiraw ?"

"I thu phuh chhuah dan chu a atthlak hle mai. Heng thil zawng zawng hi keima bil liau liauva ka tih vek tih I hrereng sia."

"Hun remchang ka pe ve thung che u a lawm."

"Heta tang hian I kalsawn thuai ang u !" tiin Badger-a chu a lo inrawlh a. "Kan chhehvel zawng zawngah Dan miten min zawng huai huai tawh a. Chet kan lak vat loh chuan engmah damchhan tur kan neilo palh ange" 

Sakawr zin leh a ip pakhat chu lain kawngka lamah chuan a han inher a.. "Ti rawh ule. an Wagon te chu va la ila, hnung lamah kan sakawrte chu kan inzui tir mai dawn nia."

Dan Rodelo-a chu a chechang hauh lo. "Engtinnge kal zel in tum a ?"

"Chhim lamah ... Ngatinge ?"

"Kawng diklo lam a nih dawn chu. Heta tang hian khawchhak lamah in kal hmasa ang a, Gila khawchhak lam dep thlengin, hmun dang an lo dap chhungin Gulf-ah chuan lawngah in lo chuang hman daih tawh ang."

Rinhlehna mitmeng nen an en ta thap hlawm a.. "Eng chu nge maw I sawi le ? Eng Lawng maw ?"

Dan Rodelo-a chuan a silai ngul chu a han tiche zauh a. "In hlang ru le. I ti dik a ni, Badger, hun hi a kal duak duak si a. Warden in khawih kha chu in tisual tak zet a ni. Mi tha tak a ni nain, pa namai lo deuh a nia. In namthlak chiah khan in kal thui mah mah a ni."

"Chu chu enge a awmzia ?" Harbin-a chuan a lo ti khu khu a.

"A bansan mai mai tawh dawn lo. In tih thin dan aia chak fe leh hla fe ah in thlan chhiat vat vat a ngai tawh tihna. In hriat angin Warden kha Army Officer hlui a ni a, Mexican ramri tluanin hmelhriat leh thian tha a nei thluah a. Apache ho an lo ni bawk nen. Chung ho zawng zawng chu a zawn tir mur mur tawh mai dawn che u a ni. "

Rang takin an thil ruksa te chu sakawrah an dah ta thuai thuai a. Chutah, a hma chiaha Nora-i kaltir chungin Dan Rodelo-a pawh chuan a rawn zui ve nghal a. Gopher-a chuan laltin chu a khai a.

Sakawrah chuan chuangin Dawr lamah chuan an kir phei leh ta hlawm a. Chutah chuan Jake-a leh Clint-a’n Gold City an rawn kal thlenna Wagon kha a awm a.

"Engtinnge niang ani hi ?" tih pahin Harbin-a chuan Dawr lam chu a han thlek zauh a. 

"Ani chungchang chu theihnghilh rawh," Rodelo-a chuan a lo ti a. "Helai hmuna atanga El Paso inkara mi tupawh hi a hre vek. Mahse a ka a ang ngai lo. Sam Burrows-a hi pa tha tak, I lamtang atana tha lutuk a ni hi. I tihnat vaih chuan Dan mi chauh lo dan pawn lama mi te pawhin an tukzal rang viau ang che. "

"Wagon-ah khan tui chu a awm asin," Nora-I chuan a lo ti a. "Kan chhuah tan hma khan bur awm thei zawng zawng chu kan tikhat vek tawh a. "

"Kan la mamawh belh ang" Rodelo-a chuan a lo ti a. Rangkachak tlang dahna ip lo ban mek Gopher-a lam hawi pah chuan, "Hei hi la la, dawr atangin tuithawl leh a bur awm thei ang zawng zawng va lei vek rawh. Tichuan kan thun khat vek dawn nia. Tui awmlohna ah zinkawng thui tak kan zawh dawn si a."

Chu thlaler khaw lum chu boruakah chuan a la cham reng a. Thil fim thaw eih pawh a awm lo. An chung van dumpawla arsi te chauh chu thil vawt awmchhun ni maiin a lang a. Dan Rodelo-a chu kil khatah lo thuin, an insiam lai chu a lo nghak a. Tuithawl leh tui tin te chu an thun khat mawlh mawlh a. Chhim lam a hremhmun inpharh duai ah chuan tute pawh an in mamawh tawn vek dawn a ni. An kalna turah chuan tui awmna hmun a awm zeuh zeuh a. Amah tluka hrechiang an awm kher lo ang. Mahse, ani pawhin thlalera tui awmdan mumal loh zia chu a ngaihtuah neuh neuh a.

Ruah sur hnuhnun ber tum chu a han chhut let a. Yuma thlalerah hian ruah a zur zen zen lova. A sur pawhin dai tla ang vel lek a ni thin a. Hremhmun ai mah pawhin a hrehawm maithei a. A hruai tumna lamah chuan tumahin Wagon an la khalh ngai lova. A hun taka an tum ram thlen theih dan kawng chu a awm em ang chu maw.

Midang an insiam zawh hnu a tawp berah chuan in chhungah a han lut a. "Ka lawm e, Sam," a han ti a. "Ka sakawr ka han nei let leh ta chu a lawmawm kher mai."

"Grulla hi Sakawr tha tak a ni," Sam-a chuan a lo ti a. "Rawn kir leh tawh lo mahla ka duh zawk hial mai."

"He ram atanga lo kal hi a nia lawm, Sam. Chhim lam atangin. Ka man lai kha chuan kum hnih a upa chauh a la nia. Henglai hmuna tui awmna zawng zawng hi a hre vek a. He sakawr hi ka hmang tangkai khawp ang le.

Sam-a chuan dawhkan chu nemin a rawn kun phei deuh a. "Hun remchang chu I nei viau dawn a. Mahse, tanpuitu I mamawh lovang tih I chiang maw ? A then a zar chu ka rawn tir thei reng a nia —"

"Hei hi chu ka kova lum a ni tlat. Kemaha ka tih a ngai."

"Joe Harbin-a hian inhmachhawn ngat pawhin mi sawmpakhat lai chu a that tawh a nia aw" Sam-a chuan a han ti a"

"Nia." tih pahin Rodelo-a chu khun khan deuhin a han inngaihtuah zawk a. "Ka lungkham ber chu Badger-a zawk hi a nia. Phul hmuna chinghne maltlat tluk zetin a fing kherek thiam a ni."

"A pianken ve reng a lawm. A pa hi thlahpawlh a nia. Amah chawi liantu ni miau hek le." Sam-a chu a han ngawi hlek a. "Kha nula kha, anmahni ang chi mihring kha chu nilovin ka hre sia, rin thiam harsa ka ti khawp mai."

"Ni love." Tih pahin inthlahrung deuhin "Ka theih chuan i bula hnuchhiah turin ka ti ang." Rodelo-a chuan a han ti a.

"Ticket lei sakin khualzin phur Tawlailirah a duhna hmuna kal tur chuan ka lo buaipui dawn nia."

Dan Rodelo-a chuan kawngka lam a pan ta a. A han ding leh det a.. "Eng kha tithim lawk teh, Sam." Pindan chu a thim fel ta tihah chuan kawngka atang chuan a pen chhuak ta a.

"Mi rinna hi chu I tlachham ve mange," Harbin-a chuan a lo ti a.

Dan-a chu an hnen lamah chuan a rawn kal zel a. "Ka ring che alawm, Joe. I ngaihtuahna kha tihbuai palh ka hlau mai mai a lawm, Chu vang chu a ni e."

An bulah chuan a rawn ding a. "Nula hi engtin nge niang ? Zinkawng hrehawm tak a ni dawn si a. Engahnge hetah hian kan hnuchhiah mai lovang ?"

"I mawl a mi ! Rangkachak a hmu a, kan sawi zawng zawng a hre vek bawk a, chuvangin hetah hian kan hnuchhiah gnawt thei lovang."

"I thu thu a lawm, Joe."

Harbin-a chu a lo hawi a, a lukhum khuh baka a mitmeng chu a duhawm fahran lo hle mai. "Engvangin nge kei kher chu min sawi lan a ?"

"He pawl ah hian tualthattu awmchhun I ni tlat a lawm."

"Kei hi maw ? Hmeichhia ka kap ang maw ?"

"Hun kan khawhral mai mai a ni," Nora-a chuan a lo ti sap a. "Joe-a hian min kap lovang, chutiangin mi dangte pawhin. I kal ang u. In silaimu te kha Yaquis ho emaw Yuma thlalera kan hmachhawn tur midangte tan khek zawk rawh u."

Dan Rodelo-a chuan sakawr lakam chu a han hui khawm a, Wagon chu kawngah chuan a khalh tan ta a. An sakawrte chuan an thlunna hrui dul tak avang chuan an rawn zui ve zel a. 

Khawchhak lam panna kawng peng an thlen hma chuan muangchangin a han khalh phawt a. Sakawrte chu anmahni kal dan pangngaia engemaw chen a kal tir hnuah, a han tur chak leh deuh hret a. A hnunglam wagon chhungah chuan Badger-a chu Harbin-a kiangah mutthilh tumin a lo tluzal mek a. Gopher-a pawh a hnunglamah chuan a lo mu kawm ngal a.

"Ka hrethiam thei lo che a ni" Nora-I chuan a lo ti sar sar a. "Enge I tih mek hi ?"

Rodelo-a chuan a lo nuih sak a. "Zan duhawm tak chu a va ni em, tiraw?"

"Min la that tak tak maithei a ni.!"

"Joe Harbin-a hian chhan tha tak a awm loh chuan hmeichhia chu a that mai mai lovang. I sakawr emaw, thil dang emaw a duh a nih loh chuan"

"Anih chutiang chu lo ni ta se ?"

"Inngaihtuah buai kual vel lovin a that hmiah ang che."