Bung-3

 Kid Rodelo by Louis L'Amour

BUNG THUMNA

Kawlkilah ni a chanve vel a liam tawh ang tihah chuan Dan Rodelo-a pawh chuan kal a siam ṭan ve leh ta a. Sakawr chungchuang ho tihṭhan vak a nilo nâ a, ke a han kal vel chu  nuam a tiphian a. Tun ṭum atan phei chuan, kumkhat lai jail run thim belh hnu a, pawn khaw eng hnuaia han tei vel chu nuam a ti lehzual hle a ni. Chung zawng zawng aimah chuan inngaih-tuahna hun leh ruahmanna duan kual velna hun tam tawk a neih phah dawn bawk si.

A hnung lama Wagon zangkhai angreng taka tlan ri a hriat chuan khua a la thim fel chiah lova. A han hawikir a, sakawr paliin a hnuh wagon chu a han hmu a. A hnung lamah chuan sakawr pakhat dang an thlung tel bawk a. Wagon-ah chuan mipa pahnih leh hmeichhe pakhat an chuang a. A bul an rawn thlen chuan an rawn dak chhuak a.

"Khawi lam nge I pan dawn Pu a?"

"Rangkachak awmna khawpuiah,"

"Rangkachak I zawng dawn a nih chuan a vang khawp ang. Rangka-chak an hmuhchhuah chhun pawh  a hming mai a sin,"

"Ka vannei mial mahna,"

"Lo chuang rawh. Chu lamah chuan keini pawh kan kal dawn a lawm," 

Chu pa lianpui chu a han phun sup a. Sakawr lakam chu na vak lovin a han vai a, Wagon pawh chu a kal ṭan leh ta a. Rodelo-a pawh hnung lamah chuan a chuang ve ta rân a. A bula nula ṭhu chu chhelo a ti angreng phian a.

"I sawi kha chu khaw rauhsan a ni tawh  alawm, Pu a. I la hrelo em ni?"

"Rauhsan vek chu a la ni lo deuh. Sam Burrows putara a la khawsa a lawm. Engemaw ti lai khan ka sakawr pawh ka hnutchhiah nge nghe a sin,"

"Sakawr hnutchhiah nan chuan a va hla angreng ve," Pa liana chuan a lo ti a.

"A ni maithei, ni lo maithei?"

Dan Rodelo-a chuan amah lo en kar tu nula chu a han en ve a, amah chu engahmah a rawn ngai lo niin a lang. Pa pahnihte chu an titi bawrh bawrh. An thu kal lam leh haw lam aṭangin an hming chu Clint-a leh Jake-a an ni tih Rodelo-a chuan lo hre thei mai a.

Zan chu a reh hle mai a. Thing tlu an kân dawn lai chuan an han timuang hlek a. Anmahni thawm mai lo chu thawm dang engmah hriat tur a awm lo. Dan Rodelo-a chuan a ke chu a han thluang zi mar deuh a. Wagon-a chuan chu  nuam fu mai a. A silai pai chu a han sawi thawl deuh va, chu chu nulain a lo hmuh chuan a melh ta reng a. Anmahni chanchin hriatchian a châk tluk zetin a chanchin pawh chu hriat ve an chak maithei a. Pa pahnih leh nu pakhat, Rangkachak khawpui panin…….. eng tak chu ti dawn ang maw!?

Rangkachak khawpui chu rauhsan tawh a nih mai bakah an zawh mek kawngṭum tawpna chu a ni nghal bawk a. A piah lamah chuan thlaler reh ruih mai chu ramri thlengin a inpharh phei tawh a. Dan Rodelo-a chu mi ringhlel ringawt chi a ni lem lo nain,  Chutiang ngaihdan chu midangten an lo put ve palh theih takin, fimkhur chikima fimkhur phawt chu a finthlak hle tih a hre tlat a ni.

Rangkachak khawpui (Gold City) ah chuan dawr leh saloon rauhsan tlu lek lek  tawh te, kawtthler àn a chirh leh hluma sak in rawih tawh tak tak ding thluah te a awm a. Kawtthler tawn tawnah chuan rauhsan tawh in ruak a awm thliah thluah a. Thing lian hmuh tur a awm lova, hniam te te buk deuha ding ṭawi liai chi Creosote thing te, ram pangpar chi khat Ocotillo te chu an awm a. Hnawmhnawk hrang hrang te chu a tladarh nuai a.

Sam-a chuan bathlara thu in, kuaite pet khu khat hlat chungin Wagon lo kal mek chu a lo thlir a. A ke bula ui bawk chu a han ngur chhar chhar a, a ngawi ve leh ta mai a. Sam-a chuan hman mai theih turin a kawngah silai a pai a. Lak maitheih turin kawngka chhunglamah chuan laiphir hi a tung reng bawk a.

Wagon lir bup bup mai a bula a rawn din lai chuan, a mit zur ṭap tawh chuan a chuangte ho chu a lo melh dan dan a. Rodelo-a a han hmuh chuan a tawp chat a.

 "Tha maw , Sam!"

"Malsawmin awm ang che. Rodelo-a I nih loh a tâkah. I hun chhung I tlak fel tawh ka lo la ring hleinem."

Dan-a chu leiah a han ṭum thla chhak a. "Heng mikhualte hian min rawn phur ve a. An hawihhawm khawp mai,"

‘Mikhualte’ tih thu a han hmang kher chu a te tham viau na a, Sam-a chuan a lo hrethiam mai a. A han enkual hlawm a, nui chungin "Tlangvalte u, engemaw tia in inhnawh puar duh ka lo ring a."

"Whiskey I nei ang chu maw?" tiin Jake-a chuan a han zawt a.

"He khua a a ṭhaber hi maw le," Sama chuan a lo ti a. A lo tho ṭuah ṭuah a, kawngka ah chuan a pai lut a. "Elpui hi ka nei ṭha viau chu a ni hran law."

An hmaa glass no chhawp pahin nula chu a han thlêk a. "A nih leh nang kapi, coffee aw?"

"A awmna min kawhhmuh la, ka lo insiam ve mai ange."

"Kha lai kawngka ah khan lut phei la, ban zung zung theih turin engkim a inchhawp sa vek kha."

"Khaw rauhsan mai mai atan chuan I in la khawl angreng hle mai," Clint-a ti a an koh pa chuan a lo ti ve bauh a.

"Hetah hian mi ngaih aiin kan khawhar lutuk lo asin. Bawngkhalhtu te, Arizona leh Wells Fargo lam aṭangin Rangers te, ram enthlithlai tute leh mi hrang hrangin min rawn pal ve reng reng ṭhin a lawm."

"Helai hmun leh Gulf (Litengsawl-khawmuala tui inkhawhlut – MH) inkarah hian engmah a awm ka ring lo."

"Engmah awm nang. Isabel Port (lawngchawlhna) ah khan Lawngin Bawngsa an rawn la ṭhin a. Chu zawng chu a ni mai." Thalaler lama han buk nghat pahin, "He khawvela Pathian hnuchhawn ram ah chuan a ber a kai ang chu,"

Sam-a chuan no te chu a rawn thlit khah leh pah chuan, "In dang pakhat pawh ka la nei a nia. A huhova awm hi a ṭha a ni. Dan-a ṭhiante chu ka ṭhiante an ni ve zel a nia." Rilru ṭha tih hriat takin a han enkual hlawm a. "Han khawsak nawk nawkna tur chu a tam alawm he khuaah hian. Khawi atanga lo kal nge in nih pute u?"

"Flagstaff atangin," tiin Clint-a chuan a lo chhang a.

Jake-a chuan a mawng ngahna chu a han tlak a, nuamti vak lo chungin Clint-a chu a han thlek a.

"Eng emaw tum ṭha te in nei a nih loh chuan helai ka han hmu che u chu awm ang lo riauvin ka hre deuh tlat mai a," Sam-a chuan a han ti a.

"Chutah chuan enge thil diklo awm a?"

"In thtur chu in hria a lawm."

"Chu chiah, Putar." Tih pahin Jake-a chuan a no chu a han tlak a. "I kal thei ang, Clint" a han ti a.

"Coffee te pawh in la dawm hlei nem."

"Kha chu Nora tan a nia — Nora Paxton-I. Coffee a duh chuan lo siam mai sela. Mutna tur hmun zawn ka duh a ni,"

"Hmeichhia khan ṭanpui a mamawh takin ka’n ngaihven teh ang," tih pah chuan Sam-a chu kawngka lam pan turin a han inher a. Mahse, Jake-a chu a hmaah lo pen chhuakin, "Keiman ka'n ti ange, pu a."

Dan Rodelo-a chu a lo ṭhu veng veng a. Choka bul sir lehlama ṭhutna chu hmuin, chutah chuan ṭhuthmun a lo remfel diam tawh a. Kawng dallo thei ang berin, mahse engkim hmu thei vek siin a awm a. Choka lama phunri chu a hre viai vuai na a, enge an sawi tih erawh a hre chiang thei bik lo.

Jake Andrews-a a rawn luh chuan Nora-I chu thuk bulah a lo ding mek a.. "In kha zawng turin kan chhuak dawn," a han ti a. "Kan kalna lamah tumah hmuh kan duh lo a nia, I hria em?"

"Ka tih theih ang chu ka lo ti dawn nia."

"I lo ti leh lutuk ange, fimkhur ang che. Saw pa lah saw kan hrechiang si lova, ka ngaina miahlo a nia. Yuma atanga rawn chhuak hlim a ni bawk si."

Nora Paxton-I chuan a lo en kal a. "Chu chu Joe Harbin-a awmna a ni bawk!"

"I tidik e. Hepa hi Joe-a ṭhian a ni lovang tih pawh a hriat loh a. Lo fimkhur hle ang che aw."

Jake-a a chhuah lai chuan No chu Coffee in a han thli khat a, room dangah chuan a bel chawpin a keng lut ta a. Dan Rodelo-a chu a lo ding fel chiah a. Nora-I chuan êng thlârah chuan a vawikhat nan chiang takin a han en a. Jake Andrews-a leh Clint Wilson-a awm hnaih lai kha chuan ngaihsak awm pawhin a awm ngam lo a ni. Pa sang zeih zawih, dar pharh hlai hlep hlawp leh pheikhai zang tak niin, sa pan lam leh biangki ruh sang lam lek lek a ni a. A incheina te chu tanin atanga chhuak chiah inthuamna atan chuan a felfai mah mah a ni. A luh hmain hetiang hian a inthuam ṭhin a ni ngei ang.

"Mahni chauha riahna zawn angai dawn a ni," Rodelo-a chuan a han ti a.

"A va hma awm ve? Party kan tan chauh a lawm le," Nora-I chuan a lo ti a.

"Eng Party maw?"

"Kan neih lai mek hi mawle," tih pahin Coffee No chu a hma dawhkanah chuan a han chhawp sak a. "No dang ka’n la leh ange aw" tih pah chuan a inher a, chhuar a ṭingṭang lo awm chu a han hmu a. "Saw saw I tum thin em ni, Sam?"

"Tum ve zeuh zeuh, keimah chauha ka awm laiin. Dan-a hian a tum thiam khawp a sin. Engtinge niang, Dan?"

"Tunah chuan ni rih love," Rodelo-a chuan a lo ti a.

Pawnlamah chuan, Clint-a chu Wagon lamah kalin lalṭin chu a han la a. A khuhna darthlalang puar chu chawikangin chhit a han tum a. A nawalh nawh vawikhatna chu a thi nghal a. A dang a han nawt leh a, chu chuan a chhi kai ta a. Jake-a pawh rawn thleng phei ve nghalin. "Khulai kawngah khuan a nih ka ring," a han ti a.

Kawtthler lehlama in ding ho en chiang tur chuan lalṭin nen an liam ta a. A tawp a tawpah chuan, an zawn ber, chirh a sak In chu an hmu ta a. Kawngkharah chuan Sakawr phei-khawk a lo inkilh bet a. A ke hmalam pheikhawk niawm tak pawh a mawng lamah chuan a awm bawk a. Mahse, a kilhnghehna aṭanga tla tih hriat takin leiah a pheikhawk inhawng lam chu lei lam hawi zawngin a awm a.  

Chutiang thil a han hmuh chuan ngaina lo tih hriat deuhin Jake-a chu  a han tawi khawmuang hrut a, "Clint, saw en teh, sawtianga pheikhawk a inkhai reng reng chuan vanneihna mawng nawi lam kan chang duh riau a nia."

"Enge pawi vak awm ang? Kan in pawh a ni hek lo. Kan vanneihna hriltu pawh a ni nek lovang e. Pheikhawk tar tupa vanneihna chungchang zawk te pawh a ni mahna."

"Chhinchhiahna a ni maithei asin. Kan vanneihna hi a tawp pawh a ni mahna."

"Chutiangin ât so reng reng suh."

Clint-a chuan a rawn nam a, pindan chhungah chuan an lut ta a. Pindan chhung chu a mawlmang hle a, rawng vara hnawih niin, meichhemna thuk a awm a. Dawhkan chhiava deuh pakhat leh ṭhutpah pahnih, bang hlat deuhah chuan ban pahnih a ding bawk a. Clint-a chuan liang aṭanga chain lo uaithla chu hmuin, chutah chuan an lalṭin chu a khai ta a.

"Tunah chuan Dollar singnga nen kan awm ta rân mai chu a niah."

"Mahse, khawihah tak nge a awm ang le?"

"Chu chu kan thu thu a ni tawh a lawm. Khang mite lakah khan kawt-thlera In, chirha sak, a kawngkharah chuan sakawr pheikhawk a intar – tih bak I dawp chhuak thei si lova!"

"Hmeichhia mai mai chuh! Pakhatna ah Harbin-a nula a lo ni a. Chutah, tunah Nora Paxton-i a lo ni leh a. Kalpui ve zel I ti tlat a nih kha,"

"Nora-I chu ngaihtuah duh suh, a changkang lutuk."

"A ṭha alawm, dah kiang phawt ila. Mahse, Khawiah nge Rangkachak chu?"

Jake Andrews-a chuan pindan chu a han en kual ngial a, chhuat te chu a han bih chiang deuh a. Ro chu phum a ni ngei mai tih a hria a. Chhuat awmdan chu a han zir chiang lehzual a. Awmze nei lutuklova thingphek remkhawm niin, tlemte chauh chuan pindan tluanin a hawlh thleng a. A engamah chu awmze nei bik taka rem pawh awmin a hrelova. Chhuat chu insak zawh hnuah chauh rem niin a lang. Thingphekte chu hmun danga in hlui châk aṭanga lakkhawm niawm tak a ni. 

"Chhinchhiahna enge maw chu an hnutchhiah ngei tur a ni" Jake-a chuan a han ti a. "Engti kawngin nge niang aw?"

"I theihnghilh dawn tak ngial a ni maw, ka ṭhian. Amah kha chuan a phumna hmun chu a hrechiang ang mawle."

"A danglam chuang hleinem, hun remchang a nei ta bik chuang lo ve thung a lawm. Tin, ni khua a lo rei hian thil landan te pawh hi a danglam ve viau thei asin. Hetah hian Rangkachak  chu rei tak hnutchhiahin a awm reng ang tih a chiang bik lova. Lak a ni lawk lovang tih erawh chu a ring mahna. Chuvangin chhinchhiah-na engemaw chu a hnuchhiah ngei ang tih ring mai rawh.."

Banga rawng var hnawih chu ṭhing un tawh viau mah se tihdanglamna hnuhma a awm lova. Hetah hian thil engemaw thuhruk a nih chuan kawhhmuhna engemaw an hnut-chhiah loh a rinawm vak lo a. Meichhemna thuk pawh chu… a'n en mai chuan khawih danglamna hnuhma awm a awm lo. Jake-a chu chhuat lam en dik tur chuan a han kir leh a. Bawkvak meuhin a chhuat inrem mal te te chu a han thlek chiang a.

"Clint!" tiin a rawn au chhuak thut a. "En teh!"

Chhuat inrem hmun khat lai chu a han kawk a. Mahse, Clint-a chuan Jake-a kawhna lai chu a hmu thiam lawk lova. Chutah a hmu ve ta, perek tuiek tawh in kilh tlar ṭhat na lai chu…

Perek chu thingphek inrem ngheh nana kilh niin a lang nâ a, anih tur ang aiin a intlar tam deuh tlat. Fei pianhmang ang deuhin perek pahnih dang chu a inkilh belh leh nghal. Tihpalh mai mai nge? An zawn mêk hnuhma kawhhmuhna chu ni ang?

"Kar phawng phawt teh ang," tih pahin Jake-a chu a han hawi kual a. Chutah kawngka lamah chuan lalṭin khaiin a lêt phei a, "Kawngka pawn lamah khan a kar phawina tur lungrâl ka hmu tlatin ka hria," a han ti a.

Clint-a chuan lo nghah pahin chhuat thing inrem lai chu a thlir reng a. A awm ngei dawn e. Dollar singnga chu… Chutiang sum tam nen chuan engkim a tih theih deuh thaw ang chu mawle!!

Jake-a chu a rawn kir leh a, lalṭin chu a han hung ṭha a. "A kar phawina lâwng chiah a nia, a vawn fung a awm lo tlat," a han ti a.

Lungrâl hmawr lehlam phek lai chu thingphel karah chuan a han nem lut a. A han phih nghek a, perek tuiêk tawh chu a kau nghal ṭhawt a. A vawihnih pawhna ah chuan a kau ta tuar a, perek tuiek tawh ho chu a ther chhuak fur a. Phûr zetin Clint-a chuan thingphek chu lo vuanin a pawtdarh ta nghal a. Chhuat hnuai chiahah chuan thinga siam thingrem, thirzaia ṭawn ṭap mai hi a lo awm a.

"Kha kha a nih kha!" Jake-a chuan a han ti a. "Dollar singnga chu!"

"Aw haw le, ka ti thei ta" Clint-a chuan a lo ti hmak a.

Jake-a chu a ngaihna hrelo deuhin a lo hawi chhuak a. A hmel puthmang chu muangchangin a inthlak ta. Clint-a chuan a kutah silai a lo hum reng tawh mai le. 

"Clint! i—"

Silai dâwt aṭang chuan meialh a rawn chhuak zuai a, a puak ri chu chulai vela inruakah chuan a khawk rum rum a. A han puak leh ṭhuai a. Jake Andrews-a chuan ṭawng tumin a ka a han âng zuau nain hmalamah a tlu zawi ta hnawk zawk a. 

Clint-a chuan a silai chu a pai ah chuan thun ṭha lehin a han ṭhingṭhi a, chulai kawkel aṭang chuan thingrem chu a pawtchhuak ta a. Lungral chuan a han chêk darh a. Eng engemaw hi a chhamphual nuap nuap a.

Thingremah chuan lehkha hlui pui pui te, inremna lehkha, thuziak eng enge maw a lo infun a. A kut pahnih hnih chuan a han ban a. Chhuatah chuan a bun ta vek a. Pawisa hmel awm reng reng a awm ta lo mai. Beidawng takin thingrem mawng lam te chu a han hai leh rawk rawk a. Engmah a awm lo!!

Khawtthler lamah chuan kawngkhar in hlap ri ṭhuai leh tlân hlawk hlawk ri a han hria a. A zuangtho zawk a, a han en kual thuak thuak a, kawngka lamah chuan a tlan phei ta a. a han dâk chhuak dêk dêk a. Kawtthlerah chuan Dan Rodelo-a chu  ama lam pana rawn tlanin a han hmu a. A hnung lawkah Nora-I chu a awm bawk a. A silai chu lekkawhin a hmetpuak ta nghal a, a hmehpuah lai la la chuan duh aiin a hmetpuak hma hret a, a tum chu hlah a ni tih a hre nghal a. 

Dan-a chu kawtthler vâng tan zawngin a lum tawp tawp a. Chutianga tive nghal tur chuan Nora-I chu a au nghal tuar tuar a. "Êng aṭang khan insaseng vat rawh! A that mai ang che!"

Clint-a chu kawngka aṭangin a rawn âwn chhuak a, Nora-I hlimthla che chu hmuin a silai chu a han lek rem leh deuh a. Chutah, engin silai ngul a chhun tlêt zauh chu lo hmuin, Dan-a chuan a rawn kap ve ta thung a. Clint-a silai chu a tla tawp a. Amah pawh inchhung lamah chuan a pil bo ta a. Silai nena inring em emin rangtakin Rodelo-a chuan kawtthler chu a rawn kân phei a. Chutih lai chuan Clint-a chu Jake-a ruang lamah chuan tlan pheiin a bawhliam phei a, mitthi tawh pa silai chu a kut ṭha lam chuan a han chhar vat a.

"Thlauh rawh!" Rodelo-a chu kawngka ah chuan a lo awm reng tawh a. "Thah che hi ka duhlo a nia,"

Nora-I chuan Jake-a ruang a melh vang vang hnu chuan Clint-a lamah chuan a mit chu a han len leh a. "I that ringawt a law.. i… !"

Jake-a silai chu chharin, a han lek kawh a, a hmehpuah hma chuan Dan-a chuan a rawn phihthlaksak a.

"Kan la mamawh maithei a sin, Nora."

"Nang kha," tih pahin Clint-a lamah chuan a silai chu vilik pahin "Khum chungah khan ṭhu rawh."

"Enge I rilruk a?"

"Engemaw chen chu kan lo nghak phawt ang chu. Nuam I tih dan dan khan lo awm mai rawh le."

"Ka kut hi engtin nge niang?"

Rodelo-a chuan Clint-a kut chu a han thlêk zawk a,  a lo thi hnuang nain, a lan dan ang em em chuan a nat hmel loh a... "Thisen I hloh tam lutuk loh nan tuam rawh," Mitthi pa chu a han thlek leh zawk a. "He pa ai hi chuan I la zia awm fu zawk a lawm.."

"Thah ngei a tum che sia, engvangin nge I kah loh a?" Nora-I chuan a lo ti a.

"Dan kengkawhtu ka ni lova, dik leh diklo rel feltu ka ni hek lo. Mahse, min kah leh vaih chuan ka that ang,"

"Sam Burrows-a kha engtin nge a lo awm ve ang le?" tiin Nora-I chuan a han zawt a. "Kawtthlerah pawh khan a rawn chhuak ve  miah lo."

"Engvangin nge a rawn chhuah ve ngawt ang? Sam-a hi chu ama buaina chauh ngaihtuahin rei tak a lo khawsa tawh ṭhin a lawm."

Silaite chu chhar khawmin, Rodelo-a chuan a paina pangngai a a pai bakah a dangte pawh chu a kawngah a han zep bawk a. A rin dan chuan zanin ral hma ngei hian puakthei thil a hmuh theih ang zawng zawng chu a mamawh ngei dawn niin a lang.

"Coffee kha tlak zo law law turin ka let leh dawn a nia," Nora-I chuan a rawn ti chhuak hlawl a.

Dan-a chuan ngaihtuah hmel fein a lo en vang vanga. "Va kal ta che. I hun kha âm takin va hmang la,"

Chutah, pindan chu a reh leh ta tlawk tlawk a. Lalṭin chu chau takin a eng teng teng a. Clint-a chu bang nghengin a thu mu a, a banrek hliam chu tuam pahin a inngaihtuah roh roh a. Dan Rodelo-a chuan rinhlelh rual lohvin a ngaihtuah ang chu a ngaihdan a ni ve tho ang tih a ring a. Hun remchang a neih vaih chuan a ṭhianpa a thah ang mai khan a that ve leh hmiah mai dawn a ni.

Clint-a buaina ber chu enge tih zel tur tih a hrelo chu a ni. Rangkachak chu a duh a, khawilai ah emaw hian a awm ngei ang. Mahse, hmuhchhuah a ni tawh emaw a tih chiah khan a bâk zel hre tur ber a ṭhianpa chu a that nghal ta mai si a. Chûng lehkha tladarh nuai ah te chuan a awmna lai kawhhmuh thei thil chu inziak awmin a ring a, mahse khawi berah nge niang? Engtin nge a inziah ang?

Rodelo-a lah chuan nghah lam chu a theih zawng tak a nih hmel si a, Clint-a thlirna aṭang chuan he pa hian thah chu a duh a, mahse rangkachak awmna chhui chhuah theih ngei a nih hnuah emaw, a rangkachak tak a neih theih ngei hnuah emaw a che chauh thung dawn a ni.

Ke pên thawm an hriat chuan Rodelo-a chu a dak chhuak vat a. Nora-I a lo ni a. Coffee No leh a bel chawiin a rawn lût a.

"In mamawh takin Sam-a’n rawn la turin min ti a," tih pah chuan dawhkan ah chuan a han dah a. Rodelo-a leh Clint-a leh ama tan chuan no chu a han thlikhat a. Dan-a chuan Clint-a leh Nora-I’n an no an laka an in chhung chu a lo nghak phawt a. Chutah a no chu lain a in ve ta a. Chu chu a lo hmuhin Nora-I chuan, "Min ring miah nange a?"

A lo ṭhen sak a. "Dollar singnga ṭhutbet reng chung hi chuan boruak hi a dang ve a."

Nora-I chuan Coffee chu a han dût hlap hlap a. Dan-a chuan lo nuih var varin a han dut ve hlak a.. "Coffee chu I va siam tui tehreng ve le," tiin a han fak hlak a, "Hetianga tui hi chu a awm leh tawh chuang lovang a."

Zan boruakah chuan thil ngaichangin a awm kar reng a. Ri danglam hlekah pawh a inring em em reng a. An rawn kal ngei ang. Chu chu a chiang. A chhuah lai khan Yuma Taninah khan kalh hnan tlat an ni nain. Mahse, a hma pawhin tâng tlanchhuak te chu an awm fo a. Tuemaw an tlanchhuak thei a nih phawt chuan, Tom Badger-a ngei chu a ni ang. A thei a, a tlanchhuak ngei bawk ang.

 Chutia lo sakuh ser nghah ngawt ngawt mai chu a ninawm duh viau mai a. A ṭul huna che nghal phat thei tura inring rengin dawhthei takin an lo awm ta ngat ngat a. Rangkachak awmna chu a hre ngei tur a ni ringawt.

"Tu emaw beisei I nei deuh em ni?" tiin Nora-I chuan a han zawt a. 

A lo bu nghat a "Rangkachak phum tute ngei hi ka lo beisei mawle,"

Clint-a chu a rawn hawi rang kher mai, a tho kâng deuh uaih a.

"Mahse, Yuma Taninah an awm a ni lawm ni!" tiin Nora-I chuan a lo hnial a.

"Khawvar hmain helai hmunah hian an rawn awm ngei ang tiin ka thâp sang ngam khawp mai," Rodelo-a chuan pangngai takin a lo ti sam êt a.

"Ka rawn chhuahsan aṭanga rei vak lovah  Tanin lamah khan engemaw rik deuh laih chu a awm ngei mai a. Anmahni an nih ngei ka ring."

Clint-a chu a rawn ṭhu chhuak hlawl a. "Min that vek ngei ang mawle!" tiin a rawn au chhuak a.. "Tumah hi min zuah lovang!"

"Maithei… chutiang chu a ni lo maithei bawk."