Bung-3

Mahse, silai vawikhat han ri thawr chuan a ngaihtuahna zawng zawng chu a tibuai ta mai pawh ni lovin a nunna hial a khawih ta tlat mai le..!!

   Ngaw chhung khawilai atang chuan nge tih pawh hriat har tak tur hian Rifle a rawn puak khawk rum rum a.  Chu Rifle mu chuan Jima hrawk bawk hnuai khuar lai takah chuan a rawn verh ta sawr mai si a.. Silai puak thut hlauva sakawr han lim puat leh silaimu denna avang chuan chiang zetin phulah chuan a thal thla ta tawl mai a..

        Jima hmel atang chuan a hnathawh lai thawk zo lova thih mai chu a hreh hle tih pawh a hriat theih a. Mahse, a tan chuan rorelna ni bak dinchhuah leh theihna hun a awm ta la.. A naute ho lo thlen pawh nghak zo lo chuan a chat thla ta riai riai a... 

               JL Cowboy hote pawh chuan hmanhmawh zet hian an rawn pan ve sauh sauhva. An lam pana sakawr pakhat chung chuan tu pawh nei lova rawn tlan par par chu an Foreman sakawr ani tih pawh an hre nghal theuh hlawm a. Silai kha vawikhat chauh arik avangin Jima chuan vanduaina tawkin thihna hial pawh a tawk mek ani thei tih pawh an ring theuh hlawm a. An Foreman sakawr nen an intawh chuan an lo pawt ding a, sadle chunga thisen thar lam tak far an han hmuh chuan thil awmdan tur chu an hrechiang ta ngei mai. Lainatna pawh nei lo ang mai hian an sakawrte chuan kheng lim puat puat hlawm mai a, phul hmun tawpa ngaw chu an thleng phei ta thuai hlawm a.. Rollen-a chuan, "Saw laia saw Jima ni ngei tur chu ka hmu e," ti in an piah lawka mihring ni ngei tur leia lo bawk phek reng chu a han kawk va a. An mitte chu fimkhur taka len reng chungin Jima ni ngeia an rin lam pan an kal phei ta a. An va thlen chuan an rin chu an lo dik chiah mai a. Rollena chuan a sakawr atanga chhukin Jima bulah chuan a han thingthi a. Jima mitmeng khap hauh tawh lo leh ang deuh huau atang ringawt pawh chuan an tlai lutuk ani tih chu a in hrechiang hle a ni. Lainat taka en ngawih ngawih chungin Jima mit chu a han siam sak mawlh mawlh a.  A rawn ding chhuak leh hmel zet chu hmuh hrehawm khawpin phuba lak chakna leh thinrimna hmel chuan a rawn ti danglam zo ta vek mai a. "Inrinna hun pawh pe hauh lovin ngaw chhung atang sawn an rawn kap tih ka hrechiang mai, mi dawihzep ho," a han ti charh charh a. Amah ai mahin a thiante ho chu an thinrim zawk emaw tih mai tur an la ni lehnghal a. Rollena'n ngaw chhung va dap nghal tura a rawtna pawh chu phur zet hian an lo pawm thlap hlawm tawh a ni. Sakawra an lawn hnu in Rollena chuan Jima ruang chu vawikhat dang a han thlir leh a. A thian ngainat ber mai thihdan chuan alung ati awi thei ngang lo a ni. A thinrim in sum zo lo chuan ngaihtuahna hmang hauh lo chuan, "Mi in ring lo lai chauh kap ngam mi dawihzep ho, in huaisenna in a tlin chuan rawn pen chhuak rawh u," ti in a han pawng au chiam mai a. An rin ang ngawt chuan Jima that tute chu ngaw chhungah chuan lo la awm pawh nise chuti mai chuan an rawn pen chhuak duh mai hauh lovang le.. Chu mai pawh ni lovin Rollena aw ri avang chuan an lo inring sawt ngei ang tih pawh a ngaihtuahna fim hmang tan chuan a hriat theih hle ang le. Rollena te ho sakawr ke pen ri chu a ringin ngaw chhunga anmahni lo thlir rengtute tan ralkhel dar ri hi ani hrim mai si a. An thinrimna chuan fimkhurna reng a neih tir hlawm tawh lo. An duh leh tum ber chu an Foreman thattu chu tupawh nise kah chik hrup mai ani tawh a, a bik takin Rollena chu a thinrim zual bik a. A chhan pawh Jima nen hian unau ang maia inkawm ngeih leh awm dun thin an nih vang a ni.. 

             An rin ang ngeiin ngaw chhungah chuan awm an awm ngei ani tih fiahna chu a rawn lang chhuak rang kher mai. Ngaw chin an thlen lohna chu feet 40 bak ani tawh lovang tih ah chuan Rifle a rawn puak ta thuai thuai mai a. Rollena tih loh midang zawngte chu an sakawr atang chuan an tla nghal phawk phawk a. Rollena erawh kah fuh harsa thei ang ber turin a sakawrah chuan a bawk phek tlat a. Chumi pah chuan a sakawr sadle a Rifle inthiat chu a han phawi dawk ve zawk mai a. Rifle rawn puahna ni a a hriatna lam hawi chuan a hmet puak ve ta zawt zawt a. Sakawr tlan lai atanga rin kah ve mai anih avangin kah fuh pawh a in ring vak lova. Mahse,  a vanneih a siamin nge ni, a va kahna zawnah chuan mihring na tuar han te thawt thawm a rawn ri chhuak ve ta hlauh mai a. Ngaw chhung lam thawm chu second li vel a han reh dak a. Mahse, Rollena'n ngaw chhung a thlen chiah erawh chuan ani lo berah pawh Rifle panga atang rawn ri chhuak ani ngei ang tih chu rinhlel rual loh tur khawp chuan a maka mak hian an rawn tlir ta zawih zawih mai a. Rollena tan lan han bihrukna tur awm hek lo, Rifle mu pathum ngawt mai chuan a darah an rawn deng ta dawt dawt mai a. A sakawr atang chuan a len thla lawp a, engmah na pawh hre hman lek lovin a thiante kawng zawh lam zawh chuan a chat thla zui ve ta nghal a... 

      JL Ranch in ah chuan rilru a vei nei tih hriat zet hian Jonathana chu a vei tawn sek a. Bathlara a vei velna chu a rei tawh bawk ani ang, tualzawl ah chuan churut zuk bung pawh a let phung tawh a. Van boruak lam a'n thlir lah chuan Ni lah chu a tla fel der tawh bawk si..!!.. Foreman Jima leh midang palite chu a ngaihtuah ber a.  Bawng rual an va zawnna lamah    Rustler hote nen an va in nangching anga a vanduai zawkah an va tang ta ani ngei ang ti in a ngaihtuahna a vak vel a. Mahse, chutiang thil em chu an chungah a thlen a ring phal chiah bawk si lo. A hote ngei pawhin vawi tam Rustler ho hnu hma chu an lo chhui ho tawh thin a, buaina tawkin Rustler hote chuan lo bei mai duh sela chance tam tak a awm tawh alawm, lo bei pawh nise a naute kha silai chelek thang leh thei ve tak tak te an ni a, a bikin Jima leh Rollena ngat phei chu tawrhhlelh awm tak an ni nghe nghe si a,  a che chhe zawkah chuan an va tan chu a ring thei lo a ni.. 

            Jonathana ngaihtuahna chu a buai map ta mai a. Engpawhnise, Benvon khaw Sheriff lo thlen hun nghah ngawt mai loh chu tih theih an nei tawh lo tih chu a hrechiang a, Jima te ho an lo thleng thuai tawh anga,  a tuk chawhnu herah chuan Benvon khaw Sheriff hmel pawh an hmu tawh em anga, chutah zawng tha tho lo zetin choka lama pumpui hnawh puar tur chuan a chhuk thla ve ta hnuk hnuk a.. 

           A tuk zinga Jonathana rawn tho chhuak zet chu zankhua in a muhil miah lo ani tih a mitmeng atang chuan a hriat mai a.  Tun thleng pawha an nauteho la rawn haw lo cheu mai chu a ngaihtuah tak zet tawh a ni.  A sakawr a buatsaih ta sawk sawk a. Breakfast pawh ei chakna reng a nei tawh lova.  A sakawra lawna kal mai a tum lai chuan an eisiamnu Pi Minky-i chuan, "Jonathan, itan coffee leh bawng sa rep kan ka siam peih vek tawh,  rawn inhnawh puar phawt la, i kal dawn nia. Eng thil pawh i va tawk thei,  pum ruaka kal chu a fel lovang," ti in choka kawngka atang chuan a rawn au lang lang a. Chutah zawng nu ang maia alo en leh amah hmangaihtu awm chhun ni a a hriat ve avangin a thu hnial chu a hreh ve em em a, a sakawr atang chuan chhuk lehin choka lam pan chuan a kir leh ta rih a. Choka ah lutin phur fahran lo chuan coffee in tur chuan a thu ve ta chawt a. Nidanga tui ti fahrana a lo ei thin bawng sarep kan leh coffee sa tha ver vawr tak mai pawh chu tui tihna reng a nei lova. Pi Minky-i ngaihthat nan chauh chuan a ei in a in ve mai mai chauh a ni. 

       Engemaw ti takin Pi Minky pawh chu a hlim lo ru ve hle ani tih chu a hmel atang chuan a lang reng a,  awm pawh a awm reng a ni. Tuk dangah chuan an nauteho fiamthu duh hlim thei tak ten breakfast dawn hmasak inchuha choka a an han infiam leh in ngur der velte reng rengin Pi Minky-i kha a buai ve chung thin kha ani si a,  tukkin zet chuan a reh ruih ta mai si a, engemaw ti kawng tak chuan a khua te pawh a har ve a ni. 

     Zing ni chhuak tantir lawma sava tho hmasa pawlin an thiante kaihthawh tum ni awm fahran a an han hram zarh zarh leh a khat tawka Thehlei han tlak leh hlarh hlarh thinte tih mai loh chu thawm dang hriat tur reng a awm tlat lo a ni. " Fimkhur takin va che la,  i nunna atana hlauhawm thei lakah reng reng chuan inthiar fihlim zel ang che,  chu chu i tan chauh ani lo, i fanu Lori tan leh he i Ranch bakah kei a tan te thleng hian i dam kan la mamawh ngawih ngawih tih hi rawn hrereng ang che. Thinrimna in sum zo lova mi in thil an tih hian nasa takin pawi a khawih phah theih thin a, an nunna in a tuar loh vek pawhin an damchhung atan a pawi phah fo thin a ni, " ti in Minky chuan Jonathana a ngaihtuah zia chu sawi langin thu a chah kauh kauh a.  Nu leh pa ten an fate chunga thu an chah ang leh an zilh ang hian a lo ti fo thin reng a ni. 

  Mahse,  Jonathana chuan engtin mah a chhang lova, a rilru tak erawh chuan Minky thusawi chu dik a ti hle a ni. Amah Jonathana hi a chhe ber dawnin lo thi palh ta se a fanu neihchhun chu fahrah mai a lo nitawh anga, chumi rual chuan he Ranch pawh hi enkawltu awm lovin a tawp nghal ngei bawk anga, a hmangaih em em leh nu ang maia a lo en Minky pawh chuan vahvaihna bul a tan dawn ani tihte chu amah a inhrechiang ang tluk zetin a hrechiang a ni. Minky chaw ei siam chu a chanve vel zawng a han ei lui hram a, a hmui hrufai mawlh mawlh chung chuan choka chu a chhuahsan ta a. Sakawr chunga a chuan hnu in choka lam chu a han melh leh zawk a,  choka kawngkhar bula lo ding chhuak Minky hnenah chuan, "Mink, min lo ngaihtuah hauh suh ang che, kan naute ho chu ka va pawh anga, kan lo kir leh thuai ang," ti in a sakawr chu a kheng kal ta a. 

    A nauteho chuan khawidang mah an pan a ring lova, Rustler ho hnu an chhui a piang maia an hnu an hloh ziahna hmun phul lam kha a pan ding ve ta ngar ngar a.  Tukthuan ei hun awm bawr velah chulai hmun chu a va thleng ta a.  Phul tawp ngaw ep ava thlen chuan a beisei hauh loh thil ava hmu ta ta tlat mai le...!! Jima, Teda, Snapa leh Bento-a te ho ruang,  pali lai maite chu phul leh ngaw inthenna phaitual hlo chungah chuan an lo thal phung mai chu ava hmu ta mai a. A sakawr atang chuan rang zetin a chhuk nghal a, a enkual zung zung a.  A tu amah chuan nunna reng an lo nei tawh lo a ni. Zan dai tla in an taksa te chu a lo tlak huh hniang tawh mai hlawm lehnghal a. Chutilaia Jonathana thinrim leh pawi ti lutuk hmel chu rapthlak tak a ni. Thinrim hrikthlak nana han au piap mai tak chu a nap a. Mahse,  Minky thuchahte kha ala hriatreng avang chauhin a in bengdai leh thei hram a. Khawnge Rollena hi a awm ve tak ang.?  Chu zawhna chu a rilru ah chuan a rawn lut nghal zat a.  Ngaihdan tha lo pui pui leh amah Rollena rinhlelhna lian tak chu a nei nghal a. Mahse, chutiang ringawt chu dik theiin a ring chiah si lo. A lu a han thing nawk a, "A ni lo,  ani thei lovang. Rollena hian ka chungah chutiang rilru chhia chu a pu duh hauh lovang, " ti in amah leh amah chu a han inhnial leh rih a. Chutilai tak chuan ngaw chhung lama sakawr han chik nghur nghur thawm chu a hre ta a. 

        Rang tak leh fimkhur tak si in a sakawrah chuan a lawn kai nawlh a,  a tul ta thut anih pawhin ngaw chhungah chuan Rifle aiin Pistol a chhawr na awm zawk ang tih a hre tlat. Chutah, a pistol pakhat chu phawi chhuakin indona hmuna ral nen an in tawh chilh pawha an lo tih thin angin kun chungin a sakawrah chuan a thu a, ngaw chhung chu a lut ta thuai a. Feet sawmnga vel awrh a kal hman chauh a, sakawr pakhatin beng tun hru hru chunga a lo thlir vauh vauh chu ava hmu ta a. Hrilh kher ngai lovin Rollena sakawr duat em em thin kha a ni tih pawh a hre nghal mai a. Sakawr bul velte chu ke in a fang kual chiam a. Mahse,  buhpawl zinga hriau zawn ang maiin Rollena chu hmuh tur reng a awm lo.  Rollena ngaw chhung khawi lai berah emaw chuan nungdama ala awm beiseiin han auh vak mai tuma a in tintuah lai tak chuan sakawr dinna thlang lawk,  thing lian tak bula Rollena ruang lo let reng chu a hmu ve leh ta a. A ngaihna hre lo zet hian reilote chhung chu a han ding  rih hlak a. Chutah Rollena ruang bulah chuan a chhuk thla ta vat a.  Ani pawh a thiante ang bawkin nizan lamah a lo thi tawh ani tih a taksa khawng vek tawh danah chuan a hre mai a. Engpawhnise, tuna a tih theih awmchhun chu Benvon khaw Sheriff lo thlen hun nghah tawp mai chauh chu ani ta a ni. A sakawrah chuan lawnkaiin hnuhma thar lam Jima te ho lo kaptute hnu chu hmuh theih mai in beiseiin ngaw chhung thelh fai hun maiah chuan a kal kual ta a. Rollena ruang atanga yard sawmli vel turah chuan lungpui lian tawk tak hi a lo awm khup mai a. 

     Chulam pan chuan a sakawr chu kal phei tirin lungpui awmna hmun ava thlen chuan mihring chet tlatna hnuhma thar lam tak tak chu a va hmu ta ngei mai le...!!    A sakawr atanga chhuk meuhin chung hnuhma te chu a han bel chiang a. Spanish sikret man to tak mai chi zuk bung lo let rum mai te chu ava hmu ta nghal a. Tangkaina te a neih takin ti in pathum lai chu a chhar a. A kawr ipte ah chuan a ak tha ta hmak a. A han vei kual leh chiam a, a beisei ruk ber kartut ruak leh pheikhawk hnuhma reng a hmu ta lova. Duh tawka thutna hnu hnim vuai chin chen bulah chuan a beisei loh thil tak, samkhuih te tak te, kamis hma lam ipte ah pawh ah bo mai theih ang chi hi a lo awm bam a. Chu pawh chu rang takin a chhar leh a, a kekawr hmalam ipte ah bawk chuan a ak leh hmak a. Chung ho hnuhma chu thil dang engmah hmuh theih a neih tak loh avangin a Rang lamah a Ranch va thlen leh thuai chu a duh avangin ngaw chu a tlan chhuahsan leh ta vat a. A tana rinawm taka lo thawk thin a naute ho ruang chu lainat takin a han thlir leh dan dan a, an thlan laihna tur hmanrua vel la tur chuan JL Ranch lam chu a pan leh ta a. A kal pah chuan a chung thil thleng zawng zawngte chu a han ngaihtuah kir a. A thinrimna chu a zual tawlh tawlh mai a.  Tunah rih chuan eng han tih theih lah a nei hauh bawk si lo.. "Phuba zawng ka la la mawlh ang, he thil ti tu hi zawng tupawh ni raw sek sek, ka chi mih hma chuan ka chawlhsan mai mai tawp lovang,"  tiin a chham chhuak mawlh mawlh a..