Bung-2

Kid Rodelo by Louis L'Amour

BUNG HNIHNA

Tanin lung lakna hmun (Quarry) chu mei chhemna thuk ang maiin a sa huam huam a. Tom Badger-a chuan lung hem chu lo chelhin Joe Harbin-a chuan a chhutna tuboh lian chi chu a chang ve thung a. Thiam thil leh remhriatna tel map lovin thapui nen chu tuboh rit tak chuan a rawn chhu ṭhuai ṭhuai mai a.

"Zawi muang deuh khan ti teh mi â pa!" Badger-a chuan nuam ti lo zetin a lo ti a. "I ṭhelh palh vaih chuan kut ka nei lo nghal a ni mai."

Badger-a chuan anmahni vengtu Ferryman-a mitmei pah thei tur zawngin ṭanhmun a rem a. Atan chuan lung lak leh Jail tan tih vel hi chu thil thar pawh a ni tawh lem lova. Mitang reng reng chuan tanin pindan a a awmpui tur duh a thlang thei lova, chu chuan tlanchhuahpui tura thurualpui a thlan dan  thlengin ngawng a nei dawn tih pawh a hre chiang hle a. Thil awmdan a zir zelin tihdan kawng ṭha zawk pawh a awm ve zel mai ang chu.

"Dam chhungin kan thawk dawn chu a ni si a" Harbin-a chuan a han ti a, "Chutah, Rodelo-a tehhrep chu kum khat hnu lekah a chhuak ta mai bawk si a! Ngaihtuah a ti thui mang e."

"Hlawh tur sum it in kha pa kha I that a ni maw.."

Joe Harbin-a chuan tuboh lian chu a han hum nghet sauh a. A thinrimna chu a bo duak a, vawt a rawn ti ta sung sung mai a, fimkhur angreng deuhin, "Eng hlawh maw?"

Badger-a chuan hêm chu lek rem deuh pahin, "Thil laihchhuahna a thawktute hlawh kha mawle, rangkachak hlang hlak dollar singnga zet a nih kha."

"I tawng tam mah mah."

"Kha I thil rûksa lo khawm vel mai mai tura Dan-a chhuak han thlir liam kha chu a thinrim thlak ve reng tiraw," Badger-a chuan a han ti a.

 "Ka thuhrukna hmun a hre lo hrim hrim."

"Ngaihdan ṭha tak engemaw chu a nei a ni. Chutiang chuan min hrilh tlat. A hun a lo thlen veleh nangpawh tlanchhuah I tum a, I thei ta lo chu a nia. Chu chu a ni lawmni tih I tum kha?"

"Nang enge I chanchin?" Harbin-a chuan a lo ti hluk a. "I tih theih bik chuan loh hi aw."

Vengtupain a rawn ngaihven deuh a ni tih hriattirna ni pah fawmin Badger-a chuan leiah chil a han chhak phurh a. Harbin-a chuan a tuboh chu vuanin a han lek kang deuh uaih a, Vengtupa pawhin mitang dangte chu a ngaihven san leh ta a. Badger-a chuan zawite in, "Keimah chauha tih ka tum laiin ka break a fail palh a law maw le, Nang chu I mawl vang liau liau a ni ve thung a. Mahse, inthurual ta ila chuan…."

Ngawi rengin an thawk leh ta mawlh mawlh a. Nakin deuhah chuan Harbina bawk chu rawn tawng chhuak lehin, "Ruahmanna I nei em ni?"

"A... engemaw zat chu nei e, ka tihlawhtling thei vek bawk, mahse thurualpui ka mamawh a ni."

"Mexico lama kal vat ka duh ang, Mexican hmeichhia te hi ka ngaina tlat," tiin Harbin-a chu a han phun sap a.

"Khang hlawh te kha la in, hmun hnihah ṭhen ila, tichuan.."

"Insem maw? I â ta em ni? Tuemaw ka sem ve phal I ring ringawt elaw?"

"Kan thawhdun dawn kha."

Joe-a chu ṭawng leh a han tum lai chuan Tom badger-a chuan vaivutah chuan chil a han chhak leh phurh a. Mahse, Harbin-a inngaihtuah thinrim laklawh chuan a lo hrethiam si lova. thinrim awrawl ring tawk in, "Ka remti ang maw? I lo inngai —"

Ferryman-a chu an bul lawkah a rawn thleng phei nghal a. "Hetah hian tumah tawng phal a ni hlei nem!"

Harbin-a chuan a han hmachhawn a, thinrim hmai chuar nûngin, "Nang kha_!"

Ferryman-a chuan a lo chhang lêt rang kher mai. A lo tih fo tawh ṭhin angin, hetiang mi luhlul deuh deh dan hi chu a hre ngang mai a. A silai kawm lam chu dimna tel map lovin a lo vai kual pawp a. Harbin-a’n a rawn pan mek lai chu a lo fuh chawrh a. A ṭhingṭhi nghal hnawk a. A chal kak atang chuan thisen a lo chhuak ngiai ngiai a.

"Tawlh kir rawh," tih pahin Badger-a chu a han en leh a. "Nang hi enge I chanchin?"

"Kan inhnial hlek a lawm maw le, Ferryman. Joe-a thiam loh pawh a ni lo. Khawlum hian a ti thinchhe ve deuh a ni,"

Ferryman-a chu a han tawi deuh a, Mahse Tom Badger-a chuan a lo nuih tlawn a. "Joe-a hian lum a ti deuh a, I hria anga, Montana lam mi a nih avangin nang leh kei ang chuan ngaiah neih har a ti deuh a ni."

Ferryman-a chu a insûm leh ta deuh a, a han tawlh kir hlek a. "A ṭha e. Tun ṭum chu hotute hnenah ka thlen lo phawt ang a. I ṭhianpa a nih avangin awmphung pangngaia awm turin lo veng ṭha hle ang che, I hria em?" A chal chu a han hui pawk a. "A lum kher mai tehhrep chuan! mahse chhuanlamah chuan a hman chi vak loh  a nia."

A kalsawn ta a. Badger-a chuan Harbin-a chu a han kaitho a. Thisen chu a far satliah mai nilovin a dir zawih zawih a. Harbin-a khawhmuh chu a la phe ruai a.. "Ka naknem lam a rawn chhir leh tur chu min lo chhanhim ta a ni maw," a han ti a.

"Khangte em em ka tih lovin? Thawk dun kan nih tawh kha?"

Harbin-a chuan hreh hmel zetin, "Enge ruahmanna I neih?"

"Khang rangkachak zawng zawngte nen khan…. Ni sawm chhungin…. Mazatlan ah chuan ka hruai thleng ang che."

"A ṭha alawm — thawhpuipa."

"Hetah hian," tih pahin Badger-a chuan lung verhna hêm chu a rawn dah chhuak a. "Hêm hi lo chelh ve thung tawh rawh le. Vengtute kha tithinrim tawh reng reng suh. Min dah hran vaih chuan heta ṭang hian keimah chauhin ka chhuak a ni mai."

Joe Harbin-a chu hlim lo zetin a hna lamah chuan a han bûr leh ngur ngur a. Dik chiah chuan hei hi a tih theih tawk chu a nih mai hmel rih a ni. A thawhṭhat poh leh an rawn ngaihven ṭha dawn lova. A hmaa an chhut thlukna avang khan a lu chu a na tluk tluk a. A rilruah chuan pawisa tam tak lo nghak mektu chu a han ngaihtuah lui hram hram a,  Rodelo-an a lo khawm vel tur te chu a ngaihtuah tel bawk a.

A ṭawng ri a hriat hma chuan Turkey-a lo kal pawh chu a lo hmu miah lova. "I chau ve thin lawm ni, Joe?"

"Kei chu ni lo ve."

"I ṭhian Rodelo-a kha tukin khan a chhuak fel ta asin. A thil min pek hi han en ve teh." tih pah chuan rangkachak pawisa tlang chu a han hmuh a. A hmel puthmang chu a lo thlir ran a.. Hemi phenah hian engemaw tak chu a awm a ni. Turkey-a chuan hei hi hriain thil pawh a chik fu mai a. "Hei hi hna a hmuh hma a a ei leh in tur a ni si a. Kha pa awmdan kha ka hrethiam lo angreng hle mai."

Harbin-a’n engtinmah a lo chhan tak lohah chuan Turkey-a pawh chu a kalsawn leh ta a. Badger-a chuan hêm chelh lam chu tum lehin, lung verh kuak kara phun pah chuan, "Dan-a hian kha pawisa kha a mamawh lo a nih chuan, a dang tam tawk lak lehna hmun tur a hria a ni mai," a han ti a

"Heta ṭanga kan chhuah ngei chu a ngai a ni." Harbin-a mitmeng chu a rum kher mai. "Tom, Kan chhuah ngei a tul a nia."

"Kan chhuak ang. Zanin ngeiah hian kan chhuak ang.."

Harbin-a chu a lo phu zawk a. "Zan inah hian maw?"

"Lo inpeih ang che, nitlak rual velin a niang."

Joe Harbin-a chuan a hmui chu a han liak lup lup a. Ni chu a han thlir a, darkar engemaw zat a la ngai tlat mai. A thlanin a rawn luan nate chu vawt deuh sung sungin a hria a. A hlau tihna em ni ang? A lo ni mahna. Engti kawng zawng pawhin a paltlang tur a ni ringawt. A lo tem fo tawh Mexican Beer tuina te pawh chu a ngaihtuah nuap nuap a. Tunah chuan ei leh in lam tih a hun ta.

Hna an thawh leh mawlh mawlh lai chuan nisa chuan ṭiauvut te chu rawn phêt letin, a sa chang kher mai. Thuk mei hmun ang maiin a sa huam huam a. Kutkawr pawh bun lova kahpathir Hem khawih vel chuan kut te pawh a tidurh duh khawp mai a. Lunglakna hmunah chuan nisa lutuk tuar lovin mi pahnih lai chu an tlusawp tawh nghe nghe a. Mahse, Joe Harbin-a chu a la thawk turh turh reng a. Tom Badger-a pawh, muangchang leh a kaida dik thlapin a chanpual chu a lo hlen ve zel a. Badger-a chu dak thlarha chein, tha chuang a hmang ngai miah lova. A lo tih ṭhan tawh angin, awlsam leh sawt angreng taka thil tih dan a thiam tlat a ni.

Thing tum hmawr lama thu vengtu pakhat, Miller-a chuan an lam a rawn pan lai chuan, an hmachhawp hnuhnung ber chu an lo zo ruai a ni tawh a. Midang zawng zawng aiin an thawk tam a ni.

"Nangni kha, midang ho zawng zawng in hmakhalh vek a lawm. In hmanrua te kha khawm ula, vawiin atan chuan in thawk tam tawk tawh e.."

Badger-a chu a han ding char a, a hnung chu a han nawk a. "Ka lawm e, ka pu. I tisual lovin ka hria, naktuk lama tihzawmah dah tawh ila a tha ang a."

Badger-a chuan Hem chu a mal malin a han chhar nghauh nghauh a. Joe Harbin-a chuan Tuboh chu a lo pu uaih bawk a. Vengtu in a rawn ngaihven loh kar chhungte chuan Hem pakhat chu lungkarah a ke chuan a han thai lut zauh a. Chutah, zawimuangin an kal san ta a. A han hawikir chuan, lung an chhut kuak na laiah chuan pakhatin thil dip hi a bunin, a sawhmuk nghal zel tih badger-a chuan a hmu thei a. hmawlhsei deuh niawm tak hi a phun zel bawk a.

Badger-a mit chuan Lunglakna hmun vel chu a en kual thuak thuak a. A hlat zawngte, a hmun hmelhmang awmdan te chu a chhut vel a ni. Chutah, Gopher-an Wheel Barrow rit zet hmanga thei leh thei lova lungkeh nawi a lo nawr mek chuan a mit a la ta a. A landan chu a tha lo hle mai. A hun hmangzo tur pawhin a dam thleng ngut ange maw tiin Badger-a chuan a ngaihtuah zui neuh neuh a.

A inher nghat a, Tanin hmanrua dahna Inte pan chuan Joe Harbin-a rualin a kal phei ve ta zel a. Chutah chuan hmanraw vengtu chuan an rawn dah pah chuan a lo enfiah zel a.

"In va hma ve vawiin tlai chu. Miller-a’n that a chhuah leh pek a ni maw?" Badger-a lo then khum sak pahin chupa chuan a lo ti a.. "A tha e, Harbin.  I Tuboh I rawn hawn maw ?"

Joe Harbin-a chuan kawngka bula chhuarah chuan a tuboh put chu a han dah a. A koki chu rem leh remlovin a han thlek pah a. A ka te chu a ro hulh mai a. Rawl deuh thumin a inhre tan ta a. Badger-a pawh chuan a Hem kenlai te chu Chhuarah chuan a han theh phei a. Hmanraw vawngtu pa chuan a lo thlek zui a.

"Hem hi a kimlo a nia aw, Tom."

"I hmuh sual a niang," Badger-a chuan a lo ti satliah mai a. "Ka rawn haw hmanhmawh deuh a."

"Anih chuan va tlan kir leh vat la, va zawng hmu ngei ang che. Dan chu I hria a lawm."

Badger-a chu muangchangin a kir leh ta a. An thlir zui reng a ni tih hriain a ke pen tin hun hman dan chu a chhut ru thlap thlap a. Hem chhar tura a kun lai tak chuan vengtute hmuh phak lohah a awm zawk dawn tih pawh a hre khiau a ni. Tunah chuan a chuan hnuai lama mitangte thlirin a han ding zawk a. Hmanraw vawngtu pa pawh Inte ah chuan a lo la awm reng a.  

Hem zawnga a kun pah chuan a khup lehlam chu leiah a han nghat a. Nawalh a lo thuruk sa chu a nawt zit ta pharh a. Fuse an lo vuah thar ho chu a han dep zit ta ngauh ngauh mai a. Chutah, Hem chu lain muangchangin a kir leh ta a.

Fuse chu engtia rei nge a kan dawn tih te, thil puak nasa takin a zui dawn tih te chu a hre khiau a. Chutah chiah chuan, tlanchhuah an tum a nih chuan an chechang zui nghal mai dawn a ni. Tom Badger-a chu pa fimkhur tak ngang hi a ni a. A chevel reng reng chuan awmzia a nei vek a. A rilruah chuan Yaquis ho te pawh an rawn lang zawr zawr a. Anmahni tel emaw tello emaw in ruahmanna siam dan kawng a awm lova. A theih chuan tlansan, a theih loh chuan lo dolet chu thil tih theih awmchhun ni maiin a lang a ni.

Hmanraw dahna Inte chu a lo thleng phei a. "Hei le I Hem chu. I lungawi tawh em ?"

"Keima chungthu a ni lo, Tom, Dan a ni a. Danin a phuar tlat che u a lawm" Hmanraw vawngtu pa chuan a lo ti a.

Badger-a kuta Hem a va ban chiah tihah thil puak ring mangkheng mai chuan boruak reh ruih chu a ti buai zo ta. A puah rual chiah chuan Badger-a chuan hem chu a han vai pawp a. Hmanraw vawngtupa luruhah tak chuan a chhu ta rawp a.

Thil puak thawm chu a reh duk a, au chel chul thawmin a rawn zui ta nuai nuai a. Vengtute leh mitangte inhliam natuar authawm chuan boruak chu a luahkhat ta a. Tom-a leh Harbin-a chu lunglakna hmun lamah chuan an tlan vat a. Mihring taksa an hmuh hmasak ber chu Ferryman-a kha a ni. Lung leh leinawi chuan a taksa chanve chu a lo chilh vek a. A taksa chu pawtchhuakin, Badger-a chuan a silai paina kawnghren chu a han pawt hlip a. Silaimute chu a han phawrh sawk sawk a, pistol pawh chu a kawngah chuan a han zep ta nghal a. Joe Harbin- pawh chuan vengtupa Rifle chu intauh bawp bawp chungin a lo khawm ve mek a.

Mitangte leh vengtute chu khu luih luih karah chuan an rawn pai chhuak tawng tawng hlawm a. A thente chu lo la tangin, thisen nena inchiahpiah nuaia lo vak chhuak tawk tawkte an awm bawk a. Chung hote chu nem nawk nawk pahin Badger-a chu a rawn lawn chhuak leh a. Piah deuha sakawr rual leh an hnuh Wagon lo ding mek awmna lamah chuan a tlan phei ta a.

Warden pawh a rawn lang vat a, vengtu engemaw zatin an rawn zui bawk a. A ding chawt a. Lunglakna hmun chu hrilhhai deuhin a en ta reng ringawt a, chutih lai chuan vengtute ho chu lung leh leiin a chhilh mek mi hliam ho buaipui tur chuan an tlan phei ta a.

Tom Badger-a chuan Warden chu a han hnaihchilh vat a. A silai chuan a nakah a han hawlh a. Lehlam atangin Harbin-a’n a lo hnaihchilh ve bawk a. A pistol chu a pai atangin a han pawhchhuah sak nghal a.

"I lakah hian engmah thil thalo tih ka tum lo, warden, Dam I la duh chuan wagon lam saw pan rawh le."

"Ka ti dawn a lawm —"

"Warden, inhnialna hun a awm lo. Wagon lamah chuan kal nghal rawh." tiin Badger-a chuan a han vau a.

Warden chuan a han hnial deuh dawn a, chutah Harbin-a chuan silai ngulin a lu ah a rawn hem pawp a. A tlu zawi hnawk a. Wagon lamah chuan an hnuk phei vat a. An hlang lut ta sawk sawk a. Tom Badger-a chuan sakawr lakam chu a lo hui khawm thuai thuai a. kawngkapui lam panin pangngai takin an tawlh phei tan ta a.

Joe Harbin-a chuan Warden chu an hmalamah a han pawt phei a. Chiang taka hmuh theih turin a thuttun tir a. Tunah rih chuan an ruahmanna chu a kaltluang viau mai.

"Ding rawh u !"

Badger-a chuan Wagon chu hmalamah a kaltir zel a. Vengtu pahnihna chu Kawngkapui sira venbuk insang atang chuan rawn pen chhuakin a laiphir chu a han lek kang a. "Ding rawh u, a nih loh chuan ka kap ang che u !"

"Kawngka hi hawng rawh, a nih loh chuan Warden thi I kawl mai ang," Badger-a chuan a han ti a. Vengtu chu a han tawi khawtlai deuh a, tanpuitu zawngin a ding leh vei chu a han thlek kual a. Tumah an lo awm tawh si lo. Deputy warden hovin Lunglakna lamah tanpuina pe turin an lo kal vek tawh a lo ni a.

"Second thum chiah I nei a nia," Harbin-a chuan a han ti a.  "Warden lu hi kan thlawh darh vek ang a, kan rawn kap nghal bawk ang che u... khat !"

Vengtute pahnih chu an han inen a. An duty an nih anga an tihtur chu khauh viau mah se, Warden chu mi tha tak niin, a lakah pawh bat an nei nual bawk si a. …. "hnih !"

Vengtu pakhat zawk chu a vir vut a, kawngkapui pawh hawnna chu a ban ta a, engmah pawh sawi zui lovin hrui chu a han pawt a. Kawngka chu a lo inhawng ta… Anni pawh chu zawimuangin an che zui ve nghal a. Joe Harbin-a chuan a chala thlanfim lo luang chhuak tuam tuam chu a hre thei a. Engtik lai pawha silaimu dawng thei reng an ni si a. Chutah, Kawngkapui chu a inhawng fel a. An kaltlang ta a, Wagon chu a him chin a thlen hma loh chuan muangchangin sakawr chu an kaltir zel a. Chutah, an han tichak deuh hret a. 

Mual pawng bulthut chu an thleng phei ta a. "Namthla rawh le!" Tom-a chuan a han ti a, Harbin-a chuan nikhawhrelova la awm reng Warden chu a han namthla a, Chutah, Tom Badger-a chuan hruihrualin sakawr chu a han hlap nghal thuai a. An lim nghal zawk a. Venbuk insang atang chuan Rifle a rawn puak thak thak a. Mahse, eng em ti lovin mualpawng phenah chuan an tlanliam fel thei ta a. 

An hnung lamah chuan ralkhel dar a ri ta bal bal a. Chutah, Badger-a chuan Wagon chu kawng tum pangngai atangin tlang bulthuta hnimbuk tona lamah chuan a han pen pui a. Perhte leh lung velah chuan an insawh phei bawp pawp a. Mahse, tluang takin an tlan zel a. Hmun fai lai deuh an va thleng phei a. Wagon chu vaivut dur hmunah chuan thawm nei mang lovin a tlan zel a. Chutah, Badger-a chuan, "Sawlai lung hmun piah ah sawn sakawr rualte hi kan phelh ang a, kan chuang tawh ang” tih pah chuan a kawr chhung atangin a tawnna ilo vel chu a phawrh a. Heile !" tih pahin Harbin-a lamah chuan a han theh phei a.

Sakawr pahnih chu a hrenbehna an han phelh vat a, a thununna tur hrui hrual chu an han bel leh nawk nawk a. A hau ngawtin an chuang ta a. Chhim lam panin an inkhalh ta zel a. Chulai hmun chu vaivut dur hmun a nih avangin chhui zel theih loh turin an sakawr hnu te chu vaivut chuan a chhilh nghal zel dawn a ni.

Hmun fai lai atang chuan thing hmun ruam lam chu an pan zel a, Luipui hnaiha tuipuisuthlah lo to luihna chu an thleng thla a. Engemaw chen an kal hnuah Badger-a chu a han inher leh nghat a, Chulai hmun chu hnu chhawnin vaivut dur hmun lamah bawk chuan an kal leh ta zel a.

Joe Harbin-a pawh chuan sakawr dung chen leka hla atangin a rawn zui ve zel a, a thianpa thil tihdan chu a ngaisang ang reng hle mai. Tom Badger-a chuan engkim a lo ruahman fel thlip thlep a ni tih a chiang reng mai a. Hnuhma hnuchhiah tur awm theih miah lohna Tuipuisuthlah hmunah an han lut phawt a, chutah chhui zui harsa thei ang ber turin an han kual kawi leh a.

Badger-a chuan van dumpawl ruih lam chu a han thlir vang vang a, Harbin-a pawh chuan eng hun nge ni tawh ang tih a lo ngaihtuah ve mek a.  A hun pawh an thlang suallo kher mai. Ni chu a tla thuai anga, khua a rawn thim zui nghal mai dawn a ni. Thlaler ramah chuan chutiang chu thil nihdan tlangpui a ni a. Tichuan, khawvar hma chu him takin an kal zel thei tawh dawn a ni.

Mahse, Joe Harbin-a chu ringhlelhna a khat mihring a ni ve hrim hrim a. Badger-a chuan an ke pen tin maiah chuan ruahmanna a nei tha hle mai a… Rangkachak an lak hnuah eng ruahmanna tak chu nei zui zel ang maw. Suangtuahna tuihnai vak chu a ni lo nain, Joe Harbin-a chuan engtia thui nge  Badger-a nen hian kal dun zel a duh ang tih te chu a han ngaihtuah nuap nuap a. Lawng an mamawhna chu buaina pakhat tur a ni leh a. Chutah tak chuan, Harbin-a chuan lawng khalhtu ho han deh vel dan tur ah chuan ngaihdan pawh a nei thiam vak lova. Chutah pawh chuan Badger-a chuan ruahmanna a lo nei fel leh diam tawh ang chu. Badger-a tanpuina chu a mamawh leh ngei hmel a. Tin, Yaqui hovin an lo um hunah pawh an intanpui tawn chu a tul hle ang le. Thlalera cheng Yaquis ho lo hmachhawn chu thil namen a ni hauh lo ang le. 

Vaivut dur hmuna an kal lai chuan Badger-a chuan dingin Harbin-a chu a ruala kal ve turin a lo nghak a. Chutah, "Zep nei miah lovin tlang deuhin min hrilh teh. Rangkachak thuhrukna chu midang tumahin an hre ve miah lo maw?"

"Mawl viau ah min ngai em ni ? Tumahin an hre lo."

Badger-a chuan a han ngaihtuah vang vangin, tumahin chu thil chu an hre lo a nih chuan,  Yaquis emaw Warden emaw chuan an kalna tur lam awm ang chu an ring thiam miah dawn lova. Chu chu rangkachak an hmuh hma thil nita se. Mahse, lo hre ve an awm a nih vaih a, Warden pawh an lo hrilh ve a nih chuan, rangkachak awmna velah chuan an lo chang reng thei a.  Chutiang a nih chuan an kutah an va inbarh lut ringawt dawn a ni.

"Dawt I sawi vaih chuan," Badger-a chuan a han ti a, "Kan nghawng ruh hian a tuar dawn a nia. Mi pakhat lek pawhin rangkachak chungchang hi lo hre vein, a awmna te pawh lo hre hial phei sela chuan an thangah kan awk chiang teh ang chu.."

"Tumahin an hrelo," Harbin-a chuan a lo ti nghut a. A inngaihtuah zui run run a. Kha nula kha… a lakah khan a lo tawng lian mah mah em aw. A thusawi te kha a bengkhawn vaih chuan tuemaw chuan an lo hre ve maithei a ni. Mahse a pawi chai love, tunah chuan he ram hi a chhuahsan daih tawh ang.