Bung-1

United State ramchhung chhim leh hmar indona rapthlak leh thisen heh zet mai in remna thuthlung a rawn puak chhuah meuh chuan a ram chhung mi chengte tan pawh kawlpui chhut chah an sawi ang mai hi ani ringawt a. Chu indonaa sipai huaisen leh ralhrat zet mai thinte pawh chuan inremna thuthlung chu an lawm ve em em mai a ni. A tam zawkte chuan ralrêl thupek ringawt an ngaihchanna thin sipai hmun rip tak chu kalsanin mi pangngai nun bul an tan chho ve leh ta a.

 

Displine nin vang hrim hrima Army nihna bansan pawh an kat nawk tho bawk a. In leh lo pan tur pawh nei tawh lo,an camp te pawh mahni in ang maia lo neih tawhte zingah chuan an nundan pangngaia nun zel thlang ta zawkte pawh an awm ve tho bawk a ni.

 

New Mexico ramchhung khawthlang lam epa Ranch lian tak neitupa Jonathana pawh chu kha indonaah khan Captain hial a kai ve hman a. Ralrel a thiamna leh a huaisenna te avang chuan hotu lian te hriat leh duhsak pawh a hlawh ngiang mai. Indo a lo tawp a,duh a piang tan sipai nihna chu chhuahsan theih anih thu chhuah alo nih tak ah chuan a ma command-na hnuaia lo awm thinte chu kalsanin a ram ngainat ber New Mexico ram chhungah hian rawn lutin bul a in tan ve ta a. Hun reilote mah ni se tunah chuan Rancher lian tak ani hman tawh a ni.

 

Jonathana pa fek tak,dikna ngaina leh mi taima tak anih avangin a thenawm vela ram nei ve te pawh chuan an ngaina tlang hle hlawm a. Kum alo vei chuan nupui hmeltha leh fel fahran mai a nei ta a. A nupui Lori Lemamaris-i chuan fanu duhawm tak mai a hring a. Mahse, vanduaithlak takin Lori Lemamarisi chuan a fanu duhawm tak pawh chawi tlei hman lovin a boral ta hlauh mai a.

 

Jonathana chu pa tuarchhel leh huaisen tak zawng alo ni meuh mai thin a,mahse,tuna a nupui han boral ta zet hi erawh chu a tuar zam mai mai thei bik thlawt lo a ni. A hun tam ber chu a nupui an phumna hmunah chuan a hmang a,a fanu a hruai chang phei hi chuan a lungchhiat a zual tak meuh meuh thin a ni. Lemamarisi nena an fanu hrin ngeiin a nu thlan chunga thing kawkalh an phun a han khalh neuh neuh mai te chuan a lungchhiat a belhchhah zual sauh thin a, a tuar thiam mawlh lo a ni.

 

"Lori, i fanu hi han thlir ve teh, i tel lo chuan engtinnge ka enkawl anga, ka chawi tlei tak ang le.? I boral hi a la hunlo tak zet asin Lori, Nang vang hian ka hringnun kawng zawh dan tur pawh ka hloh zo hial tawh a ni..!! . Mahse,nang nena kan fanu hi ka thiam ang tawkin ka lo enkawl anga, nangmah ang maia hmeltha leh ngilnei lo ni ve in min enkawltu ber ala ni ve ang tih ka ring tlat ani," ti in lungchhe em em hian a tap zawih zawih mai thin a.

 

A hriselnate chu a lo tlahniamin a hmel pawh hmu theih khawpin a tla chhe rawih tawh a. J.L cowboy leh Ranch in a an chhiahhlawhte pawh chuan an pu ber awmdan chu an hrethiam em em a,an pi ngilnei leh hmeltha tawp thang boral ta ai mah chuan an pu an lainatna chu a nasa fe ni pawhin a lang. Han hnem ngaihna vak hre si lovin an pu awmna pindan apiang chu lainatna mit nen an thlir zui vawng vawng zel ringawt mai a ni.

 

Hun leh nite chuan nghah nei hauh lovin a kal ngai chuan a kal zel a. Lori Lemamarisi thih atanga kum tam alo liam meuh chuan Jonathana pawh chuan ngai rawn awh chho ve leh tawhin Ranch enkawlah chuan a naute ho nen chuan an buai thei hle thin a. A fanu, a nu in a boral san tak, a nupui leh ama hming chawi kawpa a sak Lori Jonathan-i pawh chu Arizona ah a farnu hnena lehkha zira a dah chu a ngai thei hle thin a. "Tunah te hian engnge a tih ve tak ang aw..? ti te in a ngaihtuah neuh neuh thin a.

 

Nikhat chu Jonathana Ranch in bathlara muk taka a in ngaihtuah vang vang laiin Ranch in lam pana Sakawr chungchuang pakhat rawn tlan khu phei ram ram chu a hmu ta a. Hla tak atangin la ni mah se a nau te ho zing ami a ni tih ava hre thei a.

 

'Eng thu tak chu rawn hawn ni maw.? tih rilru pu chunga ngaihtuah nauh nauh pahin Ranch in tual zawlah chuan alo chhuk thla a, kar lohvah sakawr chung chuang pawh lo thleng ve chawp chilhin rilru helhkham nei teuh tih hriat tak hian a pu lam chu a rawn panphei thlawk thlawk a. " Chanchin lawmawm loh tak sawi tur hmel i va pu ve,Fredy.? ti chungin Jonathana chuan a lo zawt vat a.

 

Ani pawh chuan sawi hreh em em,mahse,sawi loh theih loh thil anih avanga harsa ti tak hian Fredy-a chuan a heh a pet fan fan a, lei lam melh reng chung chuan, " Kan chunga thil thleng ngai hauh lo, vanduaina in min tuam ve dawn ta a ang hle." a ti chuai raih a. Chuveleh, Jonathana chuan phawk fe hian, "Engnge ni i sawi awmzia chu, Eng vanduaina dangdai takin nge min tlak buak dawn ta ngai le.?" a lo ti thuai a. Fredy-a chuan, "Chhak lam Miner ho ram ep, daidanna pal chhia vel kha thawm tha in Bat-a nen kan fehchhuak a, hnathawh bul kan tan fel awrh tihah chuan bawngrual thi tur bu ruah ruah thawm kan hre ta tlat thut mai a. Chuveleh chu lai hmun pan kan kal nghal vata, kan bawng rual zawng hmun thuma then hmun khat ngawt tur chu luikamah thi in kan va hmu ta mai a ni...." a han ti ta a.

 

Jonathana chuan a ngaihna reng a hre lo mai a,ka hau hian Fredya thil sawi lai chu ngawi rengin alo thlir dauh dauh ringawt a. A hmel ah chuan mumang lam ram atanga rawn harh chhuak hlawl hi a ang ber a. Fredy-a chuan a han sawi chhunzawm zel a, "Kha kan ram chhunga Canel Plane lui rawn luang lut kha i hria anga, khawchhak lam ram atanga rawn in khawh thla anih nghe nghe kha. Lui bulah khan ania kan bawng rual ruang pawh chu kan va hmub ni! A ngaihna reng reng kan hre lo dun hle mai a, mahse, thil awmzia kan han hriatfiah chuan a lawmawm kher asin. Kha lui hnar lam atanga kha tuten emaw tur an rawn chah/ phul ni ngei tur a ni, lui tui chu a hring deuh nguk vek a, a rim paeh a tui lo kher mai bawk. Chu zawng chu tuna kan hriat theih chin chu a ni. Kha lui tui zawng zawng mai kha bawng chu sawi loh mihring leh ramsa pawhin in sela thihpui ngei chi pawh anih pawh ka ringhlel lo. Bat-a pawhin Foreman leh kan thian dangte ava pun mek a, keiin i hnen ka rawn thlen ve thung a ni..?" a han ti halh halh a...

 

Uluk taka lo ngaithla rengtu Jonathana hmelah chuan mak tihna leh thinrimna chu a inpawlh nawk mai a. Mahse, mi rilru nghet cherh chawrh ani in chi ai ve mai mai ani lo bawk a, dam dap leh fiah tak si hian, "Chu zawng buaina tenau lo tak kan hmachhawn ve dawn tihna anih chu," a ti mai a.

 

Chutah Ranch in chhungah chuan a lut chho thuai a, a rawn chhuah leh meuh chuan Rancher ngilnei leh zaidam, kut hnathawh ngaina tak anihna hmel kha chu hmuh tur reng a awm ta lo. A khel tawn tawnah chuan Army Colt, rei tak alo dah that vang vang tawh, hlui lampang, mahse, la tha tak si chu a rawn pai chhuak ta tah mai thung a. Tunah zet chuan Rancher zaidam leh ngilnei tak ni thin kha ni tawh lovin indo hunlaia hmar lam sipaite chhuan tawlawl, Captain Jonathana ngei mai kha a rawn ni leh ta a ni.

 

Fredy-a ngei pawh chuan a pu hmel leh a in thuam dan vel chu mak a ti ve hle a. A hriat phak chinah Jonathana pistol pai a hmuh vawikhatna pawh ani hial nghe nghe a ni. A hmelah chuan thinrimna emaw lungngaihna emaw engmah lang chhuak lo mah se a rilru tur awm ang chu suangtuah thiam ve mai in a in hria a ni.

 

Ngawi rengin a chuanna tur sakawr jean phah sa diamah chuan Jonathana chu a lawn kai a, " Ka inpeih ta e, Fredy." tih leh a sakawr khen kal chu a rual ta a. Khawchhak miner ram dep lam pan chuan an tlan dun ta par par a.

 

An va thlen chuan midang an naute ho pawh chu an lo awm kim vek tawh a. Thinrim eng phiar hian JL Ranch foreman chu alo ang bawrh bawrh a. An chunga thil thleng avangin Foreman Jim-a chu a thinrim a puak keh lo chauh ni hialin a lang.

 

An pu ber a rawn thlen ve takah chuan hahdam ta deuh huaia in hria in a han thaw halh a, " Pu Jonathan, he thilah hian suangtuahna pawnlang ber pawhin a mawhphurtu reng ka phuh chhuak thei lo hi chu pawi ka ti hle mai," a han ti chhuak hlawl a.

 

A foreman in thiam lo rilru tur awm chu hriatthiam pui takin Jonathana chuan, " Kei ngei pawhin ka hre hauh bik lo mai. Amaherawhchu, hriatchhuah ngei erawh zawng ka tum bulpui ber tur a ni. Chuti rual rual chuan eng nge an tum, eng vanga hetianga thil rawn ti mai nge annih pawh kan hre chhuak tur a ni." a rawn ti charh charh a. A hmel leh a in thuam dan a thlak atang ringawt pawh chuan a ti mai mai lo hle ani tih chu a chiang hle a ni. 

 

Amah Jonathana vek chuan, "Nangni Ted-a leh Rollen, Snap-a nen in pathumin kan bawngrual danf zawng zawng chu an thih ve hma in khalh khawm vek ula, Ranch in tual zawl khalh lut ula, uluk takin lo veng ang che u. Tichuan, Midang zawngin he thil hi finfiah kan han tum ang e," ti in thil tihdan tur vel chu a han ruahman zung zung a.

 

Chung mi pathumte chuan an pu thu chu i he lovin an zawm nghal vek a, bawngrual la dam zawngte khalh khawm tur chuan an kal ta nghal a. Jonathana leh a hote dang zawng pawh chuan Canel Panel lui chu a hnar lam panin an zawh chho nghal bawk a.

 

Canel Panel luikama bawng rual lo let phung mai te chu hmuh hrehawm an ti hlawm kher mai. Tumah reng chuan tawng zai pawh an rel hauh lova, lui tui chunga thil hring nghulh mai leh tle nuar nuar chuan rim a nei tak bawk a, an ner leh nang nang thin a. Jonathana chuan a thinrimna chu dah bovin theih ang tawka ngaihtuahna fim hman hram hram a tum a. Thinrimna chuan khua a hmu lova, a thil thlen pawh a duhawm lo ani tih pawh a hrechiang hle a ni.

Chu lui chu thui tak an zawh hnu chuan Miner ram pawh chu an lo lut ta hial a. Jonathana remruatna angin an in thendarh ta a, Foreman Jim-a ho lui kam lehlamah hnu hma enin lui chu an zawh a,a kam leh lamah Jonathana leh midangte chu an kal thung a. Tichuan a kam tawn tawn atangin lui chu an zawh chho ta zel a.