Bung-14

 Kid Rodelo by Louis L'Amour

BUNG SAWMPALINA

Rodelo-a chuan an dinhmun leh chhehvel chu a han chian zung zung a. Sakawr pahnih chauh a lo awm tawh a. Rangkachak phur mektu a sakawr Grulla leh a dang pakhat chauh chu. Badger-a chu a lo inhliam hlek a, thisen pawh a chhuak nual a. A hmel chu a chauvin a dang hle a.

"Thil awmdan a ziawm lai hian heta ṭanga kan chhuah vat hi a ṭha zawk ang," Harbin-a en rân chung chuan Dan-a chuan a han ti a.

Harbin-a pawh chuan a lo thlir ve reng a. A mithmul buk tak hnuai aṭang chuan a lo melh kuau a. "Ti khan, I rawn paltlang chu a nia maw? Ka pek mai che hi a ngaih hmel riau mai, Danny. I lo turu hi le."

"Nia, ka rawn paltlang chu a nia lawm, ka hlawhtling zel dawn bawk" Rodelo-a chuan a lo ti a.

Harbin-a chuan a lo ṭhenkhum sak a. Mahse, lawm avanga ṭhen erawh chu a ni lo. Grulla kaihna hrui chu chelhin kal mai a han tum a.

"Ngawi rih teh," Rodelo-a chuan a lo ti a. "Tui hi in phawt ula a tha ang."

Badger-a chuan tuihal tih hriat takin Tuithawl chu a han ban a, a in ta khawlh khawlh a. Harbin-a erawh chu a la insum deuh a. Rodelo-a chuan a ngaihtuah awm ang chu a lo hre thei mai a. Tûr te pawh a telh a hlau a ni mahna.

Engemaw chen hnuah chuan Harbin-a pawh chuan a han in ve ta a, Nora-i pawh chuan tuithawl pakhat ami chu a lo in ve mek a. 

An che chhuak leh ta a. Kalkawng erawh a nuam fahran lo a hle mai, an tlu pah ang nawk nawk a. Dan Rodelo-a chuan hnung dawlin, zawi muangin an kal zel a. Vaivut rawng var deuh hi phaizawl aṭang chuan a rawn vum chhuak a. Chutiang ‘Dust Devils’ an tih mai chu thui fe a inchap phei a. Ni tla mek zungzamah chuan van boruak rawng chu a  sen khuih mai a. An kal phei hnawlh hnawlh zel a. An ke inhnuk ri leh a changa sakawr te leh anmahni thaw ri huam huam bak lo chu thawm dang pawh hriat tur a awm rih lo. An hma a leilung inpharh chu a zawl durh a, creosote leh cacti hnim to karah chuan kawngtum a thlur deuh nuai a. An sakawr kaih te chuan chawlh rih an duh tih hriat takin an tang deuh ṭung ṭung ṭhin a. Indians ho hmel awm pawh an awm lem lova.

Indians ho pawhin an insaseng zel a ni tih chu an hai bik lova. An tawpna tur pawh an hrechiang hle. Anni chuan an nghak thei a. Chung mingo ho chuan kalna tur hmun dang vak an nei lo tih pawh an hai lo. An beiseiloh taka Rodelo-a rawn lang ve thut khan an ruahmanna chu engemaw chhung atan ti sukuk rih a ni mai a. An lo tum hma deuh a, mingo pa silaimu kha fak mai chu an tem phah ta nual a. Tunah erawh an han nghak leh deuh anga, zawi raihin an rawn che tawh ang.  

Chung lamah chuan thil thleng tur lo nghak ve ni awm takin mulukawlhte chu an thlawk kual luap luap a.

A tawpah chuan ni pawh khawthlang lama Gulf piah lam tlang dung phenah chuan a tla fel ta a. Pinacate tlang dung vel chu a zungzam chambang chuan rangkachak rawng in a chhun eng phut mai a. Ṭiaudüp hmun tawp lampang pawh thimin a tuam ṭan ta a. An hnunglamah chuan tawpin tai awm lovin a inpharh duai a. tuifinriat kam an va thlen chuan lawng lah chu a lo awm reng reng lova.

Tuipui dumpawl phut mai chu an thlir reng ta ringawt a. An chauhna leh beidawnna a vang chuan tumah pawhin tawng zai an rel lo. An hma zawn tuipui chu a ruak huai a, tlawm zawr hmel tawkin an ding ngawi nghiai ta ringawt mai a.

Lawng chu an tum ram thlenna tur ber a ni a, chu chuan a lo hruai ang a, an duhna hmunah a kalpui zel tur hi a ni a. A lo thlen tak si loh chuan, khawiah nge an chawlh tak ang? Enge an eiin an in tak ang? Chaw leh tui lah an mamawh ropui tawh mai si a?

 Lawng chu a kal liam tawh nge, a la rawn kal miah lo le aw?

"Lawngkai dang a la awm asin" tiin Nora-i chuan a hnulawkah chuan a rawn sawi zauh a. "Heta ṭanga kan dinglam, chhimlamah sawn."

"Engtia hla nge?"

"Ka hrelo le, mel nga emaw mel sawm vel lai pawh a ni maithei."

Mel sawm a! Tuna an dinhmun angah chuan an ban zo lo tawp ang le.

Grulla chuan a hlinna hrui chu a paw tut ut a, Harbin-a chuan ngaihtuah mang hlei lovin a chelhna chu a han thlah teh ngawt a. Hrui hnuk duah duah chung chuan chu ramsa chu zawlah chuan a kal phei nul nul a, hmun sang deuh, tuifawn rawn invawrch chhuah thinna laiah chuan a ding chut a, an hmuh phak loh chiahah chuan a lu chu a kun hniam pil ta vung vung a.

"Tui," Badger-a chuan a lo ti vut a. "Tuikhur a hmuchhuak a ni."

Chu ramsa chu zuiin, dil tui tling bulah chuan an ding khawm ta a. Tui chu a pangngai aiin a al deuh nain, a hnawnna avang chuan an in thei mai a.

"Meikhu hi thawn chhuak tawh mai ila," tiin Harbin-a chuan a han rawt deh a.

"Indian ho emaw bãkin an hmu lovang."

"A nih leh engtin nge kan awm zel dawn?"

"Kan kal zel ang," Rodelo-a chuan a lo ti a. "Duh thlan tur dang kan nei lo, zanin la la pawh hian kan kal char char ang."

An bungraw phurh vel chu a han en a. Nei tura a beih tang tang, rangkachak pawh a lo la awm a. Tanin a luh phah hialna, kum khat lai hrehawm a lo tawrh phahna rangkachak chu. Amah leh a mah chu in hrilhin, a neitute hnenah a pe kir leh ngei dawn a ni. 

Mahse, heng pa pahnihte hi engtinge niang? An ru chhuak a, hei leh chen hi la bo turin an bei chu a ni si a. A thil tum chu engti kawng zawngin nge a hrilh hriat tak ang le?

A hun chu a hnai ta hle mai. A tawng chhuah rualin silai hmetpuak turin a inrin nghal a tul dawn bawk a. He rangkachak avang hian Joe Harbin-a hi a kal thui lutuk tawh. Tom Badger-a pawhin mahni ngaihdan te chu a lo nei ve ngei turah a ngai sa a. Gopher khawngaihthlaka lah chu hemi avang hian a tir lamah khan a lo boral tawh bawk si.

"Tanhmun siamna tur I lai teh ang u," Badger-a chuan a han ti a. "Khang Injuns ho kha an lo kir leh dawn a nia."

"Inbiakna I neihpui thei mai lawm ni? I mi leh sate an ni si a."

Tom Badger-a chuan Harbin-a chu a han en a. "I mawl a mi? Cherokee zinga pakhat ka ni a, Cherokee ho chu khawchhak lam mi an ni a. Sawrkar nen pawh an inrem tawh. Heng Yaquis ho nen hian kan la inhre ngai lo reng reng. A enga pawh chu nise, Injuns ho chu anmahni leh anmahni pawh indo reng an nia. An nuam tih zawng ber a ni tlat a ni. I luvun lak an duh ang bawkin ka chungah pawh an ti ve nghal ang.."

Thil kâwrchhia ilo vel hmang chuan an theih ang angin lei laihkhuar ṭanhmun (Trench) chu an siam ta a. Ṭiauvut te chu tiang pawngin, phen tur bang te an siam a. A tawk zo lo hle nain, engemaw ti tal chuan kori a tu mahna.

Badger-a chuan Rodelo-a chu thlek zawk pahin. "An inkhuar na lai awm ang tur hi I hria ang chu maw?"

"Hmar lamah.. Tui awmna ka hriat chhun a nia. Heta ṭanga hmar lamah hian tui thianghlim awmna luite pahnih thum vel a awm a lawm."

"Anih leh Lawng châmbân theihna tur lawngkai dang hi a la awm reng reng em?"

"An rawn kal a, an la let lo a nih chuan, tuna kan pan mek hi an awmna hmun tur a ni."

Joe Harbin-a chuan tui al deuh lup chu a han in a. Dan Rodelo-a chu a han zirchiang nuap nuap a. "Ka hrethiam thei lo che a ni," a han ti a. "Engmah lo atan kawng thui tak chu I rawn zawh ve zel chu a ni si a."

Rodelo-a chuan a lo en let a. Engmah chu a sawi lem hlei lova. Mahse, inkhuainuaina chu athleng tep a ni tih a chhungril tak chuan hre thei a. 

"Kan sem ve maithei che a ni tih hi I ngaihdan a ni tiraw? A then a zar lak ve I duh a ni tiraw?"

Rodelo-a chu a han nui a. "A zavaiin ka duh, Joe. Pakhat te pawh bang lovin."

Harbin-a chu a lo chek hluk a. "Ekhai,  I va rinawm angreng ve tiin sawi ta ila."

"Chutiang chiah chu mawle, Joe,  ka rinawm a lawm."

An en ta thap mai le! "Chu chu eng I tihna nge?" Badger-a chuan a han ti a.

"Joe Harbin-a bula sakawr chungchuanga ka lo awmve vang ringawt khan Taninah ka tan hrep phah a. Kawng lakah khan kan inhmu palh ve mai kha a ni a. Thil laihchhuahna ah khan ka thawk ve a ni mai a. An dah thuhrukna pawh ka hre hek lo. Rangkachak kha kawng lakah a thang mek tih kha ka hria a ni ringawt a. Mahse, Roreltute ho chuan chu chu thil thleng palh ringawt a nih an ring silo a nih kha.."

"Tichuan, I âwk buai ta a ni maw," Joe-a chuan a lo ti a. "A tha a lawm. Engtin nge I tih zel dawn?"

"Rangkachak hi an hnenah ka hawn kir leh dawn, Joe. An hmai hmaah ngei ka vawrh darh ur ur ang a, keini thian pahnihte kha eng ang chiah nge kan nih ka entir ang. Tichuan ka kalbo nghal ang."

An en ta tlawk tlawk a. Tuman ṭawng zai reng an rêllo. Nora Paxton-i chuan a lungphu lo su ta dup dup chu a hre thei a. Thâwk leh khatah Harbin-a chuan, "Min thah a, rangkachak chu lak I tum em ni?"

"Ni love. Indian ho emaw he thlaler hrehawmna emaw hi tukdaih tir cheu ka tum a ni. A hlawhchham tak si ah chuan tumah intina lova rangkachak chu ka lak theih nan ruahmanna ka siam ta a ni."

"Mi tha tak mai a lo awm reng a nih hi" Harbin-a chuan tiel fein a han ti a. "Min tina miah lovin rangkachak chu a la dawn chu a niah! A mawl pawh hi I mawl zozai e a! Chutiang thawnthu ngaihnawm te chu tunge lei duh ang le?"

"Ka duh maithei," Badger-a chuan a lo ti a. "Thawk khat lai khan ka lo ti tawh nghe nghe a sin."

"Tihian ka han hrilh teh ang che u," Rodelo-a chuan rawtna angreng deuhin a han ti a. "Dollar sangkhat ve ve pe ta che u ila?  Chu chu in zawn chhuah leh na lawmman tur ti te pawhin a sawi theih ang chu."

"I thilphal hle mai, a ni lawm ni?" Harbin-a chuan ner nûngin a lo ti a. "Kan rangkachak zawng zawng nen I kal bo ang a, keini chu dollar sang tlemte insem turin min kalsan ang a ! Rilru chu I nei reuh mang e, naupangte, mahse, I buai lohna turah I buai tlat. Pawisa khel mi emaw mi satliah mai mai lo ni la a tha zawk tur."

Nora-i lam chu a han hawi phei a. "Hetiang thil hi I hre tawh ngai em?"

"A ṭhen a zar chu hre tawh e. Thudik a sawi ka ring. Pek kir leh hi a tum ngei ka ring."

Harbin-a chu a sakawr zin ipte nen ṭiaupho ah chuan a ṭhu a. A kut chuan a ban sa reng tawh nghe nghe a. "Hei hi I theihnghilh  a ni, Rodelo. Cent khat pawh hi i kutah a lut dawn lo."

"Coffee te hi in phawt ila?" tiin Nora-i chuan a lo rawt a. "Inkah lam chu kan la ti dawn chauh a lawm. Khawiah nge kan awm tih hi an hrechiang em."

Tumah chuan an ngaihven lo. Harbin-a chuan Rodelo-a chu a en ran mai a. Rodelo-a pawh chuan  a inralring hle a ni tih a hre mai a. 

"Engtinge ni zel dawn, Naupang? Min tum chin dawn em ni? Tunah hian chêt nghal mai chu I duh em?"

Dan Rodelo-a chu a lo nui tawi tak a. A hmui te chu a rep khi tuar a, a hmai te chu vaivutin a khawn uaih avangin nuih ringawt pawh chu harsa tak a ni. Mahse, a duh chu a ti tlang ta tho a. "Tunah chuan la ni love, Joe. Sawng Indian ho beihpui atan sawn ka la mamawh rih che alawm. Nang pawhin chutiang chiah chuan min mamawh dawn bawk a ni. "

"Heta tanga kan chhuah vat hi a ngai a ni," Badger-a chuan a lo ti a. "Coffee in pawh chu a tihchi viau ka ring.  Mei chhem ila, Coffee te chu in ila, chumi zawhah mei kan vur belh leh hluah anga, kan  che chhuak leh dawn nia u. Tui chim chinah hian kal ila, tuifawn hian kan hnuhma pawh a chawk reh zel mai ang. Lawngkai (Bay) dang kan hriat lam chu I pan zel ang u."

An ṭiauvut chhun pâwn chuan a hliah ṭha viau nain, mei eng chu an tawlh hlat san dial a. Nora-i chuan Coffee chu a han siam a, zawimuangin an in ta hlawm a, far khat te tein anin hnangfak a. Chaw ei tur chu an mamawh ngang hlawm tawh nain, an tuihalna chuan an chaw chakna pawh a ngaihtuah tir hlei thei lova. Tun dinhmuna an tlakchham chu tuiril lam chi awm thei ang ang a ni mah zawk a. Coffee chuan a tiharh deuh sawng sawng a. An chêt chhuah leh hun a thlen meuh chuan fimkhur theih tawpin an kal a. Tom-a chu kal hmasa berin sakawr chu a kai a. Tui chim chin an thlen thlak chuan a mal tete a in zuiin tui chim chin hrul zelah chuan an kal a.

Indian ho chu thim tham aṭang chuan an lo lang ta thut mai. Silai chu a puak de zawr a, sakawr pakhat chu a thal nghal tawp a. Chutah Rodelo-a chuan chulam hawi chuan a silai chu a han vilik phei a. A hmetpuak de nghal zawr a. Chumi pah chuan a sir lamah chuan a zuang phei a, a ke pahnih a ding chat pahin a han hmet puak de leh zawr a. Chutah leiah chuan tlu thlain a lum phei tawp tawp a. Sakawr ruang let reng phenah chuan a han lum lut a. Rawn dah chhuah pahin rang takin a han kap leh zawt zawt a. Ama rifle chu a kap ruak ta, Indian pa rifle chu chuh lehin a han kap leh thuai thuai a. A kah zawh leh takah chuan ama rifle ah chuan dam dapin a mu chu a han load leh zung zung a

A reh ta duak a. Tuemawni hi a sirah chuan a awm a. A rawn ṭawng chhuah chuan Tom Badger-a a lo ni a.

"Khatiang ringawt kha em ni Rangkachak I rawn umzui nachhan chu?"

"Thudik ka sawi a ni, Tom." a han ti a, a ngawi hlek a, a rawn chhunzawm leh a, "Engmah neih hi ka nei lem lova. Sawtah khan ka hmunhma buatsaihna atan hna kha ka thawk ve mek a ni a, chutah, thil a thuhruk hnu khan  Joe-a nen kan intawng fuh palh ta a ni."

"A khirh chingchivet hle mai maw," Badger-a chuan a lo ti a.

An han nghak leh deuh hlek a. Chutah, Bader-a chuan, "Tuemaw tal kan kah fuh I ring em ?" a han ti a.

"Uh-huh.. pakhat emaw pahnih vel a ni maithei."

Engemaw chen a ngawih vang vang hnu chuan, "Hetiang thim zingah chuan engmah a hriat theih tawh silova" a han ti leh a., "

Silaimu pakhat chu ka dawng ve tlat mai. Ka paltlang ve thei dawn ta lo a nih hi."

 "I a lutuk, midangin an paltlang theih chuan, I thei ve ngei ang."

Khawchhak lam yard za leh tlem velah chuan Indian ho chu an awm khawm leh laih a. Yuma John-a chuan a ning deuh tawh a. "A tawk ta viauin ka hria," a han ti a. "Ka duh tawh lo. Thi an tam mah mah tawh."

"Mipa dik tak an nia lawmmaw le," Hat-a chuan a lo ti a.

"Keini pawh mipa diktak kan ni ve tho a lawm," tiin Yuma John-a chuan a lo chhang a. "Hun dang nghah leh phawt a that ka ring."

"Ni love," Hat-a chuan a lo ti a. "Heng ho hi kan chimih vek law law ang chu."

"Ka kal dawn," Yuma chuan a ti ta deuh tlat a. "Tunge min rawn zui dawn che u ?"

Indians zinga pahnih chuan an zui ta a. An kal tak hnu chuan Hat-a chuan midangte chu a han en a, pali chuan an lo la awmpui a. A tha e. semdarh tur a tlem deuh dawn a ni mai a, mahse an hawn hunah chuan an ritsak ta deuh dawn a ni. A lo hlawhtling fo tawh thin a. Heng tlangvalte hian chu a vanneihna chu umin an lo chetpui tawh thin. Tunah erawh, an vanneihna chu a bo tan mek te pawh a ni ta ve ang.

Hat-a chuan Tuipui kamah chuan a hruai kir leh ta hlawm a. Chutah chuan sakawr ruang leh hnuhma tlem hi a lo awm a. An mi hualte chu an lo kalbo tawh a. Hat-a chuan hma hruaiin, an zui ve ta zel a.

An lo lambunna chu hlawhthling viau tur hi a ni a. An hmaah lo tlak khalhin mingo ho lo kal chu an lo chang a. Tui chim china an lo kal thawm chu hriain an lo che ta kha a ni a. Mahse, thimthamah chuan thil an lo chhutsual ve hlek a ni. A hote engemaw zat chuan sakawr chu an kap vak teh ngawt a. An rawn kah let na lamah pakhat chu an that leh ta nghal. 

"En teh u," An zinga Yaqui la tlangvl tak pakhat chuan a ti ta hlut a. 

Tiauvutah chuan thim bik deuh lai hi a lo awm a. ...thisen a ni. Hat-a chu a han dak chhuak a, a hote chu a han enkual a. An mi umte zinga pakhat chu a inhliam a, a na hle maithei bawk.

Tuipui kam hrulah chuan mel chanve pawh an la kal lovang tihah chuan Tom Badger-a hnufual hret hret leh Grulla vuana a in ham ding hram hram chu Joe Harbin-a chuan a han hmu vat a.

"Tom, Engthil nge ni ta?"

"Pakhat in min fuh ve a lawm maw le."

Harbin-a chu a ngawi ta vang vang a. "A va zialo e aw ?"

"Min mantir suh aw, Joe. Ka luman an tel mai hi chu ka duh bik lo a nia."

"An ti lovang."

"Ka sawi awmzia chu….."

Dan Rodelo-a chu a hnufualin a rawn chhawm ta a.  Hmun pakhat ‘Sea Lion Bluff’ an tih hmun chu an thleng phei a. "Hetah hian I ding rih ang u," a han ti a. "A hmun hi a sang deuhva, lawngkai pawh kan hmu thei ang. Signal kan thawn chhuak thei ang. Mei chhemin emaw, thil dang pawhin."

"Injuns ho kha, min rawn zui ve zel sia" Tom-a chuan a han ti a

"Kan lo dahtha hmak hmak anga ni mai a law, helai hmun aia rem tankhawhna tur dang kan hum tawh lovang " Joe Harbin-a chuan a lo ti a.

Vaukam tluan chuan lunglian deuh deuh a awm rum a. chulai kham suarchhe hmun (Bluff) lai chu Sea Lion (Tuipuia eizawng chi ramsa chi khat sakeibaknei hmel ang deuh, pangparh angreng nei si) ho fuan khawmna a nih avangin, a hming pawh vuah a ni a. Chung lungpui leh phul deuhreuh phenah aṭang dak chhuak chuan an lo chang ta a. 

Tuifawn ri chu a ri sung sung a, Tide (Tuifinriat fawn dan chi khat, hunbi neia sang leh hniam thin) chu a hniam lai hun a ni a. An awmna a tanga hla vak lovah chuan phun ri leh chevel hi an hmu a. Nora-i pawh Rodelo-a bulah chuan tan a siam ve a. 

Phun sep sep hian. "Enge kan tih tak ang ?"

"Nghah a ni mai," a lo ti a.

"Tom?" tia ko tu chu Harbin-a a lo ni a.. "Khawi laiah nge an fuh che a?"

"Ka pumah hian."

Harbin-a chu a phun bul bul a.

Nora-I chu a lo tawng ta thut a. "Dan, tuipui a saw êng a awm a nia!"

Chutah, an vai mai chuan an hmu ve ta ṭheuh va. A chiang tawk viau mai. Lawng chuan thirchakai thlakin, tuifawn zawng chuan an eng chhit chu a fawn dulh dulh a.

"Kan thleng ta," Tom-a chuan a han ti a. "Saw saw Ichacher-a lawng chu a ni ngei ang le."

Minute tinin hun a ral zel a, Sea Lion ho chau rau taka an chevel chu an hmu thei reng a. Thil dang hmuh erawh an nei lem lo. Chulai suarchhe hmun thim leh lungpui kar vel chu anni ang pawl tlemte tan chuan bihrukna hmun duhthusam a ni a. Chevel thawm engpawh awm se Sea Lion ho chu a thawng dawrh hmasa ngei dawn a ni. 

Rodelo-a chuan a Winchester rifle ken chu a lo thlak tawh a. Tunah chuan a mu thun khah tannin Rifle pakhat chauh a nei tawh a. A dang kha chu a chhiat deuh avangin tuipui kamah khan a kalsan ta kha a ni a. Silaimu a la neih zat endikin a kutzungtang chuan a kawnghren chu a han dap a. Silaimu sawmsarih lai mai, a rifle leh a puakruka pai laia hman theih ve ve, .44  chi vek an ni a. 

Indian rawn kal ho an hmuh theih hma chuan tiauphoah chuan phun ri an hanhria a. Thim zingah chuan chevel hmel an han hmu a. Tiauphoah chuan hlim chiang vaklovin a lang a, engmah chu a hmuhchian theih loh a.

Nora-i chuan zawite in thil a rawn sawi leh vat a, "Joe ... ti suh ! Lawng pawh sawtah sawn a awm reng tawh a. Inbeihna awm lovin naktuk zingah lawngah chuan kan chuang thei mai ang."

A lu a lo thin san a. "Tunah chuan nilove...hun remchang tha dang kan nei tawh lovang." Tih pahin a Rifle chu a han lek kang a, Tiaudup vawta bawk reng Tom badger-a pawh chuan a tih ang chiah chuan a lo ti ve nghal a. Lungpui phena tawm mek Rodelo-a pawh chuan a silai chu a lo lek rem nasa tawh mai a.

Engemaw chevel mai mai pawh a ni mahna. Silai ngul tle te pawh a ni thei bawk a. Mahse, Hat-a chuan inralrinna thupek vin thak mai chu a rawn chhuah ta ṭhawt mai a. Chumi rual deuh thaw chuan Joe-a Rifle chu a puak dur a, Badger-a leh Rodelo-a ṭanhmun aṭang pawhin silaipuak thawm chuan a rawn zui nghak tuk tuk a. A ri chu a thangkhawk rawih rawih a.

Pa pakhat hi a han ṭe ṭhawt a. Sakawr chu a tlu a, thawri hrawk hrawk hian a zui a. An rawn chhânletna silai puak ripawh an hre zui ta nghal a. Chung pa pathumte bawhna lam hawi chuan silai chu a puak eng phei zuai zuai a. Indian ho silai puak eng zuai zuai leh an chevel chiang lo tak avang chuan tum mumal pawh nei hleithei lovin an kap pawp pawp a. Mi pathum chu leiah an thal ta der a. An hlim chu thim thamah chuan a inzawm put hian a hriat a.  

Thawklehkhatah silai puak ri chu a reh duak a. Sakawr tlan thawm a lo awm a. Thawmri a reh fel tawh ang tihah chuan Joe a chuan vawikhat chu a han hmet puak leh hram a. A reh vawng vawng ta mai le…..

Thli in a chhem zawnga tui in hlap ri chauh chu an hriat theih a ni ta. An chung lam van thimruih ah chuan arsi te chu an de neuh neuh a.

"Enge kan tih tak ang?" tiin Nora-i chuan a lo zawt a.

"Kan nghak ang," Joe Harbin-a chuan a lo ti bul hmuk a.

 Tiaupho ah chuan chau zeta rum ri hi leh thaw hulh hulh ri a lo awm a.... "Joe?" Tom Badger-a aw chu a chau kher mai. "Joe, kha naupang kha rangkachak chu pe mai rawh. Hawn kir tir leh teh ang. Kan khawsak dan en hian a inman tawh hrep love."

"Tehreng mai," Harbin-a chuan a lo ti sam et a. "Lungngai reng reng suh, I ngaihdan ang chiah kha ka rilru a ni."

Khawvar tur engah chuan Litengsawl tui chu thir phek ang mai hian a mam zur mai a. Hla takah chuan puanzar ngul pahnih nei dum deuh hi a lang nual nual a. A ngul pahnihte chuan van lm a kawk vu mai a.

Tiauphoah chuan Indian ruang pali lai chu a let kawisawi nuai a. Hat-a erawh chu a awm lova. 

Dan Rodelo-a chu muangchangin a rawn dingchhuak a. Chulai hmun hnawng leh vawta tanhmun a siamna lamah a tihrawlte chu a rawl thum a. A Rifle chu lain, a ngul a dai tla te chu a han hrufai a.

"Signal atan mei kan chhem a ṭha ang," tiin Nora-i chuan a lo rawt a "Kan tellovin an chhuak takngial dawn tlat."

Thingte chu an fawmkhawm a. Tom-a chu che lovin a lo la bawk reng a. "Enge a an?" tiin Rodelo-a chuan a han zawt a.

"A kal ta. I hriat ve reng kha  — a chah thlak  hun lai vel awm kha chu."

Joe Harbin-a chuan Badger-a chu ah han thlir chhuk vang vang a. "Pa ṭha tak a ni, thurualpui tlak tak. A tello chuan kum khat pawh kha ka paltlang thei awm si lova. Thuhnu dawn lo taka rik deuh rup rup ka duh ṭhin lai pawh khan, min lo bengdai ṭhin a nih kha.."

Rodelo-a chu a han thlêk leh a. "Min hmu ngun ta viauva, ka thinchhiat zia pawh I hriat kha." tih pah chuan mei chhemna tur thing chu a tuahkhawm a, a fawhkai atan a kawr hmawr chu a han pawthler a. "Nawalh I nei mial lo maw ?"

Dan-a chuan a kawr ipte chu a han dap a, chutih lai chiah chuan  Joe Harbin-a chuan a puakruk chu a chuh ta thut mai a. A kut bawr atang puakruk kawm hlat zawng chu inches ruk chauh a ni a. Joe Harbin-a chu a che rang kher mai.

A kut chu a phe thla zawk a, a vuan a, nal zaihin a phawi chhuak a, a tin kawh ta nghal a. Chutiang chu vawitam a lo tih hnu niin, mi tam tak pawh pialral ramah a lo thawn tawh thin a ni.

A silai ngul a lek kawh chiah tihah chuan, engemawni hian a rawn deng ta dawt a. Sir lama a pai nawk rual chuan Dan Rodelo-a chuan a silai chu a lo hmetpuak der tawh tih a hre ta nghal a.

Silai puak dawt chu a dang puak leh dawtin a zui nghal zat a, chu chu a silai atanga chhuak a ni ve ta thung a. Ama silai kah erawh chuan a ke zungpui bul lawk lei chu a deng phut sawrh a. Hnung lamah a petek phei a, lungah chuan a han thu leh hram hram a. A puakruk chu a kutah a inkhai der der a.

"Badger-a hnenah khan rangkachak chu min lak tir dawn thu I hrilh kha," Rodelo-a chuan a lo ti ram hmak a.

"Mai mai a, a chah thlâk dawn lai a nuam a tih ve deuh nan ka sawi mai mia a nih kha. Chutiang te ka tumin I ring reng reng emaw ni le?"

"I pumpui chhanhim a duh a ni, Joe. Eng thil nge lo thleng dawn a hria a. I hmuh ang khan, hun engemaw chen atang khan tunge ka nih a hrechhuak tawh a ni."

"Nang hi maw?" tih pahin Harbin-a chuan a nâk chu a dawm vawng vawng a, a kutbawrah chuan thisen hi a lo luang nguai nguai a.

"Hmun leh hma ka neih hma chuan Texas ah chuan Dan pawna hnawl silai chelek mi ka lo ni tawh thin a sin. Thil laih chhuahna a ka hnathawh kha hna pangngai dik tak ka neih hmasak ber a ni a sin.."

"Kha Badger-a kha, thu tha min hrilh fo a, a thawk tawp thleng khan. Lo ngaithla a, zawm tur pawh ka ni a sin mawle" makti tak chungin Joe Harbin-a chuan a han ti a. A thawk zawng chuan a taksa chu a insawi der der a.

"Mei kha I chhem phawt a ṭha ang, Lawng chu saw an kal dawn tlat mai," a ti ta thut a.

Rodelo-a chu a inher zawk a, silai cheng kau ri rak a han hriat meuh chuan a tlai lutuk ta. Hmai lei tauh dawtin a tlu nghal tawp a, chu mi rual chuan puak ri dur hi a hre nghal a. Chutah let tawp tawp pah chuan a silai chu a han hmetpuak ve ta nghal zawt zawt a. 

Vawi thum a rawn hmet puak ṭhuai ṭhuai a, a puah a piangin Joe Harbin-a chu a che lawih lawih a.  Muangchangin a ṭhutna lung aṭang chuang a awn thla riai riai a, leiah chuan a thal ta dêr mai a.

Hmel dâng var pap leh khur zawih zawihin a rawn ding chhuak a. Nora-i chu melh pahin, "A va teuh ther ther ve le," a han ti a. Mak ti tak chungin Harbin-a ruang leia let reng chu a thlek vang vang a "A tawp thlengin a tum tluan chhuak zak chu a ni si a."

"Mei chu kan chhem ange," Nora-i chuan a lo ti a.

Nawalh chu nawtin a depkai ta a. Meialh chu enin a han ngaichang leh hlek a, meikhu chu vanlam hawiin a ding chho ta laih laih a. Suar kham koah chuan kalpheiin, lung kar chu a lai mawlh mawlh a. Thingrem bawm te a lak chhuah chu a tuiek ruam tawh a, mahse a la sakhat tha viau mai a.

"A hmun hi chu ka la hrereng a lawm," a han ti a. "Hei hi a ni ka lo kalve na chhan ber chu. Hei chi ka chhungkaw neih chhun ve chu a ni si a."

"Lawng chu an lo thlakthla a nih saw," Rodelo-a chuan a lo ti a.

Lawngin a rawn panhnaih lai chuan Rangkachak thunna ip chu lain tuipui kamah chuan an chhukthla ta a. Lawngah chuan pa pahnih hi an lo awm a.

"Ichacher-a chu I ni em?" tiin pakhat zawk chuan a lo zawt a.

"A thi tawh ... hmanni lawk khan. A ai ka rawn awh a ni."

"Chutiang engmah ka hre hlei nem," tiin chupa chuan a lo hnial deuh a. Helai hmunah hian nitin dollar sawmhnih hlawhin ka lo nghak a, chutah….."

"Chutiang chu I hlawh dawn tho a lawm. Sawng mi pahnihte saw tuipuiah hian phum la, a dang sawmhnih pawh ka pek belh ang che."

"Engvangin nge chu chu tih a ngaih kher nachhan? Tumahin an hmu tawh dawn chuang hlei nem."

"Khi laia Indian awm ho khian a nungin emaw a thiin emaw mitang pakhat an an hawn kir leh apiangin dollar sawmnga an hlawh thin a. I tih loh chuan an kal kiang mai duh lovang"

"Dollar sawmhnih maw? A tha tawk a lawm."

Dan-a’n ip rih hmel deuh lawnga a hlang lut lai chu a lo thlek zawk a.. "Kha kha enge a?"

"Buaina a nih hi, thiana. Buaina tamtak thlentu. Theihnghilh hmiah la a tha zawk ang.."

"Pa chawhnu lam, mahni buaina chauh ngaihtuah thin ka nia. Ka theihnghilh nghal e."

Nora-i chu lawngah chuan a rawn chuang ve ta a, Chutah Dan-a chuan Grulla lam chu panin a hlinna hrui leh lakam vel chu a han phelh a. "A tha e, nauva, tunah chuan zalen I ni ta. I duh chuan Sam-a hnenah khan kir leh la, engtikah emaw chuan keipawh ka lo kir leh ang. I duh leh ramhnuaiah khan I tla vel mai mai thei bawk ang."

Chu ramsa chu a khelah a han beng taih a, a kalsan ta a. Sakawr chuan a enzui vung vung a, Pinnacate ram lamah chuan a pen phei ta chhut chhut a. Rodelo-a pawh lawngah chuan a chuang leh ta a. 

Lawngah chuan thuthmun a han rem fel hnua,  vaukam lam a han thlir chuan Rodelo-a chuan Hat-a pawh chu a hmu thei a. Thlaler atang chuan Sea Lion Bluff lam panin sakawr chungah a chuang a. Chu Indian pa chu a han hawi kual ruai a. Chutah muangchangin a inkhalh liam ta a.

"Khawiah pawh, I kalna hmun apiangah ka zuive zel ang che," Nora-I chuan a lo ti hnap a.

 "A ṭha a lawm," a lo ti bauh a.

A TAWP TA