Bung-12

 J.L Ranch an va thlen chuan zanriah an lo ei fel hman vek tawh a. An han inhmukhawm zet chu an hlim tlang dar dar kher mai. A bikin Jonathan an a fanu, a hmangaih em em dam taka a han hmu leh ta chu a lawm zual hle a ni. Chutiang taka hlim tlanna chu J.L Ranch a chengte chuan hun rei tak chhung an lo hmu pha tawh ngai lo a ni si a.

 

Lori Jonathan in Hickock a chetdan tinreng mai a han sawi meuh chuan 'Ngawi rawh u' tih ngai reng an awm hauh lo, ngaisang em em chungin Hickocka chanchin vel chu an lo ngaithla thap hlawm a. Marshal an lo zui ta zel lo chu Deputy pahnihte pawh chuan ti fuh an in ti ta tawlh tawlh mai zawk a, inchhir zawng a hnai lo kher mai le!. 

 

  Pakhat phei chuan, "Engtiang pawhin lo thi dawn ta ni ila tunah chuan Wild Bill Hickock a, a chanchin leh a thawm thangva chauh kan lo hriat thin chu ka hmu ve tain, a hnungzui thei hiala ka han awm tak avang pawh hian ka lawm tawk em em tawh tho mai." a rawn ti chhuak hial mai nghe nghe a.

 

 Hickock a te pahnihin zanriah an ei fel ve hnu chuan a va kalna chanchin vel zawng zawng chu an vaia hriat tur chuan a han sawi ta dap dap a. Marshal pawh a sawihmaih hauh bawk lo. A thusawi tlang kawm nan chuan, "Black Bond a, Killer a leh Marshal te chu hruikhat vuanin an awm ngei a ni tih pawh ka ring hmiah tawh a, fiahna kan neih theih hun hunah Marshal pawh khaihlum turah chuan a bang bik hauh lo ngei ang le. Naktuk zingah bawngrual hralh tur awm ang zawng zawng chu Benvo khaw panin mi pali in kan va khalh chhuak ang a, a rang thei ang berin kan ching fel nghal tur a ni ang," a han ti ta charh charh a. A thusawi a piang mai chu rinhlelhna nei lo tih hriat takin an lo bu nghauh nghauh hlawm a.

 

      Jonathan a chuan duhsak takin, "Hickock, naktuk tal chu chawl hahdam ve rih phawt la maw le? Tun tumah i va thawk hah hrep tawh si a, hetiang chuanin i taksa pawhin a tuar lutuk ang a, kan tan thleng hian a tha lo thei zawk ang e. I ban hliamte pawh kha enkawl rih phawt a tul a ni," a han ti ve ta soh soh a. Hickocka ve thung chuan, "Ni love, Pu Jonathan, kan va beih tura te hi mi pahnih/khat mai an ni lova, mi tawrawt pui pui, pawisak nei lo leh fing tak tak si an ni tlat mai a; Chuvangin he i Ranch himna tur hian nikhat chu sawi loh, darkar khat pawh a uihawm hliah hliah tawh zawk a ni," tiin a lo hnial leh hmiah a. Chu chu thu dik tak pawh a ni reng a ni. Misual hote chu tunah pawh Ranch khawih chhe tur chuan an lo intintuah ru reng mai thei si a.

 

      A duh lo chung Lori'n a bân nâ a tuam sak hnu chuan mu turin Bunk House lam pan chuan a kal ta thuai a. 

 

An nauteho an chhuah hnu pawh chuan Jonathana te pafa chuan Hickocka chanchin chu an sawi zui bawrh bawrh reng a. Chutiang taka mi huaisen leh rinawm, anmahni tanpui tura an han tawng fuh hlauh mai chu vannei pawh an inti em em a ni.  Zan te a lo rei tak viau hnu chuan mu ve tawh turin Bed-room lam chu an pan ve ta a. 

 

Hickock a chuan ngaihthat lohna lian  tak a neih chu muthilh pui mai mai thei lovin a tho leh a, a gunbelt chu a hreng leh ta mawlh mawlh mai a. Engemaw thil hriat lawk nei ang hrimin chhek In sir thim laiah chuan a va thu ta ringawt a. Rei pawh a la thu hman lo tih chuan a hnung lama thil han ri rek avang chuan a inher nghal zawk a. Engtiklai khan nge a phawi hman tih pawh hriat lohvin a Revolver Pistol chu a kutah a lo hum hman reng tawh a. Ranch hual ru tu, amah hmu si lo te tan chuan chetna hman pawh a awm hmel loh khawp mai. Nimahsela a hnung lama thawm a hriat chu tudang ni lovin Lori Jonathani kha lo ni rengin, a 38 Revolver pistol a phawisa pawh chu a Holster ah a thawlh lut leh ta a, "I va mu har ve, Lori?" a lo ti ta ngawt a. Lori chuan tawng ring lo tura rawn zaizir pah chuan a rawn pan hnai zel a, "Hickock, nangmah ka ngaihtuah vang che hian ka muhil thei thlawt lo a ni," a rawn ti ta sep sep a. Engtizia nge ni ta ang le...?

 

Nula pangti lum ther therin a rawn nawk vel chuan Hickock a chu a mür chuai chuai mai a. Hmeichhia hi chu a lo hmu ve fo tawh thin a, mahse he nula Lori ang tluka a ngaihtuahna chawk buai theitu erawh hi chu tumah a la tawng ngai hauh lo a ni. Lori zet hi zawng a hmelthatna piah lamah atan hian engemaw ti takin a hlu danglam bik riau mai a ni.

 

 "Keimah angin maw i muthilh theih lohva?"

 

"Ni chiah e, i taksa pum, i engkim mai hi ka ngaihtuah a ni,"

 

"I ngaihtuahna chu dah bo la, va mu leh tawh rawh,"

 

"Ka thei lo, ka hmangaih che ni in ka inhria," a zah em avang chuan a han kim ki deuh chaih a. 

 

"Kei pawh hian ka hmangaih ve che chuan ka ring. Mahse tunah rih chuan hnathawh tur a la tam em a, hmangaihna lam thu han sawina hun pawh anih loh hi,"

 

"Hmangaihna chuan sawi hun leh hun lo pawh a nei kher dawn em ni,?"

 

"Mihringte chuan pian hun kan nei a, thih hun tur pawh kan nei theuh bawk a. An hunah chiah zel kan chan tur chu kan tawk mai thin chu a nia lawm. Kawng tinreng leh engkimah hian hun leh hmun a awm thin a, chumi hmang thiam lo chu an damchhung hunah an buai fo thin a ni. Chuvangin, hmangaiha pawh tun hunah chuan sawi hun la ni rih lovin ka hria,"

 

"Hickock." Lori chuan a rawn kuah nghal chawt a, ani pawh chuan lo kuahlet ve in, duh thawh tak leh rilru in hmu tawn tak chuan an in fawp ta vawng vawng a.

 

An inthlah leh thei tawh dawn lo emaw tih tur khawpa rei an infawh hnu chuan, "Lori, chawlh hahdam kan mamawh ve ve rih a ni" Hickock a chuan a han ti sap sap a. Chutah Ranch In lam pan chuan an inkai phei ta ral ral a. Anmahni mutna tur ve ve pana an ințhen dawn chuan an han infawp leh vang vang a; Chutihlaia nui sun sun chunga anmahni lo thlir vung vungtu Jonathana chu a tu ve ve mah chuan an hmu hauh lova. Chhek In sir thim laiah bawk chuan a va tawm leh ta ran mai a. Uluk leh fimkhur takin a beng chu a chhi hra reng a. Tun ang zan reh leh thimah hi chuan mit aiin beng hriatna a pawimawh hmasa zawk tih pawh a hre chiang hle a ni.

 

 Darkar chanve lai tur a thut vang vang hnu chua sava hram ang lek leka thil han ri rat rat chu a hre ta hlauh mai a. Chu zawng sava hram a ni tawp lo mai le!

 

 Hmun hnih hmunthum lai atanga a rawn in rik chhawk tliar tliar dan atang ngawt pawh chuan sava hram chu ni thei in a ring lo chiang hle a ni. Chu bakah zan ah pawh tun ang zan rei tawhah chutiang sava hram ri chu a la hre ngai hauh bawk lova.  A piah lawka bawngrual an khalhkhawm sa te chu a han thlir phei leh vang vang a. A thil ri hriatna chu bawngrual an khalh khawm sa awmna lam vek atanga rawn ri chhuak vek anih bawk avangin a ngaih pawh tha lo hle ta mai a.

 

       Bawngrualte chu Stampede (Hlauh neih vanga ranrual phi ruai) tir an tum a ni thei ang em? Reilote an han nghah leh hnu chuan sakawr chung chuang mi pali lai mai chu kiltin atang chuan an rawn lang ta sup sup mai a. Pakhat chuan a kut ding lama a thil ken chu a han ham ri rat a. Chu ngei chu Hickock a thawm hriat kha a lo ni chiah mai le!

 

 Chupa thil hamrik ken chu zan thla êng chuan a han chhun fuh palh ta hlauh mai a, samkhuih te tak te mai leh lehkha var lian vak lo chu hmeh belin a ham ri hi a lo ni reng mai a. Thil hamri tu chuan a Pistol chu phawiin bawngrual lam hawi chuan a tin ta mai a. Chuveleh Hickocka pawh chuan a Pistol chu a phawi ve nghal zat a, pakhatmah chhuahtir hauh lova thah fai phiar chu a tum dan a ni ringawt tawh mai a ni. 

 

Amah chuan silai chu hmetpuak kher lo pawh ni se chungho silai chu a puah tho tho dawnin an bawngrualte pawh chuan an chi-ai phahin an phi ruai phah dawn tho tho tih lah a chiang si a. Tin, chubakah, chungho chu an thih tam zawh poh leh nakina an beihtur te chu an tlem phah ve zel dawn tihna a ni bawk nen, An pali a thi fai vek ngei turin Hickocka chuan a pistol chu a hmet puak ta thuai thuai mai a.

 

 An rinloh deuhva barakhaihtu silai ri zet chuan a ti hamhaih chiang kher mai. Silaimu tuar hnuhnung te pawhin engmah tihve nachang reng an hre love, chumi hun te chu Hickock a tan chuan a rei tawk thova, a duh ang hna chu a thawk zo hman tho mai a ni.

 

     Vanduaithlak takin emaw ni dawn ni, a han sawi takah chuan thinrim engphiarin an lo in sehruh teuh hlawm a, Bata chuan vui hmui pu deuh chung hian, "Engatinge min hrilh ve loh le aw?" a han ti bal bal a. Hickock a pawh chuan hrethiam tak hian, "A ni khawp mai, amaherawhchu kei ngei pawhin ka hriat lawk bik loh thil lo thleng thut a ni miauva, han inhrilh ngaihna pawh ka hre bik lo a ni. Ka rinhlelhna avang chauhvin ka lo chang ngawt mai chauh va, ka vanneih a siamin ka rinhlelh ang ngei thil chu a lo thleng ta a, a chan tha lamah ka tang ta hlauh mai anih hi. Rawn hrilh turin han che chhuak ta ila chuan heng hote hi kan that hauh lo mai thei a ni," tiin thil awmzia chu a han hrilhfiah leh rih a.

 

Ranch Inchhawng chung tukverh atanga thlaphang tak hmel pu a rawn thlir ve tu pawh chuan Hickocka thusawi chu a lo ngaithla ve kar bawk a. A ngaihsan leh duhna pawh a zual sawtin a inhre hial a ni. Hetiang mihring hi tunhma zawng pawh khan la hmu ngai hauh lovin a inhria a, a pa dinhmun khirh khan tak te a han ngaihtuah chuan Hickocka kher kher a pa in a lo ruaifuh hlauh mai mawlh chuan a lawmna a tizual sauh sauh zel a; chu mai bakah atan lek phei chuan a hlimna tawp a lo ni leh zel bawk nen!

 

 Hickock a kahhlum tak te ruang chu an han en vel a. Canel Plane kawng lama tlanchhe ta pawh kha Hickock a pistol mu, a beka lut chu tuar lovin a lo thichiang ve hle tho bawk a. Midangte phei chu silaimu luhna ber pawh hriat chian theihloh khawpin bawngrual tlanchhia te khan an lo chil thler ver vur mai nghe nghe a ni.

 

 A tuk zing khua a lo var chuan zan lama mu tha lo leh hah hrep hlawm mah nise khawvar rual chuan an tho kim leh vek hman a. Jonathan a te pafa erawh chu an la rawn tho lo tih mai a ni. An chunga kar pawh awm hman lawi lo khawpa thil duhawm lo tak tak thleng zawn zut zut reng ta mai avang chuan an thinrim tawh hlawm kher mai a. Theih chu nise chungho zawng zawng chu hrehawm thei ang bera hrem an châk et et tawh mai hlawm a ni.

 

   Minky pawh chuan hrehawm pawh hrelo niawm zawk taka phur sarhin Hickock a te ho ei leh in tur te chu a siam sauh sauhva. Khua pawh a rawn êng fel ta bawk a, coffee sa tha tak leh biscuit vela an pumpui an han inhnawhpuar hnu chuan bawngrual tlandarh ta te chu an zawng nghal sang sang hlawm a. Khalh khawm hna chu an thawk ta a.

 

  Ni a lo chhuak a boruak sang takah a awm leh ta tihah chuan bawngrual tlandarh chu an khalhkhawm kim leh vek tawh a, an han chhiar chuan sangkhat leh za leh sawmli panga chiah an lo la tling a, pangate erawh chu an hmu ta mai lova, an hloh ve a ni mai anga, han zawng leh hram tur lahin hun an nei tawh lo bawk nen; bakah chung an hmuh kim lohte pawh chuan an ram chhung bak an pel chuang dawn lo tih an  hre vek a, an hun hlu tak paih heu nana hman ai chuan an zawng zui zel duh ta rih lo a ni.

 

          Jonathana zing rawn tho chhuak ve in an bawng rual tlandarh vek tawh te, an Ranch tualzawla an lo tlim leh ta hmûr mai a han hmuh chuan mak pawh a ti hle nghe nghe a. Hickocka chungah chuan a lawm tak meuh meuhva. Thil engkim mai chu amah Hickock remruatna ang veka kaltir tawh turin a hrilh ta hial nghe nghe a ni.

 

Tukthuan ei hmain an mi hren, a hma ni a Hickocka rawn man an khung chu an han hruai chhuak a, ei leh in tur tlem chu an pe ve a. An eitur pek a ei zawh hnu chuan khaihlumna tura an buatsaih diam tawh, an thing dawhah chuan lawn tirin hruihrual chu a nghawngah chuan an valh ta run mai a.

 

Chupa chuan mak tak mai hian an khaihlumna tur hruihrual a an hlin tawh pawh chuan hlau hmel reng reng a pu chuang hauh lo mai a, nuihmel lek lek a put zawk tlat reng avang chuan mak pawh an ti hle hlawm a. Lori Jonathani pawh chuan Ranch In bathlar atang chuan a rawn thlir ve dauh dauh va. Chupa nghawng  hrui hrual valha an rawlh lut ta a han hmuh chuan en ve reng ngam lovin inchhung lamah chuan a lut ta daih a. Mi an khaihlum lai hi a la hmu ngai lova, hmuh ve châkna deuh zawng a nei ve a, mahse a tak em han thleng tur chuan a hmu ngam tak tak ngang lo a ni.

 

Hickock a chuan an khaihlum tumpa hmelah chuan danglamna, dikna leh huaisenna pawh lang tel tlatin a hre ta a, a zawt ta hial a.

 

 "Engvanginnge hlauhmel reng i put miah loh? Tun atanga hun reiloteah chuan mitthi i ni tawh mai dawn si a?" tiin a zawt ta chawt a.

 

Chupa pawh chuan dul raih hian, "Killer a pawl ka zawm atang hian engtik hunah emaw chuan tun ang hun hi ka la tawng ngei dawn tih ka hre tlat a ni. Chuvangin ka thih hma leh ka chawl hma dawn tihna a ni mai a, engahnge ka han huphurh vak lem ang?" a lo ti sam ta et a.

 

 "Chutiang hre reng si te chuan engahnge Killera Gang chu i chhuahsan thuai mai loh? I tan zalenna  a awmtheih phah ngei dawn si a?" tiin Hickock a chuan a chhang let ve leh a. 

 

C"zawng ka tan thil theih ani lo. A chhan pawh ka tih ni miah lovah tualthata puh ka ni a, Texas atanga New Mexico thleng hian Marshal leh Texas Ranger ho chuan min la zawng buai ta zel si a, chuvangin ka nupui fanaute pawh uap lum ngam tawh lovin he pawl hi duh reng vang pawh ni lo, lohtheih lohna avang zawkin ka zawm ta chawt mai a ni. Tichuan he pawl ka zawm tak atang hian Red Indian ang maia beidawng hauh lova ka hniakhnung zuitute pawh chu vawi khatmah ka la hmu leh ta lo a ni. Ka zawm chhung chuan chungho lakah chuan ka him ngei pawhin ka ring bawk a ni," tiin Hickock a chu a chhang ta chuar chuar a. A hmelah chuan khaihlum an tum avanga hlauhna chu a la awm ta chuang miah lova, hlauhna aiin thinrimna leh chhungril taka lungchhiatna a lang tel zawk mah a.

 

 Chupa chuan thudik a sawi a ni ngei mai tih pawh a hmel atang chuan a hriat hle a ni. Chutiang chu thil awm thei a ni ve reng a. Amah Hickocka ngei pawhin a lo tawh ve tawh avangin a hrethiam hle nghe nghe a. Chutah Hickock a chuan a rilru a thlak leh ta tlat mai a, chupa dikna chu hai lansakin a nupui fanaute uap lum leh thei ngei tura tanpui duhna chu a rawn pu ta zawk a.

 

Chuveleh a nghawnga hrui valh an thun pawh chu hlihsak leh ta in a ngaihtuahna chu Hickock a chuan a rawn sawi chhuak ta a.

 

 "Khaihlum i ni lovang, tual that anga puh i nihna ah chuan i dikna hailan sak ngei tur che pawhin ka intiam e. Nangmah ngei pawh hian min puihna tur kawng tam tak i nei bawk. Rawn chhuk thla la, Black Bond a leh Killer a te, Marshal te inkungkaihna thurůk zawng zawng hi mi han hrilh vek teh," a ti ta zawk a.

 

Chutianga a han ti ta mai chu midang zawngte chuan mak an ti em em theuh mai a. Khaihlum an tuma ngei pawh chuan mak a ti ve tak zet a, mahse a thu hnialkalh tum lam rilru pu erawh chu tumah an awm lo thung. 

 

Thatho zetin chupa pawh chu a rawn chhukthla ta vat a. A nunna zuah anih ai mahin Wild Bill Hickocka meuhvin a dikna hailan sak tura a intiam tak avang chuan a lawm em em a, a lawmzia chu a hmelah chuan a langchiang hle a, a thinrimna hmel chu chawp leh chilhin lawmna in a rawn thlak nghal a. Hickock finzia leh remhriatzia te, pistol chelek velah a turu zia te chu a lo hriat chian tawh em avangin a thutiam pawh chu a hlen thei ngei ang tih pawh a ring nghet hmiah bawk a ni. A lawmzia chu tawngkam a sawichhuah thiam mai chi ni pawhin a hre lova. Uite in a pute a bawh that that ang maia han bawh vel chung chung mai tak a nap a ni.

 

 Chutia leia a din ve hnu chuan thihna khur thuk tak atanga la chuaktu Hickocka hnenah chuan a thiam ang tawk tawk chuan lawmthu a han hrilh ve ngial a. 

 

       Chutah a hming chu Bringo anih thu te a han hrilh ve te te hnu chuan; -

 

"Ka hriat zawng chu hei hi a ni mai e - He Fog Bound Gang-a hruaitu ber zawk chu Black Bonda, Benvo khua a pa hausa fahran mai saw a ni a. Mahse Fog Bound hmunah chiah hi chuan vawikhat mah a la kal lova, duh pawh a duh hek lo. Killera hi nang ang bawka pistol chelek rang lutuk mai hi a ni ve a, a thiltihna reng rengah a hmel rawn lan ve lovin Killera kutah engkim a dah hmak mai a ni. Chuvang chuan tumahin Black Bonda hi an la ringhlel ngai lo bawk,"

 

"Pawisa lamah erawh chuan Killera duh leh  mamawh zat ang ang chu ihe lovin tam lutuk neih hauh lovin a lo pe hmiah hmiah thin a. Tin, Marshal hi chu zalen taka an chet theihnan an tlawn lungawi a ni ber a. Chuvangin eng ang pawhin Black Bond a hote chu che khaw lo deuh pawh nise a beng a lo chhu ngawng lui tlat ta zel mai a ni. A mualphona thleng thei mai dawna a hriat chinah erawh chuan zankhat emaw vel te chu Jail ah a han dah ve mai thin a, a tuk lawkah a chhuah leh thauh mai thin a ni.

 

        "Marshal khan engkim Fog Bound ah khan a rawn sawi vek avangin Killera chuan Hickocka i ni tih pawh hi a hre vek tawh a, inhmatawna inbeih a châkzia pawh a phuh chhuak fo thin a, in la intawng ngei pawhin ka ring. Black Bonda pawhin tunge i nih a, tu tana thawk nge i nih pawh a hre tawh bawk a, in bawngrual hralh tur pawh a lo leisak ngei bawk ang che u. Mahse in haw lamah erawh chuan bawngrual in hralhna man zawng zawng chu chhuhsak leh vek che u a tum dawn a, chu chu a thei lo anih erawh chuan Killera leh a hote zawng zawngin he Ranch hi an rawn bei tawh ngei ang. Nizana an rawn chetna chhan pawh kha engdang ni lovin an la inpeih fel loh avanga rawn tirh an nih hlawm kha. He Ranch an rawn beih nghal mai lohna chhan hi chu khalh hah ngai hauh lova bawngrual he ti zozai mai hi Black Bond an neih a duh vang mai a ni.

 

   Chumi zawh hunah chuan he Ranch hi a rawn bei ang a, tumah zuah lova thah mang phiar a duh ngei ang che u. Helai ram bial velah chuan he ram bak hi ranrual han vulh nana itawm dang khawiah mah a awm loh avangin neihsak ngei che u a tum tlat a ni. Chuvang chuan a theihna zawng zawng hmanga he Ranch laksak theihna tur hian beih a tum a ni. Chutiang taka che tur chuan Killera ngei pawhin thupek a dawng diam tawh a, mahse a huhova in awm laia rawn nuai vak mai che u ai chuan in bawngrual ruksak  phawt a, chungho hnu vel in rawn chhui lai lo thah zeuh zeuh mai tawh che u an tum a, in thih mang pak thlengin. Marshal an man tel ve nachhan pawh kha eng dang ni lovin Black Bonda hnuhma thup mawina mai chauh anih kha. Mahsela rinloh tak leh Killera finna tlankhalh theitu nang i lolang ta tlat mai si a, a mite zinga pakhat i khaihlum te, ama kulh chhunga lungin tangte ngei pawh i rawn chhanchhuah theih tak mai atang phei kha chuan Killera thinrimna chu nasa tak a ni ta a. Black Bonda thupek phei chu hmu lo sela chuan buaina tawpkhawk  chu in tawk hial tawh ngei ang. Chuvang chuan nghâktu zawk nih ai chuan a che hmasa zawka tan chu a fuh zawk ngei pawhin ka ring," tiin thil awmdan zawng zawng chu zep nei map lo chuan a sawi chhuak fai ta leng a... 

 

   Hickocka leh midang ho zawngte chuan ngaihnawm an lo ti hle a ni ngei ang, Bringo an a han sawi zawh hnu pawh chuan an lo la ngawi thap hlawm a. A bikin Jonathana phei chuan mak a ti zual hle bik a. "Hickock, i lo rindan chu a dik chiah mai anih chu! Hetiang taka phiarrukna pawh hi nang hi awm lo ta ni la chuan kan tawng buak hma chuan engtikawng mahin keini mai chuan kan hrechhuak thei hauh lo ang le," a rawn ti chhuak ta hlawl mai a. Hickocka chu ngaisang tih hriat fe hian a han nuih ta sun sun a.

 

 Hickocka ve thung chuan, "Chu em em phei zawng ni bik suh e, Bringo avanga hria chauh kan ni alawm. Tunah hi zawng thil nihdan chu rin thu mai ni tawh lovin kan hrechiang ta a. Bringo a sawi ang ngei khan a che hmasa ah kan tan ngei pawh a tul dawn ta a ni," a han ti ta charh charh a.

 

       Chumi ni chuan tukthuan pawh a huhovin an eitlang vek a, Bringo a pawh chuan Hickock a sawmna angin J.L tana thawh ve zui nghal chu a remti ve ta a. Tunah chuan member pakhata an pun belh bakah an thilhriat phak loh tha tha an han hriat tak avang chuan an phurtlang tawh hlawm kher mai a. Hickock a chuan, "Bringo, nang chu Benvo khuaa i rawn tel ve a rem hauh dawn lova, Ranch ah hian i lo awm dawn nia. Pu Jonathan a leh nang in awm chuan Ranch hi chu a ngaihtuahawm lovang chu. Keini panga hian bawngrual chu kan va khalh anga, kan kir leh lam min lo chang tur chuan a tlem berah mi panga chu an inruat ngei bawk anga, Fog Bound ah chuan an tam vak tawh kher lovang chu maw! Chulai tak chuan kan va bei dawn a ni. Kan pawisa hawn pawh chu khawi maw lai hmun him laiah kan dan rih mai dawn a ni," tiin rem a ruat leh ta zat zat a. A remruatna chu tumah chuan han sawisel tum pawh an awm lova, Hickocka remruatna chu a fuh thinzia pawh an hre vek a ni. 

 

     Tukthuan an eikham chuan han thut muanna hun pawh nei hauh lovin kal nghal mai tur chuan an inbuatsaih nghal sauh sauh hlawm a. An inpeih fel veleh chuan Bata, Fredy, Deputy pahnihte leh Hickock a te chuan bawngrual chu an kalpui ta duah duah a. Jonathan a chuan an nauteho an inkhalhchhuak ta duah duah chu a thlir zui vung vung a, "Hickock, vanneihna in kutah awm rawhse, i remruatna ang ngeia in va chet fuh hlauh chuan kumkhuain kan tan zalenna kawl a êng ve tawh ngei ang," tiin a han au zui lauh lauh a. 

 

Chutihlai in a bul lawka lo ding ve, a fanu Lori Jonathan i erawh chuan a rilru te te in dam taka han inhmuh leh ka va han duh tak em! tiin a lo in ngaihtuah nauh nauh a. A thinlung zawng zawngin Hickock a chu a ngaihtuah tak meuh bik zual a ni. Chumite pafa ai mah chuan Bringo chuan Hickocka te kal ta chu a ngaihtuah zawk a ni ngei ang. Hickock a Rifle pek chu tihfai hoh hoh pah chuan, "Hickock, i chungah beiseina sang tak nei in ka beidawnna khur thuk tak ata min chhanchhuak a. Puitlina hlen ngei tura ka ring che ang bawk hian tuna in va chetna turah pawh hian a che fuh zawkah in tan ngei ka ring bawk," tiin, Hickocka te chuan an hre pha hauh lovang tih hriat reng reng tura zawi sup si, Hickock a chungah beiseina sang tak a nei tih hriat em em si hian Hickock a hnena sawi ang mai chuan a han phun ve suap suap a.