Bung-12

 Kid  Rolelo by Louis LA'mour

BUNG SAWMPAHNIHNA

Grulla kai chunga Harbin-a’n a rawn pan lai chuan Tom Badger-a chu hma hruaiin tlangkang rawn chhuahna khuar khurum kotlangah chuan an lo kal mek a. Tom-a chu a han dak chhuak a. "Rodelo-a chu buaina a tawk a va nih mai hmel ve aw," a han ti a.

Nora-i chuan a hmui chu a lo chip mar tlat a, engmah erawh chu a sawi lem lova. Harbin-a a rawn hnaih zel takah chuan a thin chu a phu dup dup a. A taksa te chu vawt sung sungin a hria a, a khawng tlat bawk a. Chutiang chuan tunhmain a la awm ngai lo reng reng a.

"Eng thil nge thleng ta a?" tiin Badger-a chuan a lo zawt a.

"Danny-a’n Indian ho auh khawm a tumna chu a duhaiin a lo thleng hma niin a lang."

"A va turu awm ve."

"A tha a lawm," Harbin-a chuan a han ti a, "Meikhu thawnchhuah chung-chang kha chu ka rawt chhuah pawh a ni lova."

"Tumah mawhpuh tur a ni lo. Amah kha a ni mai," Badger-a chuan a lo ti ve mai a. Chutah Nora-i duhsak awka takin, "Mahse, min ṭanpui turin a nun a hlan ta chu a nih kha." a han ti leh zat a.

"Khawiah nge a awm?" Nora-i aw chu a vawt raih mai a.

"A thi a nih ka ring mah zawk, Indian ho hian mitang hi an kawl ngai vak lova"

"Engvangin nge amah kha an duh kher ang? Nangmahni nena inthurual pawh an ni lo a ni lawm ni? Tâng tlanchhuak pawh a ni lova, amah avang khan dollar khat pawh an hmu dawn si lo."

Badger-a chuan Harbin-a chu a han thlêk zawk a, "Kan bulah a awm tih an hria a, chu chu a tawk viau ang. Tirawh u. I kal vat teh ang u. Hun kan khawhral mai mai a ni," a han ti a.

Nora-i chuan a sakawr chu a han pawt her a. "Amah umzui turin ka kir leh dawn. Dan Rodelo-a te ang mihring kha chutiang maia awlsamin a thi lovang."

"I a ta em ni?" Harbin-a awkâ chu a vin lek lek a. "Tih theih engmah a nei lo. Chutiangin nang pawh."

"A in-an reng chuan ka lêt leh dawn."

A sakawr chu a kaltir ṭan chiah tihah Harbin-a chu a sirah a rawn phei a. "Ramhuai pitar te I ni ringawt a lawm!" tih pahin a rawn ban phei a, a hmuiah chuan a rawn beng ta chawrh a. "Ka nula I ni tih hi I hriat a tha ang! Tun aṭang chuan ka sawina lam lamah bak khawiah mah I kal dawn tawh lo!"

"Ka sakawr hi kaltir rawh."

A theihtawpin a sakawr chu a han her kual a, Nora-i chuan sakawr vuakna hruihrual tawite hi  lo keng reng tawh a. A han vai fua a, Harbin-a hmaiah tak chuan a hlap ta ṭhuai mai a. 

Harbin-a chuan chu thil chu a chhuksak vat a, leiah chuan a paihthla ṭhuai a. Hruihrual hnuhma chu a hmaiah chuan a vual sen tût mai a. A tawp lamin a hlap fuhna a hmui chu a kak hlek lehnghal a. Thisen a lo chhuak a. Harbin-a mitmeng chu no lo tak a ni.

"He thil hi chu a man I la pe khawp ang. Tam tawk takin. I kal ve zel ang a, I theihnghilh ngai miah loh tur ka la tem tir ang che. Ka thah hma che hian kal ve zel phawt mai teh."

Ṭiaudûp lamah chuan a sakawr chu kaltir pahin, "I hriat tawh ang khan  tun aṭang chuan hotu ber ka ni ta." a han ti a.

Tom Badger-a pawh chuan a sakawr chu a bulah a rawn kaltir ve a, chutah Joe-a chuan lo mitmei pahin. "Kal hmasa rawh le, Tom," a han ti a.

"Hotu ber I nih thu kha I sawi sia."

"A dik alawm. Chuan, thu ka pe mek che a nih hi."

"Hnunglam aṭang chuan nilo ve, Joe. Kan kal rual vek ang chu."

Harbin-a chuan a dâr a lo san âk a. "Him zawk nia I inhriat chuan a ṭha a ni mai alawm."

Khuarkhurum kotlanga tlangkang lung hmun karah chuan an kalna kawng chu fimkhur taka thlang chungin an kal zel a. Chhim lamah chuan tiauvut dûp hmun zau em em mai chu khawchhak zawngin a inpharh duai a. Pinacate tlang bulṭhut lam aṭang chuan a rawn inpharh phei bawk a. Pinacate leh Sierra Blanca inkar awl lai chu thlirin an hawi kir zauh zauh reng a. Chutah, ṭiaudûp hmun chu an lut ta a.

Tuikhur an chhuahsan hma khan duhtawkin tui an in tawh a. Sakawrte pawh an thunun ṭhat chuan darkar hnih thum chhungin ṭiaudûp hmun chu an kan phei mai thei turah an ngai a. Chu aia a rei thang ngai lovin, lei ruh hmun an dai phei thuai thei bawk a. Hmun khat laiah chuan sailungvar tlang dung, ṭiaudûp hmun chung lama lo lawr chhuak hlek awm zui mai chu an han hmu a. Chulai ṭiaudûp aṭanga lo chawr chhuak tlang dung lian tak phena bihrukna remchang an thlen theih hun chu a lo thleng thuai tawh dawn a ni.

 Vaivut tlangpawng lian tak tak chu an ding lamah chuan a awm thluah a, veilam an han thlir a, a aia lian leh sang mah tur a lo inhung leh thluah a. Yard tlemte an han kal a, vaivut tlang sang zet hian an kawng chu a lo dal leh hmiah a. Sakawrte chuan vaivut chu dai pil thawih thawihin chulai hmun paltlang tur chuan an talbuai ta hle mai a. An piah deuh hmun rai deuh lai an thlen chuan an hah em em mai a. Tom Badger-a chu a let thla tawp a. A hmel chu a dâng lûp mai a.

"Buaina kan tawk tlat mai," a han ti a.

Harbin-a chu a lo bu nghat a. "Kawng awlsam zawk a awm ngei tur a ni." A han ti a. An hma lawka ṭiaudûpin tlang a siam chu feet sawmruk emaw laia sang hi a ni a. A awih lutuk lo nain, a dup vek a.

"Mahse, enchian a, hun han khawhralna hman pawh a awm lo maithei a."

Chulai vaivut tlang awihtlân chho ah chuan an che chhuak tan leh ta a. An chawn thleng thengin a pil hmawk hmawk a. Sakawrte pawh chuan an kaihza pil pilin an dai a. An kal hram hram a, tlangchhip chu an thleng ta hram a. An kaltawhna chu an han thlir kir a, yard za leh tlem baka hla a la ni lova. 

Joe Harbin-a chuan anchhia phuh chhuak bawrh bawrh a. Mel khat aia thui an kal tawh niin a hre sia.

Hmalam chu an pan hram hram a. Mahse, an beih fat fatna chuan tawp ni a nei dawn lo a ang hle mai a. Sakawrte pawh an thaw a chham ti tih tawh a. An phur hrenna te chu a dul hnuk tawh a. Sakawr chungchuan lam chu ngaihtuah chi pawh a ni tawh lo. Anmahni chuan kea kalin hma an hruai a, an sakawrte pawh ṭiaudûp karah chuan an pawh kal ṭang ṭang a ngai tawh a ni. Ṭiaudûp tlangpawng an chuan chhuah leh takah chuan tlangpawng zulzuia kal mai chu a chakawmin, chutiang chuan chhim thlang lam zawng chuan chhuk leh chho sek lovin an kal ta teh ngawt a. Engemaw chen an kal hnu chuan an han hawi vel a, kawng chin chhinchhiah nan a an hman ber tlangkar kalkhan chu an hmu ta hauh lo mai le. 

Darkar khat emaw vel an han kal leh a, Vaivut tlang dung inpharh zui mai chhip hmun khat laiah chuan an ding khawm laih a. Khawi lamah mai pawh chuan vaivut inpharh zui bak chu hmuh theih an nei ta lova.

"Kan chawlh rih phawt a ngai a ni," tiin Harbin-a chu a phun sup a. Ṭiauvutah chuan a ṭhu hnuk a. A kut chuan a lu chu a han dawm vung vung a. A khupah chuan a lu chu a han nghat a. Tuipui rim nam thlifim hi a rawn tleh heuh heuh a. Chu chu hriain Nora-i chuan a lo hip vang vang a. Engemaw chen an chawlh hnu chuan an han che chhuak leh a. Anmahni umtu hmel awm ang pawh chu an la hmu lem lova.

Nora Paxton-i chu nula sehhel ve tak niin, ke a kal leh sakawr chung chuanga ramhnuai leh hmun hrang hranga chetla fo ṭhin a ni a.  Tuna a awmdan pawh hi hrehawm a ti lem lova. A kalpui pa pahnihte erawh hi chu chutiang an ni ve lova. Yuma leh a vela chetla mipa ho hi chu Mikhual an nih ngawt loh chuan yard tlemte bak ke a kal an awm ngai vak lo a ni.

Tunah tak chuan Dan Rodelo-a chu a han hrechhuak leh a. Harbin-a sawi dan kha a dik a nih chuan Dan-a chu khawi laiah emaw thi in a lum reng tawh chu a ni phawt ang a. A la dam a nih erawh chuan, thlaler ram chu kea rawn paltlangin a rawn thleng thuai in a ring tlat a ni. 

A vawikhatna atan a kuta a chelhna leh a kuahna te chu a ngai vawng vawng a. Nu ṭâng bela ngaihṭha taka awm ang mai niin a inngai thar leh a. In lama haw leh ang maia inngaiin ama duhthu ngeia hetiang dinhmun rapthlak taka a zuanluh a, a tel ve zel na ah pawh ngaihngam na riau a nei a nih kha. Tunah chuan, ṭiaudûp hmun hi lo paltlang thei ta pawh ni se, chu chu a rinawm loh mah zawk a. Harsatna dang a hma ah a inchhawp leh dawn a. Joe Harbin-a leh Tom Badger-a hi engtin nge a tlansan ang? Chung chu lo hlawhtling zel thei ta pawh nise, engtin nge mi pangngai te chenna ah chuan a kir leh tak ang?

A hun tam zawk chu a hniak tam lam lam umin a lo khawsa ve tawh ṭhin a. A han ngaihtuah ngial pawhin a chungah khuanu hian zah a ngai ṭhin viauin a hria a. Tun dinhmun a thlen hma kha chuan mi pangngai tak tak te nen pangngai tak takin an indawrin, an khawsa ho ṭhin kha a ni a. Tunah zawng chutiang dinhmun leh khawvel atanga hla takah a awm ta chu a ni ta si a.

Joe Harbin-a’n Rodelo-a sakawr a rawn kai a hmuh kha chuan Rodelo-a chu a thih a ring chhin miah lo kha a ni a. Tunah chuan a ringhlel ta rum rum mai. Harbin-a khan engtin emaw Rodelo-a kha a that a nih loh chuan ke a kal turin a hnutchhiah a ni thei a. A eng zawk zawk pawh nise Rodelo-a chunga thil thleng zel tur chu a rin hriat theih ruak a ni. 

Thil pakhat erawh chu a chiang. A kalpui pa pahnihte ai chuan an harsatna tawn mek paltlang tur chuan a dinhmun a ṭha zawk tih hi. Ke a kal mi nilovin sakawr chungchuang mi an ni a. An pahnih chuan Tânin ah, abik taka hrenbehna hnuaia hun hmang reng an ni a. Chutiang dinhmunah chuan insawizawi ṭha lova an awmna te, chaw ṭha dawng lova an awmna te chuan a tichak lovin, tawrh hram hram theihna te pawh an neilo zawk ngei ang le. Ni engemaw zat kalta aṭanga thi leh thau pawlha an beihna te chu a la inṭan dawn chauh a ni si a.

A tlanbo a ngai a ni — Engtin emaw tal heng mi pahnihte hi a relhbo san a ngai a ni. Indian ho chu lo lang ta se, enge an tih tak ang? Harbin-a leh Badger-a chuan anmahni an invenhim rualin, amah pawh chu a him tel ve ngei ang a. Engpawh nise, Indian hovin an lo beih hma chu a nghak phawt ang a.  Indian ho tan pawh heng mi pahnihte hi chuti mai a awlsam hneh chi an ni lo tih a hriat avangin, an thlazar hnuaia awm rih chu him tlat a ni.

An theihtawp chhuahin hmalam chu an pan ve zel a. An tlu leh hnawk ṭhin. An sakawr te chu a chang leh an kai a, hnunglam aṭang te’n an nam thul. An phur te chu a lo thawl a, an siamṭha a, a lo thawl leh a. Chutiang reng reng chuan thifa hnukchatin an ṭang tak meuh meuh a ni.

Badger-a chu a ding ta thut a. "Joe ... en teh!" tih pahin an ding lama ni tla tur chu a han kâwk a. An dinglam zawnah chuan sang fu ah la awmin, a la lum hle mai a. Khawthlang lamah ni lovin chhim zawngin an lo kal char char chu niin!

 Joe Harbin-a chuan muanchangin ṭawngkam chhe pui pui chu a han chhak chhuak ngul ngul a.