Bung-11

 Bar nghaktupa in a hrilh ang ngei khan Benvo khua atanga khawthlang lam mel khat vel turah chuan Kidneya  Ranch In chu Hickocka chuan a zuk hmu ta mai reng a. Kal kawng pawh tumah zawt nawn leh tawh chuang lovin bo hauh lo chuan a thleng ve ta mai a. 

Ranch In chu pal hniamte hian a  inhung kual ve pap a. Chung pal inhung pap chhung lamah chuan sakawr pahnih/pathum vel chu hlobet vel petin an lo tla ve malh malh a. Chung sakawrte chu Kidneya te chhungkaw hman thin ngei a ni ang tih pawh Hickock a chuan a ring mai a.

Ranch tualzawl sir deuhva chhek In lian vak lo bulah chuan Kidneya chuan thing a lo ek tarh tarh a. Upa ve viau tawh mahse kut hnathawh ngaina mi tak anih ve avangin amah pawh a hrisel a, thahrui pawh ama tawkah chuan a la nei phian a ni. Hickocka chuan Kidney a awmna lam chu a pan phei a, ani pawh chuan a lo hmu ve thuai bawk a. 

               Thian dun, hun rei tak inthen tawh han in hmu leh an ni bawk a, an in lawm vel danah pawh an in ngaina hle tih chu a hriat theih mai a. Hickocka chu tukthuan ei sa diama kal ni mahsela a thianpa Kidney a chuan a sawm luih tlat si  avang chuan hnial duh ta bik lovin a eipui veleh ta a. Chaw an ei pah te chuan an tun hma nunhlui, Cavalry sipai an nih dun lai chanchinte chu sawi in an hlim hle a. An nui dun hawk hawk a, sipai nihna an bansan tak hnua an inthen dante leh tuna rinloh taka an lo intawn leh dan thilte chu an sawi kai zel a, an hlim kher mai. Tukthuan an eikham chuan coffee sa tha ver vawr tak mai hian kam an han thuah leh a. Chutia coffee in a an thut chawlh pah chuan, "Chhum zinna ram (The Fog Bound) an tih mai thin hi i hre tawh ngai em?" Hickocka chuan a han ti chhuak ta phawng mai a. Chutah Kidney a chuan a han inngaihtuah vang vang a, a hnu deuhvah chuan hriat chhuah nei ta thut ni awm tak hian a hmui chunglam chu a'n kum deuh phat a.

 "The Fog Bound" tih hi chu ka hre ve ngei tawh thin alawm; chutah chuan Killera leh a hote pawh an inkulh a, tumahin an la tlawh chhuak lo an ti nghe nghe asin. Keipawhin mi sawi chauh a ni ka la hriat ni. Killera chu pistol phawirang lutuka an sawi, hmingthang lutuk tak ve hi a ni a, nang nen hian han intawng ta chiah pawh ni ula, a tunge rang zawk ang tih chu rinthu mai lo chuan kei pawhin ka sawi thei lo a ni. Chu hmun chu enga tana rawn sawi chhuak teh tlat nge inih tak a, pawimawhna riau a awm ta em ni?" tiin Kidneya chuan The Fog Bound chan chin a hriat ve ang chhun chhun chu a thianpa Hickock a hnenah chuan a han sawi ve a.

           Chutah zawng a thianpa ngei ngei a ni bawk a, Hickock a pawh chuan J.L Ranch tana a thawh thu te, The Fog Bound a chengte ho nena an buaina tawh thute, chung hote chu J.L Ranch tana hnawksak tak an nih thin thute bakah, a rindan thil tam tak te chu zep nei miah lo chuan a hrilh fai ta vek a.

Kidney pawh chuan, "A lo nih tak chu! Tin, i rindan i han sawi chhuahte pawh chu a dik thei ang. Kan Marshal phei saw chu ka mi rinzawng a ni ther te lo mai. Black Bonda pawh chu chhui ve deuh chu a tul ngei ang. Chu hna chu keimah pawh hian ka lo thawk ve thei bawk ang," tiin Hickock a ngaihdan tawmpui tak chuan a lo ti ve thuai a.

 Chutia Hickocka'n thil awmdan leh nih theih dan tur kawngte a han sawi chuan Kidney a pawh chuan awm ang dawn hle in a hre ve ta a ni. 

           Chumite pahnih tui taka an ti ti bawrh bawrh lai chuan Benvo lama Rel han tut vuah vuah chu an hre ta a.

Hickock a pawhin a tih tur a lo theihnghlih hman tep a lo ni a, Rel han tut vuah vuahah chuan a harh hlawl ni ber hian a lang a.

"Kid, chu Relah chuan kan pu fanu pawh a lo thleng ve dawn a, chuvangin ka lo va hmuah ngei a ngai dawn a ni. I rawn kal ve duh em?" tia sawm pah chuan a tho ta nghal a.  Kidney a pawh chuan kal ve a duh thu chu sawi in a tho ve nghal a. Ranch tualzawlah chuan an in zui chhuak a, muangchang lovin sakawr chungah chuan an lawn kai nghal nawlh a, Rel lo thleng hmuak tur chuan Kidney a Ranch chu an chhuahsan ta thuai a.

 Rel Station an thlen phei hma hma chuan Rel chu a Station ah chuan a lo ding fel hman der tawh a. Rel passenger hote pawh chu an lo inthiar fai deuh vek hman tawh a. Hickock a chuan a duh aia an tlai ta deuh chu pawi a ti ang reng hle a. Rel Station an va thleng tep tawh tihah chuan hmeichhe mangang te thawm leh sakawr rualkhat ke per ri tak tak thawm chu an hre ta tlat mai a. Chuveleh Hickocka chuan, "Kid, nangin kan pu fanu chu Station ah chuan lo va ngaihven la, a hming pawh Lori Jonathan anih kha. Tichuan keiin chung thawm chu ka lo ngaihven ve thung ang e," tih leh a sakawr Black Nill chu tlan tura han khen zauh chu a rual nghal a. Kidney a pawh chuan a thianpa remruat ang ngei chuan Rel Station lam chu a va thlithlai ve nghal a. Mahse, Station ah chuan tumah an lo awm hauh tawh lo mai a. Savun thingrem hi duhloh paih ang mai hian sir khatah chuan a lo let bal mai a. A bulah chuan romol var thianghlim tak mai hi a lo tla parh hliai bawk a. Kidney a chuan romol chu a chhar a, a han lak kan chuan nula ta a ni tih hriat theih tak tur hian a rim pawh a tui cham cham hle mai leh nghal a. Romol kilkhata 'L. Jonathan' tih lo inthui a han hmuh takah chuan thinrim vangin a han ner sawk nghe nghe a. Chuveleh, savun thingrem pawh chu a la lawk a, bo mai lo turin hmun himah a

thukru sawk sawk a, Hickock a tlan liam tak na lamah khan a tlan ve leh ta nghal vat a.

      Hickocka chuan thawm chu ngaithla pah zelin a sakawr Black Nill chu a tur ve sauh sauh reng a. Benvo atanga mel thum lai tur an in um hnu chuan phaizawl rai dup mai hi a lo awm duai a. Chung a mi um te chu phaizawlah chuan an kal a, lo lehkhalh hman ngei a duh avangin Black Nill chu tlang pangah chuan a lim chhoh tir ta puat puat mai a. Mualdung a tlan chhuaha phaizawl a zuk pawh leh chiah chuan a tum ang ngei chuan a tlankhalh hman ta chiah reng a. Engtinnge a lo beih ang tih chu a han inngaihtuah leh zung zung a. Chutah a mi um te chu an rawn lan veleh uluk tak chunga lo sai pawp pawp mai chu tha ber dawnin a hre ta a. A sakawr atang chuan chhukin tan hmun tur a siam rem sauh sauhva, Rifle nen chuan a lo chang ta ran mai a.

     Hmeichhia zawng tel kher lo sela chuan dimna tel map lova lo kah pawp pawp mai chu a duhthusam pawh a ni ngei ta ve ang. Mahse hmeichhia an man chu him taka chhanchhuah a duh tlat bawk si avangin fimkhur taka a lo chet a ngai dawn tlat si a ni. A reng thuah hmeichhia chu man kher lo phei sela chuan misualho an lokal tih pawh chu a hre dawn hauh lo emaw chu a ni lawi bawk si a.

Rei pawh a nghak hman lo tih chuan a mi chante chu an rawn lang ta thah thah mai a. Hmanhmawh tih hriat fe hian an rawn tlan tak tak hlawm a. A rinai takin chungho chu an lo tlem mah zawk a. Hmeichhe pawmbettu tihloh phei chu pathum chauh an lo ni a. A zawn an rawn thlen hma chuan a Rifle chu a hmet puak duh mai lova. An rawn hnai ta maw tih veleh chuan a Rifle chu a ko kiah a han chhuang sauh sauhva, a hmet puak ta zawt zawt mai a.

 Chiang zet zet hian pathumte chu an sakawr atang chuan an tla hlawm nghal tawl mai a. Chutihlai in nula kuahbettu chuanna sakawr erawh chuan vung fahran mai hian Hickocka tawmna zawn chu a rawn pel ta thuak mai a. Chutah han kah zui leh mai tuma a Riflea tin leh pawh chu kap ta lovin a Rifle kausa pawh chu a sut ta vat zawk a.

 Rang zet mai chuan Black Nill a chungah chuan a invawrhkai nawlh a, chak mang kheng chuan nula pawm bettu chuan na sakawr chu a um leh ta zar zar zawk a. Han kap ngawt sela chuan kah pawh a kaphlum ngei ang a, mahse a hmeichhe pawmbeh chu inring hman lek lovin a sakawr atang chuan a tla ve hlawl mai ngei dawn a, sakawr tlanchak lutuk atanga tlak chu mipa chak tak tan pawh zuam awm loh tak a ni si a. Silaimu tawn fuh nen a hlauhawm lam chu a thuhmun reng si avangin a um ta zel zawk a ni. Nula pawm bettu pawh chuan chuvang chuan a rawn kap mai phal lovang tih a hriat ve reng avangin luhlul tak chuan a tlan tlang zel ngam pawh a ni reng a. Hickock a chuan a kap dawn anih pawhin hnai set sawtah, a kahthlak pawha hmeichhia chu a tlak ve hma a va țanpui  hmanna hial tur khawpa hnaiah a ni tur a ni tih ngaihdan chu a siam fel thuai a. "Black Nill, he phaizawl kan pelh hma ngei hian saw laia mi saw kan man beh a ngai a nia. I theihtawpa chak khan i tha neih zawng zawng han chhuah tak tak mai teh le," ti in a sakawr chu a fuih sauh sauh a.

 Chutah  Black Nill pawh chuan a pu duhthusam ang ngei chuan a thapui chu a han chhuah ve ta tak tak a, fei khawh ang mai hian a dukin a duk zur zur tawh mai a. Reilote chhung mai pawhin an hnaih sawt kher mai reng a. Hmeichhe pawmbettu pawh chuan tunah zet chuan tihngaihna dang lah a hre der silova, theih ang tawka tlan ngar ngar mai chauh chu a tih theih awmchhun niin a hre tawh a. Hickock a te hma a sakawr tlan ve mek chuan Black Nill chu a khan lo hle tih chu a hriat mai a. Chutih a hnu hmanah mi pahnih ngawt an la han chuang dun ta leh ta nghal vei nen. Minute nga chhung vel mai pawhin hnaih sawt hle hman mai a. An hma a hmeichhe pawm chunga chuang pa pawh chuan an hnunga umzuitu in a um phak hma a phaizawl chu pelh hman ngei tumin a sakawr chu a tur ta sauh sauhva. A ke chuan a kheng thuai thuai reng mai a. Chu sakawr lah chu phurrit bawk si nen, a hah lutuk tawh chu a chil phuante a tla hne hnu tawh mai bawk a, a âng hlui tawh mai a ni. Chutah zawngin a sakawr awmdan chu a hre ta a ni chek ang chu; a pistol a phawi lawk a, an hnung lama rawn umtu Hickocka lam hawi chuan a rawn leh kah ta zawt zawt mai a.

 A mu hmasa ber chuan Hickock a ban puamah tak a rawn fuh ta mial mai a. A mu dangte erawh chuan pakhat mahin sakawr tlan lai atanga rawn kap a ni bawk a, a fuh thei ta bik lova. Chutah zet zawngin Hickock a thinrimna pawh chu a zual ta sauh va, a nung chung ngeia man a, a phu tawka hrem ve ngei a châk et et tawh mai a ni.. 

    Hickock a pawh chuan a ban hliamtuar lo lam chuan a pistol chu a phawi ve ta a.

 A sakawrah chuan a phek thei ang berin a bawh thlap a, "Black Nill, vawikhat chauh tal chu tan han la leh hram teh, kan um pha tep e," tiin a han fuih leh ta sauhva. Chutah leh, Black Nill pawh chu a han kawh leh ta puat puat a, an hmaa tlan mêk pawh chu an umpha a ni ta deuh der mai a. A rual deuhthaw a tlan an ni bawk a, Hickock a pawhin chet ve a hun ta tih pawh Amah rawn kah leh tuma hmelma pa in a pistol a han lekkan leh lai tak chuan Hickocka chuan rang lutukin a lo hmeh puah khalh ta a. Thluak per sawk khawp in a kap ta a. A hnai set sawt bawk a, 38 Revolver mu in a han kap siah mai chu thawh pawh a thawk na ngiang reng a ni.

     Chupa a kah veleh a sakawr bulah Black Nill chu Hickocka chuan a her phei tir vat a, rang zetin nula chu a va pawm nghal nawlh a, muang changin Black Nill chu a dintir ve zui nghal a.

 Nula pawh hlau hlawpa awm a ni bawk a, a thidang lo chauh a ni ve mai a, Black Nill pawh a hah ve hman hle a ni. A han din fel tak hnu chuan nula hlau mangang thlabâr lutuk pawh chu a lo ziaawm ve ta thuai a. Chu  nula leh Hickock a chu la inhmu ngai reng reng lo an ni bawk a, nula pawh chuan mak ti zet hian a han en he haw a. Chutah, "Engvanga min rawn chhan duh mai nge i nih? Khang hote khan Killera hnena min hruai an tum a ni tih min hrilh a, itan pawh a pawi thei hle lawng maw? Killera chu mi hlauhawm tak, a chan chin pawh mi zawng zawng hriat a ni a sin," tiin Hickocka hlauhthawn pui tak chuan a han ti a. Za teh vak fahran lova han then sak pahin Hickocka chuan, "Nula, kei chu min ngaihtuah reng reng suh, him taka rawn chhan hman che a ka awm hlauh chu a vanneihthlak a ni mai," tih pahin a sakawr atang chuan a chhuk a, a kahhlum tak pa ipte vel chu a dap kual nghal zung zung a. Samkhuih tereuh te leh lehkha phek pan thlir thler chu a hmu a, a ak ta hmiah a.

Chupa chu a duh angin a hrem thei ta lova, hrehawm taka han tuartir emaw, khaihlum emaw a châk tehlul nen! Loh theih lohna avangin kahhlum a ngai ta chu pawi a ti rilru ang reng hle a.

         Chutianga a han chet vel zawngte chuan a ban hliam lam chu a rawn thip leh zawr zawr thin a. A thisen chu a rawn hnam tiam tiam reng bawk nen. A kawr ban thi hnuang maite chu nula hmuh loh theih tur ang ber chuan a thup ve ta hram hram zel a. Mahsela chuti taka thi nasa bawk si chu thukru eng ang mah se han inhliah khuh reng sen ni ta hek lo,  nula pawh chuan a rawn hmu ve ta nge nge a.

 Chuveleh rang takin phawk hra chung chuan a rawn chhuk thla ve ta vat a. "I lo inhliam reng anih hi! Khawnge, ka'n en

chiang ang e," tih pahin Hickocka chu a kai thu nghal chawt chawt ta mai a. Hickock a chuan, "A na lo, engmah tham a ni hleinem, a thawi hlek chauh a ni," a han tih ve ngial pawh chuan a thisen chhuah dan atang chuan a na thawkhat hle ang tih chu nula pawh chuan a hrethiam ve mai a. A awih der silo. Dim takin Hickocka kawr chu a phelh sak ta malh malh a, saddle horn a tuithawl chu va la in a inbang la awm chuan a hliamte chu a silfai sak ta hliau hliau a. Mahsela han tuamna mai tur awm ta hek lo, nula chuan a scarf awrh lai chu a la thla lawk a, a pawtthler ta kawk kawk a, Hickock a ban tuam nan chuan a hmang ta mai a. Kal leh tura sakawra an lawn leh hnu chuan, "Khawia cheng nge i nih nula, min hrilh thei ang em? A hlat loh phei chuan kan va thlah nghal ang che," ti in a nula chuan pui chu Hickocka chuan a han zawt a. J.L Ranch neitu Jonathan a fanu anih chu a ring deuhva. Mahse vawikhat mah an la in hmu lo bawk nen, han zawh chian ve reng reng phawt chu a duh a ni.

 Mahsela, hmeichhia chuan, "E, thlah ka ngai reng reng lo, tuna min puihna ringawt pawh hi a ropui lutuk tawh, ka theihnghilh tawh hauh lovang che. Ka pa in min hruai turin Benvo ah khan kan naute a rawn tirh ka lo ring rilru viau a, mahse tu hmel mah ka hmu ta hauh silova, mak pawh ka ti ang reng viau nghe nghe a ni," a han ti ta niah niah a. 

     Chuveleh Hickocka chuan a lo rin ang ngei a ni tih chu a hrechiang ta a, phawk deuh hra chung chuan, "Chuti chu Jonathan a fanu i ni maw? J.L Ranch neitu saw i pa a ni em?" a han ti chhuak ta hlawl a. Chutah nula pawh chuan phur fahran hian, "Ni e, engtinnge ka pa chu i lo hriat ve teh tlat zawk ni?" tiin a rawn zawt a.

 Hickocka  chu a thaw ta hawk a, inthiam lo hmel ang reng tak chung hian, "I pa chuan nangmah hruai tur hian min tir a, mahsela tul dang engemaw avangin Rel rawn thlen lai khan kan la rawn thleng ve hman lo hlauhva, kan rawn thlen meuh chuan i au vau vau leh sakawr rualkhat tlan ri tak tak chauh kha kan rawn hre hman ta chauhva. Chuveleh ngaihthat lohna lian tak ka nei nghal a, mahse nangmah i ni ang tih rin ngaihna phei zawng ka hre hauh lova. Tupawh nise mangang au ri a ni tih ka hriat khan tanpui ngai ni ngeia ka hriat avangin ka rawn um ta ngar ngar mai che u a ni. Tichuan nangmah thlithlai tur chuan Rel Station ah ka thianpa chu a kal thung a," tiin a han hrilh ve ta charh charh a.

 Chutihlai lai chuan nula hmel atangin thlamuanna leh hlimna chu a rawn lang chhuak nghal a, "A va han tih zia leh zel em! Mahse ka pa chuan nang ang mi huaisen leh tuarchhel hi a chhawr tih reng ka hre ve hauh lo mai," a han ti ve ngat a. Rinhlelh deuhna tlem chu a la tel a ni. A han nuih deuh sak paha a mitmeng mawi tak han zim deuh san te phei chu lo hmu ve tu awm sela chuan mawi an ti ve hle ngei ang le.

   Chutia an titi pah bawrh bawrh lai chuan a hmaa Hickocka'n a kahhlum tak mi pathumte ruang awmna kha an lo thleng phei leh tawh a. An bulah chuan Hickocka thian Kidney a pawh chu a lo vei thauh thauh bawk a.

A kuta sam khuih te tak te pathum leh lehkha var tlem nen a lo keng tel va va chu Hickock a te chuan an va hmu ta nghal a. Kidney a bul an va thlen veleh chuan, "Hickock, heng bak hi chu anmahni atangin han chhui chian theihna engmah hmuh tur dang, han chhuichian theihna tur chi an pai tlat lo. Mahsela an vai hian Black Bond a puibawmtu vek an ni a. Black Bond a bulah pawh ka hmu fo tawh hlawm a ni tih erawh chu ka chiang, tunah an pan mek hmun pawh hi khawidang teh vak mah ni lovin The Fog Bound hmun chu an pan a ni. Nang kher phei chuan va um zui hlauh lo la chuan Killera hnenah kha i nula chuanpui Lori kha a awm ngei dawn a ni," a lo ti lar lar a.

a.

    Mak tihhmel ang reng taka en hau pahin Hickock a chuan, "Engtinnge nula hmingte chu i lo hriat hmanhmawh theih bik a?" a han ti ve ta hluai a. Kidneya chuan then deuh tha chung chuan, "Rel Station ah khan Lori savun thingrem leh romol ka va hmu a, chu romol var thianghlim takah chuan, 'L. Jonathan' tih a lo chuang kiau mai maw le; Chung savun thingrem leh romol te chu duh vang renga dah an ni lo tih lah an awmna hmun atang chuan a chiang tlat bawk a ni," a han ti leh ta zung zung a.

 Kidneya'n 'Hickock' tih hming a han lam rik takah chuan Lori Jonathani pawh chu a phawk ta hau mai a. Chu amah chhan chhuaktu, sakawra a thutpui ngei mai chu Pistol phawi rang hming thang turu lutuk 'Wild Bill Hickock' a lo ni reng mai a nih chu maw le! Chu a chhapah a pa rawihlai ngei mai a lo ni bawk si nen; Chuta tang zet zawngin Lori pawh chu namen lovin a thla a muang nghal huai a, mahsela a langah chuan engmah chu a sawi chhuak rih hauh lo thung.

Chuta tanga an chhuah leh a Rel Station a Lori thingrem vel te leh thawmhnaw awmna hmunte an va thlen chuan an inrem tha nghal mawlh mawlh a, Benvo khaw kawtthlerah chuan an rawn phei ta a. Lori Jonathani chuanna tur sakawr leh bungraw phurtu turte an lei hnu chuan sakawr jean te chu an lei leh a. Reilote ah J.L Ranch lam pan tur chuan an in siam peih fel ta der a. 

An kal hma in Kidneya hnenah chuan, "Kid, Lori hi J.L ah ka va dah ang a, bawngrual hralh tur nen nihnih hnu lekah kan rawn let leh thei mai in ka ring. Mahse chumi chhung chuan nang pawhin Black Bond a chungchang pawh chu i lo hrefiah hman vek thovang chu," Hickock a chuan a han ti leh ta charh charh a. Kidney a pawh chuan, "Ni e, ka lo hre fiah hman vek ngei ang. Tuna kan thlenchin atang mai pawh hian Black Bond a leh Killer a chu Partner (tum thuhmun) an

ni tih chu a chiang tawk thaw khat viau tawhin ka hria a, mahse chian lehzual tluka tha chu a awm lo alawm. Ka lo chian ang e. Anih leh tluang takin va kal phawt mai rawh u," tia han chhan pah chuan thlahna tawngkam a telh pah a.

 Engmah dang pawh sawi leh tawh lovin Lori leh Hickock a te  pahnih chuan Benvo khua chu an chhuahsan ta nghal a.. 

Hickock a te kal liam kawtthler kilkhat atanga lo nuih zui vur vur paha Marshal Tima'n, "Damin J.L zawng in va han thleng dawn chuang lo rua ve le! Black Bond a thangkam pakhat chuan per thelh che u mahsela a vawihnihna zawng in tuarchhuak tawh hauh lo ngei ang maw le," a han tih bul bul thawmte chu hre pha ve hek lo, ngaihtha hmel tak chuan an kaldun ta hnak hnak a. Hickocka chuan ring chiah lo mah se fimkhur thu hla avangin lo changtu pawh an awm hlauh mai thei a,  an lo awm anih pawhin a hmu hmasa tu zawka țan ngei chu a tum tlat a, ngun takin a mit chu a len pah reng a.

Ngawi reng chuan an kaldun mawp mawp ringawt a, an ngaihtuahna chu a inang lo hle ngei ang le!

Lori chuan a kianga sakawr dum lianpui chunga chuang palian ve tawk tak, zaidam leh rinawm hmel zet mai, pa tak mai leh hmelchhe lo tak bawk si chu a va melh phei leh ralh thin a. A kianga awmte chu nuam a tiin, a thla a muang siai siai tawh mai a ni. Hetiang zawng hian mipa tumah hi a lo la en ngai reng reng lova,. Tun tum zet hi chuan a la hriat ngai loh thil a tawng ve ta a ni. A rilru te te chuan a duhawmna lam hlir chu a ngaihtuah neuh neuh reng a. 

      An vanduai ai tur ve reng em ni teh reng dawn ni? Ngaw pakhat pel phei a, kawrruam ang reng tak mai an zawh lai chuan Hickocka pawhin Lori chu a va melh let phei ve ta hlauh mai a. Mak tak mai in atu amah mah chuan mit han lak sawn leh pawh chu an tum ta lo ani awm mange tih mai tur hian an in melh vawng vawng a. An mit leh mit vawikhat han intawnna chuan thu tam tak a sawi tlat mai a ni.

Mawi leh duhawm zet mai hian Lori chu a han nui seih a, Hickocka pawh chuan a lo nuih let ve sak bawk a.

 Chutihlai tak mai chuan Rifle hi a rawn puak ta thuai mai a, Hickock a lukhum parh chu a leng nghal lawp mai a. Chutih rual rual chuan Hickock a chu leiah a let thla nghal tawp a, a leh thlak pah chuan, "Lori, leiah let nghal vat rawh," tiin a han authla ve nghal tuar bawk a. Lori pawh chu Hickocka hrilh ang chuan a awm ve ta nghal vat a. Rifle rawn puak zui zawt zawt lakah pawh chuan engmah ti lovin an him theih pah ta rih a.

Chutah kawngsir hnimbuk kara biru turin Lori chu a va hrilh leh a, ani pawh chu hnimbuk karah chuan a zuang lut nghal zawk a. A han chet vel zawnga a ban nâ leh zawk thin pawh chu ngai pawimawh duh tawh lovin Rifle  puahna lam pan chuan rul tleng ang maia thawm nei lo chung si chuan a pan ta hrauh hrauh a, a theih ang tawka chak chuan a kal zel a.

 A leilung vel chu a rem lovin a duh anga chaka kal tur pawh chuan a harsa ang reng hle mai lehnghal a. Mahse kar lovah engemaw titi chuan thui tak chu a thleng chho thei ta hram tho va. An awmna lai vel tak chiang taka hriat a duh avangin a ke bula lungtum kuttum tiat vel chu a chhar a, thlang lam hla fe a hnimbuk chu a zuk deng che ta lawih mai a. Chuveleh a sir lawk dinglam fit sawmnga vel tur atang chuan Rifle chu a rawn puak leh ta thuai thuai mai a. Chutiang bawkin a chhak lawk lungpui phen atang chuan a rawn puak ve nghal zat bawk a. A chhak lawk ami phei chu Rifle ngul hmawr rawn de chhuak zawk pawh a hmu thei nghe nghe a ni. 

        A khawilam a mi zawk nge pan hmasak tur ni ang tia a han ngaihtuah zung zung chuan a chhak lama mi chu panchhoh hmasak thain a hre ta a. Mahsela a zawn taka chhuak chho lovin a helkual te te a, chutah a chhak lam atang chuan a thlanga mi, anmahni rawn kaptu, lungpui chhak lama kun chala awm chu chiangfe hian a zuk hmu thei ta a.

Chutah Hickock a chuan a kawrban chhunga chemte chu a han thing chhuak nawlh a, thawm nei hauh lovin chupa lam hawi chuan a thlawk thla fua mai a.

 Chu chemte hriam chin zawng chu a tukkhum thlungah tak mai chuan a zuk lut ta thawih mai a. Chu veleh  awrawl pawh chhuah hauh lovin chupa chu a thuthmunah chuan a let nghal hlawl mai a, vawikhat chiah a ke chu a han leng uih a, a zal hlen ta der mai a.

Thawm nei hauh lo bawkin Hickocka chuan a pan thla ta vat a, a tukkhuma chemte bur ngar chu phawi chhuah sakin a han hrufai thuak thuak a, a ngai bawka thuhrûk leh pah chuan thlang lam sira mi kha a zuk thlir thla a, hmuh zawng a hmu thei hauh lo nain a awmna lai tur awm ang erawh chu a rin hriat theih thova. Fimkhur tak leh chetsual palh hlau takin chupa chu a veh thla leh ta them them a. Chupa tawmna lai tur ni ngeia a rin, Miner ho rangkachak zawn velna ni awm taka lei khuar kak mai chu ngun deuh hian a zuk bih a; a rin ang ngei in chupa chu Rifle humin thlanglam hawi chuan a lo bawk phek thlar mai a. A mi chan bera lah chu a chhak lawkah duh tawka amah that thei mai tawh turin a ding vang mai si a, hmu leh har pawh a inti hle tawh ngeiin a rinawm. 

       Hickock a chu a nuih takte pawh a za ru hle tawh a. Duh chuan that nghal thei mai pawh a ni teh meuh mai. Mahse thu zawh chian duh tam tak a la neih si avangin a nung chung ngeia man a tum ta a ni.

 A hnaih thla ta hle mai tihah chuan a rinloh deuh mai thil a chungah a zuk thlen ta a, "Thih i la duh lo anih chuan tha takin in pe mai rawh," tiin Hickocka chuan a zuk au ta thut mai a. Chutia a han auh thut takah chuan amah lo changtu pawh chu a phuchiang ve kher mai! A kâng awk a, a rawn inher nghal a. Chu aw a hriat tirh chiah kha chuan a thianpa aw ni turah a han ngai deuhva, a han ngai thutak vak dawn lova. Mahsela Hickocka hmel rum lutuk mai leh 38 Revolver pistol kaw hmawr thim mak mai in a lo thlir heu mai a han hmuh meuh erawh chuan thil awmzia chu hrilhfiah hran a ngai lo kher mai. Luhlul chhuah han tum lui vaih sela chuan a lo bawhna lei khuar kuk mai chu a thlankhur tur a ni nghal dawn tih pawh a hrechiang a, thih mai chu a la tum bik lo a ni ngei ang, rang deuh chuan a Gunbelt a phelh ta vat a, a inpe ta nge nge a. Kawngpui lam pan chuan an in chhawm thla dun ta hnak hnak a. 

       Kawngpui an pawh thlak dawn tep chuan chupa bekah tak mai chuan a pistol kawmin Hickock a chuan a han chhu ta bur mai a; chu veleh a ni chu leiah a tlu awp nghal nawk a. nikhaw hre lovin a awm zui ta a. Tichuan bungrua vel an phurhtirna sakawrah chuan a phuarbet ta mawlh mawlh a, nghet fahran mai hian. Rawn harh chhuak leh pawh nise a thaw thei chauh ang tih mai bak chu engmah ti thei tur ziazang a ni lovang tih khawp chuan a phuarbet ta tlat mai a. 

      Lori chu a rawn lan tak mai loh avangin Hickocka chuan a han au rawng rawng a, mahse chhanna riva reng a hrethei ta hauh lo mai! Hnimbuka a luhna zawnah khan va kalin hnimbuk kar a han bih chiah erawh chuan Lori chu che map lo hian a lo tlu khawng reng mai niin; Mahse, engtia chutianga lo tlu khawng reng mai nge tih chu Hickocka chuan a hmu ve chawp chilh ta nghal vat a. Rul, mi chukhlum thei,  hlauhawm em em mai chi, Rattle Snake hian Lori chu chuk mai tum hian a lu a lo kan ar ar tawh a. Chuveleh rang lutukin Hickocka chuan a pistol chu a phawi dawk nghal zawk a, a kawng zawn atang chuan a hmet de nghal zawk a. Chutah meuh zawng chu rul chu lu bung hmawk chungin Lori hma ah a tal vial thlep ta tap tap a, a thi ta thuai a. Lori Jonathani chu hmai dang var vek tawh chung chuan a rawn tlanchhuak ta vat a, engmah pawh ngaihtuah chang tawh lovin Hickock a chu a rawn kuah nghal thlawp a. A hlauh em avangin a khur zeih zeih bawk a.

Hickocka pawh chuan lo kuah ve nghal chawtin, "Lori, hlau reng reng suh, tun bak hi chu engmah buaina leh manganna kan tawk tawh lovang, thlamuang takin awm rawh," ti in a han hnem a. Lori pawh chuan, "Hickock, nang kher ka pa in a rawn tir che hi chu ka lawm tak zet zet a ni, lawmthu han sawi ngaihna lah ka hre der silova, i chungah hian ka lawm a ni. Thu tam tak sawi dun tur pawh kan la nei ang," a han ti sep sep a.

          Chutah kawngpui lamah chuan an chhuak chhova, sakawrah chuan an han lawnkai leh dawn a, chutia a pangngai mai emaw Lori in a lo tih lai chuan thilmak danglam tak chu a hmu ta thut a; mak ti deuh chuan lawnkai a tum lai mek chu a han tawp leh chawt a, mak tihmel tak chuan a meng bial kal mai a.

 Hickock a chuan Lori awmdan chu lo hrethiam ve vatin a thil hmuh awmzia chu a han hrilhfiah leh rih a.

"Hemi hi min lo changtu pakhat zawk a ni a, nâ teh vak pawh a tuar rih lo; thil zawh fiah duh ka neih avangin a hawn a awlsam nan ka ngawihtir rih mai chauh a ni. A thianpa erawh chu engtikah mah a tawng leh thei tawh lovang," tiin a han hrilhfiah zung zung a. Lori pawh chuan a sawi awmzia chu hrethiam takin a lo bu ve nghat a. Tichuan a chuanna tur sakawrah chuan a lawnkai ve zui nghal a, an miman pa phurtu sakawr chu kai in J.L Ranch lam pan chuan an kal leh ta thuai thuai a, rilru lung muang tak chuan an kal ta zel a.