Bung-11

 Kid Rodelo by Louis L'Amour

BUNG SAWMPAKHATNA

Rodelo-a chu khawthlang lam panin engemaw chen a inkhalh phawt a, chutah chhim lam hawi zawngin a kal leh ta char char a. Tuikhur a kalsan a ṭanga rei vaklo ah khan tu emaw in an zui reng niin a inhria a. Chutia hmun tin aṭanga hmuh theiha a inlar ta chu saruaka awm ang mai ni hian a inhre bawk a. Nuam a ti lo kher mai. A Winchester Rifle chu hman mai theiha lek reng chungin a mit chuan che hlek an awm pawha hmu hmasa tu nih ngei tumin kiltin kil tang chu a en kual pah reng a. Leia hnuhma te chu a en pah zel bawk a.

 Chutah hnuhma chiang vaklo chu a hmu ta a. Kuttum tiat vel lung, leia awm chu a hma a  a awmna ṭhin aṭanga insawn niin a hmu a. Chu thlaler lung chu vaivutin bawhin, sik leh sa in a hmeh hrep hnu tih hriat takin a awm a. A landan chuan a lumsawn hlek niin a hriat a. A chunglam ni ṭhin chu leilamah a inphum tlat a ni. Mihring emaw ramsa emaw in rapin, an palsawn hlek niin a lang. Engemaw chu helai hmun ah hian a kal chiang a ni. Chu chu atan chuan ralkhel dar a ni nghal ta bawk a.

Rodelo-a chu inralring tak chungin Cholla buk karah chuan a lut phei a, Sahuaro thing hlim hnuaiah chuan a han chawl leh hlek a, chutah a che chhuak leh ta a.  A kal tumna hmun tak chu a hla tawh vak lova.

Tunah chuan Badger-a, Harbin-a, leh Nora-I chu thlaler vaivut tlang pawngah chuan an kal mêk ta ve ang. Chutah chuan ke pil hmawk hmawkin vaivut chu an dai ang a, pen hnih an pen rualin pen khatin an tawlh let leh nghal zel ang a. Sakawr chungah an chuang a nih pawhin sakawr pum thleng hmawk in an pil ngei ang le.  Vaivut dur hmun an kal tawh chuan ram chin an chhinchhiahna Pinacate hmelhmang awm dan pawh an hai rum rum tawh dawn a ni. An fimkhur loh phei chuan vaivut dûr hmunah chuan a ni lo zawngin an kal chiam thei bawk a. An kalna tur diktak lam zawh fuh reng chu harsa an ti ve khawp ang le. 

Tunah chuan a kal tumna hmun pawh a hmu phak ta a. A veilam tlang bulṭhutah chuan Mesquite hnimte chu a lo ṭo buk liai a. Sahuaro leh Cholla te pawh an awm nual mai. Chulai hmun chu Grulla hnuchhiah nan pawh duhthusam niin a hria a.

A sakawr buang thuk mai chu midangte ta ai chuan a zia deuh hrim hrim bawk a. Thlaler hmun, chaw leh tui vãnna bakah hmun rualremlo leh hrehawma tak tak chetla ṭhang niin, eng dinhmunah pawh sakawr rintlak tak a lo ni tawh thin a. A chipui dang te an beidawnna leh an tluk hlumna thinah pawh dam khaw chhuak fo ṭhin a nih avangin Rodelo-a sahuai neih pakhat chu a ni ngei dawn a. He thlaler aṭanga chhanhimtu tur pawh hi a ni ngei ang le.

 Rodelo-a’n Mesquite buk kar a han thlen phei  chuan a sakawr aṭangin a chhuk a, Gulla chu a thlung ta a. A thangbo hlanin chu sakawr chuan chulai hnim a ei theih ang ang te petin a lo in eipuar dawn a ni. A rifle chu lain, hnim buk awmna aṭang chuan a kalna tur ruam rai lam panin tlang pang awihah chuan a chho ṭan ta a.

 A awmna aṭanga Yard za vel laia hlaah chuan Yaqui pakhat hi rawn dakchhuak hlawlin, khua a han chuan vang vang a. A sakawr aṭanga chhukin, intihsiakna bei tur chuan a lo che chhuak ve chiah a. Kawngṭum kal zel dan chu a hre sa vek a. Rodelo-a chuan a beisei dan angin chêt a la em tih a han ngaichang leh te te a, Tlang chhip lam chu a rawn pan ve ta a. Khân an inhriat hleih deuh avangin Mingopa ai ngawt chuan chet vel pawh a awlsam hle zawk a ni.

Chu Indian pa chu a hmaa thil lo thleng tur ngaihtuah chuan a phur hle a. A mit te chu a lo de chhuak sawr sawr a. Mingopa chu Hat-a sawi fo Boot thar bun pa kha a ni tih a hria a. He pa bawk hi tuikhur awmna pawh hre em emtu kha a ni a. Indomi hratkhawkheng tak pawh a ni mahna. A ruang a hawn huna an mi leh sate laka a inchhuan dan tur leh an ngaihsan dan turte chu a ngaihtuah lawk nasa mai a. Thil pakhat a chian em em chu - chu mingopa chu a thihna tur hmun panin a rawn lawn chho zel a ni tih hi.

 Dan Rodelo-a’n a kal tum na hmun a rawn thlen chuan thil danglam em em  hmuh a nei hran lova. Chhim lam aṭanga kal khân rawn chho raih chu a hmu a. Chutiang kawng a awm tih lo hre sa se chu, chu lam aṭang chuan hahdam deuh pawhin a pan chho thei tur hi a ni a. Chulai hmunah chuan Cholla a lo ṭo buk luai a, thlaler hnim ding ro leh cactus thi tawh ṭang ro te pawh a lo awm nual a..

Chungte chu fawmkhawmin, mei chhemna tur a han buatsaih a, nawalh chu a han nawt a. Thlifim rawn thaw chuan a chhêm hlum tak avangin, a rifle chu a bula lung ngheng chuan a tung a, nawalh dang chu nawt turin a han inbuatsaih leh a. Bawk titih deuh pah hian a vel chu ngun takin a han thlir kual leh te te phawt a. 

A awmna chu ruam lai deuh a ni a. Khawchhak lamah chuan Tlangkang in leilung a vawrchhuah awm nuai chu a hmu thei a. A vei lamah chuan ṭiaudûp hmun chu a awm a, hla takah laiking bel rawh chem chem karah Gulf pawh a lang riai ruai a. Engemaw ti taka nawm lohna chuan a rawn ṭham er er a. Mahse, a thiltih lai chu buaipui zui lehin nawalh bawk pahnihna chu a han nawt leh dawn chiah tihah chuan a hnung lamah chuan engemaw ni hian lung chu a hrût ri hreih a. Nawalh bâwk keng chung chuan chulam chu a han hawi vat a. Laiking pakhat hi lung chungah ang deuh hlui hian a lo bawk hle hle a.  Laikingin riva a rawn siam mai mai em ni dawn le? Chu laiking chuan a lu a kan ar a, rang deuhin vaivut zingah chuan a relh bo ta nghal a.

Meikhu chu siam a ngai hmasa ber a ni. A beng chu ri hlek pawh hriat tumin a chhi pah reng a, A nawalh chu nawtin hnahthel leh thingṭang  ro a chheh chu a depkai ta nghal a. A rawn khu chem chem a, a han vur belh leh lai tak chuan a hnung lamah phunri sep hi a han hria a, sir lamah chuan a let phei nghal tawp a.

Yaqui pa chu a hma lawka Rodelo-a lo bawhna laiah tak chuan a ke artuiin a rawn ding chawt a. Rodelo-a chuan a ke pahnihin a lo tlawh nghal ṭhuai a, Indian pa chu a pai nawk nawk a. Indian pain a chemte, hniam reih rawiha vilik chunga a rawn in her fel meuh chuan ani pawh lo dingchhuakin a lo inring tawh kher mai.

Dan-a chuan chu Indian pa chemte kenna banrekah chuan lo bêng perin a kut lehlam chuan a kuahbet nghal a. A ke chuan a kherh bet nghal bawk a. Indian pa chu leiah a tlu thlawrh a, a chemte pawh vaivutah chuan a tla nghal a.  Indian pa chu rûl ang maia man ngheh harsa niin, Rodelo-a vawnna aṭang chuan a tâl pût a, a rawn inperh tho leh nghal a. A rawn thawk phei leh ta nghal a. Rodelo-a chuan lo bumin a kut dinglam chuan hnek tumin a han vai a. Indian pa chu a ding chawt a, Rodelo-a hmanhmawh deuh chuan vai ṭhelhin a tum loh deuhin a va fin ta rawk mai a. An pahnih chuan leiah an tlu ta a. 

Indian pa chu a che rang zawk ta deuh a, Dan-a ban chu vai kiangin, a hrawkah a rawn rêk ta chawt mai a. Rodelo-a chu a zangthal zawngin a awm a, Indian pain a kut pakhat a a rawn reh lai chuan a ke pahnih chu sang taka vaiin Indian pa hmaiah tak chuan a sakawr khenna spurs chuan a fuh ta chawrh a. Indian pa chu hnung lamah a tlawh let dawrh a, a hrawka a rehna pawh chu a thlah lo thei ta lova. Rodelo-a chu thaw hlawp hlawpin a lo dingchhuak vat a, Indian pa rehna zawn a nghawng chu a duk nghal khuih mai a.  

Yaqui pa chu a rawn vir phei leh zawk a, a hmai chu Spurs in a taina avangin a kak duai a, thisen a luang nguai nguai a. In ring em em in chemte nen chuan a rawn zuan leh ta a. Dan-a chuan lo bum lehin Indian pa chu leiah chuan a thla thum leh ṭawk a. A rawn inperh thawh leh pah chuan chemte chu a rawn vai a, Dan-a kawrban chu a thler nghal hawk a. Dan-a pawh hun remchang melh chungin a che fimkhur ta kher mai. Indian dangte an awm hnaih takin tiin silai a hmang ngam si lo. A chemte pai chu chuh ve  tumin a hren behna chu a han phelh a. 

Chulai tak chuan Indian pa chuan rang tak leh na em emin a dulzawnah chemte chu a rawn vilik tle leh zawr a, a lo bum pumplum thei ta bik lova, a dul vun chemtein a ât hlek chu a hre chiang ngang mai a. Mahse Indian pa pawh chuan a tum fuh chiah bik lo, ban vaina tawh laklawh si chu a vir nawk a. Dan-a chuan a khupah tak a lo tlawh zui ṭhuai a. A insiamrem leh hmain a bawh zui ta nghal a. A taksa chu chawikangin an bul lawka Cholla buk zingah chuan a paih lut ta thlawrh a. 

Chu Indian pa chu a ṭê chûl a, tal chhuah tumin a bei nasa mai a, a tum nasat poh leh Chola zar leh hling dangte chuan a man tam tawlh tawlh a. A tal nasat poh leh a tang nghet ting hi a ni mai a. Dan-a pawh chu tawlh kirin a rifle chu a han la a.

Meikhu pawh tunah chuan a ding chho laih laih tawh a. Mei vur belh pah chuan Chu Indian pa natuar lai mek chu a han en a. "I rawn châk em a nih kha, nauva. I chhuah theih dan dan khan lo chhuak ve mai teh," tih pahin a kalsan ta nghal a, kawng rualrem lo zetah chuan a chhuk thla ta zel a. Yaquis ho chu an lo kalkhawm mek ang a, engtianga hlaah nge an la awm ang tih erawh a hre bik lo.

A chuan hnuai lam a thleng thla ṭêp tawh tihah chuan Sakawr chung-chuang pakhat, Mesquite hmun aṭanga kawng ṭuma a chhuak phei lai chu a han hmu a. Joe Harbin-a a ni. Gurulla chu a lo kai mek bawk a!. "Joe… Joe !" tiin a han au tuar tuar a. Harbin-a chu sakawr zina thu pah chuan a rawn hawi a, a kutzungpui a rawn tipir a, a kal ta zel a.

Thinrim em em in a rifle chuan a han tin a. Mahse, Harbin-a chu ruamah chuan liamthlain, kah phak a ni ta lo. A rawn lan leh meuh chuan  kah ṭhelh a, Grulla chu kahfuh palh a hlauhawm tawh bawk si.

Tunah chuan mitthi tluk in an dah ta. Sakawr leh tui a nei ta lo. Yaquis ho lah chu an rawn hnai tual tual a. A chêt chhuah hrim hrim chu a ngai a ni. Engtin tin emaw tui a neih a ngai a, ṭiaudûp hmun chu a paltlang a ngai a, A dam khawchhuak tur a ni ringawt. 

A dinhmun diktak chu hriain a thin chu a phu dawt dawt a. Thlaler chu a hriat chian em avangin a chan chauhzia pawh a hrechiang hle a ni. Sakawr nena a tui dah thuhrukna hmun pan leh chu a harsa lemlo nain, ke ngata kal ralah chuan thih leh dam inkar tak meuh a ni dawn ta a ni. Olla chu va hmu pawh ni tehreng se, lo keh vek ta se engtin nge niang le?

A chêt chhuah a ngai. Mahse, a che nghal mai lo. Tun aṭang chuan a ke pen tin chuan kawng dik tak a zawh a ngai tawh dawn a. Ngaihtuahna mumal nei lova chet chhuah ringawt chu intihhlum tumna a ni ringawt a ni.

Tom Badger-a khan ṭiaudûp kawng lamah chuan a hruai ngei ang a. Joe Harbin-a tello pawhin an lo kal fe tawh mahna. Joe-a’n a va fin meuh chuan ṭiauvut dûp karah an lo talbuai hle tawh ang. Ṭiauvuta an luh meuh chuan sakawr te pawhin ṭangkaina an nei vak tawh dawn lo va. Pa pahnih leh hmeichhe pakhat ringawt chuan paltlang turin an beih ve fe chu a ngai ang. Chutih lai chuan Indian ho pawhin an lo hual hnai zel bawk ang. Thlalêr ṭiaudûp hmunah chuan sakawr ai pawhin patling ke a kal chu an che chak zawk thei ang.

Rodelo-a chu darkar engemaw zat tui in lovin a kal tawh a.  A rindan chuan tuna a awmna aṭang hi chuan anni ho aiin vaukam chu a hnaih tawh zawk mai thei, a hrechiang ngam chiah bik lo. Ṭiaudûp hmuna bo palh chuan thih mai pawh awlsam tak a ni a. Chuvangin, tun aṭang chuan thihna nena inchibai thei rengin a hun a hmang tawh a ni tih pawh a hrechiang hle a ni.

A kal zel a, a ke pen te chu a rit nulh tawh mai a. Thing hlim awm thei ang ang te chu a bël pah zel a. Hmuh theih lohva a  awm vat theih nan tlang aṭanga a hla thei ang bera chet sawn zel chu a thil tihtur hmasa ber a ni ta phawt a.

Tunah chuan chhim lam panin a kal mek a, muang changin a pen a, ram awih tlan dan a zir chuan a ke chheh chu a siam ringawt tawh a. Buaina tawk mai turin a inring em em reng a. Hmalam a pan zel theih avang ringawt pawh chuan a lawm a. A hma lawk khawiah emaw chuan inbeihna rura takin a hmuak mek chu a ni si a. A vanneih hlauh chuan Nora-i leh rangkachak chu a chang thei dawn a ni. 

Atir lam darkar khat vel chu harsa lutuk lovin a kal a, nuam pawh a ti phian a. Mel hnih leh a chanve vel chu a kal tawh mai thei. A dawt leh chiah chu Tlângkâng leilung paltlang a lo ngai a. Vaivut dûr hmun ah chuan lut zauh zauhin a chhuak leh mai ṭhin a. Mel chanve pawh a kal hlei thei ta lo. Tuifinriat kam lam pana ṭiaudûp hmun lama inher a paltlang tum mai chu a châk angreng viau a. Vaivut chu duhthusama chhahin a inphah zui mai a. Mahse a ngam chiah bawk si lo. Tui a mamawh takzet ta bawk si.

Tunah tak chuan a dangte chu a ro zo vek tawh a. A hmui a rêp khi phawk phawk a. A leite chu a kaah a bet tlat in a hria a. A ke pen pawh a muang tial tial ta. A chevel pawh a muang ta kher mai. Silai paih mai duhna thinlung a neih chu a insum hram hram a. Indian ho erawh chu pakhat mah a la hmu lova.

Tuikhur a rawn thlen chuan ni a tla suar suar tawh a. A beisei ang ngeiin midangte chu an lo chhuak vek tawh a. A hlauh rilruk ang ngeiin Olla chu a lo keh vek a. Joe-a tih a ni ngei ang le. Mahse a kehthem pakhatah chuan a mawngkil luah lekin tui a lo la awm a. Lem khat pawh tling lo tur chu kham lo em emin a han in a. Tuikhura tui zawng zawng chu farkhat  mah pawh banglovin a lo kang vek tawh a. Thil pakhat erawh hmuh a nei tlat mai, Silaimuin a verh pawh tawh hnu Tuithawl an kalsan chu a lo la awm a. A tuamna puan chu a han pawtthler a, a thirah chuan dai tling a awm thei mial mahna. 

Chêt chhuah leh chu a han rilruk nain, a tih chi dawn lohvin a hre leh ta deuh a. Chulai hmuna chawlh hahdam rih chu a titlu ta a. A han mu a, muthilh a han tum a, mahse a tuihalna chuan a tiharh leh ṭhin. Chutah tuikhur chungah chuan Cactus dâwngṭha deuh awm chu a hrechhuak a. Fimkhur takin lung karah chuan a lawn chhova, a han hmu ta ngei a. Hnungzâng na ṭhumin a lêr lam chu a chhawk a. Engemaw zatah tan bungin, a kaah chuan a tui chu a sawr ta a. A kha viau na a, a hnawng ṭha hle mai a. A kung tanbun hmawr lam chu hmuamin, rei tawk a han sawr vang vang a. A let tawp a, a muhil ta nghal a.

Khawvawt vin tuk mai chuan a tiharh leh thuai a. Tuithawl lam chu panin dai lo tla chu a han liak a. A tlemtham hle na a, a zia deuh chuan a hria a ni.

Sierra Blanca hmuna tuikhur awm chu a han ngaihtuah a. A vanneih hlauh chuan tui a lo awm maithei a. Tunah a chet chhuah nghal mai chuan khaw en hma deuha thlen phei theih mial a in beisei a. Mahse, tui lo awmlo ta se? Chutiang a nih chuan tuifinriat kam lam chu a panding tawh mai dawn a ni. Chu erawh atan beiseina a awm lo tluk a ni.

Chutianga thutlûkna a siam fel takah chuan a che chhuak ta nghal a. A taksa te chu a rawlin a khawng ṭhûm mai a. A hriatna te chu a bîng mup a, enge a tih mek chu a hrechang chang chauh a ni. Chhim chhak lam kawlkilah chuan Sierra tlang ṭiṭoh nuk chu a hmu thei a. Tuifinriat lam panding mai chu a han tum leh deuh thut thut ṭhin a. Thil kal dan dik se chu tunah chuan Vaukamah a ding vang tawh ngei ang le. 

A tlu thlawrh a. Pai ṭawng ṭawng in a ding chhuak leh a, zu rui ang maiin lung karah chuan indapchawpin a kal zel a. Hmun zawl rualrem deuh hi a thleng phei a, kal chak thei ta deuh in a inhria a. 

A hnu lawkah chuan khaw lo êng tial tial chu a hre thei a. Vawi tam tlûk leh kal fawmin hmalam a pan hram hram a. Tlang lah chu  a lang hnai hlei thei mang si lo. Tlang bulṭhut a thleng phei ṭan tihah chuan a tlu leh thlawp a. Tun ṭum chu a tho thei ta hauh lo mai !

A khup pakhat rinchhan chuan a han ṭhingṭhi a, din hram a tum a ni. Mahse a thei thlawt lo chu a ni e. A dul hnuaia  vaivut sa lutuk avang chuan Feet tlemte a thui chu a han bawkvak leh hram hram a. A rilruah chuan boruak chu 120 degree vela sa niin a ring a, chuti a nih chuan a bawhna vaivut sat zawng chu 160 degree vela sa a lo ni ang. Mahse, a tho thei thlawt si lova. A rifle leh tuithawl chu a kuah ran mai bawk a.

Engemaw chen a han leh rên râwn hnu chuan Cactus dâwng ṭha deuh hi a bul lawkah chuan a lo awm reng tih a han hmu phut a. Chungte chuan chakna a pe thar leh te pawh a ni mahna, a silai rinchhan chuan a han inpawt ding ta hram a. 

Chemte keng chung chuan a tlu phei nawk nawk a. Cactus kung chu a va kit leh ta a. A hnâwng pai te chu a kaah chuan a han sawr lut leh ta a. A vawhna leh hnawnna te chuan a taksa pum chu a fan dam huai huai a.

Minute engemaw zat a chawlh leh vang vang hnuah chuan a che chhuak ṭan leh ta a. Sierra Blanca hmuna tuikhur awmna a thlen phei chuan ruam khur chhunga lung kehkak karah hian tui a lo awm kung mai a. A vawt tui em em mai leh nghal a.