Bung-10

 Kid Rodelo by Louis L'Amour

BUNG SAWMNA

Nisa em em mai lakah chuan han inhliahkhuhna tur reng reng a awm lova. Chhum leh hlim eih pawh a awm hek lo. Chau takin an sakawr zinah chuan inham tângin an kal ṭawk ṭawk hi a ni mai a. Khaw lum namên lo tak chuan an tha leh zungte chu a hip ral zo tawh ni maiin a lang. An khawhmuh te chu a tawi tuk tawh a, an mit an lênkual te chu an muang raih mai a, an kut te pawh an chêt hlei thei tawh mang lo a ni. 

Dan Rodelo-a chu a han ṭhu ngil hram hram a, a sakawr aṭang chuan a tawlh thla a. Eng pawh nise a sakawr, Grulla chu a chhanhim hram hram a ngai a ni. Chu ransa buang thuk mai chu thihna kut vawtin a man mêk laia a thil neih chhun ni tawh maiin a lang a.  Tunah chuan an in mamawh tawn takzet ta.

Tunah zawng Yaquis ho tan pawh engto tham an ni ta lo. An rawn lan zui tak loh danah lung hmun an paltlang aṭang khan an hnu chu Yaquis ho chuan an hloh rih te pawh a ni mahna. Tumah chu beiseina thui tak han nei thei dinhmunah pawh an ding tawh lova. Tui chungchang pawh an sawi ta lova, an ngaihtuah hek lo. Eng dang mah ngaihtuah thei lovin an rilru chu a mang vek tawh niin a lang.

 Nora-i chu a rawn ṭawng chhuak hlawl a. "Saw le! a awm ka ring tlat!" tih pahin kutzungṭang rawn pir chhuak ang deuh a Lungpui pakhat huala Sahuaros (Cactus chi khat tho) inang tak tak pathum dinna chu a han kâwk a.

A lo awm loh palha a beidawn thlak ṭhin zia hriain, tui awm leh awm loh en tur pawh chuan an hmanhmawh peih tawh lova. Rodelo-a chuan a sakawr kalsanin lung insirkhup lamah chuan a lawn chho ta a. Khuai thlawk ri a han hria a. Chumi zulzui chuan veilamah a han inher a, tlângkâng lung phihrît karah chuan a han tla leh rih a. A kut chuan a han inman tang thei hram a, remlo zetin rahchhan chu a ke chuan a dap hmu ta bawk a. A kut pem thi sung mai chu enin a hawi â ho ringawt a.

Lungah chuan a theih ang anga inban chhovin a hel kual a, tuikhur lian angreng tak a tui lo tling kung chu a hmu ta a. A sir lehlam, kawngṭum pangngaiin a rawn pawhna ah chuan hmun zawl rualrem deuh hi awmin, ṭiaupho zimte a awm bawk a. Tuikhur chu a piah lamah chuan a thûk phei tial tial a. A sakawr lamah chuan let lehin. "A awm e," a han ti, "Kan tuithawl a thun tur leh kan sakawr te’n duhtawka an in tur khawp a awm ang."

An Sakawr te an hruai thlen phei theih nan kawngṭum pangngai lamah chuan a her phei a. A thlen phei chuan a thûk lai berah chuan kalin Olla a kenah khan a khat papin a han thun a. A thun khah sa chu sir lehlama lungpui inchhawng uaihin hlim a siamna laiah chuan nisa em loh turin a va dah leh te te a. Midang an lo thlen lai chuan tuikhur kotlangah chuan awmhmun remin tui chu a lo in khawlh khawlh a.

"Sakawrte kha kal kiantir rih teh u," Harbin-a chuan a han ti a. "An dai nut hmain a tâwkfang chu I la phawt teh ang u."

Badger-a chuan a in hmain tuithawl chu a han thâl khat hmasa phawt a. Chutih lai chuan Nora-i pawhin tui chu a lo in mêk a. Rodelo-a chu a han hawi kual a, He lai hi hmun biru tak a ni a, vên leh ṭankhawh vel nan pawh a awlsam hle dawn a. Chawhnu lam  ni kang lutuk laka inphen nan a lo tha bawk si nen. "Helaiah hian riahbuk I sual teh ang u," a han ti a.

Tom Badger-a chuan a chhân hmain Joe Harbin-a chu a han en hmasa phawt a. Chutah, "A ṭha phian mahna," tiin remtihna thu a han chhâk chhuak a. "Hmun dang ṭha zawk chu kan hmuh tawh loh hmel khawp mai."

Sakawrte chu kai pheiin tui chu an intir ta a. Chumi hnu chuan, Lung tohlâwt hnuai hmun hlimlaiah chuan hruai phei leh a. Sakawrte pawh chuan chawlh an mamawh ve tawh hle a ni. Chutiang chuan an chawlh hahdam tir ta a.

"Mei chhemna tur thingro lah a awm nual a. Meikhu lah a chhuak vak dawn si lo," Badger-a chuan a han ti leh bauh a.

"Teh reng mai," tiin remtihna thu a lo sawi ve a.

An dinna aṭanga khawthlang lam phaizawl an han thlir chuan, thlalêr vaivut dûr in a siam tlâng pâwng a lo lang thluah a. Chung ṭiaudûp hmunte chu California litengsawl bula leilung sakhat awmna nena an inkar daidangtu niin, mel nga vel laia hla a la ni a. Chhim chhak lamah chuan Sierra Blanca tlang ṭiṭoh nuk mai chu, thlalêr vaivut hmuna a ṭhen a zâr in phumin a lang bawk a.

Dan Rodelo-a chuan ṭiaudûp hmun inpharh chu en pahin thu rolum a han chhâkchhuak sap a. A tuk lama an paltlang leh dan tur a ngaihtuah zawng ringawt pawhin a ngei hlui tawh mai a ni. An zavai chuan an chau chhe zo tawh a. An sakawr te pawhin an tha tawp an chhuah ve takzet tawh a ni. Khawlum leh tui vâng lutuk chuan an chakna leh chhelna te chu a kâng ral zo tawh a. Chutah, an awmna atanga hla vak lo khawi laiah emaw chuan Indian ho an awm reng lehnghal.

Engemawti chhung Yaquis ho chu an bikbo san thei ta tih erawh a chiang a. An tum reng vang pawh nilova an tei kualna lamah Indian ho chu put bosanin, anni ho chuan a ni lo lamah an chhui rih ni ngei tur a ni. Mahse, darkar tam erawh an bikbo san thei kher lovang le! Rinhlelh rual lohvin Indian ho pawhin anmahni zawng chhuak tur hnuchhui thiam bik an tir chhuak mek hlawm ta ve ang.

Chulai tuikhur velah chuan sakawr hnu emaw mihring sulhnu emaw a awm miah lova, chumi awmzia chu Yaquis ho hian an hre miah lo emaw an hmang ngailo emaw a nih hmel. Chutiang ni lo ta se, tun ang hunah chuan tui a awm mumal tawh lo tur a ni a. Hnuhma pawh a chiar dup tur a ni. A hmuh chhunte chu Ram beram leh Sidewinder (thlaler rul chikhat) hnuhma tlem chauh a ni si a.

 Dan Rodelo-a chu thlaler vaivut hmun lamah chuan a han phei leh hlek a. Mahse Harbin-a leh Badger-a chevel chu chiang taka hmu thei rengin a awm a. A tu a mah chuan Rangkachak chu pek ve tumna an nei lo tih a hriat chian em avangin, tun aṭang chuan inring renga a awm a ngai leh zual dawn ta a ni. Indian ho laka an harsatna hi chinfel a nih rual rualin, amah dahbo tur hian hun a khawhral rei lo tawp ang le.

Nora-i pawh chu lo phei vein, a bulah chuan a rawn ding a. A hmui te chu a rep khi chat uar a, A biangte chu a chât sen ûrh mai bawk a. Mahse chungte pawh chuan a hmaifang mawina chu a thup bo zo thei mawlh lo chu a ni.

"Tûn darkarah tak hi chuan thlalêr hi ka ngaina a ni," a ti sep sep a. Khawthlang lam hawi pah chuan, "Thil hlim dup mai han hmuh te, boruak vawt tak han hip vang vang te hi a nuam ka ti."

"I theih lai khan âm takin chên teh khai. Naktuk chu kan tan ni hrehawm ber tur te pawh a ni maithei a."

"Ka lo ring ve chiah a. Vaivut ṭiaudûp hmun kan dai lai te kha ka la hre reng alawm."

"I damkhaw chhuak thei chu a mak hle mai. Naupang mai tan phei chuan a hrehawm dawn nasa mai si a."

"Chutiang mai pawh a la ni hleinem. Lawng a keh takah khan ka chhungte zawng zawng thiin, keimah chiah ka dam a. Khatih laia ka hriat zawng zawng kha chu ka hloh vek a ni ber e.." A lam chu a rawn hawi thut a. "I hriat angin, tunge ka nih pawh ka inhre lova, khawi aṭanga lo kal nge tih pawh ka inhre hek lo. Ka pa kha tuiah a tlahlum a, ka nu erawh chu heta ṭanga hla vak lo ṭiaudûp hmunah sawn a tlu hlum ve thung."

"Dean Stafford-a khan thlalêr paltlangin a hruai che u a. A tirah panga in ni a, chutah pathum chauh in dam khawchhuak ta a nih kha. Khami chanchin kha ka lo hre ve alawm." Rodelo-a titi lai chu a han châwl hlek a. "Ka hriatthiam tak loh chu engvangin nge kir leh I duh tih hi a ni.."

"He khawvelah hian ka mal em em a. Chutiang chu nih ka duh tawh lo. Kan thil hnuchhiah engemaw tal a awm anga, chu chu hmuhchhuah ka duh a ni.."

"Thil tam tak chu I kalsan rêng a lawm, Nora. I nu leh I pa pawh I kalsan a, mahse I hmu leh thei tawh dawn si lova. I tlai lutuk tawh deuh lo maw?"

"Chu ngawt chu a ni lo maithei a sin."

Zawhna mitmeng nen Nora-i chu a han en a. "Nora ..."

"I hrethiamlo a nih kha. Thil engemaw kan hnutchhiah alawm. Bawm lam pang a nia."

"Bawm ringawt maw?"

"Aw.. ni deuh mai. Ka nu in a ngainat em em ṭhin thil te pawh a chhungah chuan a awm. Lehkha te, thlalak te.. engmah hlu tak phei chu a awm lova. Ka tan tih lohah chuan midang tana hlutna nei vak chu a awm lovang. Mahse I hriat angin, ka ta a ni miau a."

 "Ka la naupan êm avangin ka nu leh pate pawh kha chiangkuangin ka hre hman lova. Mahse an thlalak te ka en a, an thuziahte ka chhiar chuan ka rilruah pawh an chiang thei deuh mahna. Hmeichhe naupang mai ka nih lai aṭang khan he thil hi ka ngaihtuah fo tawh ṭhin a. A chhan chu ka ro thil neihve chhun a nihna lai te pawh awmin ka hria a. Engtin emaw takin ka la nei ngei ang tih pawh ka ring tlat a. Mumang ang ruaia ka thil hriat nimah se, thil awm tak tak, keima nu leh pate ngei an ni si a."

"Chu thil ringawt atan chuan I inhuam thui mah mah lo maw?"

"I ngaihtuah dan chu ka hrethiam a lawm. He hmuna kal ka duh thu ka sawi khan, tlang rêl leh mi sawi dan tur pawh ka dawn thiam mai. Mahse keima pual thil neih engmah ka nei miahlo tih hi I ring kher lo maithei a. Min chawi liantute chu ka chungah an ṭha em em a. Sikul ka kal theih nan pawisa te min hnutchhiah a. An thih hnuah an pawisa hnutchhiahte chu lehkha zir puitlin nan ka hmang ta nghe nghe a. Mahse helai hmun hi ka thinlungah a riak tlat a. Ka kir leh hi a ngai a ni. Bawm chu ka hmu ngei tur a ni. "

"Chutianga nawr tlattu che an awm theih chu ka va ring chiah lo em!" Rodelo-a chuan a la ti hram a. "A finthlak tak zetin I ngai chiah a maw? Lo hmu ta ang la… I thil hmuh chu I duh ang leh beisei ang a ni leh si lo a nge? A chang hi chuan a takram dai ai chuan suangtuahna a chen mai mai hi a tha zawk fo ṭhin a sin."

"Chu pawh chu ka ngaihtuah ve fo thin a lawm. Nilo ve ... ka hmuchhuak ngei tur a ni. Khawi aṭanga lo kal nge an nih tih te, khawiah nge an kal zel dawn tih te, engvanga kal nge an nih ti te chu ka hre ngei tur a ni.."

Chu zawhna chuan Rodelo-a chu a tibuai deuh hlek a. Dean Stafford-a chuan Nora Reilly-i nu leh pa chungchang chu hria pawh nise a sawi lo em ni dawn. A han ngaihtuah lêt leh vang vang a. Dean-a khan Pinacate ram an paltlang dan kha a sawi chipchiar lo ang reng khawp mai a. Amah kha mi ṭawng tlem lutuk a nih loh pawhin a sawi lo satliah mai mai te pawh a ni thei tho va. Tuikhur awmna a hriat ang chin chin kha chu a sawi vek bawk si a.

Rodelo-a hi chuan midang ai chuan hre tak a ni a. Dean-a leh a pawlte kha Colorado Luipui aṭangin Yuma an lût kha a ni a. Lawnga kal te pawh an awm tih a hria a. A sawi ṭhin danin thil thawn vel chungchang an buaipuina lama a hriat a ni nghe nghe a. Lawnga chuangte chungchang, Nora-i emaw, a nu leh pate chungchang emaw kha a sawi ngai miah lova. A huhovin an awm deuh reng a, an inchei felfaiin, an hawihhawm fu na a, an inla hrang deuh tlat kha a ni a.

Lawng captain kha lawng khalh mi a ni lova. Ehrenberg hmuna rangkachak khur chu pan turin an âr-kawh-chhuah ve tawp niawm tak a ni. Khatia lui hnar lam an pan zel lai khan suar tui zangkhauh in an lawng chu a man ta a. Lungah a insawh keh ta ni tur a ni. Stafford a ten Yuma an thlen hma kha chuan eng dinhmunah nge an din chiah pawh a hrethiam lo a ni ngei ang. A nu a han thih takah khan hmeichhe naupang chu enkawl zui turin Stafford-a hnenah a hlan chhawng mawl tawp te pawh a ni mahna.

Khâng hun lai khan tute nge Yuma lam pana rawn kal thin te chu? Tute nge lui hnar lam chu zawh chho zel ṭhin? Pawisa khel mi te, Hmeichhe dukdak lo te, thil laichhuak mi te, hriatloh ram daidar pawl te an ni deuh nuai anga. Chûng mite thlithlai tur chuan sipai te pawh an rawn kal zeuh zeuh ṭhin a. Rodelo-a thil chhut dan chuan Nora-i nu leh pate pawh chu mi pangngai lutuk chu an nih a ringlo lam a ni. A theih dan dan a thil laihchhuana khur awmna hmuna hlawkna uma lo phe ve zel chi mihring, mi bumro tak tak kalkhawm zinga a sehhel pawl te pawh an lo ni reng mahna.

Harbin-a pawh a bulah chuan a rawn phei vut a. "Nangni pahnih khan enge in sawi a? Rodelo, Hei hi ka nula a ni tih theihnghilh reng reng suh ang che."

"I nula maw?" tiin Nora-i chu a lam a rawn hawi a. "Engvangin maw, Mr. Harbin! Chutiang ngaihdan chu engtia I neih nge? Tu nula mah ka nih ka va hre lo ve."

No lo zetin a lo melh a. "Nula, henglaiah chuan duhthlan tur I nei lo a nia aw."

"A neih ka ring," Rodelo-a chuan a lo ti a.

Harbin-a chuan Rodelo-a ṭawngkam chu a lo haider hmiah a. "Enteh, Nula, I rilru I siamfel vat a ṭha zawk ang. Kal zelna tur hmabak kan nei thui vak tawh lova. Ka bulah ka hruai zel thei che a, a nih loh chuan vaukamah ka hnutchhiah tawp thei bawk che a. I duh zawk zawk a ni mai."

Dan Rodelo-a chuan a lo nuih a. "Joe, I hnar ngul piah lam bak hi chu I hmu pha vak lo a ni maw? Tom Badger-a tal hian a hmu pha ang chu. Sam Burrows-a khan Hmeichhia kan kalpui tih kha a hre ve vek a. A inlan zui zel lo a nih chuan zawhna a nei ngei dawn a nia."

"Enge venthawn tur awm? Ka kir leh dawn tawh chuang hlei nem."

"Tom," tiin Rodelo-a chuan a han ko a, "Kosterlitzky a chungchang kha Joe-a hi han hrilh ve teh."

"Ama chungchang chu enge?" tiin Badger-a chuan a lo zawt a.

"Sam Burrows-a hian he khawvel ah hian ṭhian pahnih a nei a. A… thian tam tak a nei I han ti teh ang. Mahse, a ṭhian pahnihte chu an turu riau va. Pakhat zawk chu Emilio Kosterlitszky-a hi a ni. Heng lai ramri leh thingtlang khua zawng zawng awp tu hi a ni a. I naute chuan an hriat ngei ka lo ring deuh a sin?"

"Nia," tih pahin a han sawi zel a, "Sam-a’n Emilio a hnena Nora Paxton-I thang zelna chungchang chhui tura a tih vaih chuan, Emilio chuan Nora-i zinpuite chu a zawng chhuak anga, a duh ang chanchin an hrilh hma chu an thisen far tawp thlenga tawrhtirin a dâwp mai dawn a ni. Chanchin chhe lam a hria a nih phei chuan, Emilio-a chuan Sam-a hnenah an inṭhian ṭhatna entir nan thil engemaw thawn ngei a duh dawn a. Chutiang thilah chuan luvun hi a hmang deuh ber ṭhin. In luvun chu a hîk ngei ang tih ka sawi kher lo nã-in, Sam-a hnena a thil thawn tur chu, a duhdanin a chhui chhuak ngei  a ni tih tichiang thei tawk tur thil a ni ngei ang."

"Min tihlau lem love."

"Kei chu ka ni ve lo," Badger-a chuan a lo ti hmak a. "Kha Kosterlitzky-a kha hremhmun Lapa a ni ringawt." An pahnih chuan thudang sawi tawh lovin an inher hmak a, an kal ta nal nal a. 

Tuikhur velah chuan thing dingro ṭawi deuh liai a awm nual a. Chu chuan an eirawngbawlna ilo vel chu a daih thei mai anga, awlsam taka hmuh mai theih loh turin tawm bona a awm ṭha bawk a. Coffee mai mai pawh tui an ti tawh kher mai. Sam Burrows a dawr aṭanga an lei sarêp la bang awm-chhun chuan in inhnângfâk ta hlawm a.

Rodelo-a chu mei eng aṭang chuan a inthiarfihlim a. Chulai ruam pawn lama thawm riva ngaichang pahin ngawi rengin a eitur chu a buaipui mawlh mawlh a. Indian ho laka tlanchhuah hlen theih tak tak chu a inring lem lo. Vanneih thil thuin an pumpelh rih mai zawk a ni. Chu pawh a rei vak lovang. Inbeihna chu a lo thleng thuai emaw nakinah a la awm tho tho dawn tih chu a chiang a ni. 

"Kan sakawrte hi an ei theih zawng zawnpui an ngai a ni," tiin Badger-a chuan a han rawt a. "Pawn lamah hian hnim a awm ang."

"Phul tlem a zawng pawh ka hmuh tak kha a," Nora-i chuan a lo ti a.

Sakawrte chuan an mamawh tehmeuh mai. Ni engemaw zât chu an pute nen thifahnukchatin an lo kal hram hram tawh a. An phur rih em avangin, an pute ang chuan an tlin ve reng tawh hauh lovang le. An ei theih zawng a awm mial  a nih chuan theih ang anga an inpeh puar ve chu a ṭûl tawh em em a ni. 

Thlalêr hnimbuk ṭawi liai kara an ei theih zâwng zawnga tla tur chuan Joe Harbina chuan sakawrte chu a hruai chhuak ta hlawm a. A rawn kir leh lam chu Rodelo-a chuan chîk taka lo thlirin a lo fimkhur ngang mai a. Harbin-a leh midangte chu a inrin loh hlan leh hnung lama inkah thut theihna remchang pek a tum lo hrim hrim a ni.

Tunah chuan an hun hnuhnung lam an hmang ṭan mêk ta chu a ni a. Rodelo-a chuan ruahmanna pawh a nei hranpa lem lova, an duh ang ang chuan han che phawt se. Tum fel tak pakhat erawh a nei, chu chu engti kawng mahin a kut aṭangin rangkachak chu an la bo tur a ni lo.

Nora-i chungchang pawh chu a ngaihtuah kai ta zel a. Bawm a sawi bakah khan thil dang a awm a ni lo maw? Ro hlu engemaw te pawh a ni thei angem le? Anih duh loh hmel viau zawk mai. A thil sawi chu midangte ngaihah awmlo hle mah se, hriatthiamna riau chu a nei ve tlat a ni. An khawvel hun hman mêkah chuan chhungkaw bulbâl neilo leh pawisa nei bawk silo nula maltlat tan chuan beisei a bo ve em a ni. Hmeichhe pangngai deuh thawh tur chi hna lah chu inthliarna avangin a vâng nasa mai si a. Engpawh nise, hmeichhia an nih chuan, tunge an nih a, khawi aṭanga lo kal nge, eng ang chhungkua aṭanga lo chhuak nge tih te chu inzawh fo ṭhin a ni tho alawm. Khawthlang ramah chuan mipa an nih chuan zawhna inzawh tam vak chi a ni lova. Hmeichhia an nih erawh chuan a dan a dang deuh a ni. 

Nora-i hnen aṭangin thil tam tak chu a hre ta phawt chu a nia. Chutiang thil chu lo paltlang ta tak tak ni se,  a chhung leh khatte chanchin a hriat loh danah hian engemaw tak chu a awm a ni. Amah anga  pa rawva pui puite nena hetiang thlalêr hrehawm paltlang ngam leh duh hi hmeichhia engzat tak awm ve ang maw?

Khawthlang lam a han thlir chuan kâwlkil hla takah Baja California tlâng dung chu Gulf vang tan zawngin chu a lo inkham pãwl ruih a. Ni chu an piah lamah chuan tla mêkin, vanah chuan engzung râng ruk mai a hnutchhiah ruih a. Thlaler pawh khawvawtin a rawn tuam ṭan ta. Rodelo-a chuan a hnung lungbang chu a han ngheng a. A sakawr zin rinchhan pah chuan  a dak chhuak deuh titih a. A chau ta takzet ta.

Coffee pawh chu no khat dang tal han in leh a châk kher mai. Mahse, chumi la tura ding chhuak tur pawh chuan chakna reng a nei tawh lo. A chauh zia leh Coffee in a châk na chu buk tawnin Bel chu a thlek a, engemaw chen chu a han ṭhu ngawih ngawih a. A tuk leh lamah chuan tui far khat tal pawh a taksa tana a ṭangkai dan tur chuan a buk rit leh ta deuh zawk a. Tho turin hma lamah a kun chiah tihah a hma lawka a lu nghahna chiah lungpui chu silaimu in a rawn deng kem chuai a. Leiah chuan a bawk thla nghal thlawrh a. Silai phawi paha lei a den rual chuan Indian hmel hi a han hmu zawk a. A han kâp nghal ṭhuai a. A thelh tlat mai. Indian pa hmel pawh chu a pilbo ve nghal a.

Chulai ruam vâng tan zawng chuan a inkhawh phei zawk a, lungpui karah chuan a lum lut ta nghal a. An sakawrte hnawhdarh tuma Indian pa au thawm chu a han hria a. Amah pawh chu a hmu chawpchilh nghal a. Chutah a han kap leh ṭhuai a.

Khawthim ṭantir, êng chiang tawh vaklo hnuaiah chuan, chu Indian pa chu feet sawmruk vel laia hlaah a awm nain, silaimu chuan a lu ah tak fuhin, a thi nghal hmiah a.

A kiu bul lawk aṭang chuan, "Tuna mi ang tak kha a lawm silai kapthiam ka tih ve thin chu," Badger-a chuan a lo ti bauh a. "Khatiang tak khan I lo thiam ang tih ka ring lo reng reng."

"A vannei a nih kha," Harbin-a chuan a lo ti a. "Tum loh deuha kah fuh a nih kha."

"Chumi hre tur chuan I insên ve viau chu a ngai ang, Joe," Dan-a chuan a lo ti sap a. "Inchawi dawn pawh ni ila, I thâp chu I ṭian san a ngai khawp ang."

Harbin-a pawh chuan a kutah silai chu a lo hum ve reng tawh a.  "Ka inpeih hunah le," a lo ti a, "Ace pathum pawh a rualin phawi la, vawi khatah a lai takah ka verh hman vek ang."

"Theihnghilh rawh u," Badger-a chuan a lo ti bung nghut a. "Kha Injun pa kha enge a awmzia le?"

"Kan sakawrte hi kan thlun ṭhat deuh phawt chu a ngai a ni," Rodelo-a chuan a han ti a.

"Ngaihṭha tak khan awm rawh," Badger-a chuan a lo ti a. "Tuna an dinhmun leh an awmdanah hi chuan an kal hla lo tawp ang. Tui awmna bul lawkah an awm lai a ni lehnghal."

A han sawi zawm leh a, "He Injun pa hi an hmahruai pakhat, min rawn hmu fuh palhtu mai a nih ka ring. Kan sakawrte hnawh tlan a, ke a kal lo thei lova min siam a tum niin a lang. Tichuan meikhu hmanga midangte kokhawmin awlsam taka min rawn hualtir a tum a nih hmel."

"I ngaihdan chu," Dan-a chuan a lo ti bauh a. "Meikhu hmanga koh khawm maw?"

"Tehreng e ... Tuna kan awmna hmun aṭang nilo, saw lai ruam aṭang sawn."

"Awmzia a neih phawt chuan, mêl nga emaw mel sawm vel lai pawhin kan lo hmakhalh thei mai thei asin. Kan thingthla fel law law thei bawk maithei a ni" tiin Harbin-a chuan pawmpui tih hriat takin a lo sawi ve a. Inthlahrung deuh takin, "Tunge meikhu chu thawn chhuak ta ang?"

"Engvangin nge sawlai ruamah kher? Engvangin nge sawlai hmunah sawn min beisei nachhan tur?"

"A chhan chu Tuifinriat kam lam panna kawngṭum tluang ber a ni tlat a ni. Sawlai aṭanga meikhu ding an hmuh chuan an awih ngei ngei ang."

"A âwm ang viau mai, awmzia a awm ngei ang," Badger-a chuan hrechiang inti tawkin a han ti a.

"A ṭha e, Tom, chutiang ngaihdan I neih chuan sakawr nen va inkhalh phei ta la, meikhu chu va thawn chhuak ta che" Harbin-a chuan a lo ti a.

 "Keimah chauhin khang Indian zozai te kha ka hmachhawn anga maw?"

"I hlau deuh elaw?"

"Ka hlauh leh hlauh loh chu inthâp ila. Sawng mi ho saw ka ngaina hlek lo. Kan mi leh sa te ang an ni ve lo. Nangmah ang bawk in ka hlau ve tihna te pawh a ni mahna"

"Ka’n kal ange," Rodelo-a chuan a lo ti sam êt a.

"A nih chuan in singsak ṭan nghal mai chu a tha lo maw?" tih pahin Joe Harbin-a chu awmze nei zetin a han kiai sak a.. "Khâng Injun ho khan signal chu an lo beisei reng tawh ang."

Rodelo-a chuan Grulla lam chu a pan ta a. An tawmna lamah chuan hruai pheiin a zinte chu a bel mawlh mawlh a. A hrênna a siam ngheh lai chuan an dinhmun chu a chhût pah reng a. A inchingfel pah zel dawn e. Vaukam chu an piah ṭiaudûp hmun tawp chu a ni mai tawh a. A theih chhung chu silaia inbeihna awmtir loh hram chu a duh bawk si. Mahse heng mite hnenah hian rangkachak chu lâk lêt a duh thu han sawi vaih se chu an chiau hiar teh ang chu. Silaimu dawng hmasa pawl pawh a ni hial mahna.

Nora Paxton-i chu a rawn kal hnai a. "Kal suh, Dan."

"Tuemaw chuan an tih a ngai a lawm."

"Engvangin nge Tom-a emaw Joe-a emaw zawk zawkin an tih mai loh vang?"

"Hetiang zat lai rangkachak rûk sum nen chuan tumah an inhnungchhawn huam lo a nih hi. Hei hi a dam hnuhnung ber khawm tur a ni a. A dam hnuhnung ber ka nih a ngai a lawm."

"Engvangin, Dan? Pawisa chu I tan a pawimawh viau em ni?"

"Aw, tun dinhmun atan chuan khawvela thil dang zawng zawng ai pawhin pawisa chuan ka tan awmzia a nei zawk ka ti thei ang.."

"Kei ai pawhin maw?"

A han en chhuk vang vang a. "Aw, Nora, tuna tan chuan nang ai pawhin a pawimawh zawk. Pawisa hian ka tan awmzia a neih loh chuan, nang pawh engmah I ni thei bik lo alawm. Ka zahawmna hriltu tur ber a nih hi."

A tawlh lêt dawrh a. "Chapona, zahawmna te pawh chu a ni mahna. A ṭha e, I laka ka dinhmun pawh a entir chiang ta hle mai." tih pahin a inher tau sawk a, a kal kiang ta daih a.

"Nora!"

A lo haider tlat tawh a. meichhemna lam chu a pan zel a. Engemaw chen chu a han thlir zui vang vang a, thudang sawi duh a la nei nual asin mawle, mahse midangte chuan an lo hriat ve a duh bawk si lo. Harbin-a lah hian a ringhlel sa riau hrim hrim bawk si. A chungchang hi hriat a nei lo teh nain, Badger-a pawh hi Harbin-a ang tho a ni dawn a. Card chu an dêng ṭan ta ni berin a lang. A sa huai chu a kawngah a hup tlat a. Tumahin a sa huai ken dan an hre lo.

 Rodelo-a chuan ruam luhna kal khan lam aṭang chuan a sakawr chu a hruai chhuak ta a. Joe Harbin-a chuan rawn zuiin, Badger-a a lo ni leh a. Nora-i chu a awmna ngai reng, meichhemna sirah chuan a awm tlat a.

"Heta ṭanga khawi lamah nge kal chhuah I han rilruk deuh à?" tiin Badger-a chuan a han zawt a.

"Khawthlang lamah. Sierra Blanca hi in vei  lamah in awmtir char char ang a, a ram chin in pelh veleh hmar lam pana inherin mel khat vel in kal leh ang. Khawthlang lam in pan ding leh hunah chuan Pinacate ram leh Sierra Blanca inkar ruam raiah khan in inzui ang a, chutah in va thlenna hmun tur chu Adair Bay a lo ni tawh ang,"

"Tui lampang te hi?" tiin Harbin-a chuan a lo zawt a. "Tuifinriat kam kan thlen hunah chuan ka tihna a nia?"

Dan Rodelo-a chuan a lo nuih a. "Engati ta nge, saw laiah chuan tuikhur leh luite tui luang engemaw zat a awm alawm. Ṭhenkhat chu a intlâk a, a ṭhen chu a intlâk loh va. Ka rawn thlen ve hma chuan lo awm hle hle mai rawh u. Tui intlâk awmna kawhhmuh tur che u chuan ka rawn lang leh em em ang.

 "Nang engtin nge I awm dawn?"

"Kei hi maw? Pinacate khawthlang lam ep ah hmar lam hawiin ka rawn inkhalh phei hlek ang. Chumi hmain, hetah hian tui la turin ka lo kir leh dawn a. Ka mamawh tam lutuk lovang."

Sakawr zina ṭhu chung chuan a han inher hlek a, Mei chhemna lam chu a thlêk leh zawk a. Nora-i chu amah hnungchhawn zawngin a lo ding a.

"Dam takin ule!" a han ti a, a inkhalh liam ta a.

Joe Harbin-a chu a han ṭhen sûng a. Badger-a chuan ringhlel ang reng deuhin a lo en reng a. "Enge nuihzat thlak awm a?"

"Amah kha maw le... Tui la tura lo kir leh te kha a tum, chu chu a nia. A rawn kir leh chuan tui a lo awm tawh dawn der si lova."

"I ti kang vek dawn em ni?"

"Sakawrte hian tam zawk chu an in ang a, kan lâk bang zawng chu kan ti kang vek ang. Tun hi Dan Rodelo-a kan hmuh hnuhnun ber tum a nih ka beisei.."

Tom Badger-a chuan sakawr chungchuang liamta chu ngaihtuah tih hriat takin a han thlir vung vung a. "Nia," tih pahin ring ngam chiah lo chungin, "Chutiang chu a nih hmel khawp mai." a han ti a.

Nora-i pawh chuan meichhemna bula ding chungin khawthlang lam chu a lo hawi ve a. Kut khum meuhin a kal lai chu a lo thlîr reng a.