Alice-5

 Alice's Adventures in Wonderful Land

ADVICE FROM A CATTERPILLAR

Alice-i chu Pa (mushroom) awmna lam pan chuan kal in, pangang bulah chuan a va phei a. An pahnih chuan an han in en hê hâw a. Chutah pangang chuan Alice-i bulah chuan, "Tunge-i nih?" tiin a han zawt a. Alice-i chuan a zak deuh a kun chung chuan, "Ah ka hrelo, ka pu. Tunah chuan- Mahse vawiin zing kha chuan tunge ka nih ka inhria a, mahse ka taksa len zawng leh têt zawngte a inthlak nasat êm avangin tunah chuan chhan dan tur che ka hre mai lo," a ti ta a.

Pangang chuan, "Enge i sawi tum chu le? Sawi chiang deuh teh," a lo ti a.

"In sawi chian dan tur pawh ka hrelo, ka hlau a ni, ka pu," Alice-i chuan a ti leh a. "Keimah ka ni tawhlo. I hmuh ang hian ka têt dan te hi nikhat chhung leka ka inthlak danglam nasat dan hi mak ka ti a, insawi dan tur pawh ka hre lo," a ti chuai raih a. 

"Nang mah kha tunge inih min hrilh zawk teh," Alice-i chuan a han ti leh a.

Pangang chuan, "Engvang in maw i têt tâk?" a ti a.

Alice-i chuan chhan dan tur leh chhan ṭha deuh sawi tur a hriat loh avang chuan kalsawn a han tum a.

"Lo kir leh rawh!" tia pangang chuan Alice-i chu kovin, "Thil pawimawh sawitur ka nei," a han ti a. Alice-i chu in her lêtin, pangngang ava pan hnai leh a.

"Dawhtheih zir deuh rawh,"

"Chuti zawng chu maw?" Alice-i chuan chil lem khalh pah chuan a han ti a.

"Aih" pangang chuan a ti hmuk a.

"Chuan, i inthlak iti maw, a ni em?"

"Ka hlau tawh a ni, kapu," Alice-i chuan tiin, "Engmah ka hre chhuak zo tawhlo,"

Pangang chuan, "Eng tiat nge nih i duh?" tiin a han zawt a.

"Oh, chu-chu ka hrelo," tia chhangin Alice-i chuan, "Ka duh dan chu ka taksa pangngaiin, inthlak thei tawhlo turin," a ti dam thliam a. "Feet thum (3) vel a ka len belh chuan ka lawm tawk viau ang,"

"A ṭha vel tawk chiah a nih chu," pangang chuan a ti rum hmak a.

Minute khat hnu ah chuan pangang chu a awmna aṭang chuan rawn chhukin, hnimhnah chungah chuan  a rawn vak phei a. "Pâ khu a pang lehlam I ei chuan I lian anga, lehlam i ei chuan I têt belh ang," a ti ta a.

"Pâ maw? Chuan a lehlam ah chuan eng maw?" tiin Alice-i chu a phun sep a. Eng a sawina nge ni ang tiin a ngaihtuah a.

A ngaihtuahna hria ni awmtak chuan pangang chuan, "Pâ khu," a lo ti leh hmuk a.

Alice-i chuan Pâ chu ngun tak a en in, khawi zawk hi nge ei ila dik zawk ang aw tiin a ngaihtuah a. A kut chu a sei thei ang ber in a han phar a, Pâ chu tlem te a va la ta nge nge a.

"Tunah chuan khawi zawk hi nge ka ei ang?" ti a amah chu inzawt in, a kut dinglam a mi zawk chu a han ei chhin a, a ei zawh hnu reilo te hnu ah chuan a khabe te chu lo duk in, nâ a ti ta êm êm a.

A inthlak dan mak tak avang chuan Alice-i chuan a hlau a, a khûr ta vak a. Chumi hnu chuan a kut leh lam a mi chu ei a han tum leh ta a. Mahse a khabe a nat êm avang chuan a kâ (mouth) chu a âng thei lawk lo va, a tawp nan tiin a kâ chu â a han tum leh chuan a âng thei ta chuanglo va.

Amah a han in-en nâk chuan, hnah hring sei deuh ang mai hi a lo ni ta a. Rûl a ni tih ala inhriat mai loh avang chuan, "Khaw'nge ka koki hi a awm le?" a ti ta chûl a.

"Oh! Ka kut khawngaih thlak! Engtizia nge ka hmuh theih loh che le?" 

A nghawng chu rul ang mai in a sei ta em em a, rûl ah a chang tih chu a hre ta nghal a. Alice-i chu hnim hring chunga a tleng phei lai chuan Parva chuan Alice-i hmai chu dimna tel lêk lo hian a thla chuan a rawn beng a.

Parva chuan, "Rûl" ti a ṭap chung chuan a bu lamah chuan a va phei a, a tui rûk tum turah a ngai a ni.

"Rûl ka nilo" Alice-i chuan tiin, "Keimah in min awm tir rawh!" a ti a.

Parva chuan, "Ka tui na tur zawng in ka buai ve nasa ṭhin asin. Mahse ka tui chu nang chuan lo ei I tum a maw?" a lo ti a.

"Mahse Rûl ka nilo, ka hrilh ang che!" Alice-i chuan tiin, "Kei chu.. kei chu hmeichhe naupang mai ka ni. Vawiin ah ka taksa hi a inthlak ngun tawh lutuk," a ti a.

"Ka tui I zawng tih ka hria," parva chuan tih chhunzawm leh in, "Engmah ka hmuh dan che a danglam lo. Hmeichhe naupang emaw rûl emaw pawh ni mah la,"

Alice-i chuan, "Mahse I tui ka zawnglo,. Zawng pawh ni ila, i ta chu ka duhlo. A chhan chu a hel in ka ei ve ngailo," a ti ve ta hmak a.

"Anih chuan kal rawh,"

A aw chu a dam vak chuang lo. Ani chu a bu ah chuan ava ṭhu leh ta thûn a.

Hun rei vaklo hnu ah chuan a kut ah chuan pâ chu a lo la keng tih a hria a, engtin nge ka awm ang aw tih ngaihtuah chung chuan a ei leh ta a.

A changin a lian thut a, a changin a tet leh thut ṭhin avang chuan mak a ti a. Chutia pâ sir lehlam a ei leh tak hnuah chuan a taksa pangngai ang chuan a rawn chang leh ta a.

A inthlak chhunzawm tawhloh avang chuan mak tiin a lawm hle mai a. Mahse a thil tih leh tur chu - huan mawi tak a thlen leh dan tur chu a ni. "Engtin nge ni ang aw" ti a a ngaihtuah lai chuan a bul lawk a kawngkhar inches li vel lek a sang chu a hmu a.

"Tunge helai ah cheng ang aw" tiin Alice-i chuan a ngaihtuah a, a hlauh deuh avang chuan a lût ngam ta lawk lova.

Alice-i chuan chu inchhung a awm chu tih hlauthawn a tum ta a. Inches 9 laia sang a nih tak avang chuan a luh theih mai a ring lova.