Alice-3

 Alice's Adventures in Wonderland

A Caucus Race and a Long Tale

Luikam bulah chuan party an huaihawt a. Sava hmul nalh tak tak te an awm a, mahse an hmul te chu a huh vek mai a. Ramsa te pawh chu an huh vek a, an zawhna hmasa ber chu engtin nge an an tih hul tak ang tih chu a ni. Darkar reilo te chu ṭhu-khawmin an inrawn tawn a. Alice-i pawh a vawikhat awmna a ni tih hriat hauh lovin a tlangnel nghal em em a, amah pawh chuan mak a inti hial a. Nitin a in hmu tawh awm ang tak in an awmkhawm a. Sazu, an zing a kutzung lai a zungbun bun chuan a thunei ber niawm fahran hian, "In vaiin thu vek rawh ule. Min ngaithla vek teh u. In vaiin reilo te ah in hul vek dawn a ni," a han tih chuan vawilehkhat ah an ṭhu ta vek a.

Sazu chuan a kam han then kâk kâk pah hian, "Ehem... In vaiin in inring vek vek em? He thu hi thil ro ka hriat ber a ni," a han ti phawt a. "In vaiin bengchheng siam tawh suh ule. Hnehtu ropui William-a, Pope in a duhsak em em chu English ho chuan an hlan dawn ta a. Nihna sang chelh duhmi, Edwin leh Morcar, Mercia leh Northumbria-" a tihlai mêk chuan Lory chu vawt tiin a lo khur dar dar a.

Ani chuan sawizawm zelin, "leh Stigand-a, Canterbury Archbishop te chuan thurawn ṭha tak ni-ah an ngai a.."

"Eng chu maw," tiin varak chu alo phun hluk a.

"Thil ṭha tak niin a ngai a," sazu chuan a han tihzawm leh a. "Ka sawi awmzia chu I hriat kha," a ti leh a.

"Ka hriat ve hun chuan a ṭha a nih mai chu. Uṭawk (frog) a ni emaw, changpat (worm) a ni emaw pawh ni se, ka zawhna ber chu Archbishop chuan enge a hriat chu," a lo ti leh bauh a.

Sazu chuan an zawhna chu a ngaihsak hran lo va, "Ani chuan Edgar Athleling-a rual a kal a, William-a lallukhum khumtir chu ṭha a ti a. Khai! Nang, enge i an le?" tiin Alice-i lam chu a han en leh daih a. Alice chuan aw zangkhai leh nelawm tak hian, "Awi, ka la huh vek," tiin alo chhâng lêt a. "Kei chu ka hul ve theilo aniang," a lo tih chhunzawm a.

Chumi a sawi lai tak chuan Dodo chuan dinchhuah hluai pah chuan, "Meeting hi tihtawp ka rawt e. Thahrui tello lampang zawng.." a tihlai chuan Mute chuan, "Mizo tawngin han sawi ta che maw le. I thu sawi kha a chanve pawh ka hre thiam ve lo," a lo ti ve dût a. "Nang pawhin I thu sawi kha I hriat thiam ka ring biklo," a han tizui a. Dodo chuan, "Ka thil sawitum chu hei hi a ni. Caucus intlansiakna nei ila, kan hul thuai mai ang," a ti ta a.

Alice chuan, "Caucus intlansiakna a! Chu chu enge?" a lo tivar a. Dodo chuan, "In hrilhfiah dan awlsam ber chu tih chhin a ni," a han ti zet a. "Pakhatna ah chuan rinbial chhungah kan awm anga, sawlam leh helam ah hian kan tlan ang. One two three kan chhiar anga, chuan kan tlan ṭan anga. Chuta ṭang chuan intihsiakna chu kan ṭan ang,"

Darkar chanve vel lai an tlan hnu chuan an lo hul ve ta vek a. Chu veleh chuan Dodo chuan, "Intihsiakna chu a zo ta" a ti a, an vai chuan an chawl ta ṭhap a. Dodo bulah chuan, "Tu in nge hnehna chu chang ta le?" an han tih chuan an zawhna chu Dodo chuan chhan dan tur a hre lawklo va. A han ngaihtuah hlek a, a tawp ah chuan, "Ka lawmpui a che u, in vaiin inchak e. Lawmman pawh in chang vek dawn," a ti ta a. Mahse, "Tu nge lawmman chu sem dawn le?" ti a an zawh leh takah chuan Dodo chuan Alice-i kawk chung chuan, "Amah hi ani loh ten!" a ti chu an vaiin Alice chu an hual khup khup a, "Lawmman! Lawmman!" tiin an au ta chêl chûl a.

Alice chuan mak a ti a, tihngaihna a hriat bawk siloh avang chuan a ipte chu a han zen tawp a. A ipte aṭang chuan bawm pakhat, lian lo tak hi a rawn la chhuak a. Sweet alo ni reng mai. Vanneihthlak tak in a lo huh lo hlauh va. An vai chuan an insem a, an ei khawp chu a lo daih vek a. Chumi avang chuan an ri ta lé lû hlawm a.

An vai chuan rinkual chhungah chuan an ṭhu leh ta vek a. Sazu chu thil enge maw sawi leh turin an han ngen a. Alice chuan, "I nunhlui hrilh min tiam a ni lawm ni?" a ti a, sazu beng bulah chuan va hrilh ru in, "Zawhte leh ui I huat nachhan kha," a va ti a. "Thawnthu sei leh lungchhiatthlak tak a ni," tiin Alice-i lam chu a hawi a.

"Mei sei tak á ni?" tiin Alice chuan sazu mei chu a han en a, "Eng nge lungchhiatthlak itih nachhan?" 

Sazu in thu a sawilai chu maktih hmel taka a thlir reng lai chuan sazu chuan heti hian a sawizawm ta zel a.

"Fury chuan ka hnenah chuan, 'Amah chu Inah ka hmu a ni a, kan pahnih in court ah i kal ang. Trial chu kan nei dawn nia,"

"Ni e, tukin ah engmah tihtur ka nei hleinem,"

"Khatiang a thubuai sawi ang khan maw? Thuchhe remtu pawh awmlo; thu hrethu leh hmutu pawh awmlo ang chi ah khan kan hun kan khawhral mai mai zawklo maw?'

"Fury chu a phakar em em a. 'Keimah hi judge ah ka lo ṭang ange,' a ti a. 'A chhan engkim ka zawngchhuak anga, thiamloh i chang ngei bawk ang,' a ti bawk a," Chutah sazu thusawi lai chu a han chawl dat a.

Sazu chuan Alice bulah chuan, "I tel ve lo maw? Enge i rilru ah awm.reng reng" tiin a han zawt a. Alice-i chuan, "Khawngaih tak in min ngaidam teh. I ngaihdan a kawi kual deuh niin ka hria," a lo ti a.

Sazu chuan, "Fiamthu sawiah min ngai em ni?" tiin a ṭhutna aṭang chuan a ding a, a chhuahsan ta daih a.

Alice chuan, "Khawngaih tak in lokir leh la, thawnthu chu rawn sawi chhunzawm rawh," a han tih chuan midang zawng zawng pawh chuan, "Nia, lo kal leh la, rawn chhunzawm leh rawh," an lo ti ve tliar tliar a. Mahse sazu chuan a lu thin pahin a kal hla telh telh a.

"Ka zawhte Dinah kha ka va'n ngai tak em! Tunah hian ka bulah awm ve se ka va ti ve aw!" a ti vawng vawng a. A thusawi vang chuan a-tu-a man Alice chu an be duh ta lo va. Sava chuan rang deuh in a fate a kokhawm nghal a, "Lokal r'u, mut a hun ta e," tiin. An vai chuan Alice chu an kalsan ta vek a, amah chauh chuan an hnutchhiah ta a. 

"Dinah ka ngaihzia kha engati nge ka lo sawi chhuah le aw!?" a ti a, amah leh amah chu a inhau mial mial a. Alice chu a mal em avang chuan a lung a chhia a, a ṭap ta a. Chumi hnu lawk ah chuan penthawm ri kauh kauh a han hria a, a han dakchhuak a.