Alice-1

Alice's Adventures In Wonder Land

DOWN THE RABBIT HOLE

  Alice leh a unau nu chu luikam bulah chuan an ṭhut rei tawh avang chuan a ning tawh em em a, tihtur a hre bawk si lo. A unaunu lehkhabu chhiar chu a va bih dêk dêk ṭhin a, mahse lehkhabu ah chuan thlalak, naupang in an en duh chi te chu a awm ve loh a avang chuan Alice chuan, "Enge he lehkhabu hi a ṭangkaina awm le!" a ti a. A chhan chu Alice te ang naupang tan chuan lehkhabu a thlalak awmlo chu enga tan vak a nih lo vang a ni.

Thil eng eng emaw a ngaihtuah a, a thil ngaihtuah chuan a mut te a tichhuak leh si a. Chutih lai chuan Daisy pangpar in banbun siam ila a hlawk zawk ang à! tiin a ngaihtuah a. Mahse Daisy pangpar chu a lakna tur a hre si lo va, zawi deuhvin a mu leh tawp a. Vawilehkhatah sazupui mit sen deuh mai hi a awmna bulah chuan a rawn tlan ta thut mai a.

Alice-i chuan thil eng emaw a hre tlat. Chu chu sazupui chuan, "Oh dear! Oh dear! Ka tlai lutuk palh ang!" a ti a. Chu sazupui chuan kawr a ha a,  a kawr haklai coat ipte aṭang chuan sana hi a rawn la chhuak a. A han en a, hmanhmawh em em in a tlan leh ta daih a.

Alice-i chuan mak a ti em em mai a, a chhan chu maw! Sazupui in coat a hak vang leh a ipte aṭang a sana a rawn lakchhuah chu a hmuh ngai miahloh vang leh thlan tla hluam hluam a a tlan ala hmuh ngailoh vang a ni. Alice-i chuan chu sazupui chu a kalna ah a zui ringawt mai a. A kua a a lut lai chu a hmuh avangin engmah ngaihtuah hmanlovin sazupui kua ah chuan a chhuah dan tur ngaihtuah miah lo chuan a va lut ve ta ringawt a. A chhuk zel a, thawklehkhatah Alice-i chu chhuahleh dan tur pawh ngaihtuah hman tawh lovin chu sazupui luhna ah chuan a tla lut ta tawp mai a.

A tlakna chu tuichhunchhuah ni berin a hria a. A thuk em vang a niang; Alice chu tla muang em em hian a inhria a. Chutia a tlak thlak lai chuan a thil ngaihtuah hmasak ber chu eng vang a kal nge a nih tih chu a ni. Khur chhung chu a thim em avang chuan engmah a hmu theilo va, a tlakna bul vel a han en chuan lehkhabu dahna te a hmu a, a dinglam leh veilam ah chuan map leh thlalak te chu a hmu a. Thil dah te chu a en kual vel a, chutah chuan "ORANGE MARMALADE" tih hi a lo inziak a. Mahse mak a tih em em chu a bur kenlai (jar) chu a ruak vek mai; tichuan a dah thla leh a.

A tlakna chu a tawp thei silo va, tih theih a nei bawk si lo. Alice chuan thil ngaihtuah a nei a, 'Dinah chuan zanin chuan min ngai ngawt ang' tih te a ngaihtuah a. (Dinah chu Alice zawhte a ni) Chaw te an pe angem le tih te a ngaihtuah a. Dinah ka naute, tunah hian ka bulah awm ve la ka va ti tak em a ti sap sap a. 

Alice-i chu a mut a chhuak em em a, a muhil dawn chiah a, mahse khuar tawp chu a thleng a, hnah ro leh thing te chu a rawn tla thla a.

Alice chuan na chu a ti miahlo. Vawi leh khatah a zuang chhuak pawp a, a bul vel leh a chunglam chu a han en chho chu a thim vek tih bak chu engmah hmuh a nei lo. Sazupui var chu a sir ah a kua awmna ah chuan a kal zel a.

Alice-i chuan thli thaw chu nuam a ti em em a, a bul vel a han en chuan "Oh" a beng leh a hmulthi te chu an tho a, "A va tlai tawh tak êm!" a ti a, a chhehvel a han en leh chuan sazupui kha a hmu ta miahlo va.

Amah chu hall bulah lo awmin, khawnvar bang a inkhai te chu a hmu a, hall chungah chuan kawngkhar a khat vek a, mahse a inkalh vek mai thung. Alice-i chu kawngkhar bul zawng zawng ah kal in hawn chhin a tum vek a, mahse pakhatmah a  hawn theihloh avang chuan a lungngai em em a, engtin nge a chhuah theih ang tiin a inngaihtuah a.

Chumi hnu lawk ah chuan dawhkan te reuhte, glass hmang a siam chu a hmu ta a. A han hawng chu gold chahbi tihloh chu engdang mah a awm lo. Alice-i ngaihtuahna a rawn lang hmasa ber chu - a chahbi hmuh hi hall kawngkhar eng emaw ber hawnna a nih a ring tlat a ni. Mahse a milpui tur a han zawng chu a chahbi milpui tur chu a hmu ta miahlo a, a ṭhen chu a lian a, a ṭhen a té veleh thung a, chuvang chuan engmah chu a hawng thei ta lo va, a rilru a hah ta em em a.

Mahse a vawi hnihna tur in a milpui tur chu a theihtawp in a zawng leh a, parda phen ah chuan a han hmu hlauh mai a. A hmain ala hmulo reng reng. Chumi parda phen ah chuan kawngkhar te tak te inches 15 vel lek a sang chu a hmu ta a. A chahbi ken nen chuan tala chu hawn a han tum a, a hawng thei ta hlauh mai. Alice chuan kawngkhar a han hawng chu sazupui len na tur tiat vel lek hi a lo ni a, a kua chu a zim em em mai si a.

Engtin nge he hall thim deuh aṭang hian a chhuah theih ang a, engtin nge  a kawngkhar zim te aṭang chuan a chhuah dan tur tih tih mawlh chu a ngaihtuah a.

Alice chu a mangang em em a, "Oh telescope nih ka va han chak em," te a ti ta ngawt a. "Ka tih theih ka ring, hma lak ṭan dan tur ka hriat phawt chuan,"  a ti rilru a.

Alice chu dawhkan bulah chuan ava phei a, chahbi dang hmuh a rin leh avangin, a nihloh pawhin eng emaw tal chu hmuh a in ring a, lehkhabu te chu a en a, telescope ang a awm dan tur te thleng in a han zawng vel a.

Bottle te tak te hi a hmu a. "He bottle hi nichin khan ka hmu miah si lo," a ti rilru vang vang a. Bottle chhin chu lehkha phek in a inkhar a, bottle chu chiang deuh in a en hnu ah a bottle ah chuan "Drink Me" tih nalh deuh in a in ziak tih chu a han hmu a.

Tûr a tel nge tello tih in ziak a awm em tih finfiah chu thil ṭul tak a ni. Chutiang enfiah hmasak chu a theih-nghilh ngai miahloh avang chuan, "Bottle ah chuan tûr tih inziak a awm hlauh chuan in miahlo tur a ni," a ti a.

Mahse chu burte ah chuan tûr tih a inziahloh avangin Alice chuan in a tum ta a. A han lek a, chutia a a han in ta chu tui a ti lutuk a, chu a thil in laia eipawlh tur thil chi hrang hrang inchhawpsa diam - cherry, pineapple, custard, roast turkey, toffu leh hot buttered toast ho pawh chu a in a, rei lo te ah a in zo nghal a.

"A tuiin ava han nuam chem chem tak êm"

A thei tui a in zawh meuh chuan Alice chu inches 10 lek a sang chauh a lo ni ta mai a. Tunah chuan a hmel te chu alo êng ta phêt mai a, sazu kua ah te pawh chuan alo leng ve ta a.

Nakin deuh vah chuan thil engmah a keng lo tih a hre chhuak leh a, huanah chuan vawikhat kal leh a tum a, mahse a tawp ah chuan Alice khawngaihtlak-i chuan kawngkhar a thlen chuan, a gold chahbi te takte chu a kenglo tih a hria a, chu chahbi chu lak let leh tumin dawhkan ah chuan lawn a han tum a, a banpha ta hauh lo mai. A chhan chu inches 10 lek a sân tak vang a ni. A ke lehlam te chu dawhkan ah a han hlang a, mahse a nal lutuk a, Alice chu a ṭhu hnawk a, a ṭap ta tawp mai a.

"Ṭang rawh, khatia ṭah khan awmzia a neilo" tiin amah leh amah chu a in-fuih mawlh mawlh a. "Tun darkar ah ngei hian ka chhuak thei tur a ni," a ti a.

Amah leh amah chu thurawn a in pe mawlh mawlh a, achang in amah leh amah chu a inhau vak vak a, a mit aṭang in mittui te a lo chhuak a, a mittui chu tling pâr mai a.

A mit chuan  glass te tak te dawhkan hnuai a mi chu a hmu ta a. A han hawng a, cake te deuh chu a hmu a, a bawm ah chuan "Eat me" tih hi alo in ziak a, Alice chuan ei a tum ta a. "Ka len phah chuan chahbi kha ka la thei anga, mahse ka têt belh a nih tâk pawhin kawngkhar hnuai ah ka vak lut thei mai ang," tih rilru a pu ta a. A eng emaw zawk zawk vangin huan chu a kal theih mai a inring ta a. Cake chu tlemte a ei ta a, a rilru a ngaihtuah pah in a eng zawk nge ka lo nih tak ang tiin a kut chu a lu ah a han dahchho va,  a eng zawk nge anih tak tih hriat na tur in. A mak a tih em em chu - a danglam lo, a pangngai ang in ala awm reng mai. Hna chu a thawk ngei a, cakes chu a ei zo ta vek a ni.