Strikes Back 9

 Sudden - Strikes Back 

BUNG KUANA

Slash 8 a rawn thlen ni atanga ni hnih velah chuan Grace Tate-I pawhin Ranch enkawl dan tlem tlem chu a hre ve tan tawh a. A rin ai daihin ranch leh a vela nitin a han chettlat chu nuam a tiin a tui ta riau nghe nghe a. Chulai ram hmel hmang leh hnim pangpar rimtui tak tak, rawng chi hrang hranga in pawlh chiai mai, zing nichhuak sen phut mai leh boruak thiang tak hnuaia a han thlir vel te chuan a rilru a hlim tak zet a. Thing buk rawng chi hrang hrang kara tlai ni tla tur eng mawi tak te chuan a rawn kalsan tak khawchhak lama an chetdan leh hnuhma te chu a rilrua tangin a theihnghilh tir chiang hle a ni tih a inhre mai a. Green-a hna tlin zia pawh chu ngaisang ru viau mahse, a ngaihdan erawh a tilang hran lem lova. Green-a chuan hna kalphung engkim, senso zat, engtianga tih tur nge, eng enge hmabak etc. te chu a kawhhmuh zel a. Tawngkam dam tak leh a hriatthiam theih ngei tur tawngkam  mawlmang leh awlsam thei ang ber a hmang thin a. A lo tawngkhum tawh na chungchangah ah erawh chuan engmah thleng lo ang hmakin a awm a. A naute pawh chuan an ngaina em em a ni tih a lang reng mai a. A bik takin Dave-a phei chuan a bula a han sawi vel danin, pathian tenau biakin be lo chauh niin  a hria a. Green-a chu rawl ring deuha a tawng  a hre ngai miah lova. Hnathawh dan vel an rel ho pawhin inhnialna emaw, ngaihdan inanglo avanga intihthiam lohna an neih a hre ngai lo a ni. Chuti khawp chuan thil kal fel mahse, a awmphung chungchanga Green-a’n thuneihna engemaw chen a nei chu nuam a ti lovin a ning ve hrim hrim ringawt mai a ni.

Grace Tate-I  rawn thlen atanga rei vak lovah chuan Green-a chuan apa laka a thutiam te, thurochhiah siam a nih thu leh chu chu Judge (Dan hremi) Pringle-a, South Bend-a awm hnena thawn a nih tawh dante chu  a han hrilh a. Chutah tak chuan Tate-I chuan, Barclay-a nena an lo insawi hmawrhmuh tawhna chu engmah lovah a chang ta niin a ngai ta phawt a. A lehlamah chuan thutlukna tak tak a kuta a awm lo chu hahdamthlak a ti phian lawi a. Amaherawhchu, Grace Tate-I chu mu leh mal nei lova teihawi kual khawtlai mai mai reng chi a nih loh avangin .. a hun a lo thleng ta a. Tuk khat chu, Corral lama Foreman a kal laiin a han hawi a, Chawchhumpa in vei nei tih hriat taka  a lo en reng chu a hmu ta thut a.

‘Kan pi Nula khan biak che a duh a ni, Jim,’ a lo ti lauh a.

Sudden-a chuan inkawmna pindanah zau huau mai ah chuan Nula chu a va hmu a. A lo nghak reng tawh nghe nghe a. A lo dang lep a, a lo meng val kelh a. Chung te a han hmuh chuan, tun ni reilo te liamta atang khan a thawkrimin a hah thawkhat hle a ni tih Sudden-a chuan a hre mai a. A lo ngaihsak that lem lohna avang chuan anchhia a inlawh sap a. Pawn boruak tha hipa kal chhuahpui a, ngaihsak deuh turin Dave-a  chu hrilh a tum rilru ta a.’

‘Ka pa lehkha ziah te chu ka lo en fel vel a, Green,’ tiin Sudden-a chu a han hrilh a.

‘Engkim hi I enkawl fel thlap mai niin a lang, a ropui hle mai.’

‘Chutiang chu a nih ka beisei, Ka pi, I pa in min chah dan angin ka ti mai a nia.’

‘Ka tana a ziah bik lehkha pakhat ka hmuchhuak bawk a’ a han ti leh bauh a. A aw chu tlemin a rawn khur deuh a, inthunun hram hram a tum a. ‘Chu lehkhaah chuan, hun remchang ka neih veleh South Bend a Judge Pringle-a hnena kal turin min ti a.’

‘Amah hi a nia I pa in a sawi thin kha — ka hrilh tawh ang che khan,’ Green-a chuan a lo ti ve a. ‘Slash 8 neitu I nih theihna tur kawnga thil hriat tur pawimawh te a kawl a nih ka ring.’

‘Judge Pringle-a chu kum tam tak chhung ka Pa thian hlun a lo ni reng tawh thin a sin,’ Grace Tate-I chuan a han ti a. ‘Amah hmu tura kal chu ka duh a. Khawngaih takin Sakawr I lo buatsaih thei angem ?’

Ngaihmawhawm turin, a kal duhna chhan leh thildang engmah a zawtin, a dilchhut zui hran lova. Kalpui tur tuemaw a rawt chhuah beiseiin, ‘Nangmah chauh chuan I kal thei lovang’ a han ti satliah  ringawt a. Grace-I chu a hmel a ngui deuh sawt a. Green-a chuan a tibeidawng leh ta.. ‘Boruak tharlam te hip la a tha lo maw… Dave-a’n a kalpui thei ang che.’

‘A tha khawp ang chu,’ a han ti a. ‘Hei hi ka hrilh ngei che a ngai a ni. Green, ka dinhmun mek hi ka tawrh theih piah lam niin ka ngai a. Mi hrang daih hnena ka chetvelna leh senso kip a kawi hrilh ngai dinhmuna ka ding hi hrehawm ka tiin ka duh chiah lo a ni.’

‘Khai a, ka Pi,’ tiin Foreman chuan a lo hnial a, ‘I duh a piang I ti thei a lawm. I mimal nun danah chuan ka inrawlh dawn hlei nem. Ranch enkawlna chungchang chauh hi a nia ka buaina chu. Engtizia nge….. mamawh dang I nei em ni ?’

Grace-I chuan a lu a lo thing a. Hmeichhe tam zawk angin, Green-a enkawlna chu a chhan em em pawh awm lem lovin a kham ve hrim hrim a. A duhdan leh ruahmanna lovin thil a kal deuh zel si a. Ranch hi a kutah dah pumhlum se tih chu a duhdan ber a ni a. Chutiang a nih avang chuan a thawm riva pawh a nalh tehchiam lo thin a ni.

Room atanga chhuah pah chuan ‘Sakawr chu ka’n buatsaih anga, Dave-a pawh ka han hrilh nghal a nge’ a han ti a. Pawna a chhuah veleh chuan a ner sawk a, ‘In tih lar kawngah chuan hma ka sawn lo hle mai’ tiin a mah leh amah chu a han inhrilh sap a. ‘Tunah chuan, vengtu sual tak, a duh zawng engmah pawh leitir phallo niin ka mawi e.. huh..hmm !’ a ti zui bal bal a.

Sakawr zin phah sa diam chu Bathlar bulah chuan an rawn kai phei a. Dave-a chuan hma hruaiin, lui dung zuia, Thunder Ravine (Kurung) leh South Bend lama kawngtum kal chu an zawh tan ta a. A tir lamah chuan chu Cowboy la naupang tak chuan zah tak leh hlat deuhin a ruaitunu chu a kalpui a. Chutah, Grace-I chuan chulai phaizawl zau tak a mahni chauha khawhar taka han kal ngawt ngawt chu a nin tak deuh avangin a bul hnai te a kal ve tur chuan a han sawm a. A Foreman tawng tam lo tak hnen atang ai chuan Dave-a hnen atang chuan chulai phai ruam dinhmun chanchin te pawh a hriat belh thei deuh mahna. Dik tak chuan a mize rinawm tlut leh inhawng hak mai avang chuan a rin aiin Dave-a chu a ngaina ta hle tih pawh a in hre ta a. Dave-a chu Cowboy pangngai dang tam tak ang bawkin hmeichhe bulah chuan a laiin, a zakzum ve deuh tlat niin a lang. Titi phungleng satliah engemaw chen a vawrh hnuah chuan Green-a chanchin chu a zawt ta a.

‘Pa tha elkhen mai mawle,’ tiin phur zetin a rawn chhang a. An pahniha Mesa tlang an lawn laia thil thleng te kha Dave-a chuan a han sawi chhuak chho ta zel a. A thluaithlum hran lo nain, Green-a thiltih tarlang tam tur zawng zelin a titi chu a her a. He nula hi a ngaina a. Chuvangin, a thianpa pawh chu ngaina ve turin a duh hle a ni. Amaherawhchu, bui lung tawk ang talh a la ni rih a.

‘Ka lakah chuan silai hmanga eizawng, mi tawrawt lutuk niin a la lang tlat,’ Grace-I chuan a lo ti vawt raih a.

‘Aw, khai a, ka Pi, min lo hrethiam la, silaimu verhna kua atang ringawt chuan silai hmanga eizawng an nih leh nih loh I hre lovang. Tuemaw in thil engemaw an hrilh ve ringawt che a nih kha. A dik lo pumhlum tawp ang chu ka ti ngam chiah lo na a. Chhinchhiahna leh landan ringawt atang hi chuan thil hi ngaih sual ve theih deuh mai a nia.. Mimal takin Jim-a chungchangah ngat phei hi chuan, Silai hmanga eizawng mi niin ka hre lo. Chutiang mizia a pu lo. Chutiang chu ni mahse, tupawhin Jim-a hma a silai an phawi chuan hrikin a seh thak zui nasa viau ang tih erawh ka ring.’

Chung hun laia silai chelek thiam leh phawirang hrang hrang; Wild Bill Hickok-a, Hays  leh Abilene thianfaitu chanchin te, Dodge City khua a mi Wyatt Earp-a chanchin te, Sudden-a, Hatchett’s Folly thianfaitu chanchinte chu a han sawi chho ta zel a. Bawng vulhna khua leh Rangkachak laichhuak tute khaw din chanchin te, Chuta mihring awm te’n an huaisenna leh an silai phawiranna hmanga dan leh thupek an kenkawh dan te chanchinte chu a han hrilh ve a.

 ‘Tin, hmun thenkhat, dan mumalin a thlen phak lohna engemaw zat a la awm bawk a. Chungte zinga mi pakhat chu Hanging Rock pawh a nih ve na lai a awm a. Chutiang hmunah chuan dan leh rorelna chu miin a kawnga a pai mai a ngaih chang a awm a. Kei pawh hi, remna leh muanna duh mi ka ni a, mahse, mahni invenna awmzia hi chu ka hria in mahni inveng thei tur hian ka inring reng thin a sin.’ a han ti a.

‘Chu pawh nise,’ Nula chuan a la ti hram a ‘In hriatthiamlohna zawng zawng hi silaia chinfel vek theih a ni dawn em ni ? A chang chuan mipate hian dawhkan kilin pangngai takin thil an sawi fel thei ngei tur a ni dawn lawm ni ?’

Dave-a chuan remti tih entirnan a lo bu nghat a. Chutah, inrinlawkna pawh awm lovin an kawngtum zawh mek sir lawkah chuan Rulin a mei a tih rik chhek chhek ri hi an hre ta a. Tate-I chuanna sakawr chu a talbuai thut a. Nula chu a thutna atangin a tla tawp a. Hlau fahranin a chuanna sakawr talbuaina chhan awm chu a han melh kual a. A bul chiah kawng kam mai atang chuan chuk tura inpeihsa vek hian rul lian zet chuan a lo tin ur tawh mai a. Chu rannung tle zuar mai hlauhawm zia leh a thi mai thei a nih dan te a ngaihtuah chhuak hman awrh ang tihah chuan a sir mai atang chuan a rawn puak thuai a. Rul lu chu a thlawk bo nghal daih a. A taksa pawh chu silaimu chuan a bul hnimbukah chuan a hnawl lut nawk a. Grace-I chu a rawn hawi chhuah chuan Dave-a mitmeng thip leh vawt raih mai in, a puakruk la khu ngiai ngiai, a bawma a lo thawlh lut leh mek chu a han hmu a. A hmel put hmang chu nui hmelin a inthlak leh vat a. Grace-I sakawr pawh chu kawngpui ah chuan a rawn kai chhuak leh nghal a.

‘Mi pangngai chinte chu awmze neiin thil an sawi fel thei ang I tia tiraw’ tih pahin engmah thlenglo ang hmiahin a rawn titi chhunzawm a. A aw dam raih mai chuan nula thinphu dawt dawt pawh chu a tizia deuh hlek a. Nula chuan theih tawpa inthunnun tuma a lo beih lai chuan, a lo sawi zawm zel a.. ‘Amaherawhchu, mi thenkhat hi chu khatiang rul ang mai kha an ni a. Tur a khat an ni a. chumi awmzia chu engmah sawipui turin hun an pe lovang che. Awmphung pangngai a nun hi an tum lo hrim hrim thin a ni. Rul pawh kha pangngai taka titipui I tum a nih chuan mitthi I ni nghal mai. Khatiang dinhmunah kha chuan chet dan kawng khat chauh a awm a ni’ tih pah chuan a puakruk pai chu a han beng thak thak a. Chutih lai chuan, chu tlangval la naupang tak leh nui sang maiin rang elkhen a a mah tihthaihtu, kawng sira rul a thah dan a han ngaihtuah let leh chuan, Nula chu a la khur deuh der der a. 

Engemaw chen a han ngawih hnu chuan Grace-I chuan, ‘Mr. Barclay-a khan helai Sweetwater phai ruam vela thil thleng hi min hrilh thin a.’ a rawn ti leh tan a. 

‘A va nuihzat thlak ve chu chu,’ Dave-a chuan a lo ti nghat a. 

‘Enge a nuihzat thlak na ?’ Grace-I chu a nur ta deuh a.

‘Tihdan phung pangngai tak ni pawhin I lo ngai maithei a, ka tan chuan Barclay-a titipui chu Rul nena titi dun ang vel a ni.’ A hmel tha mawlmang ve tak chu a rawn thutak ta riau a. ‘Miss Grace, ka thurawn hi pawm la, Zack Barclay-a leh a thu leh hla hi ring reng reng suh. Thlan piah lam ram thleng pawhin he pa hi chu mi sual lutuk a nih hi aw.’

‘Barclay-a chuan buaina tam zawkah phenah heng ‘Shadows’ mi mak tak tak ho hi an awm tiin min hrilh a sin’ Grace-I chuan a han ti leh hram a. ‘Engatinge tuman an la chhuichhuah loh le ?

‘Nia… ka Pi….. chu I zawhna chu a chhanna pahnih a awm thei. I duh zawk chu lo awih mai la. Pakhatna ah chuan, Sheriff Brady-a ngaihdanah Shadows ho chuan tlangah tawm buk tha lutuk an nei a, zawng chhuak tur chuan sipai rual rawih a ngai dawn a ni. Chu lo chu ngaihdan dang deuh, ka pawm zawng tak, I pa leh Jim-a pawhin an ngaihdan ni ve chiah, a awm bawk a.. chu chu, heng mi rawkrailo ho hi suangtuahna a din chawp mai mai, thil awm tak tak lo a ni.’

‘Mahse, engtinnge chu chu a nih theih ang ?’ tih pahin Grace-I chu a han thaw halh a.. ‘Vawi tam an hmu thin ngei a ni lawm ni ? Mr. Barclay-a min hrilh danin Hanging Rock Bank te pawh an rawk kha !’

‘An tih chu a nih kha’ tiin cowboy chuan a lo chhang a, ‘Chubak pawh chu an tih ni a ngaih theih, henglai vela thil thleng tam tak a awm a. Min hrethiam la, I pa leh Green-a an lambun te pawh kha a tel a. Mahse, han ngaihtuah ngun leh deuh la, thil awmang loh riau awmin I hre thei ang,’ tiin a han tlip a.

Grace-I hmelah chuan thil hriat belh zel chakna a rawn lang a. chutah Cowboy chuan kutzung pira number ziak meuhin a han sawi chhunzawm zel a. ‘Pakhatnaah chuan: Engtinnge Shadows ho chuan I pa leh Green-a’n khua an chhuahsan lai kha an lo hriat chat theih ? Pahnihnaah chuan: Engatinge an thiltih apiang hi, Bank rawk pawh kha telin, mimal taka Barclay-a tanpui zawng zelin thil a awm ? Pathumnaah chuan: Engtinnge hnuhma chhuizui  tur awm lova an pil bo theih zel? Palinaah chuan: Engatinge Zack Barclay-a hi an tihbuai ve ngai miah loh le ?’

‘Aw, takzet che hian, David,’ tiin nula chuan a lo pawtchat a. ‘Thil dang sawi lovin I ngaihtuahna kha I thutak bawl deuh mah mah niin ka hria. Tin, heng misualho zingah hian Barclay-a hi a tel ve tih lam deuh I kawhtir mah mah lo maw ?’

‘Kawh tir a ?…. a mah ngei hi a nia ka sawi mek chu !’

‘Mahse, chu zawng a atthlak deuh ang. Ani te chuan pawisa a nei bawk a, buaina thleng kher lovin a duh apiang a lei thei zel mai ang chu.’

‘A nih leh hei hi min chhang teh. Shadows ho hian enge an duh chiah ni ta ang le ?’ tiin cowboy chuan a han zawt leh a. 

Grace-I chu a ngawi ta rauh rauh a, hei chiah hi a ni, a ngaihtuahna a lo lut, a hriatthiam theih loh chu. Barclay-a sawi angin Shadows ho chuan a pa chu an lo that ta a. Enge chumi phenah chuan an tum ni ang le ? Phuba lakna a ni ang em ? Eng phuba nge ni ang ? Engatinge Slash 8 leh ranch dangte hi an tihbuai reng ? Loh theih loha an chhuahsan hnu a, Barclay-a’n an hmun hma te chu a lo lei zel theih nan a ruahmanna a ni tak tak angem le ?

Barclay-a khan engti kawng pawhin ranch chu a lei theih tho tho tur thu a sawi a. Tin, a Ranch chu a lianin an chak em a, eng suamhmang pawl mahin an khawih buai  ngam loh thu a sawi a. Mahse, Shadows ho chu midang tana thawk, tum mumal tak nei ni ta se, engvangin nge Box B chu an beih ngai si loh ? Thuthangah chuan pawl lian tak an ni an ti bawk sia. 

Dave-a zawhna chu a chhang thei lo. Amah ngei pawh chu a inchhang thei chuang lo. Muk taka inngaihtuah rauh rauh chungin Thunder Mesa ruam chhunga kawng tum chu zawhin an kal dun bauh bauh a. Kawng chu a zim khawp mai a, a zau zawng chu yard tlemte chauh hi a ni a. Chung lamah chuan lung bang sang pui pui hi a khir uaih a. Thawmna zet a lui tui luang ri hum hum chuan an aw ri pawh a chhilh bo vek deuh thaw a ni. Grace-I chu a han titi leh tan a.

‘Green-a’n South Bend lamah ranrual thenkhat hralh a tum tih min hrilh a’ a han ti lawng lawng a. ‘Helam kawnga kalpui hi chu a tum lo’ng chu maw ?’ tih pahin chulai kawng zim fahran mai leh an chung lama lung to lurh mai chu a han thlir vel a.

‘Nia, Thunder Mesa paltlanga kalpui tur chuan a ruahman a lawm, chuti a nih chuan hei lo hi chu kawng dang a awm ka ring lo’ tiin inringtawk ang reng takin a lo chhang satliah mai nain, nula zawhna chuan a ngaihtuahna a kal thui tir ta riau a. Helai hmun paltlanga ranrual khalh chu a hlauhawm hle dawn a. Buaina chhete pawh thleng se, an zavaia thihna pawh thleng hial thei a ni tih te chu a ngihtuah rauh rauh a.

‘A thil tih tur hi a hriat chian ka beisei,’ Nula chuan a han ti a. 

Dave-a chu a rilru a a vei ang ti lang lem lovin, ‘Lungngai mah ta che ka Pi, Jim-a hian a tihtur chu a hrechiang teh a nia. South Bend lamah ranrual khalh a tum a nih chuan hremhmun emaw tuilian emaw pawh paltlang ngai se a thei leh mai ang’ a han ti a.

Grace Tate-I chuan chutiang taka inngaihsanna chu engtin mah a chhawn let hran lova. A dik chauh chuan darkar chanve hnu a South Bend kawtthler an thlen thleng chuan a tawng zui ta lo reng reng a ni. South Bend khaw thleng awm dan chu Hanging Rock nen khan a danglam tam vak lova, a danglamna chu In te chu tlemin an lian deuh a, a in tlar fel deuh tih a ni mai a. Thunder Mesa a thawk Miner (thil laichhuak mi)  tam zawk te in leh lo awmna hmun a ni a. A khaw thenawm vela bawng vulhna behchhana khaw din dangte ho ai ngawt chuan a pui ve deuh tih a ni mai a. Dave-a leh Grace-I pawh chuan a hma deuhin he khua hi an lo tlawh tawh nain, a khaw thleng awmdan chu an lo hrechiang lutuk tawh lo ve ve si a. Khawlaia lengvak pa pakhat chu chinchang zawtin, Judge Pringle-a In awmna hmun te chu an han hria a. Chu pa chuan Grace Tate-I chu van atanga angel hawl thlak ni awm hrima ngaiiin, kut khum meuhin, a thlir zui vung vung a.  Dave-a chuan, kawtthlera chu nula la naupang tak leh bawih hnap mai nena an kal phei auh auh lai chuan mi mit an la hle tih pawh a hrethei a ni.

Judge Pringle-a chenna In chu te fel ren rawn, chung bial deuh, rawng var leh hringa hnawih hi a ni a. Las Crucas lam panna kawnga khaw daifem lam, kawng atanga pen hlekah a lo ni a. A nihna (Title) hi khawthlang lama mi tam zawkin a lem leh a hming mai mai a an neih laiin, a ni chu a tak tak (Genuine) a ni a. Dan hremi, upa lam, kum sawmruk vela upa a ni a. Eng fiah lo tak hnuaiah chuan a sakruang sang kul khun mai leh a mit dumpawl dal reih nen, a dan leh hrai lehkhabu keusa chungah chuan engemaw chen titi a lo vawr tawh a. Mahse, a aw erawh la chak tha tak a ni a. A hmel chu rawih ve tawh lam niin, pa ngilnei tak hmel a pu a. A khabe pawh chu tumruh tih hriat takin a invuah nghet tlet tlawt kher mai. A sam erawh vur anga var a ni a.

‘‘Tichuan.. nang hi Goerge-a fanu chu maw I nih? Tiin, Grace-i’n a han inhmelhriattir lai chuan, a han zawt a.

‘I nu I chhun hle mai a. Entia rei nge ni ta hei... Ka hmuh hnuhnun ber tum che kha chuan mawng er tin ten, hmai bal tial niu niau kha I nia’ tih pah chuan a han nui var var a. ‘I pa boral chanchin ka han hriata pawi ka tih zia chu sawi in a siak awm love, ka naute. Kha thil a thlen hma lawk khan lehkha a rawn thawn a. I hria anga tiraw ?’

‘Aw, hria e,’ tiin Grace-I chuan a lo chhang a. ‘A nihna takah chuan chu chu helaia ka lo kal chhan pawh a nia. Ka pa khan lehkha ziak min lo hnuchhiah a, chutah chuan he hmuna rawn kal a, rawn hmu tur che a tih ka nia.’

‘ A dik e,’ Judge chuan a lo ti bauh a. ‘Grace, I chungchang thu a thil kalpui zel dan turah hian thil sawi duh tam tak ka nei a sin. A nuam thei ang ber khan han thu khawmuang phawt ula maw le. Ka awmpuinu in Coffee pawh a lo pe ang che u’

Dave-a chuan Grace-I thut fel chu a han nghak te te phawt a, chutah kawngka lam pan pahin, ‘Pawn lerah ka lo va teihawi mai mai ange aw.. ka Pi. Darkar khat hnu velah ka lo kir leh ang. Judge nen hian mimal thil tak tak sawi dun pawh in duhin ka ring’ tiin rawtna a han siam a. 

‘Aw, David, I a thei em mai a. Judge, hei hi David Haynes, Slash 8 a thawk a nih hi. A hriat ve loh tur chi thil engmah a awm dawn em ni. Hnialna I neih hran loh chuan ? tih pahin zawt hmel deuhin a mitko a han san a. Judge chuan a lu a lo thing a.

‘Teh nang, duh tak,’ tiin a lo hrilh a. ‘Thil awmdan chu mawlte mawle. I pa chuan sawrkar hriatpuinain, dan ang thlapin min tir a. Chu chuan in chungchanga I pa ruahmanna pahnih hlenchhuahna kawnga thil enfel tura thuneihna ka neih thu a ni. Pakhatna ah chuan, tlangval pakhat, a hming James Green-a, a theihna leh thiamna te I pa in a rintawkna a vanga, Ranch enkawlna hna kip a kawi a khawih dan tur chungchang a ni a. Pahnihna ah chuan I kum sawmhnih pakhat na piancham a lo thlen veleh, Slash 8 Ranch I rochunna tur thu leh thuneihna pumhlum I kuta hlan a nih dan tur chungchang a ni. Chu chu ka lo hriat dan chuan tun atanga thla thum hnua lo thleng tur a ni.’

Grace-I chu a lo bu nghauh a. chutah, chu dan hremi chuan a han chhunzawm zel a, ‘I pa lehkha ah chuan James Green-a chanchin pawh engemaw chen chu a inziak a. Chu erawh chu tun dinhmunah ka puangzar thiang rih lo ang a. Chu tlangval chu rintlak a nih tak tak leh tak tak loh chhui chiang tura min tihna a awm tel nghe nghe a. Ka chhui chiang vek tawh a. I tan hlauhthawn tur a awm reng reng lo a ni tih ka hrilh nghal duh che a. Tin, a chungchangah hian Arizona Governor Bleke-a sulhnu te pawh a awm tih te pawh ka hrilh duh che a. Bleke-a te ang mihring hriatpuina lehkha meuh a tel takah chuan ka duh chu a kim ta a. Green-a pawh Slash 8 Foreman anga a awm zui zel chu hnialna ka nei ta lo a ni. Tin, ka rilrua rinhlelhna ka neih palh a, I pa hi engtin emaw vaubeh leh tihbuai a lo ni a ka hria a nih chuan Green-a chungchang hi Territorial Court-ah thlen thei reng ka ni bawk. Chutianga, thil dik tak leh fel taka ka thlir fe hnuah chuan, I pa thurochhiah chu a duh dan angin ka kalpui ta a ni.’ Tih pahin Putar chu a han nui deuh a. ‘Dan mi leh sa ka nihna in thu ka han hrilh che a.. min hrethiam dawn nia aw’ a han ti a.

Grace-I chuan a lo nuih let saih a. Dave-a pawh a thianpa chanchin tha lam a han hriat chuan a hmel a lo eng deuh sawt a. Tunah chuan Green-a laka Ranch thuneihna laksak theih a lo inrin chiah lohna pawh tihchian a ni ta a. Grace-I chu a hrilhhai angreng viau nain, a hahdam deuh sawt a.

‘Tunah chuan, tun atanga thla thum chhung chu nangmah enkawltu leh venghimtu (Guardian) ka lo ni dawn ta a ni. He ka mawhphurhna hi lawm tak leh felfai takin ka hlen chhuak ang.’ Judge Putar chuan a ti ta a.

‘Ka lawm e, Judge,’ Nula chuan a han ti a. ‘Ka ti dik a nih chuan, a nih leh, engti kawng mahin Slash 8 ah chuan thuneihna ka nei lo em ni ?’

‘E khai, chutiang em em chu ni lo deuh e, ka duhtak,’ tiin Judge chuan a lo chhang a, ‘Engemaw chenah chuan a nia. Mahse, I duh ang leh chak zawng ang apiang chu I ti thei a lawm. Hun bi neiin sum mawihnai tawk tak I dawng dawn fo bawk a. Ka sawi dan kha ngaihtuah chiang la.. thupek ni lovin ngenna a nih kha… a theih chuan I remchan hun hun ah I tum dan chu Green-a I hrilh ve thin dawn a ni. 

‘A nih leh Slash 8 hi hralh duhin, khawchhak lamah kir leh duh ta ang ila ?’

‘E.. Chungte chu I thi thei tehreng mai - kum sawmhnih pakhat I tlin hnuah. Pangngai taka lei tum chuan thla thum te chu an nghak thei lutuk dawn lawm ni ?’

‘Nia,’ tih pahin, ‘Mahse, tunah hralh duh ta tlat ila?’ a han ti leh hram a.

‘Chutiang hmalakna ah chuan Green-a pawmpuina ka dil phawt a ngai ang tih ka va hlau ve, duh tak. Ranch enkawl dan hi ka hre tlem khawp a. Mithiam te ngaihdan pawh kan lak a ngai phawt ang chu. Green-a pawhin dan ang taka ka thurawn chu min tawmpuiin, a remti ngei ang tih ka chiang a ni.’

Chu Judge putar awka chu a dam raih a, mahse, Grace-I chuan a sawi chhuah dan atang chuan a rilru tihnat a hlauh vang chauh a ni tih a hre ta a. Green-a a ban theih leh theih loh chung chang a zawh leh tur pawh chu a chhanna hresa in a inhria a. A lungni ta vak lova.

‘Ka duh emaw duh lo emaw thla thum chhung chu Swetwater phairuam leh Green-a chu ka tawrh tlawk tlawk a ngai niin a lang a ni maw,’ tiin a han insut deuh hraih a.

Judge pa chuan makti hmel a rawn pu a. ‘Green-a chuan buaina a thlen tawh che em ni ?’

‘Amah hi ka ngaina lo hrim hrim,’ Grace-I chuan a han ti teh ngawt a, ‘He phai ruam ka ngainat ang hian ka ngaina lo.. Slash 8 neitu ni awm fahranin a che vel thin a.’

‘I han sawi danah chuan, thil nih dan tur reng a nih chu. Chutiangin awm lo se a tihtur a hlen lo tihna a ni dawn a sin. Neitu nihna I chan hma chuan Green-a leh Slash 8 hlutna zawng zawng hi him takin ka kutah a awm a lawm. Chuvangin, a chet dan engkimah Slash 8 neitu dik tak anga awm tur reng a nia lawm.’

Grace-I hmel hnim ruai ruai chu a hmuh in, han tihhlim leh deuh hlek a duh a. ‘Duh tak, nangmah leh nangmah kha hun thawl inpe rawh. I rawn thlenna a la rei lo hle nain, thil thleng a tam mah mah tawh tlat. Slash 8 ah hian thuneihna pawh nei la, engtia enkawl tur nge tih I hre miah lo tih hi chiang la a tha ka ti.’

Grace-I chuan hreh hle mah se, a dinhmun chu a pawm thiam a ngai a ni, thudik a ni tlat si a. Mahse, luhlul la chhuah deuh chung hian, ‘Mahse, Chungte zawng ka mamawh lovang. A hming pawh sawilang ta mai ila, Mr. Barclay-a’n man man tawka Slash 8 hi min leisak tumin indawrna kan lo nei tawh a. Ranch hi ka hralh chuan helai phairuama buaina zawng zawng hi a tawp dawn a lawm.’

‘Chutiang chu I pa leh Green-a ngaihdan a nilo tih a lang tlang sa reng a lawm, Grace’ Putar chuan a ti ve ta khawl mai a. ‘I pa khan Barclay-a chungchang pawh a rawn ziak nual tak a sin’ a han ti a. A awki atang chuan a pain Barclay-a chanchin a ziah dan chu a nalh lem lovang tih a hriat mai a. Tin, Pringle-a ngei pawh chuan Box B neitupa chu a ngaisang lo hle niin a lang thei a. Grace-I chuan South Bend a tlawh chuan rah a chhuah lem lo tih a hriatchian tak hnu chuan, chhuah tumin a ding ta hluai a. Pringle a chuan a hmel lan dan chu diklo riauin a lo hre deuh a.

‘Khawngaih takin thinrim lo la,’ a han ti a. ‘I buaina hmasa ber tur chu Hanging Rock khua a Bank a in dahkham rulh fel kha a ni a. Tichuan, leiba chungchangah I lo zalen tawh ang a, chutah, I hralh dawn nge I awm hlen dawn tih te chu I la ngaihtuah chho zel ang chu. In leiba te rulh nan Green-a’n sum tuakna tur ruahmanna a nei a ni maw..?’

‘Nia,’ Nula chuan a lo ti deuh hmak a, ‘Bawng thenkhat a hralh dawn a niang?’

‘That chu,’ tih pahin Judge chu a bu nghat a. ‘Green-a chuan Ranch chu enkawl rih phawt rawh se. Thla reilo teah, Mr Barclay-an a la duh reng a, tun ang rilru I I la put bawk chuan, I hralh na turin engmah in a dal tawh lo ang che’ a han ti a.

Lo kir leh a, inhmuh leh thuai an intiam hnuah chu nu valai tak chu a zuitu pa nen chuan South Bend chhuahsanin Slash 8 lamtluang chu an zawh kir leh ta hnak hnak a. Kawng laka Sakawr chung an chuan chhung zawng chuan, Dave-a leh a kalpui nu chu an rilru a buai dun hle a niin a lang. An titi dan pawh a chiri deuh nuai a, a tawp lamah phei chuan mumal neivak lovin a zuihral ta daih nghe nghe a. Sakawr chung chuan pah chuan Grace-I chuan a dinhmun chu a han thlir let leh vang vang a. Tukin zinga an kal lamah kha chuan, a thuneihna tih len deuh leh Green-a pawh a dinhmun dik taka dah tura Judge titipui beiseina nen a chhuak ta kha a ni a. Chu a hnehin a pa thianpa chuan engmah tih theih a neih loh zia a lo hrilh chiang  a ni lek fang si a. South Bend a va tlawh in a kawh ber chu naupang kawhmawh bawlna chikhat te pawh a niin a lang dawn dawn a. Chu lah hmehmih a ni ta bawk si. Chu pa dam raih mai, amah leh a bungruate thunun tlat tu, a han ngaihtuah chhuah apiang chuan a thinrim tulh tulh mai a. A hna ti samkhai zawnga awm chu a tum ta bik lova. Chu chu tul riauvin a hre ta a ni. Zachary Barclay-a sakruang hrawl pui mai, thiltihtheih hmel tak chu a han ngaihtuah thleng a. Slash 8 a rawn tlawh hunah a harsatna te lo sawipui a tum ta a.

A tuk leh zingah chuan, a lo tiam tawh angin, Box B neitupa chu Lui atanga Slash 8 pawhna kawngtumah chuan a rawn lang ta a. Sudden-a leh Dave-a chu Corral (Sakawr In) sirah sakawr lakam hrui vel singsa in an lo buai mek a. Chutah,  Cowboy naupang zawk chuan Sakawr chungchuang anmahni rawn pan mektu a han hriat chian chuan a meng zim ta sat a..

‘Zack Barclay-a !’ tih pahin chil an chhak that a. ‘Sawtiang ramsa dawihzep intihuaisen hmel fua a lo kal ka han hmu chu ka ngeng a chhun mang e !’’

‘Chung lam atanga sawmna avanga awm a nih saw. Kan lalnu ropuiin heta local tur hian a ngen a nih kha,’ tiin Sudden-a chuan a thianpa chu a han hriattir nawn leh a. ‘A hma ang chu nise, Slash 8 ah hian lawm a hlawh lem loh viau ang a ? ’

‘Tehreng e !’ Dave a chuan a lo ti vat a, ‘Lawm chu a hlawh lo khawp ang le’ tiin a han belhchhah ve leh zat a. 

Box B neitupa pawh chu rawn kalzelin vaivut khu cham cham karah chuan a sakawr chu a pawt ding ta a. A ruangam mit la tak ah chuan nalh fahrana thui suit (kawr leh kekawr inchawih mawi taka thui) a inbel a. Stetson lukhum, pearl (Lunghlu chi khat) var rawng a khum bawk a. A chuanna sakawr pawh a zahpuiawm lo kher mai. Amaherawh chu, a pang sira thisen hnuhma rang ruai avang chuan, a pu chuan nunrawng takin a spur (sakawr khenna) chu chu ramsa vanduai tak lakah chuan a hmang viau niin a lang a. Chung pa pahnih te’n an lo rin loh deuhin  nui sang chungin anmahni lam chu a rawn pan ta a.

‘Green, titi pui che ka duh a ni’ a han ti a.

‘I sawi mek a ni lawm ni,’ tiin engahmah a ngai lo tih hriat zetin Sudden-a chuan a lo chhang a. ‘Thlawk bo teh.’

‘Hmanni a Hanging Rock-a thil thleng avang khan I ngaihdam ka ba niin ka hria a,’ Barclay-a chuan a han ti leh a. ‘Khatianga ka thin thawk thut avang khan ngaihdam dil ka duh a ni.’

Sudden-a chuan a kut rawn phar chhuah chu a lo haider hmiah a. Barclay-a thinrim chu a hmai a sen nghal tun tun a. ‘Ka hnung lam atangin min rawn thil hrawih tep chu a nih kha’ tiin Sudden-a chuan a lo hrilh nawn leh sak a. ‘Chu chu theihnghilh a, ngaidam tur che in min beisei a maw ?’

Chu Rancher pa lianpui chuan thinrim lutukin a sakawr lakam chu a hmer ngawt ngawt a. ‘Heng mi mawl pahnihte nena in benbekrek buai aia thil tihtur pawimawh tam tak a la awm a ni. Nakin deuhah a tul dan a zirin ka la dawr chhunzawm ang chu’ ti rilru chungin a thinrimna chu a pai dai thei ta hram a. Chutah, ‘Thil ka lo ti sual a ni tih hi ka sawi chhuah tal chu phal ve ula mawle’

‘Hrilh ka ni ta a,’ Green-a chuan a lo ti leh a. ‘Thildang enge la awm ?’

‘Enteh Hey,’ Barclay-a chuan a lo ti leh a, ‘Hetiang thil vel han sawi chhuah hi ka thiam vak lova —’

‘A nih chuan Io inzir tawh ang che aw, Slash 8 rawn tlawh I tum a nih chuan.’ Dave-a chuan vawt raihin a lo ti ve hmak a. ‘Kan dawh theih hram hramna avanga he hmuna awm I nih hi aw. Ka thu chu nise, ka um chhuak rang viau ang che.’

‘Chutiang tawngkam chu nangni ang mihring lakah hian ka dawn ngaiin ka hre love, Cowboy’ tih pah chuan Barclay-a chuan a melh ta khui mai a. Dave-a chuan zahpah lo taka lo nguk hraih pahin, ‘ I ti dik e’ a lo ti leh hmak a.

‘Sakawr atanga I tlakna ah khan I sil bawk ang maw?’

‘Engvanga… nangni tawng duh satliah in….. .’ tih pah chuan Barclay-a chu a rum ngul ngul a. a thualthah chakna thisen chu a rawn so bulh bulh avangin, a that derna te pawh chu a theihnghilh ta der a. Sakawr atanga rawn chhuk a tum lai chuan Sudden-aaw vawt raih avang chuan a tawp leh chawt a.

‘Khatah khan awm reng rawh, Barclay,’ a rawn ti ta chhak a. ‘Slash 8 ah hi chuan vanneihna in a umzui vak dawn lo che a nia. I tan chuan han tum chin leh na hun tha a ni vak lovang.’ An thusawi thawm hria a Grace Tate-I Ranch bathlara rawn chhuak mek chu Barclay-a kawhhmuh pahin a lu chu a han thle zauh a. 

‘Engatinge Barclay-a hi a lo thleng tihmin hrilh lo a ?’ a rawn ti lauh a.

‘Ka rawn lut fel deuh chiah a ni, Duhtak,’ tiin Barclay-a chuan a lo au let a, a aw atang chuan a thinrim hmelhmang zawng zawng chu a reh nghal vek a.. ‘Ka rawn kal nghal e.’ tih pahin a tawp nan Corral sira pa pahnihte chu tur zetin a han melh leh kawk a, In thleng chuan Sakawr nen a kal phei ta a.

‘A tha e, boruak chu engemaw chenah a rawn tidai ta chu a nia,’ tih pahin Dave-a chu a thaw huai a.

‘Engemaw chenah,’ Sudden-a chuan a lo ti ve sap a. ‘Mahse, Barclay-a hi eng rilru pu chiahin nge helai hmunah a lo kal tih chu ka la hre chak mange. I sakhmel buai nuai kha Slah 8 a lo kalchhan chu a ni lo phawt a’.’

‘A nih leh, nanga sakhmel hre hru kha Slash 8 a lo kal chhan chu a nih teh chuan, tunah ka kalsan nghal dawn che a nia’ tih pahin Dave-a chu a lo nui a.

‘Nia mawle,’ tiin Sudden-a chuan a lo chhang a, ‘Mahse, ka sakhmel chiah lo deuh hi chu I ngaihven thung a lawm. A ni lawm ni ?’ Sudden-a chhaih fiamna avang chuan a thianpa beng leh hmai vel chu a lo sen tan tan a. Dave-a chuan a lukum chuan a rawn vai thuak a, a vai phak loh deuh chiah a lo inthiarfihim pahin, ‘Thil sawi ka nei e law ? ’ Sudden-a chuan a lo ti a.

 ‘Aw— kal la.. Mesa tlangah va lawn daih rawh!’ Dave-a chuan lo tih chhar chhar pahin a hna khawih lai a tang chuan a zuang sawn ta a.