Strikes Back-18

Hanging Rock khua pawh a puak darh ta emaw tih turin mi an tâwt mup mup hle mai a. Vantlang hmaah lilama  Slash 8 hralh tur a nih thu thang vel chu a chhehvel khaw hrang hrang aṭangte pawhin an lo hria a. A khau kapin an rawn kalkhawm mup mup mai a. Slash 8 chu, chulai ram vela Ranch hmunhma nei ṭha ber pawl a ni tih an hre vek a. A changtu nih inbeisei kherlo mah se, a changtheitu chu han hmuh a, lawmpuina leh ngaihsanna han entir ve hrim hrim tum chuan an lo kal khawm a ni. Chu mai bakah, Pat Newman-a hovin, Thunder Mesa a Mine-a hnathawk te ho pawh, nuam chhek turin khuaa an rawn thlen khawm lai a lo ni bawk nen. Sheriff Brady-a hova Saloon vela an han intawksir vel chu an thawm a ṭha hut hut hle mai a. Khawtual mi zahawm deuh deuh ho pawh rawn intarlangin inti tuavawn fe fe a chibai lo sem kual te pawh an lo awm nuk mai bawk a.

Khawtthlera ke a kalna phah chungah te chuan mi chitin veivak an insulpel nuk nuk a. Mingo te, Mexican te, Indian te leh Mine a eirawng bawla an chhawr thin Chinese hmel te chenin hmuh tur an awm nuk nuk a. Diego Saloon-ah chuan Zachary Barclay-a leh a hote pawh Slash 8 neitu awm in an lo awm nghal ngawt a. De Witt-a’n a hmakhua chungchanga thuneihna pumhlum chan tuma ruahmanna a neih te ti sukuk tura a lo beihna te hmeichhe pakhat ve maiin a lo hnial chu a lung a la awi thei lo a. A in hrithla kûk kûk mai a.

Slash 8 lam pawh chhunlai velah lo thlengin, Grace Tate-i chu Hotelah a tlang phei nghal a. Chutah chuan Pi Mulvaney chuan fanu tlanbo lo haw leh lawm tak hian a lo làwm a. Crace Tate-i’n Ranch aṭanga Barclay-a a hnawh hawn dan thuthang te chu lo hre ve in, chuvang tak chuan fanu duat takin a lo duat a ni.  Dave-a leh a thiante chu Dutchy-a Saloon lamah an va intiharh a, chutah chuan Miners ho chuan tlangram paltlanga hlawhtling taka Bawngrual an khalh theih dan te kha la hrerengin, lawmpui nan an lo au dar dar a. 

Judge Pringle-a erawh chu amah chauhin eng engemaw pawipang tiin a thang bo ta rih a. Pat Newman-a chuan Dave-a chu rawn panin, kil khatah chuan a han pawt phei a, ‘Pawisa chu in nei daih ta lo an tih hi a dik em, ka fapa?’

Dave-a chu phur vak lovin a lo bu nghat a. 

‘Puih theihna ka neih tak che u in, Slash 8 Bawng tlema zawng chu ka lo lei leh dawn em niang tih hrilh tumin Green-a hi ka zawng deuh a, Khawiah nge a awm a, ani hi?’

‘Ka hre miah lo,’ Dave-a chuan a lo ti a. ‘Hetah hian hmuh ka lo inbeisei ve deuh a. A rawn lan loh vaih chuan tu tu emaw chu zawhna thin ṭhawng deuh deuh ka zawt ang mawle’ a han ti  chhak a.

Newman-a chu a lo bu nghat a, a kuaite siamthat pah chuan, ‘Buaina in tawh phawt chuan, engthilah pawh pui tur che u in ka mite an awm reng a nia. Kha pa Green-a kha ka ngaina riau mai.’

‘Keini pawn kan ngaina vek mai,’ Gimpy-a lo thleng hlim hlawl chuan a lo ti ve a. ‘Mahse, ka ngaihtuah vak lo, heng laivela mi dukdak lo kan hriat hovin an bawl kual mai mai theih mihring a ni lo tlat, I ti ve lo maw?'

‘I tihsual loh ka beisei’ tih pahin a mitsir chuan Saloon a lo lut mek Zachary Barclay-a chu a han melh a. A hnungah chuan in-la-pawimawh thiam takin Shady Brady-a chu a rawn thaw lut huam huam bawk a. De Witt-a chu a rawn lang zui leh nghal zat a. Dave-a chuan Grace-i lo lan hma chu kawngkhar lam a lo melh reng a, ani pawh, Pi Muvaney-i nen inkuah rialin an lo lut a. Dave-a chu an rawn hmu vat a, hmeichhe pahnihte chuan a awmna lam chu an rawn pan phei ta a.

‘Engtikah nge an ṭan dawn a?’ tiin Grace-i chuan a han zawt a.

‘An ṭan deuh vat ka ring,’ tiin a lo hrilh a. Sheriff Brady-a, bar-a lawn chho mek chu a han thlir pah a. Tuemaw hian ri mur mur chu tih reh tumin dawhkan a lo chhu dap dap a. Ri nuai nuai chu a han ta duak a

‘Ṭhiante u, vawiinah hian Lilamna nei turin kan lo kal khawm a ni,’ tiin Brady-a chuan a han puang a. ‘In lo hre vek tawh maithei a, vawiin hian Bank chuan Slash 8 dahkham rulhna hun chu a khar dawn a, a neitu hmasa chu hmanni lawka boralta, George Tate-a kha a ni a. A neitu aiawh tu turte hetah hian in awm em?’

‘Awm e, ka pu,’ tih pahin Judge Pringle-a chu mipui zing aṭangin a rawn tawlh hma hlek a. Khun khan takin a han kun zauh a, Grace Tate-i chu dawnkan bula ṭhutna an lo remsa chu a han kawhhmuh nghal a.

‘Hei hi dan anga khunkhan taka tih chu a ni chiah lo a’ Brady-a chuan a han tih zawm leh a. ‘He hun kaihruai tur hian, tunah Mr De Witt-a, Hanging Rock Bank President ka sawm e’

Brady-a chhuk mek lai chu tu emaw hian ‘chuti a nih chuan Pathian chu fakin awm rawh se’ a rawn ti lauh a. Chutah, Jasper de Witt-a chu Grace Tate-i leh Judge Pringle-a en chungin a ṭhutna aṭangin a rawn tho chhuak a, mipui hma a hmun thawl lai chu rawn paltlangin Bar lamah chuan a phei a. A han lawn chho va, mipui hmachhawn chuan a ding ta a. Amah taka chu inthlak danglam lem lo mah se, Dave-a chuan a lo hmu danglam deuh huih a. ‘Engemaw tak chu a hmelah khian a lang a ni’ Slash 8 pa chuan a lo ti neuh neuh a. ‘Hnehtu chanchang hmel a pu riauin I hre ve lo maw?’ tiin Gimpy-a chu a han hrilhru sap a.

 ‘A nih chian khi. Barrel chhe hralh takin min hralh a tum a, Chu ai pawh chuan a lawm rilru mahna’ tiin a ṭhianpa chuan a lo chhang a.

‘Kan ṭhian ṭha a ni lo tih a inhrechiang khawp a nih khi,’ tiin Dave-a chu a lo phun leh sap a.

‘Chu chiah,’ Ben Dobbs-a chuan a lo ti ve bauh a.

‘Pute u, eh.. nula te pawh’ tiin De Witt-a chuan a thusawi chu a han ṭan a. Chutia a rawn ti kher chu Grace Tate-i leh nuthlawi Mulvaney-i te chuan an lo ei lo ngang mai a. ‘In hriat tawh vek angin Bank chu hmanni lawk khan rawk a ni a. Kan Insurance chuan kan hloh hi a phuhru pha si lova, chumi a lo nih takah chuan loh theih lohin Bank-a leiba tang awmchhun te chu kan ṭhin a ṭul ta a ni. Keimah tak hi chuan.....’ tih pahin a han khuh kharh a. ‘Ka tih theih ang ang chuan hma ka han la ve nain, Bank kalzelna atan a tawk zo ta lo a. Chuvangin, hreh tak chungin Slash 8 dahkham pawh ṭhin a lo ngai ta a ni. Ranch an dahkham an rulhna hun awm tawk pawh pek an ni a. An rulh theih tak lohvah chuan vantlang hmaah lilam tura tih a lo ni ta a ni.  Kan ṭan tak tak hmain Sheriff Brady-a khan Ranch chanchin kimchang, an ramri te, an bungraw hlutna leh thildang neuh neuh ziahna lehkha them a lo sem ang che u ang a’ a han ti a. Brady-a chu a kuta lehkha them kengin a lo phusa vat vat a.. ‘Tunah hian Slash 8 lilamna chu ṭan mai ka rawt ang a. Chumi hma chuan Miss Tate-i hi thil ka han zawt hmasa phawt teh ang’

‘Inba rulhna tur sumpui chu in tuak chhuak thei ta em?’

Grace-i chuan ṭawng lovin a lu a lo thing ringawt a. Judge Pringle chu a bulah kun deuhin a lo thu bawk a.

‘A tha lutuk,’ De Witt-a chuan a han ti a. ‘Leiba rulh loh chu dollar singthum a nia. Chumi zat chuan kan chhang tan mai ang a’

Mipui kalkhawm te chu an lo thaw dep dep a. Dollar singthum chu tam hle mah se, kalkhawmte chuan Slash 8 hlutna tak tak chu in dinglai tello pawhin chumi let nga vel zet chu a nih ngei an ring a ni.

‘Dollar singthum ka tih chu kan hre chiang maw?’ tiin De Witt-a chu a han au lauh a. 

A han reh vang vang a. Mipui dinna sirkhatah chuan an han che deuh laih a, tu emaw hian hmalama rawn chhuah tumin a rawn keu kaw sawt sawt a. Barclay-a a lo ni a. Grace Tate-i thutna dawhkan lamah chuan pheiin, a han kun a, a hrilhru sup a.

‘I inngaihtuah ṭha leh lovang maw?’

Grace-i chuan a lu lo thingin, ‘Ranch hloh hi ka thlang zawk e’ a lo ti vawt raih a. 

Barclay-a hmai chu thinrimna avangin a lo thim khuih a, Dave-a chu nam sawn rawk pahin a han ding vung vung a. ‘Dollar singthum chuan ka chhang e’

‘Box B a mi Mr. Barclay chuan dollar singthumin a chhang e,’ De Witt-a chuan a han ti lauh a.

‘I aia sang a chhang tur kan hria em?’ 

Muangchanga a ṭhutna aṭanga Judge Pringle-a a rawn dinchhuah lai chuan De Witt-a chu a lo meng deuh kawk a. ‘I chhang ve duh em ni ka pu?’

‘Duh love,’ Pringle-a chuan a lo ti tawi tak a. ‘He lemchan nawi tak lak aṭang hian I zahawmna hming chhalin inhnuhdawhna hun remchang ka pe duh che a ni. Mipui vantlang mithmuha dah hniam che hi ka duhlo a ni..’

A lo thlirtute chu mak tiin an phun sup sup a. He putar rawn tihdan chu enge maw a awmzia le ? An hrechhuak har lo kher mai lehnghal!!

‘Inhnuhdawh a?’ De Witt-a awki chu a fiak thak a. Hlauthawng takin a meng kual ta a.

‘Enge I sawi awmzia?'

‘Mr. De Witt, he thil min tihluih tir ta hi pawi ka ti khawp mai. I hria a. Ka hria tih pawh I hrechiang hle a ni. Dahkhamna lehkha I tarlan kha pawisak nei miah lova tihdanglam a nih kha!’

Thil thleng tur awm ang hriat zel chakna authawm a lo chhuak huk a. Chiang leh zuala chu Banker hmel hmuh tum chuan mipui ho chu an rawn hnai huang huang a. Chu hekna thinṭhawng tak chu engtin nge chhanlet a nih dawn tih an lo thlir ṭhup a.  

De Witt-a hmel chu a lo dang var pap a. Kut khur ngar ngar hian Pringle-a chu a rawn kawk a. ‘Nang – nang hian I thil sawi kha I hre lo, ka..’

‘Engmaw I tih ang, Mr. De Witt?’ tiin Pringle-a chuan vawt raihin a lo zawt let a. ‘Engmah I ti phiangsen lo vang e a. Heta hi ka nei e’ tih pah chuan Lehkha ip a kenlai chu a han hawng a. ‘Dan ang taka chhinchhiah thlap, nang leh George Tate-a hming ziah hnan, dahkham chungchanga inremna lehkha chu. A hun leh ni inziak chu a thih hma thla khat kha a ni a. He lehkha a sum inrawlh chu dollar singkhat leh sangnga a ni. Hemi chungchangah hian enge sawi tur I neih?’

Tun ṭumah chuan thinrim authawm dik takin pindan chhung chu a luahkhat ta. A lo thlirtu hnaivai deuh berte chuan chu dan bawhchiatna lehkha chu an rawn phih thla a. Midangte chuan rawn hmuh ve tumin an la rawn nek luih luih mai bawk a. Brady-a chuan a puakruk kawm chu a lo chu ri ve dup dup a. A sawt lem hlei lova. Engemaw chen hnuah chuan Judge chu a rawn tawng chhuak leh a. Chutah, mipui thinrim rawl pawh chu a han duak a.  Chu Banker hmusitawm tak hnena a sawi leh tur ngaichang chuan an lo insum hram hram a.

‘De Witt, nangma hlawkna tur ngaihtuah ranin he lehkha hi I khawih danglam a ni. Pakhat hi pali a thlak turin vawi khat pena thai zeuh hi a tawk em em a. Tin, he thil hi Slash 8 Ranch neih chak em em mihring awmchhun, Zachary Barclay-a hlawkna turin I ti bawk tih hi ka sawi duh leh nghal e,'

De Witt-a chu hmusit em emin bar ngheng chuan an nem bet rawk rawk a. Zahzelah kut chuan a kawr nghawng chu a zut a zut ringawt a. Chutah, ‘Tihngaihna ka hrelo a ni,’ tiin a rawn chiau ta chul a. ‘Min tihtir a ni. Barclay-a’n min tihtir a ni!’ A ngaihna hrelo leh chutiangin thil a kal ang tih hre lawk lova lo hawihai reng,  Box B pa chu a kut chuan a rawn kawk ta a.

‘Ka hrilh ang che u, Barclay-a tih vek a ni,’ De Witt-a chuan a ti tuar tuar a. ‘Min vau a, min tawrhtir turin a silai kapthiam chhawr Linkham-a a rawn tir a. Bank pawh kha a rawk a ni. A…’

Mipui chu an nghing leh dual a, mengrum elkhen chunga Barclay-a pantu mipuite chu thinrimin an sahawk ta.. Barclay-a chuan De Witt-a puhna te chu a ngaihtuah vung vung a. Chutah, mipui ho an va thlen phei hma chuan chhechhamin a han rum nghut a, a lo pen chhuak a, De Witt-a chu a han hmachhawn ta a.

‘Nang dawthei, a ruka thu veivir tawn kual thiam pa!’ a han ti sup a. ‘Min lo bum kual mai mai a ni maw. Ka’n —’ tih pah chuan a kawng lamah chuan a kut chu a han vai thla a.

Laiking biru ang maiin Banker pa kut chu a bibo zeuh a, second khat pawh tlinglovah a kawrchung inthlep kar atang chuan Laite (Derringer) hlauhawm tak chu rawn lek chhuakin, ring vak lovin a puak nghal thak a. Barclay-a chu a hnung lamah tawlh dawrh a. Silaimu chuan a thinhnun takah dengin, leiah chuan thingtum paih ang maiin a let hlawm ta reng mai a.

A vawi thumna atan, Miner engemaw zat chuan an va bawr huk a. De Witt-a chu a ralthuamte chu an va chhuh sak nghal a. Ani chu chhete pawhin a lo ṭang lova. An dawm laih laih lai chuan tal buai lovin Zachary Barclay-a ruang chunga thingthi mek, Sheriff Brady-a chu  lo thlir ve reng ringawt a.

‘Sangha rep ang maiin a thi chiang e,’ a rawn ti chhuak lauh a. A rawn ding chhuak a,  a khupa bawlhhlawh kaite benfai pah chuan, ‘Mr. De Witt, kha thil kha I ti tur a ni lo a sin’ a han ti charh charh a. ‘Barclay-a hi a felfai lo a nih chuan a chungchang rel turin hren tur a ni a sin.’

‘Thil thleng kha I hmu ve reng a lawm!’ De Witt-a chuan a lo ti vat a. ‘Ka chet loh chuan ka dinna ah khan min that nghal dawn a sin. Mahni inven nan ka kap a nih kha!’

A lo thlirtu mipuite aṭang chuan awm tihpuina thawm a rawn ri chhuak tluar tluar a. Mipui ngaihdan ang ang zawm ve nghal zat zel ṭhin Brady-a chuan chu Banker pa a vawnna kut chu a han lasawn a. A tih anga ti ve tur chuan miner ho pawh chu a han mitmei nghal a. De Witt-a chu a han hawi kual a. Judge Pringle-a chu a lo la ding reng a…

‘Sheriff,’ a han ti a. ‘Mr. De Witt-a hian Barclay-a Bank rawk thu te, thil diklo ti tura a tihluih thu te leh eng engemaw kha a sawi ta luam a. Barclay-a kan dawp theih tak lohah chuan Mr. De Witt-a hi thil tlem a zawng zawhfiahna hun remchang neih ka va han duh em’

De Witt-a chuan a rilruin chu dan hremi putar chu anchhia a lo lawh mawlh mawlh a.  Mahse, a rilru erawh a vaivir kual zung zung thung a. 'Barclay-a dah kian a lo nih takah chuan Linkham-a chu a thu thu a thil ti tur a ni mai a. Parr-a pawh a thi tawh ngei ang a. Midang chu pawisa hmanga thunun theih vek an ni tawh dawn a. Thawnthu a phuahchawp thiam chuan tumahin an hnial thei dawn lo a ni. Slash 8 chu tuna tan chuan hloh rih mah se, hun a la tam a lawm. Nula pawh hi thah leh nghal ngei ngei tur a ni anga. Mahse, Linkham-a hi……' a suangtuahna tuihnai lo tak atang chuan a dinhmun mekah chuan lo kir lehin, hmusitawm takin a ding kawi ṭang mai a. 

‘In hmuh ang khan Barclay a vek hi a ni a bul tumtu chu,’ tiin a han hrilh leh hlawm a. ‘He phairuam hi neih vektumin chhia a chham a. Chutah, George Tate-a’n a lo dodal khan, a hmun a hralh theih nan eng hmanrua pawh han a tum ta a ni.'

‘Chungte chu engtin nge I hriat vek theih a?’ tiin Pringle-a chuan pangngai takin a lo zawt a.

‘A thuhnuaia kun ka ni tih a hriat hnuah khan Barclay-a’n min hrilh a lawm. Hei hi a tirah chuan ka hre mai bik lova. Barclay-a hi min dawrtu (Customer) tha ber angin ka lo cheibawl thin a. Chu chu a nih dan tak pawh a ni thin a. Aw.. a chungchang sawi hi chuan, duhamna leh itsikna a khat mi a ni tih hi ka sawi duh a. Ka hriat dan chuan mi hlawhtling tak a ni a, mi hlawhtling te hi chuan itsikna hi an nei chawk a nia. Khang Rancher-te thah an nihna ah pawh khan inrawlhna a nei ang tih pawh hi rin a harsa thin.

‘Mahse, I ngaihdan thlak thei thil a lo thleng ta a maw?'

‘Aw.. aw ni e. Bank rawk hma karkhat velah khan a nia. Barclay-a chu vawikhat tlai deuh tawhah hian a lo kal a – thil chhutbuai hian ka khawtlai fo thin a. Ka lo luhtir a. Mak deuh maiin a che ta a. Puanzar te zar thim vek a, turkverh leh kawngkharte pawh kalh vek turin min ti ta a. Chutia ka tih hnu chuan he sweetwater phairuam nei tura ka theihtawp ka chhuahpui chuan ka vanneih viau tur thu leh a hausakna te pawh min sem ve a tum thu a sawi a. Ka hrethiamlo ang reng khawp mai a. Bank a rawk dawn thu leh chutah chuan ka tanpui tur thu a sawi ta a. George Tate-a chu tihchhiat emaw thah emaw  a pawisak loh thu te a sawi a. Ka nuih ringawt a. A fiamthu emaw te ka ti a. Chutah tak chuan ka tisual tih ka hre ta a. Min khawih ta bawrh bawrh a. Whip (Sakawr vuakna savuna siam hruihrual – MH) a nei a. Chu chuan min hlap ta hrep mai a.’ De Witt-a chu a han chawl zawk a. 

A reh tak ngawih ngawih danah chuan a lo ngaithla tute chuan an ngaihven hle a ni tih a hria a. An mawlzia chu  a rukin a nuihzat hle a. 

‘A tawpah chuan, lehkha pakhat hi min ziah luihtir a. Chutah chuan pawisa khelhna atan Bank pawisa dollar singhnih ka chheprelh thu a chuang a. Chu chu ka tih loh chuan lehkha chu min ruaitute hnenah a pek tur thu leh ka nu leh pa tar tawh takte chungah pawh nunrawn a chhuah hle tur thu min hrilh ta a. Pute u, chu chu ka tih tir theilo a ni. Thuthang an hriat ringawt pawhin ka nu leh pate chu an thi thei hial ang.’ A thusawiin nghawng a neih dan chu ngaichangin a han chawl hlek a. A han melh kual zawk a, an lo meng hnuai raih hlawm tih a hmuh chuan a lo ngaithla tute chuan an khawngaih hle a ni tih a lang mai a. 

‘Mi a ho! Hnuk no hlawm si, ka la hlawhtling dawn khawp e. Rukrukna kha chu Miss Tate-i dahkham thin chhuahna tur mai mai a ni lek sia’ hmusit leh diriam takin a rilru chuan a ti pah mawlh mawlh a. 

Chutah a sawi chhunzawm zel a, ‘Ranrual an hralh chuan Miss Tate-i’n Bank a an dahkham chu a rul thei dawn tih a hriat avangin Barclay-a chuan ranrual pawh ruk a tum ta zel a. Mahse, Slash 8 Foreman Green-a chuan a thiltum chu a lo ti sukuk thei hlauh a. Chutah chiah chuan Loan rulhna hun remchang nei thei lo turin Lehkha chu siam danglam turin tihluihnain min nawr leh ta a. Loan pawh hi thin a tul miah lo. Khawchhak lam atangin chhawmdawlna a rawn thleng reng tawh a ni.’

Box B pa thi ta thiltih dikloh finfiahna hrang hrangte an han hriat chuan mipui ho pawh chu an phun mur mur a. De Witt-a chuan a han enkual a. ‘A duh ang tih zel emaw chhungkua a tlak chhiat vek emaw mai loh chu duhthlan tur reng ka neilo a ni. Min la thah tho tho hi ka ring tlat a. Mahse, pa awm nem te mah ni ila, a hlawhtling vek kher hian ka ring bik lo. Ka that ta mial mai kha ka lawm a. A thi ta hi tihzia ka ti tak tak a ni.!’  

A sawi chhuah dan vel chu a lungrunin, a thlep kual vel thiam bawk a, tihtak zeta a han sawi takah phei chuan a tawng tawp lamah chuan, ‘I tiṭha kher mai Banker!’ tia auvin thlirtu thenkhat chu amah thlawp takin an lo tawngchhuak ve ta hial a.

 Judge Pringle-a awri chuan an titi chu a rawn pawt chat leh ta a. ‘Engvangin nge heng zawng zawng hi Sheriff Brady-a I hrilh loh? Tin, In Head Office lam pawh engati bge I biak pawh loh?’

‘Mahse, Barclay-a fin kherek zia in hre lo a nih hi’ tiin De Witt-a chu a rawn te chhuak leh a. ‘Engkimah a inphamar zung zung thei vek a lawm. A chungchang pholang tur hian engmah finfiahna ka nei lo. Lehkha te chu ka kut ngeia tihdanglam a ni a. Barclay-a hmehbel theih silovin ka che tlat si a. Dollar singhnih batna lehkha a rawn neih mai theih dan te kha…tunge rin ngaihna hria ang le? Ka tlachhe vek a ni mai, Pute u. Tumah hian min ring chuang lovang.’

Hei hi a sawi luh tumna tak chu a ni ta a ni. De Witt-a chuan mipuite atanga pawmpuina leh hriatthiamna rawn awm ṭan ta chu a hai lo hle mai a. Grace Tate-I lam chu a han hawi a. ‘Miss Tate, thil kal tawh zawng zawng avang leh rilru hah taka I lo awm tawhna avang khan pawi ka ti a, I Ranch chu leiba zawng zawng lakah a fihlim ta tih ka hrilh duh che a. Hlauhawm zawng zawng nen.. I han ti nghe nghe teh ang.’ a han ti a.

Grace Tate-i chu a rilru zawng zawng nen a hmin ta khawp mai a. A kut chu chibai turin a han phar chhuak a. Mahse, Judge chuan lo chelh khawtlaiin, amah zawk chuan Banker kut chu a lo vuan ta zawk a. Grace-i chuan ‘Bul I tan thar leh teh ang u’ a han ti a. A hmel mawi tak chu hlimna avangin a lo eng chhuak a. Slash 8 pawh tunah chuan ata diktak a lo ni ta tiin a han inngaihtuah a. A mitmeng se sar sar chu Dave-a mitmeng nen a han intawk sak a.

Chutih lai tak chuan Judge chuan a thutthleng chu a han pawt tawlh deuh a, a lo ding chhuak leh ta a. Khawpui ri ang maia thum dat hian, ‘Mr. De Witt, zawhna thenkhat chhanloh a la awm tlat!’ a rawn ti leh ta ṭhak a. Banker pa in a insawifiahna te, titi phungleng pangngai mai mai a tihtawp chhoh a lo tum mek lai chu a tawp chawt a.

 ‘Barclay-a’n a kaihhruai nia I sawi Misual pawl chungchang pawh kha I la sawi lo reng reng. Tute nge an nih a? Khawiah nge Bank atanga pawisa an ruk chu an dah?’

De Witt-a chu a han hawi kual a, chik tak leh nelawm lemloh taka lo en tu ho hmel chu mipuite zingah chuan a hmu leh ta nual mai le. A rilru chhungril chuan a nerkhum nasa mai a, ‘Beram rual mai mai an nih hi. Linkham-a lah a ṭawng awm teuh mai si lova’ a ti rilru a. Heng mi mawlho lakah hi chuan chungnung tak niin rul anga fingah a inngai a. Chutah tak chuan a tisual ve ta tlat mai le…

‘Anmahni chungchang chu hriat ka nei lo reng reng,’ tiin Pringle-a chu a han hrilh a. ‘Kan hre tawh ngailo maithei a ni.’

A hnu second khat kar dan maiah chuan a aw hriat fo thin chuan, hmusit tak leh vawt raih maia chu pindan khawk rum rum khawp a, ‘Dawthei pa’ a rawn tih takah chuan, hlauhna chuan a rawn tham ta er er mai a. De Witt-a chuan insehruh teuh chungin kawngka lam chu  a han en a. Vawt raih maia then nang chungin Slash 8 Foreman chu a lo ding reng tawh mai a.